|
|
 Re: ناس الزقازيق ... أجدع ناس .. (Re: جلال عثمان)
|
صباح الخير ... إنشاء الله خير لا ريس ولا عامة الشعب الزقازيقي ، غابت كل الألقاب مشاغب البوست .. شاعر البوست.. صاحب الحوش... وصاحب المفاجآت المتصابي... والمجموعة الذهبية...وين الحلوين وين راحوا.
يا أحمد التجاني لكن ما بالغت ، غايتو واجب الضيافة باقي فيه يوم واحد... وبعد كدا ما تلوم إلا نفسك وما تفتكر الجماعة الحرشوك ديل حأينفعوك ، ديل ضيعوك وودروك .. وإنت ما بتعرف صليحك من عدوك.. يا ضيفنا لو زرتنا لوجدتنا نحن الضيوف وأنت رب المنزل...لكن إنت بقيت رب ضارت نافعة!!!
| |
 
|
|
|
|
|
|
|
|
Re: ناس الزقازيق ... أجدع ناس .. (Re: البادي النور)
|
والله كتر خيرك يالبادي
وان شاء الله صفحة جديدة عامرة ...
بالحب ....
والحنان ....
وال 21
والانتفاضة ..... ذاتووو
طبعا الكلام الفوق ده كلامي لاكن بلسان محمد الهادي
----------------------------------
بعدين ياخ عاوز اقول ليك حاجة
بالله مش سيد الحوش ده بالغ (وش بيغمز ويتاوق)
معقولة بس ... طول الغيبة!!!!
بعدين تعرف ياالبادي ميسرة ده الايكون مشى القاهرة
يمكن في اجتماع ل.س مركزية ولاحاجة
اما شاعر البورد فأكيد سوف يطل بالجديد المثير
البادي انت نمت ولا شنو.....
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
أخوي جلال صباح الخير ... أنا ما بنوم لكن يا خوي بديها متاوقة في الصباح الباكر نظام رفع للبوست ووضعه في مكانه الصحيح في الصفحة الأولى للحوش الكبير عشان ناس دودي ديل باقي لي حناكيش وما عندهم عضلات تبش يشيلوا بيها البوست التقيل دا , وبعد كدا بنشوف شغل الكفيل وزحمة الدنيا ولو ربنا قدرنا بنتاوق آخر اليوم متاوقة على خفيف كدا، لكن يا ود أمي أكتب وتاوق ونحن بنشد من أزرك. والله يديك العافية.
| |
|
|
|
|
|
|
|
|
|
Re: ناس الزقازيق ... أجدع ناس .. (Re: جلال عثمان)
|
يا أبو الجل صباح الخير
البادي (والبادي أظلم) دا رغم إتفاقية وقف الإعتداءات لكن مداخلته الصباحية دي عاملة زي بيضة الجدادة ، تاني ما في ليها أخت ، لكن الحق لي الله دائماً بتكون شحمانة ، بمناسبة الإنتفاضة و21 أكتوبر صديقنا عوض المفتاح ألقي القبض علي عصابة نسائية خطيرة ، شفت التخصص دا كيف ، وإذا عملوا شرطة متخصصة للجرائم النسائية خلي بالك محمد الهادي حا ياخد لواء مباشرة ...
أعمال اللجنة التنفيذية تسير علي قدم وساق (والعبارة دي بالتحديد غير دقيقة وإذا ما تمعنا فيها نجدها تعني أن الأمور تسير ((بكراع واحدة)) أي بلغة أوضح عرجاء ودا موضوع تاني نرجع ليهو في سانحة أخري)) ستنطلق في الايام القادمة برامجنا بعد أن تجاوزنا مرحلة التخطيط والتفكير وشدوا أوتار الحنين ، ولا زلنا في إنتظار مساهماتكم في الصفحة ....
التحيات للجميع دون فرز ،،،
| |
|
|
|
|
|
|
|
|
|
Re: يلا نكمل مشوار الدار ،،،، ناس الزقازيق ... أجدع ناس .. (Re: البادي النور)
|
صباحك نور ،،،، يا بادي ،،، كلك نشاط
وحيويه وشباب،،،، وصباح أهلناالزقازيقاب
نتمنى لأبنائنا الطلاب نجاح في الدراسة
حيث أنهم يجتهدون في المذاكرة عندنا هنا
لإنتهاء التيرم الأول .
تحياتي للشباب النشط بقيادة البادي وجلال
ويا جماعة عثمان الجيلي ما عارف يدخل حتى
يوم أمس ويبلغ الجميع سلامة،،،،،،،
عودة لموضوع إيجار الدار من المفروض
تكملة المبلغ المتفق عليه ،، ونحاول
أن نكمل المشوار ياأحبابناالمسؤولين
(جلال ، عبدالدائم ، عصام دهب) وعثمان الجيلي
أفاد بأنه سوف يكمل مجموعته المكلف بها،،،،،،
ويا حبيبنا زهير هل توصلت هيئة المحلفين
لقرار بخصوص الدار ،،،،
========================
يلا نكمل مشوار الدار
| |
|
|
|
|
|
|
|
|
|
Re: يلا نكمل مشوار الدار ،،،، ناس الزقازيق ... أجدع ناس .. (Re: ميسرة سيد أحمد)
|
يا جماعة الدعوة موجه للجميع والهدف منها كما يقول صاحب الموقع
الجديد زهير الزناتي:-
Quote: هذا القروب ليس بديلاً عن بوست ناس الزقازيق أجدع ناس
ولكنها محاولة لإشراك أكبر عدد من ناس الزقازيق في لمتنا ،
لنعرف أخبارهم وأحوالهم من خلال هذه النافذة وهي بالتأكيد
في متناول كل من لديه علاقة بالنت ، فهذه المحاولة لجمع أكبر
عدد من الشباب ونتمني أن تتحقق أهدافنا هنا وهنا |
والناس الموجودين على الفيس بريسلي facebook هم :-
عبدالدائم ، جلال عثمان ، زهير ، إبتهاج ، طارق جبريل
ياسر نجيله ، ميسرة ، عمر بسكو ، رجاء الطيب عثمان ، رفعت سالم
وفي إنتظار المدد ، وإذا إتهكرنا في البوست نكون على تواصل
في الفيس ،،، يلا أضيفوا إسماؤكم .
شكراً يا زهير على المعلومات القيمة عن جامعة الزقازيق
وشكراً على صورة الأستاذ الدكتور طلبه عويضه
| |
|
|
|
|
|
|
|
|
|
Re: يلا نكمل مشوار الدار ،،،، ناس الزقازيق ... أجدع ناس .. (Re: جلال عثمان)
|
يعني يازهير ....
نقول انو الفيس بوك ..... طفش الناس من هنا
على كل حال يجعلوا عامر ....
كان هنا كان هناك
عبدالدائم ...
انت النكتة القالا صلاح جلال دي مابتكون سمعتها
قال ليك بعد انقلاب الانقاذ في 1989 تم اعتقال كل قيادات
الاحزاب والنقابات ورموز مايو السابقين .... وهلمجرا..
المهم الجماعة في كوبر مجتمعين وهاك ياإدانة وشجب وآليات عمل
وخلافه وترتيب لعودة الديمقراطية المسلوبة
اها قال ليك زين العابدين محمداحمد عبدالقادر (رحمة الله عليه)
قام ناطي من هناك قال ليهم ياجماعة ... دقيقة...
نحن المرة الفاتت (مايو) جيناكم من خور عمر قعدنا سطاشر (16) سنة
اهه.... المرة دي جاكم عمر سيد الخور ذاتو والله يقعد اربعين سنة...
دحين والله انا قاعد ليكم هنا.....
------
لامن العشرين سنة الباقية دي تخلص
قول (2)
| |
|
|
|
|
|
|
|
|
|
Re: يلا نكمل مشوار الدار ،،،، ناس الزقازيق ... أجدع ناس .. (Re: حيدر حسن ميرغني)
|
الأعزاء حيدر وجلال
تحياتي
نؤكد مرة تانية إن قروب الفيس بوك ليس بديلاً عن بوست ناس الزقازيق أجدع ناس وإنما هي محاولة لجمع ناس
الزقازيق في مكان واحد خاصة الذين ليست لديهم عضوية في سودانيز أون لاين ، ولازم الناس تستفيد من التكنولوجيا في كل أعمالها ، والفيس بوك موقع ذو إمكانيات جبارة يمكننا الإستفادة منه لأقصي الحدود ، ومتفاءل أن يكون هذا القروب رواب للمة كبيرة جداً خاصة الذين لم نلتقيهم منذ سنوات طويلة
محبتي الأكيدة للجميع ...
بالنسبة للغياب من هنا ، هي دورة كل فترة نتمني أن تقصر مدتها هذه المرة ويعود ناس الزقازيق أكثر نشاطاً وحيوية ، والأخبار الجميلة ستتالي عليكم في مقبل الايام ، ويلا شدوا أوتار القلوب مرة أخري ...
ومرحب بيكم هنا وهناك
| |
|
|
|
|
|
|
|
|
|
Re: يلا نكمل مشوار الدار ،،،، ناس الزقازيق ... أجدع ناس .. (Re: زهير الزناتي)
|
كلام تمام يازهير
حقو نحاول بقدر الإمكان نجيب عضوية لعدد مقدر من الاخوة والإخوات بأي طريقة
بعدين إنت وصالح تبلدينا عندكم إمكانية مخاطبة بكري مباشرة خلال تواجده بطرفكم إن شاء الله تعملوا ليهو
غندهار براكم
بالتأكيد سيحترم طرحكم لأنكم من عتاولة المنبر بالإضافة لكون مجموعتنا دي الأكثر إنضباطا وليس من بينهم من
تعرض لتوقيف من قبل
لو كل 3 شهور جبنا واحد\ة نكون ماقصرنا
| |
|
|
|
|
|
|
|
|
|
Re: يلا نكمل مشوار الدار ،،،، ناس الزقازيق ... أجدع ناس .. (Re: حيدر حسن ميرغني)
|
حنين ... ياحنين
سلامات وشوق مطر ...
تعرف ياعزيز والله الواحد عاوز الناس كلها تتلم هنا
وهناك ... والدواخل معبية حاجات كتيرة ... والاماني
اكبر واكتر من اجترار الذكري والذي مضى
بس عارف موضوع النسب ده وقع لي في جرح (وش ممكون)
كتر لينا من جنس دا ياحنين خلينا نتخارج من الدامات ديل ياخي
---------
يازهير جروب الفيس بوك ابداع عديل كدة
وفكرة مابتجي الا من انسان مهموم بهم هذه القبيلة (وش بردان) من التلج الكسرو
لذلك شددنا من ازرك ... ومن هنا ندعو كل الاخوة للانضمام
خصوصا الذين ليس لديهم عضوية في الحوش ده
بعدين ياخ اقتراح حنين ده والله ممكن تحقيقوا
لذلك اقترح انو دايما ناس الحوش يزيلوا مداخلاتهم
بالايميل حتى يتواصل كل من هو خارج الحوش
وكمان تكون عندنا داتا ونحن (الاعضاء) نطلب لهم العضوية من بكري
رايك شنو؟؟
[email protected]
-------
جاييك راجع لي موضوع اللجنة العرجاء
| |
|
|
|
|
|
|
|
|
|
Re: يلا نكمل مشوار الدار ،،،، ناس الزقازيق ... أجدع ناس .. (Re: عصام دهب)
|
غدا السبت الدعوة لجميع زقازيقي الداخل والخارج لقندهار
احتفالاً بالإمريكي حاتم جبارة ، للآن الدعوة وصلت للآتية أسماءهم :
خالدة قسم الباري
محمد صديق
رجاء الطيب
نادر فاروق
ابتهاج عبد الله وزوجها
محمد حسن عبد السلام
عمار رحمة الله
المحتفي به حاتم جبارة
العم شاويش
الجد صديق الصادق
عبد الرحمن عشي
البادي النور
وكذلك الدعوة مفتوحة للجميع كل من لم يسمع ذنبه علي من سمع ولم يخبره
عبد السميع ضروري تشد لي سلك للأهمية والتنسيق
| |
|
|
|
|
|
|
|
|
|
Re: يلا نكمل مشوار الدار ،،،، ناس الزقازيق ... أجدع ناس .. (Re: طارق جبريل)
|
يا ود جبريل تعرف أجمل الحاجات وأطعمها هي تلك التي تتعمل بخيانة
يعني مثلاً حاتم جبارة يوعدك أنو تجوا السودان سوا يقوم يعمل خيانة يجي براهو
حا يستمتع جداً بالإجازة ...
نقوم نمشي قندهار ما نعزمك ، تطلع الشية بت كلب واللمة حلوة
وعلي ذلك قس ...
نتيجة حتمية :
أعمل أي حاجة بخيانة .... تطلع أحلي مما تتصور
| |
|
|
|
|
|
|
|
|
|
Re: يلا نكمل مشوار الدار ،،،، ناس الزقازيق ... أجدع ناس .. (Re: جلال عثمان)
|
ويمتد التواصل الجميل بيننا
ادناه رسالة من الزقازيقي القامة
عثمان الخير الجدي
Quote: الغالي :جلال
عبرك التحايا القلبية لكل قبيلة الزقازيقاب في كل أرجاء المعمورة.
والتحية لسودانيزاون لاين ولكم أنتم الأعضاء الذين اتحتم لنا هذه الفرصة الرائعة لمتابعة اخبار اخوة لنا لطالما اشتقنا لمعرفة اخبارهم
وبالجد هذا البوست اصبح لنا دوحة وارفة نستظل بظلها كل يوم ولوحة جميلة يجب مشاهدتها بشكل يومي ,, وحتى في بعض الأحيان لما الواحد فينا يجد البوست غاطس بتمنى لو يقدر يرفعة ويخليهو دائما في العلالي,لكن البركة فيكم أنتم الدماء الجديدة فالتحية لك وللريس ميسرة والبادي ومن قبل لسيد الحوش الزقازيقي عصام دهب وللدينمو المحرك الزناتي وللوسيم ابوالسيم سامي عبدالوهاب,,,,, وعبركم ارسل حبي الازلي لتلك المدينة الرائعة الزقازيق التي وحدت قلوبنا للابد
عثمان الخير الجدي |
| |
|
|
|
|
|
|
|
|
|
ناس الزقازيق ،،، أجدع ناس (Re: ميسرة سيد أحمد)
|
عثمان الجيلي ما زال خارج الخدمة
مؤقتاً حتى اللحظه ما قادر يدخل
على الرغم من جهودنا المبذولة
وبمساعدة جلال عثمان،،،،
الظاهر إنو الراجل اتهكر،،،،،،،،
الحبيب عصام الدهب والغالي ديدو
الإمتحانات على وشك الإنتهاء وتبدأ
إجازة التيرم الأول ،،، عايزين
نضع اللمسات النهائية
لرحلة مكة والعمرة،،،
من فوائد الفيس بريسلي وجدنا
ناس لينا سنين طويلة لم نتكلم
معهم ، شكراً يا رفعت سالم وشكراً
عمر بسكو وشكراً للزناتي والفيس بوك
| |
|
|
|
|
|
|
|
|
|
Re: ناس الزقازيق ،،، أجدع ناس (Re: زهير الزناتي)
|
يازهير ....
اول حاجة ماشاءالله لمة قندهار تمام
بس لازم تجيب الصور هنا برضو....
بخصوص اللجنة التنفيذية
---------------------
لاحظت كما لاحظ غيري الكثير من ان الامور لاتسير بنفس الهمة والنشاط الذي تبدونه
وكأن باقي اعضاء اللجنة التنفيذية لا يعنيهم الامر من قريب او بعيد.
اؤيد تماما مبدأ المنهجية في العمل العام، وان يكون للجنة التنفيذية سكرتارية
او ناطق رسمي ولكن ان توكل كل الاعمال لعضو واحد (نثمن تماما الدور الرائع الذي يقوم به)
فهذا هي بعينها اليد الواحدة التى لاتصفق. وهذا ما عنيته بإطلاق لقب العرجاء على اللجنة
زهير ... نعول كثيرا على امر هذه الرابطة ولنا فيها (نحن ناس الرياض بالذات) مثالا يحتذى
ولكن ما نراه - بطء سير العمل / عدم حصر للعضوية/ .... وغيره ... سوف يحط من معنويات
رابطتنا الوليدة (او سمها فرعية الرياض اذا شئت) ونحنا ماصدقنا ان تفاعل معنا اهل الزقازيق
هنا ... وكان السبب دعم الرابطة الام بالسودان
اها اعضاؤكم هنا سوف يسألون - ولهم الحق في ذلك- ماذا تم حتى الآن؟؟
اتمني يازهير ان لا يؤخذ حديثى بمأخذ المحاسبة او غيره انما قصدت فقط تحفيز الهمم
وتحريك السكون الذي يلازم عمل الرابطة (على الاقل من بعض اعضاء اللجنة التنفيذية)
وتأكد تماما يازهير ان ناس الرياض (وأستأذنهم في التحدث بأسمهم هنا) جاهزون....
لتفعيل ودعم ومناصرة كل المشاريع المقترحة من اللجنة التنفيذية ...
ومعا من اجل الرابطة
وماقصدته يازهير هو دعوة للنقاش هنا...
اها يلا...
وناس الزقازيق ..... أجدع ناس
| |
|
|
|
|
|
|
|
|
|
Re: ناس الزقازيق ،،، أجدع ناس (Re: جلال عثمان)
|
العزيز جلال
تحياتي
كلجنة تنفيذية نتقبل كل الأراء والإنتقادات التي توجه لنا ، لأن النقد السليم يؤدي إلي تصحيح المسار
والنقد غير السليم نرد عليه حتي تستبين الرؤية لصاحبه إذا ما كانت رؤيته غير سليمة ..
بخصوص اللجنة التنفيذية الحالية أود أن أوضح لك ولبقية العضوية الموجودة داخل وخارج السودان عدد من النقاط :
أولاً : تم أختيار هذه اللجنة قبل عام وعدة أشهر ، قابلت اللجنة من الصعاب المالية ما قابلت ، وكل عمل لا بد له من تمويل ، ومن المفترض أن تقوم اللجنة بتوفير التمويل كأحد المهام المناط بها ، ولأسباب ذاتية وموضوعية فشلت اللجنة في تسيير أعمالها طيلة الفترة الماضية .
ثانياً : في اجتماع مكاشفة قبل شهر من الآن ، وضعت اللجنة الأشياء في نصابها الصحيح ، وتم استبعاد بعض الأعضاء الذين لم تسمح لهم ظروفهم بمواصلة النشاط . وتم تصعيد أعضاء جدد وتم إبلاغهم بذلك ، فإذا ما أعتذروا ستم تصعيد غيرهم .
ثالثاً وضعت اللجنة خطة أدرجتها في هذا البوست يجب أن تنفذ في فترة اقصاها 15 مارس المقبل ، وعلي ضوءها يحدد عطاء الأشخاص ، وأي شخص تري اللجنة أن ظروفه تحول عطاءها ويتم تصعيد أعضاء جدد لتكملة الدورة بعد دراسة وافية في الجمعية العمومية التي حدد لها 15 مارس القادم .
رابعاً : تم تكليف كل أعضاء اللجنة التفيذية بمهام في البرنامج الموضوع ، دون أن يعتمد العمل علي شخص محدد بعينه ، فإذا ما كان بعض الأعضاء لديهم صوت في المنتديات الإلكترونية وغيرها فهذا لا يعني بأنهم من يعمل دون سواهم .
خامساً : تم تحديد البرنامج كالآتي :
(1) الدار : تم تكليف زهير الزناتي + صلاح عبد المجيد بأمر الدار ، وقد قامت اللجنة بمعاينة عدد من الدور وتم الإتفاق علي أحدها وذلك لإعتبار قيمة الإيجار ، إلا أن هنالك عرض لدار أخري في مكان أفضل وبمساحة أكبر وهي جديدة تماماً إلا أن سعرها مبالغ فيه ، ولازال لدينا عشم في أن يتنازل صاحبها للسعر المعقول في الأيام القليلة القادمة ، وإذا ما لم نتفق معه في خلال أقل من اسبوع سيكون الدار في أيدينا في كل الاحوال .
(2) ليلة شعرية : تم تكليف محمد صديق بالليلة وقد أتفق مع 4 شعراء كبار هم سعد الدين إبراهيم ، هلاوي ، أسحق الحلنقي ، والشاعر عبد الله النجيب ،
(3) ليلة علمية : يتحدث فيها بروفيسر منتصر الطيب وهو العالم الذي أجري بحث عن جينات السودانيين كأول بحث سوداني في هذا المجال وهذا العالم خريج الزقازيق وسيتحدث معه بروفيسر جعفر ميرغني وقد تم تكليف فدوي أحمد عباس ومعاوية يحيي بابكر بتنسيق الليلة وقد أنجزا مهمتهما .
(4) تم تكليف معاوية يحيي بأمر القاعة التي ستقام فيها الليلتين أعلاه ، وقد أتفق مع قاعة الشارقة ، ليومي 17 و 18 وقد تم منحها لنا مجاناً ، إلا أن أعتذار قبل عدة أيام من إدارة القاعة بحجة الصيانة التي أصر عليها مهندس القاعة ، وهم علي أستعداد لترحيل الموعد حتي أول مارس قادم ، وقد قام معاوية بعمل اتصالات عديدة لتوفير بديل ، وقد تم وعده من اتحاد الزراعيين ، وفي الاجتماع القادم للجنة التنفيذية سيتم حسم امر الموعد تماماً ، للتفرغ لعمل الدعوات والإعلام لليالي المشار إليها .
(5) هنالك حفل جماهيري لدعم الرابطة تقيمه البلابل واتخذ المفاوضات معهن وقت طويل وقد تم الإتفاق النهائي علي إقامة الحفل يوم 27 فبراير الجاري بنادي الضباط ، وستنزل الدعوات أعتباراً من الأسبوع الجاري في وسائل الإعلام المسموعة والمقروءة والمرئية ، وفي شوراع العاصمة . وقد تم تكليف كل من زهير + نهلة + عبد السميع بالأمر
(6) العضوية : كل عضو أتصل أو حضر أي من فعاليات الرابطة فأسمه مسجل وعنوانه ورقم تلفونه ولدينا الآن ما يزيد عن بيانات الخمسمائة عضو .وهو رقم يشكل فقط حوالي 10% من أعضاء الجمعية . ونقر بأن قصوراً يعتري هذه المسألة .
(7) المالية : هي الأزمة الكبري للجمعية ، وقد فشلت اللجنة التنفيذية حتي الآن في التعامل مع هذا الأمر ، وأعتقد وكذلك أعضاء اللجنة التنفيذية بأن معالجات جدية يجب أن تتخذ في هذا الأمر مثل تفعيل الإشتراكات في الداخل والخارج ، وبكل التأكيد فأن الدار سيعمل علي تجميع العضوية وبالتالي الإشتراكات . وكذلك الفعاليات المتعددة تقوم بنفس الغرض . وهذا يشجع علي إقامة مشاريع استثمارية مثل الحفل الجماهيري أعلاه .
(8) التأمين : قامت الجمعية بالإتفاق مع شركة شيكان لعمل تأمين طبي شامل كل العلاج ( كشف ، دواء ، عمليات ، تنويم ، أسنان ، نظارة .... الخ) في أرقي مستشفيات السودان ومصر إن دعا الأمر وكذلك تأمين للحياة لكل الأعضاء ، وسنطرحه في الفعاليات القادمة وفي كل منابرنا الإعلامية في الأيام القادمة .
(9) الصفحة الإعلامية : تم الإتفاق مع صحيفة السوداني علي صفحة شهرية ، ونحن فقط في إنتظار أكتمال المشاريع أعلاه ومواعيدها النهائية لتبدأ الإنطلاقة الحقيقية للرابطة ، ويمكننا أن نصدر صفحتنا شهرياً ، وتكون دائماً مليئة بالأخبار المفرحة للعضوية والمواضيع التي تهمنا ،
هذه بعض النقاط علي عجالة وكلما سنحت الفرصة لتوضيح بعض الأشياء سنقوم بإيرادها ، ونشكر الأخ جلال علي ما ذكره ونتمني كل الأعضاء أن يحذو حذوه ويدلو بدلوهم في الأمر ، واللجنة ترحب بكل الإنتقادات والإقتراحات والمشاريع
وللجميع شكرنا
زهير الزناتي
الأمين العام
| |
|
|
|
|
|
|
|
|
|
Re: ناس الزقازيق ،،، أجدع ناس (Re: زهير الزناتي)
|
زهير ... يديك العافية على المداخلة "الشحمانة دي"
وانا والله في غاية السعادة لأن الامر بهذه الكيفية
وعلى مستوي الطموحات ....
ولأننا نطمع في المزيد سوف اعود لمداخلتك اعلاه سطر سطر
وحرف حرف ...
بالآراء ... والإقتراحات ... والنقد الهادف الهادف الهادف
ومن هنا ادعو كل ناس الحوش لتناول هذا الامر بكل الجدية ... والاهتمام
والانتقادات ... والاقتراحات ... والمشاريع كما ورد في آخر كلام زهير أعلاه
يلا ياشباب/ت شدوا الهمة شوية.....
ولكل ناس الزقازيق من غير الأعضاء
[email protected]
-------
جاييك يازهير وشكرا على سعة الصدر
| |
|
|
|
|
|
|
|
|
 دعوة للنقاش ... تفعيل الرابطة (Re: عصام دهب)
|
| Quote: أولاً : تم أختيار هذه اللجنة قبل عام وعدة أشهر ، قابلت اللجنة من الصعاب المالية ما قابلت ، وكل عمل لا بد له من تمويل ، ومن المفترض أن تقوم اللجنة بتوفير التمويل كأحد المهام المناط بها ، ولأسباب ذاتية وموضوعية فشلت اللجنة في تسيير أعمالها طيلة الفترة الماضية . |
زهير....
اتفق معك تماما في أن كل عمل لابد له من تمويل ونتمنى ان تتجاوز ل.ت الصعاب التى واجهتها
لكن ماذا تم بشأن الاشتراكات الدورية للاعضاء؟ يقيني بأنها تدعم جزء من المشاريع لو وضعت الالية
المريحة لجمعها ... من هنا اقترح تكليف اعضاء من خارج اللجنة للعمل في هذا الجانب
هذا مع تقديري التام للاسباب الذاتية والموضوعية التى ساهمت في تأخير الاعمال في الفترة السابقة.
بالمناسبة .... نرجو توضيح اشتراكات كل عضو
وبالمناسبة ايضا .... هل زقازيقاب الخارج اعضاء في الرابطة
| |
|
|
|
|
|
|
|
|
|
Re: دعوة للنقاش ... تفعيل الرابطة (Re: جلال عثمان)
|
صباح الخير... يا جلال والله إنت ما قصرت فتحت ليك باب جميل جدا ، وعمنا الزناتي دايما جاهز منطق والله.
أعتذر جدا لشلة قندهار لعدم تمكني من الحضور لظروف قاهرة ، والجايات أكثر إنشاء الله.
بالأمس كانت حفلة البلابل بمناسبة عيد الحب (هابي فلانتاين يا دودي) كانت الحفلة بنادي الضباط وكانت روعة في روعة غردت البلابل كأن لم تغرد من قبل ، أغاني جميلة من الزمن الجميل ... رجعنالك وكيف نرفض رجوع القمرا لي وطن القماري.... كان دخول الأستاذ الكبير بشير عباس وهو ممسك بكرسي متحرك أمامه ليساعده على المشي كان منظر مؤثر للغاية لهذا الرجل القامة الذي أفنى شبابه وصحته وعافيته لسعادة الشعب السوداني فكانت أغنيات البلابل الخالدة ، وكان مشوار البلابل الناجح برغم كل الظروف...
بعد بدء الحفل ومن المدخل الخاص بي كبار الشخصيات (الناس الكبارات) ظهر أخونا مبارك جادين ، وباين جدا إحترامات الناس ليه وهو يستاهل رجل جميل في كل شئ ، المهم تابعت دخول جادين حتى إطمأنيت لجلوسه بجوار الكبار وكنت سعيد جدا لهذه المشاهدة من على البعد.. ديل أهلي الزقازيقاب الجميلين حيث ما حلوا وطلوا.
الغريبة الكاميرا لم تلمح ظهور عمو الزناتي وهو كعادته لا يتخلف عن مثل هذه المناسبات الجميلات ، يا ربي كان مفلتن وين؟؟؟ هابي فلانتاين يا عمو.. وليك وحشة!!!
طبعا المغتربين والمغتربات ليهم الله ، تشموها قدحة وتسمعوها مدحة!!!
| |
|
|
|
|
|
|
|
|
|
Re: دعوة للنقاش ... تفعيل الرابطة (Re: البادي النور)
|
يا حليل زمن ما كانت بتفوتنا حفلة حتى لو خريجة
مودعة فى لكوظ ( دكاكينيه ) هسه يا البادى بقينا
نسمع مجرد سمع بالحفلات بعد تنتهى
ويا ريت لو كود تحميل الاغانى شغال كنت سمعتك عمل نادر
للبلابل فى الثمنينيات ( اغنية موجة لسيف الدسوقى ) تسجيل اوركسترا
وربنا ينعم على الاستاذ بشير عباس بالصحة والعافية وما تنسوا
يا زهير تدعوه للحفلة ويستحسن لو عملتو شهادة تكريم له تكون لفتة بارعة
ونحن بدورنا حنعمل ليكم دعاية وسط الاهل والاصحاب فى السودان
رغم انى شايف الزمن ضيق وفضل 12 يوم فقط للحفلة
وبالتوفيق انشاء الله
| |
|
|
|
|
|
|
|
|
|
الشكر والتقدير لكل الذين قاموا بواجب العزاء.. (Re: عصام دهب)
|
الاعزاء الغالين ..الزقازيقين الحلوين الطيبين..
الشكر لكل الذين ادوا واجب العزاء في فقيدتنا/ثريا البلول
الشكر موصول لكم من العزيزة / نوال البلول ومن اسرتها الكريمة...
جزاكم الله الف الف خير ..نسأل الله ان لا نصلكم في مكروه...
ونسألكم دوماً الدعاء للفقيدة...
كذا خالص التعازي للاخ / محي الدين علي يوسف في والده
وتعازيناللدكتور / حسن في شقيقة الا رحمة الله عليهم جميعاً..
ومعذرة لتاخير واجب العزاء وذلك بسب مشكلة التهكير التي واجهتها
عثمان الجيلي
| |
|
|
|
|
|
|
|
|
|
Re: ناس الزقازيق ،،،،،، أجدع ناس (Re: جلال عثمان)
|
لقد تم ترتيب حفل البلابل ليوم 26 فبراير الجاري باستاد ود نوباوي
وسيكون حفل جماهيري كبير وضخم ، وستملأ الإعلانات كل العاصمة القومية
ووسائل الإعلام ، ولقد تم اليوم الإتفاق النهائي مع البلابل وكذلك مع
إدارة نادي ود نوباوي .....
| |
|
|
|
|
|
|
|
|
|
Re: ناس الزقازيق ،،،،،، أجدع ناس (Re: زهير الزناتي)
|
صباح الخير...
جلال والله فيك الخير على العتالة دي ، أمس بالصباح كان في مشكلة في البوست ما قدرت أضيف رد.
عمو الزناتي شكلي كدا ما حأحضر الحفلة عندي سفرية صغيرة كدا...
ليكم وحشة يا زقازيقاب يا حلوين...
| |
|
|
|
|
|
|
|
|
|
Re: حفلة البلابل ،،، لأجدع ناس (Re: ميسرة سيد أحمد)
|
خطوة موفقة يا زهير كونكم نقلتو الحفلة لاستاد ود نوباوى
لانى حسيت من كلام هادية انهم متحمسين جدا للفكرة ( الود عامل بيعرف البلابل )
ومجازا كده نقدر نقول الحفلة فى المساكن لان استاد ودنوباوى بشبه استاد المدرسة
العسكرية ، وعليه ما تجيكم وحداة من بنات بيطرة وتقول ليكم نادو لي صاحبتى بت علوم
عشان تدخلها الحفلة مجان واوعكم من ضهب لكوظ ، وقول لمحمد صديق البوليس يكتر ليكم من
العساكر وصلاح عبدالمجيد يقيف فى الباب لانو اولاد المساكن ظاتم فيهم ناس بتاعين ذوقان
| |
|
|
|
|
|
|
|
|
|
ناس الزقازيق ،،، أجدع ناس (Re: عصام دهب)
|
| Quote: اللللييييلة شيل شيلتك مع طارق جبريل |
إنتو يا جماعة البوست ده بيطلع
كل مرة بيمشي وين،،،،،،يا ناس
لكوظ ما شفتوه لينا بهناك،،،
نفتش عليه كتير ما بنلقاهو،،،
وناس الهوت ميل عاملين معاي
مشكلة مش عارف أكتب على الفيس
بعد المره الأولى ،،،
يا زهير الفيس ده ذاتو طلع عنده
مشاكل،،،،،
| |
|
|
|
|
|
|
|
|
|
Re: ناس الزقازيق ،،، أجدع ناس (Re: ميسرة سيد أحمد)
|
يا ابو الجل تأمر بس ،،،،،،،،،،،،،،
يا ميسرة الفيس بوك ما عنده أي مشكلة ، بس عايز الزول يتعود عليهو شوية ، أسهل مما الزول يتخل وإمكانيات رهيبة
والقروب دا ممكن يغني عن موقع لناس الزقازيق ،
| |
|
|
|
|
|
|
|
|
|
Re: ناس الزقازيق ،،، أجدع ناس (Re: طارق جبريل)
|
صباح النور عليك يا زهور...
يا جلال أنا ما زايغ لكن ياخي المشغوليات كتيرة (الولد عامل فيها مهم وكدا) ‘ يوم قندهار كان عندنا إجتماع حتى صلاة المغرب ، حفلة البلابل جاءت في وقت مفروض أسافر فيه وضروري جدا .. يعني ما زغنا (أنا ما سرقت أنا جيت أعاين).
عمو الزناتي الله يديك العافية عامل زي أم العروس (هي العروس إسمها منو؟)
والله يا جماعة حاتم جبارة لي حسه ما شفناه (قالوا شوف العين ما كتلو غزال) ناس لكوظ (البرلوم محمد حسن) مستأثرين بي الولد الأمريكي دا خالص يا جماعة ما تدونا معاكم شوية فرقة في بورتو البرتغالي دا (الله يطرى أخونا جاكسون بالخير - من أكبر المشجعين في ميدان المدرسة العسكرية)... أها يا ناس لكوظ الداخل الزول الوجيه دا حيسافر قريب تاني بتمشو وين؟ السودان ظروفه صعبة ياخي....
| |
|
|
|
|
|
|
|
|
|
ناس الزقازيق ،،، أجدع ناس (Re: عصام دهب)
|
Quote: يا ميسرة الفيس بوك ما عنده أي مشكلة ، بس عايز الزول
يتعود عليهو شوية ، أسهل مما الزول يتخل وإمكانيات رهيبة
والقروب دا ممكن يغني عن موقع لناس الزقازيق ، |
يا زهير عندي مشكلة في الفيس وكمان حاورت عبدالدائم
عن طريق الهاتف أنا ممكن أدخل الفيس أكتب فقط
حالياً wall to wall
بس الـ wall العام حتى اللحظة رفض يستجيب
وأعتقد تكون المشكلة مرتبطة مع hotmail
حسب رأي المتخصصين في المكتب عندنا ناس
متخصصين في المجال بس حتى اللحظة ما عايز
يستجيب بعد الدخول الأول،،،،،،
| |
|
|
|
|
|
|
|
|
|
ناس الزقازيق ،،،، أجدع ناس (Re: عصام دهب)
|
| Quote: يمين كانوا يموتوا في لكوظ دي ويتمنوها |
يا طارق يا جبريل بصراحة أنا ما كنت بحب
لكوظ وما كنت بمشي ليهو نهائياً إلا مجبور
وما حضرت فيها حفلة نهائياً بقدر الزمن
إلى كنت فيهو بالزقازيق ،، بس حضرت
أول إجتماع تآمري لإسقاط اسرة كلية
التجارة من هيمنة أخوانا الكيزان
من ذلك الزمن الجميل،،،،،،
ولا أقول هناك عيب في لكوظ وكنا بنحب
أخوانا في لكوظ ،،،،،
بس كنا بنحب المساكن وناس المساكن
وقلبنا سكن المساكن ،،،،،
وكمان ناس البوستة والمنشيه
| |
|
|
|
|
|
|
|
|
|
Re: ناس الزقازيق ،،،، أجدع ناس (Re: ميسرة سيد أحمد)
|
يعنى يا الرشيد كل الهجوم ده على لكوظ
وانت واقف تتفرج
بصراحة يا جبريلا والله الحفلات ما كانت بتنور الا بوجودكم
لاننا فى المساكن الوجوه محفوظة
بس ناسكم لما يجو ويترصرو ويقعدو قدام كده تلقى الناس تسأل
من وين الحاجات النضيفة دى ، مرة مرة بتظهر ثم تختفى ..
بالمناسبة وين صاحبى ( بيطرة )
| |
|
|
|
|
|
|
|
|
|
Re: ناس الزقازيق ،،،،،، أجدع ناس (Re: ميسرة سيد أحمد)
|
الف الف حمد الله على سلامة المدام يا جلال
والف مبروك البنيــه وتتربى فى عزكم
ومن بنات الوطن الـصالحات .. والباقى يتمو ناس زهير
قلت لي بقيت ابو البنيات ماشاء الله مريم ومرام
نديك اسماء بحرف الميم
مزن ، ملاذ ، منــة ، ملك
ولا اقول ليك سميها باسم اى واحدة من دفعتكم ( دفعتكم من كل الكليات )
ونوعدك ما حنقول اشمعنى .... او اى حاجة
| |
|
|
|
|
|
|
|
|
|
Re: ناس الزقازيق ،،،،،، أجدع ناس (Re: جلال عثمان)
|
يا جلال مبروك البت ، وقلنا ليك سميها ميار أو مزن ولتنتظر منا هدية تليق بمقامها
Quote: ممكن تنقل سلاماتي للأصدقاء ميسرة سيد أحمد وياسر نجيلة وعبد الدائم النضيف جدا. اكتشفت بوستاتهم الزقازيقة مؤخرا. قول ليهم العين بصيرة لكن الكيبورد ما لاحق
طبعا التحايا واجبة لكل الذين ساهموا في في هذا البوست فقد ساعدني (ولو افتراضياً) على تواصل (ولو كان أعرجاً) مع زملاء وأصدقاء سنوات خضر.
قول لعبد الدائم حأوريك السر في أول حفلة ألاقيك فيها في السودان |
دي رسالة ن مجدي النعيم
| |
|
|
|
|
|
|
|
|
|
Re: ناس الزقازيق ،،،،،، أجدع ناس (Re: زهير الزناتي)
|
صباح الخير..
أخونا جلال مبروك العروسة وإنشاءالله بي أسماء آيات الله محروسة..
لظروف فنية خارجة عن الإرادة تم تأجيل السفرية الصغيرة لحين إشعار آخر فإحتمال نحضر حفلتنا المنتظرة بي بلابل الدوح الصداحة...
| |
|
|
|
|
|
|
|
|
|
ناس الزقازيق ،،،، أجدع ناس (Re: عصام دهب)
|
تحية عطره مرسله عبر هذا البوست
للأخ الصديق / مجدي النعيم،،،،
والأستاذ/مجدي ،، علم من أعلام
الزقازيق والتي لا يمكن أن تنسى
نتمنى أن يتواصل معنا على هذا
البوست ،،،،
ونحن نبعث له كل آيات الود والمودة
===========
ودمتم،،،،
| |
|
|
|
|
|
|
|
|
|
Re: ناس الزقازيق ،،،، أجدع ناس (Re: ميسرة سيد أحمد)
|
مساكم الله بالخير يا زقازيقاب
شايف ناس المساكن شانين هجوم رهيب على لكوظ، و عاملين لكوظ زي بروكلين و المساكن زي مانهاتن، و بالرغم من اني سكنت بالمساكن الا أنني لكوظي النشأة و المزاج، و لا أقبل في لكوظ أبدا، و بالرغم من اختلاف العصور الا انني أقول للما بيعرف لكوظ كويس أو ما حضر العصر الذهبي للكوظ، ان لكوظ كانت قبله لكل الناس وكانت دائمة النشاط و الحيوية وتكاد لا تخلو طرقاتها من الماره و في كل الأوقات، ما عدا أثناء امتحانات التيرم الأول و الثاني بالنسبة للزراعة أما ما عدا ذلك فالجميع في زيارات مستمرة و توادد و محبة و شاي وبسكويت وكيك (بعض الناس)،وما زلت أذكر جركانات معبأه بعصير الجوافة و الفراولة عند بعض الأخوه، و هناك الكثير الذي لا هذه العجاله و لا حالة ضغط العمل الآن تسمح لي بالاسترسال في ذكرهم، و هذا قيض من فيض و الذي جاء نتيجة لاستفزازات ناس المساكن، و حتى سكني بالمساكن فقد كنا نرفع علم لكوظ عاليا رفرافاو قد كانت شقتنا يؤمها اللكوظيين قيل المساكنين، فيا ناس المساكن أخير ليكم تتلمو و أقروا التاريخ كويس قبل ما تهاجموا لكوظ.
اليوم و في طريق العوده الى مكان عملي من أبوظبي قمت بالاتصال بكل من نهلة نجم الدين و على ميرغني و محمد العوض الطيب، و نهلة عزمتني لي حفلة البلابل و أغرتني بالدخول مجانا اذا جيت للحفله، فبيني و بينكم لقيته حاجه مغرية و الله، على أي حال اذا ما جيت فنهلة وعدتني بشريط فيديو يوثق البكاء و الدموع.
ودمتم سالمين
| |
|
|
|
|
|
|
|
|
|
ناس الزقازيق ،،،، أجدع ناس،،، (Re: عصام دهب)
|
Quote: شايف ناس المساكن شانين هجوم رهيب على لكوظ،
و عاملين لكوظ زي بروكلين و المساكن زي مانهاتن، |
يا أهل لكوظ لكم كل الود والحب ،،، ولكوظ لم تكن
سيئة وكنا بنحب ناس لكوظ ، ولنا أصدقاء كثيرين في لكوظ
بس ما كنا بنمشي للكوظ والظروف هي إلى جابتنا المساكن
وحببت إلينا المساكن وناس المساكن وأهل المساكن،،،،،
التحية للكوظ جبريلا والرشيد ،،، وأبسط يا عم
أهو دي أول كوسة من ناس لكوظ بحضور حفل البلابل
دي فرصة عبدالدائم ما بيحلم بيها،،، يا حليلك
يا ديدو حفلات البلابل بقت تتخابت يمين شمال ..
======================
التحية للجنة التنفيذية
| |
|
|
|
|
|
|
|
|
|
Re: ناس الزقازيق ،،،، أجدع ناس،،، (Re: زهير الزناتي)
|
عمو الزناتي لكن ما خطير... إنشاء الله يكون حفل ناجح ماديا ومعنويا وللأمام دايما.
بالأمس تلقيت مكالمة لطيفة جدا من أخونا إدريس تراوري - كلية الحقوق - رابطة الزقازيقاب فرع مدني ، زول نشيط في مدني وكم مرة تكبد المشاق وجاءنا في الخرطوم لحضور جلسات إجتماعية زقازيقية ،إنشاء يا تراوري يوم شكرك ما يجي.
| |
|
|
|
|
|
|
|
|
|
التحية للجنة التنفيذية ،،، أجدع ناس (Re: البادي النور)
|
Quote: اللافتات الورقية والقماشية تغمر
العاصمة للإعلان عن الحفل |
صباح الخير يا زقازيقاب ،،،،،،،
نحن في غاية السعادة والإمتنان،،،
لهذه الأخبار السارة،،،،،،،،
آمل أن يكون هناك إعلان في التلفزيون
======================
التحية للجنة التنفيذية
| |
|
|
|
|
|
|
|
|
|
Re: التحية للجنة التنفيذية ،،، أجدع ناس (Re: ميسرة سيد أحمد)
|
الاعزاء الغالين ...
ناس الحوش الطيبين..
سلام جاكم ما عداكم...
صباحكم ومسائكم...
جيتا جيتو...
حبابنا وحبابكم...
والله يا اخوانا الانقطاع بسبب الجهاز...
كلما اخرج من مشكلة هكر اقع في مشلكة فايروس...
والان انا داخل بي كنكشن خطير عبر لندن وغادي...
ليكم خالص التحايا...
ولدنا العزيز جلال عثمان الف الف مبروك البنية ...
وانشاء الله من القانتات الحافظات والمحفوظات المستورات...البارة بوالديها...
تربي في عزك...
ابوك ...عثمان
| |
|
|
|
|
|
|
|
|
|
Re:لي اخوانا ناس الزقازيق بكندا... (Re: عثمان الجيلي شيخ محمد)
|
السلام عليكم ورحمة الله..
مليون تحية غمرها الود لكم علها تحيطكم دفئاً...
ي
يااخوانا عندنا برلومة سوف تشرف دياركم قريباً( اول مارس ) وبالطبع زقازيقية ، الا انها سوف تكون برلومة لديكم
والبرلمة في الصقيع والبرد الشديد صعبة...
بالله نرجو منكم إفادتنا بعناونكم وتلفوناتكم ...
مع خالص التقدير
عثمان الجيلي
| |
|
|
|
|
|
|
|
|
|
Re: Re:لي اخوانا ناس الزقازيق بكندا... (Re: عثمان الجيلي شيخ محمد)
|
Quote: ولدنا العزيز جلال عثمان الف الف مبروك البنية ...
وانشاء الله من القانتات الحافظات والمحفوظات المستورات...البارة بوالديها...
تربي في عزك...
ابوك ...عثمان |
تسلم ابوي انت ...
تعرف ياعثمان سررت جدا بالسلك الكان بينا امس
والونسة الدقاقة في سفر (بكسر السين) البنوت
واكثر ما سرني اننا تعادل في ذلك الامر
فكلنا......
نقيب اركان حرب
تسلم ياحبيب
| |
|
|
|
|
|
|
|
|
|
Re: ميــــــــــــــار (Re: جلال عثمان)
|
يت ابو الجل
خير ما أخترته من أسماء
وحا نحولك لميار تديك حصة كاملة عن معاني ميار في كل اللغات
والهدية أعتبر أمرها مقضي ولغاية ما تصلنا الأمورة الحلوة في السودان
ونسلمها هديتها يداً بيد لكم علينا مؤنة رمضان كل عام حتي عودتكم للوطن ...
| |
|
|
|
|
|
|
|
|
|
Re: ميــــــــــــــار (Re: سيف النصر محي الدين محمد أحمد)
|
Quote: يت ابو الجل
خير ما أخترته من أسماء
وحا نحولك لميار تديك حصة كاملة عن معاني ميار في كل اللغات
والهدية أعتبر أمرها مقضي ولغاية ما تصلنا الأمورة الحلوة في السودان
ونسلمها هديتها يداً بيد لكم علينا مؤنة رمضان كل عام حتي عودتكم للوطن ... |
يديك العافية يا ابوميار مابتقصر والله
وميت فل وعشرة يادكتور والله
| |
|
|
|
|
|
|
|
|
|
Re: ميــــــــــــــار (Re: زهير الزناتي)
|
نعم ما أخترت يا جلال من الأسماء
يعني خلاص ربط رايك مع ناس الزناتي
بس لو مشينا السودان قبلكم تدوني
تفويض وإستلم الهدية بالإنابة عنكم
من ميار إلى ميار .
وعاشت الأسماء الحلوه ،،،،،،
===========================
ربنا يحفظهم ليك يا أبو الجل
| |
|
|
|
|
|
|
|
|
|
تجمع زقازيقي الرياض الخميس (Re: زهير الزناتي)
|
الاخوات والاخوة الكرام
السلام عليكم جميعاً
وإن شاء الله يوم الخميس القادم وبإستراحة اللؤلؤة بالرياض سوف تكون هنالك ليلة زقازيقية من ليالي الزمن الجميل
تجري الاستعدادات لها الآن على قدم وساق وان شاء الله سوف تكون عامرة ويلتقى فيها الاحبة وبعضهم بعد سنين عددا .... وان شاء الله البرنامج عامر وموعوديين ان شاء الله ببرنامج جميل مع اجدع ناس
عليه فالدعوة موجهة لكل خريجي الزقازيق بالرياض وضواحيها ...
والدعوة عامة لكل الاخوة
شــــــــــــــــــــــــــــــــــرفونا
| |
|
|
|
|
|
|
|
|
|
Re: واجب عزاء ،،، ناس الزقايق،،،، (Re: زهير الزناتي)
|
Quote: توفي زوج شقيقة عبد السميع وإبنها في حادث أليم في
مدينة القضارف أمس الأول وحار تعازينا للعبد السميع والأسرة
الكريمة بالقضارف |
إنا لله وإنا ايه راجعون
كامل العزاء لأخونا عبدالسميع
ولأهله وذويه الصبر والسلوان
وحسن العزاء .
===============================
نقلاً من زهير الزناتي - الفيس بوك
| |
|
|
|
|
|
|
|
|
|
Re: واجب عزاء ،،، ناس الزقايق،،،، (Re: ميسرة سيد أحمد)
|
أخونا جلال أبو ميار والله إسم جميل خالص إنشاء الله ربنا يحفظها ويجعلها بارة بي والديها ، لكن يا جماعة السماية متين ووين؟؟ ما تاكلوا حقنا ووضيعونا ساكت .. نقترح تكون في قندهار بالنهار إحتفالا بميار يعني يا جلال رسل لي عمو الزناتي ألف ريال ونحن نمشي نحتفل ليك بالأمورة ميار رأيك شنو؟؟
| |
|
|
|
|
|
|
|
|
|
Re: واجب عزاء ،،، ناس الزقايق،،،، (Re: البادي النور)
|
تعازينا لأخونا عبد السميع في هذا الفقد العظيم
اللَّهُمَّ اغْفِرْ لَهما وَارْحَمْهما ، وَاعْفُ عَنْهما وَعَافِهما ، وَأَكْرِمْ نُزُلَهما ، وَوَسِّعْ مُدْخَلَهما ، وَاغْسِلْهما بِمَاءٍ ، وَثَلْجٍ ، وَبَرَدٍ ، وَنَقِّهما مِنْ الْخَطَايَا كَمَا يُنَقَّى الثَّوْبُ الْأَبْيَضُ مِنْ الدَّنَسِ ، وَأَبْدِلْهما دَارًا خَيْرًا مِنْ دَارِهما ، وَأَهْلًا خَيْرًا مِنْ أَهْلِهما، وَقِهما فِتْنَةَ الْقَبْرِ ، وَعَذَابَ الْقَبْرِ وَعَذَابَ النَّارِ
إنا لله وإنا إليه راجعون
| |
|
|
|
|
|
|
|
|
|
Re: واجب عزاء ،،، ناس الزقازيق،،،، (Re: سامي عبد الوهاب إدريس)
|
اللَّهُمَّ اغْفِرْ لَهما وَارْحَمْهما ، وَاعْفُ عَنْهما وَعَافِهما ، وَأَكْرِمْ نُزُلَهما ، وَوَسِّعْ مُدْخَلَهما ، وَاغْسِلْهما بِمَاءٍ ، وَثَلْجٍ ، وَبَرَدٍ ، وَنَقِّهما مِنْ الْخَطَايَا كَمَا يُنَقَّى الثَّوْبُ الْأَبْيَضُ مِنْ الدَّنَسِ ، وَأَبْدِلْهما دَارًا خَيْرًا مِنْ دَارِهما ، وَأَهْلًا خَيْرًا مِنْ أَهْلِهما، وَقِهما فِتْنَةَ الْقَبْرِ ، وَعَذَابَ الْقَبْرِ وَعَذَابَ النَّارِ
خالص التعازي الاخ عبدالسميع والاسرة
| |
|
|
|
|
|
|
|
|
|
Re: واجب عزاء ،،، ناس الزقازيق،،،، (Re: عثمان الجيلي شيخ محمد)
|
| Quote: نقترح تكون في قندهار بالنهار إحتفالا بميار يعني يا جلال رسل لي عمو الزناتي ألف ريال ونحن نمشي نحتفل ليك بالأمورة ميار رأيك شنو؟؟ |
البادي ياحبيب
مافي اي مشكلة... ادفعوا انتو الالف ريال
وقول لزهير يخصما من الشيلة
لانو البت دي خلاص خطبناها لود زهير
| |
|
|
|
|
|
|
| |
جلال عثمان
زهير الزناتي
ميسرة سيد أحمد
حيدر حسن ميرغني
عصام دهب
طارق جبريل
عبد الدائم سيد أحمد
الرشيد بابكر
سامي عبد الوهاب إدريس
فيس بوك
تويتر
انستقرام
يوتيوب
بنتيريست