أيها الرائع الأديب الذي ضل طريقه إلى الطب والطبيب الذي حول الطب إلى إغنية جميلة تعبر الفيافي وتحط رحالها في سويداء الفؤاد لكم سعدت اليوم بالدخول إلى هذا البوست وكنت قد طلبت مني على ما أذكر المشاركة ببعض من الذكريات والإضاءات عن فناني جزيرة توتي الحالمة التي ترقد بين النيلين العظيمين الأبيض والأزرق ولكن أخي الحبيب طراوة شغلتناأموالنا وأهلونا ونعدكم بالتفرغ ولو قليلا للمشاركة بالكتابة عن إبراهيم خوجلي وعبدالواحد طمبل وكوكبة من فناني جزيرتنا توتي فإلى لقاء قريب
عمار محجوب محمد زكي
05-05-2008, 11:21 AM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
النيل النيل النيل يا حلاوه عليك يا جميل غزلاني يا الاتنين يا الشلتو بصر العين في جزيره بين بحرين يا توتي دربك وين أهلي البعزوني أهلي البريدوني أهلي البيحبوني في أم در غرب النيل
نرحب كثير بالأخ عمار زكي
05-05-2008, 02:29 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
بعد جهاد وحروب سال ما سال فيها من دم ودموع خرج الغناء السودانى الى الساحات .. تلألأ على النيل وأشرق ... لهم التحيه جميعا الخليل وعكير الدامر والنعام وودالسافل وودالنزيهة واولادحاج الماحى . والرحمة بت الضل وكرن ... ___ الف مراحب أخ عمار زكى سعادة شديدة وانت تشرق على البوست الف شكر __ تحياتى ..
الأخوة الكرام متذوقي جمال الفن السوداني أغنية الكنينة بصوت سوف أشغلها مباشة ليومين وبعدها بنغير طيب يا موسى ؟؟؟ الكنينة طبعاً شخصية حقيقة وتسكن في شندي حلة المحطة وأكيد ودالنزيها كان يراها وهو في طريقه لسوق شندي من ساردية
على ابراهيم الله ينصر مويس الجيت منها .. الكنينة .. الكنينة على كيفك الدار اخمجيها. يا سلام عليك ياودالمنسى 11 سنة بنات حفرة ونحنا خرمانين الى تلك الدروب الف شكر الكنينة هنا بكل الفخر . تحياتى
الخلانى فوق نيران جهنم خالف . _ الأخ العزيز ياسر شبيكة شوف الحديث ده كيف أسمع شربات الغناء . شوف لون عنب ساردية . هاك ادى الشعر تله دى . احب السودان احب الله وحبابك يا ياسر شبيكة والف شكر تحياتى ...
05-05-2008, 08:39 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
هناك كان قد تمرد الشعراء وخرج الشعر طمح كسر فاض من تلك الجنات خرج الشعراء. من هناك خرج التجانى يوسف بشير . المجذوب العمرابى عكير الدوش الكتيابى ودالنزيهة اسامه الخواض السر قدور الأخ العزيز ودالمنسى ارجو التكرم بوضع صور النجوم ... لهم التحية ....
05-05-2008, 09:10 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
يطل علينا ليل السعادة و يغمرنا نور البصاير ... يوم نسمع إيقاع الدقلاشي/الدلوكة ممزوج بالحان خماسية شجية طالعة من فلوت الهادي
القوق قوق القوق قوق القمري القوق قوق
دا ما جنس الكلام البخلينا تاني نجيب سيرة البحر
الدلوكا دي لمَّ تهبق يا طراوة راسنا بقوم صوفا صوفا الجلد بتمسكو كراوشة ما بترقدا إلا عرضة وصوقيرة ودا يومي كلو أشغل الدلوكا ونتقابل أنا وليدي الخواجة دا ( علمتو العرضة ) وعراضن كان مشى عرض في شندي بسحرو والله فايت في العرضة والصوقير ابوي أيام صباه كان معروف في شندي بجمال عرضته الله يطول في عمره
تسلم يا عثمان موسى على هذه المساحة اللطيفة نفرغ فيها بعض من أشواقنا التي جمدها جليد أوروبا تصحو مرات بشعاع من ريحة الأهل والديار ( 11 سنة يا عثمان والله حارة )
الله يدي العافية يا أخوي وارقدوا عافية درت ما تشوفوا شر يا رب
05-06-2008, 03:11 AM
Osman Musa Osman Musa
تاريخ التسجيل: 11-28-2006
مجموع المشاركات: 23082
.. يا معاوية في شان ود المنسي الاصيل و جناهو الخواجة/الجعلي السمح دا .. جيب لينا دلوكة كابلي كلام حكامة الطيب ود العبيد ود بدر : البشيل فوق الدبر ما بميل قدل شيخي
.. يا خالد احفظ في جهازك صورة حميدة ابوعشر ! راجل بسيط ، راس مالو كان طبلية في مُشرع حنتوب اترفد من السكة حديد لانو خاض الاضراب العمالي الاول مع ناس الشفيع و سلام و قاسم امين في مواجهة الاستعمار .. لكنو كان بديع و كريستالي .. و ياهو القال :
* حبيب القلب لا اقوى علي حمل الهوى وحدي * و كمان قال : ظلموني الاحبة في شرع المحبة
يا ود عثمان : شوف زول الكتياب ( التجاني يوسف بشير ) :
معاك يا وزير الغنا ، حتى يجف الشراب في حافة الكأسِ
ودينا وادي الجن ، فقد سئمنا قسوة عالم العقلاء .. جيب لينا طرير الشباب .. توزيع ابو السيد الجديد ..
سندتنا في كبوشية الليلة مع رمز من رموز غناء الدلوكة ( حميــــــــــــــــرا ) لها فرقة ضراعها الأيمن الجود .. بتخلف معها في الصوت أي بتم البيت بعدما تبدءه حميرا وعازف الدلوكا ( دودو ) وخمسة عازفات شتم لزوم يخلفن مع الدلوكا ويشيلن لترنيم الأغنية
وتعرف يا عثمان. لما الشتم يخلف تنق بتسمعها في نص رأسك. بتعرف كيف بخنقو الدلوكا ( أن يضع العازف كوعه في الدلوكا ويعزف بالأخر ) أخ أخ أخ سن أسووو أه أنا الجنيت وقتا هووووو
من أغنيات حميرا البتولع النيران وتخلي الجنيات تتحزم وتقيف في روق لي البطان أغنية قديمة ( تراث ) وحــــات أبـــوي بمشي الكي كدي
كلماتها واحات أبوي أنا بمشي الكي كدي برمكي العيال تومي يا علي
شدو لي الحُصان الغليد ملان لعلي الصميم فارس أم درعان راكز يا الخزين يا أبقلباً ملان أنا يسلم لي علي يضوي في الميدان
شدو لي المهر طلقوهو العصر نهمو لي البنات يا سيف النصر ليل الهجعّا قام جاب لي النصر أنا إسلم لي علي أجبر ياصبر
05-06-2008, 02:20 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
ناذر الخليفة الله ينصر دينك شوف العرضة دى شوف الطيران ده تقول لى شيكاقو بولس الحشود دى كلها مدربة على الطيران عادى عليك الله يا فاضلابى تعال اتفرج فى لوحات الدلاليك دى .. الف شكر استاذ ناذر الخليفة تحياتى ..
05-06-2008, 06:59 PM
ناذر محمد الخليفة ناذر محمد الخليفة
تاريخ التسجيل: 01-28-2005
مجموع المشاركات: 29251
.. يا قراء البوست ، قوموا خلوا الضيق في المداين .. لعنة الله علي غابات الاسمنت .. و الشوارع المتهتكة و مليانة رقشة و امجاد !
.. و لله درك يا منسي !
خليل فرح بالوان توتي ..
مثلت اغنية في الضواحي اتجاها جديدا في غنائية خليل فرح ، عندها علاقة باجواء ما بعد هزيمة ثورة 1924 .. ورحيل خليل من الخرطوم / حي الترس الي بحري .. و علاقتو بضواحي بحري ودي مرحلة برضو حصل فيها تحول في الجملة اللحنية بتاعت خليل .. مرحلة خروجوا من صوالين الغناء الضيقة الي فضاءات التم تم .. شارع الغنا المفتوح
وظهر التم تم صريح و تارك اثروا في اغنية تم دورو و إدور .. عوزنها يا معاوية بطريقة عاطف انيس
.. عودة نآذر .. البطان يغزو شوارع الخرطوم ..
معاكم ، و بنباريكم يا عيال جعل .. نقزة ايقاع الدلوكة .. من الجيلي لغاية لفة النيل في ابو حمد
و حاجات عجيبة .. ودلال معجن محن الامات يا رداح .. وكان حدباي (راوية خليل فرح) ، شديد الاهتمام بالرداح و جمجوم كلب يهود الخرطوم
05-07-2008, 02:42 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
الأخ الحبيب معاوية جبتها من الآخر والخلا ولع وهلا هلا ومحل رهيفة التنقد وإن شاءالله ما تتلتق
هاك شوف هذا الوصف الدقيق لحفلة الدلوكا والبطان في تلك المنطقة... قال الشاعر دكتور محمد بادي العكودابي .. في الدلوكا وكت تهبق الأعمى بشيل المكسر ...
قال : هووي يا وليد حصل صحاكَ عِز الهجعة صوت شتماً بعيــــد مخنوق وجاتك شخرة الطمباري مشتاقاً يسوي القوق ونومك طار وإتقسّم والرشرش صِبح مفروق وإتلفحتَّ نص من توبك الجرجار علي الدلوكا سايق سوق تلقى هِناك بنات بلدك وِلاد بلدك يعلو الصفقة تقدح في القلوب الشوق ونغم الفال .. أبشرن آ بنات بي الخير والجِنيات تطير لي فوق وكم زغرودة تتفجر تفور بي الناس بعدما تروق يعوم الوز ... صدورّو تشابي لي المجهول تميل زينوبا زي البان يمين وشمال تودي الطوق وأخوان أم شلخ .. ينكبّو جوه الدارا زي صقراً نزل من فوق ضرب الصوت والركزّا بفرز الناس عشان زينوبا مابتحوق وعاد تتحزم الجِنيات وتتنظم تقيف في روق وكل واحد يهز ضرعاتو والحِجبات تزح لي فوق جفير الخوسة فايت الحد وسيرو مع العضل مطبوق والطاقية تحت الحاجب المعقود هديت ام زين ومامشرية من السوق ويتقدم عريس السمحة رافع صوتو كان بسوقو بيهو النوق والعنجاوي ينزل فوق ضهورهم بس تقول منشحطى فيها بروق يبدأ مجرّو بي الترقوة ويتحدّر مع الضلع القُصار ملصوق وأحمر عين يشم الدم بعدما يرش بنات عمو ويزيدن شوق وثابت حيطة لا بتهز ولا بتلز وصاري جبينو كلو عروق وقال بعد العقد طلقانة ما يحجزو ألا يخلو ضهرو شقوق هناك الحال مغيُر جد وهيجة الناس تفوت الحد وكان حجازو مدَّ اليد بتسمع كــــــــــــــــع
05-08-2008, 02:28 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
.. الدلوكة (الدهلة) موجودة عند الهنود و بلاد السند من زمنا قديم .. إلا ما عندهم زي دا ! لِطام و صدام و عقابيل بُطان و قمزات صِغيرية ، و اسد بيشا المكرمت
.. كيف صارت الدلوكة هي الحامل التاريخي و الاجتماعي لايقاع الحماسة و الحوبة و العركة ، و سلاح بتار في يد الحكامات ؟!
.. ظنيتو صراع القبائل الدامي حين سطوة المركز السناري ! صراع الانعتاق من ضيق كونفدرالية المانجلك و السعي الغريزى لكامل الاستحواذ علي الفائض الاقتصادي
.. وفي المدينة (امدرمان عند ثلاثينات القرن الماضي) وقعت الدلوكة في يد ربوحة ( رابحة التم تم ) و سوت بيها اجمل غنا التم تم آناء تلك الايام الزاهيات السبقت ظهور فضل المولى زنقار .. ضروري نقول إنو ابو حراز كان بضرب الدلوكة لربوحة
.. وفي يد زهرة بت نجدي ، كانت الدلوكة هي الق السيرة .. السيرة المرقت عصُر قاصدة ضريح الحسن ود نصر .. و فيها العريس السار البحر و قطع جرايد النخل من لدن ذاك الشاطى و رجع بيهو سِبر و تعاويذ لعروستو
.. وبديع عبد العزيز الجعلي ، بضرب في دلوكة شرق النيل مع خلف الله حمد .. و اصلا دلوكة شرق النيل من زمنا قديم شالتا مهلة العبادية و فزت بيها من ذاك الحصار و المنع الاجتماعي و جات قعدت بيها مع شريفة بت بلال في ذاك الحي الامدرماني المهدوي القديم ( المسالمة )
.. ومن عجايب مدرسة الغنا السوداني .. إنو الناس فيها طربانين و مجلودين .. و ياها مدرسة مجلود و جالد يا خالد .. مدرسة ايقاع الدلوكة ال Multi - Rhythmic
05-07-2008, 02:42 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
العزيز معاويه سلام كدى ابحت كمبيوترك ده . شوف لينا كلام عمك الطيب محمد الطيب عن الدلوكة . الطيب قال الدلاليك دى جات من شرق من نجد . والعرضة هى نفس العرضة النجدية لى يوم الليلة . الشتم موجود من زمان فى بلاد السودان . والدفوف هى الدفوف المدنية دفوف المدينة المنورة ...
05-07-2008, 07:46 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
الأخوان ناذر وودالمنسى وبعد السماح من الدكتور طراوة لو عندكم تسجيل للحفظ لحميرا او الحى يشوف ( المكنية ) او الرحمة .. ودالسافل .. سيدالجعلى .. عثمان بشير البعيو .. الف شكر .... ويا معاويه فى الصفحة دى كتر صور البطان للحفظ ..
05-07-2008, 09:16 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
.. و بقينا وسط كرابيج تتلاصف .. ودماء سايلة ودا كلوا بسبب اسطوانة الفُخار شبه المخروطية اللي إسمها الدلوكة
.. وربنا يستر علينا ، و علي ود المنسي تخصيصا من ملاحقات لجان حقوق الانسان .. عندي شعور قوى انو خالد حيسوق ولدو الخواجة يوديهو عركة البطان في ساردية .. خاصة بعد ما يسمع كلام ندى القلعة :
" ساعة الصوت يشح .. ماني دايرة ولدي يوِح "
و جميل ترباس لمن يقول : الوحوحة و الجري ما حقي ا .. حقي المشنقة و المدفع اب سكلي ! "
.. أها يا ود المنسي الدلوكة قامت ولِدت الشتم ودي قصة فيها دلالات و مفاهيم مربوطة بألق موازير الايقاعات و علاقاتا الجوانية ..
.. لانو شتم الدلوكة حسب فهم ناس جراهام ، و عبد الله ود السجانة ، و الضو : برضو من ذات فُخار و طين الدلوكة .. و بنضرب بعصايا رفيعة ( عصايا عاوزة فهم ) .. و الغرض من الشتم هو عمل زخارف ايقاعية تتماشى مع ضرب الدلوكة متعدد الايقاعات .. يعني الشتم بساير الدلوكة مُسايرة هلال السما لسفينة نوح ..
.. مش كدا و بس .. مصطفى كامل الموسيقى المصري حبيب السودانين ، لمن شاف الشتم ، إكتشف إنو ممكن يتماهى و يتكامل ايقاعيا مع آلات ضبط الايقاع الحديثة : الطبلة ، البنقز ، و الكونغا ( اللي هي الدمبا ) مصطفي كامل كان رائد الموازير في السودان .. موازير الايقاعات و برضو موازير الجملة اللحنية ( صاحب المدونات الراقدة الآن في قاع بحر ابو روف !! )
.. يا معاوية كلم ود عثمان و جيبوا لينا عبد العزيز قسم الله شايل مع محمد احمد عوض الكونغا بتاعت امريكا الاتينية البقت دمبا في مدرسة الغنا الشعبي و غنا الحماسة السوداني .. و ما إنفك اهل السودان يستقبلون الوافد بترحاب و مرونة و وعي ، ثم يهضمونه لطفا في داخل نسيجهم الكلي
.. و اركز يا نآذر طبع العيال فضاح .. ما شفنا ام كريكة بتبلع التمساح .. وقالوا الدود قرقر .. و حبس الدرب نواحي الخرطوم 2 ، غزوة اولاد جعل للخرطوم و قفلة شارع الحكومة عافي منكم ( هو اصلا في حكومة ؟ ! )
.. بسراع يا ود عثمان .. جيبوا لينا كابلي في تم تم حبس الدرب .. و هآتيك المسادير الجميلة بتاعت الحردلو الموطنة في إيقاع التم تم و جُملة الخماسي اللحنية :
* قلبي المن نشوه للبنات هواي * و الزول السمح فات الكبار و القدرو * و الزول السمح يوم الخميس واعدنا * و معيز ام سومريت الراتعات دوام في خلاهن * و يا خالق الوجود انا قلبي كاتم سِرو * وكان فد يوم خديداتك معاي يتغطن .. اقنع بيك و اتوب من البنات يا ( شتن ) .. و كانت شتن و ( الدون لِحق ) من جميلات بنات الهوى في ذاك الزمان ميسور الحال
.. و لله درك يا كابلي .. تفانين و ألمعية صحبك الراجل رقيق الحال ( محمد ود شعفوفة ) راصد الادب و الغنا الشعبي في مظآنو الحقيقية .. تعاون اثمر تفانين و فتح دروب السعادة
.. وياها مدرسة الغنا .. و اوركسترالية - اللحن - الخماسي التانية و لانزال في محطة المبدع عبد الكريم عبد العزيز الكابلي
05-07-2008, 11:18 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
و ترتدي غنائية السودان لونية جديدة علي يد كابلي .. تجارب و إكتشافات و مشاوير كابلي علي دروب الحماسة و الشكرة و كامل تراث الحكامات و مخزون الغناء الشعبي ..
.. و فوق ذلك تمكن كابلي من تحقيق نجاحات ضخمة في كيفية تطويع و استخدام طيف ايقاعات الدلوكة و التم تم ، لصالح هذا النوع من الغناء
.. و يبقى كابلي احد رواد بعث الثقافة الشعبية .. ثقافة الغناء الشعبي ذات العمق و السعة و التاريخ الطويل علي مدى القرن الثامن و التاسع عشر ، و القرن العشرين كذلك
05-08-2008, 11:54 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
التور كرف الدم .. الدلوكة دقت .... اهو ناس تعرس وتنبسط . بلد تخرج منها تلك المعانى لابد لها أن تعيش .. قال ود حد الزين تصور كيف يكون الحال ؟ لو ما كنت سودانى واهل الحاره ما اهلى ؟ ... ود المنسى حلفتك بى حامد اب عصا ابهل الدوبيت .. الدوبيت الكان سبب الغناء .. الدوبيت الجاب لعكير الدامر السجن . جر جر النم كب التسجيلات الدوش قال ده دوبيت بال GRAMMAR نفس دوبيت بنى أسد فى العهد الجاهلى .. يا الله ود المنسى .. تر جاى على بوست تاريخ الغناء ده اكشح ليك كوم دوبيت طراوة ما عندو مانع ..
05-08-2008, 07:27 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
في التبادي والله أبداع خلف الله حمد وغناء الحماسة تعرف يامعاوية وانا بشاهد في الفيديو خلف الله حمد بغني عاينت لصورتك ( جاني أحساس كل ما يقول خلف حمد مقطع أنت تقول والله كلام )
مـــا حرسو الجري وصدرك موشح بي الدِمي وما بخاف فارس الحديد إن حِمي
يا فارس الألوف والأنتَ كفيتن كبستا الدروع وشلعتا خوداتن فارسنا البخيت التمى شكراتن صديت الخيول وقمحتا رِكباتن ما بخاف
من قومة الجهل ليهو الخوف ولا قسمّو مولود في المحاص وفي الدود كتر عشمو تدخل فوق بكانن النحاس خلف شتمو وركز البخيت الفال والنصُر ختمو ومابخاف
أها يا طراوة في شكر أكتر من دا زول الدود ( الأسد ) يعشم يبقى زيو في الشجاعة )
ومن قومة الجهل والخوف ولو كارو الهول والشرق إصنتو أفعالو العوق أب صفوف فالو البخيت شالو ومضروب في الوِجن وماجاني بي شمالو ومابخاف
هيييييييييييييييييييييع حديث والله
ماحضروا معاك أخوانك السلاط قمزوا الخت علي خيلاً بجن غايرات تدخل فوق بكانن حرابو منشبكات جاني مرهون علي جفونو الدمي سايلات ومابخاف
كباس زرايد أم حبر يادابي الجُبال قلبك سمين من حجر يادود الوعر
زينب تجر النم زينب تجر النم فوق تور العُمام فارساً بكرف الدم في محكر قواش حشاهو مابنزم ساطور الرجال جرعة عقود السم
زينب تجر القول زينب تجر القول فوق شلبي العيال الوافر الشمبول يا جبل الداير الما بنطلع لي زول غنيت بي غباش يامطر السواري اللاف هبوب ورُشاش ياقصب الفراش اللي ضلع قصاص سيد دينن قبيل قبل الناس تعرف الناس
05-08-2008, 08:10 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
.. مواعيدنا معاك في قوز ود حرير .. مُلاقاة كبد الحُقن و شوفة الخِنيصر المو شديد لاواي !
.. و ما في زولا زي مصطفى بطران وصف الحسان ، الجآذر ، الراميات باسهم ريشها الهدب .. اسمعوا بالله قصة شم النسيم في جنينة الحيوان آناء ايام السعد السوابق ( قم بينا نلاقي مناظر .. تفانين خدر ود بشير ! و بنرجع لود بطران و سيد عبد العزيز يوم طار عقلهم في ساحات شم النسيم
.. كابلي :
* مدرسة اعادة إنتاج مخزون التراث الشعبي * مدرسة السفر في آفاق الحردلو و ود الفراش * مدرسة حركة الجماهير السايرة في طريق الجامعة يوم هبة الخرطوم * مدرسة الحس القومي و سد فرقة عبد الناصر : قم صلاح الدين
يا عبد الكريم لك العوافي .. و صادق معزتنا ..
.. ارمح يا معاوية .. الدود يا عيال للعقاب دراج
05-09-2008, 07:24 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
غرامك يا حبيبى وهبتو سنين شبابى و دايما لرضاك يهون سهدى و عذابى صدوك و نار خصامك مصيرى مع الحباايب اقيم الليل مساهر جنانى و عقلى غاائب و بحلف بشباابى الاقى صبااحى تاائب من الريد و انشغالو من وله الغراام و من كلمة بريدك و هجرك لى حراام
و اعيش ايامى سااهى اردد فى غناايه براى اخترت دربك و عارفو بدون نهااية سلكتو قلبى خاائف و تهته من البداية رضيت اشغل ضميرى معاك ابد الليالى و اشوف فى شقاى سرورى لانك عندى غاالى...
ــــــــــــــــــــ
05-09-2008, 08:17 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
مدير الري انقضت ايامو ! طرينا القومة و جفينا النومة .. للديوان اب علامتن دومة .
.. وهج دولة البراجوازية - الوطنية السودانية آناء تلك الستينات ، عهود الموظفين و المدراء البراقا .. دولة التحالف الافندو - تجاري المثل إحدى إطارات حركة التم تم و غناهو .. الدولة الخربت خراب سوبا التاني
بنرسل ليك يا منسي : ( بلالي ابوى لي بي )
.. شوف كابلي :
غنا التم تم ماركة الافندية و التجار .. و ياحليل التاجر الوزقن مراكبو و كتن .. مُشرع الموردة النيلي يوم دولة الاتراك و سيدي المهدي الامام
.. وازيدك في الشعر بيتين :
" أمبارح انا و قصبة مدالق السيل .. في ونسة و ضحك لامن قسمنا الليل "
.. لله درك يا حردلو يا رائد الغي و العُشق في وهاد سوداني الجوه وجداني .. بريدو
كلامن بخلي صحبك ود حامد فوق نيران جهنم خالف !
05-09-2008, 10:28 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
.. ومنذ تلك الستينات ، برز كابلي بوصفه تيارا اصيلا و متفردا في مسار غنا التم تم السوداني ,, منفعلا بمضاعفات الق المد القومي التحرري لعبد الناصر .. ومع ذلك رائدا للفن السوداني الاصيل ، لجملة السلم الخماسي و طيف ايقاعات البلد و تراثا الثقافي الشعبي
.. كرب حياة العند الخياط و بلالي الابو لي بي .. و يعيش الملك فاروق ..
05-09-2008, 10:55 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
و خرجت جماهير تلك الاءات الثلاث في لقاء عبد الناصر .. خرطوم الصمود .. خرطوم سد الفرقة .. خرطوم الازهري و السيد الصديق و المحجوب و عبد الخالق .. الانقياء طاهري الايدي
و جميلة تلك الصورة التاريخية اللتي جمعت عبد الناصر مع الشفيع احمد الشيخ و فاطمة احمد ابراهيم
.. و أنتِ يا غابات كينيا يا ازاهر !
المجد :
* لابو آمنة حامد * و لتاج السر الحسن .. و لكابلي صاحب الحس السليم
كثيرا ما ترجع بي الذاكرة الى غناء الحماسة متمثلا في خط كبوشية كما كان يسمى كخط لشيخ الخط ايام الادارة الاهلية. تربتط ظاهرة حميرة وفرقتها من خلال دودو ،بالفئات المهمشة من بقايا الرق. ارجو تسليط الضوء على هذه المرحلة. مع خالص التقدير المشاء
05-09-2008, 11:23 PM
Haleem Abu-Gusseisa Haleem Abu-Gusseisa
تاريخ التسجيل: 04-18-2006
مجموع المشاركات: 93
د / طراوة بعد جات الصورة صورة اضخم شعراء السودان التجانى يوسف بشير الشاعر الذى اشعل نور الشعر والغناء فى البلاد بعد ما جات الصورة ارجو الدخول لعالم التجانى الشاعر الهرم ..
دكتور طراوة.. و الضيوف الكراام و سيد الحوش...الاخ عثمان..
طبعا معااوية كوم برااهو و مجهود مقدر وماسك الدفة بكل اقتدار...
الكابلى كتاب كبير يحتااج تصفحه الى زمن و و قت طويل..مراحل متعددة و اماكن و اغنياات مختلفة تحكى كل منها عن مرحلة معينة فى حياته الطويلة فى دنيا الفن ثقافته الواسعة ساعدته كثيرا فى ان يتبحر فى التراث و اغنياته المختلفة.. نترك لدكتور طراوة مواصلة السياحة فى عواالم كابلى...
صديق مدثر كتب الاغنية الشهيرة و الخالدة ضنين الوعد الاغنية التى جعلت الفنان يغير منها و يلح على صديق مدثر ان يكتب له اغنية بالشعر الفصيح لتخرج اغنية الحبيب العائد كاجمل ما يكون بعد اللحن الجميل الذى البسه وردى عليها... و الاغنية لها قصة طويلة حكاها صديق مدثر يمكن ان تستعرضها فى مساحة اخرى...
صديق مدثر كتب ايضا العمل التحت للفنان الكابلى و يا دكتور طراوة كدا اسمع و اعمل لينا فلاش باك..
05-10-2008, 11:57 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
.. أنه و لمن دواعي غِبطتنا و سرورنا أن نراكم هنا يا اهل الحس السليم يا :
- اسامة الخواض - عبد الحليم ابو قصيصة
و بادىء ذي بدء ، ونحن لانزال في فيحاء كابلي بنهدي ليكم صورة حميدة ابو عشر اعلاه ، و كلامو العجيب .. ابو عُشر الراجل رقيق الحال ، ذو الوجدان الضخم ، الراجل ملح الارض ، مرفود اضراب عمال السكة حديد في عهد الاستعمار ذاك .. وداعا روضتي الغنا .. ميلوديا الكاشف العملا بالفم ، و المعية كمال ابراهيم سليمان (ترباس) احد رموز التطريب الحديث داخل المدرسة التانية
.. تعرف يا اسامة .. لازلت ببحث عن مقال كتبو زول نابه ، ذو افق و فهم اسمو : عثمان عامر ، مقال عنوانو فيما معناهو : ايقاع التم تم و الدلوكة في حامله الاجتماعي .. حامله الاجتماعي دي هو بالضبط مبلغ قصدك في الملاحظة السوسيو - ثقافية اللي إنت قلتها في كلامك اعلاه .. .. و بناشد زولة كندا المتابعة بوستنا دا وقع الحافر بالحافر ، الاديبة الاريبة ، اختنا الامدرمانية الرفيعة: صفوة عبد الله محمد فرح رمرم .. ان تلقى لنا سبيلا لعثمان عامر ، و لفتح الطريق امام فكرو و كلامو عن العمق السوسيو- ثقافي لحركة الغناء بتاع المدرسة الفنية الاولى و التانية .. واصلا يا اسامة ، دا بالضبط العاوزينو منك في هذا البوست : المقاربات النقدية ، الرصد السوسيو - ثقافي ، و تفكيك و إعادة قراءة تلك الظواهر المدهشة : زي الكاشف و حميدة ابو عشر القدامنا دا !!
.. مررت علي مقال نزار عتيق يا حليم ، له مودتي و إعزازي و اوعدك ان اعود لتسجيل رأيي حول افكار و ملاحظات نزار عن اصل ، و مسار ، و مصائر اغنية الحقيبة .. و مهد السبيل يا حليم لتواصل نزار معنا و نقل آرائه و آرائك انت ايضا لبوستنا هذا . .
اسمعوا ترباس يتمنطق طربا بكلام حميدة ابو عشر : تفدية النفس بالنفس .. و ليالي المعبد القُدسِ
.. دمت يا ود عثمان ، إليك سوف نعود
.. أها يا معاوية عاوز نشوف قصة العباسي في حدائق جيرون نواحي سوريا مع تلك الفتاة ذات العشرين ربيعا .. و الايام مُقبلة ..
05-10-2008, 12:45 PM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
عثمان عامر يبقى خال نزار عتيق، يعني لوعاوز زول يجيبوا ليك أمسك في نزار.
مشاركاتي القادمة ستكون متعلقة أكثر بفترة ما بعد الحقيبة. أعتقد أن فترة الحقيبة "عصرت شوية" على ما تلاها وهو الأمر المستمر حتى هذه اللحظة وفي اعتقادي أنه أحد أهم أسباب كوننا أمة "مجترة غنائيا". بصراحة موضوع نزار عدل شوية في زاوية تناولي لذا التأخير.
لدي مقالات سابقة متعلقة بالغناء مؤرشفة في هذا المنبر، يمكنني البحث عنها وربطها إذا كانت هناك رغبة في الإطلاع.
تحياتي للجميع.
عبدالحليم أبوقصيصة
05-10-2008, 10:16 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
مهد المدرسة الفنية الاولى هي الان و في هذه اللحظة تغدو ساحة لمعارك الشوارع ، دماء نازفة .. اشلاء متناثرة .. وتحولت لغة التفاوض السياسي الي زخات مدافع و لعلعة رصاص !
.. و مع ذلك ، ومن فوق ربوة غناء الوطن نقف في هذه اللحظات الحواسم ونقول بلغة العقل و الحق الابلج :
* لا مخرج سوى إعادة صياغة واقع و مستقبل السودان علي نحو عاقل ، مُنصف ، يرد كافة الحقوق و لا يميز احد علي احد
* لن يُحكم السودان بالحديد و النار .. ولن يُولد الظلم الا مثل غزوة ام درمان هذه .. و مع ذلك نقف بحزم ضد إراقة الدماء
.. و نواصل حلمنا المشروع بسودان المساواة ، دولة القانون ، البرلمان ، الديمقراطية الراسخة ، السلم الوطيد ، رد حقوق القوميات ، إعادة توزيع الثروة علي نحو عادل ، التمازج الديمقراطي الحر لثقافات الجهات الاربعة نحو وحدة و تنوع المكون الثقافي السودان
.. و فوق ذلك نحلم بوطن الغناء الجميل .. و نواصل مطاردتنا لغزال الروض السوداني ماركة كابلي و ابو صلاح .. غزال السودان الجديد ..
يا ام درمان .. انا ذلك الولد الذي دنياهو كانت ها هنا في ميدان المدرسة الاهلية ، في بحر ابو روف ، في دار الرياضة ، في ترسو السينما الوطنية اللتي إعتلي مسرحها عثمان الشفيع يوم ذاك المستعمر !
نحو حل ديمقراطي عادل لقضايا القوميات المهمشة ، نحو وقف ابدي دائم لقصف القرى و المدارس بححم الطائرات .. لا لإراقة الدماء
05-11-2008, 11:22 PM
Osman Musa Osman Musa
تاريخ التسجيل: 11-28-2006
مجموع المشاركات: 23082
.. و ابدا لن تستطيع قعقعة السلاح ، لعلعة الرصاص ، زخات المدافع ، ازيز جنازير الدبابات ، و احكام الطواريء ان تحجب :
* صوت محمد ود الفكي وهو يشدو برميات الغناء الفرايحي تلك
* صوت العبادى الجهير/الرخيم وهو يطرح شعرا اغاني التحولات الجديدة
* صوت سرور البارتون الشجي وهو يشق ليل ام درمان معانقا آفاق سموات البلاد .. سودان السِلم ، و المحبة ، و تعايش الاعراق و الاديان
* صوت كمنجة السر عبد الله المتدفقة بموجات النغم الخماسي الحنين ، النغم الخماسي الذى جاء مزيجا تاريخيا لتداخل و اندماج الحان و ميلوديا ابناء و شعوب السودان في كل تلك الجهات الاربعة
* ضربة ايقاع النقرزان الخفيف الصادر من جوف رق كرومة وهو يلامس شغاف قلب ابناء السودان في الجهات الاربعة
* دوباي و لحون و موسقة هداي غرب السودان الصادرة من آلة ام كيكي رقيقة الحال ، لتلهم لاحقا جديد الغناء الجميل القادم من غرب السودان و مستقر في نسيج اغنية السودان الجديدة
* صوت ترانيم عود اسمعيل عبد المعين و جُملته الموسيقية التي فتحت الباب لموسيقي و غنائية الامير ابو علي ، و عثمان حسين و وردي ، و ود الامين .. و كابلي
.. فليظل عاليا صوت غنائية السودان و ميلودي الجهات الاربعة بلسما يشفى جروح ام درمان ، و يفتح الطريق لوقف الاقتتال ، ورد الحقوق ، ورفع المظالم .. وزادا لقوى النضال من اجل دولة القانون ، الديمقراطية الحقة ، السلم الوطيد ، سودان تعايش الاعراق و الثقافات و الاديان ..
أمتزج المؤثر فكان الأثر بليغ وعميق نغم الساقيات وهنَّ يتمايلنَّ طربا وصوت أنين السواق في هدؤ الليل
المتتبع والمستمع لأغاني الأستاذ كابلي يلحظُ جلياًكيف يحرك كابلي أحرف الكلمات ويجعلها تأتيك أنتَ المستمع طائعة تفرد امامك معانيها وتكفيك من عناء البحث لذا نقول الأداء فن وجمال الكابلي يتمتع بذلك ولا خلاف في ذلك لله درك أستاذ الكابلي (( الحقوق محفوظة يا طراوة ما تخاف )).
05-11-2008, 10:27 PM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
[QUOTE]المتتبع والمستمع لأغاني الأستاذ كابلي يلحظُ جلياًكيف يحرك كابلي أحرف الكلمات ويجعلها تأتيك أنتَ المستمع طائعة تفرد امامك معانيها وتكفيك من عناء البحث
.. نعم يا منسي :
إذ تستحيل الحروف في ميلوديا الكابلي الي احرف من نور !
" الكابلي ملك الميلوديا المتوج "
.. اسمعه بالله يا خالد يقول كلام شوقي :
حرصي عليك هوي .. و من يحرز ثمينا يبخلِ .. و الشُح تحدثه الضرورةِ في الجواّد المُجزلِ ..
إنها واقعة (كرمة بن هاني) .. صداح يا ملك الكناري .. جيبوها يا ود عثمان .. بسراع يا معاوية .. علها تشفي جراح ام درمان و تصيرا بلسما لاهلنا في معسكرات الهجير و البرد في تلك الاراضي التشادية ..
05-12-2008, 01:33 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
Quote: يحرك كابلي أحرف الكلمات ويجعلها تأتيك أنتَ المستمع طائعة تفرد امامك معانيها وتكفيك من عناء البحث
.. لذا يا خالد فان كابلي هو ملك الميلوديا المتوج .. صوته البارتون ماركة سرور ، معطوف علي تموجات صوتية مُحرضة علي التطريب .. معطوف مرة اخرى علي دقة مخارج الالفاظ نحوا و صرفا
ذلك هو كل الجمال يا غالي .. الجمال الناهض في لحظة مودة و نظرة عابرة
.. و لنسمعه في إهزوجة شوقي :
حِرصي عليك هوى .. و من يحرز ثمينا يبخلِ و الشح تحدثه الضرورة في الجوّاد المُجزلِ
.. انها واقعة كرمة بن هاني تلك .. و ما بالنا نحن في تفانين واقعة البنت ماريا اللتي حدثت في تلك التسعينات بحي الاندلس بمدينة ود مدني !
.. حتما نعود
05-12-2008, 08:03 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
تمَّ دور وإدوّر عمى ونور شال فات الحلّه نوّر زي بدر التمام كان وبعد كان تأتي الآهات والتحسر .. تمتد أيام الفرح وتعم الحلّه حيناً قبل وبعد الزواج في كل شبر فرح في كل بيت فرح والناس فرح وكلامهم فرح قبل وبعد الفرح. الحال نفسه في الأتراح. وهذا حال أهلنا الطيبين ( فرحهم كُتر وترحهم كتُر ) وبين الأفراح والأتراح التواصل يشد حبل محنَّة متين فتله يربط بينهم ( ويا حليلهم أهلنا زمان ).
الدور : قد يكون أسبوع تمام كما قال الشاعر ياقمر دورين أنا شفتك وين
وقد يكون الدور ( دورة مسار القمر في منازله 14 يوم ) من يبدأ هلال حتى يكتمل بدراً.
ياقليبي إتجبّر قوم وريني كيف الجِراح تتصبّر نحن ما بنتنبّر النِفوس إن حبّت تستحي وتتكبر
التنبر هو التفاشي والتفشر
ياقليبي إتجبّر قوم وريني كيف الجِراح تتصبر قولوا لي البتنبّر ماكشفن قناعّن المعاني إتوفر
عليك الله شوف جنس الحديث والنضمي دا يا طراوة ما البسوق الزول ويخلي يحاحي بقيف البحر
ياصديق إتصبّر شن بشوف حِداك إلا حُور مبطّر ..... ( اي بطران والبطران من ظهر عليه أثر العز والترف ) إبقى يومنا مطّر حال الكون تجيك والفريق معطر
هنا في كلام يا طراوة عجيب والله يعجز اللسان عن وصفه يستخدم أهلنا كلمة إبقى ( بمعنى محتمل ؟ ) والمطر دوماً يعقبه ذاك المزج البديع من رائحة التراب بالماء وهذا هو حالها لما تمر في الحي تعبق فيه روائح تسطل وتغبي بالشديد القوي
النحر مغمر والثباتا حارا والمجال معمر الشعر مخمر ينضح كُلو ليل حتى بي المجمر كناية عن شدة سواده حتى بي المجمر :: وهذه كانت عادة النساء زمان أن تزين شعرها بالذهب ( الورقة ودي الجنيه.... وأنصاص الجنيه ) بتعرف الجنيه ونص الجنيه يا طراوة ؟
Quote: حتى بي المجمر :: وهذه كانت عادة النساء زمان أن تزين شعرها بالذهب ( الرقة .... وأنصاص الجنيه ) بتعرف الجنيه ونص الجنيه يا طراوة
.. بالحيل بعرفو يا خالد !
.. و قيل إن حِسان السودان زمن العبادي و ابو صلاح كن علي هوى عِقد الرقبة الملان بانصاص جنيه الدهب و قيل ان الدهب قد كان دهب البرتي او دهب شيبون اللي كان في جمالو و نقاوتو و عيارو زي مزيج خام برنت بتاع بحر الشمال عالي الإغلاق
.. وقد قام الشيخ ابراهيم العبادي آناء تلك الحُقبة الزمنية و في زواج والد المحامي الكبير عبد الحليم الطاهر ، قام بوصف إمرأة ام درمانية جميلة راقصة علي السباتة و محفلة بدهب شيبون و ذاك ماركة البرتي و قال فيها اغنية الوصف و الغزل الاثيرة :
يا موفورة النفل .. يا الهيبة الكست الحِفل ليك في الجمع الحفل .. نسبة راد من طفل و قلبي الما بعرف الوجل .. هابِك و خاف سيف النُجل
.. و شاحدنك بالواهب العطاي يا منسي تجيبا لينا بصوت ميرغني المامون واحمد حسن جمعة
.. و لانو سيرة العبادى جات .. بنرسل ليكم اغنيتو بتاعت المُناجاة و المناشدة البقول فيها .. الغرام عامل إحتلال و الهجُر حاجة مش حلال ..
.. بعد حنة العريس قمنا تحركنا من تفتيش ود بلال المجاور لحلة عبد العزيز .. ودخلنا حي الاندلس بود مدني .. كان الفنان كابلي .. وبت الخواجات جوه الدايره .. كابلي لمحا !! بسراع كسر ضنين الوعد باغنية ماريا !
علي ود يس .. اصلا البت كانت عاجباهو مما شافا معانا في حوش ناس بلال .. أها قام فرزع ليك كل ناس مدني و سواهم دايرة كبيرة و ختا البت الفنلندية في النص !
و يا سلام يا ود المنسي علي شعب السودان و أمة السودان و شباب النيل و الجزيرة الخدرا لمن (الورق يفتح) و يبقى الاعمى شايل المكسر
05-13-2008, 04:46 AM
أحمد طراوه أحمد طراوه
تاريخ التسجيل: 12-25-2006
مجموع المشاركات: 4206
السحر الجاي من جزر الاطلنطي في ضفاف الساحل الافريقي :
* جُزر الراس الاخدر * جُزر الباتيك
.. عُنصر البانتو الافريقي القديم ، ممزوج مع ثقافة البرتغال ذات العمق الاسباني .. دا الجاب غنا ماريا دي باروس
الق ال :
- الترمبيت - الترمبون - الساكسفون الالطو و التنور - الهارمونيكا ذات النكهة و الخصوصية في غنا ماريا دي باروس - الكلارنيت - الفيولين الصولو و الشيللو - وزخم ايقاع السالسا ، و السامبا ، و البوليرو البرازيلي ، و الكولادرياس الخفيف ، و التمبو الوسط و العالي .. كلو نتج من تلاصف و تقاطع ثقافات السواحل العابرة للقارات .. و تبقى افريقيا هي مهد الايقاعات .. حنرفع بعض غنا دي باروس لمن نجي لازمة الغناء الامريكي . .
.. و ياها ماريا السمحة القال عليها كابلي :
She is so facinating .. Sweet and captivating
شاهدوا دي باروس علي : mariadebarros.com
.. يا منسي :
نجوي كمال اللي امها عازفة العود الخرطومية القديمة بت عكاشة رسلت لينا :
* موفورة النفل * ظبية السّلم
.. جاينك يا الحبيب ، و بقينا في دروب العبادي .. جبل الشعر المتحرك
05-13-2008, 09:19 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
موفورة النفل * ظبية السّلم يا دوب يا طراوة داير تخلينا نباري بي الحيط وقيف البحر ونسوي ونقول ونشكي حالنا... الحال العلي حال العدو المسكين وحال الكتفوهو وسالين علي السكين وحال الفي البحر حايشنّّو تُمساحين وحال الفي السجن ماقدرّولو سنين وتحياتنا لنجوى
حالي العلي ما ظن يزول و ما بهمني قول العزول .. يا زميل حي !
.. اللي ببدأ بيها عوض الجاك اغنية يا جميل يا مدلل
.. لزاما نلقى عوض الجاك في رمية العبادي .. مدد يا ود عثمان .. يا معاوية و يا نجوى بت عكاشة
يا خالد يا منسي : الطيب ود ضحوية ، في درب الهمبتة و مساسكة الغواني .. الانجليز كانوا بسجنوه في السنة ثلاتة مرات .. كلما المفتش يصدر حكموا .. شيخنا ود ضحوية كان بقول :
" نحنا ركزنا إن كان هي ام حمد بتشوفنا .. ! "
اركزوا يا عيال .. الدود قرقر .. سمحة عند الكابلي ..
05-13-2008, 08:46 PM
خالد علي محجوب المنسي خالد علي محجوب المنسي
تاريخ التسجيل: 04-10-2006
مجموع المشاركات: 15968
Quote: يا خالد يا منسي : الطيب ود ضحوية ، في درب الهمبتة و مساسكة الغواني .. الانجليز كانوا بسجنوه في السنة ثلاتة مرات .. كلما المفتش يصدر حكموا .. شيخنا ود ضحوية كان بقول :
" نحنا ركزنا إن كان هي ام حمد بتشوفنا .. ! "
اركزوا يا عيال .. الدود قرقر .. سمحة عند الكابلي ..
يا طراوة الظريف الجميل قال ودضحوية الدرب البجيب كُمش النقود مو هيّن ما بمشيهو ديك بيتو أب جليدّن لين الولد البقوم من أم حمد مديّن غصباً عنو يا الساحر بسوقن بين
والساحر هو جمل ودضحوية
يا طراوة الموت ما بنخافو الخوف يمين مو هولنا بس ما شفتا الغزال بي عينو بجرح الأسد
وما شفتا الزول السمح الفات الكبار والقدرو ودرديق الشبيتي فوق صدرو حمانا العيد مع أهلنا
نعم الشبيكى سبب كافى لحضور العيد ... تلك البلاد الساحرة جديرة بالحب . جديرة بالتواصل وجديرة بأن يكتب فيها مثل ذلك الشعر البديع .. ____
أخى العزيز جدا ناذر الخليفة الف شكر على التلفون . والف شكر على حديثك العذب عن البوست وكل تلك هى مجهودات الاخوان .. تيم الندوة اكرر الشكر الجزيل على الدعم الدايم للبوست تحياتى
05-14-2008, 01:59 AM
Moawia Mohammed Moawia Mohammed
تاريخ التسجيل: 10-24-2006
مجموع المشاركات: 3777
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Moawia Mohammed
أحمد طراوه
Osman Musa
خالد علي محجوب المنسي
ياسر شبيكة
ناذر محمد الخليفة
osama elkhawad
Haleem Abu-Gusseisa
فيس بوك
تويتر
انستقرام
يوتيوب
بنتيريست