عايز أقول أنو الكلام القلتو دا
علّمني ليهو أستاذ أمين
[email protected] د. شهاب فتح الرحمن محمد طه
لو مسلمين و تعرفو دين
و مسيحيين و تعرفو دين
و لو قلتو نحن مناضلين
أو حتى كنتو مجاهدين
و لو إنتو اصلوا سياسيين
و بقيتو فينا الحاكمين
كان تعرفوا إنو الجنا، إنو الضنا
الجادعنو في كلما* المُهين
بالنسبة ليّ ياهو العشم
دخُري السنين
باكر بكون حامي الحِمى
سند البلد، درعو المتين
أَمنْتوُ رب العالمين...
بس يا بلد كيف العمل؟
كيف العَلمَ يفرد يرفف في السما؟
و لسّا الولد مجدوع هناك
عايش غريب داخل وطن
ممسوك سجين
راجي الطحين، حتة عجين
مكتول كمد، محروق حنين
مشتاق إبردب في الفصل
يعمل شغب، يشبع لعب
يفقع ضحك
يسكت يَصِنْ...
يسمع كلام أستاذ عمر
و أستاذ مجوك
و أستاذة نور بت الخزين
نقلوها من وسط البلد
ناس بيتها في حلة حمد
ودّوها لى ناس الغرب
ناس الكرم، ناس الأصول
شالوها جوّا المُقلتين
تلقاها طايرا من الفرح
مبسوطة تبْ بى مهنتا
تدي الولد درسن رصين
يكبر يقيف ينْضُم فهم
يرفعنا فوق
ينقذ وطن مليان سجم
متروس هجين
هذا الكلام لى ناس محكّرا في الحكم
و ناسن مسلحا... خارجين
و عايز اقول أنو الكلام القلتو دا
*معسكر كلمة للنازحين في جنوب دارفور
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
