|
زيارتي الأخيرة للسودان (هل تغير الشاهد أم تغير المشهد)؟!
|
مشاهد و مشاهدات من السودان الشقيق ... هل يتغير الشاهد أم يتغير المشهد؟!.
توجد صور بالكوم... وطبعآ قصص وحكاوي بالردوم. وتوجد دهشة عارمة.
ألتقيت كل زول. وأحتفي بي بورداب الخرطوم أيما أحتفاء وقمنا برحلة إلى جبل أولياء فأكلنا السمك البلطي وفي قندهار كان الشواء والشامبيون بصحبة وهبة وسفيان بشير نابري والأخت رهف. حسين ملاسي قال جاي بس جاتو ملاريا ورقد من بعدها في المستشفي سطرين قصدي يومين بعد الشر عليه، زرناه أنا ومحمد المسلمي... والله محمد المسلمي دا أرجل زول ما قصر معاي تب خلى الكرين كلوا ومشى معاي لغاية المستشفي مع إنو قال هو الوصل صاحبوا اللصيق حسين أول أمبارح بعربيتو لغاية المستشفى يعني أدى الواجب وزيادة وما محتاج أمشي المستشفي تاني بس عملها عشان خاطري.
وحضرت وشاركت في الفعاليات والندوات والمظاهرات. وحظيت بلقاء الأخ السلفي الخلوق محمود الزبير. وأجمل أربع ساعات في حياتي قضيتهم مع دينا خالد حيث حضرنا فلم What To Expect When You're Expecting بقاعة الصداقة. بس الحاجة الحيرتني في بنات السودان مع إنهم مدبرات وبصيرات بس عينهم بقت قوية خلاص... دينا إشترت التسالي من السوق العربي لأنو رخيص وطول الفلم تقرقش في التسالي وماسكة يدي اليمين لحدة يدي ما عرقت وأعصابي باظت قالت المشاهد مخيفة ... لما الفلم إنتهى والنور ولع دينا لقت البت القاعدة بجنبي الشمال حاضنة يدي الشمال ونايمة على كتفي (وتعال شوف العكة الحصلت). بنات السودان بقوا صعبين خلاص وعينهم بيضا... الخجل والحياء الزمان بقوا مافي، إنعدمو... زمان كان يقولوا فلان شدة ماهو مأدب زي الفتاة هسه بقوا يقولها للزول قليل الأدب وعديم الحياء... الدنيا أنتهت... دي نهاية الوجود على قول صاحبي قصي سليم.
أنا مصدع هسه من الباقي علي. والحال دي البروفات والمقدمات بس ح أرجع ليكم بالتفصيل الممل ما تمشوا بعيد. حا أبلع بندول وأجيكم. حا أحدثكم عن تجربتي في عوالم السياسة والإجتماع والثقافة والسوق والحانات الخلفية وكل شي أي جميع مشاهدي و مشاهداتي في السودان الشقيق.
يتواصل... زيارتي الأخيرة للسودان.. هل تغير الشاهد أم تغير المشهد؟!
محمد جمال
|
|
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
Quote: ألتقيت كل زول. وأحتفي بي بورداب الخرطوم أيما أحتفاء وقمنا برحلة إلى جبل أولياء فأكلنا السمك البلطي وفي قندهار كان الشواء والشامبيون بصحبة وهبة وسفيان بشير نابري والأخت رهف. حسين ملاسي قال جاي بس جاتو ملاريا ورقد من بعدها في المستشفي سطرين قصدي يومين بعد الشر عليه، زرناه أنا ومحمد المسلمي... والله محمد المسلمي دا أرجل زول ما قصر معاي تب خلى الكرين كلوا ومشى معاي لغاية المستشفي مع إنو قال هو الوصل صاحبوا اللصيق حسين أول أمبارح بعربيتو لغاية المستشفى يعني أدى الواجب وزيادة وما محتاج أمشي المستشفي تاني بس عملها عشان خاطري.
|
الاخ محمد جمال رمضان كريم شفت مستشفي الامل كان جميل ومنظم كيف وشايفك علقت في الدفتر كلام كويس وشيلتليك كم صورة مع البروف الفريق امن مدير المستشفي كم صورة
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
تنبيه هام جدأ:
البوست دا ما عندو علاقة أو ضعيفة جدآ ببوست "البروف" أمين نوتة المجاور... كون أمين يتحدث عن المشاهد ونحن هنا نتحدث عن الشاهد.... أو هو ما سيحدث في المستقبل القريب... والله المستعان.
أنا بالمناسبة لي زمن طويل عايز أتحدث عن النقطة دي!. فقط سنحت لي السوانح هذا اليوم المبارك.
رمضان كريم وكل عام والجميع بخير... ولنقم إلى الدخول في موضوع البوست... بعد أن أنتهينا من المقدمات الأساسية والضرورية... واهما الرحلات و صورة السمك البلطي.
يتواصل... زيارتي الأخيرة للسودان.. هل تغير الشاهد أم تغير المشهد؟!
محمد جمال
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
الأخ محمد جمال الدين رمضان كريم والله لو كنت عارفة إنك جاي السودان كان أكيد عملت حسابي ألاقي سعادتك وبالمرة كان نزلت صورة لينا ونحن في Regent's Park .. قصدي حدائق أمدرمان الكبرى...
طالما وصلت مركز عبد الكريم ميرغني يبقى في احتمال تكون تنسمت معطر الجو (البمبان) .. نتمنى تكون استمتعت بيه (ومن هذا البوست نبث أشواقنا للأخت رشا أحمد..أين اختفت هذه الشابة؟) .. . أتركك لتعود إلى جدية البوست مع التحية..
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: rummana)
|
رسالة جاءت عبر البريد الإكتروني الخاص بي: ([email protected]):
Quote: محمد جمال ... الآخر ... الآخر الذي لا يمكن تفسيرهـ على نحوٍ سريع و بليغٍ بما يكفي ..
الآخر .. الذي يجدد قوانين الحديث و الفكاهة و الخيال كـ أحلى ما يكون ..
أزيك و أزي حالك و أحولك .. و حشتنا أيام مضت والله كانت ما أحلاها ..! على ضفاف نهر النيل مساءً و أنت ونحن و البلد الحزين .. و يا حليل الصحاب و الأحباب .. رمانة الحبيبة و بروف أمين و هيثم طه من على البعد .. و الود أمير عثمان و البت دندون .. و قيقا بلدياتي .. و عمر دفع الله ... و أبا ذر .. والجميلة رحاب خليفة و اللذيذة اللطيفة سهام و الاستثنائية منال الشاي و القهوة و النسكافيه و الكركدي و اخوانهم واخواتهم من تسالي و فول سوداني و فشار وشيخ البورداب اخونا العوض يتحفنا بطلاته بين فينة و اخرى .. يا سلام ! و ياسلام على اللقاءات التي جمعتنا ببيت الفنون في حضرة الحقيبة و أنغامها ... أذكر كم كنت بخيل و انت تنسحب بهدوء حين يتنزل عليك القمر الوردي محسن خالد و تنفرد به .. يا ليتها تعود .. في رحاب وطن مستبشرٍ فرح نفديه بالأرواح نموت
دي حاجة كدا على السريع من ذلك الماضي القريب ... --------------------------- وتحياتي لولي نعمتنا هنا ... قولوا ليهو و بلغوا عني الشكيّة ... رشا احمد ما قادرة تخش المنبر ليها اسبوع .. خلوهو يحن و يعطف علي .. لي اسبوع وانا على باب المنبر ... الحر سلخني .. والعطش كتلني ..و الدنيا رمضان .. تصوموا و تفطروا على خير
ويا رمانة ... مشتاقين والله ... معقولة بس ! اذا حضرت الشياطين ذهبت الملائكة! ماكان تعيدي معانا في السودان ... علمتوها شينة وتخينة انتي و البروف ^__^
رشا احمد |
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
هذه المشاهد زائفة... لنرى كيف يستطيع أن يكون الشاهد زائفآ بوعي أو بلا وعي!.
أنا شخصيآ لم أرجع إلى السودان منذ أن خرجت منه في العام 1993 لأسباب سياسية بعد تخرجي مباشرة من الجامعة "الخرطوم". أعتقلت ست مرات خلال سنوات الدراسة وكنت في الفترة من أكتوبر 1991 و إلى فبراير 1992 أتمم يومآ في جاهز الأمن من الساعة 9 صباحآ إلى الساعة 9 مساءآ بصحبة عدد من الزملاء "رويت القصص مع زملائي في مرات سابقة". وتم تعذيبي جسديآ ونفسيآ بواسطة شخصان في جهازالأمن هما عبد الغفار الشريف (مسئول شعبة الأمن الطلابي وكان زميلنا بالجامعة) وآخر يدعى صالح. في الفترة من ديسمبر 1989 وفبراير 1991 تم إغتيال أربعة طلاب "واحد بالسكين و ثلاثة بالرصاص" وبترت أرجل إثنين آخرين وتردد المئات على المعتقلات كما فصل العشرات من الدراسة بشكل نهائي. دا وين؟. دا في جامعة الخرطوم بس!.
ليه بقول الكلام دا؟. عشان أوضح إنو في ناس كتيرين جدآ عارفين من البداية ما ستؤول إليه الأشياء إذا ما أستمر "الكيزان" في السلطة وضحى البعض منا بأرواحهم في سبيل الخلاص من كابوس الإنقاذ وما زال البعض يفعلون وسيفعلون حتى يحين فجر جديد. أكتر من كدا في زول زي محمود محمد طه "مثلآ" كان عارف "الكيزان" حا إجو السلطة قبل أن تولد الأجيال الجديدة ونحن منها... وكان عارف أنهم سيذيقون الشعب الأمرين أو كما قال. إذن لا توجد مفاجئة مميتة!.
ونحن هسه في السؤال: هل تغير الشاهد أم تغير المشهد؟!
محمد جمال
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد البشرى الخضر)
|
وكنت ومن الانطلاقة الاولي للبوست وشوفة الدوحة وشوفة الثلاثة ايام التي قضيتها متجولا في نواحيها قد قررت وفورا اشهار (الام دلدوم الاسفيري) بتاعي يا قبطان ونويت علي كركبة معاك لا انزل الله بها من اسفيرة او اسفرة ولكن التماهي المتخيل امتص غضبي الساطع الذي كان حتما سيكون كله بمبان[
ولكن الان لا نردد الا ما يقوله الصادق اسماعيل في نواحي امريكا
سنتابع
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: الصادق يحيى عبدالله)
|
سلامات يا صحاب:
-محمد المسلمي -د.أحمد الحسين -أمين محمد سليمان
-امجد البصيرى
Abdulrahman Gorashi-
- ناصر البطل -rummana
-محمد البشرى الخضر
-عبدالكريم الامين احمد
-الصادق يحيى عبدالله
و- رشا أحمد (أرسلت رسالة عبر البريد الإكتروني)
مرحب بيكم كتير... وحا أشوف حا أعمل شنو مع تداخلاتكم المبدعة... ربما أتعامل مع بعضها وأترك البعض الآخر يتحدث عن نفسه.
تحياتي
محمد جمال
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
سلامات كيكي
معليش يا صحاب... بكلم كيكي أول عشان سبب أساسي إنو من أول الناس المريت عليهم في الدوحة وما قصر معاي... وعشوني هو خليل فول أفغاني بالسمنة... حاجة ما تخلص. وبعد داك القصة كلها كانت بقبق قام بقبق قعد... فنيلة بقبق ذاتو... بقبق دا منو؟. : )... شكلو البق بق دا بشكل نصف حياة كيكي : ).
--- نتابع إبداعاتكم وصدامتكم الفنيلية عن كثب... بس الظروف صعبة ما سمحت لي بالولوج إلى عش الفنايل فمثلك يحتاج وقت وخيال... بل الزول محتاج ل training عديل قبل ما يدخل عوالم الفنايل.
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
محمد البشرى هلت الأنوار
Quote: متماهين وممشين حالنا و انبسطنا بشوفة دينا أخيرا و اعجبنا برشا و المشهد من كبري النيل الازرق في داعي تصر على ذكر انو مشهد متخيل و ترجعنا تاني مربع واحد
|
ما أجمل الخيال... خليك خيالي ومتماهي زي ما انت : ).
Quote: كما تماهينا من قبل مع اعلان الوظيفة ام سطاشر الف ههههههه |
انت مركز مع الفيسبوك برضو!... يعني مفسبك... أنا قايلك مسوزن بس (بكسر الميم والزاء) من مركلس في سودانيزأونلاين... أنا دا بعملوا كلو وكمان "مفورن" بكسر الميم والراء (من سودانفوروول) هههه بس لما الواحد إفورن لازم إركز لأن هناك مافي شلة تدافع عنك... كل شاه معلقة من عصبتها ... عصبة واحدة بس... الحاجة الوحيدة الغريبة إنو أنا الوحيد المعلق من أعصابي كلها هههه
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
Quote: الأخ محمد جمال الدين رمضان كريم والله لو كنت عارفة إنك جاي السودان كان أكيد عملت حسابي ألاقي سعادتك وبالمرة كان نزلت صورة لينا ونحن في Regent's Park .. قصدي حدائق أمدرمان الكبرى...
طالما وصلت مركز عبد الكريم ميرغني يبقى في احتمال تكون تنسمت معطر الجو (البمبان) |
سلام رمانة العزيزة... أشواق يا صديقة.
أهو هسه عرفتي... عذاب المغني!.
وأما عن البمبان وما أدراك م البمبان... كان فضل فيه شي والحكومة قعدت لحدة شهر 11 الجاي أوعدك ح أتعطر معاكم ح أتعطر : ).
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
محمد جمال ... رمضان كريم .. تغير المشهد والمشاهد والجمهور وحتى النص المسرحى ... يعنى مسرحية جديدة فى مسرح العبث ... ======== رشا يا رشا ... رمضان كريم .. وليك وحشة ...
Quote: وتحياتي لولي نعمتنا هنا ... قولوا ليهو و بلغوا عني الشكيّة ... رشا احمد ما قادرة تخش المنبر ليها اسبوع .. خلوهو يحن و يعطف علي .. لي اسبوع وانا على باب المنبر ... الحر سلخني .. والعطش كتلني ..و الدنيا رمضان .. تصوموا و تفطروا على خير |
ما ملاحظة إنو حظرك بدأ مع رمضان؟ يبدو إنو الموضوع أكبر من بكرى!!
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
Quote: محمد جمال ... رمضان كريم .. تغير المشهد والمشاهد والجمهور وحتى النص المسرحى ... يعنى مسرحية جديدة فى مسرح العبث ... ======== رشا يا رشا ... رمضان كريم .. وليك وحشة ... Quote: وتحياتي لولي نعمتنا هنا ... قولوا ليهو و بلغوا عني الشكيّة ... رشا احمد ما قادرة تخش المنبر ليها اسبوع .. خلوهو يحن و يعطف علي .. لي اسبوع وانا على باب المنبر ... الحر سلخني .. والعطش كتلني ..و الدنيا رمضان .. تصوموا و تفطروا على خير
ما ملاحظة إنو حظرك بدأ مع رمضان؟ يبدو إنو الموضوع أكبر من بكرى!! |
سلام أمير عثمان... والله دا كلام خطير شوية : )... بالله بكري عمل كدا؟!... قصدي الأكبر من بكري : )... أنا من زمان كان عندي شعور إنو البت دي ما من الإنس : ).
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
Quote: زيارتي الأخيرة للسودان (هل تغير الشاهد أم تغير المشهد)؟! |
زمان كان الفرق بسيط بين الشاهد والمشهد ....
هسع الفرق بقا بيناتهم فرق السنين وكل واحد إنتشر في الإتجاه المُضاد او المُعاكس ،،،
وممكن تقول برضو الشريعه والحياه ليها أثر في تغيير المشهد ....!!
تلقــــاك في غيبوبه مما نزلت لحدي ما عملت (لانديق) في بلدك أبو جواز تاني ...
وبيني وبينك كدا ( السرطان إستفحل ، فأكسب المشهد بعُداً ثاني ) ...!!
كررها يا مان مصيرك تتعود ...
| |
|
|
|
|
|
|
زيارتي الاخيرة للسودان (Re: محمد جمال الدين)
|
كانت ايام قمة الروعة والمتعة قضيناها ما بين السبلوقة وجبل الاولياء ولكن يا محمد رجاء سحب صورة دينا خالد لانك اتفقت معاها انك ما حاتنزلها في المنبر :) الالتزام التزام يا رجل :)
| |
|
|
|
|
|
|
Re: زيارتي الاخيرة للسودان (Re: العوض المسلمي)
|
وسعدت بلقاء وصحبة زميلة البورد الجميلة رشا أحمد... وكان لنا جولات وصولات في باحات الخرطوم الجميلة
***********************************
وانا اقول صاحبتى كانت مختفية وين ؟؟ اتاريك كنتى بتصولى وتجولى فى باحات الخرطوم ؟؟؟؟
اصحاب البوثت سلام ,,
| |
|
|
|
|
|
|
Re: زيارتي الاخيرة للسودان (Re: محمد جمال الدين)
|
"التمكين" لا يحتاج ذكاء خارق (ولم يفعل بذكاء) وإنما يحتاج في المقام الأول قوة عين وتبلد شعور تجاه الآخر وقدر كبير من التهور (وذاك ما حدث) وأدى إلى النتائج التي نراها في الواقع أمام أعيننا وربما كان هناك المزيد من السوء ينتظر الناس للأسف!. أي "شبيحة" بلغة الربيع العربي ممكن إعمل "تمكين" وإدمر تاريخ شعب كامل ويقوم بمجازر وجينوسايد كمان، شوية مهارات صغيرة كفاية وهناك رهط من المجرمين المحليين و الدوليين على إستعداد لتدريبك ومساعدتك على إستباحة المزيد من ممتلكات وأرواح الناس "تمكينك" والأجر مدفوع طبعآ. القذافي قعد في الكرسي 40 سنة وهناك أسرة واحدة تستطيع أن تستولى على بلد كاملة لمدة عدة قرون. المعادلة شديد التعقيد!.
وعندي ظن أن آيديولوجيا الإنقاذ في حد ذاتها مضادة للذكاء الفطري وتستطيع أن تستشهد بالواقع فانظر حال المدارس والجامعات كما أن "الإسلاميون المذهبيون" في الأساس هم أقل الناس إنتاجآ و إحتفاءآ بالمعرفة بمعناها الشامل وكل ما يفعلونه في الغالب مجرد نقل وتكرار من الكتب الصفراء. وعمومآ حظ السودانيين في إنتاج المعرفة (في زعمي) ضئيل جدآ’ مقارنة بشعوب أخرى في الجوار لأسباب تاريخية وموضوعية كونهم في الغالب ما اعتمدوا على الإنتاج المعرفي العربي ثم الغربي في الدين والتاريخ والرياضيات والطب والفلك والفيزياء وإلخ. هل هناك شيء يقول بغير ذلك؟. لا أجده!. حتى أن الإسلاميين في السودان في الغالب فكرهم في الأساس "المنشأ" مصري في حالة الجبهجية وسعودي في حالة التيارات السلفية مثل أنصار السنة وتستطيع أن تقول بنفس الشيء بالنسبة للتيارات المذهبية الأخرى كالبعثية والناصرية والإتحادية و"الشيوعية" كمان مع إعتبار محاولات الإشتراكيين لتأصيل الماركسية وربطها بالواقع المعاش كما حاول عبد الخالق محجوب وقبله عوض عبد الرازق لكن بعد هو فكر عنده جذوره في البعيد.
وأجد أن المحاولة المذهبية الوحيدة الأصيلة والجريئة "السودانية" في السودان الحديث هي محاولة محمود محمد طه في الإصلاح الديني (وجهة نظري) والتي دفع دمه ثمنآ لها وقبله طبعآ الإمام المهدي في ثورته الشهيرة ضد الأتراك وضد النظام الإجتماعي السائد في زمانه والتي دفع مئات الآلاف من الناس دمائهم ثمنآ لها... مع العلم أنني "قطعآ" لست جمهوريآ ولا أنصاريآ لكنه مجرد رأي يزعم الحياد.
محمد جمال --- هذه المداخلة كتبتها العام الماضي في بوست "الأزة" وقبل عدة أيام وجدت رأيآ من عالم إجتماع كبير ومعروف هو سمير أمين يساند الجزئية المتعلقة بأصالة محاولة محمود محمد طه من قولي. إذ يقول سمير أمين: ((Quote: - يجب أن تعلم أن الإسلام السياسى الذى يمثله الإخوان ليس حركة دينية نابعة من الإيمان البرىء بتعاليم الإسلام، بل هى حركة سياسية تخدم مصالح الدول الكبرى. وقد جرى اختراع «الإسلام السياسى» الحديث فى الهند على أيدى مستشرقين إنجليز لخدمة السلطة البريطانية، ثم تم تمريره لأبى الأعلى المودودى الباكستانى الذى تبناه وبشر به. خلاصة منهج المودودى -الذى دعا لفكرة «حاكمية الله»- أن المسلم لا يصح أن يعيش فى دولة غير إسلامية، وبذلك مهد لتقسيم الهند بانفصال باكستان عنها، وهو ما يصب فى صالح الدول الكبرى. والإسلام السياسى يدعو إلى الخضوع لا التحرر، ولذلك تجدهم متحالفين مع نظم فى غاية التسلط مثل السعودية وباكستان. المحاولة الوحيدة لقراءة الإسلام فى اتجاه التحرر كانت تلك الخاصة بالمفكر الإسلامى السودانى محمود طه، ولم تحاول أية حركة إسلامية «لا راديكالية ولا معتدلة» أن تتبنى أفكار محمود طه الذى أعدمه نظام نميرى فى السودان بتهمة الردة! المفكر سمير أمين : حوار مهم
|
)).
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
ما ننسى إنو نحن واقفين في "الشاهد"!.
وددت أيضآ أن أجدد تحياتي المخلصة لكل المتداخلين هنا والمتداخلات طبعآ... مع ثقتي التامة أننا سنفكر معآ في لب الموضوع... في الوقت الذي نفعل فيه المسرح والفكاهة ونعمل الخيال "المسألة كما تعلمون عويصة جدآ محتاجة شغل كبير وخيال عريض مع العزم والإرادة". --- وهمسة صغيرة ملؤها الإمتنان في أذن القراء الكرام الذين ربما تصادف أن مروا من هنا... لكم جميعآ المحبة مع أسمى معاني الود والإحترام.
ودا بريدي الإكتروني الخاص لمن أراد أن يفض عن مكنون هاجس ما، عبر به:
[email protected]
محمد جمال
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
وصلتني ثلاث رسائل لأناس مختلفين عبر البريد الإكتروني... وهذه هي الأولى "أنشرها كما هي" من Abdou Satiahmed:
Quote: ----- Forwarded Message ----- From: abdou satiahmed <> To: [email protected] Sent: Sunday, July 29, 2012 8:54 AM Subject: زيارتك الخايف عليها
الأخ الكريم محمد جمال الدين
السلام عليكم ورحمة الله
شكراً جزيلا لإشراك القارئ في ما تكتب من خلال بوست " زيارتكم المفترضة للخرطوم" . وفي الواقع فأنا تابعت اسهامك الجيد في قصة سليفيا ثم في محاولة تكوين خط سياسي جديد وأخيراً في اسلوبكم الجديد في نقد الانقاذ. ورغم في أن بالبوست الكثير المثير الخطر كما تقول الاغنية الخطيرة إلا أنني توقفت عند عدة ملاحظات أوجزها في ما يلي:
1- لا اعتقد أن هناك علاقة بين الحزب الاشتراكي الاسلامي وجماعة الاخوان المسلمين واعتقد أن الأمر يحتاج إلى تمحيص وتحقق أكثر.
2- فكرة ربط " الاسلام السياسي" بمؤامرة غربية (تخدم مصالح الدول الغربية) فكرة شاذة وبلهاء. وشخصياً لم استغربها من سمير أمين في ضوء ما يحدث بمصر وما عُرف به من تشدد. واعتقد أن سبب اللجوء إلى وصم الآخر بالتخوين والعمالة للغرب يعود إلى عقدة ماركسية قديمة بسبب من انتمائها وعلاقاتها (المحرجة) مع " الاتحاد السوفيتي العملاق" كما كان يشار إليه في السابق. وفي تقديري أن هناك أسباباً موضوعية محلية ساهمت في خلق وتخلق فكرة الاسلام السياسي تختلف من بلد لآخر وعلى أي دارس للظاهرة أن يعمد إلى دراستها عوضاً عن هذه الجزافيات البعيدة عن العقل والعلم. صحيح أن الكثير من الاسلامويين يشيرون إلى أن بدايات حركاتهم كانت لصد الهجمات الماركسية. ولكن هذا لا ينفي الحاجة الموضوعية لوجود أي من الفكرتين. وقد أشرت أنت بنفسك إلى طرف من هذا عند الاشارة إلى ضعف المساهمة الفكرية السودانية. كما أن من السخف – اعتذر للاضطرار لاستعمال الكلمة - محاولة معالجة الظاهرة بوصفها عالمية تشمل نطاق واسع يمتد من الباكستان (أو الشرق الاقصى في الواقع) إلى المغرب الاقصى دون الانتباه إلى الخلافات الجذرية بين هذه الحركات في تمظهراتها المختلفة التي تصل حد النقد اللاذع الذي قدمه الغنوشي التونسي لتجربة السودان.
3- لكني أعتقد أن أكثر ما أدهشني هو ما أتيت به بعد كلما قلت عن الاسلامي السياسي عن " أصالة محاولة محمود محمد طه وعلاقته بالتحرر" ! وفي الواقع فإن سمير أمين محق بإدراج محاولة محمود ضمن محاولات الاسلاميين. بل اعتقد أن أسوأ استغلال للعاطفة الدينية هو ما قام به محمود شخصياً عبر ادراج أفكار في غاية من الشذوذ ومليئة بالطوباويات مثل مزاعم " الأصالة والإنسان الكامل وبلاهة بيع وذم scrap وشيطنة demonize نصف الاسلام لإصلاحه عبر نصف آخر. ولن يشفع له بعد هذا إن كانت نواياه طيبة أو مفيدة أو مساندته لمسيرة البحث عن الحريات. وحتى في هذه فقد اندلق الكثير من الحبر حول علاقة مشبوهة لمحمود و" للجمهوريين" بنظام جعفر النميري. ثم هب أننا مضينا بفكرة العمالة للغرب إلى منتهاها فهل سينجو محمود منها؟ أليست الفكرة الجمهورية سوى نوع مما يروج له الآن من اسلام البيبسي كولا؟ صدقني أنا لا أعادي هذا النوع من الاسلام حتى. أنا أرى فقط ألا حاجة لنا بشيطنة جزء من الاسلام أو جلد الاسلام التاريخي "عشان خاطر عيون حلويين." وقد شاهدت للأسف ندوة عبر الجزيرة مباشر واحداً من " الزعامات العلمانية السودانية" وهو يتعرض للعصر البجيب الزيت من بعض الاسلاميين المصريين لأنه " فارق العصر" بسبب نقد النظام السوداني عن طريق نقد فكرة " أهل الذمة " . فوجدتني أقول : عليك الله يا حيدر ابراهيم تاني ما تعمل كده!
4- وبعد هذا لا نقول إلا ما تقول المسوزنة " العديل راي والعوج راي" إن المسوزنين كانوا اخوان الشياطين!!!!
5- فتك بعافية. |
شكرآ أبدو Abdou ... سأعلق لاحقآ.
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد عبد الماجد الصايم)
|
تحياتى العزيز محمد جمال الدين
شرفت السودان.. و بما أنك أهم بوردابى يزور السودان فى الفترة الأخيرة( طبعاً بعد بروف أمين) فسقف التوقعات عندنا عالى جداً!!
- وين اللقاءات التلفزيونية، الإذاعية و الصحفية؟؟
- وين ندوات الحقيبة و ورش عمل المجتمع المدنى؟؟
و وين الاستقبال الرسمى؟؟ و المخاطبات الجماهيرية؟؟ ما تقول لى الناس دى ضيعة الفرصة العظيمة دى، أحسن أنا بزعل!!
تحياتى و رمضان كريم ياخ..
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: رانيه محمد الشيخ)
|
رانية محمد الشيخ... سلامات
Quote: بركه الما قابلتك :)))))))))))))))))))))))))))))))))))))))))))))))) |
أيوة والله حسرة علي أنا دا. قالوا تعاقبنا في رحلة جبل أولياء ... بس الشباب ما قصروا رسلوا الصورة... روعة حا أنشر بعضها بعد شوية : ). --- يا خ أنا لو قابلتك كان كتبت بوست شين زي دا. كان بكون العنوان: أنا ورانيا والنيل والقمر : ).
شكرآ للطلة الجميلة رانيا.
--- معليش يا صحاب ردينا على رنو أول مش لانو كلامها خطير وبس لكن برضو لأن الإتكيت بقول: Ladies first
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
أبو ذر عمر "العزيز" سلامات
Quote: و وين الاستقبال الرسمى؟؟ و المخاطبات الجماهيرية؟؟ ما تقول لى الناس دى ضيعة الفرصة العظيمة دى، أحسن أنا بزعل!! |
دا كل حصل يا أبو ذر أفووو نحن بنقصر من الكلام : ).
شوف دي مثلآ مخاطبة في ميدان أبو جنذير***: http://youtu.be/mJWUxuWfu2I
بعدين في مجد وإستقبال وإحتفاء وجمال أكتر من الرحلات لجبل أولياء والسبلوقة "؟!"... أنا لا ارى!.
--- *** دا لما كان في أمل للوحدة بين شطري البلاد... بحاول في براءتي المعهودة أقنع الخواجات بجدوى الوحدة!.
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
العزيز عز الدين عباس الفحل... سلامات
شكرآ كتير على المجاملة الجميلة.
وأما فيما يختص بقولك:
Quote: سؤال قليل الاحـراج :- لم لم تلتقي بالبروف ادريس سالم بالســودان ؟ جامعة الخرطوم ، وسبق أن مدحته لنا ، البروف ادريس سالم ، عالم لا يشق له غبار ،،،
|
نعم، تمام، هو كذلك والمزيد... البروف ادريس سالم الحسن هو أحد أهم أساتذتي المبجلين ... وكم أنا فخور أن تتلمذت على أيدي أناس من أمثاله بجامعة الخرطوم... نتمنى أن نكون في حسن ظنهم بنا وبقدر ولو صغير من الجهد الذي بذلوه من أجلنا... لهم المحبة... ولو حدث وأن جئت إلى السودان وهو حلمي العاجل من أول الأشياء التي سأسعى لها هو لقية أساتذتي وفي مقدمتهم بروف إدريس. (هو في السودان هسه؟.).
تقبل أصدق التحايا وكل عام وانت بخير...
محمد جمال
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
نقطة فنية في غاية الخطورة!...
أن ليس هناك شاهدان فقط (الشاهد العايش المشهد + الشاهد الغائب العائد) كما يوحي به سردي السالف وإنما هناك أيضآ "طبعآ" الشاهد الغائب (ناس المنافي من غير العائدين "بعد") ولكل واحد منهم الحق في الشهادة بالتساوي ولكل واحد منهم نقاطه المحددة في محصلة الشهادة.
وهذا ما لزم التنبيه له.
يتواصل... نظرة في الشاهد...
يتواصل... هل تغير الشاهد أم تغير المشهد!.
محمد جمال
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: Abuzar Omer)
|
الاخ محمد،
سوف أتحدث قليلا عن الشاهد، هنا يختلف الشهود علي حسب رؤية كل للمشهد، هناك شاهد يملك من النضج والوعي والإدراك لاستيعاب المشهد واختزالة علي رغم البعد وهناك من الشهود قد يصطدمو بالمشهد بمجرد نزولهم الي ارض المطار، قليلا من بلاد المهجر قد تغير نظرة الشاهد بل اقصد الشاهد نفسة واقصد خصيصا امريكا وشمال غرب اوربا، التكوين النفسي لفرد تلكم المجتمعات تقبل التأقلم والتغمس بسهولة في ثقافتها اقصد مثلا اذا هاجر سوداني الي تنزانيا وبدورة اذا هاجر سوداني اخرالي امريكا فنري تمحور الثاني يكون اكثر قربا الي الثقافة الامريكية منة للآخر الذي هاجر الي تنزانيا بكيفية المدة الزمنية ذاتها وهذا في حد ذاته قد يغير من رؤية الشاهد للمشهد بعد العودة،
النقطة الثانية: سرعة تغير الشاهد مقارنة بسرعة تغير المشهد، ايهما اسرع في الحالتين، ممكن اقول انو السودان منذ الاستقلال وقريب لنهاية نميري لم يكن سرعة تغير المشهد فيه سريعا مقارنة بالتغير الذي احدثه انقلاب الانقاذ حتي يومنا هذا، تغير المشهد في السودان الان ارتبط بتغير ايدولوجي وثقافي اكثر منه مكاني ولذا سوف يشعر القادم الي السودان بالوحدة وتغير الناس حوله وتغير الكثير حتي في القناعات، لقد بدا الانقاذ بتغير البشر فتغير بعضهم فمن كان زميل لك في دراسة او صديق جار قد لم يكن هو نفسة الذي كنت تعرفة من وقتك آنذاك , فهذة النقطة بالذات فد يكون لها بعد كبير جداً في تغير المشهد،
النقطة الثالثة: التغير العالمي الاجتماعي من ادوات اتصال او فضائيات ، ما عاد تلفزيون السودان هو السودان، انفتحنا علي عوالم وثقافات كثيرة من حولنا بادراك او من غير إدراك بوعي، اصبحت البنت السودانية تتفن في عالم المكياج واصبح الرجل السوداني يتقبل علاقة القيل فرنيد وبكل بساطة، قد اكون موافقا او غير موافقا لتلكم ولكن التحول اصبح سمة وسريع في عالمنا ، ما اصبحت الخرطوم قريبة ولا لندن بعيدة، شوق المهاجر او المغترب الي السودان تتخلله علة وهي اعتقاده بثبات الواقع الذي فارقة من غير إدراك للتحولات السريعة التي مر بها او مر بها الوطن وتمكين نفسة لهذا التحول، النظرة الموضوعية لة تحتاج الي واقعية وإدراك التغير، ولكن اعتقد انو تغير المشهد اسرع وأعمق من تغير الشخص الشاهد،
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
الاخ الفاضل محمد جمال الدين
حياك الله
السرد الجميل ، ينبع عن رغبة في الكتابة ، علي نمط الابداع ، وشد انتباه القارئ الفطن ، ليتكئ علي شلالات الروعة ، متابع بوعي معك ،
يا ملك ،،،
سؤال قليل الاحـراج :- دائـمـاً يترك الاستاذ الجامعي بعض الاثر الطيب ، في نفوس الطلبة ، ويتوهج ذاك النسيم عقب التخرج ، البروف ادريس سالم الحسن ، جامعة الخرطوم ، هل ترك ذاك الدهاش الطيب في نفسك ؟ ،،،
. .
عزالدين عباس الفحل ابوظبي. .
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: عزالدين عباس الفحل)
|
هذا البوست ربما كان محاولة إستباقية مني "ذاتية" تجي من العقل الباطن للتقليل من وقع الصدمة المتوقعة عندما أصل السودان بعد 19 عامآ من الغياب.
يعني بحاول أتخيلني وأجد الأعذار مقدمآ لصدمتي... الوعي بالصدمة التي يبدو أنها حتمية عبر الإحاطة بأسبابها وميكنيزمات إنباعثها... و في الحقيقة أنا جاي مصدوم قبل ما أركب الطيارة لما سمعته من الحكاوي المرعبة وهول التغيير الجسيم الذي أصاب الناس في مقتل وطال الطبيعة بالقسط الأعظم... وأظن أحيانآ أن تنظيري لن يجديني شي!.
بس برضو أسمحو لينا نستمر في التنظير إمكن إنفع شوية في حتة ما... وإلا فهي ونسة أتمناها ممتعة لفناجين الجبنة دي : ).
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
سلامات محمد....
اترحم بداية علي من سقطوا برصاص النظام اليوم بنيالا, قدر شنو الواحد بحس انه صغير وت افه قدام الاستقبلوا الرصاص باجسادهم الهزيلة اليانعة والببيتوا الليلة في زنانيين النظام واعرف ان منهم من رفض التوقيع علي تعهد مكتوب بالكف عن النشاط المعارض مقابل اطلاق سراحه اسف علي المدخل لكن بعتقد انه ما بنفصل عن موضوع البوست. اول احساس بيداهمنى هناك هو الاسي,الاسي لي حال الناس وحياتهم,بمشي السودان سنويا مرات مرتين في السنة(برغم الحاصل لكن ما بحس اني اخدت اجازة الا لما امشي السودان!!!!) طلعت بي ملاحظة انه في العالم دا (او اغلب اماكنه) مستوى حياة الناس واغلب الحاجات التانية المرتبطة بالانسان (صحة ,اقتصاد,حريات عامة,قوانيين,اخلاق البني ادميين ساكت كدا)كل الحاجات دي يا ماشة لي قدام او ثابتة في محلها الا في السودان كل شئ ماشي لي وراء بلا استثناء!!. الانطباع التاني هو الحيرة,بستمتع مرات بمراقبة الناس هناك وهم منفعلين بي البحصل برة اكتر من انفعالهم بي حالهم,تلقي الناس كلها متابعة سوريا وتدعوا علي الاسد رغم انه انا مثلأ لو اتوفر لي المستوى المعيشى بتاع السوريين دا الليلة دي برجع السودان!. في حاجة تانية ما عارف اوصل فكرتي فيها كيف,لكن ممكن تفسر النقطتين الفوق ديل ومعاهم كم حاجة تانية وهي انه الواحد بشوف الصورة او الواقع احسن لما يطلع منه او لما ما تكون جزء منه, شخصيأ انا في كم حاجات حاصلة ما اتبين لي خطلها ومفارقتها للطبيعى الا لما طلعت برة (دي ممكن تكون واحدة من الميزات القليلة للاغتراب, كنموزج مثلا العنصرية كنت هناك برفضها بدافع من وعي قليل مكتسب بالانتماء لتنظيم في الجامعة والاطلاع لكن لما تتعرض نفسك للعنصرية بفرق كتير جدأ من رفضك ليها بدوافع تانية(دي في الحاجات السلبية لكن الكلام برضوا ممكن ينطبق علي الحاجات الايجابية كالصحة والتعليم مثلأ).
اخيرا شكرأ علي كل الكتابة المحفزة دي سواء هنا او في فور اول(بنفهم جزء والما بنفهمه بنقول كتبته وانت مستعجل!!!!).
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: Elmuiz Haggaz)
|
العزيز Elmuiz Haggaz
Quote: اترحم بداية علي من سقطوا برصاص النظام اليوم بنيالا, قدر شنو الواحد بحس انه صغير وت افه قدام الاستقبلوا الرصاص باجسادهم الهزيلة اليانعة والببيتوا الليلة في زنانيين النظام واعرف ان منهم من رفض التوقيع علي تعهد مكتوب بالكف عن النشاط المعارض مقابل اطلاق سراحه اسف علي المدخل لكن بعتقد انه ما بنفصل عن موضوع البوست. |
دعنا قبل كل شي نتوقف عند هذا المشهد المؤلم.... ولنقف في الحقيقة والخواطر للحظة حدادآ على أرواح الأبرياء من أبناء وبنات أهلنا البررة في نيالا وغيرها من المناطق التي مسها الضرر والعدوان. ونعزي أهالي الشهداء أينما كانوا ونتمنى للجرحى الشفاء العاجل كما نرفع صوتنا عاليآ في وجه السلطان الجائر حتى يكف عن الظلم والعدوان وبكل ما نملك من وسائل.
--- شكرآ لعبورك من هنا معز ومشاركتك لنا قسطآ من رؤاك وتجاربك... وأتمنى أن يجود صبرك بالمزيد في المستقبل.
تحياتي
محمد جمال
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: محمد جمال الدين)
|
يا اخونا قصة الشاهد والمشهد دي بتذكرني بي ال (Jet Lag) الي هو الحالة البتحصل للبني آدم من الرحلات الجوية الطويلة. بي كلام الشارع بكون زمنك فارق وماعارف الحاصل شنو في حاجه ماراكبة عدلا. نفس القصة مشابهة لي موضوع البوست بتاعك الي هو في اعتقادي مسالة بتاعت فروقات زمن. لكن عندي ليك سؤال بجي في بالي من كم يوم او بالاصح من ماقريت البوست بتاعك هل الحالة دي سودانية صميمة؟ يعني كل الناس بتهاجر هل لمن يرجعوا لي بلادهم بتكون في فرق الزمن دا؟ او جدلية الشاهد والمشهد دي؟ هل النظرية دي نعزيها الي ظروفنا السياسية والاقتصادية والاجتماعية؟ ام نحن عاطفيين اكتر ومربوطين بالماضي اكتر من الحاضر؟ يعني لو كا في استقرار نسبي في السودان سياسي اجتماعي اقتصادي وانت رجعت السودان بعد 15 سنة اغتراب هلي زمنك حيكون طبيعي ومافارق؟وهل حتقدر تسبح مع التيار بسهولة؟ ام موضوع الشاهد والمشهد نسبي في كل الاحوال؟
موضوع شيق جدا حاجيك راجعة تاني اكتب ليك عن تجربتي الشخصية. تحياتي.
| |
|
|
|
|
|
|
Re: زيارتي الأخيرة للسودان (هل تغير الشاهد أم تغير المشهد)؟! (Re: yaser mostafa)
|
سلامات yaser mostafa
Quote: يا اخونا قصة الشاهد والمشهد دي بتذكرني بي ال (Jet Lag) الي هو الحالة البتحصل للبني آدم من الرحلات الجوية الطويلة. بي كلام الشارع بكون زمنك فارق وماعارف الحاصل شنو في حاجه ماراكبة عدلا. نفس القصة مشابهة لي موضوع البوست بتاعك الي هو في اعتقادي مسالة بتاعت فروقات زمن. لكن عندي ليك سؤال بجي في بالي من كم يوم او بالاصح من ماقريت البوست بتاعك هل الحالة دي سودانية صميمة؟ يعني كل الناس بتهاجر هل لمن يرجعوا لي بلادهم بتكون في فرق الزمن دا؟ او جدلية الشاهد والمشهد دي؟ هل النظرية دي نعزيها الي ظروفنا السياسية والاقتصادية والاجتماعية؟ ام نحن عاطفيين اكتر ومربوطين بالماضي اكتر من الحاضر؟ يعني لو كا في استقرار نسبي في السودان سياسي اجتماعي اقتصادي وانت رجعت السودان بعد 15 سنة اغتراب هلي زمنك حيكون طبيعي ومافارق؟وهل حتقدر تسبح مع التيار بسهولة؟ ام موضوع الشاهد والمشهد نسبي في كل الاحوال؟
|
أسئلة ذكية جدآ في تقديري... ربما جعلت البوست أكثر سلاسة... وجعلتني أكثر تفاؤلآ!.
Quote: موضوع شيق جدا حاجيك راجعة تاني اكتب ليك عن تجربتي الشخصية.
|
وفي إنتظارك يا صاحب الرؤى.
محمد جمال
| |
|
|
|
|
|
|
|