مواويل الغربة عبد الكريم محي الدين
بكت الخطى المكتوب عليها
في هجير الغربة تمشي
المتاهات و الوهم
تمشي المسافات الضاربة أعماق الضياع
و ساكنة أشباح الظلم
بكت الخطاوي الكانت قبيل متموسقة ,,,
و الحرقة فيها بتلتهب ,,
تحرق بواكير العشم
و لي بكاها الكون لبس
من وكتو أثواب الندم
و احمر الشفق
من دمعات حشاه المنقسم
بكت الخطى
و الأنة صبحت
زي رحى الساقية
و الليل ما انهزم
لا نارا أطفاها الشتا
و لا ليلا ضواه النجم
بكت الخطى
و ما عرفت عراقيل الطريق
ما لبست مراكيب في القدم
و الغربة ألوان في العذاب
ما فيهو البياض ما فيهو الخضرة و الجود و الكرم
الغربة أطلال في الذوات
بالذكرى تحيا و تنعدم
الغربة دمعات في الحشا
ترسم حبيبات في الدهم
الغربة نكران الوجود
الغربة لعنات الندم
الغربة عركات الضمير
الغربة فقدان القيم
وبكت الخطى
المكتوب عليها في دساتير الزمن
تمشي و تميد في المشية من تقل المحن
في ذاتا وجدانا قديم
دائما بغذيهو الوطن
في ذاتا جمهور من هموم
في عيونا أحمال السفن
بكت الخطى
و الليل بنح
من همو لي سود الدجن
و الكون بخب
بي رحلو ما بعرف وهن
لي وين قصد ؟؟
من وين أتى ؟؟
ضيعان لمن ؟؟
وا أسفاي ما بعرف جواب
ما بعرف وحاتك اشرحن
و بكت الخطى
و عرفت نجيماتا بتنهزم
و الليلة بس
يادابا عرفت
إنو العمر أركانو بتنهدم
و الناس بتكبر بي الهموم
و الدنيا كل الدنيا كوم
و الاغتراب بي كومو هد هامات العزم
الليلة يادابا عرفت
إنو الصغير
ما بظل صغير
و إنو القيم لا بد من قيم
إنو الوطن
مهما يكون
زيو ما فيش في الوجود
و الناس في بعدو بتنظلم
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة