|
|
Last Updated: Jul 11th, 2011 - 15:37:55 |
على قبر من كان .. سيغير وجه السودان
بنعيـــك أنا شعر / خضرعطا المنان
وبكيـــك أنا
وحزني يغمر الوطن الفســيـح
بى آهة .... بـي دمعن وحـيـح
وبى وجعة من قلـبن جــريـح ..
كم فقدناك يا قرنق
كم شربنا المرة بعدك
وكم بكـاك الشـعـب يـاما
يانسمة في الزمن القبيح
يا بسمة للساكن الصفيح
وعـيـنو ما لاقـت منـاما
آهـ ... وتاني آهـ ..
آهـ من فراقك ياعظيم
يـا أمـان أمـة وســلاما
أنت يـا حـلـم اليـتـامـى
وباقي في التـاريخ عـلامـة
في القلوب حـبك تــنـامى
وفوق جـراح الكـل تسـامى ..
ليه بترحل انت ليه
والبـلد مـليـان مـآسـي
الجرح ما زال بينزف
وكل زول مسـكين يقـاسي
اليتيم ما زال بيحلم
تـمسـح الدمعة وتـواسي
وشعبنا المكلوم وتائه
زي مريكب دون مـراسي
حلمو كان يلقاك معاهو
تصلح العـوج السـياسي ..
ليـه بـتـرحـل يـا أبــانا
وليـه زمـانـك جـار وأبـانا
ورحـت سـبتـنا في أسـانا
كنا بـس دايـريـن معـانـا
تبقى دارنا .. وضل ضـرانـا
وفي الفـجـايـع والمهـانـة
تـبقى وحـدتـنا المـصانـة
وضي مصـابيحـنا المزانـة
خيـمة للعايش مشرد
وغـيمة تسقـيلنا الـبطـانـة
وتـبـقى بسـمتـنا وغـنـانا
فـوق شــفاه كل الحـزانى ..
ليـه بـترحـل انـت ليـه
وكنت الأمل عايـشـين عليه
قـلنـا بـكـرة تلمنا
وبي عزة تجمع شملنا
وعـشـنـا راجـيـن المدد
الا فـجأة عـلينا غـبتا
ومن بلدنا مشيت ورحتا
وفـينا جـمـرك ما خـمد
وانت عـارف يـا أســد
الدموع سكنت معانا
والفـرح فـارق شـــرد
الـخـوازيـق دون عـدد
وملت التمـاسـيح البـلـد ..
ليه بترحل انت ليه
ونحنا عارفـين وانت عـارف
انت يـاك رجـل المـواقـف
مش حرام يا جون تفوتنا
وتسـيبنا للريح والعـواصـف
بلدنا زمن يفـتش ليك
وشايل الصبر مستنيك
نيلو يبكي .. وموجـو راجـف
وطــــن عـالة
سنين أوجاعو تتوالى
وماعـارف محـل واقــف ..
******************
خضرعطا المنان
أغسطس 2005م
© Copyright by SudaneseOnline.com
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
الأخبار و الاراء المنشورة لا تعبر بالضرورة
عن رأي الموقع