المعذبون في الارض
- ألو ...
- ألو منو ؟
- أنا محمد
- منو؟
- محمد محمد ولدك
- إزيك يا محمد , يا ولدي قاطع الخبر مالك ؟
- والله يا أبوي دايرين أخباركم لكن الرصيد مافي , هسي دا تلفون صاحبي
- بارك الله فيو يا ولدي , اه عاملين كيف ؟
- والله الحمد لله يابا انتو كيف؟
- نحمد الله في نعمة
- والله يا ابوي ما كنت داير اقول لك هسي , لكن ناس الجامعة ديل طلعوني من الامتحان قالوا دايرين القسط التاني
- نان يا ولدي عشان القروش يطلعوك من الامتحان ؟
- ما براي نحنا كتار طلعونا
- لا حول ولا قوة الا بالله , دحين اليوم داك الرئيس في التلفزيون ما قال تاني مافي زول يحمو القراية بسبب القروش ؟
- يابا البتقال في التلفزيون شوية ؟ اه هسي بتقدر ترسل لي ول اجمد السنة دي برضو ؟
- يا ولدي القروش بتصلك اصلك ما تشيل هم , أنا بدفع لك من اولى ابتدائي داير أغرقك عند الحجرة ؟
- خلاص لازم تصلني بكرة عشان جلسة بعد بكرة ما تفوتني برضو
- ان شاء الله تصلك بس خلي بالك في قرايتك وما تفكر في شي غيرها
- يابا الله يديك العافية , اه مع السلامة عشان باقي الرصيد دا اخلي لصاحبي دا يكلم اهلو كمان
- الله يوفقكم مع السلامة . سلم علي صاحبك
- دا منو يااا ابو محمد ؟
- دا محمد , واللااااهي جامعتن دي حيرتنا .
- والله القراية الزمن دا حارة , هو وصل وين ياحليلو بعد دا ما قرب ؟
- والله يا حاج احمد ما فضلو كتير , لكن القراية دي كملتن كلو كلو, والله كان شفتو اصلو ما محمد الزمان داك, انقسم النص بالنص وبقى ازراااق
- ليه مالهم ما بياكلو
- والله يا حاج احمد اصلو وصف لنا شيتن ما بتوصف , غير فول السجم دا ما عندهن حاجة فطور وعشا والغدا ما بسألو منو
- لا اله الا الله , والبجيب ليهم الفول دا ما يجيب ليهم معاهو حاجة ول يغير ليهم شوية
- الجيب دا كان زمان هسي اي شي من جيبك , انت في دي , ياخ في الرقاد ما في راحة والله محمد دا حلف قال الفرش الزول كان طبقو يختو مخدة والله قال انتو كان شفتو ما تعرفو فرش ول بطانية تقيلة , والسراير , السراير حديد قال والله الواحد يقوم من الصباح زي الدقين ليهو مسامير في ضهرو , وموية الشراب في تلتلة والحمام دا اسكت خلو بس
- يا اعوذ بالله الناس ديل ما بخافو الله في الطلبة ديل ؟
- الطلبة براهم ياخ نحنا زاتنا مقصرين معانا ؟
- الله في . هسي محمد يطلع وكل شي يهون
- لامتيين يطلع والله نحنا روحنا طلعت , الراجنو كتار والله هسي علي الطلاق امو دي متألمة ليها اكتر من سنتين انا بس قاعد اتفرج فيها , غايتو ربنا يهون
- الصبر الصبر لوك الصبر , بعد دا ما نمش علي ناس اللجنة ديل
- مالهم ناس اللجنة كمان ؟
- ما دايرين نشوف موضوع الموية ... ما جوا قطعوك؟ بعدين الكهربا البقت مسكولات دي
- لالا انا بعد دا ما بقدر امش معاك ماشي اشوف لي حل للفلقة الفي راسي دي
- ان بقى لقريشات الولد بتلاقي الناس في الاجتماع وبتدبرا
- انا القروش بدبرا , انت امش واعتذر لي
- اه ودعتك الله
- الله معاك
- تعالي يا ام محمد وشوفي الليلة ناس الجامعة عملو شنو في ولدك
- مااالن عليهو الله يازاهم
- طلعوا من الامتحان عشان ما دافع القروش
- نان الما بدفع يطلعوا من الامتحان شحدت ربي تطلع روحن من اول مسعول لي اخر مسعول , يا اخواني نحنا نموت ؟
- يا ولية استهدي بالله ,كدي جيبي لي الجلابية والعمة النمرق لي برة اشوف لي حلل
وابو محمد يتحصل على القروش بمعجزة وبمعجزة اخرى تصل محمد . ومحمد بعد خراج روح يتخرج والفرحة تغمر البيت الصغير .... وكرامة ... وتهاني ... مباركة ومواجبة ...... وبعد مدة
- هي انت الجامعة قريتها عشان تجي تترقد لي من سرير لي سرير ما تمرق لي برة تشوف لك وظيقة ول شغلانة تنفعك
- هي الوظيفة دي ساي , انا شهاداتي لسة عند ناس الجامعة
- وجاي بلاهن مالك ما كان ترجى لامن الشهايد يطلعن
- اجيبها كيف انت ما عارف في حاجة اسمها خدمة وطنية ؟
- خدمة وطنية؟! ودي شني كمان ؟
- دي سنة لازم الزول يشتغلها للبلد
- هي يا ولدي ما تشتغل موش بالقروش ؟
- يا ابوي انا لي 8 شهور كايس حتة اقضيها فيها وما لاقي
-سمح الله يدي العافية يا ولدي, انا واصل عمك قسم السيد دا مارقنو من السجن الليلة كان داقي ناس المحلية
وبعد اكثر من سنة يبدأ محمد الخدمة الوطنية والفرحة تغمر البيت من جديد
- يا حاج احمد محمد ولدي ما اشتغل
- ما شاالله ما شاالله , اشتغل وين ؟
- اشتغل فوق الخدمة الوطنية
- الخدمة الشني ... الوطنية ودي وين كمان ؟
- ما بعرفها والله الا هو كل يوم راكب المواصلات ماشي وجاي من الشغل
وبعد شهر
- هي يااا محمد انتو حكياتكم شنو , الليلة يوم 7 في الشهر الجديد ما صرفتو ؟
- صرفنا زمان اول انت قايلها كم ؟ خمسين بس
- كااااام ؟
- خمسين جنيه والله
- لا اله الا الله بس خمسين , والحال دا لمتين ؟
- اطناااااااااشر شهر
-12 شهخ خ خ خ خ خخ خ
وبعد انتظار لاكثر من اربعة ساعات في المستشفى المتهالك , يأتي دكتور الهنا , ويدخل على ابو محمد , وبعد دقيقتين يخرج رافعا يديه ... الفاتحة
وبعد مدة , محمد سايق كارو الموية ..... وبعد شوية محمد جاتو نفسيات ... وبعد شوية محمد وقف للقطر قطعو ..... والليلة يا محماااااد .
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
