|
|
Last Updated: Jul 11th, 2011 - 15:37:55 |
عرض البحر
اجيكي سليم ومتعافي
يموت علي حيلو شجر النيم
واقف للمطر حافي
لا تعريفة لا مليم
علي يا حلوه لا تخافي
عشانك ما قليبي هزيم
قنا الراكوبة لو مافي
بتفتح ضحكتك بابنا
وتعرش بيتك اكتافي
بريدك قدرما تحني
ولو باقي العمر كافي
أنا الفي القيفة مستني
وقدر يا غالية ما تجافي
نحتو هواك في قلبي
رسمتوعلي السماء الصافي
قطعت دروب بدون رجعة
وراك كسرتو مجدافي
... ... ... ........
مسافر وسكتك عنوان
ولو بي كلمه زعلتك
اكبر من تكون غلطان
اكبر من تخت احساسنا
والعشناهو في الميزان
عترة تصلح المشيه
جيتا جيتني يا انسان
تب ما جابتك غشيه
غلطه علي بي الايمان
اهيم بي ضحكتك واحيا
اخاصمك جد وانا الندمان
وابدا قصيدة منتهية
اسافر وسكتك عنوان
ولو مكتوب اجيك الحين
ولو في الباقي
و من عمر التلاقي سنين
بجيبك لي زمانا جاي
من تالاكي من جواي
اخت جولبابي بي عراقي
ساترو حشاي
تحت لالوبه
ومتقاسمين جغيمة شاي
ولو الدنيا كان مقلوبة
بحسك فيني مكروبه
بختك أمانة في الزمة
وأفرش للهموم عمة
وأفرد للصباح غنوات
وأغرس في الجراح همة
بتقدلي في الضحواي معاي
وتعزفي للقهاوي الناي
وتمرق لي ضلامنا شموش
رنين الضحكه في الخاطر
هفيف المشيه ذي طاووسف
واشد اوتار خلاي الحار
نقيم ربابه صوت الطار
وتقدلي في المدي المفنوس
وتلمعي في لحي الابنوس
رفيق الدرب ود ولدي
علي أهلي و علي بلدي
عكازتي و حمار جدي
وتحت جلدي
خنجرك مغروس
عليكي بكوس
واعائن ليك علي المرسي
علي المرفي
وعلي الموج الرجع مسي
علي القمر اللي تاه في سماكي إدسي
علي الدرب الوقف مكسوف
حزن الرجعة بتحسي
واعائن ليك واتخيل
شراع الدهشة ليك ميَل
وجيهك يشع ملان بي النور
وعز المطرة نتقابل
اقالدك والربيع مدخل
علي و عليك تتمائل
عناقيد النخل تخجل
اصافحك ويدي في عينيك
علي مسكت ايديك منجل
اجيك اصتاد ويا خوفي
أقاوم الهفة أترجل
تصيبني اللقيا بي الرهبة
تصيدني عيونها بي المخمل
ورد في سكتك قام لييك
وفرهد يوم لقاك مشتل
يا وعد الزمان الجاي
وعدك لحظة ما اتاجل
يا وعد الخرييف مطرة
ويا سكت سفر خطرة
مسلح اجيكي بي الاشعار
وبي ريجت الغوني العطرة
ولو اخر الرحيل بنطال
بنرجع يوم نكون عشرة
يا بوعد المسافه بوعد
يا لييل الهوي المن ضي
يا صحوت عيونها سقد
يا شطر المحنه الشال
شامات هواكي سود
انا في الطريق جائيك
كائس المحنه حضن
تاجلي في الوعد لي متين
شعر راسك بياضو قطن
أكبر منك الاشواق
واكبر من سماكي وطن
محمد الفاتح خالد 06/22/2006
© Copyright by SudaneseOnline.com
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
الأخبار و الاراء المنشورة لا تعبر بالضرورة
عن رأي الموقع