أوحت لى اللقطات التى صورها الأستاذ عصام عبد الحفيظ ل"حليوة" ست الشاى بمناسبة "الكشات" الجائرة التى تشنها عليهم السلطات، بحجة تنظيم هذه المهنة ونشرها فى سودانيس اونلاين، بهذه الخواطر. الشكر أجزله للأستاذ عصام.
حليوة.... ست الشاى
شوفو حليوة ست الشاى
شايك ما بدورو براى
كم مليون بدورو معاى
شايا ليهو خرمانين
سيد الركشة
سيد الكارة
الطيانى
المكانيكى
الكل قال تعال بى جاي
...
قايمى حليوة نص الليل
عشان رزقا حلال وعديل
رزقا ما بيدورلو دليل
وان فد يوم جاتا "الكشة"
بتتبهدل جنس بهديل
...
تشيل الهم
هما عاد يهد الحيل
داكا يتيم بدور مصروف
داكا مرضان وغالبو الشوف
ديكا بنيي عيانى
وترجف من كترت الخوف
...
وصوتا جاها من قاطوع
مهدهد بى كترت الجوع
حليوة... يا بتى
قشى دميعتك النازلى
وأسألى ربك الرزاق
يسهل ليكى كل ممنوع
...
تسوى الشاى
تبيعى حلال
تجيبى الكسرى للأطفال
تجيبى الدكوة للأطفال
و السكر بدل رطلين
منو تجيبى كم شوال
وصندوك شاى بدل تمنة
عاد مو حايقى فى الأطفال
....
صوت الوالدة باقى حنين
بتسمع فيهو ليها سنين
بتندهليها كل الفقرا و الصالحين
يغتوها ويضاروها من الجايرين
البيقطعو الأرزاق ومو خايفين
...
ديل حكامنا مو خايفين
عيونن ديمة مفتوحات على المسكين
الفارشلو كوم عجور
و البيطرق السكين
القايمات نصوص الليل
ست الشاى
ست الكسرى
القالاها نار الدوكى
و البتسوى فى التركين
...
ديلا يربو فى الأيتام
فى اطراف البلد ساكنين
بيوتن من بروش وصفيح
لا اسمنتى لا من طين
ورقادن ديمه فى الواطه
حتى ان كانو مرضانين
...
يا حكامنا قولو عديل
زى ناس ديل
يدوهم زكاة الله
و الله "الكشة" و البهديل
...
وشان حكامنا جبارين
قصورن ديمة بتضوى
وهن جواها مطامنين
لا مرضا بيغشاهم
و لافى أنين
لا ركشات و لا "كشات"
عاد مو ديمه محروسين
...
كم عربيى بى سواقا بى بنزين
ديكا صغيرى للأطفال
واحدى براها للستات
واحدى كبيرى للأولاد
ما مال الحرام لامنو ليهو سنين
...
يا ناس ما تخافو الله
نهبو بلدنا... بإسم الدين
سرقو قروشنا ... بإسم الدين
زادو امراضنا... بإسم الدين
كتلو اولادنا... بإسم الدين
نشفو ريقنا... بإسم الدين
طلعو "..."... بإسم الدين
و الكل عاد صبح جيعان
بعد ما كنا شبعانين
....
نسأل الله ليل ونهار
يوريهم حقيقة الدين
تبين آياتو فى زى ديل
ناسا ما بخافو الدين
تبين آياتو فى الدنيا
قبل ما يجينا يوم الدين
عليكم الله يا اخوان
قولو آمين
عليكم الله يا اخوان
قولو آمين
ابراهيم الكرسنى
30/7/2008
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
