لو بتحب بلادك جد!

__________________

                                                         الفاضل إحيمر/ أوتاو

لو بِتحِب بلادك جَد

و زي بلادك ما تحِب حَد

لو بِتحِب بلادك جَد

و حب بلادك ما ليو حَد

تعال خُت يد

معاي فوق يد

نبني نشيد سودان الغد:

ديمقراطي و حر

فيهو العدل أساس للحكم

و الحرية ركايزاً صلد

نسوي خلافنا فيو بالراي

لا بالطلقة و لا بالزند

بالإيثار و بالإصرار

الواعي و عاقل

مش بالفرقه و لا بالعند

       ***

لو بِتحِب بلادك جَد

و حب بلادك ما ليو ند

تعال نتراص

نقيف زي سد

و كل ما محنو

تزيد تشتد

يعلو الصرح

يزداد منعه

 متانه و صد

       ***

لو بِتحِب بلادك جَد

بتضوق في مُرها

حلو الشهد

و لو تبقى جحيم

فيها تحس

بسلامة و برد

و ما تكون ليها

الإبن العاق

أو تنحاز لعدوها اللد

و لا بتأذيها

و تسوي ذريعة

حسن النية و عدم القصد

       ***

لو بِتحِب بلادك جَد

افرد فيها طويل يديك

و قدر ما  تقدر

مدها مد ....

بي سعفة نخلة

غُصُن ليمون

أوباقة ورد ....

تنضح حب و تفوح بالود

تجود بالزين لي كل الناس

و تجيب الخير

لي كل فرد

        ***

لو بِتحِب بلادك جَد

امسح دمعه أوقد شمعه

اعدل مايله و ارتق قد

ما تبقى أناني

سواك يعاني

خيرو يقِط

و إنت تعُب

من بحر السعد

سودانا كبير

و خيراتو كتيرة

ما بتنعد

تكفي تزيد

لله الشكر و ليهو الحمد

بس محتاج مننا كد

نكران للذات و نبل و زهد

و إيمان صادق

من ميلادنا حدو اللحد

ما بنتراجع في يوم عنو

ما بنتزحزح أو نرتد،

ليه في غفلة

عايزين نقتال

كل افراحو

نقبر عزو و نهدم مجد

نسوي الشينة الليلة و بكرة

و نقيف نتأمل

فيما بعد

بعد ما يروح

و تمرق الروح

و يبقى حكاوي

حجاوي و سرد؟

       ***

لو بِتحِب بلادك جَد

بيِّن حبك

ليها الآن

قبال ما يفوت فيها أوان

و يحكو: "زمان

كان في بلد إسمو السودان

كان ميمون و مليان وعد

وقع مع  أناس

لا فهموهو و لا رحموه

و دورو فيهو

هاك يا ضرب

و هاك يا طعن

و هاك يا جذب

و هاك يا شد

و هو جريح،  يصرخ و يصيح،

آناس هوي،

 ما في نصيح؟ ما في صليح؟

يرسي الناس

يزيل الباس

و يكف الهد؟  

و بدون طوفان و لا زلزال أو بركان

بقى المسكين في خبر كان

قبض الناس بعدو الريح

ما فضل فيهو

حتى ضريح

أو حائط مبكي

يذرفو عندو دمعاً دم

يشقو جيوب

و يلطمو خد."

      ***

و قبال ما تروح

ليك يا "زول"

عندي سؤال

و فيك متعشم عملي الرد:

هل بِتحب بلادك جَد

و زي بلادك ما تحب حد؟

هل بِتحب بلادك جَد

و حب بلادك ما ليو حد؟

        ***