|
Re: هنا نتحاور ونتعرف على العضو ساره الطيب ... مرحبا بالجميع (Re: حمد محمد احمد)
|
حمد....
Quote: هشام مجذوب من زمان انت عارف حاجة وشغال بالقطاعي يظهر انو سارة لحدي اخر 2008 دي ناس المنبر كلهم حايطلعو اهلها هنيالك يا سارة مكسب كبير الموضوع البين سارة وهشام بقى مشوق محتاج لقناة الكوتش |
إنت عارف انا يوم الخميس قلت لي هالة إنو أنا ماشاء الله أسرتي من والدي كبيرة وأسرتي من والدتي أكبر.... وأخواني ماشاء الله معارفهم كتاااار... أي مكان بمشي لي بلقى ناس معارفي... حتى قلت ليها صلاح مختار في بوست اليوم الحار قال لينا Quote: د.تهاني ,ساره إحتمال برضو نكون نحن اهل...
|
وأنا رديت عليهو:
Quote: والله مابعيد يا باشمهندس... أنا عن نفسي أي مكان بمشي ليهو بلاقي ناس من أهلي... أهلي كتار وأنا مابعرفهم كويس...
وكان قلت بسم الله وقعدت للموضوع دا بطلع نصكم أقاربي....
زي أيام الجامعة، كنت كل يوم بطلع بي قريب...لدرجة إنو الناس كانو بقولو لي إنتي أهلك ديل كلهم بقروا هندسة جامعة الخرطوم |
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: sara Eltayeb suliman)
|
Quote: عرفينا عن اصدقائك فى الجامعه بشئ من التفصيل الممكن |
رانيا كمير (كيميائية)
شمعة تحترق من أجل الاخرين.... عندما تحتاج لها تجدها بغض النظر عن الظروف... رانيا حب بلا حدود... إنسانة طيبة... تعمل على إرضاء الأخرين ولو كان ذلك على حساب مصلحتها... هي مثال للتفاني والتربية والإحترام والأخلاق... عندما تراها تحس إن الدنيا بخير... ويجدها الإنسان في أوقات الشدة لتشد من أزره بكل إخلاص ووفاء... لرانيا قلب أبيض... وهي تومة... وتومتها ريم كانت في طب...في سنة أولى أنا كنت ما بميزهم أبداً... وعندهم قصص طريفة كثيرة بي موضوع الشبه دا... رانيا شخصية لاتُنسى أبدا...
رباب هاشم (كيميائية)
رباب صديقتي منذ المرحلة الثانوية درست معي سنة تالتة ثانوي في المجلس الأفريقي والجامعة... رباب دي ما شاء الله عليها زي ما بقولو بت ولا كل البنات... من أكثر البنات اللاتي قابلتهن رجاحة عقل (عقلها يوزن بلد)... لها رأي سديد في المواضيع الجادة وخير من يمكنك إستشارته والرجوع اليه عندما تريد حسم امر ما... تتجسد في رباب معاني الأدب والأخلاق والذوق والإحترام والفهم العالي وأكثر من ذلك ما لا يمكن حصره...
ريلة منصور (كيميائية)
ريلة المنقبة... متزوجة وعندها ولد... شخصية لذيذة جداً وعندما يكون الإنسان معها لايكف عن الضحك... كلامها كلو مضحك وعندها كلامات حبوبات كدة بتعرفها براها نسبة لأنها تربت مع حبوبتها... ريلة هي ألذ أنصار سنة في السودن... كنا بنشاغلها طوالي كل ما نشوف لينا بت منقبة عملت حاجة نقول ليهالا شفت منقبات اخر زمن ديل بعملو شنو؟... ماسكين ليها النقاب دا ذلة بس... أي نعم بتشاكلنا وبتهرشنا بس ما بنخليها برضو... و إذا هي ضحكت ساي بنقول ليها شوفتي ليك منقبة بتضحك بالله شوف منقبات اخر زمن...
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: sara Eltayeb suliman)
|
Quote: عرفينا عن اصدقائك فى الجامعه بشئ من التفصيل الممكن |
محمد هاشم (ميكانيكا) أخو أخوان بمعنى الكلمة... شخص ممتاز، تتجسد فيه معاني التهذيب، الإلتزام، الأخلاق، الأدب، الإحترام، يتعامل مع كل الناس بكل الإحترام والجميع يحترموه ويقدروه... التعامل مع محمد هاشم مريح للغاية فهو انسان واضح وبرئ ولا يحمل ضغينة لأحد ويفكر في الناس ويراعي مشاعرهم أكثر من نفسه... بقدر ما هو إنسان جاد هو في نفس الوقت صاحب نكتة وحاضر البديهة... يمكنك الإعتماد عليه (بصراحة محمد هاشم دا ممكن تقول عليه رجل والرجال قليل)... وهو شخص يفرض عليك احترامه... وهو من أسرة محترمة محمد هاشم شاب مميز أمثاله قليلين ونادرين في هذا الزمان... وربنا يوفقه و يرد غربته....
عبد القادر ابراهيم (كيميائية) أخ عزيز وود بلد يحترم ويقدر الزمالة و الأخوة... كان نعم الأخ من الشخصيات التي كنت ألجأ إليها في بعض المواقف وكان يفيدني جداً برأيه وتصرفه... وقف معي وقفات رجولية وأخوية كثيرة.... وهو من أسرة محترمة...
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: Hisham Magzoub)
|
Quote: ساره مواصفات اصحابك عاليه
دا بيدل على حسن الاختيار |
أولا شكرا جزيلا...
وأنا بالجد بكتب عنهم بكل فخر وبفتكرإني بقدر أنافس بيهم على جائزة أفضل أصدقاء...
وأنا نفسي تعرفوهم كلهم وحا تتأكدوا من كلامي...
Quote: وانو من المفترض انك بنفس المواصفات دى
فكل قرين بالمقارن يقتدى |
أما دي يا هشام فما بضمنها ليك.... بس بتمنى أكون بنفس مستواهم لأنهم جد ناس ماساهلين ويستحقوا الثقة...
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: sara Eltayeb suliman)
|
Quote: بس ما قلتى لينا حاجه عن اخوانك؟ |
ابوعبيدة الطيب سليمان
شخصية أثرت وما زالت تؤثر في سارة الطيب... أبوعبيدة أخي وصديقي وظهري ومصدر الأمان لي والعصا التي أتكئ عليهاو...... و.....هو شخصية مرجعية (Reference) بالنسبة لي... لا إفعل شئ إلا بالرجوع له.... أنا الأن أفتقده كثيراً لأنه خارج السودان...بس ربنا يرجعو لي بالسلامة... بالنسسبة لي أكن لهذا الأخ إحترام وحب فوق العادة لأنه شخصية يمتاز برجاحة العقل، الفهم العالي، الحكمة، الدين، الأخلاق، الإلتزام، الوفاء.... ماشاء الله وتبارك الله ربنا يحفظه ويوفقه (ما عشان كل فتاة بأخيها معجبة بس دي الحقيقة والله).. أبوعبيدة له مقدرة ومهارة عالية في فهم سارة وفهم تفكيرها ومعرفة إحتياجاتها حتى بدون أن أتكلم معه... بمجرد أن ينظر لي نظرة واحدة يمكنه معرفة ماذا أود أن أقول ويمكنه أيضا ان يعرف ماأود فعله..... هو حقيقي نعم الأخ يتعامل مع أخواته بحنية ومرونة وopen mind وفي نفس الوقت يقدم لهن النصائح المقنعة وهي أيضا قريب منهن جميعا يجدنه معهن حيثما ذهبن... حتى وهو بعبد هو معنا جميعاً... وبصراحة هو أخ مثالي بمعنى الكلمة... بقدر ما هو شخص قوي الشخصية هو أيضا حنييييييييييييييييين جداً ويستطيع إحتواء كل من حوله ويعمل فوق طاقته من أجل إسعاد الأخرين وإرضاءهم... هو إنسان خدووووم جداً ومجامل لأبعد حد... وأي إنسان يعرف أبوعبيدة لايملك إلا أن يحترمه وأتمنى ان تتعرفوا عليه، طبعاً إحتمال في زول فيكم بعرفو في إطار علاقاته المتشابكة والمتشعبة جداً.... أبوعبيدة خريج قانون... هو محامي وأستاذ بالجامعة.... أبوعبيدة عبارة عن كنز حقيقي.... وربنا يحفظك ويحميك ويوفقك دنيا وأخرة يا أبوعبيدة....
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: sara Eltayeb suliman)
|
Quote: عرفينا عن اصدقائك فى الجامعه بشئ من التفصيل الممكن |
سهى بابكر (معمار)
سهى في الأصل هي بت خالة والدتي... وفي نفس الوقت أصبحت صديقة مقربة جداً بالنسبة لي بعد دخولي الجامعة حيث عرفتها عن قرب... وهي دفعتي 99 بس هي معمار... سهى دي بقى حكاية براها... إنسانة عجيبة حقيقي... تجد في سهى معاني الإنسانية والله عندها قيم جميلة متمسكة بها وفي نفس الوقت تجدها معك في السراء والضراء... لها قلب يحب الخير لكل الناس بطريقة مبالغ فيها تهتم بالعمل الخيري و الأيتام والعجزة وتقضي الكثير من وقتها في التفكير لحل مشاكلهم و إيجاد طرق لمساعدتهم المادية والمعنوية وتصل إلى إنشاء الجمعيات الخيرية الجادة وتجمع المهندسين للعمل الخيري... وهي خارج السودان من فترة، لكنها تعمل في هذه المشاريع وترسل ما تنجزه للسودان والله شخصية يحس الإنسان بالضالة عندما يرى إنجازاتها... بالإضافة إلى كل هذا فهي صديقة وأخت حنون وطيبة وتسأل وتطمئن على الأحوال وتهتم بتفاصيل حياتي الشخصية وتعطي النصيحة بكل صدق وأمانة وأنا مدينة لها بالكثير... رد الله غربتك يا سهى.... ووفقك وسدد خطاك
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: sara Eltayeb suliman)
|
Quote: رؤيتك لمستقبلك فى العشره سنوات القادمه (اى الخطه العشريه)؟ |
إذا شاء الله وأذِن..
أهم هدف في الخطة هو عمل الماجستير والدكتوراة في ال Environmental Engineering ودا بيحتاج لتذليل كمية من العقبات ربنا يقدرني على تذليلها...
والثاني هو العمل في مجال ال Environmental Engineering
طبعا أنا في الخطة مفروض أحدد الأهداف وكيفية الوصول إلى هذه الأهداف وإلا تصبح أحلام وأماني... بس بكل أسف ما بقدر أدخل في تفاصيل كيفية الوصول الي الأهداف أكتر من كدة...
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
Quote: إذا شاء الله وأذِن..
أهم هدف في الخطة هو عمل الماجستير والدكتوراة في ال Environmental Engineering ودا بيحتاج لتذليل كمية من العقبات ربنا يقدرني على تذليلها...
والثاني هو العمل في مجال ال Environmental Engineering
طبعا أنا في الخطة مفروض أحدد الأهداف وكيفية الوصول إلى هذه الأهداف وإلا تصبح أحلام وأماني... بس بكل أسف ما بقدر أدخل في تفاصيل كيفية الوصول الي الأهداف أكتر من كدة... |
ساره خطط جميله وطموحه لكن الزمن بيسرق وكل ما تتاخرى القرايه بتبقى صعبه اتخرجت ليك اربعه سنوات اوخمسه فركزى فى الموضوع
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: sara Eltayeb suliman)
|
سنوية...
Quote: ويا ساره حلى المعادله ده مدنيه+كيميائيه=؟؟؟؟؟؟؟؟؟ |
مدنية+كيميائية= كيمدنية...(Environmental Engineering)
بالمناسبة دي حقيقة ال Environmental Engineering عبارة عن مزيج مدنية+كيميائية
وأيضاًعلى الصعيد الشخصي بالنسبة لسارة....
مدنية+كيميائية= أصدقاء صدوقين صادقي الوعد منصفين
مدنية+كيميائية= أحلى صداقة وأقوى علاقة
مدنية+كيميائية= تعني لي الكثييييييييييييييييييييييييييييير
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ ممكن يا هشام دا يكون واحد من أسباب حبي لل Environmental Engineering ....
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: sara Eltayeb suliman)
|
Quote: ويا ساره حلى المعادله ده مدنيه+كيميائيه=؟؟؟؟؟؟؟؟؟ |
كمان بيرتي (my pair) من سنة أولى كانت إسمها سارة أحمد وهي أيضا حولت كيميائية
كنا أكتر بير متفق في الدفعة وكان من المواقف الأثرت فينيي جدا....
لأنها من القلائل الذين أعرفهم في مدنية هي و آن.... بعد حولت قطعت راسي عدييل...
واصلت حتى السنة الثالثة وأنا لا أعرف ناس مدنية بصورة جيدة عدا آن طبعاً.......
بس حدودي معاهم المحاضرات و بجري جري على ناس كيميائية بدون تفاهم......
علاقتي بيهم بس في الوقت البنكون راجين فيهو المحاضرة تبدأ وخلاص.........
والوقت دا ذاتو بعد مرات بكونوا ناس يسرا واقفين معاي فيهو لحدي ما الدكتور يجي....
في سنة تالتة إنفصلنا كليا عن ناس كيميائية فيما عدا الماس وبرضو قريتو مع ناس يسرا...
كيميائية الفهم والذوق والأصدقاء الصدوقين صادقي الوعد المنصفين.................
ونواصل.....................
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
سلامات يا هندساب .. يا جماعة الخير .. مسعولين من الشر لى بعدو.. القرود .. وين موقعو من المولد بتاعكم دة؟ وبالمناسبة ساره دى استضفتوها هنا على اساس شنو؟ انا في تقديرى هناك من هم اولى منها .. والا ما كدة يا كوتش؟ يخيل لى ابراهيم بيعرف منو الاولى؟ ودة سؤال موجه ليك يا سارة ..ليه سارة؟؟؟ وفي انتظاركم .......
الفاتح
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: Hisham Magzoub)
|
الفاتح وديدي...
Quote: وبالمناسبة ساره دى استضفتوها هنا على اساس شنو؟ انا في تقديرى هناك من هم اولى منها .. والا ما كدة يا كوتش؟ يخيل لى ابراهيم بيعرف منو الاولى؟ ودة سؤال موجه ليك يا سارة ..ليه سارة؟؟؟ وفي انتظاركم .......
الفاتح |
التبرير الأول
سارة إستاضافوها هنا على نفس الأساس الإستاضافوا
بيهو وديدي في بيت الهنا في قناة الشروق....
وانا في تقديرى هناك من هم اولى منه ولا ما كدة يا...
ويخيل لي إبراهيم برضو بعرف منو الأولى؟
ـــــــــــــــــــــــــــــــــــــــــــــــــــــــــــــــــــــ ملحوظة وديدي طلع بشتغل كويس في البيت
قولوا ما شاء الله ما تسحروهو
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
يا جمل الحلوين .. سلام..
الرجاء عدم خلط الكيمان ..
سارة كتبت
Quote: بسم الله نبدأ التخمينات يا هشام والفاتح وديدي....
أول حاجة وديدي سكت دهرا ونطق كفراً... |
منو القال .. سكت؟ يجب التفريق بين الانصات والاستماع والسكات ( خمو صرو .. جاتكم محاضرة من حيث لاتريدون)
انا كنت منصت جيد.. عشان اشوف نهايتكم .. لقيتكم ما عايزين تنتهو..(اعمل شنو؟) يعني تقصدوا انو لمن يغلبني الصبر .. اصبر شوية كمان .. والا شنو؟
اما موضوع الشروق بخص الفاتح وديدي .. وانا الفاتح عبد الله .. كيف تشبهوني بالزول الشين ابو صلعة داك؟؟ اها المصائب جاتك يا سارة..
وعليه .. لازم تكوني قريبتنا زى ما طلعتي قريبة الجماعة ديل ناس هشام وهلمجرا ديل.. يا افتح بلاغ اشانة سمعة اقول انك شبهتيني بالفاتح وديدي
وانا منتظر.. يا المحكمة يا المحكمة.. اختارو واحدة في المحكمتين
وراجعين للشروق!!!
الفاتح الوجيه
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: sara Eltayeb suliman)
|
Quote: اما موضوع الشروق بخص الفاتح وديدي .. وانا الفاتح عبد الله .. كيف تشبهوني بالزول الشين ابو صلعة داك؟؟ اها المصائب جاتك يا سارة..
|
برنامج بيت الهنا ما فيهو عيب ما تنكروا...
الفاتح وديدي الله أعلم به....
عموما كدة الصلعة ما كانت ظاهرة في بيت الهنا
الفي قناة الشروق ما كنت داسيها بالعِمُة...
لكن المرة الجاية حاتظهر لما يستضيفوك
في برنامج شغل الهنا في هارموني
لأنو التسجيل حيكون في Greater Nile
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: sara Eltayeb suliman)
|
دي نصيحة طارق البأكد عليها بإلحاح...
Quote: التحية للجميع ..
الزميل طارق الكوتش تعرض لعملية تهكير .. وحاليا لا يستطيع الدخول .. وذلك لفترة حتى يقوم بكري بتغيير ال password له ..
وهو يناشد الجميع بتوخي الحذر ،، وعدم فتح أي Link سواء في المنتدى أو في إيميل من عنوان غريب .. |
يا جماعة يجب أخذ موضوع الهكر دا بجدية شديدة
ولازم كل زول يعمل حسابو شدييد من أي Link
حتى لو كان من عنوان معروف لأنو ممكن يكون سيدو إتهكر
وأي زول يشك في مداخلة من مداخلات أحد الأعضاء
يتصل به مباشرة ويتأكد من الموضوع بي نفسو
ويكلم الناس إذا أكتشف أي حاجة مشككة
الرجاء توخي الحذر...
ممكن الهكر يكتب بإسم أي واحد من الأعضاء
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: Hisham Magzoub)
|
بعد مرور فترة من السمستر الأول في سنة تالتة تعودت نوعا ما على ناس مدنية.....
في كمية من ناس مدنية أنا كنت بعرفهم لكن معرفة سطحية يعني بس بعرف الأسامي
كل البينا السلام عليكم وعليكم السلام وكان كترنا بنسأل القراية كيف وإبتسامة مجاملة
وبدأت أتعرف على الناس من قريب بحكم وجودي معهم لفترات أطول من السابق قليلاً
بسبب اللابات الكتيرة الفي سنة تالتة والتساليم الما ليها عدد والassignments
والمشروع بتاع ال Steel Design (د. زروق) ومتعلقات القراية والذي منه....
في السنة الثالثة إتعرفت على إحدى بنات مدنية من دفعة 97 وهي رُبا عبد الفتاح....
من الشخصيات الكنت أصلاً بعرفا من سنة أولى بس علاقتي بيهم فوق فوق وبقو أصحابي....
سارة الوسيلة وهند نجيب وسمية عمر ووائل عبد المجيد..............ديل من دفعتي 99
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: Hisham Magzoub)
|
ربا عبد الفتاح
تقريبا هي أول من صادقته من ناس مدنية وهي دفعة 97 (جوارح)
بنت ممتازة وراقية في التعامل لدرجة مبالغ فيها ولها مستوى فهم عالي
ومتعاونة وأنا بصراحة أكن لها الكثير من التقدير والإحترام والحب
تعلمت من ربا معنى العطاء والبذل دون إنتظار المقابل ابداً.......
أيضا تعلمت منها كيف تقف مع من هو في حاجة اليك دون ان يطلب منك..
بصراحة ربا قدمت لي الكثير ووقفت معي وقفات مشهودة
كنت أجدها حين احتاج اليها وتقدم لي مساعداتها الكريمة جدا....
بالمناسبة الطريقة التي تعرفت بها على ربا كانت مؤشرا لانها
شخصية لطيفة ومتعاونة و تعطي اهتمام وحنية مبالغة لأصحابها
والله أنا كانت بتحرجني شديد بتعاملها الجميييييييييييل معاي
يرجع لربا الفضل في نجاحي في السنة التالتة بعد رب العالمين
لانها ساعدتني بكل ما تملك من خبرات ودفاتر وشرح وغيره
في حين أني لم أطلب منها وأيضا لم أكن أعرفها قبل فترة طويلة...
هي الان متزوجة ومقيمة في أمريكا رد الله غربتها ووفقها في حياتها....
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
البرلومة كتبت
Quote: ملحوظة وديدي طلع بشتغل كويس في البيت
قولوا ما شاء الله ما تسحروهو |
بغض النظر عن منو الفاتح وياتو وديدي ..
البرولمة دى ..ارادت ان توصل رسالة الشغل بالجزء الاول من العبارة.. والا حسادة منها كما المحت في الجزء الثاني ؟
طبعا لمن لم يحضرو الحلقة دى من بيت الهنا.. جابوا الفاتح وديدي وهو يستعرض ابداعات الرجل الشرقي من ذبح الكديسة واستعراض عضلاته في البيت
بكل الود..
الفاتح
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
Quote: عرفينا عن اصدقائك فى الجامعه بشئ من التفصيل الممكن
|
وائل عبد المجيد (مدنية)
انا أصلا بعرفو من سنة أولى بس معرفة فوق فوق...
في سنة تالتة تعرفت عليه بصورة أفضل... وهو شخص متعاون
هو أخ ممتاز و له دور كبير في تشجيعي وحثي للسعي الى الامام وهو إنسان مجتهد وطموح يعمل مافي وسعه للوصول الي أهدافه
ويقدر الناس والعلاقات الإنسانية...
من الشخصيات التي تدفعك الى الامام وبكل موضوعية ......
سارة الوسيلة (مدنية)
سارة بنت تقية ومحترمة وتخاف ربها في تعاملها مع كل الناس
تحنرم الجميع وهي إنسانة مجاملة جدا ويمكنها التعامل مع الجميع
عندما اراها احس بالراحة النفسية... لها رأي سديد وعقل راجح
إنسانة تتحمل المسؤلية ومجتهدة في تحقيق أهدافها وفي التقدم
سارة الوسيلة من الشخصيات التي أكن لها كل المحبة والإحترام
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
من الأشياء الربطني بناس مدننية...
رحلة عطبرة
في أثناء السنة التالتة نظمنا رحلة الى مدينة عطبرة
زرنا خلالها مصنع أسمنت عطبرة وكبري كان تحت التشييد
كان لهذه الرحلة أثر كبير في تعارف على ناس الدفعة من قريب
مع أن الرحلة كانت ليومين فقط لكنها اثرت في الروابط والعلاقات
وكان أول برنامج للدفغة مع بعض وخاص بمدنية فقط....
نزلنا يومين في إستراحة مصنع أسمنت عطبرة وكانوا يومين جميلات
معظم اليوم طبعا كنا بنكون حايمين برة في المدينة ...
كانت بصراحة رحلة ممتعة وجميلة...
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
Quote: عرفينا عن اصدقائك فى الجامعه بشئ من التفصيل الممكن |
سمية عمر (مدنية)
سمية من الشخصيات اللذيذة والحاضرة البديهة وكلامها حلو
ولما الزول يكون معاها بس بضحك الوقت كلو من التعليقات
اللذيذة ... لقبها (سمسم أبوعميرة هيمو) هي اللقبت روحها باللقب دا
سمية تأخذ كل الأمور بهزار وضحك... وهي بت لذيذة جدا وإجتماعية...
علاقاتها واسعة ومصاحبة نص ناس الجامعة
هند نجيب (مدنية)
بطة نجيب دي البيبي عندنا، هي شخصية عسل وطيبة جداً
وهي حبوبة شدييييييد من الناس البتحبو والزول بحس فيها البراءة
بتدي إحساس الطفولة وهي بت ظريفة وبرضو تعليقاتها لطيفة..
عمر عدلي (مدنية)
من الشخصيات التي تعرفت عليها في سنة رابعة وفي خامسة
عرفتو من قريب وهو ولد ممتاز وأخلاقو عالية وهو نعم الأخ
بيقيف وقفة الرجال في المواقف التي تستحق... وهو ولد ناس
ومحترم لأبعد الحدود ورغم قصر المدة التي عرفته فيها لكن
كان من الشخصيات المميزة وهو راجل تمام... بقيف وقفات
رائعة مع كل الناس .....
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
معسكر المساحة جبل أولياء2002
كورس عملي المساحة الإجباري بكون بعد السنة الثالثة
دا من البرامج الكانت فظيعة جدا جدا خلال فترة الجامعة
كانت رحلة عبارة عن 9 أيام كل يوم فيها قصة براها
أخطر وأصعب يوم كان أول يوم وصلنا فيهو الجبل
طبعا نحنا جايين الجبل بي فكرة إنو غرفة أشباح
حسب ما صورووهو لينا ناس الدفع القدامنا بالإجماع
بالذات البنات كلهم كانوا بقولوا نفس الكلام المرعب
وصلنا جبل أولياء الظهر كدة ونزلونا في مدرسة (البنات)
أما الأولاد نزلوهم في كلية تابعة لجامعة النيلين.....
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
معسكر المساحة جبل أولياء2002
أول ما وصلنا لقينا ليك الجماعة مالين حوش المدرسة سراير
بإعتبار إنو الحوش دا الإستراحة بتاعتنا وكدة
بالنهار طبعا نحنا والشمس قاعدين مع بعض بدون حجاب
والكلام دا كان شهر 6 يعني عز الصيف والشمس الحارقة
ودي كانت أول البشائر الهلت، المهم سكتنا ساي نعاين بس
العصر جانا الترحيل ومشينا عشان يورونا شغل بكرة
والشرح دا بدونا ليهو في الجامعة النازلين فيها الأولاد
المهم شرحوا لينا الحاصل شنو سريع سريع كدة
ونحنا لسة منططين عيونا ومستنين البلاوي الحكوها
لينا تحصل وأول حاجة ما عجبتنا المدرسة الحا نقعد فيها
المهم خلصنا المحاضرة والشرح العملي ورجعونا المدرسة
الكلام دا كان على وقت المغرب كدة ....
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
معسكر المساحة جبل أولياء2002
رجعنا لقينا الدنيا ظلام تقريبا وبقينا في بطاريتي وبطاريتك
لأنو في لمبة واحدة ونورا خافت و كأنها مافي أصلا
وبرضو ساكتين ساي ونعاين منتظرين باقي المفاجات
باليل كدة إتعشينا وإتونسنا حبة كدة وقلنا ننوم عشان الشغل
الصباح بدري مفروض نصحى مع صلاة الصبح ونواصل
المهم قبل ما نوم كدة نشوف ليك كلب معانا وبعد شوية حيوان تاني كدة
طبعا بلعناها ساي ما كان في حل تاني قلنا ننوم عين مفتحة وعين مغمضة
بس أول ما قلنا ننوم كدة زي الساعة 12 تقريبا جاتنا ليك عاصفة ترابية فظيعة وغريبة
ما حصل شفناها قبل كدة دي بالجد خلعتنا لانو الزول ما بشوف الجنبو
من كترة التراب المراتب بدات تطير وصوت العاصفة وبدات الكلاب تنبح (غرفة الأشباح)
المهم البنات ديل كلهم أصيبوا بالذعر حتى الكانو في الأول عاملين
فيها صنديدات و ما حنكوشات الموقف دا جرسهم جرسة شديدة
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
وأجمل حاجة نحنا كنا برانا والزمن داك(2002) شبكة الموبايل كانت تعبانة
شديييييييييييد في جبل أولياء بقينا نحاول نتصل بي المشرفين (أ. يحي وأ. وليد لطفي)
ما قدرنا كلو كلو نصل ليهم بعد شوية مع التراب سارة الوسيلة أغمى عليها
ألذ حاجة نحنا كنا فاكرينها ماتت لأنو لما بقينا نحرك فيها لقيناها قاطعة النفس
وواحدة من البنات البحضرو مسلسلات كتير رفعت ليها يدها اليد جات واقعة
بقينا متأكدين إنها ماتت وواحدين قاعدين ببكوا عليها جادين وقربو يوصفوا
دا كلو ونحنا ماقادرين نتصرف ونلم في مشرف عشان كانت العربات معاهم
بعد فترة واحد من الأولاد قدر يتصل بينا بيسأل عن الحاصل شنو مع التراب
قالوا ليهو سارة شكلها ماتت وبقى سامع صوت البكا و الصريخ ...
وبعد شوية تاني واحدة أغمى عليها قبل الأولاد والمشرف ما يتصرفوا ويصلوا
المهم بعد داك جونا بقى بروقو في الموضوع وبقولوا لينا البت دي حية
بس شكلها عندها أزمة والتانية كان ظاهر عليها ما ماتت المهم ودينا البنات المستشفى
وعملو ليهم اللازم وقعدنا زي ساعتين تلاتة في المستشفى كان الجو صفى والتراب وقف
وطلعوهم وبقوا تمام التمام، المشرفين والأولاد بعد مارجعنا بقوا موقفين العربات جنبنا
وقاعدين فيها تأهبا لحالات الطوارئ كان كلها ساعة ساعتين والصباح يجي ،
طبعا اليوم داك ما نمنا بس قاعدين نعاين لي بعض وخايفين موت على سارة الوسيلة،
الصباح طبعا ما مشينا الField لاننا قلنا للمشرف بس عايزين نرجع الخرطوم (لقيناها فرصة)
و ما عايزين نعمل الكورس دا
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
سلام لكل عشاق المنبر الرائع و سلام خاص للحبيبة إلى قلبي سارة الطيب و بوستيها الرائع حقا و التحية لكل المتداخلين معها و للمخرج طارق الكوتش و نأسف لعدم المذاكرة الجيدة و شكلي كده ح أكون مع قائمة الملحق و البديل بعض الشخصيات الهندسية قدرت عيدت عليهم بالتلفون و البعض الآخر لم أستطع فلهم العتبى حتى يرضوا التحية للمغتربين العائدين إلى أرض الوطن و إجازة سعيدة أطلب العذر من الجميع لعدم المشاركة و كمان النت الملح اليومين ديل قاطع يا هشام
و يا سارة حقيقي بوستيك إبداع
من الانجازات في العيد قمنا بزيارة أسرية إلى أسرة البير أبراهيم
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: Tahani abdalla Attia)
|
الغالية دكتورة تهاني سلام بالكميات والله مشتاقيييييييييين... وانتي الأحب إلى قلبي... (القلوب عند بعضيها)
Quote: سلام لكل عشاق المنبر الرائع و سلام خاص للحبيبة إلى قلبي سارة الطيب و بوستيها الرائع حقا و التحية لكل المتداخلين معها و للمخرج طارق الكوتش و نأسف لعدم المذاكرة الجيدة و شكلي كده ح أكون مع قائمة الملحق و البديل بعض الشخصيات الهندسية قدرت عيدت عليهم بالتلفون و البعض الآخر لم أستطع فلهم العتبى حتى يرضوا التحية للمغتربين العائدين إلى أرض الوطن و إجازة سعيدة أطلب العذر من الجميع لعدم المشاركة
|
هشام ذاتو شكلو النت الملح بتاعو فيهو مشكلة...
Quote: و كمان النت الملح اليومين ديل قاطع يا هشام
|
ماقصرتي ياست الناس...
Quote: من الانجازات في العيد قمنا بزيارة أسرية إلى أسرة البير أبراهيم |
شكراً ليك كتييييييييييييييييير يا أرقى قريبة
يا ست الذوق إنتي.... انتي الابداع كلو...
Quote: و يا سارة حقيقي بوستيك إبداع
|
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
جبل أولياء
أول يوم في عملي المساحة طبعا ما مشينا ال site وقلنا لازم نرجع بيوتنا في الحال
الغريبة ما إتفقنا على الكلام دا مع بعض بس كلنا كنا مجمعين على نفس الراي ضمنيا
كلمنا المشرفين بالقرار دا بقوا يقولوا لينا الكورس دا أصلا إجباري ولازم تعملو و إذا ما
عملتوهو ما حا تتخرجوا من الجامعة(تهديد) قلنا ليهم بغض النظر عن أي حاجة نحنا برضو
راجعين وبقينا في كلام تاني زي نحنا بنات ناس كيف تجيبونا من بيوت أهلنا وتبهدلونا كدة
المهم ختينا ليك المشرفين ديل في حتة ضيقة، أضيق من خُرم الإبرة... وكل واحدة إستعملت
طريقتها الخاصة في التعبير عن إحتجاجها ناس بالدموع وناس بالشكل وناس بالنظرات العنيدة
طبعا الشنط كانت مقفولة لسة ما في زول إستعملا .. بس طلعناها في الحوش عشان نكون جاهزين
للرجعة وقلنا ليهم لو إنتو مابترجعونا نحن برانا بنعرف نرجع لأنو ونحنا جاين شوفنا مواصلات
مكتوب عليها حاجة كدة بتدل على إنها بتمشي بين الخرطوم وجبل أوليا ء..
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
جبل أولياء
طبعا البنات الله أداهم سبب إزوغو بيهو من موضوع جبل اولياء الكابوس دا...
وعاملين نظام البنات قويات ومافي حاجة هاماهم ولا حاجة بتثنيهم عن رايهم وكدة...
ولما المشرفين لقونا ما شغالين بي موضوع ما حا تاخدوا شهادتكم وما حاتتخرجو دا
بقوا يحاولوا بي طريقة تانية و يقولو لينا طيب إنتو مشكلتكم شنو عشان نحلها ليكم...
لكن أصرينا إصرار شديد إننا ما ممكن نقعد في المدرسة دي (صحراء) مع الكلاب
والتراب والشمس والمطر، قالوا لينا كويس حا نشوف ليكم مكان تاني تقعدوا فيهو
وكنا الطرف القوي في نيفاشا طبعا والطرف القوي هو البيملي شروطه على الناس
قلنا Ok بس على شرط نحنا نشوف المكان الحانقعد فيهو قبل ما نمشي ليهو وكان ما
عجبنا حا نرجع بيوتنا، قالو جداً..مشوا وجونا بعد كم ساعة قالوا لينا لقينا ليكم بيت
إنتدبنا إتنين من البنات مشوا معاهم شافو البيت وأبدو ملاحظاتهم في الحاجات المفروض
تتعمل زي دايرين لمبة هنا ومروحة هناك وحركات زي دي وجونا قالوا المكان كويس
ممكن نقعد فيهو، بي كدة المشكلة إتحلت ومشينا البيت وكان جنة مقارنة بالوضع الأول...
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
المهندس الفاتح..
Quote: المهندس سارة..
عرضك جميل.. وسردك ضافي... واصلى .. ويا ريت يجينل كيكي بي مداخلتو.. يحكي على التواوزى ما جرى في ايمهم الخوالى الموازية لما تحكين
كيكي ... كيكي .. كيكي..
كيكى .. كيكي .. قرقر .. قرقر.. قرقر .. ايريا .. ايريا .. ايريا ..
ليتهم يعيدون ما جرى
|
الشكر أجزله...
انفع أكتب يعني..
ومنتظرين حكاوي كيكي..
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
البرلومة دفعتنا كتبت .
بالتاكيد تنفعي تكتبي .. باقيلك البكتبو في الجرايد ديل عندهم شهايد؟ ما ساكت شغالين .. وانتي احسن منهم ..وعندك الشهايد..
وكمان انتي .. حقك دة يسموهو الاعور في بلد العمايا مفتح .. يعني احسن من التانين .. ناس قريعتي راحت ديك..
لانو لو قلنا ليك غير كدة.. بكرة بنلقاك في امتحان القيد الصحفي مع ناس صلاح ادريس ..
Quote: ومنتظرين حكاوي كيكي.. |
كيكى والقرود .. كملو الحكي .. في غابر الايام في اليوم الحار .. لو تابعتي بداياتو..
وليت ينضم ليهم المبدع ايريا صاحب رواية ( مسار الاسراب) التي هزت اركان الرواية السودانية بعد ان شبهت بمنتجات الطيب صالح
وليستمر دفقكم .. وروائع المعسكرات والمواقف الجميلة.
اطنان .. مودة.
الفاتح
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: ابراهيم محمد الحسن)
|
سارة ،،
Quote: ابراهيم محمد الحسن: أعتقد إنو شخصية إجتماعية جداً وذوق (على قولو) بدلديل إنو بصر على التواصل اليومي رغم الظروف... اهتمامو بالمواضيع الجادة باين مشروع دعم المكتبة.... وفاءه وتقديره للناس بظهر في بوست تكريم شيخ الحبر..... طبعا الطيور على ابيارها تقع، يبدو إنو إنسان رائع زي تهاني... بس عيبو بحب مواضيع الكورة |
وما خفي كان أعظم ...
بس تعرفي حاجة .. وما بتصدقي لو قلت ليك إني ما عندي شغلة كتيرة بالكورة .. أي نعم مريخابي وعاقل .. لكن حكاية المتابعة والنفسيات دي والحمد لله ما عندي ..
بس الله يجازي الكان السبب .. هي مجرد خلق مواضيع ..
هسه يجوك الجماعة يقولوا 7UP
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
جبل أولياء
بي كدة زوغنا من اليوم الأول في العملي... لأنو على بال ما ودونا البيت التاني
كان العصر جاء خلاص، طوالي طلعنا مشينا درس العصر (زي ما كنا بنسميهو)
وواصلنا المعسكر لمدة 7 أيام بعد الإنتفاضة... وبالجد كانت الظروف كلها معانا
وكم يوم كان في غيم كدة ويوم المطر صبت بالمناسبة دا كلو بالنهار...
ويوم المطر صبت دا ما واصلنا العملي للنهاية لأنو ناس المساحة خافو على الأجهزة
بتاعتهم، أول ما المطر نقطت طوالي لملمنا ليك الحاجات ورجعنا البيت....
معقولة نخرب لي الناس أجهزتهم أكيد لا....
بس في يوم واحد كانت فيهو الشمس طالعة طول النهار ونحنا اليوم داك كنا شغالين
عملي ال Curves المهم داك كان اليوم العرفنا فيهو يعني شنو جبل أولياء...
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
جبل أولياء
ان صديقتي كانت في القروب الأول نسبة لأسمها والناس
الكانو معاها كلهم ناس جادين شديد وأنا وسارة الوسيلة وسمية
كلنا كنا في القروب التاني طبعا أن من أول يوم مشت حولت
القروب التاني دا كان قبل التراب....
المهم كان قروبنا لذيذ جدا فيهو بنات لذيذات ومتفقات جداً
وأذكر من الشخصيات ال funny جداً وكانت بالجد بتضحكنا
هناء (لقبها هنو) ودي من الناس النكتة بالجد وهي أيضا زولة
حارة بالجد وقفت معانا أنا وان وقفات جميلة فلها التحية والتجلة
وأين أنت الان يا هنو؟ ....
أيضا من الشخصيات الممتازة في القروب كانت صحوة الشامي..
صحوة بير سمية عمر... وهي بنت لطيفة جدا وهي دايما بتكون
معي في القروب في معظم المواد....
من الشخصيات التي أذكرها أيضا في قروبي سارة وقيع الله
لكن التحية جميعا عزيزاتي فقد كنتن خير support لي...
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
جبل أولياء
طبعا كنا لما نرجع بس نتغدى كدة و نلقى (درس العصر) جاء
نمشي درس العصر ونجي مع المغرب عشان نشتغل في
ال report الجماعي (كل قروب مطلوب منو Report واحد)
الكان مطلوب مننا والوقت داك بس نتتلاقى
الجماعة كلهم في calculateorي وcalculatorك والورق
والحسابات ظبطت والحسابات ما ظبطت ونبقى في القراءات
فيها مشكلة وحا نعدلها كيف بعد دا ونعيد الحسابات كم مرة
وفي الاخر سلمنا ال Reports المطلوبة مننا قبل الرجوع للخرطوم
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
جبل أولياء
من المناسبات التي إحتفلنا بها في المعسكرعيد ميلاد سمية عمر
كان برنامج دا برضو لأنو كان نفسنا في موضوع غير المساحة
المهم هيصنا اليوم داك بس من غير تورتة طبعا مشينا الحال..
والله لنا كمية من الذكريات الجميلة في جبل أولياء وكان فرصة
للتعارف بين الناس وطلع الموضوع ألطف مما توقعنا بكتير
واخر يوم ودونا على النيل والخزان لزوم الفُسحة وكدة غايتو
مشينا برمجنا وإتصورنا عشان نقول رفهنا في جبل أولياء
وأيضا لا أنسى وقفة زملاءنا الأولاد معنا بصراحة في مجموعة
خجلونا عدييل بي تعاملهم الأخوي وتهذيبهم ومساندتهم...
وطبعا هم كتار ما زي البنات لا يمكن سردهم جميعا هنا حتى لا أنسى
واحد من الأسماء وأكون قصرت مع من لم يقصروا معي/نا
فلكم التحية فرداً فرداً يا أخواني….
300
| |
|
|
|
|
|
|
Re: هنا نتحاور ونتعرف على العضو ساره الطيب ... مرحبا بالجميع (Re: طارق الكوتش)
|
طارق الكوتش ...
Quote: ساره شكرا للتواصل و ربنا يخليك و يديك الفى مرادك كان نفسى اكون معاك خطوه بخطوه بس الله يجازى الكان السبب
عموما برجع اعلق على كل الاشياء التى وردت فى هذا التعارف بمهله فى الايام القادمه
ويتواصل السرد من طرف ساره ... وبرضو التعارف على ساره ... جنبا الى جنب مع لقاء المبدع حمد محمد احمد
راجعيـــن |
الحمد لله على السلامة... القناة من غير مخرج كانت ناقصة كتيير...
نحنا حاولنا نخلي البرنامج يستمر بس أكيد ما بنفس الكفاءة...
لكن زي ما قلت الله يجازي الكان السبب...
شكرا جزيلا ليك ولي دعوتك الجميلة دي ...
ومرحبا بكل تعليقاتك وإستفساراتك ومنتظرينك...
ومنتظرين أيضا لقاء المبدع حمد محمد أحمد...
| |
|
|
|
|
|
|
|