كتب الكاتب الفاتح جبرا المتوفرة بمعرض الدوحة
|
|
 عدو المرأة والمجتمع بالنيل الأزرق: د. سليمان.. وسارة أبو اضعف الإيمان..
|
كثير من الأحيان تتصّل إمرأة تشكو من عنف زوجي
وضرب زوجها لها..
د. سليمان -الإختصاصي يقال بجامعة الخرطوم- ينصح المرأة بـ "الإذعان"
او يسأل عن السبب "البيخلي يضربك"..
و"ابعدي عن الاشياء البتزعله".. وغيره من التبريرات الفطيرة..
د. سليمان لا يمثل دين ولا علم..
بل يطرح رأي شخصي متخلف لا يستنكر العنف ضد المرأة..
بل يلقي اللوم عليها..
رسائل غاية في الخطورة لمجتمع يعاني ما يعاني
بكل أسف د. سليمان لا يصلح كخبير في برنامج "مافي مشكلة"
د. سليمان هو المشكلة الحقيقية..
______
سارة ابو.. تكتفي بإنتقاد الضرب على استحياء
ولا تقف مدافعة عن اخواتها واطفالهم.. والإنسانية ..
موقف مؤسف ومتخاذل من امرأة لها مدخل لأجهزة الإعلام وفرص لنشر الوعي..
______
أوقفوا د. سليمان من نشر رسائل تدعو لقبول التخلّف، القهر، والعنف..
|
|
 
|
|
|
|
|
|
|
 Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: ليلى عز الدين)
|
" هى لكن يضربا يادكتور"
دة كان رد دكتورة سارة وعلى إستحياء على دكتور سليمان لما حاول وبكل بساطة يبرر الضرب, وقال أنو فى بعض القبائل الضرب دة عندها عادى ومابستنكروهو ,
طيب عرفنا إنو عادى هل هو صاح؟
وين دورك إنت كمعالج إجتماعى لعلل ضاربة فى جذور المجتمع , ليه ماتستنكر على الأقل ؟
توضح إنو فى مليون طريقة لحل الإشكالات الأسرية , والضرب ما من ضمنها
شبكا ليك إنتى وبتعامليو كيف؟ واحساس التفوق , ويحزنون كتيرة ومسيخة
والله لما جانى إحساس إنو شوية وح يقول ليها : تستاهلى الضرب إنتى ذاتك
يادكتورة سارة , يقع عليك العبء , وأغلب المتصلات متقويات بوجودك فى البرنامج فكونى واضحة وقوية
أتمنى أنو البرنامج مايبقى مركز على الحالات الفردية وبس, حاولوا إستغلوا الحالة الفردية ووجهوا بيها رسالة لكل المجتمع عشان نتعلم من أخطاء الآخرين.
سلامو يانجوان
| |
|
|
|
|
|
|
|
|
 Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: ندى عثمان حسن)
|
الاستاذة نجوان
سلام
لقد كنت حريصا على متابعة البرنامج
الاستاذة سارة ما تلوموها لانني شعرت بغليانها الداخلي من احتلال د. سليمان لكل مساحة البرنامج وبكلام يفتقر الى المهنية والمنهجية وكان يقر العنف ضد المرأة .
سارة المسكينة ما كان عندها حيلة وغير راضية عن الحاصل ومديرة البرنامج لم تكون بالمستوى المطلوب فقد كان بامكانها مقاطعة سليمان بل حتى التصدى لتفلتاته تلك .
تحياتي
| |
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: ليلى عز الدين)
|
شكرا اماني الأمين,,
لا للعنف.. العنف ضد المرأة هو عنف ضد مجتمع باكمله..
_____
شكرا ليلى عز الدين..
النيل الأزرق -على علاتها- عندها قاعدة متفرجّين كبيرة
وهذا البرنامج تحديدا اصبح من البرامج التي يتابعها الكثيرون..
منهم الأسرة المغلوبة على أمرها وحاير بها الدليل..
بس بكل أسف، يقدل في الساحة رجل يطرح نفسه كمختص .. وهنا مكمن الخطورة..
تابعت البرنامج منذ فترة.. الدكتور لم يستنكر العنف صراحة..
والآن لا يتحرّج من الدعوة لقبول العنف كشيء طبيعي وشائع!
وكمان ينصح بالإذعـــــــــان كعلاج للنزعة العدوانية من الرجل تجاه المرأة..
ده كلام خبير يستضاف في جهاز إعلامي؟؟
قبل شهور إشتكت زوجة من زوجها وضربه لها..
وقالت بالحرف الواحد "خايفة يوم يكتلني"..
لم يزد الدكتور على اسطوانته المكرّرة ولا كلمة واحدة..
تاركا أسرة في مهب الريح
زوج يحتاج علاج وإصلاح
وزوجة شابة حياتها مهددة بالخطر..
_____
أوقفوا المهزلة والإستهتار بالأسرة..
أوقفوا السبهللية والتخلّف..
أوقفوا د. سليمان..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: نجوان)
|
سلام ندى عثمان واستاذي شيقوق..
للحق، سارة ابو حاولت أمس اكثر من الحلقات السابقة..
لكنها ما زالت محاولة ضعيفة جدا، ولا يمكن تصنيفها كموقف واضح وقوي..
خصوصا من امرأة اعلامية وشخصية عامة.. مهتمة بأحوال الأسرة والمرأة..
ويا شيقوق.. في كثير جدا من الأحيان تحيل سارة ابو السؤال للدكتور تاركة له الأمر برّمته..
وهي في تقديري افهم وأحكم منه (لا أدري ما هو اختصاصها)..
رشا الرشيد نفسها تملك من الحكمة أكتر من الدكتور.. لكنها أيضا مغلوب على أمرها..
البرنامج هاديء جدا..
د. سليمان لا يصارخ ولا يرفع صوته، بل يدس السم في الدسم بكل ذوق..
وهذا شيء خطير.. ورسالة يصعب رفضها -او كشف حقيقتها- من إمرأة شابة مقهورة ومتعلّقة بقشة..
_____
لا لقبول العنف الزوجي وتدمير الأسرة السودانية..
لا لإستضافة د. سليمان على شاشة النيل الأزرق..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: ليلى عز الدين)
|
| Quote: سارة أبو طلبت منها أن تقابلها خارج البرنامج |
لووووووووووووب يا نجوان كدا كويس !
كنت متابعه لسارة ابو فى كثير من ظهورها على الشاشة
ولكنى فوجئت انو انتهى بيها المطاف داعمة لخط المؤتمر الوطنى
فى [B] منصب فى الاتحاد العام للمراة بتاع ناس رجاء خليفة !!!!
نجوان كلامك خطير ومطلوب
فعلا من خلال الاجهزة الاعلامية تحدث كثير من الانتهاكات لحقوق المراة
بلا عرفه ولا دراية بل بالعكس من ما يسموا باختصاصيين !!
واصلى وجيبى لينا نماذج خلينا نشوف الراجل دا بهبب فى شنو !
ــــــــــــــــــــ
قتى لى قال ليها ضربها ، لكن ما نشوف اول هى عملت شنو ؟؟؟؟
بنظرية الفعل من جنس العمل !!!
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: دينا خالد)
|
دينا..
هذا الرجل.. لا عنده أمانة علمية، لا حقوق إنسان، ولا common sense
إنتهاك حقوق المراة في رأيه شيء عادي وفطري في مجتمعنا..
وعلاجه هو منع تفّوق المرأة على الرجل، إظهار إذعانها له بوضوح، وعدم كشف حالها وشعللة الأمور..
____
في مرّة قال د. سليمان لأم تشكو من عدم سماع ابنها للكلام.. وعدم اهتمامه بدروسه
قاليها انه هي -كإمرأة- لا تعني كثيرا لإبنها..
لن يعطي ابنها لكلامها وزن لأنها إمرأة .. (بالحرف كده)..
لم يعطيها نصائح تربوية، وفضّل ان يتوّلى المهمة رجل..
هل هناك تحقير وإستصغار اكتر من هذا!
ويسمونه خبير!
____
سلام يا باش..
الشباب شريحة نعوّل عليها كثيرا للتفكّر في موروثات بالية ومريضة..
لما يجوا يسمعوا الكلام الفارغ ده من مختص في جهاز إعلامي ..نكون ظلمناهم حقيقة..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: نجوان)
|
يا نجوان سلام .. شاهدت جزء من البرنامج .. ارتفع ضغط الدم ... قفلت التلفزيون ...
الفكر الذكوري هو فكر في راس رجال ونساء ....
حمدت الله ان بنتي لم تكونا معي واساسا لا تشاهدان هذه البرامج ...
اشعر بالاسي كثيرا علي حال اجيال من بناتنا ستستمر معاناتهن من جراء هذا الفكر الممعن في ذكوريته والمقاوم للعلم والمعرفة والانسانية ...(بقي زي بعوضة الملاريا في الخرطوم لا بيف باف ولا ريد ولا اي مستحدث كيماوي يقدر عليه )...
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: abubakr)
|
الاستاذة نجوان
Quote: ويا شيقوق.. في كثير جدا من الأحيان تحيل سارة ابو السؤال للدكتور تاركة له الأمر برّمته..
وهي في تقديري افهم وأحكم منه (لا أدري ما هو اختصاصها)..
رشا الرشيد نفسها تملك من الحكمة أكتر من الدكتور.. لكنها أيضا مغلوب على أمرها.. |
اعتقد الاستاذة سارة ابو امراة مهذبة وموضوعية للغاية ولعل في صمتها الكثير من الايحاءات التي تنبئ بعدم رضاها بما يقوله دكتور سليمان .
صحيح كان من واجبها التصدي لهذا الاسفاف ولكنها - في اعتقادي - صمتت لتكشف عما ينضح في اناء ذلك الرجل وقد نجحت في ذلك .
الاستاذة تعمل بدبلوماسية النفس الطويل داعية الجمهور للتمرد على د. سليمان وطرده من البرنامج ليتسنى لها الانفراد به مستقبلا وايصال رسالتها المناهضة لاهانة المرأة بالاسلوب الذى تراه مناسبا .
معزتي
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: الطيب شيقوق)
|
الحبيبة نجوان سلام وأشواق منذ مدة لم نلتق ههنا
المجتمع يربي البنت منذ نعومة أظفارها أنها يجب أن تكون (مدمدمة) و(كاسرة رقبتها) ولو تعرضت لإهانة يجب عليها أن تتوجه صوب (التكل) تكفكف دموعها هناك...طبعاً المجتمع دة ما بعني 100% من نماذجه لكن السائد أن المرأة مبعث الخطل، إذا تعرضت لعنف يجب أن تصبر وإلا فهي ناشز وقاهر، لو تعرضت لإهانة فالمثالية تلك التي تبتلعها مع غصصها ودموعها، تفكير دكتور سليمان لا ينفصل عن تفكير قطاع عريض من مجتمعن، وأستاذة سارة تخشى -ربما بوعي ودون وعي-ان تصنف ضمن فريق الناشزات لو تصدت لآرائه بحسم!
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: Hussein Mallasi)
|
Quote: يجب إيقاف مثل هذه البرامج العبثية؛ السخيفة؛ و المملة في آن؛
مشاكل شنو دي البتتحل بمكالمة هاتفية لبرنامج تلفزيوني؟!! |
الشقيق(:ملاسي
سلام وتقدير
زمان كنتا بفكر زيك
وبسخر من كتب:تعلم الحياة-كيف تكسب أصدقاء إلخ وبسخر أكتر من أركان حل المشكلات في المجلات والصحف:أريد حلاً-مشكلتك-قوديني إلى النور إلخ إلخ وكنت أتساءل زول ما عايش المشكلة حيعرف أبعادها كيف؟!
لكن لمن كبرتا لقيت أن هناك من يحتاج ولو بصيص نور حتى لو أتاه من خصاص مجلة أو تلفاز، فليس للجميع مقدرة التصدي لمشكلاتهم ومجابهة الحياة متكئين على تفكيرهم ومنطلق أنهم أدرى بتفصيلات المشكلة والأقدر على حلها..
لنا
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: lana mahdi)
|
Quote: هناك من يحتاج ولو بصيص نور حتى لو أتاه من خصاص مجلة أو تلفاز،
فليس للجميع مقدرة التصدي لمشكلاتهم ومجابهة الحياة متكئين على تفكيرهم
ومنطلق أنهم أدرى بتفصيلات المشكلة والأقدر على حلها..
|
مرحب يا لنا ويا سلام عليك!!
كلام سليم وواقعي للغاية..
وهناك ايضا من تعايشوا مع اوضاع فقدوا معها المقدرة على تمييز الصح من الغلط..
لو سمعت يا ملاسي المتصلين على البرنامج ومدى حوجتهم للنصح والمشورة
لتأكدت تماما انهم متلهفين ولو لكلمة واحدة تمسكّهم الدرب ..
وتشرح ليهم هل ما يمرّون به شيء طبيعي وفطري كما قال الدكتور
أم انه أمر يتطلّب وقفة جادّة، تصحيح ومعالجة..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: الطيب شيقوق)
|
نجوان
اول مرة اعرف اسم الدكتور دا
سارة ابو ضعيفة جدا امامه وما لاقية فرصة للكلام واحيانا كتيرة بتحسي انها ما راضية واحيانا احسها تقول الليلة اخر يوم لي في البرنامج دا
سارة في الحياة العادية زولة متفهمة وواعية وقادرة على النصح
لكن فرصتها ضايعة مع الدكتور
وماحصل حل ليهو مشكلة بطريقة جذرية
دائما كلامو نص نص ومحبط لاي امراة او انسة او لاي واحد عندو مشكلة انو عايز يخطب واحدة واهله ما راضين
طوالي بقيف في صف الاهل على اساس انو مافي بنت بتستاهل تخلي اهلك عشانها
اتمنى لو يتم تغييره
المذيعة في النهاية محكومة بوقت وبطريقة تقديم واظن من حقها مقاطعة الضيف لو طوّل في الرد
لكن المذيعة رشا ما قادرة توقف الدكتور يمكن احتراما له او قلة خبرة منها
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: SHIBKA)
|
شبكة مرحب بيك..
وملاحظتك في الصميم..
أتفق معاك ..سارة أبو عندها امكانيات، حكمة وقبول..
بس اراها متقهقرة للخلف مع كل حلقة جديدة..
ليس لسارة مصداقية الآن للنصح والإرشاد
وهي نفسها تبلع ريق فوق ريق مع رجل يدعّي ان اذلال المرأة
جزء من نسيجنا الإجتماعي الذي علينا تقبلّه والرضوخ له (حتى لا يلجأ الرجل للضرب)..
سارة أبو نفسها الآن في حوجة للنصح والإرشاد بخصوص كيفية التعامل مع د. سليمان..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: الطيب شيقوق)
|
شكرا ًنجوان ..
محمد سليمان لم يشذ عن القاعدة
ولم يفارق الخط الذي تنتهجه شريحة كبيرة من السودانيين والسودانيات على حد سواء
كانت (X) تتعرض للضرب من قبل زوجها لأتفه الأسباب
أي نقاش بينهما ينتهي بالضرب!
لم تشتكي لمخلوق في الشهور الأولى
وعندما زاد الأمر عن حده
رأت أن تحكي لوالدها
قابل كلامها بإستنكار شديد
وحاول إيقاف هذا الضرب بالكلام اللين مع الزوج في البداية
لم تفلح محاولاته لمنع الزوج عن ضرب إبنته
طلبت الإبنة الطلاق
وقف والدها بكل قوة وحزم مع حق إبنته في الحياة بكرامة
نالت ما أرادت
وأصبح الجميع يتساءل لم كان الطلاق فتجيب بثقة: لأنه كان يضربني
إجابة كافية لا تستوجب التعقيب
الجميع
الجميع دون إستثناء
رجال نساء بنات صديقاتها وفي عمرها أولاد أصدقائها وفي عمرها كان ردهم:
وإنتي كنتي بتعملي شنو عشان يقوم يضربك؟
يا سادة:
ما من تبرير لضرب النساء
حتى وإن أتى الضرب مبرراً بواسطة السماء
واللاتي تخافون نشوزهن ... فتسريح بإحسان
وليقف الأباء والأمهات وبقوة في وجه من يمتهن كرامة بناتهن ..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: تيسير عووضة)
|
نجوان واللاتي معها
ازيكـ
الخطأ ليس من د.سليمان ، الخطأ في إعداد البرنامج واختيار المُصلحين ، اولا: د.سليمان هذا كان استاذي في الجامعة ومازال ومن الأساتذة المميزين جدا جدا ، د.سليمان تخصصه تقريباً صحة نفسية او علم نفس علاجي ، اذا شئ طبيعي يعبر عن رايو الشخصي
د.سليمان مميز جدا في مجاله
يعني يا نجوان البرنامج قلب ، بيت الأجاويد 
انا رأيي قد يكون متطرف في مسألة الضرب هذه.
ففي رأيي ان المرأة التي توصل نفسها لمرحلة الضرب ، تستحقه تماماً، فهي التي أهانت وذلت نفسها ، اساسا ما الذي يستحق العيش تحت وطأة الذل والمهانة ، اما حكاية من أجل ابنائي ، فاحسب انها مبرر اقبح من الوضع الذي تعيشه المرأة
حسين ملاسي
كلامكـ 100%
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: شمائل النور)
|
سلام يا شمائل وكيفك..
| Quote: اولا: د.سليمان هذا كان استاذي في الجامعة ومازال ومن الأساتذة المميزين جدا جدا |
معليش يا شمائل، بس ده ما الموضوع
تعليقنا هنا بخصوص كلام محدد قاله د. سليمان في برنامج تلفزيوني
ما بتفرق كتير ان كان د. سليمان متميّز برّه الأستديو او اول السودان..
(مع احترامي لرأيك فيه)
| Quote: د.سليمان تخصصه تقريباً صحة نفسية او علم نفس علاجي ، اذا شئ طبيعي يعبر عن رايو الشخصي |
عليك الله اشرحي لي كلامك ده..
د. سليمان يقدّمه البرنامج كخبير مختص، يأخذ المشاهد حديثه ككلام علمي..
في برنامج تاني بالأزرق اسمه نساء ورجال بيجيبوا فيه ناس بيقولوا رأيهم الشخصي ويتغالطوا ويتشاكلوا ويمشوا بيوتهم..
البرنامج تحت النقاش بيختلف.. د. سليمان في البرنامج له expert power ودوره الإرشاد في مجاله..
وين درسّوه الدكتور ده انه الإذعان علاج للعنف؟
هذا ينافي ابسط قواعد السلوك.. الإذعان يعزّز العنف وليس العكس..
سمعتي بطاغية أو مجرم أصبح ذوق عشان الناس سكتت ليه وأذعنت؟
| Quote: اساسا ما الذي يستحق العيش تحت وطأة الذل والمهانة |
سعيدة جدا بكلامك ده وياريت هناك الكثيرات من أمثالك في رفضهم للذل..
بس بكل أسف ليس لكل النساء نفس القدر من الوعي، الإرادة، والدعم اللازم ممن حولهم..
وهن ضحايا .. وليس العكس..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: نجوان)
|
نجوان
انا اعلم ان شهادتي في د.سليمان ليست هي الموضوع ،لكن قصدت ان اوضح لك انه ليس كل سايكولوجست مُصلح اجتماعي وحبيت الفت انتباهك لـ ان الخطأ يكمن في تنصيب البرنامج لدكتور سليمان لحلحلة مشاكل اجتماعية ، سليمان خريج علم نفس وماخد الدكتوراة في احد التخصصين (صحة نفسية او علم نفس اكلينيكي) انا ما متأكدة بالضبط ، يعني تخصصه امراض
عشان اوضح ليك اكتر: سليمان ممكن يحل لي مشاكل ، القلق ، الخوف ، بناء الثقة في النفس ، التكيف مع الاوضاع المختلفة ، كيف اتوافق مع متطلبات الحياة ، كيف اواجه عناء الحياة كيف اتعلم ضبط النفس .....الخ
فمسألة الضرب والعنف دي مسألة حقوقية في المقام الأول ولا علاقة لها بعلم النفس...
Quote: سعيدة جدا بكلامك ده وياريت هناك الكثيرات من أمثالك في رفضهم للذل..
بس بكل أسف ليس لكل النساء نفس القدر من الوعي، الإرادة، والدعم اللازم ممن حولهم..
وهن ضحايا .. وليس العكس.. |
طالما انني استطعت ان احكي مشكلتي في برنامج تلفزيوني ، اذا انا واعية بمشكلتي ولست راضية عن وضعي هذا ، اذا ما الذي يجبرني ؟؟
ثم كيف تسير الحياة بعد وقوع العنف؟؟
انا غير متعاطفة مع اللاتي يرضين الذل ولا احسبهن ضحايا
تحياتي،،
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: شمائل النور)
|
سلام يا شمائل..
| Quote: ان الخطأ يكمن في تنصيب البرنامج لدكتور سليمان |
في الجزئية دي، اتفق معاك 100%
خطأ كبير من النيل الأزرق إصرارهم على استضافة د. سليمان رغم الدراب الذي يأتي به.. حلقة بعد حلقة..
| Quote: فمسألة الضرب والعنف دي مسألة حقوقية في المقام الأول ولا علاقة لها بعلم النفس... |
اختلف معاك هنا..
العلاقات الإنسانية، الصحية وغير الصحية من صميم تخصصه، متميزا كان فيه او غير متميز..
(كونه ما عارف شغلو ده موضوع تاني)
والكثير من الظواهر السلوكية والمجتمعية تشترك فيها عدّة علوم..
إن كان للمشكلة جانب قانوني واضح فهذا لا يعني انه ليس لها جانب نفسي، طبي، مادي، تربوي .. وغيره
_____
واشكرك كتير على التحاور يا ستي..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: تيسير عووضة)
|
سلام اشراقة وشكرا على المساهمة..
واتفق معاك انه ما يحدث ببعض البيوت الآن ماهو الا نموذج مصغّر للصورة الكبيرة..
وأجهزة الإعلام الآن -من خلال برنامج كهذا- تدعم العنف المنزلي ..
ما معروف باقي القنوات بتسجّم في شنو..
______
هلا تيسير..
| Quote: ما من تبرير لضرب النساء |
بالضبط كده..
المؤسف ان القانون نفسه يتساهل مع العنف الزوجي..
يعني نفس الزوج ده ما يقدر يمد ايده على زول في الشارع
دون التعرض لعقوبة من القانون او مباشرة ممن تآذى منه..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: تيسير عووضة)
|
استاذة نجوان
السلام عليكم ورحمة الله وبركاته
بعيدا عن برنامج ( مافي مشكلة ) قريبا من مشكلة المرأة المظلومة من جانب الرجل
عليك الله اسمحي لي بوجهة نظر كمحاولة للفهم زيادة وعينا بقضية المرأة؟
في الحقيقة انا عندي استفسارات محتار فيها عندما يتعلق الامر بقضية المرأة ونضالها ضد العسف والتخلف والجهل ووالخ
ياريت القى عندك اجابة عشان افهم ليه انتو بتميزوا بين المرأة والرجل من خلال الاعتناء بمعاناة المرأة وحدها بينما هي معاناة ناجمة عن معاناة الرجل نفسه ( معاناته المتعلقة بالضغط الاجتماعي والاقتصادي والسياسي والنفسي والديني وضغط المرأة نفسها عليه ) !!
ولما يعبر عن آهة ألم في شكل ( عكاز او بونية ) تنسوا اسبابه وتتجاهلوا معاناته وجذورها وطوالي تنحازوا للمرأة المسكينة الغلبانة بالضرورة
الدليل على كلامي دا هو اعتراضك انت مثلا وجذريا على سؤال د. سليمان في برنامجه عن اسباب الضرب!!
دا في نظري تمييز
لأنو المرأة دي نفسها اذا ذبحت زوجها دا نفسه بساطور ( و نسوان كتار عملوها زي ما انتي عارفة )وقاموا شنقوها..
حاتجي انت نفسك تحتجي هنا وتقولي المجتمع لازم يسأل عن السبب والقاضي ليه اغفل الدوافع!!
وحا تقولي دا تمييز وظلم وجهل وتخلف !!!
طيب مش احسن نكون موضوعيين يا جماعة على طول الخط ؟
مش اسس العدل افضل من اشتراطات المساواة .. وللجميع دون تمييز ؟
يعني المرأة البتدافعي عنها دي لو هي البادية مثلا وقامت بصقت في وجه زوجها الكان بناقشها سلميا في موضوع ما، فسكت وحذرها ، لكنها اتمادت واعطته شلوت ، وبس قام فجأة ثأر لكرامته ونفد صبره واداها كف .. مش بكون العنف في الحالة دي مفهوم ومتوقع وانساني كمان ؟
اذا قلنا ما في شئ اطلاقا بيبرر العنف ضد المرأة
يبقى تقولوا لينا طوالي العنف بين الرجال وبرضو بين النسوان مبرر ليه ؟ ووقوع الجرائم عموما مبرر ومفهوم ليه؟ واحيانا المتهم بيبرأ ليه ؟
ماهي نفس الاسباب !!!
انا عايز اقول ان الدفاع عن حقوق المرأة بطريقة جزافية يؤدي الى تكريس التمييز بين الجنسين.
طيب خليني اضع اسئلتي بطريقة منظمة شوية
استاذة نجوان:
1/ هل ينبغي على المجتمع معاملة المرأة بطريقة تمييزية لصالحها حينما تحدث اية مشكلة بينها وبين الرجل؟ ولماذا؟
2/ هل المرأة دائما مظلومة ؟ أم انها قد تكون ظالمة؟ وفي حال كونها ظالمة للرجل او لاطفالها هل يتعين التسامح معها ام يجب اخذها بصرامة العدل وقوة الحق ؟ وهل في هذه الحالة يعد موقفنا اعتداء عليها وتخلفا وجهلا؟
3/ هل اذا كان الرجل اكثر اهلية واستحقاقا من المرأة في شأن من الشؤون أو حق من الحقوق او فرصة من الفرص ، هل اذا فضلنا الرجل عليها يعد ذلك انتهاكا لحق المرأة في المساواة مع الرجل ؟
4/ هل التمييز بين الجنسين على اساس التمايز الفطري في القابليات والوظائف الفسيولوجية يعد سلبيا مرفوضا؟
5/ هل المساواة بين الجنسين مظنة عدل دائما أم ان العدل اولى واشمل من المساواة التي قد تفضي احيانا الى اعطاء المرأة أو الرجل فوق ما يستحق؟
6/ انا مثلا مع المساواة في الفرص ، سواء فيما بين الذكور على حدة او الاناث على حدة او فيما بين الجنسين ، ولست مع المساواة في حصص المكتسبات من هذه الفرص المتاحة بشفافية للجميع ، لأن المعيار لذلك عندي هو الاهلية والجدارة .. فهل انا غلطان؟
لك احترامي
_______________
وقل رب اغفر وارحم وانت خير الراحمين.
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: SHIBKA)
|
نجوان يا اختي الكريمة
السلام عليكم ورحمة الله وبركاته
انا طمعان في كرمك
عليك الله اهتمي لي بكلامي دا شوية عشان هو في لب البوست
وبرفعوا ليك تاني عشان تشوفيهو كويس وتساعديني افهم انتوا عايزين شنو ومشكلتكم شنو الفارزين ليها كوم النضال ( النسوي ) مع اننا عيال حواء وآدم:
Quote: الدليل على كلامي دا هو اعتراضك انت مثلا وجذريا على سؤال د. سليمان في برنامجه عن اسباب الضرب!!
دا في نظري تمييز
لأنو المرأة دي نفسها اذا ذبحت زوجها دا نفسه بساطور ( و نسوان كتار عملوها زي ما انتي عارفة )وقاموا شنقوها..
حاتجي انت نفسك تحتجي هنا وتقولي المجتمع لازم يسأل عن السبب والقاضي ليه اغفل الدوافع!!
وحا تقولي دا تمييز وظلم وجهل وتخلف !!!
طيب مش احسن نكون موضوعيين يا جماعة على طول الخط ؟
مش اسس العدل افضل من اشتراطات المساواة .. وللجميع دون تمييز ؟
يعني المرأة البتدافعي عنها دي لو هي البادية مثلا وقامت بصقت في وجه زوجها الكان بناقشها سلميا في موضوع ما، فسكت وحذرها ، لكنها اتمادت واعطته شلوت ، وبس قام فجأة ثأر لكرامته ونفد صبره واداها كف .. مش بكون العنف في الحالة دي مفهوم ومتوقع وانساني كمان ؟
اذا قلنا ما في شئ اطلاقا بيبرر العنف ضد المرأة
يبقى تقولوا لينا طوالي العنف بين الرجال وبرضو بين النسوان مبرر ليه ؟ ووقوع الجرائم عموما مبرر ومفهوم ليه؟ واحيانا المتهم بيبرأ ليه ؟
ماهي نفس الاسباب !!!
انا عايز اقول ان الدفاع عن حقوق المرأة بطريقة جزافية يؤدي الى تكريس التمييز بين الجنسين.
|
الله يفتح عليك برد يساعدنا على الفهم وتجاوز حالة الالتباس العايشنها دي
انا شايف ان المرأة ما عندها مشكلة عنف مفروزة من مشكلة الرجل
بل شايف ان ( ظاهرة ) عنف المرأة تجاه الرجل أسوأ واكثر وحشية
المراة ياخي قاعدة تدي الراجل كف قدام اولاده وبترميهو بالعدة وكراع العنقريب والشبشب ورجال كتار بقشوا وشوشم ودمومم ويصموا خشومم كايسين السترة( ماعارفة الكلام دا يا استاذة وللا مافي مشكلة؟!)
وقليل جدا يصل عنف الرجل تجاه المرأة حد القتل مثلا ... قليل
لكن عنف المرأة ( كتير جدا ) بيصل حد ظاهرة قتل الزوج غدرا وتقطيعه اربا( والراجل المسكين نايم لا حول له ولا قوة)
ماسمعنا قالوا في راجل طالب يوم بآلية او ضمانات لحياته وهو نايم مع زوجته المستغلة للخلوة وضعف النائم وسكون الليل عشان ترتكب البشاعة المركبة دي( العكس ما قاعد يحصل .. كظاهرة )
اها انا كدا جوة البوست وللا برة ؟
اذا كان البوست بيبحث فقط عن ادانة جماعية ضد زول ما موجود معانا هنا فنحن بنطالب بالموضوعية في محاكمة اي زول
ونحن بنعتقد ان ادانة دكتور سليمان ما مكسب لقضية المرأة
ولكن المكسب هو في ادانة الظاهرة ( ظاهرة العنف الموجه ضد المرأة ) تمهيدا لتجاوزها
عشان كدا انا بنتقد هذه المطلب النسوي غير الموضوعي( اقصد تخصيص الرفض والادانة وحصره في خانة صالح المرأة اغفالا لبشاعات كتيرة بترتكبها حينما تتساوى في روح الاجرام مع الرجل
الغلط هو الغلط يا نجوان مش الزول هو الغلط
والمهم هو فصل الزول عن الغلط ( كان مرا كان راجل )
نريد المساوة في تجريم العنف
وليس التمييز النسوي بتجريم الرجل ( كان دكتور سليمان او راجل المرا المعنية )
عفوا على المطالبة بحقي في رد صريح وموضوعي من جانبك بدلا عن زحلقة افتح ليك بوست تاني
دكتور سليمان من حقه يقول : ضربوك ليه يازولة ؟
كان غلطانة وبادية بالعنف او اسبابه : ندين العنف وندينها وندين راجلها ونعوهم لتجاوز العنف ومبرراته
( نعم انا مصر ان العنف عنده مبررات منطقية طالما الانسان هو عبارة عن نفس ولحمة قلب واعصاب )
وبكرر تاني : ندين العنف ودوافعه وندين مرتكب العنف ومرتكب دوافعه في ان حالة الاتنين ارتكبوا الجرم قصدا.
اما مطالبات الادانة المجانية لصالح المرأة طوالي ولا شئ غير المرأة دي حاجة مضرة بسلامة المجتمع والعدل والحق وتعزز التمييز وما بنسمح بيها
سامحيني
_______________
اللهم ارنا الحق حقا والزمنا اتباعه وارنا الباطل باطلا والزمنا اجتنابه
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: sudania2000)
|
نجوان ...انا اسفة مقدما على المداخلة دى. عارفه انك حاولتى ما تطلعى البوست عن مساره.
سبيل..
Quote: ولما يعبر عن آهة ألم في شكل ( عكاز او بونية ) تنسوا اسبابه وتتجاهلوا معاناته وجذورها وطوالي تنحازوا للمرأة المسكينة الغلبانة بالضرورة
الدليل على كلامي دا هو اعتراضك انت مثلا وجذريا على سؤال د. سليمان في برنامجه عن اسباب الضرب!!
دا في نظري تمييز |
جادى انت ??? "اسباب اضرب" و "يعبر عن آهة ألم في شكل ( عكاز او بونية )"???
اها و انت شايف فى شنو ممكن يكون سبب للضرب? البيت ما نظيف ? ام الحوامة فى الحلة ?
يا سيدى ما فى شئ (ابدا...ابدا) بيبرر الضرب. و الناس بدل ما تقعد تضارب احسن كل زول يمشى فى حاله. للاسف النساء البيشكو من الضرب ديل نوعين. نوع مسكين و عاجز و عارفه انها لو تركت زوجها ما ح تلقى زول يعينها فى تربية اولادها او فى معيشتها. و نوع تانى معمول ليه غسيل مخ. و الواحده بتكون "ذيك كده" متخيلة انو فى سبب فى الدنيا ممكن عشانه بنى ادم تانى يضربها.
هسى اى زول لما يزهج من زول -فى الشارع مثلا- بيضربه عشان "يعبر عن آهة ألم"??
الضرب سلوك همجى و يجب معاقبة اى زول يقترفه (امراة او رجل). و يا سيدى ما فى امراة ادوها براءة عشان قتلت زوجها البضربها.
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: smart_ana2001)
|
الأخت نجوان
أتفق معك في خطورة الانخداع بالألقاب العلمية في مثل هذه المسائل الحساسة... لا يمكن أن تكون هذه نصيحة إنسان متخصص. لا بد من أن تبصر النساء بحقهن في حياة تحترم إنسانيتهن.
الأخ سبيل... والله بصراحة كلامك عجيب جدا ياخي دي حياة شنو... معاناة و جذور معاناة و عكاز و بونية. لو الحكاية وصلت المرحلة دي في حاجة اسمها فراق بإحسان. شخصيا ضد نظرية أن الأفضل للأسرة و الأولاد أن تستمر الحياة الزوجية كيفما اتفق... أحسن للأولاد مليون مرة أن يتربوا مع أحد الوالدين من أن يتربوا في بيت كله خلافات و انتهاك لآدمية أمهاتهم.
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: smart_ana2001)
|
نجوان معليش أعذريني أرد برضو علي الأخ سبيل,
زي ما العزيزه سمارت عملت لأنه الموضوع مهم,
Quote: ياريت القى عندك اجابة عشان افهم ليه انتو بتميزوا بين المرأة والرجل من خلال الاعتناء بمعاناة المرأة وحدها بينما هي معاناة ناجمة عن معاناة الرجل نفسه ( معاناته المتعلقة بالضغط الاجتماعي والاقتصادي والسياسي والنفسي والديني وضغط المرأة نفسها عليه ) !!
ولما يعبر عن آهة ألم في شكل ( عكاز او بونية ) تنسوا اسبابه وتتجاهلوا معاناته وجذورها وطوالي تنحازوا للمرأة المسكينة الغلبانة بالضرورة
الدليل على كلامي دا هو اعتراضك انت مثلا وجذريا على سؤال د. سليمان في برنامجه عن اسباب الضرب!!
دا في نظري تمييز |
يا أخ سبيل, الرجل متفوق جسمانيا علي المرأه,
لجوءه لاسلوب الضرب, أول شئ عجز منه, وعدم قدره علي حل مشاكله بالحوار,
لأنه كده بيستضعفها وبيستقوي عليها,
لمجرد انها زوجته وفي بيته,
لا أجد مبرر لأي انسان انه يضرب امرأه لأنه متفوق عليها جسديا,
أو لأنو عارف انها ما حتتجرأ ترد عليه بالمثل,
وبفتكر انه المرأه البتتعرض للضرب, لو في المره الأولي الضربها فيها اتصرفت تصرف سليم,
حتي لو عاشت معاهو بعد كده, عمرو ما حيفكر يكررها,
الكلام كتير, وعشان ما نغير لنجوان الموضوع, حأقيف هنا,
شكرا يا سمارت, انتي ميه الميه :)
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: smart_ana2001)
|
Quote: اها و انت شايف فى شنو ممكن يكون سبب للضرب? البيت ما نظيف ? ام الحوامة فى الحلة ?
يا سيدى ما فى شئ (ابدا...ابدا) بيبرر الضرب |
الاستاذة سمارت 2001
الاخت د. اماني الامين
السلام عليكم ورحمة الله وبركاته
ياخوانا كلامي بسيط
لمان المرأة مثلا تلجأ الى العنف اولا اثناء حوار محتدم مع زوجها
تبدأ بالعنف
ويقوم الراجل يعبر عن ما اسميته ( آهته بضربة بونية مثلا )
فهل في الحالة دي ندين (( العنف ضد المرأة والسلام) عشان الرجل متفوق عليها جسمانيا؟؟
ام ندين العنف من الطرفين معا
ونبحث عن جذور الخلاف والحلول؟؟
دا ملخص كلامي
الغريب فيهو شنو ؟
أنا لا اؤيد ضرب المرأة
ولكنني ايضا لا اؤيد مجانية تحميل الرجل وحده مسؤولية العنف ضد المرأة لأي سبب كان ( جسمه قوي وللا عنده قروش )
الدفاع عن المرأة بمجانية أنا اعتبره تمييز ضار بالمجتمع كله
يجب تحميل المسؤولية على عاتق من يجب ان يتحملها فحسب ، سواء كليا او جزئيا
هذا هو العدل والحق
كلامي دا ما مفهوم هسع ؟
قلنا عنف المرأة يصل حد القتل ازء زوج نائم بينما عنف الرجل لا يصل هذا الحد فأيهما اكثر وحشية
وبالتالي فالمطلوب التوقف عن عبثية الانحياز الاعمى وعبثية المطالبة بادانة اي رجل ضرب امرأة لمجرد انه رجل
هذا غلط كبير وتمييز جنسي اعمى
يجب ان نسأل لماذا؟
لأن العبرة بالسبب ( قالوا اذا عرف السبب بطل العجب )
فهل سبب العنف كان كافيا ومنطقيا أم لا ؟ بغض النظر عن المتضرر محل النظر رجلا او امرأة
دا قصدي
اماني الأمين انت تعلمين مدى احترامي لرجاحة عقلك وعلمك ، فاسمحي لي ان ارد على زعمك حول تفوق الرجل جسمانيا مما يبرر عدم قبول اي سبب يدعوه لضرب المرأة
اقل : هل ندين العنف والابادة الجماعية ضد البعوضة مثلا - من باب الرفق بالحيوان - لمجرد ان الانسان اقوى جسمانيا وعدة وعتادا منها؟ وهي التي تفعل الافاعيل وتزري بالكماة الاشاوس من الرجال ؟ هل نتركها ام ندين عنفها القاتل رغم انه لسعة خفيفة.
أرأيت كيف يجن جنونك حينما تلسعك بعوضة مهيضة الجناح وكيف يضطرب جنانك وتفكريين في الملاريا والعذاب المفضي احيانا الى الموت؟
اذا فالعبرة ليست في حجم المعتدي وانما في حجم الاعتداء ونوعه وما اذا كان كافيا لتبرير العنف المضاد ام لا ؟
يا سمارت ما قلنا يضربها لمجرد انها حايمة في الحلة طول اليوم ولكن بس نسأل عن سبب ضربها
فاذا كان منطقي وانها ( بالغت ) ما حانقول تستاهل ولكن حا ندين العنف اولا ثم ندين زوجها ثم ندينها في الآخر
بس لازم ندينها ما بنخليها لأنها امرأة زي ما البعض بطالب!!
لابد من العدل والقسطاس المستقيم حينما نعرض الى اية مشكلة او نزاع
لابد ان نسأل ( لماذا) اولا
لنفهم ثم نتصرف
ومافي شي اسمه بغض النظر عن اي سبب
البقول بغض النظر عن اي سبب دا اسمه متحامل ، ظالم رأيه ما مفيد الخ
وبالتالي د. سليمان من حقه ومن واجبه ان يسألها : ضربك ليه ؟ سؤال وجيه وقد تكون الاجابة مبررة للضرب المبرح رغم انه مرفوض!.
----------
ملحوظة: الناس القالوا لو المسألة وصلت حد الضرب فالطلاق افضل .. دا كلام سمح وغير واقعي
لأن اسباب الضرب ( المنطقي ) غالبا اشد واقوى من اسباب الطلاق
يعني لو الزوجة لطمته وطعنت في رجولته ظلما وبهتانا لتغيظه وطعنت في شرف اهله وجهرت بخسته ووضاعة اصله وعقله وامه واخواته في لحظة شجار وغضب
فليس من الواقعية ان نقول ان ضربها لم يكن مبررا
كلام ميت !!
ففي هذه الحالة فان الضرب والطلاق معا مبرران تماما وفي محلهما
ولا ننسى ان نكرر ما قلناه من أن كلمة ( مبرر ) ليس معناها ( مشروع أو جائز ) وانما معناها : سبب منطقي يجعل جريمة الضرب واردة
لأن الانسان مكون من مشاعر واعصاب وهو قابل للاستفزاز وجرح المشاعر وردة الفعل المفاجئة وفق ذلك.
لكم/ن جيمعا احترامي
__________________
رب اشرح لي صدري ويسر لي امري واحلل عقدة من لساني يفقهوا قولي
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: نجوان)
|
الأخت العزيزة نجوان
أستغرب اكتشافك(م) المتأخر لضحالة المستوى وسطحية التناول للقضاياالحياتية في ذلك البرنامج خاصة بعدالمشوار الطويل لسلسلة الدرروالدراب. وإذا ما نحينا الحلول السخيفة التي يقدمها والتبريرات الساذجة التي يسوقها جانباً، يمكننا أيضاً أن نلاحظ أن أسلوب الرجل في الحديث والجلوس وحتى الـ body language يشير إلى انه نفسه يحتاج وبصورة عاجلة إلى جلسات anger management
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: نجوان)
|
محمد عبدالقادر سبيل
كلامك واضح جدا و مفهوم .و انا قلت ليك انو ما مقبول ما عشان ما فهمته....ابدا عشان فهمته و ما عجبنى.
للاسف انت عندك الضرب ممكن يكون عندوا مبرر . و انا -للاسف- الضرب عندى ما مبرر نهائى.
انا شايفه انو لو فى رجل ضرب زوجته مفروض تسيبه علي طول .اما رد الضرب بالضرب فدى (ذى ما قلت فى المداخلة السابقة
) همجية
و الكلام ينطبق على الزوج . لو زوجته ضربته (و شتمت اخواته) احسن يسيبها و يمشى فى حاله .اما انه يضربها فده قلنا عليه شنو ? صح... همجية
بصراحة ما فى بيناتنا ارضية مشتركة عشان نبدا منها حوار. انت شايف ان الواحد لو زعل شديد ممكن يتفشى بالضرب. و انا شايفه ان ده هو الفرق بين الانسان و الحيوان.
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: بدر الدين الأمير)
|
Quote: محمد عبدالقادر سبيل
كلامك واضح جدا و مفهوم .و انا قلت ليك انو ما مقبول ما عشان ما فهمته....ابدا عشان فهمته و ما عجبنى.
للاسف انت عندك الضرب ممكن يكون عندوا مبرر . و انا -للاسف- الضرب عندى ما مبرر نهائى.
انا شايفه انو لو فى رجل ضرب زوجته مفروض تسيبه علي طول .اما رد الضرب بالضرب فدى (ذى ما قلت فى المداخلة السابقة
) همجية
و الكلام ينطبق على الزوج . لو زوجته ضربته (و شتمت اخواته) احسن يسيبها و يمشى فى حاله .اما انه يضربها فده قلنا عليه شنو ? صح... همجية
بصراحة ما فى بيناتنا ارضية مشتركة عشان نبدا منها حوار. انت شايف ان الواحد لو زعل شديد ممكن يتفشى بالضرب. و انا شايفه ان ده هو الفرق بين الانسان و الحيوان. |
ما عشان كدا بحبك يا سمارتي...
لا يوجدمبرر لضرب المرأة على الاطلاق,, لا مبرر لاستخدام اليد ابدا
خاصة بين الازواج
اي زوجة يضربها زوجها تطلقو طوالي لانها حتنجب اطفال يستخدمو يدهم برضو
الاب البضرب الام دا نموذج ابوي مرفوض يجب الا يعيش في اسرته
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: د.نجاة محمود)
|
الاستاذة الكريمة / سمارت
السلام عليكم ورحمة الله وبركاته
طبعا انت جزمت انو مافي ارضية للحوار بيناتنا
والعبارة دي سمعتها من كذا زميلة هنا قبل كدا ،، وواضح انها ايقونة تعلق لما يكون في افتراض بان الطرف الآخر بيحمل افكار سامة وتثير الحفيظة !!!
لكن معليش الدنيا كدا
لكن عدم الارضية لا يعني ان اتركك تقولي الانت عايزاه وتمشي ؟
من حقي ارد عليك باحترام ومن حقك تحترمي عدم الارضية دي وما تردي مشكورة !.
يا ستي
المشكلة الاكبر مش في الارضية المشتركة وانما في سوء الفهم ازاء المصطلحات
يعني انا شايف انك ملخبطة شوية في معنى كلمة( مبرر ) لمان نقول ( ضرب مبرر )
كلامك يدل على انك بتفتكري ( بل ومصممة بعد شرحي المكرر ) ان تبرير الضرب معناه قبوله او السماح به
دي مشكلتك ومشكلة اخريات هنا ايضا زي د.نجاة
ياخوانا لمان نقول ان في حالة ضرب مبررة
ما معناها انها مسموح بيها او مقبولة
وانما معناها مسببة تسبيبا منطقيا
يعني الزول السوي ممكن في الحالة يعمل يرتكب غلط فادح زي دا
ليه
عشان الانسان مكون من مشاعر واعصاب وتصورات ووجدان ومعتقدات واجات كتيرة بتفور وبتؤثر على سلوكه في احوال استثنائية زي دي ( الاستفزاز )
وكون اننا نتفهم سبب الضرب ما بيعني اننا حانغفره او نقول خلاص الزولة دي بتستاهل يضربوها
لكن ممكن نقول انها تسببت فيه( لحد ما ، لحد كبير ، بشكل صارخ ولا يطاق الخ)
انتي قلت ان رد الضرب بالضرب همجية
طيب همجية من جانب منو ؟
الرجل وبس وللا الطرفين الاضاربو!!!
أها
وتاني مليتي خشمك بقولة ان الغضب المؤدي للضرب حيوانية ( بالتحديد قلتي دا الفرق بين الانسان والحيوان) ما كدي؟
طيب اذا المرأة غضبت وضربت الراجل بالكمشة في نافوخو تعتبر في نظرك حيوانة وبس ؟
مشكلتكم بتعاينو من زواية واحدة وعاملين القصة هلال مريخ
ما عاوزين اي ادانة موجهة لعنف المرأة ضد الرجل ولا عايزين ذكر ليها
مع ان عنف المرأة زي ما قلنا قاعد يصل حد قتل الرجل النائم وتقطيعه اربا
بينما عنف الرجل غالبا ما بيصل مثل هذه الوحشية وانتو عارفين
انا ادعوكن الى ادانة العنف بمختلف صوره : لفظي ، جسدي ، جنسي بغض النظر عن النوع
واختم بالقول ازاء القول غير الحكيم بأن العنف لا يمكن تبريره ابدا
وبعد ما نكرر ( عسى ولعل ) ان ياخوانا التبرير لا يعني الموافقة وانما وجود المسببات المنطقية للعنف
اقول ان العنف - عموما - هو شئ غريزي فطري في الانسان واحيانا يكون ايجابيا وحضاريا واحيانا جريمة وعدوان
ومن صور العنف المبررة والمنطقية نذكر:
- الحروب ( ومنها حروب النضال والتحرير البيشاركوا فيها نساء احيانا رغم انها تقتل نساء ومدنيين)
- ضرب التأديب ( كرها واجبارا )
- المظاهرات والمواجهات مع رجال الامن والتعبير العنيف عن الغضب
- عقوبات المجرمين المدانين
- فض البكارة وما بها من مقاومة وقهر
- عملية التطبيب الجراحي والكي ( اكراه في لحظة ما بالتأكيد ولكن رجحان المصلحة هو ما يجيزها)
فهل هذه كلها يفعلها الحيوانات يا سمارت يا اختي ام يفعلها حتى المتحضرون لضرورتها
لا تقولي هذه ليست عنفا ، لأن فيها عنصر اكراه وتعذيب وقهر في لحظة ما من العملية
اخيرا سأسأل سؤالا
اذا كان الغضب والشعور القوي بالاستفزاز لا يبرر العنف وهو شغل حيوانات، فلماذا يقع ؟ هل لأن فاعلوه مرضى ماسوكيون بالضرورة؟
اذا كانوا مرضى فما من عذر اكثر من المرض !!!!
نحن نقول انهم تعرضوا لضغط شديد افقدهم صوابهم وتوازنهم ، هذا هو المبرر الذي ظل القضاء في كل الشرائع يقبله ليخفف به الحكم واحيانا يبرئ به تتصوروا
دا ما رأيي اسألوا اهل الذكر القانويين ( ملابسات الجريمة مسألة معتبرة ) لا ترفض جملة واحدة هكذا الا من جانب المجازفين
انتن هنا تمارسن التمييز ضد الرجل
دعونا ندين العنف وليس الرجال
دعونا ندين كل ماهو غلط وظلم وباطل
لأن ارث الانسان وغير الانسان على هذه الارض من الباطل والظلم والفساد والعنف قديم ومستمر ولا يستثني احدا الا من هدى ربي وعصم وقليل ماهم
ولذلك هنالك سجون للرجال والنساء معا
هنالك نساء كثر قلتن نساء اخريات وقلتن ازواجهن النائمين وحمسن الرجال على العنف والحروب وكسرن اعناق اطفالهن واطفال ضراتهم كثير
ومع ذلك فهن لسن حيوانات وانما مجرمات يجدن ما يبررن به ما فعلن
المطلوب فقط الموضوعية والعدل
المطلوب دائما ان نسأل بالله: لماذا فعل/ت ذلك لنتفهم الملابسات ونحدد مقدار الأدانة .
هذه ابجديات اسس العدل والموضوعية الانسانية
لكن احترامي
______________
اللهم اهدنا فيمن هديت وتولنا فيمن توليت
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: الجندرية)
|
يا سمارتي..
بالعكس اشكرك على التوضيح وطولة البال..
واتفق معاك 100% .. لا يمكن ان يكون هناك تبرير منطقي لإستخدام العنف بين الأزواج..
العلم هو الفيصل، وهذا ما فشلت قناة النيل الأزرق في إيصاله عبر الخبير والأكاديمي .. د. سليمان ..
_____
سلام يا جندرية..
البرنامج فعلا نجح في إيصال الرسالة عن طريق اصوات نساء حقيقيات يعانين ويطلبن المشورة المختصة..
لكنه فشل في إستضافة الكوادر المؤهلة التي بإمكانها التداخل ونشر الوعي بصورة علمية ومهنية..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: د.نجاة محمود)
|
شكرا ود الأمير..
العنف الزوجي اصبح متنامي بصورة مذهلة في السودان في الآونة الأخيرة..
بدلا عن محافل علمية لدراسة الظاهرة وعلاجها
يجي واحد زي د. سليمان على جهاز إعلامي وكخبير
يدعو للتعايش مع الضرب كظاهرة مستشرية في مجتمعاتنا
وينصح المرأة بأن تتجنّب غضب الرجل وتذعن له حتى لا يضربها..
لم ينصح ولا مرّة واحدة بأن يعرض الزوج نفسه على إختصاصي لمساعدته في ترشيد انفعاله
والتعبير عن نفسه بصورة تحفظ كرامة شريكة حياته ولا تدمّر توافق أطفاله..
_____
شكرا د. نجاة محمود،
لا يوجد مبرّر للضرب.. على الإطلاق..
لا للعنف المنزلي.. لا للنصح العشوائي الهادم
لا لإستضافة د. سليمان على شاشة النيل الأزرق..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: محمد الأمين موسى)
|
| Quote: انا بقى شايفه انو لو زوجى جاء البيت يوم زهجان و قام شتمنى و شتم اخواتى و امى و كان في ايدى اللحظة ديك طوة كبيرة .و خلينا نقول انى زولة سمينة و امينة و زوجى زول ضعيييف و ممكن عادى اضربه بالطوه دى خاصة انى زعلانة جدا انو شتم اهلى. انا ما ح اعملها .و شايفة انى او اى زول فى محلى عملها يكون همجى عارف ليه? لانى ما اتعلمت ان الضرب بيحل المشاكل .و الزول |
يا سمارت
ياخي والله ابشري
كلامك دا ذوق جدا وبيعكس وعي عميق ، وفعلا اضاف لي وافادني ووضح لي موقفك
فشكرا جزيلا ليك ياخ ( تاني انا حا اباري بوستاتك كلها عشان استفيد)
وكمان بتفق معاك تماما لكن بشرط ان كلامك دا كله لا يتعلق بالظاهرة ( ظاهرة العنف ضد المرأة ) وانما انتي بتتكلمي عن العنف الزوجي اذا وجه ليك انتي على المستوى الشخصي
موقفك في الحالة دي سليم جدا وراقي جدا ومفهوم ومن حقك
واما عن موضوعنا ( ظاهرة العنف الموجه ضد المرأة عموما) فهذا شأن آخر
وفي الحقيقة كلامي بينصب على الأخير
فالقضية حينما يتم تناولها كمعطى عام فانه يتم النظر اليها ورصدها وتحديد الموقف منها بناء على اسس موضوعية لا تنحو فقط نحو الذاتي من نوع ( كان علي انا دي غايتو موافقة )
يعني رأيك دا ذاتي غنائي مش موضوعي ومن الصعب اعتباره موقف كل النساء
شايفك كوركت ليهن بفوق وما قصرن ، لبسن تيابن وجنك : آآآآآآي صاااح !!!
ياخوانا لكن ما العنف مستمر ومع ذلك النسوان قاعداااات في بيوتن ما عشان الوليدات وبس وانما عشان حاجات تانية زي:
- السترة اخير من كلام الناس
- بيتي ولا بيوت الناس
- خايفة من شماتة النسوان
- عزة المراة في بيتي ياختي !!
- وما بنقدر على فراق الرجال
- وواحدة تقول ليك طاعة الراجل اجر
- وواحدة تقول الوحدة شيطان الخ
- والبتقول بصبر امكن ربنا يصلحو
واسباب كتييييرة تانية تجعل خيار النساء في النهاية هو البقاء في البيت رغم العنف ( وما بقدر اقول انهن غلطانات او ماعندهن كرامة وعزة نفس ولا قليلات وعي لأن مبرراتن دي ايضا لا تخلو من الحكمة والوعي بشروط المجتمع وقيمه وظروفه )
لاحظي انا ما اتكلمت عن المشكلة الاقتصادية ولا احتمال كونها بلا بيت عائلة تلجأ له او يتيمة ولا عن اجبار ابوها ليها الخ
بل اتكلمت عن رضاها فعلا ببيت الزوجية مهما كلف من القابلية للعنف وسلوك الزوج السكرجي الخ
اها يا سمارت
ديل كلهن موقفهن غير موقفك مش؟
يعني رايك دا ما الحل
عشان كدا دايرين نناقش ( ظاهرة العنف ) الموجه ليهن كان نلقى حل وفق شروطهن دي ( اقصد شروط انهن ما مرقات من بيوتن كان شنو وشنو)
وطبعا ما بعتقد انك مستعدة تحرضي النوعية دي عشان يتبنوا خيارك ويتحلوا الى ظاهرة تانية دايرة حل
شفتي كيف نحن كنا بنتكلم عن مشكلة المرأة ، وانتي كنت بتتكلمني عن نفسك ! ومن حقك
وموقفك ممن يكون سليم
لكن اخواتك الشايفات غير كدا يمشن وين ؟
انا بقترح ان انتي ونجوان ونجاة محمود تعملوا حاجة اكتر ايجابية من حكاية ( انا غايتو ما بوافق )
ايجابية من نوع يتواضع لشروط النماذج الأنا ذكرتها فوق دي ( المتمسكات بسجم برجالن ورماد بيوتن حتى الرمق الأخير دي)
تحالوا توجهو نضالكم باتجاه التأهيل والتدريب الهادف نحو ايجاد مناخ اسري مستقر هادئ وخال من العنف بالتي هي احسن
يعني
هذا النمط من النساء يجب ان تتعلم كيف تروض زوجها ، كيف تكسب احترامه لها ، كيف تمتص غضبه دون ان تفقد كرامتها ، كيف تدربه دون ان يشعر بانه خاضع لدورة تدريبية في حسن المعاشرة ( امساك بمعروف ) يعني كيف نجفف منابع العنف ضد المرأة من الجذور
ومن ناحية اخرى تطالبوا ببرامج تربوية ونفسية ودينية موجهة نحو الرجل في مواقع العمل والمدارس والجامعات ومؤسسات المجتمع المدني والمساجد ، من اجل ( امساك بمعروف ) مع تبيان فضائل ذلك
وهكذا يكون الرجل العنيف بين قوسين تدريب زوجته ( المدربة منكن سلفا لتدريبه) وتوجيه المؤسسات المذكورة
وهكذا لا نقول ان الظاهرة ستزول ولكننا نتوقع تحجيمها وربطها بالمجرمين والمرضى فقط
ايه رايك؟
احترامي ليك طبعا زاد كتير بعد سماع مداخلتك الواعية الأخيرة دي
اطلعي شوية يا سمارت من الذاتي للموضوعي
نجوان طبعا انا ما اعتذر ليك بطريقة تقليدية لكن حا اضحكك بحاجة
هل تصدقي انا ما قاعد اشوف قناة النيل الأزرق دي خالص ولا عارف د. سليمان دا منو ومستواه شنو زاتو؟؟!! والله جد
نقاشي دا كله بناء على القلتيو انتي وبس
وعموما :
انا ضد وضع المرأة في موضع الضحية دائما وبالضرورة فهذا محض عبث
انا ضد المسارعة الى تفكيك الاسرة بناء على العنف المحدود والمبرر (الذي تسببه او تشارك فيه المرأة)
انا ضد فصل ظاهرة العنف ضد المرأة عن ظاهرة العنف الاسري عموما
انا ضد المساواة بين العنف الاسري الناجم عن ملابسات منطقية من جهة ( العنف المبرر )، والعنف الاهاني المستخف بالمرأة من جهة ثانية، فالأخير فقط هو ما ارفضه دون ان اتردد او اشترط.
________________
اللهم اني اعوذ بك من ان اشرك بك شيئا اعلمه واستغفرك لما لا اعلمه
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: محمد عبدالقادر سبيل)
|
شفت يا سبيل؟ عشان نوع كلامك الفوق ده أنا قلت ليك اننا ما في بينتنا أرضية مشتركة للنقاش. أنا بحاول اشرح ليك عشان كده ختيت ليك مثال. جيت قلت لي ده ذاتي ...و دي انت بس ..و صفقت لي صفقة قوية على عقلى الراجح.
بعدين الأمثلة الختيتها دي كلها أنا جمعتها في نوع واحد. حاصل ليها غسيل مخ.
Quote: - السترة اخير من كلام الناس
- بيتي ولا بيوت الناس
- خايفة من شماتة النسوان
- عزة المراة في بيتي ياختي !!
- وما بنقدر على فراق الرجال
- وواحدة تقول ليك طاعة الراجل اجر
- وواحدة تقول الوحدة شيطان الخ
- والبتقول بصبر امكن ربنا يصلح
- والبتقول بصبر امكن ربنا يصلحو |
عزة شنو مع الضرب؟ و ليه تتحسر علي فراق زول بيهين كرمتها كل يوم ؟ ما أظن في غسيل مخ اكتر من كده.
المشكلة ما فيها هي بس. المشكلة ح تكون في أطفال اتربوا في اسرة مشوهة. عمرهم ما ح يتعلموا يحترموا أزواجهم و زوجاتهم. و ح يكون عندهم شعور دايم بعدم الأمان.
عارف الحل شنو؟ الحل في وضع قوانين لردع العنف. و أبعاد امثال د. سليمان من الاعلام.
إحنا ما بندين سؤ معاملة المرأة بس مزاج و حب في المناكفة. ابدا.
إحنا عارفين اثار الموضوع ده علي البني ادم. سؤ المعاملة من الشريك بيخلي الواحدة (او الواحد) يكون ما واثق من روحو. و أكيد ما ح يكون عضو نافع في مجتمعوا. و اغلب حوادث القتل اللي انت من قبيل بتتكلم عنها سببها ان الواحده في النهاية بيكون فاض بيها و تعبت من الضرب. لكن لان ظروفها الاقتصادية صعبة او معمول ليها غسيل مخ و كانت فاكره انها مفروض تصبر علي الضرب و الاهانة بتحاول تصبر فى البداية. لكن النهاية دائما تعيسه.
| Quote: هذا النمط من النساء يجب ان تتعلم كيف تروض زوجها ، كيف تكسب احترامه لها ، كيف تمتص غضبه دون ان تفقد كرامتها |
انت بتتكلم عن زول عندو مخ و ممكن تتناقش معاه. و انا بقول ليك ان البيستعمل يدو لما يزعل ده بالنسبة لى حيوان.
انا ما عندى حاجه ممكن اقدمها للمعمول ليهم غسيل مخ غير انى اقول ليها: يا بنت الناس ده ما بيت و لا دى اسرة و لا ده شريك حياة. و ما ح تضري نفسك بس. ح تضري اولادك. الحاصل من ضرب و سؤ معاملة ده ما حاجه طبيعية فى الزواج.
عارف يا استاذ سبيل ضرب الزوجات بالنسبة لى ذى التحرش الجنسى بالطفال. لازم تفهم اطفالك ان السوك ده غلط. و ما مفروض يقبلوه و يسكتوا عليه. ذى ما انت ما بتقول لطفلك لو حصلت ليه حاجه ذى دى " انت الموديك جنب الناس الكبار شنو". برضوا ما بتقول لزوجه "انتى عملتى شنو عشان يضربك."
انا هنا ما بشبه الزوجه بالطفل. لكن ..الاتنين ضحايا. و انا ضد لوم الضحية.
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: smart_ana2001)
|
| Quote: انا ضد المسارعة الى تفكيك الاسرة بناء على العنف المحدود والمبرر (الذي تسببه او تشارك فيه المرأة) |
بس...هنا...بعد كل العربى الصرفناه انت بترجعنا لمربع صفر.
يا سيدى....انت عاوز ناس بيضربوا بعض يعيشوا مع بعض ما دام الضارب ليه حق يضرب المضروب ??
انا مع تفكيك الاسرة دى لانها ما اسرة. دى علاقة ما طبيعية. لانها ح تنتهى بان المضروب يوم ح يرد الضرب (او يستعمل الساطور).
انت متخيل يكون فى موده و رحمة بين ناس بيتضاربوا?.
لو اجابتك "نعم" . ح اقول ليك ديل ناس انا لسه ما لاقيتهم فى حياتى.
لو قلت "لا"...ح اقول ليك : ما قلنا الكلام ده قبل 3 يوم
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: smart_ana2001)
|
Quote: انا مع تفكيك الاسرة دى لانها ما اسرة. دى علاقة ما طبيعية. لانها ح تنتهى بان المضروب يوم ح يرد الضرب (او يستعمل الساطور).
انت متخيل يكون فى موده و رحمة بين ناس بيتضاربوا?.
لو اجابتك "نعم" . ح اقول ليك ديل ناس انا لسه ما لاقيتهم فى حياتى.
لو قلت "لا"...ح اقول ليك : ما قلنا الكلام ده قبل 3 يوم |
الاجابة نعم
لأنو المودة ما حاتكون بين ناس بيضاربوا وانما بين ناس ( كانوا زمان ) بيضاربوا
يعني نضالكم مفروض يتحول من تشجيع النسوان البيعانن من الضرب على الانفصال بحثا عن المجهول، الى عملية اصحاح بيئي ونفسي واجتماعي من خلال ( عملية منظمة ومدروسة ) تحتوي الظاهرة وتستوعب الآخر لأنه ضحية
منو القال ليك الضارب ما ممكن يكون ضحية زيو زي المضروب
كفاية انو يكون جاهل أو فقران او ضعيف الاعصاب عشان يكون ضحية
يجب ان نكون اكثر جدية وشجاعة في مواجهة الظاهرة بدلا عن الانسحاب عبر الانفصال والتعرض لظروف اجتماعية واسرية وتشريد اطفال ووو تعقيدات محتاجة لألف حل آخر
ناس كتار ( كانوا اعداء ) واتحولوا الى احباب
ومجتمعات كتيرة كان تتفتاهم بالحروب والدماء الآن اصبحت مجتمعا واحدا منسجما ( امريكا مثلا )
اما انت فلابد انك تشجعين على انفصال الجنوب
ليه
لأنه طالما في عنف مستمر من يوم الاستقلال ومافي احترام متبادل فيجب الانفقال فورا
يعني كل مساعي العقلا للوحدة والعمل على ايجاد ارضيات مشتركة عندك بلا قيمة
دا ياهو منطقك يا سمارت
وبعدين اذا اي زول اعتدى على زول يصبح تاني مافي اي تفاهم بيناتهم الى الابد ، اتخيلي كيف حال الدنيا
السلام يا سمارت مش شئ معروف وعنده قيمة وضرورة اطلاقا الا بعد معرفة العنف والشعور به
الدعوة الى السلام والمحبة هي نتاج مصارعة واقع اسمه العنف والنزاع والكراهية
ما ممكن يكون الحل : نجيبها من قصيرها : طالما في نزاع عنيف يبقى خلاص مع السلامة ومافي تفاهم ( حردة)
والمبرر هو ان الصراع بعنف شغل حيوانات وبس !!
ما اظن الحياة بسيطة بالشكل دا يا سمارت
ولدي حسام مشى معانا صلاة العيد
قعدنا نقول ليه انت ما تقيف بيجاي معاي الناس الكبار تعال بهنا مع الشفع
قال لينا خلاس ما عايز ماعايز ماعايز
قال عشان حانوقفوا كدا جنب وسام البيعمل معاه مشاكل دايما !!
اها انت هسع عايزه النسوان يخلن الصلاة كلو كلو مع الناس بتاعين المشاكل بدلا عن اصلاح ذات البين
الحردان ما حل وانما هروب .
لك احترامي
______________
رب الا تغفر لي وترحمني أكن من الخاسرين
| |
|
|
|
|
|
|
|
|
 Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: وليد عبد اللطيف)
|
يا أخ سبيل,
انت هنا بتمثل وجهة النظر اللي بتشوف العنف الأسري ما نهاية الدنيا,
وبتناقش في بنات الحيز الضيق ده اتجاوزوه بعلمهم وعملهم واحترامهم لذاتهم,
وبيحاولوا يطلّعوا غيرهم من البنات من ذات الحيز,
الضرب نهايه يا أخ سبيل,
لاتستقيم بعده حياه,
النماذج الصابره علي تعامل زي ده مجبوره, وفي وضع ما بيسمح ليها تختار,
أو زي ما قالت سمارت, اتعمل ليها غسيل مخ وبقت ما عارفه تحترم نفسها وتحافظ علي كرامتها,
مافي سبب ولا مبرر في الدنيا ولامقبول انه شريك يضرب شريكه تحت أي مسمي في الدنيا,
ولو ده حصل يبقي العلاقه وصلت طريق مسدود, لاتستقيم بعده حياه,
وعشان خاطر الصحه النفسيه للزوجه وللأطفال أفضل الانفصال,
لأنه طفل بيشوف أبوهو بيضرب أمه لا يمكن يكون سليم نفسيا مستقبلا,
وزوجه بتتعرض للعنف الجسدي لايمكنها تربية الأطفال بصوره متوازنه,
يا أخ سبيل علاقه زي الزواج لو بقي الرابط فيها خوف من الزوج أو من الناس أو خوف من عدم الانفاق,
تبقي علاقه ما صحيه ,, وتبقي سجن,
وما بتعيش فيها الا اللي أصلا ما اتزوجت عشان موده ورحمه ومحبه وأسره سليمه معافاه,
بتعيش فيها اللي اتزوجت عشان مأوي وانفاق ومظاهر قدام الناس, وضل راجل ولا ضل حيطه,
زي دي ممكن تنضرب وتاني يوم تلبس توبها وتطلع لجاراتها كأنه ما حاصل حاجه, ومن يهن يسهل الهوان عليه,
لكن اللي اتزوجت انسان محبه وتقدير ليهو وثقه فيهو,
يومه اللي يضربها تبقي دي نهاية الدنيا في عينها مش بس نهاية علاقتهم,
الضرب يا أخ سبيل بيهدم الزواج,
ولما تطلب من انسانه انها تروض زوج عنيف معاها في المنزل,
تبقي بتعرضها لضغط نفسي ما بتقدر انت تتحمل تبعاته,
ودي هي زاتها اللي في يوم حتشيل ساطور وتنتقم منه,
أو أطفالها حيطلعوا عنيفين أو مجرمين أو ثقتهم في نفسهم مهزوزه,
يا أخ سبيل المفروض يكون في قانون بيمنع ضرب حتي الأطفال في المنازل,
وحضرتك عايزنا نتقبل ضرب الزوجات كواقع ونتعامل معاهو؟
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: نجوان)
|
ــــ
سلام يا نجوان
بصراحة فكي حلتنا أحسن منك ياأستاذنا سليمان ..!!!
أعرف جيّد إنك أستاذي لكن للأسف الشديد هي سياسة التعليم العالي التي قلبته الإنقاذ إلي التعليم ( الواطي ) وهي التي أنتجت أستاذة ودكاترة جامعات غير مؤهلين أقل ما يكون للتدريس ناهيك عن برنامج تلفزيوني علي الهوا ومع الجمهور , ولولا رحمة الكتب علينا وصبرنا علي المعرفة كنا خرجنا (بقد القفة) تابعت كثير من حلقاتك وهي تفتقد للمنهجية والعلمية التي قام عليها علم النفس كعلم حديث, فرجاء رفقاً به وبنا.
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: نجوان)
|
سمارتي وأماني..
شكرا للخطاب العاقل، الإنساني، والمنطقي..
_____
برنامج "مافي مشكلة" يبث هذه الأمسية على شاشة النيل الأزرق
حوالى الساعة 11:30 بتوقيت السودان..
لا لإستضافة من لا يشجب العنف الزوجي
لا للف والدوران وخيانة المهنية والعلمية..
لا لإستضافة د. سليمان..
ونتمنّى ان تعود سارّة أبو كما كانت وتتبنّى ما يتسق مع العلم من مواقف واضحة
وتكون عنصر فاعل في نشر الوعي في المجتمع السوداني.. بدلا عن نظام عصاية مرفوعة وعصاية مدفونة..
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: نجوان)
|
Quote: انت هنا بتمثل وجهة النظر اللي بتشوف العنف الأسري ما نهاية الدنيا,
وبتناقش في بنات الحيز الضيق ده اتجاوزوه بعلمهم وعملهم واحترامهم لذاتهم,
وبيحاولوا يطلّعوا غيرهم من البنات من ذات الحيز, |
الاستاذة اماني الأمين
السلام عليكم ورحمة الله وبركاته
شكرا على المداخلة والتنوير
البنات ديل على العين والراس ومن حقهن يتبنن خيارن ( مافي مشكلة )
لكن من حقنا نقول رأينا :
1/ بتقولي : | Quote: الحيز الضيق ده اتجاوزوه بعلمهم وعملهم واحترامهم لذاتهم |
انا حقيقي ما عارف ياتو حيز ضيق دا الانتي بتقصديه يا اماني
وليه سميتو ( حيز ضيق ) تحديدا؟، وبعدين ياتو الحيز الواسع البديل له لو سمحت ؟ هل حياة الوحدة والعزوبية؟ شن وساعها؟
2/ | Quote: وبيحاولوا يطلّعوا غيرهم من البنات من ذات الحيز |
طيب اذا نجحوا يقنعوا اي امرأة اتعرضت لكف من زوجها انها تتطلق فورا ، تفتكري في كم كم كم واحدة حاتكون مطلقة محترمة واولادها ناجين من الاثار النفسية الناجمة عن ( فرت ) كف من ابوهم لأمهم وبعد داك عاشوا معاها في تبات وبلا رعاية ابوية ( يعني ايتام ) وللا حا تخليهم لزوجة ابوهم ؟
تفتكري يا اماني الاثار النفسية والاجتماعية للاولاد والمرأة ذاتها بعد الطلاق الناتج عن ( فرت كف ) حا تكون اقل من اثار ذلك الكف الواحد سواء على المطلقة او اولادها ؟
3/ مش الأفضل نكون علميين وامناء مع انفسنا ونفرق بين مشكلتين هنا : الأولى زولة بتتعرض للضرب دائما لأقل خلاف مع زوجها ، والتانية مشكلة واحدة وصل خلافها مع زوجها في مرة الى ضربة لم تسبب اذى جسيم ؟
مش من مصلحة الاسرة اننا نجري هذا التفريق الموضوعي ليكون موقفنا من الحالتين مختلفا نوعيا؟
اقصد ان الرجل البيحترم زوجته دائما وبيحسن اليها وبحبها ، لو في مرة استفزته لغاية ما ضربها بما لا يؤذيها ثم بعد داك اعتذر ليها وندم ووعدها انه ما حايكررها هل منطق وعدل اننا نضعه في خانة واحدة مع معتاد الاضطهاد والاذلال؟!.
4/ هل البطالبن بضرورة الانفصال وكمان زي ما بتقولي انتي ( وبيحاولوا يطلّعوا غيرهم من البنات ) اذا كانوا بمواجهة حالة زوجة هي التي اعتدت على زوجها بضربة كمشة او شبشب في وشو فهل كمان عندهن نفس الموقف ؟
يعني حا يحاولوا كمان انهم يطلعوا غيرهم من الحيز الضيق دا ؟ وللا عايشين النظرة الضيقة المنحازة بتاعت ان العنف مرتبط دائما بالرجال واما النساء فهن دائما وابدا ضحية العنف( كلام مجاني )
طبعا منطقيا بتوقع تكون اجابتك ان كل عنف اسري سواء من جانب الزوج او الزوجة يجب ان يكون مبررا مقبولا وكافيا جدا لهدم تلك الاسرة الفاسدة فورا !!
يللا خلينا نضيف كم الاسر اللي حا تنهدم بسبب البنات ال( بيحاولوا يطلّعوا غيرهم) من الحيز الضيق اياه
والله يا اماني كان العلم والعمل مدعاة لخرب بيوت الناس 0 مش بيوتهم براهم ) لأ ، كمان بيحالوا يطلعوا النسوان من بيوتن عشان يكونن محترمات بلا ازواج ، يبقى دا ياهو العلم الجد جد بينفع المجتمع
ياخوانا المعركة الحقيقية للناس المتعلمين ودورهم هو انهم ينتشلوا الناس الجهلاء - بمن فيهم الازواج - من امراضهم الاجتماعية ، مش يتهربوا من النضال الايجابي ويزيدوا المشاكل الاجتماعية عن طريق زيادة عدد المطلقات والاولاد فاقدي الاستقرار الاسري وعديمي الابوة الى الابد .
اماني
هل انتو عايزين النسوان العنهن مشاكل اسرية في مجتمعنا يكونن زي الخواجيات عايشات براهن بلا ازواج كدا احسن فعلا؟
يعني النموذج الغربي في المجتمع الشرقي الاسلامي
هل نساء الغرب العايشات وحيدات ديل سعيدات او مرتاحات او حاسات بالاحترام والكرامة فعلا
البعرفو انا ان الحياة دي ما بنلقى فيها كل شى حسب مزاجنا ومعاييرنا
ومن حقنا نعيش بالطريقة البتريحنا
ولكن ما من حقنا نحاول نحرض ونخرب بيوت الناس الراضين بضرر اقل من ضرر افدح منه
وما من حقنا نعتبر ان حالة عنف واحدة تحدث في اسرة مستقرة وسعيدة لعشرات السنوات كافية لانهاء هذه الاسرة بدعوى الكرامة واحترام النفس
قال تعالى ( والعصر ، ان الانسان لفي خسر ، الا الذين آمنوا وعملوا الصالحات وتواصوا بالحق وتواصوا بالصبر ).
شكرا لكم
________________
رب الا تغفر لي وترحمني اكن من الخاسرين
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: محمد عبدالقادر سبيل)
|
أخ سبيل ,
تاني مرحب بيك,,
أخدت أول تلاته سطور في مداخلتي, وأهملت باقي المداخله كلها,
مامشكله نوضح تاني,
Quote: انا حقيقي ما عارف ياتو حيز ضيق دا الانتي بتقصديه يا اماني
وليه سميتو ( حيز ضيق ) تحديدا؟، وبعدين ياتو الحيز الواسع البديل له لو سمحت ؟ هل حياة الوحدة والعزوبية؟ شن وساعها؟ |
الحيز الضيّق هو الخضوع والقبول بزوج ظالم لأنه ضل راجل ولا ضل حيطه.
Quote: طيب اذا نجحوا يقنعوا اي امرأة اتعرضت لكف من زوجها انها تتطلق فورا ، تفتكري في كم كم كم واحدة حاتكون مطلقة محترمة واولادها ناجين من الاثار النفسية الناجمة عن ( فرت ) كف من ابوهم لأمهم وبعد داك عاشوا معاها في تبات وبلا رعاية ابوية ( يعني ايتام ) وللا حا تخليهم لزوجة ابوهم ؟
تفتكري يا اماني الاثار النفسية والاجتماعية للاولاد والمرأة ذاتها بعد الطلاق الناتج عن ( فرت كف ) حا تكون اقل من اثار ذلك الكف الواحد سواء على المطلقة او اولادها ؟ |
الطلاق قرار فردي, مافي زول بيقنع بيهو زول,
اللي بنحاول نوصله انه الحياه ما بتستقيم مع ظلم,
توعيه يعني,
أوّل حاجه أنا شخصيا موضوعي هنا الزوج البيضرب زوجته,
لأني ما لاقاني ولا سمعت عن زوجه ضربت زوجها لحد الان,
الكلام ده بيحصل وين؟
ياتو زوجه دي البتضطهد زوجها ولا تضربه,
في مجتمعنا ده؟
طيب الانت بتسميهو "فرت كف" ده واضح انك ما حاسي باثاره النفسيه,
"فرت كف" بيهدم انسان,
بالضبط زي المرايه لما تتكسر لمليون حته, وتاني أبدا ما بتتصلح,
اثار الطلاق السلبيه دي هي ضغوط المجتمع البتخلي زوجه تعيش مع زوج ما بيحترمها وبيهينها,
خوف من الناس, وده منطق الضعف البنتكلم عنه من قبيل,
بعدين نفرض انهم اتطلقوا, البخلّي الأب لو أب صالح ما ينفق علي أولاده شنو؟
يعني عشان طلق زوجتو بقوا ديل ما أولاده وما ينفق عليهم؟
ده فهم انسان تعيش معاهو واحده بتحترم نفسها؟
Quote: يللا خلينا نضيف كم الاسر اللي حا تنهدم بسبب البنات ال( بيحاولوا يطلّعوا غيرهم) من الحيز الضيق اياه
والله يا اماني كان العلم والعمل مدعاة لخرب بيوت الناس 0 مش بيوتهم براهم ) لأ ، كمان بيحالوا يطلعوا النسوان من بيوتن عشان يكونن محترمات بلا ازواج ، يبقى دا ياهو العلم الجد جد بينفع المجتمع |
الأسر ما بتنهدم بسبب البنات اللي عايز تصورهم خرابات بيوت,
الأسر بتنهدم من الظلم وعدم الاحترام اللي هو المفروض ركيزة علاقه زي الزواج,
انت ليه يا أخ سبيل عايز تصور علاقة الزواج كعلاقة ملكيه تبيح الاضطهاد؟
الزواج علاقه انسانيه عندها مدخل وعندها مخرج,
والبقاء فيها مرتبط بالاحترام المتبادل والموده والرحمه,
ده الشئ الطبيعي, وأي حسابات تانيه تبقي ضغوط ضد المرأه ولوي لذراعها,
عشان تقبل تعيش تحت أي ظرف وما تطالب بانسانيتها اللي هي هبه من ربنا ما من مخلوق,
نحن ما قلنا الزوجه تسيب الزوج لي أي سبب ,
الزوجه في مجتمعنا بتعيش مع زوجها علي الحلو والمر,
وبتسانده في أضعف حالاته, وبتفرح لنجاحه, وده واجبها,
قلنا لو ضربها ودي جريمه يا أخ سبيل, في حقها وفي حق أطفالها,
يعني بدل ما الزوجين يواجهوا مصاعب الدنيا مع بعض,
حيكونوا سبب تعاسه وأذي نفسي لبعض, هي ناقصه يا أخ سبيل؟
الدنيا دي ناقصه صعوبه؟
Quote: هل انتو عايزين النسوان العنهن مشاكل اسرية في مجتمعنا يكونن زي الخواجيات عايشات براهن بلا ازواج كدا احسن فعلا؟
يعني النموذج الغربي في المجتمع الشرقي الاسلامي
هل نساء الغرب العايشات وحيدات ديل سعيدات او مرتاحات او حاسات بالاحترام والكرامة فعلا |
لاحول ولاقوة الا بالله,
ليه بتقولنا كلام ما قلناهو؟
هسي الجاب سيرة الغرب منو؟
تاني مره حضرتك اديتني احساس انك فاهم علاقة الزواج بصوره غريبه جدا,
علاقة الزواج ما علاقه ذات اتجاه واحد,
علاقه ذات اتجاهين
الضرب في حد ذاته لو وقع يبقي العلاقه فشلت,
وفشلها ما نهاية الدنيا,
الحياه بتستمر ..
علاقه فاشله الواحده تتجاوزها وتبدأ حياه مع نفسها وأولادها موفورة الكرامه,
أفضل من فشل يومي متجدد, وضغط نفسي ما محدود,
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: Amany Elamin)
|
اماني
Quote: الطلاق قرار فردي, مافي زول بيقنع بيهو زول,
اللي بنحاول نوصله انه الحياه ما بتستقيم مع ظلم,
توعيه يعني |
معليش في الحالة بكون مهم جدا نسأل
الفرق شنو عندك بين التوعية الايجابية والتحريض السلبي على خراب البيوت يا اماني
يعني متين بكون نضالكم اسمه تحريض الزوجات على التمرد وهدم الاسر من خلال التوعية ؟
Quote: لأني ما لاقاني ولا سمعت عن زوجه ضربت زوجها لحد الان,
الكلام ده بيحصل وين؟
ياتو زوجه دي البتضطهد زوجها ولا تضربه,
في مجتمعنا ده؟ |
طيب طالما اعترفت بانك ما عارفة خلينا نساعدك من قوقل
| Quote: والجانب الآخر من العنف الأسري الذي لا يحظى بقدر كبير من الاهتمام أيضاً هو ذلك الموجه من المرأة ضد الرجل، فحسب بعض الدراسات يتسبب الرجال في إيذاء بدني أو ضرر جسدي للنساء بمعدلات أكبر، وإن كان الجنسان يتساويان في عدد مرات العنف الموجه ضد الطرف الآخر، وربما قد تزيد مرات العنف الموجه من النساء ضد الرجال. أي أن النساء قد يكنّ على القدر نفسه من العنف ضد الرجال، ولكن بسبب الفارق في القوة البدنية فقط قد تتسبب نوبات عنف الرجال في إصابات أكبر للنساء. وإذا ما اقتصرنا الحديث على نوبات العنف والإيذاء اللفظي وحدها فربما تتفوق النساء على الرجال بمراحل، وخصوصاً إذا ما أدرجنا التذمر الدائم، والشكوى المستمرة، والإهانات المستترة. وهذا ما تظهره دراسة أجراها مركز التحكم في الأمراض والوقاية في الولايات المتحدة، حيث أقرت 70 في المئة من النساء بقيامهن بالهجوم البدني على الأزواج من جانب واحد، وهو رقم يمثل أكثر من ضعف ما أقر به الرجال الذين بلغ معدل عنفهم البدني من جانب واحد تجاه زوجاتهم نسبة 29 في المئة فقط |
أها شن قولك
هل ما زالت متمسكة بالطلاق ؟
كان عايزة ترمي النسوان في هموم وخزي الوحدة والحرمان الزوجي قولي اي ضربة شمال يمين طوالي طلاق !!
Quote: "فرت كف" بيهدم انسان,
بالضبط زي المرايه لما تتكسر لمليون حته, وتاني أبدا ما بتتصلح,
اثار الطلاق السلبيه دي هي ضغوط المجتمع البتخلي زوجه تعيش مع زوج ما بيحترمها وبيهينها, |
اي آثار سلبية ممكن تزول مع الوقت
بدليل ان العنف الاسري ما مقصور على ( ضرب الزوج لزوجته )
هنالك ضرب الزوجة للزوج كما قدمنا
عنف البنت ضد اخيها
عنف الأخ ضد اخته
عنف الأم ضد ابنتها او ابنها
عنف الأب ضد ابنه او ابنته
هل في كل حالة يحدث فيها كف من ابوك او اخوك اتشاكلت معاه حول احقية الدولاب او استعمال التلفون خلاص انتي كدة اتشوهت نفسيا وانهدمت انسانيا وكرامتك الى الابد باتت في التراب ؟
ياحليلك والله انت انسانة رقيقة ومثالية بالجد
انا العايز اعرف انتوا مجتمعكم دا وين الما فيهو ولد بيتشاكل مع اخته ولا ام بتقرص بنتها في وركها وتقول ليها يافاجرة يا قليلة الادب بتتكلمي مع اولاد الشارع من فوق الحيطة كمان يخسي عليك يا قليلة الحيا
العنف الاسري دا كله ما بتعرفيهو ولا سمعت به كله كله
وللا كان عملته الزوجة يبقى حلال وما عنف ولا بيهدم الانسان ويفقده ثقته بنفسه ؟
ياخي دي مقاييس غربية يا اماني
نحنا في السودان حياتنا في حد ذاتها مواجهة عنف وممارسة عنف ههههه
Quote: بعدين نفرض انهم اتطلقوا, البخلّي الأب لو أب صالح ما ينفق علي أولاده شنو؟
يعني عشان طلق زوجتو بقوا ديل ما أولاده وما ينفق عليهم؟
ده فهم انسان تعيش معاهو واحده بتحترم نفسها |
طبعا انا عهدي بك انك زولة عميقة الفهم لكن هنا امكن استعجلت شوية
يعني هسع الابوة عندك بس نفقة ؟ اوعا تكون الزوجية عندك مجرد نفقة برضو؟ لأني شايفك بتتكلمي عن الظروف الاقتصادية البتعصر الزوجة على ضل الحيطة .. معقولة بس يا اماني؟ ابتسار شديد
Quote: الأسر ما بتنهدم بسبب البنات اللي عايز تصورهم خرابات بيوت,
الأسر بتنهدم من الظلم وعدم الاحترام اللي هو المفروض ركيزة علاقه زي الزواج,
انت ليه يا أخ سبيل عايز تصور علاقة الزواج كعلاقة ملكيه تبيح الاضطهاد؟ |
في دي عاد بالغت عديل
انا انا بصور علاقة الزواج كملكية ؟ بأمارة ايه ؟
الزواج شراكة ن والشركة لو اتعرضت لبعض الخسائر او سوء الادارة الشركاء بيقعدوا ان يحلوا المشاكل مش طوالي فرتق فرتق
عشان كدا انا زي ماقالت سمارت الفهمتني بطريقة افضل لمان قالت عني :
Quote: انا فاهمة انك لا تشجع الضرب و لا تعتمده طريقة للتفاهم . لكن انت شايف انو ممكن الزول (امراة او رجل) يقفدوا اعصابهم و يستعملوا اياديهم فى حالات معينة. و حتى ده انت ما شايف انه صح. لكن نعمل شنو البنى ادم لحم و دم و بينفعل و بيغلط.
اها ده رائك... صح? هل احنا متفقين انو ده رائك ? كويس. |
ارجو انك تفهميني زيها.
وبعدين بتقولي ان الاسر بتنهدم بسبب الظلم صح؟
طيب الظلم دا نواجه بوسائل تجفيف منابعه عشان نحصل على اسر رايقة ومتفاهمة وبالتالي مجتمع صحيح ومستقر وللا نحرد ونقول ما عايزين ونحقق الخلاص الشخصي ؟
وين دور التنورات في قهر الظاهرة بوسائل ذكية تروض مرتكبي جريمة العنف بحكمة وذكاء وعمق
مش فقط مجرد بقوانين رادعة نتيجتها نسوان مطلقات بالكوم واولاد مشردين ومجتمع مدمر زي المجتمع الغربي
عايزين نضال من جانبكم لرفع الوعي التربوي والاخلاقي والديني لدى افراد الاسرة مش الزوج وبس ؟
محتاجين ثورة تربوية اخلاقية
محتاجين مجتمع الصفات
وين دوركم
بس تقولوا : خلاص ما عايزين ماعايزين؟
Quote: لاحول ولاقوة الا بالله,
ليه بتقولنا كلام ما قلناهو؟
هسي الجاب سيرة الغرب منو؟
تاني مره حضرتك اديتني احساس انك فاهم علاقة الزواج بصوره غريبه جدا,
علاقة الزواج ما علاقه ذات اتجاه واحد,
علاقه ذات اتجاهين
الضرب في حد ذاته لو وقع يبقي العلاقه فشلت, |
هسع بعد ردودي الفوق دي تفتكري انا محتاد ارد على كلامك دا ؟
عشان بحترمك شديد مضطر ارد
من الفات لابد انك عرفت علاقة الغرب شنو بدعوة الانفصال فورا من اول عنف اسري
ونقعد عزابة
وطبعا اذا الاب اصر على العودة والصلح حا تخلي بيت الب برضو ( انا ما بتكلم عنك انا بتكلم ان المرأة في المجتمع السوداني )
اها كمية من العزابة والعزابيات في بيوت خاصة ، والآولاد ما معروفين مع منو ، وغرائزهم الجنسية حا تمشي وين؟
كدا ما في علاقة بالغرب برضو؟
صحيح انك رديتي على الكلام دا وقلتي عن مأساة المطلقة
Quote: الحياه بتستمر ..
علاقه فاشله الواحده تتجاوزها وتبدأ حياه مع نفسها وأولادها موفورة الكرامه |
ماياهو دا واقع مجتمع الغرب ذاته؟
حياة مع نفسها؟؟؟
لك احترامي
_________________
رب اغفر لي وارحمني
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: محمد عبدالقادر سبيل)
|
يا أخ سبيل سلامات واحترام,
واضح زي ما قالت سمارت انه مافي أرضيه مشتركه للحوار في الموضوع ده بيناتنا,
الموضوع باختصار انت بتشوف الضرب ما نهاية العلاقه,
ونحن بنشوفوا نهايتها,
ياسيدي أنا بعرف سمارت ودخلت بيتهم,
وعليه بقدر اتكلم عني وعنها,
نحن فعلا من مجتمع بيحترم المرأه جدا,
والضرب فيهو محرمات وخط أحمر تجاوزه يعني النهايه,
لا من أخ لا من أب لا من زوج,
الضرب كان معتمد كوسيلة تربيه زمان,
لكن في فرق بين ضرب أطفال وبين ضرب أمرأه هي نفسها مربيه لأطفال,
وحتي ضرب الأطفال أنا بفتكرو جريمه,
الشرخ اللي بيحدثه الضرب لايمكن علاجه,
وعليه التعايش معاهو مستحيل,
دي وجهة نظرنا باختصار,
وفي رأيي من باب أولي انك تنصح الرجال بعدم استعمال الضرب,
بدلا عن ارغام المرأه علي قبوله والتعايش معه,
لو مارست شوية توعيه للرجال بمضار الموضوع ده,
كنت شعرت انك ما متحامل علينا,
لكن يبدو انك من أنصار المرأه تستحمل أي حاجه عشان بيتها يستمر,
ودي نظرية نساء عاجزات, نحن ما منهم,
وبنتمني كل النساء يكونوا ما منهم,
لأنه الاحترام المتبادل هو أساس الحياه الزوجيه,
والتحمل بيكون لأي شئ الا للعنف الجسدي,
ده نهاية مطاف علاقه ربنا جعل الطلاق فيها رحمه,
مواصلة الحوار ما حنصل فيهو لحاجه,
عليه بشكرك علي طولة بالك,
ونلتقي في وجهة نظر أخري فيها تقارب انشاء الله,
تحياتي,,
| |
|
|
|
|
|
|
|
|
|
Re: عدو المرأة والمجتمع بالنيل الأزرق: د. سليمان.. وسارة أبو اضعف الإيمان.. (Re: Amany Elamin)
|
شكرا جزيلا على هذا الحوار
يا اماني وسمارت وشكرا لست البيت نجوان
وطبعا ما يؤسفني فيما تلقيت من ردود هنا
انكم ما كنتو بتدافعوا عن وجهات نظرة بقدرما كنتو بتدافعو عن النفس
ودي مشكلة كل الحوارات في العالم الثالث
الحوار يفترض فيه يكون بين اطراف متفقة اصلا على مضمون المشكلة ومتضامنة في موقفها تجاهها
واذا ما حصل يبقى مافي ارضية مشتركة
انتو ما موفقين في حكاية ( ارضية مشتركة الحوار ) دي
الارضية المشتركة في الحالة دي ما معناها ان اطراف الحوار يكونوا صادرين عن ايدولوجية مشتركة
ولا لازم يكونو متفقين مبدئيا في مواقفهم حيال الموضوع محل النقاش
لا يا جماعة
الارضية المشتركة بالدرجة الأولى هي معطى تكنيكي لادارة الحوار الجاد مش معطى تيماتيكي
اذا كنا منسجمين متفقين في مواقفنا تجاه طبيعة المشكلة ، دا ما حا يكون اسمه حوار اطراف متباينة وانما حايكون اي حاجة تانية قولي عصف ذهني ، استعراض افكار ، تقديم رؤى، مساهمات بناءة لدعم الموقف المعين وايجاد الحلول الخ
كتير بسمع ذوات الايدولوجيات الليربالية يقولن ليك نفس الجملة ( مافي ارضية مشتركة ) يعني امشي فكر زينا وبعدين تعال نناقشك
ما بالضرورة احمل نفس القيم الايدولوجية عشان اقدر اوصل افكاري ومقترحاتي
ممكن الحوار يكون اولا حول فحص المشكلة واعادة توصيفها ( دا اسمه تشخيص الازمة ) ثم بعد داك نتحاور حول ( وصفة/ صيغة الحل الانسب ) ثم نتحاور حول طريقة الحصول على هذه الوصفة وجرعات تطبيقها عبر اللوسائل الناجعة
دي هي مراحل حل الازمات وحلها
يعني ممكن تتولد مشتركات تشكل ايدولوجية لمقاربة المشكلة وحلها دون ان تكون الايدولوجيات الفكرية المسبقة لاطراف الحوار عبر مراحله المختلفة متطابقة.
يعني ايدولوجيتنا الفكرية شئ وايدولوجية الحل كنتاج للحوار شئ آخر
انتو بتعتبرو المخالف ليكم فكريا دا زول ما ممكن التفاهم معاه وبتسموا دا ( عدم وجود ارضية مشتركة ) بما يعني ايدولوجية مشتركة
هسع نحن هنا خلافنا خلاف ايدولوجي اساسا مش خلاف حول مدى احترامنا للمرأة ولا مدى تأييدنا للعنف الاسري
ثم تقولين
Quote: وفي رأيي من باب أولي انك تنصح الرجال بعدم استعمال الضرب,
بدلا عن ارغام المرأه علي قبوله والتعايش معه,
لو مارست شوية توعيه للرجال بمضار الموضوع ده,
كنت شعرت انك ما متحامل علينا, |
طيب حاضر
افرضي اني نصحت الرجال بعدم استعمال الضرب ، ونط واحد قال لي لكن كان ضربتني اخليها؟
عليك الله ردي عليه انت يا اماني
شفتي ان موقفكم شكلو شنو
محض تمترس ايدولوجي لمفتون بموقف المرأة الغربية الشائع الآن
نحن عايزين موقف ايجابي يهرع لمواجهة حالة العنف الاسري ( سواء جاء من المرأة او الرجل ) كيف نضع حدا له وتجفيفه بدلا عن النصح بالطلاق
الحل ما بحي بين يوم ليلة
وانما داير صبر وتربية وتفهم لثقافة ومستوى المجتمع
وشوية شوي وكلنا مع بعض
وبلا مسارعة نحو الطلاق
شكرا لكن جميعا على هذا الحوار الطويل الفاشل
_________________
رب اشرح لي صدري
| |
|
|
|
|
|
|
| |
نجوان
ليلى عز الدين
ندى عثمان حسن
الطيب شيقوق
الرفاعي عبدالعاطي حجر
دينا خالد
abubakr
lana mahdi
Hussein Mallasi
SHIBKA
Ishraga Mustafa
شمائل النور
محمد عبدالقادر سبيل
Mohamed E. Seliaman
Kamal Karrar
smart_ana2001
Elawad
بدر الدين الأمير
الجندرية
Afraa Sanad
محمد الأمين موسى
وليد عبد اللطيف
emad altaib
فيس بوك
تويتر
انستقرام
يوتيوب
بنتيريست