تلاتة رجال
فى رثاء الإخوة الأعزاء عابدين صديق، فاروق كدودة و محمد سعيد القدال
عليهم رحمة الله أجمعين
د.ابراهيم الكرسنى
 |
| فاروق كدودة |
تلاته رجال
 |
| محمد سعيد القدال |
مضو فى الحال
كان فى أولن عابدين
تلاهو كدودة
أخيرا شيخنا ود قدال
...
تلاته رجال
حاملين مشعل التنوير
شاقين دربو بى تفكير
سايرين بيهو للحرية
لا ارهاب و لا تكفير
...
من فوق قبرو قام محمود
شاف عابدين
قالو آزول تعال بى جاى
تعال أرقد مع الزاهدين
دخلنا الدنيا
وارثين لى بيوت الطين
و انسلينا
زى ما جينا يوم داخلين
بى عراقى
بى سروال
لا دهبا خزناهو
و لا "تمكين"
وديمه مواجهين للموت
دفاعا عن حقوق مسكين
...
بيشلع نور من أم درمان
نور فاروق
فى الأهليى
نورا بان
نورا فاجى للظلمات
منور ديمه للمحتاج
بكان ما كان
...
و راجل التاكا قام فرحان
يومت جوهو ناس قدال
جابلو معاهو نور وظلال
هو زولا زين و كلو حنين
ليل و نهار يقيم الدين
لكن الختم زعلان
يوم الناعي قال إتيتم التاريخ!
بيسأل كيف؟
كيف اتيتم التاريخ؟!
وكت قدال خرج فيهو كم أجيال!!
...
تلاته رجال
ختو الساس
شايلين لى هموم الناس
مع جوزيف
و داكا شفيع
و عبد الخالق الملهوف بحب الناس
...
ناسا كيف عزاز بلحيل
يخوضو النار يعدلو الميل
يوم الحارة شدو الخيل
سالين لى سيوف الحق
ما بتعرف تجامل تب
بتبتر للبجيها دخيل
و بتسند للبيمشى عديل
...
يومت يكتبو التاريخ
يوم يقروهو للأطفال
دروس وعبر
من ترهاقا لى قدال
نصائح تروى للأجيال
عشان الثوره مو ساهلى
دايرى ثبات
دايرى صمود
دايرى نضال
ثباتا زى ثبات عابدين
صمودا زى صمود فاروق
نضالا زى نضال قدال
...
ديل آ ناس
ديل فرسانا فى "الميدان"
ديل أقلامنا للتنوير
وكت سودانا صار ضلمان
تلقاهم دوام قدام
زاهدين فى نعيم الدنيا
بس رهبان
عشان بيقدسو السودان
...
فى التاريخ اسم محفور
هناك عابدين
جنبو كدودة
داك قدال
زى ترهاقا
زى بركلنا
جناينا الملانى تمور
دليبنا الداقى نص الليل
و شباب "عشقان" من الطنبور
...
ما هاميهو ايش ما كان
ما دام ديمه قايم الليل
وبالقرآن قلب مليان
خلاوى ملانى بالحيران
خصوصا ديمه فى رمضان
نار الفقرا ما بتندس
يشوفا الزول تزيدو أمان
و كيفن عاد وكت تزدان
و بالتنوير تزيد نيران
وبالتنوير يومداك نور السودان
...
يوم ظهرت كراماتن
ومن فوق القبور الطاهرى
شلع النور
و من فوق القبور الطاهرى
جانا النور
يولع حتى للعميان
يقولو تعال
شوف عابدين
شوف فاروق
شوف قدال
يوروك كيف بنى الأوطان!!
ابراهيم الكرسنى
21/1/2008
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
