Quote: نحن هسع يا حسن طه محتاجين عبد الكريم عشان يفك الاشتباك بتاع امتحان الكابلي الذي اقره حسن طه ونكره الدكتور عبد المحمود مع انو حسن طه ما قال حاجه عن سنة الامتحان ...!!!
الباشمهندس طارق
** إقرار سعادة المُستشار ود طه كان صريحاً:-
Quote: عندما كنا في بحري الثانوية وفي امتحان الشهادة السودانية اذكر - ان ما غلطان ويصححني الاخ الموثق عماد - ان الفنان الكبير الاستاذ الكابلي تسجل مع طلبة المدرسة للامتحان من منازلهم .
** إقرار د. عبدالمحمود كان ضمنياً لم ينكر بل أفاد أنه :-
Quote: أثارنا الأمر كثيراً غير أن الأستاذ الكابلي لم يأت للجلوس للامتحان معنا..
*** وكلمة معنا هنا تكفي بأن ثلاثتهم يحملون أرقام جلوس للإمتحان حضر المُستشار والدكتور وتغيب الفنان... *** فيما يتعلق بسنة الامتحان يتم إحالة الامر للخبره ويتحمل الباشمهندس طارق رسوم الخبره.. ## رفعت الجلسه... محكمه....
11-25-2008, 07:37 PM
عبدالكريم أحمد الامين عبدالكريم أحمد الامين
تاريخ التسجيل: 08-04-2008
مجموع المشاركات: 6343
Quote: ياعبدالكريم.. أنت ما ملاحظ أنو أنا أقنطر ليك الكورة وأنت تهدف في الشبكة
ود السر كرار بعد التحليل الجيوفيزيائي لهذه الظاهره كما أفاد العلماء أن التجاور في المنازل في ظل وجود ساحه فاصله تنقل تفاعل التخاطر وإن تباعدت المسافات وان هذا الامر يحدث بصوره ميكانيكيه ولاإراديه ولادخل لإرادة المُتخاطرين في ذلك... ** والله أعلم.. ودام الود بيننا.. (ابو محمد فؤاد - دبي)
11-25-2008, 07:59 PM
عبدالكريم أحمد الامين عبدالكريم أحمد الامين
تاريخ التسجيل: 08-04-2008
مجموع المشاركات: 6343
Quote: طارق وحياة بت السعيد.. بقيت تفط سطر. يأخي كيفن ما سألنا عن أبو علي. أنت ما شفتني قلت ليهو بركة الشفنا صورتك....
ود السر كرار
إنت فاكر الصوره الموجوده في البروفايل بتاع طارق ميرغني هي صورة حسن ميرغني (ابو علي) صحي النوم طلعت إنت الفاطى سطر الصوره اكان مااخاف الكضب صورة الشاعر المرحوم :- أبـو آمـنـه حـامـــد..
11-26-2008, 03:13 PM
عبدالكريم أحمد الامين عبدالكريم أحمد الامين
تاريخ التسجيل: 08-04-2008
مجموع المشاركات: 6343
Quote: بس وين شعر (رٌشك في الهند)... تتذكره يا طارق.؟؟؟
تعرف يا طارق لغاية هسع ما لقيت لي واحد هندي أسمه (رشك)..
ود السر كرار بطريقتك دى حترجع المدونه الطبيعيه والحساب الاملائي وأعمال الطين ,, ومع رشك في الهند صديقنا أحمد في مصر وجون في هولندا ولا استراليا ماعارف وآفو في الصين (هسه لقاك صيني اسمو آفو) لما يلاقيك هندي اسمو (رشك).
** يالمناسبه دى :- كان معانا واحد دفعه في الاوليه الاستاذ يوم السبت وبعد التفتيش اياهو بتاع النظافه قال إنشاء الله يوم الاثنين حنمشي مصر عشان نزور صديقنا أحمد ,, صاحبنا جاب غيارتو وستف شنطتو بإعتبار أنو مسافر مصر بس كان ناقصه الزواده...
لا حولالالالالالالالالالا ياكمال ده قلعتو من ياتو ركن؟ تذكر الصورة وهو بيغرس في الأرز؟؟؟ . يآآآآآه ... ده انت مش ديناصور وبس .. ده انت من ما قبل الانفجار العظيم ال Big Bang ظآآآطو .. "بلهجة المنبر"
Quote: يا خوانا بهناك في بوست بتاع مغتربين ... المتاوقة بس ما بتنفع .. دخول توش ولا بلاش.
سعادة المُستشار ود طه بيتك بهناك محروس والليله الدخول ليهو كان توش وبنصوص مواد الدستور لسنة (2005) وقانون تنظيم شئون المغتربين لسنة (1998) وقانون المحكمه الدستوريه رقم (13) لسنة 1998 .. *** المساعي مبذوله مع الزملاء ببحرى لمدنا بإى لائحه إجرائيه أو تنظيميه لرفع الدعاوى الدستوريه..
### ودائماً بحرى فووووق لمُناصرة أصحاب الحقوق المهضومه...
11-26-2008, 10:55 PM
ناهد بشير الطيب ناهد بشير الطيب
تاريخ التسجيل: 02-08-2008
مجموع المشاركات: 4180
لا حولالالالالالالالالالا ياكمال ده قلعتو من ياتو ركن؟ تذكر الصورة وهو بيغرس في الأرز؟؟؟ . يآآآآآه ... ده انت مش ديناصور وبس .. ده انت من ما قبل الانفجار العظيم ال Big Bang ظآآآطو .. "بلهجة المنبر"
يا دكتور كمال كرار ده يااخي اقدم من الكسره والانفجار العظيم ده انت قايل منو العملوا ؟؟ بيقولوا تحا تحت انو كمال كان شايل جرس عجله وقلبوا
والفتحه حشاها بارود وللاسف طلعت الماده تي ان تي فحصل الانفجار العظيم لكنه محظوظ طار فد طيره ما رك الا لمن الارض بردت.... وهذا هو رأيي في الموضوع.
هذا يدل علي ان الاخ كمال جاء بمرحلة متقدمه عن الديناصورات بي ذات نفسها.
اخي حسن طه سيف بادي كان صديقي وهو رجل موهوب وفنان بحق وحقيقه وكان لديه القدره علي عمل سيناريو مصور مثل مجلة سمير .لا ادري اين هو الآن؟؟
بعدين من ناحية القروش اطمئن عامله زيرو كبير عشان كده بطني والله طامه وانا عارف انو في النهايه كرار موظف في حكومه لا يستطيع سوي عدد محدودفيها من
اجراء اي تغيير وكلنا نعلم ذلك فالقصه حتكون في النهايه فنجطه من كرار وحيروق في علبو بس اديها صنه .
انا لست متشائما بل التغيير كلنا نعلم انه صعب وصعب جدا في ظل هذه الاوضاع.
11-27-2008, 07:41 AM
Tabaldina Tabaldina
تاريخ التسجيل: 02-12-2002
مجموع المشاركات: 11844
كتبتوا والله ما قصرتو أبدا في بحري ولسه بحري عايزة كتابة وكتابة بس في حي جديد في بحري يا جماعة والله أذهلني حي جميل جدا وليه مستقبل واعد في بحري وهو حي العزبة والله حاجة جميلة جدا جدا وهذا الحي موازي للصافية وشمبات الأراضي من الناحية الشرقية على إمتداد المنطقة الصناعية شمالا ..
الحاجة التانية ما سطره الأخ/ عماد عثمان عبر بوابة الأخ/ طارق ميرغني حفظه الله في البوست الذي رفعه للباشمندس بكري وتضمن شخصيات من بحري أحب إضافة معلومة بسيطة يمكن الأخ/ عماد خانته الذاكرة فيها وهي :- أن المرحوم لاعب الهلال شيخ إدريس لم يظهر في الدورة المدرسية عبر بحري الشعبية وإنما كان ظهوره عبر بحري الأميرية (2) وكذلك اللاعب عماد خوجلي وكان يعرف بإسم معتمد خوجلي وكذلك اللاعب عصام مصطفى برضو من الأميرية (2) وأقول ليكم سر إنو معتمد خوجلي كان زميلي وصديقي في الأميرية (2) وكان فعلا حريف بحق وحقيقة لكن جسمو كان صغير شديد وأذكر إنو كان عندنا مباراة بحري الأميرية (2) وفريق من حلفاية الملوك وكان يشرف على الفريق أستاذنا الجليل يوسف محمد خير الذي كان يسكن المزاد ، المهم معتمد خوجلي ما كان ضمن التشكيلة الأساسية للفريق المهم في نهاية المبارة معتمد خوجلي قال لي أستاذ يوسف يا أستاذ بالله أديني فرصة عليك الله ألعب العشرة دقائق الأخيرة دي ، أستاذ يوسف قال ليه إنت يا معتمد حريف ولعاب بس أنا خايف عليك ما يكسروك معتمد قال ليه يا أستاذ يوسف أنا عندي قلم رصاص ليه 3 شهور ما إتكسر وبرضو ما خفت عليه ليه تخاف علي ، ضحك أستاذ يوسف وأشرك معتمد خوجلي في آخر 10 دقائق أحرز فيها معتمد هدف من تمريرة مني ومن اليوم داك صار معتمد خوجلي أساسي في التشكيلة وأصبح الهدف الذي أحرزه سببا في تقوية أواصر الصداقة بيني وبينه . أما شيخ إدريس كباشي فهو زميل أيضا في الأميرية (2) وكذلك عصام مصطفى وبرنجي والحارس عبدالحليم عبدالرحمن وما تنسوا الحارس العملاق أحمد آدم وكنا نطلق عليه أحمد حجبات لأنو دايما كان يلبس الحجبات وأيضا الممثل القدير نبيل متوكل برضو كان من الأميرية (2) وقد تزوج من الممثلة إخلاص نور الدين .. هذا ما وددت إضافته ..
تبلدينا سلام .. ونحن في إنتظار حضورك الجميل عبر إطلالاتك المميزة وتعليقاتك خفيفة الظل ..
سيف الدين الفاضل
Quote: أحرز فيها معتمد هدف من تمريرة مني ومن اليوم داك صار معتمد خوجلي أساسي في التشكيلة
لو كنت هدّفت مباشرة في القون وأحرزت الهدف كان أحسن ليك وكنت أصبحت مشهوراً بدل معتمد وبدلا ما أنت مغترب في المملكة كما هو الحال الآن كنت بقيت كفيل لي طارق ميرغني وكمال كرار ورشك الهندي ../B]
11-27-2008, 04:18 PM
عبدالكريم أحمد الامين عبدالكريم أحمد الامين
تاريخ التسجيل: 08-04-2008
مجموع المشاركات: 6343
Quote: حسب المؤشرات الواقعية على ما يبدو سأنضم لهذاالركب قريباَ ___________
تبلدينا الف مرحب بيك في ست الهوى والطراوه..
Quote: اها بيتوكم بوين ؟
إنت نازل من إى كوبرى يؤدى الي بحرى إعتبرو بيتك الي أن تصل شمالاً الي ود رملي وواوستي وشرقاً الي أمدوم وابو دليق والحاج يوسف ,, وغرباً الي الصبابي والشيخ موسي وحلتي خوجلي وحمد وجنوباً الي الاملاك ومابين كل هذه الإتجاهات يمكنك أن تطرق إى باب في إى حي فكل هذه بيوتنا وتُرحب بك... ** ودام الود بين الجميع.. (ابو محمد فؤاد - دبي)
11-27-2008, 10:35 PM
عبدالكريم أحمد الامين عبدالكريم أحمد الامين
تاريخ التسجيل: 08-04-2008
مجموع المشاركات: 6343
يوم الجمعة ونحن صغار فى بحرى كان يوم اللمة بتاعة الاهل الخالات والخيلان والعمات اخوات الوالد ودائما كان بيكون عندنا فى الصافية ... بنقوم بدرى بترتيب البيت وتبخيره وفريش الملايات وتحضير كبابى العصير وكبابى الشاى الاحمر المبخرة بالمستكة ...وكانت على انا مسؤولية النظافة بس . ...ومسؤولية المطبخ بس ...حتقولوا ليه؟ براى مافى زول بيساعدنى ؟ لا مافى ..... لانى بت وحيدة وسط 5 اولاد ...سيادتهم الشباب اكبرهم بيمشى سوق الخضار بحرى والتانى بيذاكر... (طول السنة بيذاكر ) (بقى مهندس قد الدنيا ماشاءالله عليه) ...اما الثالث لسة بيكون نائم تصحيه تشيل الملاية من تحته وتفرش التانيه وهو لسه نائم والرابع فى الكورة فى الشارع......مع اولاد الجيران ....او شغال غسيل فى فنايل الفريق والخامس (شايلاه فى صفحتى) ..... ....... واقوم بكل مايلزم ماعدا الغداء ..لانه الخالات بيجن شايلات حلل وصوانى فرن تكفينا باقى الاسبوع ...كنا تقريبا كعائلة كدة حوالى 43 شخص (طبعا عديتهم هسى رغم موت 4 منهم ) رحمهم الله ...
اول الحضور زوج خالتى يأتى ومعه هديتى المفضلة مجلة ماجد وميكى او سمير وبطيختين ...ويبدأ بقراية الجرايد ... وبعده تبدأ الوفود فى الحضور ...وتبدأ الوالدة يطول الله فى عمرها برمى القراصة ...القراصة الحارة بنوعين من انواع الايدامات (مفروك ودمعة ) ...والبصل والسلطات والشطة وماالى ذلك من (اكسسوارات) القراصة ...
ويبدأ الاكل فى نهم وجوع وحب وانبساط (ايام اخالها لن تعود) وبعده كل الى سرير.. وجريدة ويتلمن البنات والونسة وغسيل عدة الفطور وفتح الصوانى الجات من برة والحلل والاستعداد لترتيب عدة الغداء ....بعدها يقوم كل الشباب والرجال والوالدة والخالات والعمات وازوجات الخالات الى المسجد...... ومعهم منو ؟ ....انا ...وكانت الصلاة هى ملاذى ..... صلاة الجمعة فى مسجد (المسرة) بالصافية هى المكان الذى احبه والالتقاء فيه ببنات الحى .... والسلام على كبيرات الحى ...
المهم بنرجع البيت وبتبدأ مراسم الغدا ...ووضع (الماكياج ) الاخير للصوانى .... وصدقونى كلما اتذكر هذه (اللمة ) ابكى لانفراط ذلك العقد.... الذى تناثرت حباته يوم ان عرفنا شيئا اسمه اغتراب وسفر ... وتأشيرات من كل الالوان ..وشنط من كل الاحجام....
الان اين الخال (توفى رحمه الله) وبناته واولاده مسافرين ومسافرات الخالات وحيدات والاولاد بالخارج ...العمات هاجرن ؟ الحى نفسه وحيد ...ومازالت (الكورة ) قرب الباب تسأل من يرفعها ... اما (العدة) و(الصاج) فقد ملأهم الغبار.... والصحون تشكى طول انتظارها فى (فضية البيت ) والوالدة (يطول الله فى عمرها ...فقد عرفت الاغتراب وجاورت بيت الله وجاورتنا نحن ابناءها .....
مجرد سؤال ؟ (بعد مااغتربت اسرتنا(اتلمينا فى مكان اخر) ...هل مازالت هناك لمة وقراااصة حاااارة )؟ هذا ماسأجيبكم عنه الحلقة القادمة فترقبونا وحصريا هنا ...فى بوست الطراوة ده ..بتاع كمال
كمال يديك الف عافية ....
وقبل ماافوت حلفتكم كده ... كان ماحكيتوا لينا جمعتكم فى بحرى كانت كيف .؟
.
جمعة مباركة بس ...الله غالب
11-28-2008, 01:03 PM
Kamal Karrar Kamal Karrar
تاريخ التسجيل: 11-16-2006
مجموع المشاركات: 3734
أها نرجع نقعد في الخور..في حضرة أبو النور وصلاح جربوية (الأول معانا عن طريق أخيه الدكتور الأستشاري إبراهيم العجب) والثاني خليك منو,,,
يعني نرجع البيت بعد الساعة الواحدة صباحا.. وكل واحد ودرجة صياعته..
المهم تبقى حريف وتدخل بعد ما ترفع الترباس بشويش عشان الوالد ما يصحى.. وبرضو يصحى... وتستلم حدرة وعبارة أنت ما عايز تبطل الصياعة دي يا ولد..!!!
أها طبعا الجمعة بنكون مدمرين... والنوم في الحوش.. والشمس تطلع.. ونجر العنقريب أو السرير من ضل لضل..يا أولاد قوموا .. الصلاة.. قوموا ونقوم متثاقلين للدش ومن بعد ذلك للصلاة...ونرجع.. وبعد داك ننوم ثاني
والمنظر الذكرتيه وزيارات الأهل طبق الأصل مع الإختلاف في التفاصيل...لكن بس عشان حلفتينا أديناك إضاءة سريعة عسى ولعل.. تشحذ ذاكرة أصدقائنا في البوست..
لكن يا ناهد أجمل من قراصة الدمعة ما أظن...
بس كمان بعدها تحلية قراصة بالسمن والسكر...قبل إختراع الكلوسترول
أوع تقولي لي مخبازة.. ولا الثانية بتاعة الجداويين نسيت أسمها
11-28-2008, 02:43 PM
ناهد بشير الطيب ناهد بشير الطيب
تاريخ التسجيل: 02-08-2008
مجموع المشاركات: 4180
ياكمال حكاية تنوموا من ضل لى ضل دى ...كانت بتجنن البنات فى البيت كيف بتجنن كل البنات العندهم اولاد ذكور فى البيت .... وطبعا الحاجة دى كلكم عايشتوها صح؟ وكاويتوا اخواتكم البنات (يامجرمين) وشكلتكم الطوالى مع البنات الاخوات ...فى ..
يابرعى ماتقوم....الواطة صبحت ياخى انا مساهر امبارح خلينى اتم نومتى اخليك شنو قوم الشمس دى ماجاتك ياخى خلينى شوقى ليك شغلة تانية طيب قوم دايرين نقش تحتك.... ونلم المراتب دى ماتقشوا الماسككم منو...... ياكمااااااااال ياخى قوم بطل الدغالة يابت عليك الله زحى من جنبى هسى ...ماتوترينى اوترك شنو وانت نائم.... نايم فى راسك ...مافى سريرى ده بالله عاين دى طيب خش جوة كمل نومك...جوة مفرش لا...جوه الكهرباء قاطعة ...
الغريبة ياكمال يااخوى ... اسالك كدى ....كنتوا كيف يتتكلموا وترجعوا تواصلوا نوم تانى؟ عارف هسى مع الغربة والهدوء البيلغنا ده .. ان الابرة وقعت نصحى مفزوعين زى الجات قنبلة... الراجل زاتو يفتح الدولاب زى الحرامى عشان يشيل القميص... (مافى زول يتلحنى وبالذات طارق ويجى يقول لى مابتطلعى انتى القميص ليه وتحضريه )
نرجع لجمعتنا ولمتنا ....
اما بخصوص (الايدامات) اللى هى (الملاحات) فغلبنى زيك اجيبها..... وقلت يابت نزليها اصلوا العالم بقى قرية صغيرة وكدة وجماعتك ناس بحرى اغلبهم مهاجرين (ومغتربين داخليا) فااكيد حيعرفوها ...
المهم انت ماسألتنى عن يوم الجمعة فى الغربة ؟
يلا هسى الساعة كم ؟قول 4 عصر الجمعة مش ؟ انا وين؟ فى النت معاكم ... تعال شوف...
هنا اتلمت اسرتنا الكبيرة كلها ... بوصفى البت الوحيدة وسط الاولاد الذكور حبيت انقل نفس الفكرة الاتعودنا عليها حقت البيت الكبير المفتوح يوم الجمعة تتصل على الوالدة (يطول لى فى عمرها يااارب) ...تقول ليك انا نمت بعد صلاة الصبح ... كنت بتونس مع اخوك البيجينا فى الاسبوع مرة ده ... طيب ياحاجة تعالوا....قوموا اتنفضوا ... ...تقول لى كدى نشوف الاولاد ... وتبدأ تصحى اكبرهم ... اختك ضربت قوموا يلا .... لبس اولادك ارحكاكم... يرد بانه الليلة هو يوم اجازته ومابيقدر يتحرك ... (طيب مازمان كان برضو الجمعة اجازة ) ولا شنو ؟
التالت لا لا لا ...عندى تقرير لازم اكتبه ...وشفع ناهد هناك جنهم لعب وبيطلعوا لى فى ضهرى وهاك يالعب...وبعدها اكسل من كتابة اى شىء
اصغرهم ... 24 ساعه نائم .....
وتضيع الحجة... وتضيع الاسرة.... ..وتضيع الجمعة .... وتضيع القراصة غير مأسوف على صحنها (السرقته من فضية الحجة فى السودان) فى اول اجازة زمااان لى بالسودان ...تقديرا له (للصحن)...(طبعا لازم يغترب معانا)
ولايبقى شىء غير الدمعة ... اقصد الدموع الشربنا منها مايكفى لارواء حديقة كااااملة من حدائق بحرى
الجمعة زمان كانت بمثابة عيد صغير من حيث أنه يوم الراحة الوحيد سواء أيام الدراسة أو بعد الإلتحاق بالعمل فبعد ستة أيام ننتظر بفارغ الصبر هذا اليوم الجميل لأخذ الراحة المعتادة ونومة ممتدة تعوض صحيان بدري في بقية أيام الإسبوع المملة ..
جمال هذا اليوم المبارك يتجلى في إلتئام شمل الأسرة من خلال فطور متفرد في الغالب قراصة بالدمعة ، أوالفول مع السلطات ، وفي أيام معلومات سمك يحمر في البيت وفي أيام أخر سمك أذكر أن الوالدة رحمها الله كانت تشتريه جاهز من النساء اللاتي كن يجلسن في مكان مخصص لهن يقع شرق سوق بحري ، في هذا المكان تجد السمك والطعمية والفسيخ وتجد كذلك الكسرة والعيش بأنواعه المختلفة وكنت في بعض الحالات النادرة أذهب لشراء متطلبات البيت من سوق بحري وفي معظم هذه الحالات كنت لا أجد الإستحسان بما جلبته من أشياء فأحلف بعدم الذهاب مرة أخرى ..
في حالات نادرة جداً الفطور يكون فسيخ مع ضرورة وجود البصل رغم ما يقال بأنه غير مستحب يوم الجمعة ولكن أنها الحقيقة لا فسيخ بدون بصل كما لا شمال بدون جنوب ..
بعد الإفطار الواحد يكون مخدر وتنتابه حالة من النعاس ولكن لا تستطيع النوم حتى لا تفوت صلاة الجمعة فكنت أقضي هذا الوقت في قراءة الجرائد والمجلات حتى يحين مواعد صلاة الجمعة والصلاة غالباً في مسجد أونسة وخطبة الشيخ/ محمد السيد إبراهيم الذي أعتقد أنه لا زال إمام وخطيب هذا المسجد منذ ثمانينات القرن الماضي وحتى الآن وأذكر من ضمن مقولاته الشهيرة المتكررة للمصلين "أربطوا الأحزمة" وكان ذلك في بداية التسعينات ، الآن حتى تلك الأحزمة تقطعت ترى ماذا تبقى للناس لربطه ..
الغداء في الغالب الأعم يكون غداء عادي لأن الواحد يكون فاطر فطور جامد والحالة تكون وسط بين الجوع والشبع خاصة إذا كان الفطور متأخر شوية وكان قراصة وملحقاتها .. برنامج ما تبقى من هذا اليوم الجميل حافل بالعديد من الأنشطة الإجتماعية والثقافية والرياضية سوف أكتبها لكم في الحلقة القادمة .. بصراحة الجمعة في المزاد أحلى بكثير من الجمعة في شمبات ..
Quote: بعد الإفطار الواحد يكون مخدر وتنتابه حالة من النعاس ولكن لا تستطيع النوم حتى لا تفوت صلاة الجمعة فكنت أقضي هذا الوقت في قراءة الجرائد والمجلات حتى يحين مواعد صلاة الجمعة والصلاة غالباً في مسجد أونسة وخطبة الشيخ/ محمد السيد إبراهيم الذي أعتقد أنه لا زال إمام وخطيب هذا المسجد منذ ثمانينات القرن الماضي وحتى الآن وأذكر من ضمن مقولاته الشهيرة المتكررة للمصلين "أربطوا الأحزمة" وكان ذلك في بداية التسعينات ، الآن حتى تلك الأحزمة تقطعت ترى ماذا تبقى للناس لربطه ..
ابو رزقه هو الامام دا غير خطبتو الواحده دى الفالقنا بيها من سنة 1980 !!؟؟
Quote: بصراحة الجمعة في المزاد أحلى بكثير من الجمعة في شمبات ..
في دى إنت الصادق خاصةً إذا كان الفطور في النادى (دار الجمعيه الخيريه) أو قدام بيتنا مع المرحوم د. حسن ابوزيد (والد هُشام وحاتم) او مع اولاد حسن الزين تحت النيمه - وقبل الصلاه الجماعه دورو عشرات في النادى ومنها علي الجامع ..
** ابو رزقه ياخي مافي داعى للحاجات دى وخاصةً أنو اليوم الجمعه.. ودام الود بيننا.. (ابو محمد فؤاد - دبي)
11-28-2008, 09:46 PM
ناهد بشير الطيب ناهد بشير الطيب
تاريخ التسجيل: 02-08-2008
مجموع المشاركات: 4180
Quote: في حالات نادرة جداً الفطور يكون فسيخ مع ضرورة وجود البصل رغم ما يقال بأنه غير مستحب يوم الجمعة ولكن أنها الحقيقة لا فسيخ بدون بصل كما لا شمال بدون جنوب ..
:D رزقة كنت دايرة اقول الفسيخ والمش لكن قلت تقولوا علينا (حلب )... لانه جماعتنا (اهل الوالدة ) جنهم مش وفسيخ ...واكلهم كله مالح ... وكلهم عندهم كلى ...لا ...ومايفوتك (التندله) بعد اكل القسيخ دااك ... فاانا عملت حريفة معاكم ......ان قلت ضربوا الفسيخ فى الفطوز معناها الجمعة خلصت ومافى شىء احكيه ليكم
فهمت
______________
شكرا على التزكية بهناك وان كان هناك من يستحقها اكثر منى
11-28-2008, 07:35 PM
Kamal Karrar Kamal Karrar
تاريخ التسجيل: 11-16-2006
مجموع المشاركات: 3734
Quote: وأسخف مشوار ما بحبو يوم الجمعة مشوار شراء الكسرة... بس بعدما الحناكيش بقوا يسوقوا حمدنا الله...
...
عليك الله مش كنا نتعلم العواسة خاصة وانها بقت بالاسكراتش لكن لا والف لا لن نعوس ولو بقت بالكيبورد ... ويحيا يحيا مرسالكم للكسرة (وش شمتان شايقى مشلخ لا وراء)
Quote: وأمسية الجمعة طبعا ثقيلة على الحناكيش لأنها يوم التحضير للعودة للمدارس.. وفي بعض الأحيان.. يكون فيها مشوار للمكتبة
صدقت يااخوى كمال ...ومشوار المكتبة ده مابيكون الاربعاء ولا الخميس وحتى الاختبارات يدسوها ...لمن يتفسحوا بعدين يجيك الواحد يوم الجمعة العصر ومكشر وشو ...عنده اختبار بكرة قرينى ... بمناسبة الدس دى (غير دس الكبابى البنشتريها بوراكم) لما نكون عايزين حاجة من السوق ...ويصادف فاتورة الكهرباء تجى بنقوم نطلب قروشنا بدرى بدرى ...من الساعة 4 ولما نجى طالعين بندى ابونا (البحراوى) الفاتورة...... بنقول ليه الحارس رفعها هسى
Quote:
الجمعة هنا لا فيها حقيبة فن ولا رشا يا كحيل غيثني...
لا يمكن ان يكون الحديث عن يوم الجمعه دون ان ادلي بدلوي فيه
يوم الجمعه الكارب كالعاده من الصبح فتاح يا عليم رزاق يا كريم المشي بالطبع لسوق بحري حيث اجمل خضار في الدنيا .
قال الشاعر
المرنوعه زي شمس الغــــمام في طلوعا اخدر لونا اخدر تاجا خل نظهرلك استنتاجا الالوان جميعو نتاجا كلها للخدار محتاجا
تنقسم المهمة الي الثلاث وجبات
اولا الفطور يبدا من الغلاط في البيت انو يكون تقليه (ندلعها ونسميها ام دقوقه) وقراصه كرغبة الوالد رحمة الله عليه او فسيخ او سمك او سخينه كون الحاله
فلسطين.
لو اتفقنا علي الفسيخ يكون من منو ؟
امشي للحلبيه اوعك في واحده مشلخه جنبها ما تجيب منها المره الفاتت كان حقها ملحو كتير بعدين الحلبيه فسيخها عفن لمن حلو وده المطلوب.
بعد داك توابع الفسيخ البصل الاخضر والشطه الخضراء مع السلطه عموما وفي الغالب نعمل مع الفسيخ اسود " بازنجان" - والبازنجان ده عندو قصه براها خلوها
هسع - البازنجان بالجمر مع زيت السمسم او سلطة طماطم بالدكوه والشطه. اهم شيئ رغيف الفسيخ لازم يكون من النوع ابو لبه لزوم الغموس.
بعد داك صحن صغير بتاع ام فتفت مع الشطه الخضراء .
نفس هذه الاكسسوارات كما قالت ناهد تنطبق علي السمك الذي نحضره من الزنك جنب بتاع التلج.
اما اذا فاز اختيار التقليه فيجب ان يكون معها فول مصلح مع الطعميه وشعيريه في الغالب.
او في بعض الاحيان كبده ابل مع الويكه وطبعا التجهيز بواسطة الدقيق والعرديب مع الدكوه والبصل الاخضر والشطه........ يا سلام.
كده حددنا الفطور وهو الاهم يوم الجمعه والذي لا اذكر علي الاطلاق ان فطرنا كافراد الاسره لوحدنا دون وجود ضيوف والحمد لله.
الغداء ملحات عاديه ولكني افضل الفته . لحمة عجل والعظم يتقطع الرغيف مع الرز ويتخت اللحم بي فوق مع سلطة اسود او طماطم بالدكوه. والبطيخ تحليه اساسيه.
اما العشاء لو كان هنالك ملم او ميلم نجلب الكوارع من الصبح جوزين عجل بعد التكسير والنظافه ولوازمها من جزر ، قرنجال،كرافس،فلفل اخضر وشطه خضراء.
يقوم اخي الاصغر حمدو بتحضير الكوارع . توضع علي الفحم – الغاز غير وارد اطلاقا – منذ التاسعة صباحا توضع الحله الكبيره في المنقد الكبير جدا وتوضع كل
الوصفات المذكورة آنفا ويوضع حجر كبير من جنب شارع المعونه مانع للتسرب فوق غطاء الحله ولا تفتح الحله الا عند الخامسة مساءا للتشييك عليها وزيادة
المويه ووضع بعض البهارات كالثوم ومن بعد تترك علي النار الهاديه وبالهنا والشفا.
لفتره في منتصف الثمانينيات كنا نجتمع شله كل جمعه للعب الكنكان وتمر كل جمعه علي بيت من يبوت الشله والني كانت تضم الآباء والابناء علي قدم المساواه
فكان والدي وانا ونسيبنا استاذ الزين عثمان وكان عمنا كامل صالح عبد السيد "ابو صلاح" وبعض الاحيان ابنه دكتور وجدي كامل وعمنا يسن السيد وابنه الدكتور
شوقي يسن وعمنا محمد طه " شقيق زينب طه زوجة ابو صلاح" والاعمام يحيي ،كامل مقلد،سمير فؤاد ومحمد بشير رحم الله جميع الاعمام وبالاضافه الي الدكتور عبد الله
عبد الكريم " عديل دكتور محمد عثمان الجعلي" .
في هذه الجمع كانت تختلف الوجبات فتكون اكثر حداثه وترتيبا فيدخل الاستيك والريش والشيه واللحم البارد والتحليه من نوع الهارت اتاك heart attack
والترايفل وغيره .
كان شعار اعمامنا ان لا سكري يوم الجمعه فيبرطعوا في التحليه بمنافسه شديده وجاده جدا.
في احد الجمع صحيت باكرا لاذهب للسوق المركزي بالخرطوم " جوار المركز الافريقي"
حيث كنت اجيب منه السمك . صحيت بدري ومشيت بالجلابيه الكنت نايم بيها وطبعا كالعاده بتكون مكرفسه وقلت مره واحده اغشي بتاع البطيخ وكحلت واحد بطيخو
كبير وذهبت اليه وقلت ليهو كيف البطيخ يا حاج ففاجاني يا ولدي امشي اشتري من هناك؟؟
يعني شافني مشعنف والجلابيه مكرفسه قال الزول ده ما بقدر علي بطيخي ده .
اليوم داك زعلت واشتريت اكبر بطيخه عنده كيتا عليه.... الوسخ.
11-29-2008, 09:44 AM
محمد عبدالمنعم التلب محمد عبدالمنعم التلب
تاريخ التسجيل: 09-13-2008
مجموع المشاركات: 155
اهل الطراوه كيفنكم والله ياجماعه اول ما فتحت المطبخ اسف اقصد البوست ضربتنى ريحه التقليه والفسيخ والبصل انتو ياجماعه رمضان بكره والا شنو ؟؟؟؟؟؟؟؟؟ تاكلوا هنيا وتشربو مرئيا . الشاهد فى الامر رغم اختلاف الاجناس والقبائل نجد فطور الجمعه متشابه لحد بعيد فى كل البيوت السودانيه. وياهو دا السودان. راجنكم فى فطور رمضان وبحرى طرررراوه وحلاوه
11-29-2008, 11:23 AM
عبدالوهاب علي الحاج عبدالوهاب علي الحاج
تاريخ التسجيل: 07-03-2008
مجموع المشاركات: 10548
في واحد احمراني كدا بيكون حايم في السوق طوالي لابس بنطلون بيجامة وفنيلة داخلية وشايل سيجارة وقلم رصاص وفي حالة تفكير دائم ولم اشاهده يتكلم قط الزول دا قصتو شنو ؟ والله الزول دا شاغلني جدا من زمن كنا اطغال وقدر ما سألت عنو ما لقيت معلومة لو في واحد فيكم عارف ينورنا وينوبكم ثواب .
عبد الوهاب الحاج سيارة واحدة لأن الوقت الذي أخذت فيه الصورة يبدو كأنه في الصباح الباكر .. وربما يكون كذلك يوم جمعة وناس بحري لسه نائمين وطارق ميرغني لم يصحو بعد للذهاب إلى سوق بحري القديم لإحضار الكوارع .. كذلك في الصورة يظهر شخص واحد فقط قادم من بعيد وهذا ما يؤكد صحة كلامي ..
11-29-2008, 09:40 PM
عبدالوهاب علي الحاج عبدالوهاب علي الحاج
تاريخ التسجيل: 07-03-2008
مجموع المشاركات: 10548
Quote: في واحد احمراني كدا بيكون حايم في السوق طوالي لابس بنطلون بيجامة وفنيلة داخلية وشايل سيجارة وقلم رصاص وفي حالة تفكير دائم ولم اشاهده يتكلم قط الزول دا قصتو شنو ؟
Quote: هشام رضا قاليك ...ده واحد قبطى اسمه عادل من اولاد حمد جنب ناس قرن شطة ... وكان فى الجامعة وفجأة جاتو حالة نفسية وسيجارته دى كان بيجي يشحتها من الشباب القاعدين فى الشارع ... وهو زول اصلوا مابيتكلم الا بس السيجارة دى
11-29-2008, 09:54 PM
Kamal Karrar Kamal Karrar
تاريخ التسجيل: 11-16-2006
مجموع المشاركات: 3734
Quote: هشام رضا قاليك ...ده واحد قبطى اسمه عادل من اولاد حمد جنب ناس قرن شطة ... وكان فى الجامعة وفجأة جاتو حالة نفسية وسيجارته دى كان بيجي يشحتها من الشباب القاعدين فى الشارع ... وهو زول اصلوا مابيتكلم الا بس السيجارة دى
شكرا هشام للمعلومة
لكن قرن شطة ساكن حلة حمد ولا كرش الفيل
11-29-2008, 10:16 PM
عبدالوهاب علي الحاج عبدالوهاب علي الحاج
تاريخ التسجيل: 07-03-2008
مجموع المشاركات: 10548
يا حسن طه يا حليلك الواقف علي حيلك انت قايل نحن بقينا نشتري....!!! والله الواحد بقي مقطع الا يلفتوه للبنطلون المشرط حتي ينتبه.
Quote: في واحد احمراني كدا بيكون حايم في السوق طوالي لابس بنطلون بيجامة وفنيلة داخلية وشايل سيجارة وقلم رصاص وفي حالة تفكير دائم ولم اشاهده يتكلم قط الزول دا قصتو شنو ؟ والله الزول دا شاغلني جدا من زمن كنا اطغال وقدر ما سألت عنو ما لقيت معلومة لو في واحد فيكم عارف ينورنا وينوبكم ثواب .
بعدين الراجل ده كانت لبسته نظيفه رغم انه يلبسها كل يوم الفانله الكت وبنطلون البيجامه المخطط بالاخضر علي ما اذكر.
وعلي ذكر هذا هناك يا كمال علي ناصية بحري الحكوميه تجاه مرطبات عبد القادر حاج السيد كان ايضا كوجاك رجل اصلع ويرتدي جلبابا ابيضا ولا يتحدث مع احد من
هو؟؟؟
يا عبد الوهاب العيش الشمسي هذا منذ ذاك الزمن لم نذق طعم رغيف مثله فهو رغيف منفوخ وشبعان ومرشوش به كميه معتبره من السمسم وله اركان اربعه رغم انه
كامل الاستداره.ويشتهر باللبه الغزيره والمتشابكه تشابك جبنة موزاريلا حاليا . واحسن رغيف للحشي... طعميه حاره او فول بالجبنه وزيت السمسم .كان يبيعه
رجل يحضر بالفعل في حصان يجر عربه جميله خضراء ليست كعربات الكارو.
يا ناهد يعني سالتي عن يوم الجمعه وانا فترت من الوصف ما خليت فسيخ ولا كوارع... يعني كل الحاجات البتريحك وبرضو لسه نفسك ما انفتحت؟؟؟؟؟
11-30-2008, 06:57 AM
عبدالوهاب علي الحاج عبدالوهاب علي الحاج
تاريخ التسجيل: 07-03-2008
مجموع المشاركات: 10548
قرن شطه من سكان حلة حمد القدامى ومازالت بقية اسرته بحلة حمد شارع البحر وهو الشارع المؤدى لبيوت الشيخ مصطفى الامين.
اما عادل القبطى مازال يسكن حلة حمد وهو نفس الشخصيه التى عرفتموها من سنين عددا فى هدؤه وطلبه للسيجاره بكل ادب بل توسعت دائرة حركته حتى امدرمان غريا وحتى الخرطوم جنوبا وصحته اعتلت بعض الشىء لكثرة حركته وهو يعرف فى حلة حمدحمد بعادل ود ودوديده الخياطه وهو من الشخصيات المالوفه بحلة حمد واحد معالمها البارزه ربنا يشفيه ويشفى كل من به داء
وبحرى طراوه وحلاوه
11-30-2008, 08:07 AM
محمد عبدالمنعم التلب محمد عبدالمنعم التلب
تاريخ التسجيل: 09-13-2008
مجموع المشاركات: 155
قرن شطه من سكان حلة حمد القدامى ومازالت بقية اسرته بحلة حمد شارع البحر وهو الشارع المؤدى لبيوت الشيخ مصطفى الامين.
اما عادل القبطى مازال يسكن حلة حمد وهو نفس الشخصيه التى عرفتموها من سنين عددا فى هدؤه وطلبه للسيجاره بكل ادب بل توسعت دائرة حركته حتى امدرمان غريا وحتى الخرطوم جنوبا وصحته اعتلت بعض الشىء لكثرة حركته وهو يعرف فى حلة حمدحمد( بعادل ودوديده الخياطه) وهو من الشخصيات المالوفه بحلة حمد واحد معالمها البارزه ربنا يشفيه ويشفى كل من به داء
أقام ساسة سودانيون احتفالا متأخرا بانتخاب باراك أوباما رئيسا للولايات المتحدة واشادوا بجذور عائلته في بلادهم، وذلك وفقا لما ذكرت تقارير إخبارية الأحد 30-11-2008.
ودارت احاديث كثيرة بشأن جذور والد أوباما في كينيا. لكن أوباما اعترف بجذوره السودانية البعيدة في مذكراته التي حملت عنوان "أحلام من أبي".
وقال ياسر عرمان عضو بارز في الحركة الشعبية لتحرير السودان وهي حركة متمردة جنوبية سابقة تشارك الآن في حكومة ائتلافية مع الشمال "والد اوباما ينحدر من قبيلة ليو وهي من النيل. وقبيلة ليو انتقلت اصلا من السودان الى كينيا".
ومن رويترز جاء الخبر اليقين ياعبد الكريم
تذكروا عندما تم إنتخاب أوباما قلنا انا وعبد الكريم انو الزول ده سوداني وابوه كان شغال فى المخازن والمهمات وكان بلعب فى فريق الوحدة فى الديوم وانو باراك ذاتو كان بلعب فى رابطة الديوم ،واكد عبد الكريم انو الشافع ده شايفو بساعد ابوه فى عمل الزراير فى سعد قشرة حيث كان يعمل ابوه هناك فى الامسيات . وطبعاً ماصدقتوا كلامنا اها جاءكم الخبر اليقين من رويترز الوكالة الماخمج خلوا كلامنا انا وعبد الكريم اها رايكم فى رويترز
وعاش ابناء بحري حكاماً لامريكا
11-30-2008, 05:25 PM
Kamal Karrar Kamal Karrar
تاريخ التسجيل: 11-16-2006
مجموع المشاركات: 3734
كمال كرار كرش الفيل تضم بين حناياها كل ألوان الطيف السوداني من قبائل السودان ولذلك سميت بكرش الفيل ولكن ربما الأكثرية كما ذكرت دناقلة ومحس .. بس أنا عاوز أعرف هل إسم "كرش الفيل" حسبما هو مدون في سجلات الأراضي وإلا مجرد إسم متداول بين الناس .
11-30-2008, 05:13 PM
عبدالكريم أحمد الامين عبدالكريم أحمد الامين
تاريخ التسجيل: 08-04-2008
مجموع المشاركات: 6343
Quote: في واحد احمراني كدا بيكون حايم في السوق طوالي لابس بنطلون بيجامة وفنيلة داخلية وشايل سيجارة وقلم رصاص وفي حالة تفكير دائم ولم اشاهده يتكلم قط الزول دا قصتو شنو ؟ والله الزول دا شاغلني جدا من زمن كنا اطغال وقدر ما سألت عنو ما لقيت معلومة لو في واحد فيكم عارف ينورنا وينوبكم ثواب .
وعلي حسب ماسمعناه من روايات عن عادل :- أنه كان طالباً بكلية الهندسه جامعة الخرطوم ,, وأصيب بهذه الحاله أثناء فترة الامتحانات ,, وأن المشوار اليومي من حلة حمد ينتهي به المطاف الي كلية الهندسه ثم يسترخي بالميدان الشرقي ويعاود الكره الي حلة حمد مرةً أُخرى من دون أن يتحدث مع إى شخص.. ** لو كان ببلادى رعايه إجتماعيه وصحيه لما وصل عادل لهذه الحاله!!! ولكن أنه الـ سـ و دان...
11-30-2008, 05:28 PM
عبدالكريم أحمد الامين عبدالكريم أحمد الامين
تاريخ التسجيل: 08-04-2008
مجموع المشاركات: 6343
Quote: U]تذكروا عندما تم إنتخاب أوباما قلنا انا وعبد الكريم انو الزول ده سوداني وابوه كان شغال فى المخازن والمهمات وكان بلعب فى فريق الوحدة فى الديوم وانو باراك ذاتو كان بلعب فى رابطة الديوم ،واكد عبد الكريم انو الشافع ده شايفو بساعد ابوه فى عمل الزراير فى سعد قشرة حيث كان يعمل ابوه هناك فى الامسيات . وطبعاً ماصدقتوا كلامنا اها جاءكم الخبر اليقين من رويترز الوكالة الماخمج خلوا كلامنا انا وعبد الكريم اها رايكم فى رويترز
Quote: وعاش ابناء بحري حكاماً لامريكا
ابو عوه أما عن آخر الاخبار أنو اللوترى للسنه الجايه 2009 حيكون للسودان 25,000 فرصه مُقسمه كالآتي:- ** 15,000 فرصه لسكان بحرى ويتم الاثبات بشهادة الميلاد ولقد قامت السفاره الامريكيه بمخاطبة مصلحة الاحصاء بعدم إصدار إى شهادة ميلاد بدل فاقد من تاريخ 30/11/2008 وقامت بنسخ كل السجلات القديمه للمواليد والوفيات الخاصه ببحرى منعاً للتلاعب والتزوير ,, وإنت عارف الجماعه إياهم ملوك التزوير كلهم حيجو يتلصقو ويقولو من بحرى.. *** 10,000 فرصه لبقية سكان السودان.. *** رعايا بحرى يتم قبول طلباتهم بموقعهم الشعبي (بحرى ست الهوى والطراوه).. *** يكون فرز الطلبات ومقارنتها مع سجلات الاحصاء الرسميه( نسخة السفارة الامريكيه) من الساده:- ## المستشاريين :- حسن طه ,, معاويه محمد الحسن ,, عبدالكريم أحمد الامين .. والديناصورات:- أنور العجب ,, طارق ميرغني ,, كمال السر كرار .. والسيده ناهد بشير الطيب (مُمثلة المرأه)..
11-30-2008, 05:41 PM
Kamal Karrar Kamal Karrar
تاريخ التسجيل: 11-16-2006
مجموع المشاركات: 3734
والله يا عبدالوهاب كلامك جايز خاصة بعد فذلكة أبو رزقة بسبب التسمية...
في تقديري أن كرش الفيل هي منطقة صغيرة جدا.. من الناحية الشمالية يحدها ميدان الخطر.. ومن ناحية الغرب تنتهي ببيت ناس عبدالعزيز هلال.. ومن ناحية الجنوب يحدها شارع الصناعات.. إلى تقاطع شارع الأسفلت قبل شارع الإنقاذ.. حيث تتداخل مع الختمية في هذه الناحية.. والله أعلم..
Quote: بعدين يا عبدالكريم يا أخوي.. أنت ما ظلمت ناهد بحبسها في نطاق الجندرة... يأخي أنت ما عارف أستاذة ناهد دي كاتبة خطيرة وصاحبة قلم أديب ورشيق.. عشان كده عوالمها أرحب من ان نسجنها جندريا... فهي يمكن أن تكون ممثلة أدباء بحري ودونك البورد وكتاباتها الجميلة
ودالسر كرار دى فرصة العمر لناس بحرى يعني عايز لجنة مُختصه بشوؤن الهجره للولايات المتحده الامريكيه وماشيين لود خالتنا (مُبارك ودالدومه) باراك اوباما بالامريكي - واللجنه مايكون فيها عنصر نسائى ,, يعني الـ 15000 فرصه يضيعوا علي ناس بحرى بسبب عدم تمثيل المرأه في لجنة الفرز - وهي عندنا منو غيرا في بيتنا دا...
11-30-2008, 08:55 PM
Kamal Karrar Kamal Karrar
تاريخ التسجيل: 11-16-2006
مجموع المشاركات: 3734
Quote: أنت في كده يا عبدالكريم... ولا ودخالك الليلة وين؟ أوع يكون قريفتو للفسيخ خلتو يمص الليمونة,,,(وش ممطق)..
ود السر كرار ود خالي بيفرز في طلبات المُهاجرين بتاعين اللوترى وقال لي :- كمال مشاويرو كترت للبحرين دى وماعارف عندو هناك شنو.. قلت ليهو :- الكلام دا بيجيب الطراوه لكمال.(والعارفو عندو شغل عشان يورد لناس الجبايات في السودان) قال لي:- كان كده خليني في فرز الطلبات دى لما يجي كمال راجع من مشوارو...
11-30-2008, 09:45 PM
ناهد بشير الطيب ناهد بشير الطيب
تاريخ التسجيل: 02-08-2008
مجموع المشاركات: 4180
e: بعدين يا عبدالكريم يا أخوي.. أنت ما ظلمت ناهد بحبسها في نطاق الجندرة... يأخي أنت ما عارف أستاذة ناهد دي كاتبة خطيرة وصاحبة قلم أديب ورشيق.. عشان كده عوالمها أرحب من ان نسجنها جندريا... فهي يمكن أن تكون ممثلة أدباء بحري ودونك البورد وكتاباتها الجميلة
ياشباب بحرى وديناصوراتها المخضرمين ... ده كله مامهم يااخوانا ......المهم فيها مشية لامريكا .... ولا ندور فى العربى ده ونجوده اكتر واكتر
Quote: عبد الكريم متى موعد إعلان النتيجة علشان نجهز .
ابو رزقه ود خالتنا حيستلم في 20 يناير 2009 وبعد ياخد ليهو إستكانه في البيت البيضاوى والذى غالباً مايحولو لديوان كبير زى دواوين الاملاك وحلة خوجلي والحلفايا عشان إستقبال أهلو ناس بحرى ,, الفرز شغال عشان نستبعد الجماعه المطهبين ونحول طلباتهم مع مجموعة (10,000) الحايدافس فيها السودان كلو وناس ست الهوى والطراوه (15,000) براها.. ** جاهزين..
12-01-2008, 02:40 PM
Kamal Karrar Kamal Karrar
تاريخ التسجيل: 11-16-2006
مجموع المشاركات: 3734
Quote: عموما.. طارق ده ما مسكو إلا الشديد القوي... يمكن تكون في حفلة بهمانيويت قيرما في الرياض ونحن ما جايبين خبر!!!
** بعد توجيه الاقمار الصناعيه الخاصه بست الهوى والطراوه (طبعاً بقينا أمريكان وكده) ولابد من تتبع أحوال رعايانا ,, إتضح أن الباشمهندس طارق في مهمة عمل بالبحرين كصديقه ود السر كرار وسوف يغادر منها الي الامارات لتقضية إجازة العيد بدانة الدنيا..
*** الدخول للاقمار الصناعيه الخاصه بست الهوى والطراوه غير مسموح إلا للمُخوليين فقط...
12-01-2008, 03:51 PM
عبدالوهاب علي الحاج عبدالوهاب علي الحاج
تاريخ التسجيل: 07-03-2008
مجموع المشاركات: 10548
الأخوة العزاز اللذاذ ناس بحري الحلاوة و الطراوة سلامات و كيف الحال و مشتاقين و الله الواحد مقصر معاكم شديد ما جفا لكن شغلة ارجو المعزرة . كل سنة و الجميع بخير و انشاء الله كل زول فيكم علي كيفو .
12-01-2008, 08:13 PM
عبدالوهاب علي الحاج عبدالوهاب علي الحاج
تاريخ التسجيل: 07-03-2008
مجموع المشاركات: 10548
طبعا يا اخوانا الجزارين ديل اكتر ناس خاينين في السوق لو تلاحظوا هناااك جنب الميزان في عظام مكومة الجزار لما يقطع ليك الحتة الدايرها وبخبرتو دايما بيقطعها ناقصة عشان يتمها بالعضام الموجودة جنب الميزان وتعرف هذه العملية بالتخشيب بلغة الجزارين . الجزار لو داير تحرجو بعد ما يخت اللحم في الكيس طلعوا تاني وراجعو حتلقاهو خاتي ليك كمية بتاعة عضام تكفي قطيع من الاسود الجائعة ولتجنب نفسك هذه الخدعة لازم تتكلم معاهو بنفس لغتو اول ما يقبل على الميزان تقول ليهو يازول هوي اوعك تخشبني حيضحك ولكن كان بقيت تنقا بخشبك بخشبك .
ومعا من اجل سوق لحوم خالي من التخشيب
والضان بـ 12 جودة ورخا يا مواطن
12-01-2008, 08:19 PM
Kamal Karrar Kamal Karrar
تاريخ التسجيل: 11-16-2006
مجموع المشاركات: 3734
عبدالوهاب والله ياخى لحمة بحرى دى مامبااااالغة عديل .... العجب العجالى ...تقول ملبن (ماشاءالله) مايقوموا يذيدوا ليكم الاسعار بكرة تقول دى عين ناهد....
كمال كرار ..
خرفان السودان قالوا جات ووصلت السعودية بركة ياخوى ... الله حلانا من (الحرى)(الحرى نوع من الخرفان زى السواكنى) تعبناه معانا (ولاتعبنا معاه) ماعارفة ايام وقوف اللحمة السودانية من السودان ....
المهم فى الموضوع ياناس السعودية ...الخروف بى كم للعيد ؟ عشان نشوف كان فضل باقى نجيب بيه الشطة الخضراء
كل انتوا ....والعام بخير ....
12-01-2008, 08:38 PM
Kamal Karrar Kamal Karrar
تاريخ التسجيل: 11-16-2006
مجموع المشاركات: 3734
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kamal Karrar
عبدالكريم أحمد الامين
عبدالمحمود محمد عبدالرحمن
حسن طه محمد
ناهد بشير الطيب
محمد عبدالمنعم التلب
عبدالوهاب علي الحاج
معاوية محمد الحسن
فيس بوك
تويتر
انستقرام
يوتيوب
بنتيريست