في احد المولات لاحظت ان معظم الازواج من جنسيات مختلفة كانت مشيتهم فيها حميمة، ماسكين يد بعض، او خاتي يدو في كتفها او علي الاقل يكلمها و عينو في عينها و ابتسامه كبيره.
و فجأه جا واحد سوداني مع زوجتو ماشيين، لو قلت ليكم المسافة البيناتهم كانت 7 متر علي الاقل، ما تستغربو. و كل عشرين خطوه يتلفت عليها (يا وليه ما تتحركي) و المسكينه بتحاول انها تمشي بي اقصي سرعة و يد ماسكه بيها المطبقة و اليد التانية تجرجر في التوب و تتلفت خجلانه من نظرات الناس.
و الخواجة حاضن مرتو و ماشيين الهويني جنبهم، و الزلمه ماخد ركن و وعشره ونسه مع المدام. و المصري و المصريه شابكين ايدينهم و يقزقزو في اللب.
04-12-2011, 07:22 AM
قلقو قلقو
تاريخ التسجيل: 05-13-2003
مجموع المشاركات: 4742
في المطارات و عند الوداع أو الاستقبال برضو تحس التعبير عن المشاعر ضعيف جدا وداع رسمي جدا، تعابير الوجه جامدة، النظرات غير ثابته تدل علي قلق و بعض التوتر
مره في مطار ابوظبي شفت سوداني بينو و بين مرتو اكتر من 15 متر و صاري وشو و زهجان و المره المسكينة مجرجره شنطتها وقف قدام مدخل الصالة وأشر ليها علي الكاونتر و اتخارج قلت اكيد بيناتهم مشكلة، لكين لاحقا عرفت انو الراجل دا طريقتو كدا.
____________________________ هي الرجالة دي الا صرصرة وش؟؟؟
مسكينة حواء السودانية
04-12-2011, 07:44 AM
مدثر صديق مدثر صديق
تاريخ التسجيل: 04-30-2010
مجموع المشاركات: 3896
يا أخوي دا من تربيتنا وتراثنا السوداني ورصيدنا السوداني في علاقات الأسرة
الأب يتونس مع نسوان الدنيا كلهن ويجي البيت يعمل ليكم فيها مدير السجن
برة البيت يعمل فيها هو الرجل الرحيم بالأطفال وفاعل الخير وفي البيت عامل فيها "صول كديت"
الإزدواجية التي يعاني منها السودانيين في علاقاتهم ودا ما ذنبي ولا ذنبك إنت دا ذنب أجيال سبقتنا أنا وإنت وكرست هذه العلاقات التي تفتقد الحميمية
ونكون صريحين نفس هذا الرجل السوداني عندما يتعامل مع بنات ليل ونساء خارج العلاقة الزوجية تلقاهو آخر ظرافة وتحضر وخفة دم مافي بعدها
لكن يا ناصر من هنا وماشي حاول تكرس في الناس الحواليك كيف يتخلوا عن هذه السلوكيات الفظة شوية شوية طبعاً "تدريجياً" عشان ما بقدروا يفارقوها بسرعة يقوم يحصل ليهم عدم توازن ولا يدخلوا "السرايا الصفرا"
تعرف يا ناصر نحنا عندنا مجتمع فيهو فعلاً حاجات غريبة والمفروض تخجلنا مش نفتخر بيها، يا أخي في ناس لو صحيت الصباح وقلت صباح الخير يقولوا ليك مالك في شنو إنت عيان ولا شنو أو يقولوا ليك شوف الحنكشة دي
تقول لي ونسة وشابك يدينو في يدينها وما عارف يعاين ليها في عيونها
غايتو يعاين ليها في عيوناها دي بالذات في ناس عندهم فيها راي عديل كدا
سمعت أحدهم قال بحتار فيمن ينظر لمن يمارس معه الحب في عينيه "فكر فيها كويس وشوف دي شكلها كدا شذوذ !!!)
موضوع خطير لكن الناس بتعمل فيها رايحة
وأنا نفسي غير راضي تماماً عن نفسي وأسعى لتحسين صورة علاقاتي وبحاول لكن طكبعاً إنت عارف في مجتمعنا بنعاني لا بيتغيروا لا بيخلوا العاوز يتغير في حالوا
وما طالبني حليفة مرات المدام ذاتها بتقول لي إنت ما بتخجل؟ دا لو بتونس معاها بطريقة عادية وماخد راحتي أها نلقاها من جوة ولا من برة !!!
ودعتك الله وبجيك تاني
عاصم فقيري
04-12-2011, 07:40 AM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
بس اضيف انو لقيت دراسه قام بها طلاب علم النفس في جامعة استون هارفن سأنق منها الاتي:
(وأفاد سيمان ألفن 26 سنة أن الرجل السوداني يعتبر من أكثر الرجال جفافا من حيث نوعية التعبير عن مشاعره تجاه زوجته وانه يكرس كل تفكيره تجاه مسؤولياته الأخرى أصدقاء وغيره وأعمال أخرى يليه بعد ذلك الرجل الخليجي حيث أكدت الرداسة أيضا أن الخليجين هم أيضا من أقل الرجال معاملة حسنة لزوجاتهم بعد الزواج . وبما أن البحث عن حول المشاعر فقد كان الرجل السوداني صاحب النصيب الأكبر من هذا الجانب كما تحدث مك بيبان 26 سنة أن الشاب السودان يكون في مرحلة تحول تام ما بين مرحلة المراهقة والنضوج حيث أن ما يعبر عنه الشاب السوداني ليس إلا طاقات تفرغ بمجرد الالتحاق بقفص الزوجية .. ونحو هذا كله فقد افادت الدراسة أن حواء السودان هي الأكثر ظلما بين نساء العرب حيث أنهن يتمتعن بروح المثابرة والحفاظ على عش الزوجية بخلاف الزوج السوداني الذي لا يعيرهن أي اهتمام ..) المصدر : مجلة مجازين ينيفيرس
04-12-2011, 07:44 AM
ALMURADABI ALMURADABI
تاريخ التسجيل: 06-22-2002
مجموع المشاركات: 533
أستاذ ناصر صباح الخير .. ليك التحية المرأة السودانية ليها دور كبير في الحاجة دي .. عن نفسي مقتنع تماماً إنو الرجل يسهل تغييره .. فقط إذا (أرادت) المرأة ذلك
04-12-2011, 11:05 AM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
Quote: المرأة السودانية ليها دور كبير في الحاجة دي .. عن نفسي مقتنع تماماً إنو الرجل يسهل تغييره .. فقط إذا (أرادت) المرأة ذلك
لا بالعكس يا نادر المرأه السودانية دي زيها زي اي امرأه في العالم .. كلمه حلوه واحدة بترفعها السما يعني ارضاءها سهل خالص ... و دا المفروض ان الرجل يحاول يعملوا في اسهل من الكلام ؟؟؟ ياخي حتي لو كان كضب. يعني المبادرة مفروض تكون من الرجل عشان يكسر حواجز كتيرة. و شوف النتيجة
04-12-2011, 08:08 AM
عبدالله كع عبدالله كع
تاريخ التسجيل: 02-12-2008
مجموع المشاركات: 4841
اعكس الصورة سوف تجد ان حواء السودان بخيله جدا في مشاعرها تجاه ادم السوداني ان البرود الفيها من المشاعر يوازي بوردة القطب الجنوبي ..
حواء السودانية قد تظهر مشاعرها باشكال مختلفة جدا صينية سمك كااااربة .... دا نوع من المشاعر جذب المرأه للتغير و تحرير جميع انواع التعبير عن مشاعرها يبدأ من الرجل. و لو كانت ما بتعرف ... وريها و لو كانت ما بتقدر ... ساعدها
Quote: ولكن انها اشياءنا التي توارثنها .. اذن لابد من التغير - فلنبداء نحنا لكي يعشيو احفاد اولادي والادك بدفء المشاعر !
فعلا ليس كل ما ورثناه صحيح دعوة جميلة و يا ريت الناس تحاول
ياشباب الكلام دا ماعندو اي علاقة لا بيمسيك ايادي ولا بوس في الشارع , الشغل دا غريق وابعد من ذلك . التربية الجنسية السودانية ضعيفة جدا بين الأزواج , وتلك نقطة البداية. اتمنى مسار البوست يغرق حبة هنا لانو دا مربط الفرس.
04-12-2011, 10:53 AM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
الجفاف العاطفى غير موجود. الموجود هو غياب التعبير اللفظى عن المشاعر الحميمة لكن لازواج السودان طرق اخرى فى التعبير و يمكن ان تؤدى الغرض: نظرات الحنان, الهدايا و اظهار القلق عند المرض مثلا صدقونى توجد الحنية و المحنة و المحية الا ان كلمات الحب المباشرة دى تقيلة على لساننا: و لماذا الاصرار عليها اذا كانت هناك وسائل اخرى للتعبير
ثم هناك الخجل الازلى عند المراة السودانية التى تخجل حتى عن ابداء ادنى انفعالاتها اثناء ممارسة الحب, فتغدو تلك الممارسة اشبه باداء امتحان الشهادة السودانية: صمت مطبق و كان القوم ياتون جرما!
04-12-2011, 11:28 AM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
Quote: لكن لازواج السودان طرق اخرى فى التعبير و يمكن ان تؤدى الغرض: نظرات الحنان, الهدايا و اظهار القلق عند المرض مثلا
يا عوض لو الواحد عمل دا كلو ... غالبو يدق سدرو و يقول ليها بحبك
أو كما قال ودالامين (اقيف وسط البلد و أهتف بريدك يا صباح عمري)
بالله شوف تعبير (بريدك يا صباح عمري) دا جميل كيف!! حبة زي دي من الصباح تفك بيها ريقك اخير من الف هدية.
Quote: ثم هناك الخجل الازلى عند المراة السودانية التى تخجل حتى عن ابداء ادنى انفعالاتها اثناء ممارسة الحب, فتغدو تلك الممارسة اشبه باداء امتحان الشهادة السودانية: صمت مطبق و كان القوم ياتون جرما!
هههههه ... و دي مشكلة تانية كمان عندي واحد صاحبي عايش في فرنسا، زعلان قال لي منهج التعليم في مدرسة و لدو فيهو (طرق و اساليب ممارسة الجنس). قلت ليهو انت متضايق مالك دي ثقافة جنسية المعرفة بيها مهمه. قال لي و نحن الدرسنا منو؟؟ ما اهو دا جبناهو!!
نحن مشكلتنا زي ما قلت نحن بنمارس الجنس بالخطوات الروتينية و اي محاولة للتجديد او التنظير ممكن تعتبر قلة ادب، شكلنا كدا فوتناعلي نفسنا الكتير من المتعة
اشكر مرورك القيم يا عوض
04-12-2011, 08:05 AM
قلقو قلقو
تاريخ التسجيل: 05-13-2003
مجموع المشاركات: 4742
الأخ ناصر والأخوة المتداخلون , نحن يا سادتى نجبن ونخاف بل ونخجل من اظهار عواطفنالزوجاتنا واطفالنا, ولعمرى هذا هو احقر انواع الجبن , ونعتبر ان اظهار العواطف الرقيقة هو ضعف ونقص فى الرجولة لا يليق, بينما انا اعتقد العكس تماما فأن الرجل الممتلئ ثقة فى نفسه لا يخجل ابدا من اظهار تلك المشاعر الأنسانية الجميلة . ولا ننسى ان النبى (ص) عليه وسلم كان من ارق الناس تعاملا مع زوجاته .
يا صبري الراجل السوداني ما مضمون لو بدت هي في الملاطفة و ما عجبتو و شبكها بطلي قلة ادب و احترمي نفسك و تاني ما تمسكي يدي قدام الناس و اللا ما تنعصري علي شديد كدا !!!
تودي نفسها وين بعد داك ؟؟؟
ياخي قبل الزواج تلاقي الراجل معجب عن رشاقتها و اناقتها و بعدو ... التوب دا شفاف و شعرك ظاهر و الخ ... كمان تلحق تبدأ هي بالملاطفة؟
المصريات مجتمعهم علمهم الكتير من ابداء الشعور الرومانسي تجاه ازواجهم .. و دي حقيقة.
اشكرك صبري
04-13-2011, 06:25 AM
SHIBKA SHIBKA
تاريخ التسجيل: 01-14-2009
مجموع المشاركات: 5759
الرجل السودانى عندو وش مخصوص بيركبو فى عتبة البيت اول ما يجى داخل ....لزوم انا راجل و كده..و ده طبعا من اهم سماته الصرة الشديدة ...و بيقلعو برضو فى عتبة البيت و هو طالع بس السيمه بتكون الابتسامة من الاضان للاضان ...ما عارفه ليه الراجل السودانى ( مش كلهم طبعا بس الغالبية) بيعتقد انو بعد العرس التعبير عن المشاعر بيقلل من رجولته ...لحدما الزوجة المسكينة نست معنى الكلمة الحلوة و بقت لمن تسمعها تستغرب و تشك انو ناوى ليه على حركة كده و لا كده ....غايتو المأذون ده ما عمل فينا فايدة
04-12-2011, 08:36 AM
ismeil abbas ismeil abbas
تاريخ التسجيل: 02-17-2007
مجموع المشاركات: 10789
لو خليتني السؤال دا فيه تحامل وتعسف ع الرجل السوداني خاصة لما تتبعه المقارنة بين الازواج من جنسيات أخري وكأنك تقرر أن الرجل السوداني متبلد أومتجرد من المشاعر الرومانسية، وبهذا عليك أن تتقبل إجابة تحمل ذات التلميحات مثل : (لأنه لا يجد الإلهام) ويعني أن الزوجة السودانية تفتقد للإلهام الذي يحفز زوجها للبوح والإفصاح عن مشاعره الحميمة كما تفعل الأخريات من جنسيات مختلفة وهكذا .. لكن ومن جهة أخري التعبير عن الحب ليس مجرد تماسك بالأيدي وحركات في الشارع وقدام الناس.. لا أستبعد أبدا أن يكون السوداني الذي لا يمسك يد زوجته أحن وألطف وأكثر حراره في مشاعره ناحيتها من ذلك الذي (يتلببها) أمام الناس . السوداني بطبعه خجول لذلك يعجز عن التعبير عما يجيش بدواخله حتى ولو كان بركان ثائر كما يفعل ذلك الخواجات ومن لف لفهم. من وجهة نظري ان الإحترام التى تجده المرأة السودانية من زوجها قبل وبعد الزواج لا تجده أية زوجة من أي جنس آخر في العالم مع التأكيد بأن ( لكل قاعدة شواذ).
ياناصر فى حالة كونك رومانسي او تحلم برومانسية سودانية خالصة مافيها شق ولا طق ... بهديك وزوار البوست الصورة .. قبل كدا صاحبتى نزلت الصورة دى صم وير وقالت نفسها تموت وتشوف منظر زى دا فى السودانن
اكيد حارجع ليك ..
04-12-2011, 02:12 PM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
قبل كدا صاحبتى نزلت الصورة دى صم وير وقالت نفسها تموت وتشوف منظر زى دا فى السودانن
السودان في المطره ظروفو براها يا أميره الزول يمسك المرا و اللا يرفع الجلابية و الا يتزاوغ من الحفر ؟؟ دا اذا افترضنا الشارع ما (طين) والا الهم الاول بكون حذر الانزلاق.
المطر دا الذ جو رومانسي ما زلنا محرومين منو حتي يتم اصحاح البيئه بالسودان.
__________ صوره معبره
04-12-2011, 09:49 AM
doma doma
تاريخ التسجيل: 02-04-2002
مجموع المشاركات: 15970
Quote: ويعني أن الزوجة السودانية تفتقد للإلهام الذي يحفز زوجها للبوح والإفصاح عن مشاعره الحميمة كما تفعل الأخريات من جنسيات مختلفة وهكذا
انت عارف كلامك دا فيه جزء من الحقيقه وبرجع لتربيتنا واعرافنا انه اظهار الحميميه عيب عامه وبخاص امام اعين الناس . تعودنا ان نتخذ دورا سالبا يعني لازم المبادره تكون من الراجل .
04-12-2011, 02:33 PM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
Quote: لو خليتني السؤال دا فيه تحامل وتعسف ع الرجل السوداني خاصة لما تتبعه المقارنة بين الازواج من جنسيات أخري وكأنك تقرر أن الرجل السوداني متبلد أومتجرد من المشاعر الرومانسية
حبابك يا طلحة انا لما كتبت عنوان البوست كان في رأي ان المبادرة للملاطفة في العلاقة الزوجية تكون علي عاتق الرجل و خصوصا في حالتنا السودانية الخاصة. طبعا اتفق معك ان هنالك الكثير من الزوجات المتبلدات شعوريا و لا يستطعن التعبير عن ابسط احساس. هناك بعض العادات الاجتماعية الضارة (الطهارة الفرعونية مثلا) ساهمت في تضليل و تشويه الشعور الطبيعي للمرأة.
Quote: مثل : (لأنه لا يجد الإلهام) ويعني أن الزوجة السودانية تفتقد للإلهام الذي يحفز زوجها
يعني الواحد يخت شرط جديد للحصول علي زوجة: ان تكون ملهمة
Quote: السوداني بطبعه خجول لذلك يعجز عن التعبير عما يجيش بدواخله حتى ولو كان بركان ثائر كما يفعل ذلك الخواجات ومن لف لفهم.
نفس السوداني الخجول دا ممكن تلاقيهو في قمة الرومانسية و اندياح مع عشيقتو!! فأين ذهب الخجل؟؟؟
اشكرك يا طلحة علي مداخلتك الثره
04-12-2011, 09:08 AM
خالد عبد الله محمود خالد عبد الله محمود
تاريخ التسجيل: 11-28-2004
مجموع المشاركات: 5393
سيمان ألفن ( 26 سنة ) يجد الرجل السوداني الأكثر جفافاً في التعبير عن مشاعره لأن سيمان ألفن ( 26 سنة) يعتقد أن محمد أحمد السوداني يعبر عن مشاعره بنفس طريقة سيمان ألفن ( 26 سنة) !!
04-12-2011, 09:17 AM
ابراهيم قناوي ابراهيم قناوي
تاريخ التسجيل: 06-17-2008
مجموع المشاركات: 2087
Quote: الجفاف العاطفى غير موجود. الموجود هو غياب التعبير اللفظى عن المشاعر الحميمة لكن لازواج السودان طرق اخرى فى التعبير و يمكن ان تؤدى الغرض: نظرات الحنان, الهدايا و اظهار القلق عند المرض مثلا صدقونى توجد الحنية و المحنة و المحية الا ان كلمات الحب المباشرة دى تقيلة على لساننا: و لماذا الاصرار عليها اذا كانت هناك وسائل اخرى للتعبير
والبروف جاب النجيضة
تحياتي ليك يا ناصر
والمتداخلين
04-12-2011, 09:31 AM
قيقراوي قيقراوي
تاريخ التسجيل: 02-22-2008
مجموع المشاركات: 10380
انتو جربتوا وهن قالن لا كدي واحد فيكم يوما ساي كدي يسميهو يوم الريدي ويشتريلو وردة ان شاء الله ألت حسكنيت ويدخل عليها ويديها كلمتين حلوات ولا بعد ياكل يقوم وهو ماشي يغسل يدينو ويقطع فيها بوسة ويقول ليها شكرا على الغداء الحلو دة ولا يقولها يلاكي نتمشى شوية ويحضنها ويمرق كدي سووا ديل وتعالوا قولولي الحصل شنو ما تقعدوا تلصقوا الشي في ربونا ومجتمعنا كسروا الحاجات دي يمين يبقالي الشغل ما تمشولوا
04-12-2011, 08:04 PM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
Quote: انتو جربتوا وهن قالن لا كدي واحد فيكم يوما ساي كدي يسميهو يوم الريدي ويشتريلو وردة ان شاء الله ألت حسكنيت ويدخل عليها ويديها كلمتين حلوات ولا بعد ياكل يقوم وهو ماشي يغسل يدينو ويقطع فيها بوسة ويقول ليها شكرا على الغداء الحلو دة ولا يقولها يلاكي نتمشى شوية ويحضنها ويمرق كدي سووا ديل وتعالوا قولولي الحصل شنو ما تقعدوا تلصقوا الشي في ربونا ومجتمعنا كسروا الحاجات دي
جبت الكلام من الاخر
ودائما تعودنا ان الراجل هو المبادر
خلي الرجال يبادروا بالكلام القالوا طارق دا ونشوف بعد داك الغلط وين
04-12-2011, 08:01 PM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
Quote: ما عارفه ليه الراجل السودانى ( مش كلهم طبعا بس الغالبية) بيعتقد انو بعد العرس التعبير عن المشاعر بيقلل من رجولته ...لحدما الزوجة المسكينة نست معنى الكلمة الحلوة و بقت لمن تسمعها تستغرب و تشك انو ناوى ليه على حركة كده و لا كده
ذكرتيني مقال كتبو واحد سعودي عن صاحبو الحاول يعمل مقلب في زوجتو بأدعاء الرومانسية بعد ما شاهد برنامج في التلفزيون . مقال لذيذ جدا بحاول انزلو هنا... شكرا يا منار و المأذون دا تاني اعملو حسابكم منو
Quote: وهذا التصرف يعتمد على تربية ألأسرة وما وجده الشخص من تعامل والديه.
فعلا يا اسماعيل للتربية اثر واضح و لكن هناك حالات شاذة، تلاقي و احد من اعرق الاسر و متربي تربية ممتازة و هو بعيد عن الحاجات دي كلها
04-12-2011, 10:14 AM
Mohammed Awad Mohammed Awad
تاريخ التسجيل: 11-13-2009
مجموع المشاركات: 3441
is it a must that I have to show everyone ?that I love my wife by hugging & kissing her in public
We got to have a look on our Islamic traditionals sometimes as we have been mind control by this kind of mental poisons
you guy's are now been converted to be following the western cultures I pray for you sometimes hopefully you might change your mind when you think this way
I hope I was clear
04-12-2011, 10:29 AM
doma doma
تاريخ التسجيل: 02-04-2002
مجموع المشاركات: 15970
اي والله انا دي يا طارق ولدي ابيت بالله واحد المقابضه الفي السهله دي وحاتك قهرتو ونهرتو لما بقي سوداني راسو عدييييل . اها شبحتو ما قدر شبحتي تجيب بيها سته سبعه شبحات والعجب ان لقيت لي دكان هدوم ووقفت اتفرج الا تشوفو من هناك ياشر بيدينواسرعي اسرعي وانا الحركه دي بتجيب كثافتي لو خالتك لقت ليها طبنجيه الساعه ديك كان جاتو طاااااخ
04-12-2011, 10:34 AM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
Quote: وانا الحركه دي بتجيب كثافتي لو خالتك لقت ليها طبنجيه الساعه ديك كان جاتو طاااااخ
طبنجة عديل يا ماما دوما لووووووووووووووولز يعني ولدك ناصر ده, يشيل ويصلح للبنوت الرومانسية والراجل ما لطيف وما عارف شنو ؟؟ و تجي في الاخر شايلة طبنجة غياتو فقعتيني بالضحك هههههههههه كيفنك وعلك بخير..؟
04-12-2011, 10:45 AM
Manal Awad Khugali Manal Awad Khugali
تاريخ التسجيل: 05-03-2006
مجموع المشاركات: 407
بوست رائع .. طبعا الرجل والمراءة في السودان الاتنين مسئولين ، وكما ذكر المتداخلون التربية بتاعتنا ليها دور كبير ، الامور حاليا بدت تتغير شوية . لكن يا خوانا انا وزوجتي في السوق او في اي حتة عامة ماشين نجيب حاجة ونجي في داعي اقعد " اكتِل في عويناتي لي مرتي " ؟؟ اصل البيت ياخي ... بصراحة انا شايف انو الملاطفة والمداعبة لمن تكرر طوالي كده حا تبقى حاجة عادية وحا نفقد احساسنا الاول بيها وممكن تتحول لسلوك ممل ومبتذل لا اقصد الونسة والهزار طبعا فهذه لا يمكن ان تستقيم الحياة الطبيعة بدونها ، اقصد اظهار عواطف الحب والحركات بتاعة المسلسلات دي . تحياتي ناصر والجميع
04-12-2011, 08:48 PM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
Quote: لكن يا خوانا انا وزوجتي في السوق او في اي حتة عامة ماشين نجيب حاجة ونجي في داعي اقعد " اكتِل في عويناتي لي مرتي " ؟؟ اصل البيت ياخي ...
ههههه ... انت من زمن الملاطفة بي كتيل العوينات ؟؟
ذكرتني نكتة الزول الكان مغترب من السبعينات و رجع السودان لاول مره لاقي ليهو بت حلوه فحب يشاغلها قال ليها: وين يا تتي ... حمامكم بدي و اللا بعضي البت قالت ليهو: سجمي سجمي انت الزمن دا كلو كنت وين؟؟
Quote: بصراحة انا شايف انو الملاطفة والمداعبة لمن تكرر طوالي كده حا تبقى حاجة عادية وحا نفقد احساسنا الاول بيها وممكن تتحول لسلوك ممل ومبتذل
بالعكس ممكن تبقي روتين نافع جدا .... المشكله انو نحن ما جربنا، خلينا نجرب
اشكرك يا عبدالله ادريس علي المداخلة الجميلة
04-12-2011, 11:10 AM
عثمان رضوان عثمان رضوان
تاريخ التسجيل: 07-14-2008
مجموع المشاركات: 961
Quote: نحن يا سادتى نجبن ونخاف بل ونخجل من اظهار عواطفنالزوجاتنا واطفالنا, ولعمرى هذا هو احقر انواع الجبن , ونعتبر ان اظهار العواطف الرقيقة هو ضعف ونقص فى الرجولة لا يليق, بينما انا اعتقد العكس تماما فأن الرجل الممتلئ ثقة فى نفسه لا يخجل ابدا من اظهار تلك المشاعر الأنسانية الجميلة . ولا ننسى ان النبى (ص) عليه وسلم كان من ارق الناس تعاملا مع زوجاته .
يا سلام علي الكلام
04-12-2011, 10:59 AM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
Quote: يعني انا شفت و برضو في مول في ابوظبي شفت سوداني و زوجته متماسكين و كلامهم همس. و شفت البيأكلها و تأكلو الآيسكريم
داكلام سليم يا الموردابي انا مره زرت واحد سوداني في بيتو و كانت زوجتو مريضة استغربت جدا من الجو العاملو في البيت ما خلي ليها حاجة .. رعاية كاملة و كلام رقيق و رمانسية في قمتها و ما شغال بي وجودي الشغلة وعرفت انو اخد اجازة عديل كدا عشان يكون معاها في البيت
__________________________ تخيل كان عندها التهاب بس
Quote: طبعا" دا لو في السودان يقولوا ليك بالله شوف الوهم دا أو الناس ديل ما متربيين لأنو تربيتنا (خشنة)
وفي احتمال كبير انو ناس النظام العام يلقوا عليهم القبض
اي والله انا دي يا طارق ولدي ابيت بالله واحد المقابضه الفي السهله دي وحاتك قهرتو ونهرتو لما بقي سوداني راسو عدييييل . ______________________________________________________________________________
مرمي الله ما بترفع يا ماما ...ياها بقت عليك حكاية الزول البرفس النعمة ..
04-12-2011, 12:02 PM
Nasruddin Al Basheer Nasruddin Al Basheer
تاريخ التسجيل: 12-09-2005
مجموع المشاركات: 4083
سلام يا ناصر وسلامات لضيوفك الكرام ومشكور على البوست الهادف داير احكي ليك قصة لطيفة حصلت معاي قبل ثلاثة سنوات كنت في مطار Washington Dulles لإستقبال زوجتي و ابني و ابنتي وكانوا في اجازة في السودان في المطار في محل لبيع الزهور يطل على صالة القدوم، فقلت لي نفسي " كدي يا ابو الصيو اعمل ليك حركة ظريفة كده و استقبل اولادك بباقة زهور زي باقي خلق الله ديل" اها قمت اشتريت لي باقة ورد لزوجتي و بالونات مكتوب عليها Welcome back للأولاد ووقفت منتظرهم يطلعوا، اها كان في واحد سوداني بعاين لي شديد وانا ما اهتميت بيهو وقلت يمكن مشبهني وكلما اعاين في اتجاهو القاهو مبحلق فيني في الآخر جاء و سألني: الأخ سوداني؟ قالت ليهو نعم سوداني وقام سلم علي وعرفني بي نفسو و عرفتو بي نفسي، فقام قال لي انا من قبيل قلت الواقف ده شكلو سوداني وكنت داير اجي اسلم عليك لكن الورد الشايلو ده جهجهني!!
04-12-2011, 09:29 PM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
سلام يا ناصر الغريبة ما جا واحد قال كله من الحكومة ههههههههههههههههههكحكحكحهههههههههههههههه اعتقد (الشمس الحارقة) بتلعب دور في الموضوع ده والسخانة في السودان بتزهج الواحد والتعب...الخ لكن الحمد لله عندنا الوضع مختلف في أوربا والجو الباااااارد بخليك دائمآ منتشي وفرش وغصبآ عنك بتكون حالم ورومانسي ومرات شاعر كمان إلا أن تكون دقة قديمة لا تجدد حياتك دومآ للأفضل بعدين ما كل السودانيين في السودان كده لكن ربما الأغلبية ودي فعلآ مشكلة للمرأة البوست ده ممكن يطلع بخارطة طريق واضحة المعالم تدي الناس دفعة للرومانسية والحب المفرط والتغيير نتمنى أن يكون دائمآ في تغيير للأفضل تجاه الزوجة ونتمنى أن نكون أفضل شعب يعامل المرأة في العالم
04-12-2011, 09:40 PM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
Quote: اعتقد (الشمس الحارقة) بتلعب دور في الموضوع ده والسخانة في السودان بتزهج الواحد والتعب...الخ
يعني التعبير عن المشاعر علي حسب حالة الطقس و اللا شنو يا اشرف؟
Quote: الغريبة ما جا واحد قال كله من الحكومة
ياخي الحكومه الفيها مكفيها ... يعني نكون نحن و اسرائيل عليها
Quote: البوست ده ممكن يطلع بخارطة طريق واضحة المعالم تدي الناس دفعة للرومانسية والحب المفرط والتغيير نتمنى أن يكون دائمآ في تغيير للأفضل تجاه الزوجة ونتمنى أن نكون أفضل شعب يعامل المرأة في العالم
04-12-2011, 11:56 AM
نور الدين عثمان نور الدين عثمان
تاريخ التسجيل: 04-30-2010
مجموع المشاركات: 1390
اغلب الكلام عن برودة وجدية المراة السودانية صحيح واضيف : بعد الزواج ومجى الاطفال يكون كل اهتمامها انصب اتجاه رعاية اطفالها ويكون صاحبنا فى اخر الاولويات اما بجد اللحظات الحميمية ديك فهى فى اخر اخر الاهتماماتها وربما اعتقادا منها بانه مادام البيت مرتب والاطفال مهتمين بيهم فهذا كل شى يعنى يالحبيب دورك انتهى بمجى الاطفال ونرجوا التركيز على ماكلهم ومشربهم وتعليمهم ووووو الخ اما انت فنوم نومك عشان تصحى بدرى وتواصل جريك ياتور الساقية .
04-12-2011, 12:15 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18010
اها دي الحاجة الوحيدة المفروض ما تقتصر المبادرة فيها على الرجل دون المرأة الرومانسية وإظهار مشاعر الحب يبنغي أن تكون المبادرة بها متاحة للطرفين وخيرهما هو من يبدأ بالملاطفة . غريبة والله أن تطالب المرأة بالمساواة مع الرجل في كل شىء إلا في إبداء مشاعر الحب واللطافة.
Quote: ناصر أحمد الأمين: يا صبري الراجل السوداني ما مضمون لو بدت هي في الملاطفة و ما عجبتو و شبكها بطلي قلة ادب و احترمي نفسك و تاني ما تمسكي يدي قدام الناس و اللا ما تنعصري علي شديد كدا !!!
الخوف يقول ليها يا ولية إنتي ما كويسة ولاّ شنو دة إذا ما رجّعها بيت أهلها طلقانة
04-13-2011, 06:03 AM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
Quote: الرومانسية وإظهار مشاعر الحب يبنغي أن تكون المبادرة بها متاحة للطرفين وخيرهما هو من يبدأ بالملاطفة .
طلحة للمرأه السودانية عدة اساليب للتعبير عن المشاعر و للأسف اغلب الرجال بمر عليها مرور الكرام (داقس و اللا قاصد) كونك تجي داخل البيت و تلاقي ريحة البخور عامله جو لطيف او الغدا كل يوم متنوع (علي قدر الفي) و الذ .. الذ .. الذ ملاية السرير نظيفة و مفرشه بي عناية
دي امثلة بس، و المرأخ السودانية قادرة علي ابتكار المزيد و الجديد و نسبة المقصريين في الحته دي قليلة جدا.
و بأفتراض ان الكلمة الحلوة هي جرعة طاقة معنوية كاملة دي المبادرة الانا بقصدها من الرجل.
04-12-2011, 12:34 PM
الصادق صديق سلمان الصادق صديق سلمان
تاريخ التسجيل: 07-11-2006
مجموع المشاركات: 4010
دي نحن اتعلمناها زي ماقال اخونا عاصم فقيري من اجدادنا ياخي انا حبوباتي الاتنين مافيهم واحدة اكلت مع اجدادي الاتنين في صحن واحد لمن ماتوا كلهم الله يرحمهم جميعاً لمن ياكل هو حتى بعدين تاكل ما بتقى من اكله او تعمل ليها صينية جديدة المهم هي بطريقتها بعدين طيب انا اجيب الحنان والرومانسية من وين ياااااااخ
سلام
الصادق
04-13-2011, 06:11 AM
ناصر احمد الامين ناصر احمد الامين
تاريخ التسجيل: 03-29-2009
مجموع المشاركات: 2913
Quote: ياخي انا حبوباتي الاتنين مافيهم واحدة اكلت مع اجدادي الاتنين في صحن واحد لمن ماتوا كلهم الله يرحمهم جميعاً لمن ياكل هو حتى بعدين تاكل ما بتقى من اكله او تعمل ليها صينية جديدة المهم هي بطريقتها بعدين طيب انا اجيب الحنان والرومانسية من وين ياااااااخ
و دي في حد زاتها نوع من انواع اظهار مشاعر الحب عبر الاحترام الزمن اتغير يا مان ...
واقع نعيشه في السودان كثير من الرجال مابتعاملو مع زوجاتهم برومانسية وواقع مماثل له ايضا بعض من النساء السودانيات فيهن غلظة وحدة كبيرة جداً وماليهم اى صلة بالرومانسية وفى نظرهم الرومانسيه عيب
عموما مشكلة الرومانسية والتعامل عند الأسرة السودانية تحتاج علاج من الجزور وتربية اجيال عليها ,,,,
04-12-2011, 12:50 PM
محمد المرتضى حامد محمد المرتضى حامد
تاريخ التسجيل: 08-14-2006
مجموع المشاركات: 10832
ســـــــلآم يا ناصر، ما شاء الله شايف دكانك زباينو كُتار. تصدق مرّة وآحد ماسكني في التكسي في مشوار لآفي بي للساعة 4 صباحاً، العداد عمل أكتر من 200$ بعد دآك قال لي: وديني البيت الولية بتكون نامت. تصدق!!!؟ أها ده خوآجة، تلآقيهو الصباح في المولآت مكنكش في إيدها اليوم كلوا وقدر ما يلقى فرقة يقطع فيها بوسة. يا اخوي نحن وآقعيين بالحيل. والله صحي...
04-12-2011, 12:56 PM
ادريس خليفة علم الهدي ادريس خليفة علم الهدي
تاريخ التسجيل: 10-11-2005
مجموع المشاركات: 5409
Quote: و سألني: الأخ سوداني؟ قالت ليهو نعم سوداني وقام سلم علي وعرفني بي نفسو و عرفتو بي نفسي، فقام قال لي انا من قبيل قلت الواقف ده شكلو سوداني وكنت داير اجي اسلم عليك لكن الورد الشايلو ده جهجهني!!
ما هو دا البجنن بوبي بني كجة!؟ تخسر وطنيتك عديييييل عشان يرضى عنك ناصر الامين!؟ اصلو ما ممكن!!
عن طبارك الذي ليس بيده شئ انه قال عندما سئول عثمان بشرى عن الحب، قال : الحب محرج
رواه قيقاراوي
Quote: لماذا لا يلاطف الرجل السوداني زوجته
يا ناصر ما في داعي للاحراج .. بطل اسئلة تعسفية ياخ! بعدين رومانسية بتاع الساعة كم؟ اقصد العمر/ المرحلة / الظروف الاقتصادية / الوضع الاممي .. اللخ اللخ!؟ الحاجات دي ما مهمة؟ طواااالي و من الكل متوقع نفس المقدار/النوع!؟ سم سانين .. ما هو المعيار؟
-----
في حوار كدا - ايميل هو، سودنتي انا دا - كان لميت فيو بجيبو ليك .. المافي شنو!؟ هو حوار - او قول حوارين - بين عريس و عروس .. و بعد زي سنة كدا مما تعدون ..
04-12-2011, 02:58 PM
Hani Arabi Mohamed Hani Arabi Mohamed
تاريخ التسجيل: 06-25-2005
مجموع المشاركات: 3515
كاريكاتير الوردة يا ادريس دا واقع محير جدا فعلا الواحدة الما متعوده علي الدلال، اول ما تاخد منو جرعات بسيطة، بيبدا القلق و الخوف و الشك يا ربي الراجل دا مالو؟ اشكرك ادريس
Quote: نقلة كويسة في التفكير جزي الله الاسافير الخير الكتير
التقي جيل الاسافير بجيل التضحيات كل شي موجود ياالسيدح بس البقنع الديك منو؟؟ اشكرك علي الطلة و المشاركة
Quote: في حوار كدا - ايميل هو، سودنتي انا دا - كان لميت فيو بجيبو ليك .. المافي شنو!؟ هو حوار - او قول حوارين - بين عريس و عروس .. و بعد زي سنة كدا مما تعدون ..
و علي ايميلي طوالي ... بليز يا زعيم
Quote: المشكلة في المرأة السوادنية ولكل قاعدة ......
ما ممكن يا هاني نحمل المرأه السودانية كل الاسباب الرجل يتحمل اكتر من نصها في اعتقادي و برضو ممكن نقول المشكلة في الرجل و لكل قاعدة .... تحياتي يا فنان
04-12-2011, 03:23 PM
عبدالله كع عبدالله كع
تاريخ التسجيل: 02-12-2008
مجموع المشاركات: 4841
Quote: واقع نعيشه في السودان كثير من الرجال مابتعاملو مع زوجاتهم برومانسية وواقع مماثل له ايضا بعض من النساء السودانيات فيهن غلظة وحدة كبيرة جداً وماليهم اى صلة بالرومانسية وفى نظرهم الرومانسيه عيب
عموما مشكلة الرومانسية والتعامل عند الأسرة السودانية تحتاج علاج من الجزور وتربية اجيال عليها ,,,,
04-12-2011, 03:25 PM
نوفل عبد الرحيم حسن نوفل عبد الرحيم حسن
تاريخ التسجيل: 02-27-2009
مجموع المشاركات: 2361
التربية الاولي والمجتمع نحن اتربينا انه تشلت اختك ( الاكبر منك ) لانك راجل .. المرأه ذاتها اتربت علي العين الحمراء والقهر لما نجي لحتة ( بعد) الزواج لازم الراجل يبقي عينو حمراء ويهرش البيت كلو اي تراخي منو الزوجه بتعتبرو زول ضعيف واضينه ساكت . وطوالي بتخت سرجها فيهو وتركب حتي وصية الام ليها .. ختي سرجك قبال يخت سرجو نجي لي حتة المجتمع من حولنا .. ابسط مثال .. وشي بشاهدو دائما . لما نقعد بالمساء في شارع النيل مثلا ويجوا عرسان مشبكين يديهم والعروس لابسه لحدي الركبه بس .. اقل تعليق بصدر من الشباب بالله شوف العورا ديل متماسكين كيف ؟ خايفها تروح منو ؟ شوفوها ذاتها لابسه كيف ما بغير الزول دا ؟
..............
كل كلامي الفوق دا بنطبق علي البعض وليس الكل ... لانه الجمع والتعميم مخل
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ناصر احمد الامين
قلقو
مدثر صديق
Asim Fageary
ALMURADABI
SHIBKA
نادر النور آدم
عبدالله كع
طلحة عبدالله
عادل الباهي عبدالرازق
mayada kamal
ismeil abbas
doma
خالد عبد الله محمود
ابراهيم قناوي
قيقراوي
طارق جبريل
هواري نمر
Mohammed Awad
حبيب نورة
Manal Awad Khugali
محمد المرتضى حامد
Abdullah Idrees
عثمان رضوان
Nasruddin Al Basheer
elsawi
ASHRAF MUSTAFA
نور الدين عثمان
الصادق صديق سلمان
معاوية المدير
ادريس خليفة علم الهدي
عبد اللطيف السيدح
Hani Arabi Mohamed
نوفل عبد الرحيم حسن
فيس بوك
تويتر
انستقرام
يوتيوب
بنتيريست