ثقـــــالات سيد ثقـــــالة
شعاركم بالي مقطع ...والعالم يشهد ويسمع
كيف ناكل مما نزرع؟...وكيف نلبس مما نصنع؟
والارض النزرع فيها...ساكن في ترابا المدفع
والمصنع قفلتوه...ووزيركم باع المصنع
***
اثقل علينا اعلام المؤتمر الوطني ممثلا في التلفزيون القومي وقناة الشروق
بالتقارير المصورة
اثناء عملية الاستفتاء في جنوبى السودان عن انجازات الحكومة في الجنوب
من مستشفيات وكباري ومدارس ومحطات مياه وغيرها من البنى التحتية
لهولاء اقول انه استحقاق مااغترفت يداكم فمن الذي دمر الجنوب؟
انت من دمرتموه وعليكم وحدكم تقع مسؤلية اعماره
انفقت الحكومة المليارات في تدمير الجنوب ايام الحرب لا يساوي عشر ما انفقوة في تاسيس تلكم المنشئآت
( YOU Broke it, YOU Fix It)بالله عليكم ...لا تمنو علينا انجازاتكم ف
وجهة نظر
الجنوبيون لهم الحق في السودان الشمالي حتي بعد الانفصال فهم مواطنون سودانيون بالميلاد ولو ما مصدقين راجعو قانون الجنسية المزدوجة
انا دة هسي عندي جنسية كندية هل دة بيعني تجريدي من جنسيتي السودانية والتي اكتسبتها بالميلاد وهل سيمنع هذا من احقيتي في تولى مناصب دستورية او في السلك القضائي او في الجيش والشرطة (لا قدر الله)؟؟؟ كضبا كاضب وساظل سوداني كما سيظل اخوتي في الجنوب سودانيين لهم ماللسودانين في الشمال وعليهم ماعليهم
بعض الجلابة الحاقدين يستخسرون حتي الفرحة لابن الجنوب وعاملين فيها هم (الافرح ) لانفصال الجنوبين عنهم هم وانو الجنوبيين وبانفصلهم سيرتاح منهم السودان الشمالي الكلام دة كان ممكن يكون صاح لو بادرتوا بيهو انتو
فالمعروف انو حكومتكم وقعت اتفاقية نيفاشا عن انف وهي صاغرة
جون قرنق هو المنتصر ياجدعااااان والبقول غير كدة يمشي يقول كلامه دة لي (زول ماعنده حديدة) لانو ما ممكن تكون الحكومة منتصرة في الحرب وتجي امريكا تلوي دراعها
اظرف حاجة تصريح المسؤل الرفيع في الحكومة عن سياسة امريكا مع السودان قال
زمان كان الامريكان شغالين معانا بسياسة العصاية والجزرة...اليومين ديل جزرة زاتو مافي" او كما قال
الملاحظ للهجة البشير وابوالعفين اليومين ديل خلوها من نبرات التهديد والوعيد وصارت من شاكلة "والله الشعب كن قال مادايرنا ...انحنا برانا بنمرق ليهو برة يفلقنا بالحجار وشنو شنو كدة ما عارف" بالله؟ ياخي انت جيت بي دبابة شعب شنو البتتكلم عنو؟واوعى تصدق قصة انتخاباتكم المخجوجة دي ...حزبك دة شعبية حزب البهجة والمسرة اكتر منو؟ المؤتمر الوطني دة اتاسس متين لمن يعمل ليهو شعب يدورو ولا ما يدورو؟ اتاسس كيف ؟ مش اتاسس وهو حزب حاكم...نعرف كيف انو المواطنين ديل اختاروه رغبة وليس رهبة؟ طيب انت وكت واثق من شعبيتك قدر دة "بتخج" مالك؟ الحنك العاضي بتاع استدرار عطف الشارع السوداني دة مابحلك ولا "بقسم" معانا ومنطق العوير دقو واعتزرلو برضو ماوارد هنا لاننا بنتكلم عن الاف الارواح التى اهدرت في الجنوب والشمال والشرق وبصفة خاصة دارفور...
موقف الصادق المهدي وبقية القوة المعارضة كان متوقع ولو تذكروا حديثي في المقال السابق عن الرهان المعقود علي الشارع ...والشارع فقط وبواسطة...الثالوث هم من سيدفعوا بنا الي الشارع .
..الجوع... والفقر... والمرض... وليس الصادق... والترابي... ونقد
محمد مكي
الثلاثاء 25ياناير 2011
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة