عودة الفارس
بقلم الشاعر السوداني/ حسن إبراهيم حسن الأفندي
[email protected]
http://hasanalafandi.blogunited.org
فتشت عنك يا بطل يوم اسماعيل سافر شهيد
واقف معاي .. لكن فؤادك كان بعيد
و كأنوا لا بتعرف تحاسب ... أو بتتحدى الوعيد
فتشت عنك و الإمام مقتول وحيد
فتشت عنك و الشريف جاييك ثائر لا يحيد
فتشت عنك و الحسن ود الحسين واقف يقاوم من جديد
فتشت عنك لو تساند لى محمد نور .... تحول يأسه عيد
فتشت عنك فى دروبنا و فى البرارى و فى الصعيد
فتشت عنك لو بتسمعنا و تعود
فتشت عنك يوم تحدى الموت شجاع
عالم بطل مفتول ضراع
آمن بربو بلا حدود
فتشت عنك يوم على المغوار تكبل بالقيود
فتشت عنك فى الضهارى و فى البلود
فتشت عنك لو تعود
فتشت يوم جرحوا الكرامه
و يوم أذلوا كبير صغير
جرحوا الرجال ...
داسوا الأنوف ... أكلوا الكتوف
و سووا لى سودانا غير
و سهرنا ليل ... بالحيل طويل
و ضقنا ويل
نادينا ليك .... فتشنا ليك مليون سبيل
واقف معاي
فى السوق معاي ... فى البيت معاي ... فى البص معاي
تاكل معاي .... تشرب معاي ...تدرس معاي ... تزهج معاي
لكن فؤادك كان بعيد
خليتنى فى يأسى الشديد
و فجأه جانا خبر أكيد
خبر سعيد .... طازه و جديد
فارسنا عاد ... بعد البعاد
أسمر جواد ... راكب جواد
غنينا عاد .. الليله عاد .. و الله عاد ... فارسنا عاد
ذي ما كان ... طول الزمان
ممشوق قوام... سيفو التمام ... وسط الزحام
لامع شديد
راسم عليه الآلاف شهيد
بى شده صال ... بى حزمه جال
قاد الرجال .... صنع المحال
لأمجادنا زاد .... فارسنا عاد
راكب جواد
6 أبريل 1985
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة