عصفور يا وطن 

د.امال حسان فضل الله 

ان اربر ميتشجان

عصفور في اليد 

 يا الف طاير

يا محنن بالطمي  

يا مضرضر بالغبار 

وينو ليلك و البشاير

يا نخل لريد قديم 

غرقت مراكبك في خطاي 

و انكسر قلب الاديم 

 وعثاء  سفر

  طليت عليك شبهتني

يا صحرا ٠٠٠يا غابه  وجبل

فكتوريا سرقت حصتي

انتحلت اسمي

سلبت جسمي   

عملت منو ستيانات

مسخت لوني 

الا سمر واجمل

كريم بالمنقه و بالبشمل

صابون بالجوز و بالكرمل

عطور بالموز  وبالباباي

ويبس صوانينا العدم

شوربه ملح- مرقه جداد

اغاني بن  وحجاوي شاي

وفي عيونك شفت همي الشالني منك وجابني ليك

حقة صعوط مرميه في نص الرصيف

زادا الملل

وعممنا لابساها الامم

وعرايا قشينا الدرب

وتيابنا غاسلاها الدما 

اعلام  ترفرف  للحرب

مقتول ومصلوب في الجنوب

جمجمه قامت في الغرب

مكسر مهجر في الشمال

جيعان وعطشان في الشرق

و يا ساري فوق رمضه و حجر  

خليني اسمع نبرتك

اديني من قممك صخور

 تمتد زي نيلك  تطول

تقفل منابع علتك

اعجنا طين بين كفتيك

رجعنا اطفال زي زمان

"والعسكر واقف طابور"

بنيه من قلبك تشب

تغزل خيوط رحطك سهول 

وترجع الفوج  النزح

وترجح الكيل  الطفح

وتنضم عقود محلك حقول

يا مبشر بالغني

يا مهدد بالنحول

يا مبطن بالغرق

يا ملفح بالامل

يامؤرق بالهموم

خليني في حضنك انوم

خليني اتونس معاك

خليني اسمع ضحكتك

يامدثر بالغياب

تقراني في صفحه كتاب

تلقاني في لمة صحاب

نشابي لفجرك نجوم

يامدردر بالسفر 

يامدخن بالهشاب

يامدلك  با لندي

يامحوط بالتخوم

اديني من ريشك جناح 

الوانو زي نور الصباح

خليني فوق قممك اطير

اتلفا حوالينك حرير

انزل فراش في ضفتك

تزرعني في وشك نخيل

تغرسني في عمقك جذور

تبذرني في ارضك حضور

خليني امشي 

عشان اجيك 

يا الف طاير 

يا رسول

   ٢٠٠٨