|
|
Last Updated: Jul 11th, 2011 - 15:37:55 |
عرس ود أمونة
الزين والعديل
بركة لينا الجيتا
والجرتق حرير
مربوطة فيه السوميتا
الشاب الأصيل
ست البنات مالقيتا
*****
تسلم يا الأمير
بيك العروس تتهنا
بالمال والعيال
ليك القلوب تتمني
شوفوا يا عيال
أحمد وليد أمونة
في جبينه هلال
في إيده ضامي الحنة
*****
أمونه في وسط العرس تتني
زي بنات عشرين
تتفدع شمال ويمين
وزغرودة الفرح
واحدة ووراها إتنين
من جوف الضمير الرنّة
وفي إيدها اليمين
ورقة أم خمسين
الليلة الفرح عندي
الليلة العريس ولدي
خلوا السهر يطحنا
الليلة يوم سعدي
يلا يا بنات للصباح نتغنا
هزوا يا عيال
فوق وليد أمونة
في جبينه هلال
في إيده ضامي الحنة
*****
الريحة أم عبير
معطونة فيها الحنة
والخمرة أم فتيل
عود روائح الجنة
والشمعة فوقها تسيل
زي سواقي النيل
تروي الغريب وأهلنا
بالزين والعديل
عريسنا الأمير ده حبابه
يهزوا بالمنديل
ديل العزاز أصحابه
وأمونة في وسط العرس تتني
الليلة يوم عيدي
الليلة ليلة الحنة
*****
زينة بهجة ونور
زي ليالي العيد
حفلة علي الطنبور
مع الحسان الغيد
عرضة ورقصة جيد
زي فرحة العصفور
بالعش الجديد وسعيد
*****
وأمونة بتوب الحرير تتني
فرحانة بيها اللمة
يا الله تستر الحال
خلي الفرح يتما
يا بركة الصلاح
أهل الكتاب والسنة
بي بت الحلال
إنشاء الله العريس يتهنا
بالمال والعيال
ليه القلوب تتمني
أحمد وليد أمونة
في جبينه هلال
في إيده ضامي الحنة
إبراهيم عبد العزيز عثمان-الدوحة
[email protected]
© Copyright by SudaneseOnline.com
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
الأخبار و الاراء المنشورة لا تعبر بالضرورة
عن رأي الموقع