دور أبنـاء السـودان فى دول المهجـر
لا يجـاد حلول للأزمــة السـودانية
[email protected] سعيد عبدالله سعيد شاهين
كندا تورنتو
تلاحظ لى وبكل أسف امتلاء المساحات المتاحه على الشبكة العنكبوتيه بكتابات تدور أغلبها فى ردود فعل لأعمال الحكومه ولائية كانت أم اتحاديه ، وكأنما المهمه الأساسيه هى تصيد الأخطاء رغم أنها لاتخفى على فاقد السمع والبصر. وتمحور الأمر فى النهاية فى قضايا التحول الديمقراطى والمطالبة بتعديل القوانين المقيده للحريات ،قانون الصحافة ، قانون الأمن ..الخ ثم أخيرا دارفور.قد كان العشم فى مولد التجمع الوطنى الذى وجد دعما وصل حد( تسليمه) مقر السفارة السودانيه بأريتريا وامتلأت شرايينه بعملات عدة من دول مختلفه خلاف امتيازات أخرى وتدرج نضاله الى قمته فى الاجتثاث من الجذور ثم الانتفاضه المحميه ثم ثم ثم وصل الأمر الوصول( لميس) الجلوس على شاطىء النيل فى المجلس الوطنى والتمتع بكافة الامتيازات الماديه والعينيه والادبيه والاجتماعيه( وبس) ولا يكلف الله نفسا الا وسعها ، مسكين هذا الشعب يلقاها من ناس المؤتمر بقسميه ولا من ناس التجمع لذلك اعتقد ان أقوى موقف وقفه الشعب المعلم هو أن يشوف( نهايتا شنو) كما يقول أخونا سعدالدين ابراهيم (ملكيه فكريه) .
ناس المؤتمر( بشقيه) عملوا العايزينو من( انت للكدا وأنا لكدا) مرورا بالقوانين و(الظهر والدساتير) الماعجب ناس التجمع والمتجمعين الآخرين طيب السؤال المحير البعض ان( كان) هناك ما يحير بعد العمايل دى كلها ماذا فعل ناس التجمع وبقية العقد الفريد من الأحزاب ومنظمات المجتمع المدنى وبالمناسبه كل (مجموعة) عندها منظمات مجتمع مدنى وكل بما لديه فرحون نرجع للسؤال ناس الأحزاب والتجمع والمعاهم لماذا وحتى تاريخه لم( يبرزوا) لنا مواهبهم فى صياغة دستور وقوانين جنائيه ومدنيه وأحوال شخصيه وأى قوانين أخرى تحل محل القوانين الحالية يعنى المؤتمر الجامع ولا أى اسم آخر ما ممكن يعقد ولو (على الهواء مباشرة) فى شكل حوارات عبر الأنترت للوصول لصيغة يتفق عليها الجميع عشان لما يجى زى ملتقى أهل السودان يقصروا الحجه ويقولوا هذا( ما عندنا) موضوع جاهز متفق عليه فى كيف تحل مشكلة السودان كدا بتكون فى جديه وهنا الشعب السودانى بيحدد موقفه صاح يعنى ياأهل المروة الزموا الجابره وابدوا بجديه وأخيرا نأتى الى مسابقة الحلقة لماذا تم اغتيال الأنتفاضه ؟؟؟
الجــــــــــــــائـــــــــــــــــــزه
كرسى الرئــاسه محـل ما قـالوا لسعـادتـو أمــــــــــشى
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة