|
|
 Re: ناس الزقازيق ... أجدع ناس .. (Re: منصور عبد الرازق)
|
تكتيكات الكتابة فى المنبر
بداها لينا ابو الزوز
قال ليكم لو عايزين اى صورة ولا موضوع ياخد حفه من المطالعة والتداخل
اوعكم تختوهو فى آخر الصفحة
اول ما الصفحة تقلب
لصقوهو طوالى
طبعا دى تكتيكات اسفيرية لا قبل لنا بها
لا انا ولا فلان ولا علان
لكننا حانوريكم تكتيك جديد لنج
لمن تكون تكون عايز (تقطع فى الرشيد مثلا)
اعملها فى اى حتة من الصفحة
ما بيهم اولها ولا آخرها
بس اعملها يوم الخميس قبل الضهر
لغاية ما الرشيد يشوفوها اصلا بعد ما يصل ابو ظبى
تكون القيامة قامت
| |
 
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
حساب المثلثات دى ياها قصص المابعرف جيب التمام
وظل الزاوية
وظل التمام
وجيب الزاوية
ياها دى
يطرشنى ويعمينى وانطس فطيسة لو كنت بحبها ولا بعرفها اساسا
نحن ناس ظل زاويتنا ممدود ممدود ممدود يا ولدى
وجيب زاويتنا , مقدود مقدود مقدود يا ولدى
ونحن ناس جيب تمامنا , مشدود مشدود مشدود يا ولدى
من حاول فك ضفائرنا
مفقود مفقود مفقود يا ولدى
هاك الضفائر دى يا عفاف
ادى منها اتنين (بالجوز ) لحاج الركز
قال سال من شعره الذهب
ده منو (المجنون ) القال كده؟؟!!
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
تكتيكات الكتابة فى المنبر
بداها لينا ابو الزوز
قال ليكم لو عايزين اى صورة ولا موضوع ياخد حفه من المطالعة والتداخل
اوعكم تختوهو فى آخر الصفحة
اول ما الصفحة تقلب
لصقوهو طوالى
طبعا دى تكتيكات اسفيرية لا قبل لنا بها
لا انا ولا فلان ولا علان
لكننا حانوريكم تكتيك جديد لنج
لمن تكون تكون عايز (تقطع فى الرشيد مثلا)
اعملها فى اى حتة من الصفحة
ما بيهم اولها ولا آخرها
بس اعملها يوم الخميس قبل الضهر
لغاية ما الرشيد يشوفوها اصلا بعد ما يصل ابو ظبى
تكون القيامة قامت
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
الجانى منك ومن تباريح الهزى
اصلو بصعب يا جميل
تعبت منك
ولما طال بى النوى
بقى لى اسيبك مستحيل
يا زول نتفق
اى راس صفحة مافيهو اغنية
ببقى راس فاضى
اخير منو
راس السنة
فى السعودية
طارق جبريل
عبد الدائم عملها معاك ظآآآآآهرة
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
عبد الدايم
ياخي مالك مابتشبه ناس الزقازيق وراقي زيهم
ياخي الواحد لما يعزمكم كباية شاي
يا مافاضين ومشغولين او جاييييييين ومرحبين بالفكره
والله انت طلعت خليل فرح
وكلم معاك عصام دهب وباقي الجماعة
ودي في اول صفحة المـــــــــــــــ70ـــــــــــــــــــــــل
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
بمناسبة محمد ميرغنى يا جماعة
انا بعد مرات عندى جزئيات صغيرة فى الأغانى
بتعمل فينى عمايل
فى الأصل الغنية كلها بتكون مبنى واحد
نسيج واحد
تكوين متجانس
متسلسل , متدرج
طالع طالع
او نازل نازل
زى قطعة الحلوى , تأكلها ما تعرف من وين
المهم حاتاكلها تاكلها
وحا تستلذ بيها , اكيد حا تستلذ بيها
لكن دايما فى زى حتة كده , تتمنى لو انك اكلتها آخر شى
وقع ليكم يا جماعة الخير
لمن الزول الأسمه محمد ميرغنى ده يقول
اشتقت ليك ساعة المسا فرد الجناح
تموت مرة
ولمن يقول
لملم مصابيح النهار
يجيك احساس الحفلة البيلمو كراسيها وانت كنت متسلطن فيها آخر سلطنة
ولمن يقول
والكون شرب لون الجراح
ترجع تموت تانى
ولمن يقول
والعتمة نامت فى الدروب والليل لبس اجمل وشاح
تحس انك فى المرتين الفاتو , ما مت الموتة الصاح , تموت المرة دى بالجد جد
لغاية ما يقول
فى اللحظة ديك اشتقت ليك
ويقول كده يقرنا ليك ب
واحتجت ليك
فتشعر انك (بعثت من جديد) والقيامة قامت
احتجت ليك دى
عاملة بالظبط كده
زى (التوبنغ) البختوهو فى (قمة قطعة الجلى الأحمر)
او قطعة (الكرز) البتلقى منها يا دوب قطعتين تلاتة مع (الفروت سلاد)
يعنى
اشتقت ليك , عبارة عن قطعة حلوى بألوان جذابة
واحتجت ليك , هى (الكرزاية) الحمراء المتوجة
ابو الزفت
والله يا الرشيد لو لسه مدبرس بعد الكلام ده
الا تمشى ابوظبى , وتتم يومك هناك
وعلى فكرة
اها بكرة كمان اجازة
قصرت معاك ؟؟!!
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
قالت لى ايثار
بتى الكبيرة الأمورة
وانا طالع الصباح ماشى المكتب
يا بابا خليت ليك ورقة فى نص المحفظة بتاعتك
متعود على الكلام ده انا يوم الخميس
متعود اعمل شوبنغ لبعض احتياجات البيت وانا راجع
ما اشتغلت بالموضوع كتير
ما ياهو الباذنجان واللحمة والدجاج والذى منه
يعنى حا تحترعوا حاجة جديدة
هى باين عليها عارفة احساسى ده
يا بابا عليك الله كان ما قريت الورقة قبل ما تمشى (هايبر بنده)
الدوام قرب يخلص
فتحت المحفظة اراجع (جيب التمام) بتاعى
جات طالعة لى الورقة
آيس كريم , بسكويت آيسكريم , فانيليا , شوكولاتة
زيتون اخضر وزيتون اسود , باذنجان , بصل , بطاطس, سكر
خردل مسطردة, فراولة , شكولاتة سائلة
كلو ما مشكلة
المشكلة فى السطر الأخير ده
خردل مسطرده يعنى شنو ؟؟!!
احسن حاجة تعمل فيها ما فاهم
هسى انا امشى لبتاع الدكان اقول ليهو ادينى (خردل مسطردة)
الراجل يقول على شنو ؟؟؟؟!!!
الله يجازيك يا ايثار
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ياسر نجيلة)
|
يا قول نجيلة
هسه مبارك ده يرحبو بيهو يقولو ليهو شنو ؟؟
غايتو ما دام جيت شوف اسامة ابتر وين غاطس
ولا بنقلع منو الباسورد ونديهو الشريف عباس
مشتاقين وتحياتى لامنيه
يا اخوانا ممكن الواحد يأجل بعض المواد للتيرم التانى
لان الريس ميسرة قال عاوز يقرأ البوست من اخر مداخلة خلاها
وسافر ..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عفاف علي ميرغني)
|
تاني ازيكم000
تلقيت امس نبا وفاة والد الزميلة الزقازيقية عفاف علي سعيد
خريجة زراعة85 00 وزوجة الزميل الزقازيقي الفاتح ثابت خريج صيدلة85
ورقم تلفون عفاف علي سعيد الموجودة حاليا بابو ظبي للعزاء
00966548974803
للفقيد الرحمة ولاسرة عفاف الصبر
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عفاف علي ميرغني)
|
صادق التعازي للأخت عفاف علي سعد
في وفاة والدها
اللَّهُمَّ اغْفِرْ لَه وَارْحَمْه ، وَاعْفُ عَنْه وَعَافِه ، وَأَكْرِمْ نُزُلَه ، وَوَسِّعْ مُدْخَلَه ، وَاغْسِلْه بِمَاءٍ ، وَثَلْجٍ ، وَبَرَدٍ ، وَنَقِّه مِنْ الْخَطَايَا كَمَا يُنَقَّى الثَّوْبُ الْأَبْيَضُ مِنْ الدَّنَسِ ، وَأَبْدِلْه دَارًا خَيْرًا مِنْ دَارِه ، وَأَهْلًا خَيْرًا مِنْ أَهْلِه، وَقِه فِتْنَةَ الْقَبْرِ ، وَعَذَابَ الْقَبْرِ وَعَذَابَ النَّارِ
نسال الله له الرحمة ولذويه الصبر
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عفاف علي ميرغني)
|
مبارك جادين .. حللت أهلين و نزلت سهلين .. و حبابك عشرين ..
عبد الدائم بلاي شغل لينا ( فرمالة ) مبارك البيتقطع فيها ديييك ..
يا الله يا مبارك لما الواحد يسمع ( الذكريات ) منك في حفلات الزقازيق ..
كسيّر شديييد ..
عبد الدائم تلحقني أنا و تنجدني أنا بالذكريات ..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
يا جماعة كنت ما داير أدخل معاكم في المداخلات ....
لأنو في كلام جميييييييل و طاعم في الميل 69 خليتوهو وراكم ما جبتو ليهو خبر
أنا شخصياً اقتنعت يا دوبك إنو الأخ زهير الزناتي له من الجماليات في صياغة ما يكتبه وبشكل متفرد
طبعاً لأنو بقى صاحب محمد صديق ليهو فترة كدا...
أما حكاوي الرشيد ...عايزة ون تو مع الزول المامعروف حتاتو وين ...عرفنا أن دار الصحيفة قفلوها..و لأنو ما فاضي و قافلة معاهو و لم يأتي حتى الآن ...فلم استطع تجاوزها حتى الآن
و بعدين كتابة منصور التي تجعلك تتحس رجليك ...وكأنك معلق بين السماء و الأرض و تراكيب من الجمل اللفظيفة بين زمن تجاوزنا حدوده و آخر حاضر بيننا
أما الآخرون وكلهم سواء...يمتعونك بتداخلات قلما أنك تجد نفسك منبطح أو منبرش بكميات من الضحك الهستيري بعد ما تغلق باب مكتبك خوفاً من الكفيل..أي كان خواجة، عربي بي عقال، سوداني و لا جايب خبر
و فوق هذا وذاك غياب طال انتظارنا له ..ليس بالمتابع ولا هو بالمستمتع ...إنه صاحب الإبداع و التميز محمد عيد ...وقع في عينكم يا جماعة؟؟؟
إنتو مبارك جادين دا نصيح يجي يا دوب؟؟؟
عفاف الجن ماسكني ما عندك زوارة سيدي الحسن راجل كسلا؟؟؟
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عصام دهب)
|
سلام يا عفاف ليك و الأولاد و حاج الركز الما لاقي ليهو فرصة في الباسوورد و برضو تقولوا ( مساواة ) ياخي تحيا المساواة و مرحبتين حبابا ..
ــ
التعازي الصادقة لزميلتنا الزقازيقابية الأخت / عفاف علي سعيد في وفاة والدها الذي نسأل الله تعالى أن يغفر له و يرحمه و ينزله الفردوس الأعلى من الجنان و يلهم زميلتنا / عفاف و أسرتها الصبر الجميل و أن يجعل البركة فيهم .. و التعازي موصولة لزوجها و زميلنا د. /الفاتح ثابت .. و لا أراكم الله تعالى مكروهاً ..
ـ
الأخت / عفاف آمل مراجعة رقم هاتف الأخت / عفاف علي سعيد لأنه لا يرد .
| |
|
|
|
|
|
|
|
|
|
Re: ناس الزقازيق ... أجدع ناس .. (Re: عصام دهب)
|
مشيت لحد السوق العربي وجيت لقيت لسة الجاني منك مدورة
الظاهر المهدى اليه عامل طناش الا نلحقوا بواحد تلفون ابو لستك
يصيحيهو والله كمان يكون نقل للمغاربة امراض وتفانين الشعب السوداني المبدع (اضرابات واعتصامات والذي منو)
يعني في ذمتك يا محمد عيد تتخيل انو الدكاترة ولادة السرور ديل مضربين في جوبا ذات نفسها (هم اساسا الوداهم بهناك شنو ؟؟؟؟؟؟)
شكرا ابن الدفعة نجيلة
شكرا عبد الدائم وتقبل تحيات امنية واحمد ومحمد
يا عفاف الذكريات صادقة ونبيلة مهداة لك ولعصام دهب
يا منصور انت متطور جدا
انحنا عندنا واحد اسمو اليو يو خرم جيب التمام والحقوق المجاورة
شكرا رشيد القوم على الترحيب
احبكم حب جلا لملاح النيعيمة مع محمد صديق وخالدة وولدهم القالب هوبا في البلكونة
عجبي
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
سامعين صوت البلاي ستيشن العالي ده...يا ولد وطي الصوت...
أنا في أبوظبي يا جماعة وصلت من شوية...
أقول ليكم قلبي دق...ما بقوله...حسه يجي واحد من ناس الكوة يقول لي
نحن ما عندنا رجال خفيفين و لفيفين...أخير لي أمسك علي خشمي ساكت
و أغير المود بس....
| Quote: شكرا رشيد القوم على الترحيب |
الليلة يا مبارك جادين ذكرتني حبوبتي حاجه أمونة...اولاد خالي يمارضوها
لحدي الصباح وتجي تقول ليهم والله رشيد القوم يتبارك مساهر معاي لحدي الصباح
حسه والله فاتني أن أرحب بيك لأني كنت في الطريق السريع الى أبوظبي...
لكن حسه أنا برحب بيك ترحيب حار انت أهله و أهل أبوهو كمان.... ومافي داعي
للشكر تاني خلاص مدفوعة مقدما دي....
| |
|
|
|
|
|
|
|
|
|
Re: ناس الزقازيق ... أجدع ناس .. (Re: مبارك جادين)
|
عفاف على سعيد رحم الله والدك واسكنه الجنان الفسيحة
مع الصديقين والشهداء
احسن الله عزائك انت وزوجك الدكتور الفاتح ثابت
مبارك جادين
جيب ليك (حافظة كبييييييييرة )
وبعد داك كمان ما تكتفى بانها حافظة
خت فيها (تلج اضافى )
كسر جزء منه لى زهير
وجزء منه لعصام دهب
والجزء التالت لى امنية
انا كسر لى الباقى
عشان تضمن باسويردك لا يروح لا تجيهو عوجة
هسى عليك الله من ما بدينا البوست ده
شفت جلا باسويرده راح ولا اتفقد
يوم فى كسلا , يوم فى نيالا , يوم فى مدنى
اها فى مدنى دى
جلا كان معاهو (جلى ) عديييييل
باسويرده راح ؟؟؟
كل الحصل ليهو
جن وفقد المحنة
لغاية ما عمر جا , وسوا ليهو السماية الماخمج
لحمتى الرسلوها لى لغاية هسى ريحتها فى الماسينجر
عفاف , بنية كسلا
قطعتها ليكم طرنشات طرنشات
واى زول ماشى فى الملز
شايف ليك (لحمة كسلا الحلوة الصافى لونها والقلبى بريدها وغرب القاش سكونها )
معلقة فى الحبال فى الحوش
بين كل طرنشة لحم وأخرى
بنطلون لى (حاج الركز)
ابقى عشرة على باسويردك يا مبارك جادين
(امنية ما تديها ليهو )
| |
|
|
|
|
|
|
|
|
|
Re: ناس الزقازيق ... أجدع ناس .. (Re: مبارك جادين)
|
مساء الخير يا وجوه الخير،،،،
إصبت بقمة الإندهاش والإنبهار والإرتياح
وآخر إندياح وإنبساط ،،،، الوضع في البوست
صار لا يصدق ده عايز ليه إجتماع (ل ، س) عاجل جداً
غبت عنكم فترة طويلة قسرية وكنت في إجازة عمل - على وزن غداء عمل-
ولم يتسنى لا الوقت للدخول إلا مرات قليلة ولكن لم إستطع أن أجاري هذا
الفرس الرائع صاحب الميل رقم 70 وأنا كنت معاكم حتى الميل 54 وأنا دلوقت
عملت معسكر مذاكرة في كازينو النهر ووصلت حتى الصفحة 61 ولازم أكمل علشان بحبكم
شديد ما عايز أي حاجة تفوتني - شعارنا العلم بالشئ ولا الجهل به - وما بقدر افوت
أي كلمة مكتوبة وبصراحة لقيت نظرية أخونا عصام دهب متابع ومستمتع حتى الثمالة جميلة
جداً جداً ومذاقها جميل وبصراحة حاجة حلوه ،، وفي الأيام الأولى سافرنا إلى الزقازيق ولكننا
وجدناها قد رحلت ولم تعد موجوده سوى في أذهاننا وقلوبنا ،،، وأبشركم فقد أكملنا عمل أخونا
ياسر نجيلة وكنا في كلية بيطرة وزراعة ولنا عودة بإذن الله .
أرتاح قليل وأجمع أطرافي وأرتب بيتي وعملي وبجيكم برواقه زي ما بيقول أخونا زهير الزناتي
تحياتي لجميع الأخوان والأحبات والزملاء والزميلات اللائي غيرنا شكل وفهم البوست ونشيد بهذا الحراك
الجميل ولنا عودة تفصيلية للكل وصور الزقازيق سوف تكون جاهزة الإسبوع القادم ،،، ولكم حبي وودي
وإشتياقي ،،، أحبكم جميعاً ، يا ناس الزقايق يا أجدع ناس ،،، وكمان ناس الشعبية الحلوين أحلى ناس .
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
| Quote: ووصلت حتى الصفحة 61 |
يا ريس ميسرة إنت أول من ناس الليل و لا النهار؟؟؟؟...ورينا إنت هس متواجد ...عشان نرحب بيك كويس
برضو انت عايز تقرا و لا تتداخل معانا؟؟؟
جاوبني على التساؤلين ثم بعد داك نرحب بيك و نسلم عليك..
زول يقرأ من 61 و تنتهي متين ما عارف إلا زول مجنون
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
جلال و سامي عبدالوهاب مالكم بقيتو ما بيمرقكم الا الشديد القوي...بقينا ما
بنشوفكم الا اذا كان في عزاء...تجو لابسين الجلاليب و القفاطين..تعزو وتمشو..
و نحن مارقين للربا والتلاف...طوالي حايمين في البوست ده...حسة في زول غايب
من أولاده اسبوع يجي يطل على البوست ده يوم الخميس والجمعة...الا يكون زول
مجنون...
محمد عيد ان شاء الله خير...اختفيت مالك...مدبرس زينا ولا شنو...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
من طرائف المجنون الشاطر
ونسبة لمواقفه الطريفة كل من يعرف عز الدين وهم يستلطفه حتى بعض
المسئولين وعلى رأسهم الطيب المرضي حاكم الإقليم، اياميها
كان إقليم دارفور موحد
وعندما كثرت الأسواق وجات موجة كده كل زول جاري يتحصل
ليه على كشك او دكان يبيعه ، ذهب عز الدين وهم للحاكم رأسا
وقال ليه انا عايز تدوني الشجرة الكبيرة الفي السوق دي
الحاكم قال ليه بدل الشجرة مانصدق ليك دكان أحسن قال ليه لا
انا بس عايز الشجرة . قاموا سجلوا ليه الشجرة وأدوه مكتوب
بالملكية كما طلب 00 رجع السوق طرد الناس القاعدين تحت الشجرة
بعد أن أثبت ملكيته لها ومن ذلك اليوم اي زول عايز يستفيد من
ظل الشجرة يدفع حتى يستظل وعمل صورة من إثبات الملكية وعلقه
على الشجرة وهكذا صارت الشجرة مصدر رزقه.
إلى ان جاء يوم وجد ثلاثة اشخاص تحت الشجرة ورفضوا يدفعوا له
وحصل الشجار اثناء ذلك مرّ بهم رجل بوليس مابعرف عز الدين وهم
قال ليه كيف تمنع الناس من الشجرة ؟ المجنون قال ليه الشجرة
حقتي وانا على كيفي الشرطي قال ليه طيب البثبت ان الشجرة حقتك
شنو رد عليه المجنون وهم قال ( المعلق فوق ده قسية أمك)
| |
|
|
|
|
|
|
|
|
|
Re: ناس الزقازيق ... أجدع ناس .. (Re: أحمد إسماعيل)
|
أحر التعازى لاختنا وزميلتنا عفاف على محمد سعيد فى مصابها الجلل
ونسأل الله له الرحمة والمغفرة الواسعة وان ينزله فى علييين مع الصالحين ...
**********
طبول ترحاب ومزامير فرح وزغاريد مهيراتنا الجميلات
تصدح وتشدو ..
فرحا وابتهاجا بعودة الريس الحبيب ابو منذر
وفى انتظار مافى الجراب ...
نفس الزغاريد زفت لنا ظهور فارسنا المغوار
الفتى الابنوسى .. امير الفرح المدهش .. مبارك ود جادين ...
ويقينى انه عائــد الينا مضمخا بعبق ام درمان وبخور سوقها العتيق ..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
سلامات يا ناس
ياجماعة محمد نجيب ده زول ما ساهل
الكلام عنو طويل ....قبل كدة اهديتكم
قصيدتو المطلعا ..ازيك انتى وازى عيونك
حأجيكم ليهو بروااااااااااااااااااااقة
محمد عيد والله مشتهنك...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
منى يونس /
سلام عليكم يا ناس الزقازيق كلكم،،، يا اجدع ناس التعازي لكل من فقد عزيز لديه
وكل عام وانتم بخير وعيد مبارك اخص التحية للأخوات عفاف ونجاة حوفي وإبتهاج وزينب
التجاني وشجعتوني على المداخلة والكتابة ونقول للبوست وداعاً للعزوبية ومبروك
تسجيل اللاعبات الجدد (البرايات) .
ذهبت الى الزقازيق مع الريس والأولاد ولكنها تغيرت تماماً بحثنا عن 21أكتوبر ولم نعرف مكانها
حتى وزنت رأسي بالعودة لمستشفى المبره ومنه كانت اللفة يمين يسار ويمين هكذا تعرفنا على بيت
الطالبات ولو لا مستشفى الجاويشي لما عرفنا دار الإتحاد .
تقبلوا سلام الأولاد وبرجع ليكم تاني ، وعفاف وين صور جدة حاولي نزليها لو كانت موجودة عندكم بالرياض .
منى يونس / باسويرد مشترك
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
يا جلا يا حبيب اول حاجة مبروك الوليد - يتربى في عزو - مسلسل مصري -
وصدقني أنا لحدي بكرة بجيب ليك خبر البوست ده و ماشي بسرعة الصاروخ
علشان أشوف كل ما كتب في الفترة السابقة وأنا ما زلت جالس في كازينو النهر
وبذاكر ولو كنت غير مصدق شوفني موجود في البوست ده اليوم كلة ولا لا السهر صباحي
والما مصدقني يمشي يجيب ليهو سندونتشات فول وفلافل ويجلس معاي للمذاكرة وكان رسبت
لحقوني بدور سبتمبر أو دورة نوفمبر والله في ، وإذا سألت عني أنا بتاع كلو بالليل تلقاني
وبالنهار تلقاني ما بغيب أبداً إلا للشديد القوي واليوم واخد إجازة بوست ومتفرغ تماماً وموجودين
بجدة مع الأولاد .
تشكرات للفنان المبدع محمد عيد ومحمد صديق وجلال وديدوي وعفاف وكل من إنتبه لعودتنا ومرحب باالأمير الجميل مبارك ود جادين.
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
نرحب أيما ترحاب بالأخت منى يونس (بت الشيخ بتاعت الريس)
و نكون أكثر سعادة من الريس نفسه أن تؤازري أخواتك في البوست دا....بالرغم من أن هناك استعلاء ذكوري من الريس ...لكن استقلاليتك ستجدينها وبلا شك عندما يتكرم الوسيط الهلالابي زهير بالتحدث مع الأخ بكري ...ودونك ابتهاج....بس بعدين ما تمشي تسكني السجانة...
غايتو منتظر الأخت البرااااية يوم الجمعه طبعاً حا تستلمكم...بس حذاري من أن تمرض في الكتابة و تنسي ليها ملاح قرين في البوتجاز....و الله زولنا حيكون خشمو ملح ملح وهو راجع
وكان دا حصل حا تبقى معاي في الجن لكن أحذرها ما تزيدو
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
الاعزاء الغالين ناس الحوش
السلام عليكم ورحمة الله وبركاته...
تعازينا الحارة للاخت / عفاف علي سعيد ...في وفاة والدها نسأل الله ان يتقبله في الصالحين والشهداء..
والتعازي موصولة للاخ دكتور / الفاتح ثابت ...
العزيز الغالي الريس ميسرة ومني ...الف الف حمدالله علي السلامة ومنورين الحوش والله ...
مبارك جادين ...خطوة عزيزة ...والليلة حوشنا نور بيك كتير ...
بقيت الاخوان الاخوات / تحياتناواشواقنا تسابق خطوات صفحات البوست ..
دوما لكم المحبة والاشواق...
يا خوانااين المدعو زهير الزناتي
عثمان الجيلي
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
غدا ارحل دون ان يشعر بى اناس...
وترانى اضع بيدى متاعى ورحلى وفأسى...
وانطلق من جسدا عصف الزمان به الى رحب انفك به طلقا من كل احباسى ..
كل الذى ساحمله عند رحيلى زادى من التقوى ..وطهرى .. ورهف احساسى...
اعزيكم وكل عزيز لدينا اعزى كل عائلة السيد حمد وعمى بابكر سيد احمد واخوانه والخالة فتحية فؤاد فى وفاة عم احمد السيد حمد..عم احمد السودان وشموخه وعزته..
عم احمد رجل بقامة النيل .. كان عطوفا مرهف الاحساس كريما رحل عنا جسدا وشعر كل الناس بفراقه ..بكاه السودان كله ناسه وترابه ونيله وطينه ..قضينا معه اياما جميلة بالقاهرة كان يحبنى كثيرا ويدللنى اكثر .. كل يوم يذكرنى ان ازور دار الاوبرا...كان دايما مبتسما مرحبا بالضيوف حتى وهو مريضا..
اعطى الكثير للسودان ولاهله اقربائه واصدقائه فهو تاريخ السودان سيظل رمزا للنزاهة والنضال والعطاء والثقافة والغيرة على وطننا الحبيب.
رحم الله د احمد السيد حمد واسكنه فسيح جناته والهم اهله واحبابه وزوجته واصدقاءه الصبر وحسن العزاء وانا لله وانا اليه راجعون.
رحم الله والد الاخت عفاف والهمها الصبر..وحسن العزاء.
الف سلامة يازوبة لماما محاسن وتحياتى ليها سوف اتصل للاطمئنان...
التحية لكم جميعا وشكرا على المواساة فانتم دايما ناس الحارة اتمنى ان يظل جسر تواصلنا ممتد للابد .
ودمتم سالمين
نجاة حوفى
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
إنا لله وإنا إليه راجعون
لكل الأخوان والذين فقدوا أحبابهم خلال الفترة السابقة
- عبدالمنعم المبارك في وفاة شقيقة
- الهميم الأمين فضل المولى في فقد أخويه
- سعاد عبدالرحمن في وفاة أخوها محمد
- عصام جلي في وفاة والده
- عبدالحليم عباس في وفاة خاله
- عفاف على سعيد في وفاة والدها
نسأل الله أن يتقبلهم قبول حسن ويصبغ على أهلهم وذويهم الصبر والسلوان
والمعذرة إن كان نسينا أحدهم لأني قاعد أكتب الأحداث كلها على ورق طويلة
طبعاً يا جلا دي عمايل مجانين .
زرت في السابق مدينة القضارف وكنت في ضيافة محي الدين أحمد حامد وخالد نوح وسعاد عبدالرحمن
وتعرفت على أخوان سعاد المرحوم محمد عبدالرحمن ومتزوج من سيده فاضلة إسمها أيضاً سعاد وأيضاً أخوها حسين عبدالرحمن الذي توفى أيضاً قبل سنوات قليلة رحمهم الله رحمة واسعة والله يصبركم على مصابكم .
أخونا الهميم الأمين فضل المولى والذي فقد أيضاً أخوين هما أحمد الأمين وإبراهيم الأمين ومن هنا أعزي عائلتهم وأخص أخونا منتصر الأمين ونحمد الله على تلك الأيام المباركة وهم صيام ولقد فازوا بحسن الخاتمة ونحمد الله كثيراً .
في بعض المداخلات المتأخرة جداً ناس سألوا عن أخونا الهميم وقالوا من يعرفه يكتب لنا عنه وأضيف لكم عنه ، الهميم كان من ضمن شلتنا وربطتنا معه صداقة كبيرة جداً وكانت زوجته الزقازيقية والتي تقيم معه حالياً بالدوحة تسمى أماني الهميم - كما كان يقولون منى ميسرة - يمتاز الهميم بدماثة خلقه وطيب معشر وإنضم لمؤتمر المستقلين ويتمع بخط جميل الراجل كان فنان وكان يكتب ويسهر الليل في كتابة جدارية المؤتمر ويشاركة في ذلك الفنان عاطف علي ، الهميم راجل رقيق جداً يزورنا ومعه الأخت أماني كلما قدم السعودية معتمراً وحين توفى أخويه في 16رمضان كان مع أولاده في المدينة المنورة ووعد ناس الزقازيق بزيارة جدة في أول أيام العيد ولكن تأتي الرياح بم لا تشتهي السفن.
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
مبارك عليكم ،،، مبروووووووووووووووووووووووووك
أهني كل من الأخوان والذين أستطعت أن أجعهم
- جلا الوليد الجديد
- عبدالمحسن بالمولودة الحلوه
- محمود محمد آدم بالولد
- مدثر أبا يزيد بالمولوده والدخول إلى عالم ناس الزقازيق أجدع ناس
- عزام البشرى بيت مال وعيال وألف مبروك يا حبيب الزواج
الدخول إلى عالم سودانيز - ناس الزقازيق أجدع ناس
- الريس معتصم سلمان جعفر
- نجاة حوفي - مشترك -
- زينب التجاني
- عفاف على ميرغني
- إبتهاج عبدالله بالباب عديل كدي
- مدثر أبا يزيد
- عبدالحفيظ عباس
- عودة الإبن الضال - الريس مبارك جادين -
يا عفاف ميرغني يا براية صور جده وين؟ لو موجودين عندكم نزلوها لينا ، عفاف والأولاد وحاج الركز كانوا معنا بجده وتعرفنا عليهم أكثر وأكثر .
الريس معتصم سلمان جعفر هو من جيل الزقازيق الذي سبقنا على الرغم من معاصرتنا له ومعتصم على ما أذكره كان رجل رقيق ونضيف شديد- أكثر من عبدالدائم- ووجيه وكانت تجمعنا بعض الملامح في الشكل أرحب بشدة بالريس معتصم لأنه يمثل جيل قوي من ناس الزقازق الأوفياء وهو رجل صاحب مبادئ وفهم ومعدن صلب وطيب المعشر ودمث الأخلاق ومهذب شديد أنا لا زكيه لكم ولكني أقول من واقع معايشتي له وكنت معجب جدا به وأدبه الجم ولم يتعامل معتصم معنا إلا بإحترام زائد وبسمه طريه جميل لك يا ريس كل الود والحب ،.
زينب التجاني - زوبا - تمثل جيل مختلف خالص على الرغم من أنها منظمة ولكنها كانت تجبر الآخرين بإحترامها وذلك بأدبها الشديد وتواضعها الجم وعدم تدخلها فيما لا يعنيها هكذا كنا في التجمع نشاهد زينب بهذا الأحترام ونحن نكسب جيلين مختلفين يحملون كل أدب وتواضع وأحترام ناس الزقازيق وكان العلاقات الثقافية تختار ناس الزقازيق في صندوف واحد لأن معظمهم طينة واحده لنعود للزميلة نجاة حوفي وإبتهاج عبدالله وأخونا المحبوب دوماً مدثر أبا يزيد والأستاذ عبدالحفيظ عباس والمحفوف بحب ناس الزقازيق هذه الأجيال الطيبه المهذبه سطرتها في الختام الأخت عفاف على ميرغني ولكنه مسك الختام نكرر الترحاب بالريس مبارك ود جادين ونقول عودة حميداً طيباً يا حبيب.
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
نرحب بدخول أخونا أحمد إسماعيل إضافة حقيقة لناس الزقازيق وبصراحة إستمتعنا بقصة عزالدين وهم ويظهر لسه عندكم كثير من القصص الجميلة ،، هل من مزيد.
عارف يا جلا وجلال أنا عامل نظرية ناس المواصلات - النظرية العكسي في ركوب البوكسي - تحاول تكرب البوكسي من جامعة القاهرة الفرع وتمشي الموقف وما تنزل وترجع أم درمان بس تدفع مرتين وتضمن ليك موقع في البوكسي ،،، أها يا جماعة أنا عملت للبوست ده نظام الكماشية علشان أجيب خبره لحدي الصباح أعلن ليكم وفاة المقالات الجميلة وما تركت ليكم فيها سطر واحد زحفت من الميل 61 تصاعدياً ومن الميل 70 تنازلياً يعني يا منصور بدل من جيب التمام وتمام التمام نجيب ليك زاوية الأرتفاع وزاية الأنخفاض وأنا على وشك سحق ضفتي الميل قبل أذان الصبح بكون هرستوا ليكم .
رشيد القوم أعزيكم في وفاة رجل السودان الكبير والعلم المعروف السيد/ أحمد السيد حمد رحم الله الفقيد وأسكنه فسيح جناته والهم أهله وذويه الصبر والسلوان .
وكان هذا الرجل يحب أهل السودان وخدمة أهله الطيبين ولي قصة معه فهو من أقنعني بالذهاب إلى الزقازيق حيث كنت أرغب في الدخول لكلية الهندسة ومجموعي كان يدخلني كلية تربية بجامعة الخرطوم وذهبت أوراقي إلى العلاقات الثقافية فتم قبولي في جامعة المنصورة كلية التجارة على الرغم من أني لم أكبت كلية التجارة وبفلسفة عمياء إذاء كان لابد من كلية التجارة ولماذا لا أذهب جامعة الفرع ولا شئ يدعو إلى السفر وتقدمت مره أخري بشهادتي للعلاقات الثقافية ولم أتقدم إلى كلية التجارة وتم توزيعي جامعة الزقازيق كلية التجارة رفضت السفر ولكن كانت تجمعنا معرفة عائلية به فأقنعني بالعدول والذهاب إلى الزقازيق للتجربة وطلب مني إذا لم تعجبك البلد ولا الكلية أرجع فوراً وتعال عندي ولكني لم أعود له بل واصلت المتعة الزقازيقية ،،، الا رحم الله هذا الرجل القامة الطيب السوداني الأصيل .
يا جماعة أيه الحلاوة دي الميل رقم 69 هو حقاً ميل مميز بقوة وأتمنى للزين يستمتعون بحلاوة المتابعة والقراءة المتأنية أن يعيدوا قراءة هذا الميل بتمهل ورويه حقيقة هذا أبداع وأقول لو لا رغبتي بالذهاب إلى الميل السابق لقرأته مره أخرى ،،،، شكراً لهذا الألق الجميل .
أحبكم جميعاً كان هذا شعار الشاعر مختار دفع الله بعد كل ليلة شعرية زقازيقية .
الحبيب الفنان محمد عيد ممكن أصحح مداخلة في الميل 69 حينما كنا في الجمعية العمومية في سينما
قصر الثقافة بالزقازيق وكان الشاعر الزقازيق حافظ أبو عاقلة ومقولته الشهيرة - أكتبي يا خديجة - وأظنها هي الأخت خديجة همام .
لكم كل الود
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
منور يا ريس وحمد الله علي السلامة
وإنشاء الله الإجازة كانت سعيدة ..
تحياتي لمني ميسرة اقصد مني يونس
والشباب الحلوين في إنتظار الصور
وعليك الله صور زراعة وبيطرة خليها
آخر حاجة . إنشاء الله بعد شهر ما
مستعجلين ليها ،
أما عن إشادة جلا بكتاباتي الأخيرة فيجب
علي أن اراجع موقفي جيداً فهذه الإشادة ذكرتني
قصة واحد من عندنا شغال في وزارة الخارجية مع
بداية الإنقاذ ، وكلما يظهر كشف الصالح العام
يعتقد أن أسمه في أول القائمة ، ويخيب ظنه حتي
عشية الكشف الرابع ، أرسل لصديقه خطاب قال له فيه
والله الكشف حايطلع بكره ولو إسمي ما ظهر ما عارف
أودي وشي وين من الناس . بعد إشادة جلا الأخيرة انا
ذاتي ما عارف أودي وشي وين من الناس ..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
يا ريس الليلة تتنوس برانا الجماعة كلهم ضربوا الرز باللبن
وشخره واحده ، وريسنا الثاني من أمبارح مسجل غياب ، لاقيته
في صفحة 69 زهجان ماشي علي الترعة يفرق شوية ، لكن أظنه
مرقه في منشية اباظة .. والله يا جماعة البورد دا من أرشفه
بقي كيف كيف كده ما عارف يا ربي يكون حصل ليهو شنو . بس
ما يكون جن زي جلا ، يا جلا صاحبك الكوتش الليلة لحسنا في
الحكاية ، الزول دا مش قال كل خميس في حكاية ، اها بكره مش
الجمعة ، عازين قصتنا ولا كل زول يشيل ليهو كم صفحة ويفرتك
يعمل ليهو بوست براهو إنشاء الله في الحتانة ، إنت يا جلا
قايل روحك بتعرف تجن براك ، هاك الجنينة دي ...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
Quote: وعليك الله صور زراعة وبيطرة خليها
آخر حاجة . إنشاء الله بعد شهر ما
مستعجلين ليها ، |
هلا بالحبيب الغالي صاحب الحوش الداخلي
زهير يا زناتي ، أنا الليلة سهران لحدي الصباح
داخل في حليفة كان ما كملت البوست ماني نايم تب
بس طلبك الفوق ده كان بيرضي كان رشيد القوم ومحمد عيد
وطارق جبريل أنا ما عندي مانع بس أنا دلوقتي نزلت الصورة .
كلها على الكمبيوتر من الكاميرا بس لازم شوية تظبيطات وتعليقات
وكمان ح أجنن ليك جلا وعبدالدائم جنس جن .
إنت عارف الليلة منى يونس شردت وفاتت تكتل ليها عرس سعودي وأنا مساهر
في البوست ومنتظر رنة الهاتف بس سهرانين حتى الصباح تحياتي للكتاكيت الصفار
ولفارس البوست الجديد - إبتهاج - وبدون حسد ربنا كمان يسهل علينا ونعمل فك إرتباط .
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
نصدح قليلاً مع الرائع الفنان عثمان حسين
كلمات الشاعر حسين بازرعة
الوكر المهجور
كانت لنا أيام في قلبي ذكرها
ومازلت أطرها
يا ليتنا عدنا
أو عادت الأيام
إن أنسى ما أنسى
ذكراك يا سلمي
في وكرنا المسحور والصمت قد عم
تحلو لنا الشكوى والحب والنجوى
لن أنسى نجواك والهمس والبسمة
وحرارة الأنفاس في قبلتي لما
ضمتك يمناي
يا سعد دنياي
وغفوت في صدري
نشوانه بالأحلام
* * * * * *
كيف أنس أيامي وفكرتي الكبرى
يا وحي إلهامي أنا همت بالذكرى
.* * * * * *
ذكرى لياليك،،،، في خدر واديك
الليل أهواه ،،،،، في شعرك الناعم
والنور والنوار ،،، في طرفك الساهر
لكن بتاعدنا ،،،،،،، دهراً وما عدنا
للوكر يا سلمى ،،،،، أو عادت الأيام
**********************************************************
عدنا وعادت الأيام لبوستنا العزيز ناس الزقازيق أجدع ناس
مهداه إلى أخونا الرشيد وهو عاشق معي للفنات الراحل عثمان حسين
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
سلام يا شباب
تم اطلاق سراح رئيس تحريرنا على اساس ان يحاكم بعد فترة
لا زال الامن يطوق مقر الجريدة
غدا ستكون لنا معركة قوية مع الداخلية وجهاز الامن
يعني ممكن الزول يتفلق عادي او يترحل
دعواتكم
يا سلام ياخي لمن يجيك صوت منصور من على البعد
اسعدني حقيقة سماع صوته ومواساته في ازمتنا
قلت لي صحافي مغربي كان بقربي:
لو ان لهذه الازمة حسنة فهي سماعي لصوت
احباب لم التقيهم منذ عقدين
لك الود كله يا منص
عودا حبيبا ريسنا ميسرة
بالله تعال كاشح من بيطرة وانت ماشي
لو غبت كتيييييير منكم غدا معناها الامور تعقدت
| |
|
|
|
|
|
|
|
|
|
Re: ناس الزقازيق ... أجدع ناس .. (Re: طارق جبريل)
|
Quote: عودا حبيبا ريسنا ميسرة
بالله تعال كاشح من بيطرة وانت ماشي |
أمرك مطاع يا ود جبريل ،،، مين يعصي أمرك يا حلو
على قناة الجزيرة كنت متابع اليوم الأزمة بتاعتكم
ربنا يستر وتنفك الأزمة بتاعتكم .
Quote: يا ريس الليلة تتنوس برانا الجماعة كلهم ضربوا الرز باللبن
وشخره واحده |
يا زهير ما لاقي لي زول أساهر معاهو بس قلت أمسك فيك شديد بس الظاهر
إبتهاج ناولتك كورة الرز باللبن ولحقت أمات طه وناس جلا وجلال .
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
إني أتنفس من تحت البوست ،،
إني أغرق أغرق أغرق ،،،،،،
يا جماعة مستعدين للإمتحان ،،، تم طرح جميع الصفحات السابقة
والمذاكرة كانت حلوه في كازينو النهر وأنا فهمت ناس عبدالدائم
كانوا بمشوا كازينو النهر ليه .
صلاة الصبح على الأبواب وأنا متابع البوست ده بالمداخلات علشان ما يحتل.
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
بزغ الفجر ،،، وغطس الليل
أصبح الصبح والسجن والسجان باقي
تحررت من عقدة الجماعة فاتوني وأنا مسطح ومش فاهم
نختم هذه الأمسية بقصة قصيرة عنوانها
أمسية تبحث عن أمسية
الأضواء ساطعة والناس كثر
ذاك يراقص تلك وآخر يسامر
وأصوات الموسيقى صاخبة وشخص يبحث عن صاحبة
وأنا واقف أراقب بصمت أريد أن أعرف
ماذا تريد أن تعرف؟ لا أعرف !
ابتسامات صفراء لا أحد يعرف أحد تقريباً !
تركت تلك الأمسية وخرجت مسرعاً إلى خارج المكان
لحقت بي فتاة !
إلى أين ؟
قلت لا أعرف
قالت هل أنت مطرود ؟
قلت لا
قالت من أنت ؟
قلت أنا صاحب الأمسية
اندهشت تلك الفتاة وقالت : كيف تكون صاحب الأمسية وأنت من دعوتني ودعوت كل هؤلاء الناس وأنا لا أعرفك وهم قد يكونون لا يعرفونك ! ثم تتركهم وتغادر ؟
إن هذه الأمسية اغرب أمسية شهدتها في حياتي !
لماذا ؟
فأجبتها لكي أعرف
فقالت ماذا ستعرف
قلت لها لا أعرف
فسألتها كيف جاءتك الدعوة وكيف قبلتها ؟
فأجابت لم أتلق دعوة بل جئت مع صديقة والصديقة جاءت مع صديقة
وكلهم جاءوا بهذه الطريقة
فقلت الآن فقد عرفت !
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
سلامات يا ناس
يا زهير ما لحستكم فى الحكاية لكن والله
انت عارف اخوك زى ما بقول جماع مصطفى
بتاع بيطرة...
احكى ليك نكتة ..واحد من اهل العوض بلدياتنا
يعنى...جالد رمضان...وهو مفلس لحدى ما الفلس
ذاتو زهجان منو...واحد سألو: قال ليه انت ليه
ما صايم رمضان؟؟ قال ليه رمضان ده انا اصومو
بلا طايوق...
الناس الصعبة عليهم النكتة دى يسألوا عنها
او نعتبرا مسابقة..
زهير اليومين ديل انا ما عندى طايوق
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
سلامات يا ناس
زهير والله العظيم عجبنى كلامك
الكتبتو عن نجيب حد الدهشة
والرجل رغم قربى الشديد اليه
الا اننى لا استطيع كتابة ما كتبته
انت...
جانى اتصال من زول مضطر اطلع ..
اجيكم بعدين ان شاء الله
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
صبحكم الله بالخير والسرور والعافية.. وجعل جمعتكم مباركة ودعواتك مستجابة..
الليلة يا اخوانا البراى الكبير ابو مهند جسمه سخن شوية ادهو ليه بالشفاء...
رحبوا معاى ترحيب حار بعودة الريس ميسرة والسيدة الاولى (منى يونس)ويا منى لازم تتعلمى البرى الشديد...
طارق جبريل قلوبنا معاك وقول (علمت ان رزقى لن ياخذه غيرى فأطمئن قلبى..)
يا بهجة يلا فرحينا وادخلى البهجة فى قلوبنا بمداخلاتك . زناتى انت بعد ابتهاج لكن وراء كل رائع مبدع امراة زقازيقية اكثر روعة منه.
فافى يا اخر عنقودنا الطاعم مزهلة... مزهلة... تحياتى للعجوز المحظوظ بيك وجيفاراتك الله.
يخليكم لبعض .
زوبة وينك انت الطال غيابك..
اين طعم التفاح ورائحة القرنفل النضييييييف ... تحياتى للبنات النضيفات الوارثات النضافة من جدهم الظاهر النضافة من جينات والدك الله يطول عمره ويمتعه بالعافية..
يا محمد صديق مشتاقين وانت خالدة دى ما تديها فرصة معاك سلامى ليها وللرهيب القالب الهوبة..
منص يا ضلى يا سندى تعرف انه البرى بتاعى دى بقى سمة من سمات الزقازيقيون شايفة كل واحد اشترى ليه براية سنينة..منظرين بريك الاحلى واطعم.بما انك ما بتعرف الا ال
cheese cackeتعال اشرب شاى المغرب معانا الليلة عاملنها فى البيت يعنى عااااااااااادى.ما فيها حاجة يا اخوانا منصور لما يمشى محل برة بعرف كل المنيو بس بحب الكيكة دى بس اسالوا الرشيد.
عيدنا مشتاقين عايزة لى درس خاص فى الفوتشوب .
مرحبا بعبد الحفيظ ومدثر وكل برالمة البوست..
يا جلا انشاءء الله اجن وازيد فى الجن بس انت يا احباب ابروووووووووووا. على فكرة طلعت بعرف البربور وبعرف اعمله كمان والله اسالوا رشيدالقوم..
وين شبوكشى يا جماعة؟
دمتم سالمين وما زال البرى جايكم.. برى برى ما شفتوا قبل كدة عشان الليلة الجمعة ..
نجاة حوفى
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
ساسلام يا ريس ميسرة على صورة استوديو مصر ... طبعا النضيف ما كان بحتاج يتصور فيه حتى بدون فلاش صورته نضيفة.. اما الجماعة التانين ذى الفولة المدمسة على قول محمد صديق استوديو مصر بقلبهم نضااااااااااف التقول وارثين جينات من عمى سيد احمدابو نضيف الزقازيق..
يا ميسرة اتذكر ونحن برالمة حضرت الجمعية العموميةفى المجمع الثقافى وكان معاى والدى الحبيب محمدحوفى اطال الله فى عمره ومتعه بالصحة والعافية.. وحافظ ابو عاقلة بقولته المشهورة اكتبى يا خديجة..فنحن برالمة الانتفاضة...بس فى واحد زعلنى بتعليقه لما قال ديل برلومات شنو البجيبوهم ابواتهم ديل...
تحياتى عبرك للشادى كمال الشادى الذى اتحفنا وارقص اذاننا دوما بشدوه وصوته الذى ما زال يطربنا
بالذات عند سماعنا لانا والاشواق...
راجعة ليكم
نجاة حوفى
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
ترحيب خاص بمبارك جادين
يلا خلينا نسمع الذكريات ونجترها ... فهى اجمل اللحظات.. اجمل مكان فى الارض جمعنابخير مجموعة من الرائعين اخرجت للناس...
حيوا معاى بروفسور محمد عبد الرحيم الذى تزكرته بهذه العبارة ..ابريكم بيها بسرعة كدة.. لما كنت بعمل فى الماجستير فى جامعة الخرطوم.. هو كان internal supervisor
جاء داخل المكتب كلنا وقفنا ليه ما عدا الرشيد كان جالسا... فساله انت جنسك شنو؟؟ قال ليه بكل فخر.. سودانى؟؟قال ليه قصدى قبيلتك؟ فرد عليه بديرى دهمشى.. قال ليه عشان كدا..
لما دخلت للمناقشة قال لى يا بتى اسالك شنو انت شديدة معرسة ليك بديرى دهمشى .. قال لى نحن خير امة اخرجت للناس ...ووواحد قريب الرشيد ادعى انه الرشيد لو قروشه حقت العرس كانت كاملة كان عرس ليه بديرية دهمشية ... ( يا اخوانا انا لحسه زعلانة من هزاره ده رغم انه بقيت انا قريبته اكثر من الرشيد بابكر... يا بنات الشيخ اكبر عقلى احسن ولا رايكم شنو)والله اهلى الجعليين يسمعوا الكلام ده يرجعونى بيت ابوى اخير ما فى داعى اخرب على روحى انا عندى وليدات زوبة اوعك تكلمى اعمامك..وولا عمى محمد عمر.
فانتم الزقازيقيون بكل هذا التنوع الثقافى .. الاجتماعى والاختلاف الفكرى ... التقينا وتحاببنا وما زلنا مترابطين لذا انتم الزقازيقيون الرائعون خير امه ومجتمع اخرج للناس..
بحبكم ذى حبى للبديرية االدهمشية
نجاة حوفى
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
جمعة مباركة يا أحباب
شكرا يا ريس على أغنية عثمان حسين...و شكرا على تلخيصك الرائع للبوست واكتشفت
ان ما قمت به للحاق بالبوست كان أمرا جميلا و أقترح أن نقوم كل فترة بتلخيص
أبرز المداخلات في الصفحات السابقة...يا ريس بتعرف البري المقنن..البري المقنن
زي سؤال نجاة حوفي ده...قالت لي أسأل الريس قول ليهو امات طه ديل منو و مالهم..
محمد صديق الطايوق ده عاد لمتين....ليك فترة من غير طايوق...انت عارف أنا أقول
ليك حاجى يا محمد...يا تقعد وتقبل بالحال كما هو يا تتخارج اليوم قبل بكره لكن
الجهجه دي طولت...أقطع العرق وسيح دمه...
اليوم يا جماعة أنا مآخد ساتر من نجاة حوفي...كا ما أجي ناحية الكمبيوتر تحمر
لي...فخليتو ليها...حسه هي مشيت تريض اصابعها فلقيت لي فرقه...لكن شكلها كده
ناوية تقلب ليكم الصفحة دي و الجاية..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
يا واهب الانسان اسباب الهدــدى
يا من بحمد العالمين تفــردا ..
لى عند بابك دعوة .. فيها رجاء ..
أحشر احبتى تحت عرشك ســجدا ..
ثم أســقهم ماء سلسبيلا ..
طيبا بيد الحبيب محمدا ..
" جمعة مباركة "
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
سلامات يا ناس
طارق جبريل ...ازيك
انت ياخوى مالك معاى مرتين اقول ليك
الله يغتى عليك يا وليدى .....وما تعبرنى
تشيل وتشكر فى ناس الخليج والسعودية
اقوم اخش ليك بى غادى فى الجانى منك...
وبرضو ترد على المتداخلين كلهم وبرضو ما
تعبرنى...
انت يا خوى :
ا شايفنى
2ما شايفنى
3 ما داير تشوفنى
4 كل ما ذكر اعلاه صحيح
==========================
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
يا محمد صديق انا قاعد في الشارع زي الشمشي
ما تاخد علي خاطرك مني
يا سيدي الله يغتي علي الجميع
وبجيك بهناك لانه في ناس كتار ما رديت عليهم وبحاول ارد حسب تسلسل المداخلات
يا سلام ياخي لمن يتصلوا بيك عفاف (فافي) وحاج الركز
يمين طولتلي شبرين لاااافوووووووق
الله يحفظكم يا احباب ويغتي عليكم وعلي وليداتكم
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد صديق)
|
ازيكم يا احلى ناس
عندما ادخل على هذا البوست والأجتماع الدائم الأنعقاد
ادخل وانا خالى ذهن فى الأحوال الغالبة
لم يسبق ان دخلت بخطة مسبقة لمداخلة ما
ولكن ما تكتبونه هنا دائما يوفر لى شرارة الدخول
وجمرة الكلام الملهلب الأولى
او قولوا
انكم دائما ما توفروا لى مشهيات ما قبل الطعام
فأبدا فى الأكل , واستمر فيه , حتى اذا ما وزنت نفسى
قبل البوست وبعده
قراءة وتفاعلا اعنى
اجدنى وقد زدت لى كيلو كيلوين
لذا فان طبيبى المداوى قال لى
اعمل حسابك من حاجتين
ما تمشى السوبر ماركت وانت صايم وجعان
ولا تقرا بوست الزقازيق على الريق
مجنون يا جلا
لبيقرا بوستيكم ده , وهو عامل ريجيم
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
لذا فان صينية الغداء نهار هذا الجمعة
بعد ان صلينا الجمعة , وضربنا قراصة امانى
الجنبها صحن السلطة المجيه
وتجنبنا السكريات والأملاح
وقمنا شبعانييييين نحمد الله
ولكن غلطتنا , جينا داخلين الحتة الفاخرة دى
البتبوظ اى ريجيم , وبتنسف كل احتياطات وتحوطات
لقينا كالعادة صينية تانية
* لقينا الريس قاعد لينا صباحى فى كازينو النهر
الراجل كان قاعد (اون كول ) زى ما بيقولوا الدكاترة وناس ورديات الليل (وهذا طبق تحلية مغرى لا يستطبع مقاومته مثلى)
* ثم وجدنا طارق جبريل جالسا على السلم (والعتبة قزاز والسلم نايلو فى نايلو ) , يتلقى الأتصالات من هنا وهناك , فوجد نفسه وقد (طال ليهو شيرين ) , مثبتا نظريتى فى خطا تداول هذا البوست على الجوع , مضيفا اليها خطا آخرا فى تداوله وتعاطيه على السلم وعتبات القزاز ايضا ) , ثم سأل سائل , ومال نتداوله متين , وتأخرت الأجابة الى اجل غير مسمى
*وجاءت الفارهة , اختى الصغيرة , بت شيخ اخى الفارع , المصاب بحمى الدبرسة , التواق الى حنان (التدثير والتزميل) , فبسطت الينا يديها (كلتاهما) , تدثرنا وتزملنا (كلنا ) , بأبسطة الجمال , ودثار الوسامة , والحفة (البساطة) , وبطاطين سهل الأمتناع , فكانت وجبتها الأضافية لنا مما لا استطيع جمعه هنا , ومما لا شك اننى راجع اليه حتما فى مداخلة آتية
*ثم كان محمد صديق ايضا حاضرا ومساهما بطبق من نكهته , طارحا سؤالا شهيا عصيا على كل الأجابات , فكيف يصوم من لا (طايوق له) ؟؟والطايوق هو المخ حينا , الدماغ احيانا , وهو قطعة الدهن التى تدعك بها (الدوكة ) دائما لتجهيزها لقراصة امانى مرة , ولكسرة خالدة مرات و اما بربور زينب النيجانى (شفى الله والدتها شفاءا لا يغادر سقما) , فليس له لا بطايوق محمد صديق , ولا ب chease cake
نجاة حوفى , ولا ب green خبراء جلال الأجانب , ادنى علاقة او نقاط تماس
وبس , راجع ليكم
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
سلامات يا ناس
يا منص ..مساء القراريص السلطتا مجيهة
وجايباها امانى ...
صينيتك انت دايمآ طاعمة ...صوانيها من نوع خاص
لاهى صحانة صينى ولا بلمين ولا حتى صحانة طلس...
امى الله يديها العافية تنادينى من جوة المطبخ
يا ولد عليك الله ناولنى صحن الطلس الفيهو الوردة
فى النص ده...
ماتحتويه الصحانة برضو مختلف ..لاهو قرين ولا بربور
ولا حاجات احمد اسماعيل ديك الدايرة تفكيك وشرح..
الكهربا....زز
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
عندما تقول -اختى الصغيرونة - نجاة حوفى اننى ضلها وسندها
فان طولى لا يقاس بالشبر يا طارق جبريل , ووزنى وحدة قياسه تصبح
اى شى غير الكيلو جرامات ووحدات الوزن الأخرى , حتى ان لونى يخرج من نطاقات
مدونة الوان قوس قزح ومشتقاتها , انا الذى وصفت لونى بالبرونز (جهالة) فتجىء
نجاة بت حوفى وتخرجنى من (ملة الألوان), فاختلاط الأسود بالأبيض يخلق الرمادى
وزواج الأحمر بالأبيض قد يلد (البرتقال) , مثلما يخرج (الليمون) من اقتران
اخضر الزرع (مع بياض الفراغ)
هل تكون المحصلة يا محمد عيد ان تكون
او ان اكون
بعض الرحيق انا
والبرتقالة انت
ولا يا ربى يا زهير
تكون
او اكون
ضلنا المرسوم على رمل المسافة وشاكى من طول الطريق
قول للبنية الخايفة من نار الحروف تحرق بيوتات الفريق
قول ليها ما تتخوفى
ده الماضى بيجيب الأمل , والأمل بيصبح رفيق
يا ضلنا
| |
|
|
|
|
|
|
|
|
|
Re: ناس الزقازيق ... أجدع ناس .. (Re: منصور عبد الرازق)
|
التحايا النواضر لاجدع ناس كافة الزملاء والزميلات الزقازيقيين
احر التعازي لكل من فقد عزيزاً والف مبروك لكل من وهبه الله خيراً و كل عام والجميع بخير
شوية كلمات ساسطرها بمداد يتقطر حباً و حنينا....الى الزقازيق ولا ادري ان كان هذا الحنين لذلك المكان بحدوده الجغرافيه.. ام لتلك المرحلة حيث كنا اوراقاً خضراء ندية وقوية ..عندما كان التفكير صاافي.. والاعباء لا تذكر .. ام لذلك الجو الاجتماعي الجميل ..
اياُ كان فحنيني للزقازيق لم يتقلص ابدا
اعترف انها اهم محطات حياتي حيث تشكلت شخصيتي وتعرفت عليها عن قرب ,
في الزقازيق يوما بعد يوم كانت المفاهيم عن الحياة تتسع لتصقلني وعشت واقعها يوما بيوم لذا تنامى احساسي بالانتماء لها ولاخوتي بها
رغم ان عالمي في الزقازيق كان مختصرا الى حد ما الا انني استمد منه كل المشاهد الملونه .. فتأتيني على خط ارتحال الذاكرة مواقف واحداث وصور وتداعيات وايام ليتها تعود..
..
اعلم انه لا يكفي ان نتذكر مشهدا حتى نستعيده فلا حيلة لنا في ذلك لكن حيلتنا في ان نخلق الجو المشابه ..
التقائنا اسفيريا باجدع ناس عبر هذا البوست يعيد لنا الماضي من اول{مش من الاول اوي}
لي عودة قريبا باذن الله
دمتم جميعا بخير وعافية
اختكم عرفة محمد سعيد
| |
|
|
|
|
|
|
|
|
|
Re: ناس الزقازيق ... أجدع ناس .. (Re: ميسرة سيد أحمد)
|
يا سلام ياخي
حباب عرفة
البوست نور
يا جماعة انا شغال ردود من الشارع قاعد في طوبة كمان
والله اتذكرنا الاجازة في السودن والقعاد في الضللة
هههههههههههههه
اسعدني تليفون جلا شديد
وحبيبنا عصام دهب
لا زلنا معتصمين اما المقر
وربكم كريم
| |
|
|
|
|
|
|
|
|
|
Re: ناس الزقازيق ... أجدع ناس .. (Re: طارق جبريل)
|
Quote: يا جماعة انا شغال ردود من الشارع قاعد في طوبة كمان
والله اتذكرنا الاجازة في السودن والقعاد في الضللة |
زول شغال ردود تلفونات من الشارع ...علماً بأن تلفونه مراقب ...
يعني زي نكون تجارة لاعبة مع ناس بيطرة ويقول لي راقب حاتم جبارة...ودي ساهلة ...
وعندما يأتي تلفون لأخونا طارق ...طوالي يقوم من الواطة ماسحاً يده الشمال بنطلونه الذي به بقايا آثار الطوبة القاعد فيها وكأنه نزل من مسطبة الجاويش ..
لأنو الحنان بتاعو جا من هناك ماشي ...قبل ما ناس جلا يعترو ليهو في السكة....
ثم يقول ليك بعد التضامن معه و ربنا يفك أسر الصحيفة ....طوالي يقول ليك...معاي منو؟؟؟
أقول ليهو ... معاك أنا ..
آي أنت منو؟؟؟ ...
أقول ليهو ..الله يغطيك يا ولدي...
يقول لي أووووو محمد صديق...
أقول ليهو كضباً كاضب...
يقول لي ..طيب منو؟؟؟؟...
أقول ليهو محمد آدم النور (جلا) ...
يقول لي.... الله يخت محنك...
قلت ليهو الحمد لله ما قلت لي الله يخرب مطنك.....
أقول ليهو أوصف لي المشهد الآن محل الحدث عشان ننقلو لوسائل الإعلام المختلفة....
يقول لي ....في ناس كتاااار ماشن قدامي أشكال و ألوان .....ثم يستدرك ....
يقول لي إنت داير تضامن معاي و لا داير تجيب لي الهوا مع الناس ديل و ناس الزقازيق؟؟؟؟.....وعارفك شوتك ضفاري...وتقوم تمسكني بيها...
أقول ليهو إنت قلت الروووووب.... لكني شاكر و سعيد جداً أن أسمع صوتك منذ 1988....و ربنا يغطيك يا ولدي....
يقول لي و أنا كذلك ثم شكرني و قال لي مع السلامة؟؟؟
وبيني و بين نفسي قلت هس يكون قاعد يقول و الله جلا دا صحيح مجنون
لكن المجنني ...الزول دا يكون قاعد تحت شجرة نيم و خاتي كمبيوترو في الواطة وشغال مداخلات؟؟؟
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
يا منص الظاهر في توارد خواطر اليوم بين أماني و نجاة في الغداء...بس لسوء
حظي ضارباني انفلونزا الجواميس اليوم و ما قدرت أجضم بمزاج...فلقد قضيت كل
اليوم مدثرا مزملا...حسه منتظر الكيك بتاع نجاة...نجاة حاولت تذكرك باليوم
المشينا فيه المول في أبوظبي و طلبنا الطلبات وقلت ليها صاحبي ده مفلهم من
يومو...
الليله أنا منزول ما مدبرس يا ياسر نجيلة عشان كده ما قادر أكتب...أحسن اتنازل
لي نجاة من الكمبيوتر أخايها تتفشى فيهو...
آآآآتش...آآآتش
ودعتكم الله
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
ازيكم 00
الليله الجمعة بعد ما غديت حاج الركز والجيفارات
قلت اخد لي لفة في الحيشان البرة ديل
مرة مرة القى لي جنس كتاحات
جيت جااااارية جري لحوشنا دا 00 ارتاح مع سماحة ناسي واخد نفسي
لقيت نجاة تبري البري السمح زيها 00 والرشييد يعطس 00 سلامتك
ومنصور الابنوسي متالق كتابة زي عادته
وعرفة في البوابة تسلم لسه مشتاااقين يا عرفة خلينا نسمع صوتك قبل كيبوردك
وجلا زايد جن (اريته جنون حاج الركز)
وجبريلا نحن معاك معاك 00 وحاج الركزبيقول ليك:
انت ماك عارف صوتك لما يجيني بطول لي شبرييييين
وانبسط لي انبساطي زايدي على القوانييييييييييين
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
احمد الحق البقوى
احمد الناس البهاتوا..
من وهج نفسوا البضوى لوليداتوا البتاتوا..
تحية حارة بعرفة واكيد اطلالتك لون جديد واضافة جديدة للبوتقة الرائعة.. ذى اضافة ادائك الفردى فى هذا الكورال ونحن نسمعك لاول مرة..
التحية موصولة للفنان زكى ود مدنى اينما ما كان...
وراجعة ليكم ..
نجاة حوفى
| |
|
|
|
|
|
|
|
|
|
Re: ناس الزقازيق ... أجدع ناس .. (Re: محمد آدم النور)
|
مرحب العزيزة أختكم عرفة محمد سعيد الشهيرة بالبت روفي
وتنضم عبر نفاج سيف النصر ... وعرفة لمن لا يعرفها خريجة
كلية الآداب قسم الإعلام ، وهي زوجة سيف النصر ، وعندها اللوتري
كمان ... أهلاً بالبت روفي وسلام مربع للجدعان ,, ويلا يا عرفه
إنطلقي بهذا البوست واريتو ما وقف إلا في صفحة مية ..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: زهير الزناتي)
|
يا اخوانا الرشيد بابكر ده بقى ما بتتبل فى خشمة فوله ... اى شى اقوله ليه اجى القاه منزلة فى البوست وبما ان عدد القراء كثير بقيت اخاف منه انتوا ما مشكلة ياكم انتواسترى وغطاى ومنصور سندى وضلى.. .. يعنى حسه بعمل لى فى كيكة ويدى فى قلبى كان كمان لا قدر الله فشلت .. اكيد ح يقول ليكم وانا خايفة على مستقبل امنية بكرة يجى واحد يخطبها يقولوا هى امها كيكة ما بتعرف تعملها ..وبهذة المناسبة احكى ليكم القصة دى.
اشوف الفرن وارجع ليكم..
نجاة حوفى ..
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
تسلموا جميعا يا شباب...محمد صديق..فافي و أبو الزوز...كنت متابع القرعة بتاعت
المدينة التي ستنظم الأولمبياد 2016 و أسعدني فوز ريو دي جانيرو...و جيت لقيت
القطيعة بتاعت نجاة فيني...أنا بعتذر من الكيكة دي من حسة بعد المقدمات دي...
أبو الزوز تعليقك ده الا ترسلو لي في الشريط الاعلاني بتاع النيل الأزرق مع الكريم
البطول الشعر داك مافي زول بجيب خبره.. هنا الجو ملغم...ده كان بيتنا الليلة في
البيت بعد الكيكه دي...الله يستر...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: سيف النصر محي الدين محمد أحمد)
|
اها يا جماعة جيت تانى ابراكم بالحكاية المخوفانى .. موضوع الكيكة والحمد لله عدى على خير...
واحدة قريبتنا وصاحبتنا شديد ... هى من اسرة ميسورة الحال الله عليها.. انسانة متواضعة جدا ورائعة جدا ولطالما وقفت معى مواقف لا انساها.. المهم اتخطبت بت عمها ولكن كل اسرتها غير موافقة على الخطوبة فسالتها شنو السبب .. قلت ليها هو شاب متعلم واهله ناس كويسين ومستورين ومحترمين .
فاذا بصاحبتى المتواضعة بدون ما تشعر ...تعبر بنزعة برجوازية
دايما كانت تخفيها حفاظا على مشاعر الناس البسيطين..
قالت لى تتخيلى انوا امه وابوه بركبوا الركشة!!!!
زهلت للسبب وضحكت كثيرا وقلت ليها يا الله ... طيب كان كدة ما مستقبل امنية بتى دى فى خطر ..
سالتنى ليه قلت ليها ياخى حبوبتها محاسن ( امى انا)بتركب الركشة مع الجمهور كمان يعنى ما طلب!!!
حيوا معاى امى الحبيبة المتواضعة ...لانها دايما بتفكر فينا وتستكتر على نفسها ركوب التاكسى او الامجاد طلب .. اقتصادا منها وتدبيرا رغم غلاء المعيشة فى السودان ..وحتى لا تزعجنا بارسال المزيد من المصاريف...لكى الحب والاحترام..يا امى..يا من علمتينى الصمود.. والصبر.والحب. والعطاء بلا حدود.. ادعو معاى كلكم الله يخليها لينا ويطول عمرهاوالله يقدرنا نرد ولو 1% من العملته عشانا..
حسه ترانى بعرف اعمل الكيكة اوعكم يا ناس الزقازيق يجى بعدين واحد من اولادكم يخطب امنية تقولوا لا لانه حاجة محاسن حبوبتها بتركب الركشة وكمان مع الجمهور .. والله اكلم ليكم سندى وضلى قااااااااااعد..
بحبكم حب امى لركوب الركشة
نجاة حوفى
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
كلكم يعرف الردود التقليدية للمشاهير من لاعبي كرة القدم و الفنانين...عندما
يسالون عن بداياتهم فهي دائما ما تكون كرة الشراب للاعبي كرة القدم و الدورات
المدرسية بالنسبة للفنانين....
كذلك المقولة الشهيرة (تعلموا الحلاقة على رؤوس الأيتام)...بالنسبة لنجاة حوفي
فلقد كنت كرة الشراب..الدورات المدرسية واليتيم فيما يختص بالطبيخ...
أوعز بعض المقربين لنجاة في بداية حياتنا الزوجية ان أقرب طريق الى قلب الرجل
هو عبر معدتة...فقررت أن تسلك ذلك الطريق الوعر المحفوف بالمخاطر...خاصة ان
والدتها الخالة محاسن علمتها الصمود والصبر و أكلتين تلاتة بس...
قررت نجاة توسيع مداركها في الطبيخ و صقل مهاراتهاو مجارات أشهر الطباخين في
العالم...فبدأت بالأكلات المحلية و قررت أن تبدأ بالبامية المفروكة و ذلك باستخدام
وسائل حديثة متمردة على الوسائل التقليدية وصوت المفراكة الشهير مع الدبلة...
تك تك..تك تك...تك تك...استخدمت نجاة البرستو في عمل المفروكة...كانت النتيجة
مفروكة السرور...قدمت لي نجاة المفروكة في الغداء...الطعم ما بيغباني لكن
الشكل ده ما شفتو قبل كده...انتي يا نجاة دي شنو...دي بامية مفروكة...بالله عليك
و أنا أقول الطعم ده ما غريب على...باستخدام البرستو...البامية لحقت أمات طه
و دي أجابة على سؤال نجاة عن أمات طه...فلقد كانت عبارة عن ويكة أو أم رقيقة
و حبيبات بذور البامية مطفحة بي فوق...طبعا يا جماعة للأمانة شتان ما بين
تلك البامية وهذه التي تلذذنا بها من يومين...ما قلت ليكم أنا كنت كورة الشراب..
المحاولة التانية كانت كيكة اسفنجية...المهم بعد مجهود خارق خرجت الكيكة شبهتها
أنا في ذلك الوقت بالسفنجات الصينية الحمراء ديك...لكنني كنت حكيما و قلت كلاما
طيبا في حق تلك الكيكه خوفا من أن يطاح برأسي بتلك الكيكة..
أما الشيس كيك بتاعت الليلة و ما أدراك ما الشيس كيك...فلقد كانت رهيييييييبة
ويا زهير انتظر الشريط الاعلاني في قناة النيل الأزرق...
مهند عبر عن اعجابة الشديد بالكيكة أما أمنية فلم تكملها بحجة أنها تجب الآيس
كيك أكتر...اجابة أمنية ذكرتني بقولهم لي في عيد ميلادي الرابع و الأربعين بأنك
يا بابا زي Cartooon net work و ذلك للتوافق بين عمري ورقم تلك القناة في الرسيفر
اعتبرت ذلك اطراءا رغم انني لم أفهم المقاربة...
| |
|
|
|
|
|
|
|
|
|
Re: ناس الزقازيق ... أجدع ناس .. (Re: الرشيد بابكر)
|
| Quote: اها يا جماعة جيت تانى ابراكم بالحكاية المخوفانى .. |
أنا طبعاً متوقع كدا من يوم الخميس ...وقلت لي الجماعة ديل ...يعني عارفين البرييييي بتاعك دا...و بدون مجاملة و الله لهو جميل يعني حنكون أخدنا زوادتنا لفترة أسبوع قادم ....دا لو الزول الحنين ما خلى ليك الباسويرد| Quote: قالت لى تتخيلى انوا امه وابوه بركبوا الركشة!!!! |
أظن خطيب الزول دي دس منها حاجة مهمة ...وهي إنو الركشة دي زاتها حقتو...لزوم زيادة الدخل
| Quote: حيوا معاى امى الحبيبة المتواضعة ...لانها دايما بتفكر فينا وتستكتر على نفسها ركوب التاكسى او الامجاد طلب .. |
إنت يا نجاة ما تحي معاي أمي الحبيبة المتواضعة ...البتمشي كداري للمناسبات البعيدة عشان حق المواصلات دا تسالف بيهو صحباتها
مرة قلت ليها يمه إنت مجنونة تمشي المشاوير دي كلها بي كراعك؟؟؟
قالت المابعرف يقول عدس
طبعاً العدس دا ما بياكلوهو إلا المجانين
| |
|
|
|
|
|
|
| |
منصور عبد الرازق
عبد الدائم سيد أحمد
الرشيد بابكر
وليد عبد اللطيف
ياسر نجيلة
عفاف علي ميرغني
سامي عبد الوهاب إدريس
عصام دهب
محمد آدم النور
ميسرة سيد أحمد
محمد صديق
جلال عثمان
أحمد إسماعيل
محمد عيد
زهير الزناتي
طارق جبريل
فيس بوك
تويتر
انستقرام
يوتيوب
بنتيريست