|
|
Last Updated: Jul 11th, 2011 - 15:37:55 |
الموت الأخضر أو اعتذاريات الغياب
إلي الفنان الراحل الفاضل سعيد محمد عبد الجليل جعفر
إذا ما جف في بؤر الشموس الضوء
وسحابات كم خريف حبست دموعها سنين مالت واتكت
ودلقت مدامعها شووو
وأعاصير الزمان اجمعت من كل صحاري الدنيا
وقلعت أوتاد جبال الكون
* **** *** ***
ونادت ( وووب) فراغات لوحة
فراغات لوحة أزمت الفرش واللون
غالطت امتزاج لونين عشان طيفين
وقفت واتكت
وخلت للبياض تعبير
وسط فوضي الأحاسيس
وانقلاب ناموس طبيعة الضوء
**** *** ***
نقول في الموت شنو؟
وعشان فهمنا شنو؟
نقول المات منو ولا الانهدم ده شنو؟
إجابات قد تجيك من شاكلة:
( ميل في أخاديد التراب النيل وراح نصو)
أو
(انهدم الشمال في اتجاه جغرافي في عرش السماء
وانكشف المآل للريح وللإعصار)
أو
(اتحركت الجبال وسار الشدر أميال)
علي كل حال
سيبك من تخامين السطل وقول لي هو كان مات كيف؟
****** ******* ***
فارس فوق لجام الخيل علي المسرح
وبكتب في الوصية وفاتنا ماحردان
مسامح وكان فرح فرحان
كانو بضحك الموت برضو
أو قد كان
بقلب في عيونو الصانو قلب الناس
من صدا السنين والقهر والوسواس
ببشر بي فرح ميلادو متعسر
وبصبر في الشفاقا الجر سو الحصحاص
كانو قريب لان البعد في القرب
وكانوبعيد لان القرب في البعد
وكانو الادخرناه بكمل المشوار
وكانو الفقد كان فاقد فقد لسع
وكانو الكان فاضل من التعب هو قليل
وكان الباقي في المشوار سفر هسع
سلاما يا ابو المسرح سلام إحساس بغالب في الدموع الجفو من مدة
فكم كم اندلق حزن الثكل أحزان
وكم كم انكسر مرقا وقف سد
يا معني الجمال أصبح علي الإشراق
ويالون الفرح لسع( جمال) لسع
عشان ثغر السنين الشال ديون أفراح
يلثم ثغرك اللسع برد هسع
سلاما في الخلود يا أجمل الحلوين
سلام حتى السلام يسلم من الشفع
الخرطوم 12:6:2005
[email protected]
© Copyright by SudaneseOnline.com
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
الأخبار و الاراء المنشورة لا تعبر بالضرورة
عن رأي الموقع