فاشر السلطان
فاشر السلطان
والله فات ليك زمان
فاشر السلطان
في القليب ليك مكان
فاشر السلطان
الوضع بقي فلتان
فاشر السلطان
الحاكم أصبح جبان
-----------
عجب عجايب
الجنجويد سبب متعاعب
وأغرب غرائب
الوالي ما حل الحقائب
يا بِني أمشي أم دفسو
لو تلقي لبن رايب
من زمان إنعدم بهايم
ومن زمان إختفى الزرايب
-------
مع الإنقاذ الخير إنعدم
ومع عثمان الفرح إنكتم
هل شفتو مرحات عجول
هل شفتو زول رضع بهم
وين شفتو ساحة هجوري*
ومتين سمعتو نقاره كَتم
---------
شوفي يا أُم بخاري
الكتِل بقي تجاري
شوفي يا أُم بخاري
السفر بقي كداري
شوفي يا اُم بخاري
الوالي بقي مُنكاري*
في المسيرة زي الدنباري*
وفي القصر للحقيقة يباري
-------------
القاعد في البنابر*
قال ممكون و صابر
ويا الساكن في فشّار*
لمتين الإنتظار؟
لمتين الإنتظار
الجنجويدي يقدل نهار
لو كان قلبك حار
قاتلت بي فرار*
-------------
الشايل الموبايل
دمو شايفنو سايل
والمخالف من الوجود زايل
لو إخفتى وراء الحجايل*
إنكسر الضهر..
الحمل تقيل ومايل
ومحل المبيت أصبح مقايل
البرق يشلع
وما في سحاباً شايل
------------
أُمبارح في المنام
جاني عزيز أوهام*
جاني عزيز أهام
قال لي شطانو قام
لو كانو رجال تمام
دخلوها وقصيره حام
------------
جز الرقاب
أهون من قطع العُشار
والفحش أدناه
إغتصاب بكار
وضرب نار
في شجار وفي حظار
والجار..
تخلى عن فزع الجار
الحواجز علت
وإرتفع الستار
وما من خيار
الفرسان عبروا البحار
والبوم سكن الديار
طال إنتظار
تفجير شــرار
طال إنتظار
هبوب أعصار
طال إتنظار
هطول أمطار
وما من خيار
قــدوم ثوار
· هَجوري : لعبة شعبية.
· منكاري : أي كثير المنكرات.
· الدنباري : المتحكم في مسير الجرد.
· البنابر : أشهر مقهى بالفاشر في وقت سابق.
· فشّار : بفتح الفاء وتشديد الشين بلده شرق مدنية الفاشر.
· فرار : فأس متوسط الحجم يستخدم كسلاح يدوي.
o حجايل : ستائر من البروش أو الشمل المزخرفة توضع في بيوت النوم.
o عزيز أوهام : المقصود عبد العزيز وهم وهو من ظرفاء مدنية الفاشر في وقت سابق (عليه الرحمه)
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة