إلى زعيم الأمة الخالد إسماعيل الأزهري
التحية والتجلة لك ولكل الخالدين معك في الصفحة الوطنية والتهنئة في عيد الفداء عيد الإستقلال المجيد.
(1)
زعيم الأمة ألف ســلام
أبو الوطنية ألف ســلام
مرســل ليك بطاقة عيد
وجيلك كلو دون تحديــد
والحرية عيدها مجيـــد
ترفرف في السماء الأعلام
كفاحنا الليلة عيدو سـعيد
جهادك وكل رمز شهيــد
وتاريخنا القديم وجديــد
والذكرى المدى الأيــام
(2)
أبو الحرية ألف ســلام
وعندي رسالة ليك وكلام
رســالة روح وماها بريد
ودم شــرياني ماها وريد
ومعذور لو كلامها شــديد
موضوع شكوى ما إستسلام
ولو جـيت والزمن حيعـيد
كنت تلاقي مليون ســـيد
وبلدك ماشــي بالتهديــد
وكلو ســجون وكلو ظلام
تشـوف حكامنا زيد وعبيد
وكل حرامي مقطــوع أيد
ونوعاً ما بتعــرفو أكـيد
وشـيهو اقبح من الإعدام
حفنة وراسه فوقو عميـد
تبهدل فينــا زي ما تريد
وكـل يوماً تزيد تشــديد
ولمولنا (اليمن والشــام)
(3)
تلقى الناس بقت أقســـام
وبعدك طيرنــا هبهب قام
والأحزاب أصــابها فتور
والإثنيــــة لعبت دور
والعســــكر ورانا تدور
وما ودونا لي قـــــدام
وخلونا العرب والفـــور
والأنواك مهاجمــة الجور
وشـمالنا وشــرقنا قبور
وباعولنا الحقيقة أوهــام
كل زول جُوّاه زول محسور
وخاطر الناس صبح مكسور
والنيل كلو موت وجسـور
وكل حلال علينا حــرام
تلقى الناس حسابها كسـور
وكل إنسان صبح مأسـور
وبقى سودانا أكبر ســور
والناس جُوّاه كالأيتـــام
(4)
وشوف حكمونا (أولاد سام)
وجابولنا النظام العـــام
حكم أب لحيــة والدلدول
وورونا البدع والهـــول
وشــفنا الأصلو ما معقول
وتوب الدين كسـى الإجرام
بإسـم الدين تصول وتجول
تلم زكواتنا قبل الحـــول
وتصغر والأماني تطــول
وتبني قصورها بي الأزلام
شــوف بلدك صبح مغلول
والجوع يعوي زي الغـول
ومليون أمنجي وبهلـــول
وطالت بي وراك أقــزام
ناس بتنّـز من البــترول
وناس ممنوعة من القــول
والفقران صــبح مو زول
وماتت في الرؤى الأحـلام
(5)
ولو تحكيــلك الأرقـــام
وكيف جربوعنا بقي أهرام
وكيف بلدك بقت منهـوبة
وكيف عسكرنا خرّبوا سوبا
ناس لا دايرة تخفي عيوبها
ولا همــاها رأياً عــام
وأهي الأيــام بقت مغلوبة
وأهو الإنسان صبح أعجوبة
وعايش كيف دي ما محسوبة
ومن يومو الرقد ما قـــام
بلدك يا الزعيم منكـــوبة
ناس وأزيارها في راكوبـة
وناس دخانها إنتاج (كوبـا)
وبتأّكّل كلابها حمـــام
ناس ضايعة وحقوق مسلوبة
وناس رايقة وملانة جيوبهـا
وأهي الحرية بقت أكـذوبة
ونهبوا الدنيا بالإســــلام
(6)
وأخيراً وفي رسـالتي ختام
شعبك لســـة عالي الهام
وصامدين برضو رغم الجوع
وعايشـــين في بلد مبيوع
وبرضنا ما لحســنا الكوع
ولا بنتبـاع ولا بننســـام
ولسه لي مســـانا شموع
ولســـه في الكرم ينبوع
وصوتك لسه هو المسـموع
ما بنهـــتمّ لي اللّمــلام
زراع لســه خير وضروع
وعمال لســه هادرة جموع
وطلاب خارجـة عن الطوع
على الحريـة ما بتتـــلام
سـقط من أيدهم المشـروع
ويوم باكر من المدفـــوع
ونسمع بي المشــير مخلوع
وتســقط دولة الإعـــلام
(7)
وألف تحية وألف ســـلام
من كل إتحــادي همــام
صامد لســـه زي ما كان
لا باع الوطــن لا خــان
وعاضّي على القضـية بنان
وواعي لا غفــل لا نـام
لا خـاف لا بيقولو جــبان
وزيك في القواســـي يبان
عـاقد عزمو والإيمـــان
يهد عســـكر على أصنام
ورايتك زاهيــة بي الألوان
ترفرف كـــل دور وأوان
وناديك بي العبق نشــوان
وما جفّت وراك أقـــلام
وحزبك لســه هو العنوان
وحزبك لسه هو الســودان
ولي الحرية نحنا ضمــان
ومهمــا كانت الأحكــام
إبنك
بكري نعيم
1 / 1 / 2008
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة