|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: أنا أول مرة أشوف الحري وأعتقد هو النجدي قلت ده دحش مسخوت ولا شنو؟؟؟ |
ده يااخ كمال مابيشوفوه شكله شيييييييييييييييين.... ده بس بياكلوه..... لحمته زى البسكويت لكن سعره ناااااااااااااااااااااار النجدى سمح فى الولائم ...والارززة (الارززة دى على وزن الارشفة ) لانها قربت شدو حيلكم وين باقى (الاشببة) اقصد الشباب و(الادنصرة ) من الديناصورات ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالوهاب علي الحاج)
|
Quote: مبروووووووووووك ياكمال
الليلة المولد دا فات كرومة |
العزيز وهبه قاصدين سيد البيت يحتفل بالطراده ,, ودا طبعاً نوع من الحنين للماضى ,, تعرف الطراده في زمن دراسة ود السر كرار وودميرغني علي مصطفي في بحرى الحكوميه بتكون مصاريف شهر كامل شامل السينما لمره واحده. ** والشئ التاني كنت بعمل ليك في تحريات عن موضوع الزول المتبرع ليك بالخروف (بتاع الشروق.)
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبد الرازق سعيد)
|
Quote: أها يا عبدالكريم... المرة دي قنطرتها وشوتها.. وعملت ليكم طرادة |
ود السر كرار قصدت أديك الفرصه في الطراده الجديده دى ,, بس إنشاالله ماتكون زى طرادة شلنكح لصالح اليمانى.. ** شلنكح عندو سيجاره واويه بس مالاقي البرنجي وورق البرنسيس والساعه 12 بالليل والدكاكين قافله مش لعمك صالح اليماني ودق ليهو الدرابزين ياعم صالح الوالده توفت وعايزين الكفن ,, عمك صالح فتح وجرى السلم عشان ينزل الدبلان ,, قال ليهو كدى أديني صندوق برنجي وورق برنسيس وحلاوه كرمله واداهو الطراده الكلها عساكر وسخانه وقديمه وكنسل موضوع الكفن ,, عمك صالح بيقلب في الطراده اللونا من أحمر بقي بني ,, شلنكح قال ليهو في عسكرى ناقص فيها..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
بمناسبة قرب حلول عيد الأضحى .. واحد مشى الحج لأول مرة .. الجماعة قالوا ليه جهز نفسك علشان تمشي تعمل الطواف والسعي قالوا ليهم ما قلتو كل شيء على البعثة ..
واحد مسطول رسلوا أهله عشان يشتري خروف العيد .. مشى جاب خروف ضعيف وهلكان أخواته قالوا لي ده شنو الخروف الضعفان ده قالوا ليهم كدي خليكم من الضعفة بتاعتو شوفوا العيون دي كيف ..
مِعزة أبوها غصبها على الزواج من خروف مرتاح .. إشترطت أن يكون الزواج بعد عيد الأضحى ..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
والله يا ناهد الليله اتصلت بي الوالده ربنا يديها الصحة والعافيه لقيت القاوت قايم عليها ...مما عملت فطور
الجمعه ديك وانا عارف انو الفسيخ بيجهجها.
يا كمال والله انا بافتكر انو اصل الكلمه الكسيح مش الفسيك لانو بكسح ناس القاوت
اما بخصوص الطراده تعرف يا عبد الكريم نحن في بحري الثانويه كنا نفطر ماشاء الله شله عجيبه جدا تضم صلاح جرب وابو
النور وكمال كرار والمرحوم جلال عثمان ورمزي ونجت برسوم والمرحومان جلال عثمان واسلام عمر وعمر رجب صاح يا كمال ولا
نسيت زول وكان الفطور مش عن حاجه فاطمه ولا زينب لا... في المطاعم الفاخره بعدين العدس والبيض والفول او الكبده
شفتي يا ناهد من زمان الكبده دي باقيه لي في رقبتي ...او انا الباقي ليها في رقبتا.
وبعد ده كلو الشيرنق خمسه قروش وده غير البيبرشتو صلاح جربويه عشان حق السجاير حيث كان حريص علي لم الشيرنق اكتر
من ابو الجاز ذاتو.
شكرا ابو رزقه علي الاستراحه الظريفه في الموسم .
وقالوا واحد مرتو ما شاء الله اربعه في اربعه .. ومع العبايه ...حاجه عجيبه ..بس خلاها دقيقتين يجيب ليها عصير جاء
لقاء ايرانيين لافين حولها وهاك يا .....لبيك اللهم لبيك.
معليش اليومين دي الدي اس ال بتاعنا (موبايلي) في المكتب مخستك قالوا صيانه او توسيع في الشبكه ماعارف يعني بعد
ده بالليل بس لمن اجي راجع البيت.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
كمال اخوى
هشام ده كان دخل معانا (بيكشوا) ليك البوست ده كشة عدييييل ولا خيران ولاحاجة ...امانة ماعنده توريات توريك النجوم فى عز الضهر ...
لا والعجب تقليد الناس ومحاكاتهمكوم تانى الا تفتح قسم فى البوست اسمه (مبدعى اولاد بوست بحرى)....
انت بالمناسبة ليه ماتعمل للبوست ده اتحاد اسوة بالاتحادات الكتيرة الفى البلد دى .. هسى بجيك عبدالكريم ويقول ليك نقسمه اقسام ومابعرفوا شنو داك ...ونودى الناس لامريكا حسب اقسامها ولا طارق ماعارفاه يجى يقول شنو .... وعبدالوهاب ورزقة فى ياتو قسم ... كدى بالله انت ياكمال قسم ناس اتحاد ابناء الطراوة ...ديل ...
انا على الجبايات من هسى حجزتها اطبعوا لى الايصالات بسراع.....
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
ياخوانا كان فيها تقسيم ماتنسونا ادونا حاجة معاكم كفاية طلعنا كيد من تقسيمات السودان ماتطلعونا كيد من تقسيمات البوست .
ياابو النور وعوض اللة الحكاية شنو طولتوا علينا الغياب
يادكتور ابراهيم حرك لينا العريس ده يلحقنا بحلقة جديدة قبل العيد وياريت لو كانت عن العيد فى بحري او المزاد ،واذكر انو تصادفنا مرة فى اجازة عيد فى السودان قبل سبعة أعوام تقريباً انا وابو النور وجاء ابو النور طالع من الشارع لاحق صلاة العيد وانابرضو لاحق الصلاة وتقابلنا فى طرف الشارع واقترحت عليه نذهب نصلي فى جامع اونسة وكان الامام عثمان شكاك لكن ابو النور حلف مايمشي يصلي معاهو لانو مكجنو وساقني معاهو جامع المسرة فى الصافية ،وتصدق يادكتور من الوقت داك تاني ماحضرت عيد فى السودان .
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: لكن يا طارق "محمد الحسن عبدالمحمود" كان بيفطر وين؟؟؟ |
كان بيفطر معانا يا كمال اوع اكون نسيتو لانو الاسبوع الفات ده تقريبا بنتكلم كل يوم مع بعض.
طبعا ود موسي متوجه للسودان وكما قال انو كلمك قبل شويه.
صديقي الامين ذهب للحج في مفاجأه لينا كلنا وبدون مقدمات ضرب لي من الحج اها كل سنه وانت طيب مالك
جيت راجع ولا شنو؟؟ قال لي ابدا والله بس نحن قعد نرمي في الجمرات ووالله اتذكرتك ....!!!
بالله شوف الراجل ده قلت ليه انا شيطان تتذكرني في رمي الجمرات ؟؟ ودي حصلت حقيقه .
وبعد ما جاء من الحج ذهبت للمباركة والنزاع معه ففاجأني بي هديه طاقيه مداها معتذرا وقال لي والله
ما لقيت الطواقي الصغيره بتاعة الحاخامات ديك ...!!!
تعرف يا كمال مرات لوني ده بيعمل لي مشاكل فمره لابس جلابيتي ومشيت دار الاتحاد اشرب شاي واحد دفعتنا
مطرطش كده لمن جيت اقعد واتحكر قلت استغفر الله قام قال لي بالله انت مسلم ؟؟؟
والله اول مره اعرف انك مسلم !!! ليه ما عارف ؟؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
في العام 1992م تقريباً ويوم الوقفة تحديداً وأسعار الخراف نار توجه كل من أ.ح وع .س إلى زريبة الخرفان ببحري بالقرب من السكة حديد لشراء خروف العيد وهي بالنسبة لهم كانت أول تجربة لشراء خروف العيد وكان ذلك عند مغيب الشمس .. بعد فترة وجيزة وجد الشخصين المذكورين خروف كارب وبسعر رخيص فلم يصدقا فقاما بشرائه على الفور معتقدين أنهم فعلوا مالم يفعله الكبار وذلك بشراء خروف بهذا الحجم وهذا السعر الرخيص مقارنة بالأسعار المتداولة بين الناس في تلك الأيام فقاما بإستئجار عربة بوكس وعلى حي المزاد مباشرة .. وعند وصولهم تصادف خروجي من البيت فقام أ.ح بإنزال الأضحية من العربة ولحسن الحظ كان ذلك أمام لمبة الكهرباء في الشارع وبالصدفة نظرت للخروف وأكتشفت في الحال بأن هذا الخروف المزعوم ليس إلا مجرد نعجة فأخبرت أ.ح و ع.س بهذا الكلام وانه حسب الشرع فإنه لا يجوز الأضحية بها ولربما تكون حامل في الشهر الثاني أو الثالث وبعد أن فكرا فيما قلت لهم وإتأكدا من صحة كلامي شعر الإثنين بالصدمة والخجل في نفس الوقت فكيف لهذا العربي أن يخدعهما بهذه الطريقة وفي هذا الوقت المحرج حيث لم يتبق إلا ساعات قليلة لحلول وقت الأضحية . ذهب أ.ح إلى منزلهم بسرعة وأحضر مسدس فيما يبدو أنه كان بتاع لعب بس حجمه كبير ويخوف وشكله ذي المسدس الحقيقي ، وإستغل الإثنين نفس السيارة التي أتيا بها من الزريبة وتوجها إلى صاحب الخرفان النصاب الذي أنكر في البداية أنه باع لهما هذه النعجة مستغلاً حلول الظلام حينها بالرغم أنهما كانا متأكدين من أنه هو نفس الشخص ولا أحد غيره . وبعد الإنكار والمغالطة قام أ.ح بإستخراج المسدس من جيبه وهدد صاحب الخرفان أنه إذا لم يقم بإرجاع المبلغ الذي إستلمه مقابل هذه النعجة فإنه ربما لن يحضر العيد .. وبعد هرج ومرج إتلم الناس وأقنعوا البائع بأن يقوم إما بإرجاع المبلغ أو على الأقل إستبدال النعجة بخروف بنفس المبلغ الذي إستلمه فوافق في النهاية تحت تهديد السلاح وبعد سماع نصائح الحاضرين والخوف من أن يصل الموضوع إلى الشرطة .. وعلى ما أذكر أنهما دفعا مبلغ زيادة على المبلغ المدفوع أصلاً ليحصلا على خروف ليه القيمة ويقول باع مثل خرفان الناس الآخرين .. عاد أ.ح و ع.س إلى المزاد هذه المرة وبرفقتهما خروف حقيقي وهما في غاية السعادة وقدما لي الشكر لإنقاذهما من الفضيحة التي كانت ستطالهم لو تم إكتشافها من قبل الضباح في الصباح .. لا زلت أذكر هذه القصة عند حلول كل عيد أضحى حيث ساعدتني الصدفة فقط في تعديل مسارها وإلا كانت هذه الأضحية راحت شمار في مرقة وأصبحت للإثنين فضيحة يتداولها الأجيال ..
هذا وكل عام والجميع بخير ..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبد الرازق سعيد)
|
Quote: ** معقوله دى ياناس بحرى ست الهوى والطراوه تخلو منبرها في الدرجه الثانيه ,, أها رفعناهو ليكم في الدرجه الاولي ولو أتعود علي النزول للدرجه الثانيه بيلحق العامل والاملاك والاتحاد ,, والله تاني إلا تمشوا تجيبهو من بحيرة ناصر** |
ياجماعه همتكم معانا شويه التيم بنزل كل سنه درجه ,, لكن ست الهوى والطراوه في 12 ساعه نزلت الدرجه الثانيه مرتين ساعدونا مع المد والجزر الحاصل في المنبر دا البقي اسرع من تسونامي..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: ليحصلا على خروف ليه القيمة ويقول باع مثل خرفان الناس الآخرين |
بمناسبة باع دى ياعبدالكريم .... ليه الخروف بيقول باع ... وعشان ماتقوموا تفكروا بقول ليكم
زمان كان فى خروف وخروفاية على علاقة يبدو مع بعض المهم يوم جاء زول اشترى الخروفاية من الزريبة الخروف بكى لمن الله غفر وقعد بس يقول (امباع ...امباع ...) (فوت ...او ودر )
ومنها ليومنا الخروف بيقول باع ...امباع ...باع ...امباع ...
___________________
والله تنكتوا للزول حاجات من وين مابعرفها ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: انت بالمناسبة ليه ماتعمل للبوست ده اتحاد اسوة بالاتحادات الكتيرة الفى البلد دى .. هسى بجيك عبدالكريم ويقول ليك نقسمه اقسام ومابعرفوا شنو داك ...ونودى الناس لامريكا حسب اقسامها ولا طارق ماعارفاه يجى يقول شنو .... وعبدالوهاب ورزقة فى ياتو قسم ... كدى بالله انت ياكمال قسم ناس اتحاد ابناء الطراوة ...ديل ... |
بت بشير الطيب عايزه تعمل لينا إتحاد المعلمين وترجعي الدراسه المُختلطه وتعملوا نقابات وتفشلي مشروعنا الحضارى بتاع الهجره الجماعيه لود خالتنا اوباما وإنت مقرر وعضو لجنة فرز الطلبات ,, ولكن بما أننا نؤمن بالطرح الديمقراطي خلينا نشكل لجنه لإقتراحك دا تقوم تنبثق من اللجنه دى لجنه تحضيريه ومن التحضريه تتولد لجنه إستشاريه وكل لجنه من اللجان المُنبثقه والمتولده تتصرف وتشكل اللجان الخاصه بها ,, اها قدرى وفكرى إقتراحك كان مُجدى ومُفيد مع الاجراءات الحكوميه دى والله إلا تمشي تجيبهو من رشيد ودمياط. Quote: انا على الجبايات من هسى حجزتها اطبعوا لى الايصالات بسراع..... |
** بس إقتراحك الثاني علي طول صدر الامر السامي بقبوله وتنفيذه وتطبيقه علي أن يكون في شكل شركه تضامنيه بيني وبينك وسيد البيت نصيب كل فرد من الشركاء 30% ,, و10% مصاريف إداريه للشركاء,و شفتي الامور بتمشي كيف لمن الموضوع بيكون إستثمارى وهنالك مال يُراد له أن يقبع في الجيوب... ** سوف تصلك الايصالات من الرقم :- 001 الي 1000 علي عنوانك البريدي.. ** إيصالات سيد البيت من الرقم:- 1001 الي 2000 علي عنوانه البريدى.. ** إيصالاتي عندى وفي جيبي من :- 2001 الي 3000 .. ** تعيش الجبايات العامله لينا الحاجات** *** الايصالاتو بتكمل يرسل لي المخزن مليان...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
علي ذكر النصب الذي حدث من قبل يحكي ان رجلا نصابا اتي ببوكس لزريبة احمد قاسم : يللا بسرعه يا
عرب ارفعوا الثلاثه ديل . العرب فرحوا فرح شديد لدرجة انو صاحب الخرفان ذاتو ركب مع العربيه
للضبح . طبعا ده ما زول هين البيقول ارفع دونما يفاوض في السعر وحاتك العربي ركب وفللي لمدينة
الرياض. صاحب البوكس وقف قدام باب البيت التلاته ضلف وقال للعربي نزل واحد هنا واضبحوا دلوقتي.
العربي نزل الخروف وضبحوا . وكت اتاخر صاحب البوكس بدأ العربي في طرق الباب واظنو لحدت العيد
الجاي ده حيكون بيدق في الباب منتظر الراجل المرتاح يفتح ليهو ...!!!.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: كان بيفطر معانا يا كمال اوع اكون نسيتو لانو الاسبوع الفات ده تقريبا بنتكلم كل يوم مع بعض.
طبعا ود موسي متوجه للسودان وكما قال انو كلمك قبل شويه.
|
بالله يا طارق...الزول ده حي يرزق؟؟؟
يا أخي إن شاء الله بلغتو سلامنا...
آخر مرة لاقيتو مع أبو آمنة حامد رحمه الله وموسى بيرق في القاهرة...
أما أخي ودموسى... جزاه الله خير... فقد أتصل وغدا هو في السودان بمشيئة الله...
وهو حملني رسالة للعريس أبو النور وقال إذا العرس في العيد لازم يعزمه..
ولو ما عرف بيته ممكن يمشي بيت العم موسى في الشعبية وهم بيدلوه..
التحايا الطيبات للأخ الصديق العزيز ود موسى... وسفرا وحمدا حميدين
يا ود موسى الوصايا في الذمة..
سلامي لجميع الأخوان وعلى رأسهم الدكتور/علي قرم.. ومنقستو..وعادل بسكويته
وعبدالسلام كامل.. والجميع
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
الأعزاء أبناء و بنات بحري
أطيب التحايا و الود
و كل عام و انتم بألف خير و حقق الله أمانيكم جميعا و أنشاء ربنا يجمعنا في بحري الطراوة و يمن على
الجميع بموفور الصحة والعافية.
أعزائي معذرة على الأنقطاع في الأيام الماضية و لكن بحري المدينة و بحري الطراوة دائما حاضرة في كل
اللحظات ولم تفارق الذاكرة أبدا, و في الأسابيع الماضية قابلت الأخ الدكتور عبدالله سليمان أستشاري
الطب الباطني و هو من ابناء بحري الأوفياء و بالتحديد من حلة الدناقلة و من أخوانه د. حامد
سليمان و هو من نشطاء نادي الأتحاد و أخيه د. سليمان ( مراكز السكري)
و رحب بالتوثيق لمدينة بحري ووعدني بالكتابة عن الذكريات من الزمن الجميل…..
و أيضا في الأيام القليلة الماضية قابلت في مدينة أبوظبي بفندق المها روتانا و بالصدفة الأخ الزميل
بالبوست آدم موسى مدير سودانير بالأمارات و اللاعب البحراوي العيناوي الآن حارس المرمى المتالق
بالدوري الأماراتي و الفريق الوطني الأماراتي معتز عبدالله ( بلاش ) و معتز ككل أبناء بحري يحب الوطن
الصغير بحري الطراوة و بالرغم من نشأته في دول الخليج فهو يعرف الكثير وو عدنا بالكتابة عن هجرة
أبناء بحري الأولى لدول الخليج كلاعبي محترفين لكرة القدم و بما فيهم والده ,,, و لقد أختلف معي
حول بعض المعلومات التي ذكرتها له حول الراحل المقيم سليمان فارس رحمه الله الذي بدأ الأحتراف
بنادي الأهلي جدة في بداية الخمسينات حتى قبل ان يتشكل الدوري السعودي بطريقته فيما بعد, و عندما
تبينت موهبته الفذة و أمكانياته العالية رأى الأمير الشاعر رحمة الله عليه عبدالله الفيصل راعي
النادي الأهلي السعودي و المصري أن ينقله للأهلي المصري الذي لعب له مواسم حافلة و حتى لقب بالسد
العالي في مصر,,,,
الأخ الأصغر الحارس الموهوب معتز عبدالله من أبناء بحري الأوفياء نسال الله له التوفيق و أن يكون خير
سفير لأبناء الطراوة في دولة الأمارات العربية المتحدة ونحن في انتظار ما توجد به ذاكرته…. عن
أوائل اللاعبين السودانين بدولة قطر عبدالله بلاش المرحوم سعد دبيبة و صالح أب أصبع و أحمد حسين
الذين أنتقلوا لتلك البلاد في بداية الستينات.
و ايضا من حراس المرمى البحراويين الذين تألقوا في السبعينات و الثمانينات الأخ ا لصديق عوض دوكة
حارس فريق الموردة و الفريق الوطني سابقا و مدرب الحراس بنادي بني ياس الرياضي بدولة الأمارات حاليا و كانت البداية مع فريق الجوهرة رابطة الديوم و الأخ عوض لديه الكثير من الذكريات و أنشاء
الله حنرجع ليهو و حبيت أحكي له طرفتين الأولى مع المدرب سليمان فارس و كان وقتها مدرب للفريق
الوطني و بعد مبارة مع المنتخب المصري و أنتصر فيها الفريق السوداني بالنتيجة لكن الأداء كان
متواضع في أثناء المباراة فواحد من الصحفيين بيسأل الكوتش بعد المباراة وقال النتيجة أيجابية
لكن العرض كان تعبان فأجابه الكوتش ( الكورة أقوان و العائز عرض يروح الكباريه!!).
الطرفة الثانية لكابتن عوض أثناء الدوري في السبعينات و مبارة مهمة مع احد فرق القمة و لم يحضر
التمرين بسبب انه يعاني من أصابة بالركبة و كان في تلك الأيام يسكن الحاج يوسف فحضر أليه أحد
أداريي نادي الموردة المحنكيين و كان سائق موتر أسكوتر و كابتن عوض راقد في السرير قعد جنبوا و
قال ليهو كفارة و بعد داك قالي كدي نشوف ركبتك (وهو ليس لديه أي علاقة بالطب) CLINICAL
EXAMINATIONS
و بعد الكشف قال ليهو ( هسع ياكابتن لو ربطنا ليك عشرة < يقصد عشرة حنيه> من هنا و عشرة ثانية من
هنا أي من جانبي الركبة من الداخل و الخارج ما بتلعب),, فتحرك معه الكابتن على متن الأسكوتر و
أنتصروا في تلك المبارة
و القصة تجربة مفيدة لأداري هذه الأيام في الذكاء و حسن التصرف و عدم التعنت
و الى لقاء قريب أنشاء الله و كل عام و أنتم بخير
د. ابراهـــيم العجـــــب ___________________
في أنتظار العيدية من أبو النـــــــور
و ذكريات العيد في بحـــــري طـــــراوة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
Quote: بوست بحرى طراوه لحق أُمات طه ولاشنو؟؟ |
Quote: البوست دا كان مُختفي من المنبر , المهم كان عندى مُخزن في المُفضله دخلت عليهو رجع بس في مداخلات مشت الخووور.. |
Quote: ازيكم ياناس بحرى وكل سنة وانتوا بالف الف الف خير ... يااطيب ناس ....فى مداخلات طارت من البوست ده ... |
بت بشير الطيب كل سنه وأنت طيبه والاسره الكريمه مُداخلات بس , هو البوست كلو كان طاير , ربك رب الخير حصلناه في غرفة الإنعاش قبل مايصل السبلوقه, قبل التهكير كان عدد المُداخلات (2480) وبعد عودة البوست (2433) مُداخله..
** بالامس كتبت الكلام الفوق دا عن عدد المُداخلات وحاتك فتشت ليهو من الاملاك لغايت الجيلي مالقيتو لي هسه ويظهر أنو المُداخله بتاعتي مشت تجيب تلج مع باقي المُداخلات الطشت..
** نداء للباشمهندس بكرى لإعادة الامور الي نصابها...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
Quote: بالفعل يا عبد الكريم وناهد بالامس حاولت ادخل في البوست قدر ما فتشت ما لقيتو وبحثت حتي الصفحة
الخامسه ،، وهذا يحدث لاول مره . ورونا الحاصل شنو ؟؟ |
اول ايام العيد ....اللابتوب كان معاى فى المطبخ ...وبظبط فى الخروف وبعاين لكن ماقادرة ادوس اى زر فيه من الحالة العلى واليدين المليانة دهن ..(هى الخرفان اسنة دى مالها مدهنة كدة) المهم بيجوا بناتى الشابات .... ويدوسوا لى المنبر العام كل شوية ...الاهل جوا واللخمة و(اللحمة) .. .مادريت بنفسى الا 9 بالليل فتحت المنبر لقيتوا مايااااهو ...جانى بالكتابة الصينية... تانى خليتو الساعه 11 دخلت لقيتوا منتهى خالص مرة يجينى اسود ومرة اضحك ومرة ابكى ومرة تغلبنى القراية خليته وطبعا ماشاركت خالص ...تانى يوم الضهر اللى هو امبارح ...دخلت لقيت نفسى لسة ضيفة حاولت تانى رفض ..جاتنى الرسالة دى
joker_1 site hached by joke 1
قلت يمكن الهكر جاء يعيد علينا وكدة ... دقائق والمنبر اتملأ اسئلة من الاعضاء ..وسواد فى اطرافه فجأة البوستات اتسحبت ... والمنبر شوية استعدل الليلة نفس الشىء ...بدت تانى الحركات مرة ارد.... ومرة ردى مابيظهر بقينا نرد على خفيف ..خوفا من التعب وبعدين يتلحس الكلام
_______________________
ياطارق عندى قصيدة هنا بتاعة الشربوتيشن دى طارت ويييييييييييين ؟ ياربى يكون الهكر شرد بجك الشربوت التعبت فيه .....
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote: بالفعل يا عبد الكريم وناهد بالامس حاولت ادخل في البوست قدر ما فتشت ما لقيتو وبحثت حتي الصفحةالخامسه ،، وهذا يحدث لاول مره . ورونا الحاصل شنو ؟؟ |
طارق كل سنه وانت طيب والاسره الكريمه بالفعل البوست لم يكن موجود حتي الصفحه العاشره وبعد هذه المحاوله التي قمت بها:-
Quote: البوست دا كان مُختفي من المنبر , المهم كان عندى مُخزن في المُفضله دخلت عليهو رجع بس في مداخلات مشت الخووور.. |
** كنت واضع البوست فى لائحة المُفضله وبعد إنزالها ظهر البوست في الصفحه الاولي بس في مُداخله عملتها عن عدد المُتداخلين بالامس (09/12/2008)11:45 م. وحاتك لي هسه بفتش ليها في الميعاد في الضل الوقف مازاد.. 2480 - 2433 :- (47) مُداخله في ذمة الهكر ولاعزاء لاهل ست الهوى والطراوه..
** هل يستطيع سيد الحوش إعادتها؟؟؟
** ولي يكون الهكر كوز وأفتكر أنو اشعار ناس بحرى عن الشربوت رجس من عمل الشيطان فجنبها من البوست وعمل حركه في شكل ورده وقال أحسن اقش كم مُداخله عشان ماتكون ظاهره انو العمليه في النمليه!!!!
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخوة الأعزاء والأخت ناهد..
كل عام وأنتم بخير...
يبدو فعلا أتهكر .. وقد كبت أيميل فورا للأخ/ بكري... وذلك فجر يوم العيد...وقبل الصلاة...
وأختفى البوست تماما ويبدو أن الأخ/ بكري قام باللازم...
ياقي المشاركات الضائعة ربنا يجبيبها...
طارق أنا في الرياض... يمكن أمرك بعد شوية...
لو في شربوت ما بطال... بس ما يكون مخمر
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: حسن طه محمد)
|
الاخ حسن طه
والله بشكرك جزيل الشكر على المكالمة الرائعة وتهنئتك لى والاسرة بالعيد وبالجد فرحت يانه بقيت اعرف اغلب ناس بحرى هنا ...وعلى تواصل معاهم وبالجد ناس بحرى ديل عجينة براهم ناس طيبين ورايقين وسبحان الله مابعرفوا للمشاكل وناس فى حالهم ...... ياسلاااااااااام على بحرى .....امانة يابحرى ماربيتى ...
الشكر كل الشكر للاخ البنتمناه يكون بينا عماد عثمان اللى مابيقصر فى لم شمل ناس بحرى وهو قاعد بره .... شكرا اخ حسن طه شكرا عماد عثمان شكرا صاحب البوست كمال
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
ناهد أختي...
كل عام وأنت والأخ/ هشام والأسرة الكريمة بخير ...
معليش كنت خارج الدمام من ثاني يوم...
المهم جيتكم في بيتكم الجديد.. ولم أجدكم...
وفعلا لقيت المفتاح تحت الفرشة...
ودخلت وأخذت فحمة من فحم الشية.. التي لم أجدها...
وشخطبت ليكم شوبة شخطبة... أمسحوها
وللأسف لم أتمكن من متابعة الحلقة نسبة لسفري...
بعدين لقيت عندكم في الصالة صحن بتاع "ربيت"
أفتكرتوا كعك
تحياتي
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
اخ كمال حمدلله على السلامة وانشاءالله لاقيت طارق اتمنى تكون انت والاسرة بخير وهو واولاده بالف خير .... وماياهو الربيت ده القاعدبن نضيف بيه غايتوا الله يديكم العافية بس محتاجة لمساعدتكم بى هناك ماقادرة انظم البورد من يأنس فى نفسه انه ممكن يساعد فى ترتيبه ورش حيشانه يكلمنى عشان محتاجة لمدير ومشرف ووظائف كتيرة ماعندنا شروط غير نقل الكفالة من اخونا كمال وتجوا بالعندكم وتستلموا الادارة المميزات تذكرة سفر يوميا الى بوست الطراوة وبوستات الاميرية والشعبية ولامانع من بعض البوستات الاخرى اجازة اسبوعية مدفوعة الاجر...من سنامنا علاج .... ضيافة ربيت وكدة تنتهى الضيافة بالربيت بانتهاء فترة العيد ليجد الفول مكانه محفوظا بدلات وعمولات تحددوها انتوا ... المهم ... انا عندى مشروع كتابين بطبع فيهم ...يعلم الله كان ماكده كنت مسكت الموقع وجيهتوا
بالله العرض ده كيف؟
اخ كمال وكل الاخوان
ملحوظة هامة امبارح خليت لى مشوار مهم مع الاولاد للفسحة وقعدت حرست الهكر الهكر جاء من الساعة 8 ولغاية 2 صباحا نزل بوست فيه شتيمة باسم بكرى وبوست للاعضاء بشتائم برضو وبوست اخير باسم (أنا)قال فيه انه هو نعس وماشى ينوم... اتصدوا ليه الاخوان ماقصروا لكن كان بيخش ويعدل فى مداخلاتهم وبتظهر( عدل بواسطة بكرى ابوبكر)
المهم تسيفوا بوست بحرى ده من اوله لانه بوستات كتيرة ضاعت زى بوست الامتداد وبحرى ده مابوست ساهل الواحد فعلا بيحس انه فى بيتو
بالجد الموقف خطييييير ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
اخ كمال حمدلله على السلامة وانشاءالله لاقيت طارق اتمنى تكون انت والاسرة بخير وهو واولاده بالف خير .... وماياهو الربيت ده القاعدبن نضيف بيه غايتوا الله يديكم العافية بس محتاجة لمساعدتكم بى هناك ماقادرة انظم البورد من يأنس فى نفسه انه ممكن يساعد فى ترتيبه ورش حيشانه يكلمنى عشان محتاجة لمدير ومشرف ووظائف كتيرة ماعندنا شروط غير نقل الكفالة من اخونا كمال وتجوا بالعندكم وتستلموا الادارة المميزات تذكرة سفر يوميا الى بوست الطراوة وبوستات الاميرية والشعبية ولامانع من بعض البوستات الاخرى اجازة اسبوعية مدفوعة الاجر...من سنامنا علاج .... ضيافة ربيت وكدة تنتهى الضيافة بالربيت بانتهاء فترة العيد ليجد الفول مكانه محفوظا بدلات وعمولات تحددوها انتوا ... المهم ... انا عندى مشروع كتابين بطبع فيهم ...يعلم الله كان ماكده كنت مسكت الموقع وجيهتوا
بالله العرض ده كيف؟
اخ كمال وكل الاخوان
ملحوظة هامة امبارح خليت لى مشوار مهم مع الاولاد للفسحة وقعدت حرست الهكر الهكر جاء من الساعة 8 ولغاية 2 صباحا نزل بوست فيه شتيمة باسم بكرى وبوست للاعضاء بشتائم برضو وبوست اخير باسم (أنا)قال فيه انه هو نعس وماشى ينوم... اتصدوا ليه الاخوان ماقصروا لكن كان بيخش ويعدل فى مداخلاتهم وبتظهر( عدل بواسطة بكرى ابوبكر)
المهم تسيفوا بوست بحرى ده من اوله لانه بوستات كتيرة ضاعت زى بوست الامتداد وبحرى ده مابوست ساهل الواحد فعلا بيحس انه فى بيتو
بالجد الموقف خطييييير ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخت / ناهد..
تحياتي...
إن شاء الله الهكر المضرة يلقاها في "بوست بوردو"
بدل في "جنى جناه"... لأنو هذا ما جناه الهكر..
وجنونو.. إن كان ليهو أو سيكون ليهو ما ليهم جناية...
يعني... نحن لا قاعدين نشاتم زول ولا بناضم زول
مالو علينا كمان؟!!!...
عموما إن شاء الله نعمل بنصيحتك.. وBACKUP مهم مع أو بدون هكر...
ودي من أبجديات أستخدامات الحاسوب...
بحري طراوة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: يعني... نحن لا قاعدين نشاتم زول ولا بناضم زول مالو علينا كمان؟!!!... |
ود السر كرار التهاني لك والاسر الكريمه وكل سنه وأنتم طيبون.. والله ماطلبنى حليفه كلامك الفوق دا زيد عليهو حدنا كبارى بحرى ومابنتخطاها , وكان لي شمال بحرى حدنا واوستي وودرملي للفواتح والمناسبات والرحلات وكان لي شرق النيل ناس فواتح ساكت ونحنا في حالنا في طراوتنا لابنخش بيت زوول ولابنغلط عليهو لكن البهبشنا في طراوتنا دى وونستنا إلا مانعتر فيهو ويفكو مننا الله .. ودام الود بيننا.. (أبو محمد فؤاد)
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
شباب بحري الرائعين روعة أهل بحري وشوارع بحري وطراوة بحري كيف حالكم وكل سنة وانتو طيبين وتامين ولامين والسنة الجاية تتحقق كل امانيكم وانشاء اللة مجتمعين فى حديقة عبود وطبعا عبد الكريم ما حيكون معانا لانو جاء الامارات نهائي وماناوي الرجوع تاني عموما تحياتي لكم ولجميع افراد اسركم واحد واحد وتهانينا بزواج ابن المزاد والبوست ياسر حامدونتمنى له زواجا مباركاً /B]
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
أنعى لأهل بحري عموما.. وفاة العم صديق إبراهيم بابكر...
أحد خريجي كلية غردون والقدامى وأحد أعمدة الخدمة المدنية..
الملقب بود المأمور .. حيث أن والده هو أول مأمور سوداني..
وهو والد الأخ الصديق العزيز/ عادل صديق إبراهيم بابكر..
وكل من الأخوان:
صلاح صديق عبد الحميد صديق الفاتح صديق محمد صديق
وأختيهما الكريمتين..
وعم الدكتور/ عبد الجبار علي أبراهيم
وقد توفى مرضي عنه بإذن الله ثالث أيام عيد الأضحى المبارك...
نسأل الله أن يتغمده بواسع رحمته.. وأن يضيء قبره ويجعله روضة من رياض الجنة..
ولا حول ولا قوة إلا بالله
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
بسم الله الرحمن الرحيم
(( أنا لله و أنا اليه راجعون ))
(( و لا حول و لا قوة الا بالله ))
أتقدم بالتعازي الحارة لأبناء المرحوم العـــــم صديـــــق أبراهيــــــم
صلاح و عبدالحميد و عادل و الفاتح و محمد و أبن عمهم د. عبدالجبار علي أبراهيم
و الى كل الأهل ببحري و الجيلي و الشهيناب
و نسال الله ان يسكن الفقيد فسيح جناته مع الأنبياء و الشهداء و الصديقين و حسن
أولئك رفيقا,,,,
و لأسرته الصبر و حسن العزاء
(( و لا حول و لا قوة الا بالله ))
د. ابراهيـــم العجــــب و الأســـرة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Ibrahim Elagab)
|
الاخ معاوية كل عام وانت بالف خير
Quote: عبد الكريم وعبد الرازق انشاء اللة ماتكونوا نسيتوا ترسلوا جلود الاضاحي لنادي النجمة |
هو الخروف زااااااااااااتو مابشوفوه بيمشوا يلقوه لحم بس وكمان السنة دى نحن اتلطش مننا المصران والفشفاش والاتنين الحمدلله نحن مادايرنهم ...
________________
التحايا لاسرة نادى النجمة .....
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: يا أخي أنت عملت فاول فني..
يا أخي التخمير ده ضد الفايروست..
|
كمال كرار ،، ليس هناك فاول وأعتقد أن هناك فرق جوهري بين البكتيريا (التي تقوم بعملية التخمير) وبين الفايروسات ، وهناك بعض أنواع الفيروسات تتطفل على البكتريا نفسها فتعمل على انحلالها وتتسبب في موتها وهذا ما حدث بالنسبة لشربوت ناهد لدرجة أنه إلى الآن لم يتخمر ..
معاوية محمد الحسن كل عام وأنت بخير .. جلود الأضاحي زمان لمن الناس كلها كانت بتضحي وتتبرع بها للجمعية لم يتم الإستفادة منها الآن عدد الناس البيضحو قل كثيراً وأغلبهم بيعطي الجلد للضباح (ما إيداهور) ..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: ليس هناك فاول وأعتقد أن هناك فرق جوهري بين البكتيريا (التي تقوم بعملية التخمير) وبين الفايروسات ، وهناك بعض أنواع الفيروسات تتطفل على البكتريا نفسها فتعمل على انحلالها وتتسبب في موتها وهذا ما حدث بالنسبة لشربوت ناهد لدرجة أنه إلى الآن لم يتخمر ..
|
والله يارزقة مباااالغة يعنى شربوتى ضربوا فايروس او بالاصح الفيروس ضرب البكتريا بتاعتوا طيب مافى مشكلة اجيب ليه بكتريا من وييييييييييييييييين ؟ وبلقاها بى كم ؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: ما تزورينا بهناك.. ومعاك شوية قرض...
أو حتى جردقة |
لا لا.. عندى تعاويذ بجيبها واجيها سممممممح حتى اخش وياغرغرة ماجاك شر....
_____________
عارف يااخ كمال بوست بحرى ده زى البيت الواحد بيقول فيه الدايره يهظر ينكت يزهج زاتو فيه ....اما اى بوست تانى الواحد بيضرب اخماس فى اسداس ويقسم بعد داك على الاتنين ويجمع ويخت الناتج ويطلع بالواحد ...حتى يطرح الكلام ارضا على ارضية البوست ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: غايتو أنا لوزاتي ورمانة شديد... عشان كده برضو لو جيبتي زيت سمسم ومستكة.. |
ود السر كرار قدر ماالواحد يحاول يطلعك من شُلة الديناصورات , تجي داخل بكرعينك , هسه الكلام القلتو فوق دا بت بشير الطيب إستعانت بحبوبات ومركز العلاج بالطب الشعبي ورجعت للارشيف بتاع صور شعبيه (الطيب محمد الطيب) دا غير إنها ضاربه تلفونات بمية ريال عشان تعرف العلاقه بين ورم اللوزات وزيت السمسم والمستكه ,, كلامك القلتو دا يتبع لمرحلة الناس الكانو حاضرين مؤتمرالخريجيين وكده.. ودام الود بيننا.. (ابو محمد فؤاد)
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
يا معاوية...
سلامات.. وكده..
أنت منو القال ليك عبد الكريم مصلع... دي جلحات.. ممتدة...
تعرف (محمد فؤاد) ما شاء الله بيشبه أبوه الخالق الناطق...
بس والله والحق يقال .. أبوه .. كان عنده شعر بس شامي كابور
والله قلنا بما علمنا ورأينا...
يعني نحن في حضرة إبي محمد فؤاد... فعلا ديناصورات... لكن
شن بجيبنا لناس فلان وفلان...البيشربو الشربوت بالفنجان!!!!
تحياتي... بكرة الصغار يكبروا... تحسبوا لعب؟؟؟؟
| |
|
|
|
|
|
|
|