يعني ايه يا ناس وطن
أشرحولي و علموني _ جادلوني و أقنعوني
إني بس عندي وطن _ إني بس إنسان أصلا ً
يعني أ يه يا ناس وطن
لما تبكي بدموعك ******* لما تحكي عن همومك ؟
او تطالب بحقوقك ******* او تجادل في خصومك ؟
تلقى بس بذرة جدودك ******* من صغارك لجدودك
هم بطالة على حدودك
هم رقاد تحت جسورك
و كمان اطراف سدودك
او كمان بعاد هناك
خلف أسوار الاشلاك
و بيوتات الاملاك
بسياط من الهلاك
و عيون من البلاك
يرضوا يقولو القرد ملاك
بس بقولوا لانو داك
من كبار ناس هناك
البأمروا بالضرب هناك
البشربوا من كاس شقاك
يا ناس قرد يبقى ملاك ؟
*******
ويبقى ايه يا ناس وطن ؟
لما تشكي من الظما و تمشي نيلو بيغرقك
لما تشكي من الهوس و تمشي طبيبو يهجرك
لما تجبر للفلس و تلقى بنوكو تهاجمك
لما تفطر بالعدس و بكره فولو تعطشك
لما ظالم تكون راس تلقى شعب يساندك
*******
يعني ايه يا ناس وطن
*******
لم الطفل ينوم هناك في حضن الطين و الحجر
لما المدارس تطردك لانك ما عندك صفر
لما الجوامع قفلت لأن الشيخ إسمو خضر
وجامعات طيشت ذكي البداوة و الحضر
وين ديل من ناس نمر البكره ح يزوروا القمر
*******
أقنعوني بالوطن
لما اليمين ينوم في قصر من الزهر
و الشمال حارس حكايتو في الجمر
لما الجنوب ينعم حياتو بالمطر
والغرب تحمينا من كل الخطر
و الشرق تخبز تجينا بالكسر
و الشمال يزرع في اولاد الخمر
لمن فلان يجدع الناس بالتمر
وفلاني هناك بيتو من رصة حجر
لمن فلان تكييف عام كل الحجر
وفلاني هناك غرفتو من الشجر
ما فيهو غير جيشا ً فار وكوم حفر
لمن فلان يركب حديد موديل جديد
وفلاني هناك يلملم في اطراف حديد
يجمعوا لليوم الشديد
يقابل بيهو حياة العيد
يخضر بيهو بؤرة جديدة
*******
*******
يعني ايه يا ناس وطن
*******
داك إمام وشيخ كبير
عارف كمان علوم تفسير
وبارع جد في التحضير
جدعوه جوة في الحظير
يطارد في غنم و حمير
لكن داك زول تنظير
و بارع جد في التزوير
طبعا اكيد في التبزير
مهارة كذب وخبرة كمان سنين تبرير
قدر يقنع واحد عوير
جابوه جوة بالتكبير
مع إنو كان زول ً سكير
لاعارف دمار لا تخسير
و كمان ادوه شؤون تسيير
درهم واحد عندو كتير
لزول مسكين و كمان ضرير
في ايدو جدام ورجلو كسير
طعامو بواقي و لو يسير
فارش كرتون ما عنو سرير
عيونو بتدمع من السعير
لا حجة لا تبرير _ ياخي حرام يا ناس وزير
لا حجة لا تبرير
*******
*******
يعني ايه يا ناس وطن
لمن تفدي في سبيلو ما يلقى لروحك كفن
لمن تشتل و كل شتلة ما ينتج غير الجبن
لمن تزع في الزهور تحصد الشوك لا الثمن
لمن بذرة حلوة صغيرة بس تكبر تبقى عفن
لمن كل الناس تغي بالحان من الشجن
لما الكل يزرع سويا يحصدوا أهل المدن
لمن تنسى سباب امس لانها قبل الحضن
وتسمع بكره ناس تكرر نفس الفاظ الخون
دم الاحرار يندفن ؟
صوت الثوار يتلحن ؟
و شيخ الابرار للسجن ؟
منتهى الامر يحن - -- منتهى الامر يحن
*******
يعنى ايه ياناس وطن
*******
لما تعمل لحمايتو وهو قاصد يعدمك
لمن تدرس في علومو و داك قاصد يحرمك
لمن تزرع لاخضرارو وداك يحرق يعكسك
لمن تسهر لحمايتو و صبح بكره يخزلك
لمن تخدم في شؤونو وهو رافض يخدمك
أ يـــــــــــــــه مكسبك
لمن تبكي بدموعك ******* و انت توسد كل همومك
المرض قدام عيونك ******* والطبيب مشغول ب دونك
الدواء مرصوص هناك ******* بس كمان دايرين قروشك
القمل مليان سريرك ******* و كمان اوساخ هدومك
لمن تنوح من الم ******* يمشى طبيبو يغادرك
وتبقى يوم براك هناك ******* إلا القمل تسامرك
تشكي شين و حاسي شين و من متين ده مافي زول بيخابرك
يـــــــــــــــعنى أيــــــــــه يا ناس وطن
*******
لما تحكي عن همومك
و الجموع قدام عيونك
كل زول يضحك يشوفك
إنك بس ميت ضميرك
يــــــــبقى أيــــــه يا ناس مصيرك
خلوني امش بعيد هناك
افتش القى غير ذاك
اعيش مع اخر غير سواك
خليني اترك ليك براك
كل التراب و الافلاك
امشي بعيد من هواك
تشموا براك و هم معاك
تتانسوا و تسامروا
تتكاتفوا و تتامروا
بس ما تقولو تجاهرو
او تلقى قربو تصاهرو
لانو براك يا هلاك ---- لأنو براك يا هلاك
*******
ولو تطالب بحقوقك
يبقى بكره بس مصيرك ******* معروف بجد ما اشيرك
لا أنيس لا زول يجيرك
لا سمر ولا سميرك
بس بعيد انت و نصيرك
لا قلم و لا نصيرك
و يبقى شافع هو المديرك
يعمل بيك افعال عويرك
يوم سياط و يوم حسيرك
يوم كلاب ويوم خنزيرك
يطلق عنان و صرخات تحزيرك
من الكلام في يومصيرك
يعني ايه يا الناس وطن
لمن تجادل فى خصومك
او تحكي عن اعمال عدوك
تبلغ الشعب الحزين بيوم قدومك
وياما لو قلت الحقيقة
او كسرت من سجون الظلم بس قطعة حديدة
او تداركت المعاني و قلت شعرا ً او قصيدة
او تغشك المساحة تبدا تخترع الجديدة
ديـــــــــــــــل خصومــــــــــــــــــك
*******
بكره كبلوا قيد وجودك
وحرموا ناس من خدودك
وعيال صغار من ودودك
وهرم كبير من كل جودك
وشباب اصيل يحتاج لقولك
حرموا تلميذ من دروسك
حرموا جيش من يقودك
حرموا الخير من يسودك
و يبقى ايه يا ناس مصيرك
*******
لمن تشكي من الظما *** يبارح نيلو مسارحك
لمن تنوح من الم *** يمشى طبيبو يغادرك
لمن تبقى براك حزين*** مافي عزيز بيشاطرك
لمن تشكى من الظلم *** تلقى عديلو مظالمك
لمن تحكي عن الفساد *** تلقى كبيرو مسفاسدك
لمن تمشى مزارعك
وكمان برضو مشاتلك
تلقى الظروف محاصرك
وكمان فى زول بيطاردك
( دمغة – ضريبة)
(تحصيل_ مصيبة )
******
تمسح دموع تمشي الوزير
وكمان مرات للبعرفك
برضوا بدل ما يحاورك
يلعن كلامك و يشاجرك
و يبقى ايه يا ناس وطن
لمن ترفع في راياتو و مابقدر عشمك
لمن تسهر ليل عشانو و بكره يصبح يغدرك
لمن اليوم تحرر ارضو و ناس غريبة تحكمك
باشا بيه هو الرئيس
لما ولدت......... هو الرئيس
لمن كبرت ............هو الرئيس
لما حفظت .................هو الرئيس
حتى نسيت ................... هو الرئيس
لما خلقت .......................... هو الرئيس
حتى دفنت ............................. هو الرئيس
في البداية .........؟
وفي النهاية ...........؟
أيـــــــــــــــــــــــــــــــــــــــــه مكسبك ؟؟؟؟؟؟؟؟؟؟
أحسن تنهى ليهو حكايتكو
وتقرر انت في مصيرك
خلى دولة رب يديرك
******
******
نجم الدين جميل الله
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
