صحى الدنيا ام دروب بتسوق
تغش الناس فى لم المال..
والجرى البفوت الحد
نقول بحر السعادة مقيل
فى ضل النعيم والجاه
وتارى الفرح مدسوس
فى الونسة المعا الجيران
وفى اللمة المتل...
قعدتنا فى ضل الضحى المشرور
حلاة الجلسة فى الجبنه....
تقول حارة مسيد درويش
يجوها الناس ..تقول العرضة والطمبور
ولما الحاجة تبدأ تمرر القلاى
دخان البن يطق الزول ...
ولا صندل هنود محروق
صحى الدنيا أم دروب بتسوق
ضب العصب شايلانا
لا إيداً تفر من غيد
ولا رجلاً تجارى السيل
قاشانا البروج والكم
معيارنا الهدوم والحيل
بالله وين شكل الفرح عند ديل
لو فى السعادة دليل
صحى الدنيا أم دروب... بتسوق
ظالمة وما بتنصف المسكين
ناس الضحكة لما الناس
صدورة تضيق
وناس الحارة....
لما النار لهيبه يبق
تلقاهم فوق للرؤوس باينين
ضراعهم زمزم الحرمين
كفوفهم للسلام خالصين
وحفيانين يخدمو القوم
صحى الدنيا أم دروب ...بتسوق
وما بشوف المخبئ بعيد
قليل النظرة والتجريب
وكان فتشنا فى الزخم المعبئ رفوف
بنلقى سعادة فى الرف التحت ..بِى هناك
ممددة فى التواضع فوق
جداره البسمة طوالى ..وهم الناس وزرع الخير
صحى الدنيا أم دروب بتسوق
ضجة عصار الهم ...سيرة
ولا بنحس بنشوة رقدة الفتران
فوق عنقريب الغد
أو حتى فى تبروقة الصلوات
والتكية فى برش السعف مضفور
صحى الدنيا أم دروب بتسوق
عليكم الله كيف بنكون
لما أخوك يقاسمك هم
ولمن تغمرك أفراح
يذيدك من فرح عندو
ولما تدور الأيام ...زى ما الطبيعى بكون
نلقى المخزن يوم
يورينا الزمن دوار
صحى الدنيا أم دروب بتسوق
فرقة أعز الناس
فى شان قنطور ورق مردوم
شرف العلم يازول !
للمحتاج فريش جناح الخير
وللمسكين رد إحسانو.. فى الضحكة والتقدير
صحى الدنيا أم دروب بتسوق
تجارد فينا بالقطاعى والجملة
شي حكر الشر وحب الذات
ناس مشغولة طوالى
زمن مافى وفراق أحباب
تقول الكم ده ماشى معاها
ولا فرقاً كبير بيكون
بين العندو بالمليار
 والماشيلو ضهرية ...لحق القفة يوم باكر
صحى الدنيا أم دروب بتسوق
كثير ساقتنا فى الغايات
وضلت بينا سكتنا
بقينا نشوف بى عينيها
ونسينا الصادقة حقتنا
وفينا الشاف بعينيه
وشانا غارانا بالفيها
لصق فيها نظارات
صحى الدنيا أم دروب بتسوق

ياسر آدم عبدالرحيم
 بريطانيا
[email protected]