إعتزار للوطن
اسف مليون ارض المليون
اسف مليون ارض المليون
فى عيونى مدارك
مراكب ماشية فى صدر الريح
مواكب رعدا مطرا
تهز وترز فى ضفاف السيل
وموج النيل غضبان
مستنى صهيل الخيل
اسف مليون ارض المليون
لسة انينك ضارب فوق الدنيا صداه
عيون الحابس نفسك
لسه مداها حدود الكلمة
وعيون الناس الشالت بصر الدنيا
مداها.. عمل ....بنيان لبعيد
خناك اليوم ارض المليون
حسابك لينا بكون يوم باكر
يوم تتجفف كل بواقى الفيك
ويوم تدفق كل اسرار السر الليك
لحظات كل عيون الدنيا
وكل ايادى الناس
البطشت ....سرقت ...حرقت تشهد
وكل ضمائر البشر
القفلت .... نامت ... قصدت تنسى سؤال الحاكم
تصحى
يوم تاريخى وابدى يكون
دفتر احوال
مليان بشكاوى الفقراء
الحزنو عشان لموه عشا الاولاد
ودعاوى غلابة
فى شان بدموعهم بنوها علالى سحاب
وغضب الهاجرو ..
شان الظلم الخيم فى الطرقات
وصفوف للاتمه
افراحهم ماتت بالدانات
وباقى الحشر صفوف
ما اليوم محفوف بعدالة كون
اسف مليون بن المليون
همى أمل تربال
مستنى ولادة موسم
هما ما بغشاه الزيف العابر
وهمك انت توفى ضمائر الشعب الحائر
شعبا واقف بين الحربة ركيزة
وبين طابور الكزب الوافر
اسف مليون بن المليون
محتار فى عيونك
لمتين حتغطى جفونك
وليه مسجونه عيونك
وطالق ايدك فى الضلمة
تشرد ....تضرب .....تقتل وتنهب فى الامال
قبل سنين واهمنا قلبيك
شفنا بريق مرسوم فى جبينك
قلنا خلاص ...!!!!!!!!!!!!!؟؟؟
وبعد سنتين حددنا مصيرك
اسف مليون بن المليون
ما عيونى عيونك
ايه الجابرك تقدر وطنك
لحظة متعة تعدى سريعة
وباقى الزمن تتعزب ليه
ما الارض امانة ....بورثه خالق
فيها كنوزه ...وزبدا عالق
ما تتغشه فى شان جبروت كرسيك ولالئ
اسف مليون بن المليون
ما الشورة مصير
مفتاح تغيير
كم موهوب محتاج تقدير
وقيادة الناس بتكون بصغير
على ايه محتكر المعرفة فيك يابن المليون
فى لحظة صدق ....لوتقدر يوم
قلب صفحات الكون
شوف كم عالم طافح
وناس بتكافح
وناس محتارة ...تشاهد لهبا لافح
قصة فصوله غريبة
مؤلف عاقل ....ومخرج جاهل
ومسرح دموى
وكل ممثل لابس ثوب تحنان
بنفاق مليان
اسف مليون بن المليون
شايف كل الشايفاه عيونى
ولا خلاص الطمع الغاشم غطى عيونك
ليه ضللت صغارك
بالاموال الوسخ الصبحت ذادك
وسبت طريق الشرف ...الكان جوهر لحياتك
اسف مليون بن المليون
لو اصبح فكرك
كلو ركوب عربات
دخانه معشعش فى الساحات
وكل الفهم الفيك
بالاسمنت ترص طوبات
تتشابى بعيد ...لوراء النجمات
اسف مليون ارض المليون
لو كل كتبنا ورق حرقان
لا فيه كتابة ولا اطمئنان
والناس الصبحت زى عنوان
تاريخه مداد اقلام
ونحنا خلاص... تكفينا البصمة
وعمة كبيرة وخطبة دوام
اسف مليون ارض المليون
لو كل حصادنا ....ملاليم صفقة
وحكر العيش من سيدو الزرعو
ودفن الترع الشايلة سنابل والافراح
ليه خلق الله ....معزبو بالحرمان
وانت بتضحك لما سنونك ..
غرقت فى الاحلام
اسف مليون بن المليون
شايف كل الشايفاه عيونى
ولا لهيب الظلم اتعالى جداره على الاحزان
ليه مشوارك كلو زرع الغام
فى صدور اطفالنا
حوش المدرسة
جوه الحاره
وسط العسكر
فى المشروع الاخضر
فى فوق المدن الساكنة ضفاف الوادى
وحتى قرانا الفى الاطراف
اسف مليون ارض المليون
ياسر ادم (ابو عمار)
(بريطانيا)
[email protected]
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
