|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
اخي عماد عثمان كان لي شرف ان التقي بالمرحوم اسماعيل عبد المعين ببحري عندما رأيته وهو متجه
لمنزل صديقه حبيب بالدناقله شمال حيث كنا نسكن هناك فنزلت من البص الفيات حينها وسلمت عليه
وابلغته باني ادرس الموسيقي ويدرسني الاستاذ يوسف عبدالفضيل وكان حينها عازف لآلة الشيلو في فرقة
البساتين وكان يدرسنا موسيقي بدار جمعية الصداقة السودانية الصينية وكانت وقتها تقع علي ميدان عبد
المنعم ( ميدان الاسره حاليا ) وبجوار منزل المرحوم بشير النفيدي .
كنت وقتها معتز باني وصلت الدرس 106 فيما كان يسمي ب" البونا" وهو كتاب درس علم الموسيقي فاكبر
فيني ذلك وقال لي بعض كلمات التشجيع .
من الاعمال الجميلة التي قدمها عبد المعين ولم ترد في حديث اخي عماد نشيد اركويت وهو بمثابة دعاية
للسياحة في منطقة اركويت ويدعو لزيارة اركويت.
العمل الآخر وهو من الاغاني البسيطة وهي اغنية يوم الاحد بالليل.
كان يتغني باغاني عبد المعين الفنانين آزار من الشعبيه بحري والفنان رباح لا ادري اين هما الآن.
في احدي الرحلات المدرسية لو يذكر الاخ كمال ونحن في الاميريه واحد شارك فيهاالعازف سليمان زين
العابدين وغنيت معه حينها اغنية سهرانه ليه يا عيون من الحان عبد المعين وكانت مفاجأه بالنسبه
اليه.
درست حينها ثلاث سنوات بواقع ثلاث مرات اسبوعيا وكنت اذهب من الدناقله بحري الي الخرطوم ثلاثه ولم
يتعد عمري حينها الاثني عشر عاما.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
للاسف لاأستطيع التداخل معكم لوجود عطل في البنايه التي اقيم بها نتيجةً لاعمال الصيانه ,, ولكن حالياً وجدت نفسي في مكان عام ,, وكمية من الاسيويين بس سوق سعد قشره يوم الوقفه ,, قلنا في سبيل بحرى نستنشق ريحة زيت املا من الجماعة ديل ونكتم نفسنا ,, ونسلم عليكم وناخد لينا غيبه لمن ينصلح الحال .
** كسره :- التمهيد أعلاه خوفاً من الجزاءات الإداريه من سيد البيت ود السر كرار,, ( وزى ماقلت من قبل كما تُدين تُدان..) ودام الود بيننا..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
ازيكم ياناس بحرى ..........انتوا وين شكوكو وامجدكرار وحسن طه وسامى عتبانى وايهاب وابراهيم قناوى وين الاخوان الركبوا معانا بوست الطراوة ده من الاول....... الرحلة لسة طويلة .... وينكم المهم حابه اقول ليهم افتقدناكم ...وبالجد بالجد فتحت صفحة واحد واتنين وتلاته وقعدت اقرا فيها ..... اتمنى انكم تكونوا بخير
اخونا سيد محمود ......يديه الف عافية قال .....
بتذكر ونحن صغار كنا بنصلى التراويح مع حبوباتنا وكانت ساحة الجامع تتملى لى عينها بالمصليات وكنا بنكون فى الفوف الخلفية وكانن رغم جهلهن لكن كانن مابيفوتن ولا ركعة واحدة من صلاة التراويح واكتر واحدة فيهن تتعتبر فاهمة البتكون حافظة سورة الفاتحة وكم صورة تانية .. ....وكنت بسع حبوبة جيرانا حاجة اسيا بت نور الشام اثناء سجودها وركوعها .....(ياربى تفتحها فى وش عبود ولدى ....) تسجد اسمعها تقول ....يارب العباد ادى بتى بتول ود الحلال اليسعدها ويهنيها ...وترفع من السجود ...(.والامام يكون بيقرأ فى القرأن) تسمع همهمات من هنا وهناك بالدعوات ....وهناك من ترفع راسها من الركوع وتقول ...احى ياضهرى .....واى يالضهر ......
تذكرت ذكريات اخونا سيد ...... حينما حضرت رمضان هذه السنة فى السودان ...وكنت فى التراويح مع اخوات زوجى فى مسجد بحراوى كبير .....والمطر كان بدا ينزل ...سمعت واحدة قبال الامام مايسلم .......خلاص اتجننت .......وبقت تتململ وقالت .... للمعاها....(هى انا ماشة شارة لى ويكة تلقى هواء المطر اسى شالها ) .....
_______________________
الله يرحمك يانعيمة حبوبتى رحمة واسعة فمنك تعلمت الصلاة الصحيحة .........
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote: ذكريات اخونا سيد ...... حينما حضرت رمضان هذه السنة فى السودان ...وكنت فى التراويح مع اخوات زوجى فى مسجد بحراوى كبير .....والمطر كان بدا ينزل ...سمعت واحدة قبال الامام مايسلم .......خلاص اتجننت .......وبقت تتململ وقالت .... للمعاها....(هى انا ماشة شارة لى ويكة تلقى هواء المطر اسى شالها ) .....
_______________________
الله يرحمك يانعيمة حبوبتى رحمة واسعة فمنك تعلمت الصلاة الصحيحة ......... |
تذكرت حاجات الفول زمان...الواحدة في صلاته..أول ما تقرب منها... تقطع صلاتها..عشان تبيع ليك... والعجيبة..يكون معاها طفلها لما يحبو بعيد عنها.. تمشي في صلاتها تمسكو وترجعوا وتواصل
أما حبوبتي فاطمة فضل رحمها الله رحمة واسعة كانت وبعد الصلاة والصلاة الصحيحة تماما...تدعو وبصوت عالي بالخير لكافة أبنائها.. وبناتها...وكانت تقوم الهزيم الأخير من الليل حتى صلاة الصبح ثم تنوم وتصلي الضحى... ونتنظر الظهر وهكذا...رحم الله حبوباتنا جميعا..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عابدون محمد عابدون)
|
Quote: تذكرت حاجات الفول زمان |
الاخ العزيز ود الكرار
وانا تذكرت ايامي نمن كنت بتعلم سواقة العجلة
في حلة الدناقلة جنوب وبالقرب من الجامع
كانت هناك حاجة فول معروفة بفولها السمح الكبار متمركزة في موقع استراتيجي ناصية الشارع .
وفي هذا الشارع بدأت في تعلم سواقة العجلة
وفي احد الايام واخوك امتطي عجلة بدون فرامل وباقصي سرعة كفت الحاجة وقفتها.
الحاجة في مكان وقفتها هناك والفول ملا الشارع ..... والتسالي حدث ولا حرج
موقف اتذكره حتي الآن بكل تفاصيله.
وعاش ....... رالي باريس !!!!!!!!!
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالمحمود محمد عبدالرحمن)
|
ظرفاء و إحياء في بحرى –الحلقه رقم (9) – عوض الله مصطفي - العين
شخصيات في الذاكرة
بركات الحلبي ( حلة خوجلى )
Quote: بناء على رغبة السيد حسن ميرغني شقيق الأخ طارق ميرغنى نورد بعضا من ملامح شخصية بركات الحلبي . الذي ينتمي إلى حي الحلبة بحلة خوجلى. يقع حي الحلبة في الجزء الشمالي من مقابر حلة حمد بداية حي حلة خوجلى. يقال إن أجدادهم الأوائل اتو مع الحملة التركية و إن اختلف الناس في أصولهم إذ أن البعض يرجح أنهم من مجموعة من غجر شرق أوروبا و يدلل على ذلك بالوشم الذي يرتسم على وجوه و ايادى بعضا من نسائهن و البعض الأخر مع مقولة أنهم من بلاد الشام تحديدا مدينة حلب السورية . اختلفت الآراء أو اتفقت أنهم الآن سودانيون بحكم الميلاد و صاروا جزءا أصيلا من نسيج ست الهوى يمتازون بالطيبة و حسن المعشر و لهم لكنة محبب سماعها خاصة بهم و يتميزون أيضا بالصراحة التامة إذ لا يجدون حرجا في البوح بما في دواخلهم .و اذكر في ذلك قصة السيدة المشهورة التي تم القبض على وحيدها بحرباشة كمنقة و تم اقتياده إلى الضبطية فذهبت شاكية باكية إلى احد رجال الدين و السياسة فوجدته في محفل من أتباعه و مريديه علها تجد مخرجا فأجابها بإجابته الشهيرة نرفع له الفاتحة ففاجأته بلهجة حادة آمره .... ارفع التليفون . كانت منازلهم متشابهة جدا و الرابط الاساسى بينهم شجرة النيم العملاقة التي تتصدر باحة المنزل يتحلقون حولها للسمر و ممارسة إعمالهم الحرة . كانوا في ذلك الوقت مغرمين بالدراجات الهوائية يتجولون بها بين الإحياء لترويج و بيع منتجاتهم كما كانوا بارعين جدا في إصلاح و صيانة إعطاب الأدوات المنزلية و من أشهر الطرائف إن اثنين منهم كانوا على دراجاتهم الأول يمتلك صوتا صداحا رنانا يردد بصوت جهير صلح كراسي ... شد السراير ... صلح مواسير ... صلح بوابير الجاز ... و الأخر خلفه يردد مقطعا واحدا .....وأنا كمااااان . كانوا في الرياضة متعصبين جدا لفريق العامل الذي ضم نخبة متميزة من اللاعبين أشهرهم حافظ عبيد و المرحوم شيخ ادريس جعفر عبد الرزاق وهينو الذين تم تسجليهم في فريق الهلال . كان بركات رجلا ضخم الجثة طيب القلب وديع وباسم اغلب الأوقات و مولعا بازدراد كميات تجارية من الطعام و غالبا ما تجده حاملا كرتونه بها طفل ميت في سرج العجلة لدفنه في المقابر و رغما عن رهبة الموقف إلا انه دائما ما كان يتلذذ بسندوتش ضخم من الرغيف الشمسي لزوم التصبيرة حتى يحين موعد الوجبة الرئيسية إذ انه متعهد دفن الموتى مجهولى الهوية لمستشفى بحري و رغم ضخامة جسمه إلا انه كان مفعم بالحيوية و النشاط إذ كان يمارس السباحة و المساعدة في انتشال الغرقى و كان زيه التقليدي العراقي و السروال الطويل و كانت العجلة الرالي الدبل في ذلك الوقت رفيقته الدائمة في حله و ترحالة يجوب بها كافة إرجاء بحري وهى تئن تحت وطاة الجسد الضخم و غالبا ما كان يشاهد برفقة شقيقه سليم على دراجته و معه القرد على المقعد الخلفي . في مشهد كوميدي من مشاهد تلي مانش كان المرحوم بركات يمتلك إقداما ضخمة جدا لذا كان دائما مايسير حافي القدمين لصعوبة إيجاد مقاس له إذ يقال إن إصبع قدمه الصغير كان نمرة خمسة أدى المرحوم بركات خدمات جليلة بجانب انتشال جثث الغرقى حفر المقابر و تركها جاهزة في وقت كان كثير من الناس يرتعب من سيرة المقابر له الرحمة و المغفرة . |
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالكريم أحمد الامين)
|
Quote: من أسعد أيامي في بحري...فقد أنسلت كم وكمين سنة..وأنا لا زلت أنعم بسعادة ذلك اليوم المستمرة.. وأحمد الله على التوفيق الأكبر في حياتي ...واللبيب بالإشارة يفهم |
ود السر كرار عقبال اليوبيل الماسي .. بس شايف الناس دى كلها بتسأل عن 12/11/##19 ياخوى براك بتجيب لنفسك الطراوه مع الناس الشكاكين ديل كان ختيت ليك إى رقمين ماكان فى زول سعل جنس السعال دا.. ودام الود بيننا..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالمحمود محمد عبدالرحمن)
|
الرائعون اهل الطراوه ... عشاق بحرى ست الهوى مشتاق لى ونستكم السمحه ماداير ابداء بالعتاب ولكن ماسالتو علينا عرفتو الهكر سوا معانا شنو انا طبعا زى وزى ناس السودان كنا بره الشبكه قرابة العشرة ايام وبعد رجوع الاحوال لحالتها الاولى ظللنا نعانى من الخروج من الشبكه لمدة يوم او يومين وبعدها انعدل الحال لكن حالتى غريبه كنت اطالع كل البوستات ولكن مشكلتى الاساسيه لااستطيع الكتابه عدا مره او مرتين وفى بعض الاحوال اكتب وارسل وهنالك واحد من احتمالين اما الرد لايظهر مباشرة اويظهر بعد يوم او يومين واما لا يظهر بتاتا وانا اكتب الان ويحدونى امل ظهور الكتابه بعد عدة محاولات من الدخول على خانة الرد حتى اوشكت ان ا يأس من المحاولة التى استمرت طوال الفترة الماضيه.
على العموم لن ادع هذه السانحه تمردون الاستفاده القصوى منها: اولا: اهنئ سيد الحوش ود السر( على كمين سنه) من السعاده ادامها الله عليه وعلى اسرته الكريمه واحكى له ولكم طرفه من طرائف ام العيال قبل... كم سنه فاجاتنى زوجتى قائله كل سنه وانت طيب!!!! فتسالت عن المناسبه وعرفت بعد حراق روح منها وحبة زعل‘ بانه عيد زواجنا ( كمين كدا) فحقيقة راعنى الرقم الذى ذكرته لى وبدا الاستغراب ظاهرا فى وجهى وماحبيت اغالط عشان مااذيد الطين بلهولكنها فاجاتنى برد مازال يضحكنى كل مااتذكره(انا عارفه انك ماقادر تصدق انه السنين دى كلها مرة بسرعه من فرط السعادة الانتا عايش فيها) وانا ماعارف اخونا كمال والبقيه ينطبق عليهم نفس الشعور ؟
ثانيا:احبى كل رواد الطراوه واثنى سؤال الاستاذه ناهد عن غياب مجموعه العقد الفريد التى ساهمت فى اثراء هذا البوست منذ افتتاحه عسى الايكونوا مهكرين كتهكيرى وما اراكم الله هكرا فى عزيز لديكم .
وحتى لقاء قريب باذن الله
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأعزاء أبناء و بنات بحري
أطيب التحايا و الود
و نقول لسيد الحوش كل عام و انت بخير و صحة وكل الأسرة
و دامت المودة و الرحمة.....
و أليكم هذه الترانيم الودية من عاشق صاحبة الهوى و الطراوة. و أترككم بعافية مع
مســــــلســــــل أبـــو النــــور ( أنور العجـــــب)
الحـــــــلقة الثـــــــامنة
TARAWA DELIVERY #8
أحبابنا أهل الهوى و ده البجيب الطراوة و المرة دي برضو حنزوغ من الونسة البحراوية
و نديكم هدية من الشاعر الراحل المقيم في قلوب الكثيرين لأبداعه و روعة كلماته و عمقها الأثير
في كل ما كتب من حب و عشق و سياسة, كان عليه رحمة الله يحب الخرطوم عاصمة اللآت
الثلاثة عندما كانت منارة للأدب و الفنون و السياسة و كان يضئ لياليها نجوم لامعة من أهل
الفكر و الأدب و السياسة رحلوا بعد أن و ضعوا لنا اللبنات و الأساس المتين ليتبوأ مكانه أفريقيا
و عربيا و لكن تغيرت الأحوال و جاء النميري ليدق أول مسمار في النعش الذي مازال مسجى و المشيعين يهرولون الى عواصم لم تشرق شمسها يوم كان السودان و خرطومه مدينة الحل و
العقد, جار الزمان و بقينا ننتظر الحل عند الآخرين عجمان و عربان و أفريكان.
عشان الناس ما تدبرس نرجع للكلام الحلو رمية حكمة من جبران و نكسرها بترنيمة للجميل
نزار...... نــــقش الحـــــروف
(( ويل لأمة عاقلها أبكم و قويها أعمى ))
( جــــبران خليـــل جـــــبران ) ************ حـــــديث الــــــروح
أسائل دائما نفسي
لماذا لا يكون الحب
في الدنيا.......
لكل الناس...... كل الناس ؟
مثل أشعة الفجر
و مثل الماء في النهر
و مثل الغيم و الأمطار
و الأعشاب و الزهر
أليس الحب للأنسان
عمرا داخل العمر
نــــــزار قـــــــباني
غايتو قلنا نديكم جدعات رومانس . بس أوعكم تقارنوا أو تربطو ما أتى بما يلي الفرق أكيد زي
ما بين الثرى و الثريا !! لكن تقول شنو الشلاقة و النفس الأمارة بالبوح تخلي الزول يخش في
حته زي دي, لكن ناس بحري روحهم طراوية و بيدوا الزول مساحة يعبر عن شعوره بمعنى
الغالبية الغالبة ما كلهم أكيد بيؤمنوا بحته الرأي الأخر و حرية التعبير و دي خلفيتها جاية من
التربية في الأحياء الشعبية في مدينة عمالية و ما تستبعدوا أوباما القادم من بحري و خلطه
برضو لأنو في كتار من اولاد بحري أقترنوا بأجنبيات أروبيات و أمريكانز و المسالة مامستبعدة
ليه لأنو شيكاجو بتشبه بحري في أنهم مدن عمالية!
ألتناتيش و نسة ما أكثر أما نظم الشعر و القوافي فده ليهو ناسو زي قصيدة الدفعة عبد السلام
كامل في جبل مرة من أجمل ما سمعت من الشعر أتمنى زول على أتصال به و يتحفنا بها..
التــــناتــــــيش ___________________
ليه أنتي يا أيام تقيلة
أسرعي الخطوات شوية
ما صبري قلة و نومي برضو
أحسب النجمات و أعد
أعد.... كم من الأيام تبقى
فضل كثير و الخوف يزيد
خوفي منك يا قدر
قدر حالتي اللي عليها و أعطف
ده ما أحلى ريد......
كل عمري ليه *****************
عندما أكتب لك تنسكب الحروف
و خيالي يذهب الى حيث انت
تفرح الحروف جذلا
عندما تراها من احب و أهدي
و تكتسي بلون الفالنتاين...
تحس نبض قلبي
تزخرف كلماتي بورود جميله
هي مرآة للحب و العشق و الحنين **********************
أس أم أس:
بيني و بينك مافي حواجز
بس ممكن يكون عامل المكان
بيني و بينك شتول محبة وريدة
باقية على مر الزمان
القلتو فيك ما قلتو في زول من قبل
و ما اظن يكون من بعد
ألهمتني بسحرك سر القوافي
هل من مزيد......
هل من مدد......
و الى و نسة قادمة أذا مد الله في الأيام تحياتي
أنــــور العجـــــــــب ( أبــو النـــور)
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الاخ كمال كرار
هى طبعا صور بحرى . جميلة وحتى التشجير مميز برسومات واشكال جميلة ....حملات التشجير بدأت ...بل فى حدائق بقت مليانة بالناس .. وكنت اقصد انى مالقيت بحرى زى زمان ..ناسها ...الفتها ......لطافة جوها الزمان ..... .بصراحة بحرى عايزة اعادة تأهيل شامل ...يكفى انها مخططة كويس .... خسارة المنظر يكون جميل وانت نازل من الكبرى ...وتخش على السوق وتلقى الشىء غير .....كمية من الاوساخ والمجارى الطافحة ....و و و و .البيزعلنى حاجة واحدة ....الشارع الفيه التجار الكبار والبنوك ....فى السوق....... تلقاه ببيع بالملايين فى اليوم وقاعد ليه فى كوم زبالة لامؤاخذة ورجلينه فى الموية الطافحة ......
لكن برضو بحرى حلوة بس كمان عايزنها تكون احلى ...... __________________________
براك جبت السيرة انا قاصدة حاجة تانية ...اها شوف خليتنا نهبش والى بحرى ....(وش ضاحك حلف ماينزل معاى)
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
هى طبعا صور بحرى . جميلة وحتى التشجير مميز برسومات واشكال جميلة ....حملات التشجير بدأت ...بل فى حدائق بقت مليانة بالناس .. وكنت اقصد انى مالقيت بحرى زى زمان ..ناسها ...الفتها ......لطافة جوها الزمان ..... .بصراحة بحرى عايزة اعادة تأهيل شامل ...يكفى انها مخططة كويس ....
الأخت/ناهد بشير
والله الصور جميلة بمدخل بحري خاصة على الكباري ، لكن والله أنا جيت قبل أسبوع من السودان وحا أكتب الكثير والكثير عن بحري ، لكن بس حبيت أقول ليك بحري مهما تغيرت برضو حا تظل هي بحري بحلاوتها وطراوتها وعشمنا إنو تكون من أجمل مدن العالم ، أنا ساكن قريب ليك جدا في الصافية لكن والله العظيم شوارع الواحد يخجل يمشي فيها خاصة الشوارع التي بداخل الأحياء أكوام من الزبالة وأي واحد كان عندو إصلاحات في منزله ترك باقي الرملة والطوب المهروس والخرسانة لغاية ما تسد الطريق يعني الواحد يعاني كثير عشان ما يمشي بي رجولو ناهيك عن السيارة ودي حالتا الصافية يعني لو دخلتي شمبات الحلة أو أحياء بحري الثانية تمرقي كيف والله الواحد يحتاج لطيارة هيليكوبتر عشان تنشلو من الوحل والطين وأكوام الزبالة في الشوارع رغم ضيقها . والعجب العجاب سوق الخضار في بحري حدثي ولا حرج . على العموم ده قليل من كثير عن بحري وسوف أفرد حيزا كبيرا لإنطباعي عن بحري والخرطوم وأمدرمان كمان ..
مع تحياتي وتقديري
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الاخ عبدالمنعم التلب ......
قريت ردك ....وانا كانت مشكلتى نفس مشكلتك ....وهسى بوريك تعمل شنو ؟ لكن انت عارف الزمن دة اى شىء بقروش الاستشارة بقروش النضمى بقروش ان درت تمرق مسمار من الحيطة دى ساااكت ...وناديت ليك زول من الشارع يقلعوا ليك من الحيطة يقول ليك 5 الف ..... وبالمناسبة دى ...احكى ليك حاجتين ..... مرة جيت من السفر واول مانزلت من العربية ......جنب بيتنا .....فى طلمبة ومليانة تكاسة كتار المهم ناس الطلمبة والتكاسة وسيد الدكان جوا جاريين يسلموا على ...... سلموا وفاتو والشنط لسه فى العربية ...قلت للوالدة ماتنادى ناس الطلمبة ديل يجوا يساعدونا فى دخيل الشنط دى ....الوالد ة قالت لى (انتى يابتى قايلاهم ياهم الناس الخليتيهم زمان .....اى شىء هسى بقى بقروش)
الحاجة التانية ....
جارتنا مرة لطيفة جدا .....جيت برضو من السفر ولقيتها ماشاءالله عليها عينى باردة صحتها زايدة شويه عجبتنى ...قلت ليها ماشاءالله عليك ياخالتى سعدية بقت عندك جضوم( دى طبعا تعتبر سحرة جاهزة مش بالغت فيها اليوم داك) ضحكت وقالت لى ...(انتى قايلاها شحم الجضوم دى...... ده مامن النفخ ) قلت ليها ...النفخ ؟ نفخ شنو كمان قالت لى ...نحن هنا من الصباح نقول ..5 الف 7 الف 8 الف 4 الف (والف قالتها بنفخة مع مدة بوز لى قدام ) ليه ماتجينا جضوم ياناهد يابتى ...
يلا النوريك حل المشكلة ...
اولا تتصل ببكرى يديك باسورد ...طيب؟
واذا تعذر عليك اوريك الحل التانى ...
افتح internet explore امشى tools ethernet options delete cookies
لو ماظبطت معاك بالطريقة دى امسح الانترنت اكسبلورر ونزله مرة تانية ....
ولو برضو ماظبط اعمل Download for Safari browser
هاك الرابط حق التحميل .... http://www.apple.com/downloads/
اها قصرنا معاك ..... يلا ادفع بالتى هى احسن ......
_______________________
التحايا للجميع
:
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: المشاركة التالبة من عماد عثمان احمد – جده شخصيات من بحري : الراحل المقيم – ميرغني علي مصطفي
- ولد المهندس ميرغني علي مصطفي ببري المحس في العام 1923 م وتلقي تعليمه بمدرسة الخرطوم شرق الابتدائية العريقة والتي اقيم في مكانها حاليا برج البركة وتخرج في كلية غردون التذكارية في العام 1942 م – كلية المساحة – وعمل بعد تخرجه مهندسا بالري المصري كما عمل ايضا بمجلس ريفي الخرطوم وبعد ذلك ترك العمل بالحكومة وتفرغ للعمل الخاص.
- كان ممثلا لمنطقة الخرطوم بحري في مؤتمر الخريجين – الهيئة الستينية- وذلك في العام 1944 م وهو احد الذين اوقفوا تنفيذ مفتش مركز بحري عن نادي بحري وتحويله الي نادي الخريجين.
- انضم الي حزب الاشقاء- حزب الحركة الوطنية – بالخرطوم في العام1945 م.
- اول سكرتير تنظيمي للحزب الشيوعي السوداني وتركه بعد الانشقاق الشهير الذي قاده عوض عبد الرازق.
- اعتقل في العام 1948 م بسبب اشتراكه في تنظيم مقاطعة الجمعية التشريعية البريطانية الصنع في السودان . كما اعتقل ايضا في العام 1951 م بسبب اضراب البوليس الشهير.
- من الذين سعوا لبناء مساكن البوليس جنوب ميدان عقرب – الاشلاق- ومن الذين وقفوا ضد ابو القاسم محمد ابراهيم الوزير في العهد المايوي السابق في مشروعه لتكسير مباني حي الديوم وتحويلها الي الدرجة الاولي.
- من مؤسسي جمعية الصداقة السودانية الصينية وسافر ضمن وفدها الي الصين واستقبلهم الرئيس ماو تسي تونغ واسهمت تلك الزيارة في انفاذ عدد من المشاريع العظيمة وانزالها في ارض الواقع فيما بعد مثل قاعة الصداقة ومصنع الصداقة للنسيج وكبري حنتوب والاكروبات السودانية.
- من خلال عمله كمهندس ساهم في العديد من المشروعات مثل فندق القرين فيلدج ونادي العمال ببحري ومشروع خشم القربة ومشروع سكر غرب سنار ومشروع سكر منقلا وجامعة جوبا والعديد من المدارس ببحري.
- نشرت له مقالات عده في العديد من الصحف وله اربعه كتب لم تطبع بعد.
- تزوج من السيدة الفاضلة نفيسه ختمي وله من الابناء طارق وعامر وحسن ومحمد وعادل ومن البنات ساميه وهدي وسلوى ونوال ومريم.
- كان من محبي الفنان الراحل حسن عطيه فنان الطبقة المثقفة في ذلك الزمن الجميل إضافة الي مصطفي سيد احمد واحمد الجابري واناشيد اكتوبر لمحمد وردي ومحمد الامين . - شقيقه الاكبر والاوحد هو امين علي مصطفي وكانت يعمل ضابط صحة وهو من اصدقاء الفنان الراحل المقيم عبد العزيز محمد داؤود المقربين . وشقيقاته فاطمة – الخرطوم (3) وهي الدة عبد الوهاب تميم واخوانه وزينب – حلة حمد - والدة احمد عبد المنعم حسين واخوانه والتومه – المزاد - والدة محمد عبد الرحمن محمد احمد واخوانه وخديجة – المزاد - والدة عبد العزيز احمد كروم واخوانه .
- توفي المهندس ميرغني علي مصطفي في 7/1/2005 م ودفن بمقابر حلة حمد بالخرطوم بحري . نسأل الله ان يتغمده بواسع رحمته وان يدخله فسيح جناته مع الصديقين والشهداء وحسن اولئك رفيقا. |
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبد الرازق سعيد)
|
عماد عثمان ثرو أبورزقه
شكراً علي هذه النبذه التعريفيه للخال ميرغني علي مصطفي ,, وأضيف اليك بأن الخال أمين علي مصطفي يُعد من أشهر ضباط الصحه في السودان وكان يطبق قوانيين الصحه العامه في بحرى كما يطبقها الانجليز في إنجلترا بل وأكثر ,, سكن بمنزل مفتش الصحه ببحري ولايزال هذا المنزل مُخصصاً لمفتش الصحه وهو خلف البنك السوداني الفرنسي عند موقف الحاج يوسف وأقرب الي شارع البوسته.. ** ونقل في السبعينات الي مدينة بورتسودان وكان المسوؤل الاول عن الصحه والنظافه ,, لذا تجد كل من زار بورتسودان في ذلك الزمان يُشيد بنظافتها وإرتفاع مستوى البيئه الصحي ..
** الرحمه للخاليين أمين وميرغني علي مُصطفي..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الف شكر اخي عماد لمعلومة عن اناس ضحوا من اجل وطنهم رغم ما لاقوا وعانوا من عنت وضيق ولكن التاريخ لا ينسي. دعواتكم له بالمغفرة والرحمة ،رحمه الله .
شكرا اخي ابو رزقه علي المناولة.
اخي عوض الله حلب بحري صاروا جزء اصيل من بحري وانا بحكم لوني تواجهني الكثير من المواقف في السعودية سوي من السودانيين او الاجانب فالاجانب في الغالب ما
يصدقوا اني سوداني لاعتقادهم ان السوداني مش ممكن بل يجب ان يكون اسود.
اما السودانيين فبعد التعارف يقول ليك انت من وين تقول ليهو من بحري علي طول يقول ليك : انت من حلب بحري؟
رحم الله بركات فقد قدم الكثير الذي لا نستطيع ان نقدمه . لكنه مضي سريعا وبعد عمر قصير.
اخي التلب والله سالنا منك لكن يبدو انك ما جايب خبر وقبل يومين في سيرتك مع اخي حسن ميرغني.بعدين انت ما صدقت الفونيه فتحت معاك عملت one original and
two coppies بعدين ليه بتضحك كل ما تتذكر الموقف داك . انت المره ما قاعده تقرأ البوست زي حالة جماعتنا ولا شنو؟؟؟؟؟؟؟
اخي العزيز جدا العريس ابو النور ياخي انت ما تحكي وبس بالاول عاين لي مداخلاتنا ورد عليها لانو فيها الكثير من الاسئلة التي نود ان نطلع اخواننا وابناءنا
عليها.
والحمد لله وكتر خير العروسه الاطلقت فيك روح الشاعر الجميلة فيك فانت اصيل يا صديقي. حلوه الSMS
توجد درر في بوست لناهد بشير الطيب ارجو الاطلاع عليه
جميله الصور يا كمال وكتر منها .
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
Quote: ازيكم ياناس بحرى ..........انتوا وين شكوكو وامجدكرار وحسن طه وسامى عتبانى وايهاب وابراهيم قناوى وين الاخوان الركبوا معانا بوست الطراوة ده من الاول.......
|
الاخت الفاضلة ناهد بشير الطيب
لك اطيب التحايا وشكرا علي السؤال
واخوك اليومين ديل مشغول شوية ببوست تاتي عن المغتربين وجهازهم
عسي ان ننجح في استرداد حقوق كمال كرار وطارق ميرغني
ويا ريت طلتك بهناك.
دمتم
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
الحبايب اهل الطراوه
ااها ماقلت ليكم؟؟؟؟
حتى صباح اليوم كنته بقراء فى البوست وكانت لدى مداخله واحده الان لاحظت انه المداخله اتكررت مرتين بالاضافه للاصليه.
الاخ الراقى طارق ميرغنى لك الشكر على سؤالك والتحيه لاخونا حسن (ابولبه) والرحمه والمغفره لعمنا ميرغنى الذى كان لنا صديقا قبل ان يكون والدا.
الاخت ناهد بشير الف شكر على المعلومه القيمه وسابدا فى تنفبذها فورا ونسال الله الهدايه للهكر والكمبيوتر ولا اراك الله بأساً فى كمبيوتر لديك.
الاخ ودالسر ماعارفك سألت السؤال الانا زغته منه والا انتا حافظ كويس وعايش فى السعاده الوصفته حرمنا المصون.
اها ياجماعه انا لسه جديد اعمل شنو عشان اشيل تكرار المداخله اعلاه والا كان الشغله دى ممكن واحد فيكم يحذفها يكون كسب فينا خير عشان مااقوم اكوجن الوطا وعشان مايفتكر اخونا عبد الكريم انه انا فالح جدا وداير انافسه فى قنطرة الصفحات وكدا مع تقديرى لشخصه فى اجتهاداته المقدره على تعلية هذا البوست.
وبحرى طراوه ......
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: العبارة أعلاه بتاعة حنكشة جداوية... ما حقتنا
نحن بنقول "مياهو"...بشديد الياء وفتحها,,, مش أخونا عاطف عمر.. يقول ليك ناس بحري ما بيعرفوا "عمنول"...
هو قايل ناس بحري كلهم "حلب" ناس "هات الشملوخ يا عويس".. |
سلامات يا كمال لست هنا بصدد التحدث عن حنكشة ناهد ( الجداوية ) وتلك لعمري حنكشة إن وجدت فسوف تمتد جذورها حتى تصل ( الصافية ) لكنني قد أتت بي الشماتة فقد إتصلت السيدة الفضلى ( بعلتنا ) وهى متابعة متابعة لصيقة لهذا البوست إتصلت - بالطريقة المتفق عليها بيننا - أن المكالمة لا تحتمل التأجيل ولما رددت عليها أماتتني من الضحك بقولها
" جبت لى الكلام في صمة خشمي ، أها ناسك حيطلعونا " حلب " على كبرنا "
لكن هذا وذاك لا ينفي ( كم الكلمات ) التي أراها عادية بل أراها ذات نسب عريق بلغة العرب الفصيحة وكيف كنت حين أرددها على مسامع نسابتي ( رغم عدم حلبنتهم ) ينظرون إلى وكأنني أقول لغة صينية .
لكم التحايا نسابتي الأعزاء
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: اها ياجماعه انا لسه جديد اعمل شنو عشان اشيل تكرار المداخله اعلاه |
محمد التلب سلام هناك حلين :- أما أن تكتب مداخلة جديدة وتروح على أي من المداخلتين المتكررتين وعلى تعديل وتضع المداخلة الجديدة مكانها ، أو تدخل على أي من المداخلتين المتكررتين - تعديل - ثم تحذف المداخلة المتكررة وتكتب مكانها حذف للتكرار . الحل الأول أفضل .. لا يمكن لأي أحد آخر غيرك حذف مداخلتك أو التعديل فيها خلاف صاحب الموقع طبعاً .
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالوهاب علي الحاج)
|
ناس بحري الحلوين زحمة الشغل و بوست الشعبية الذي هو امتداد لجمال بحري يشغلنا و لكن اتابعكم و اتابع هذا التوثيق الجميل لبحري الجميلة و لناسها الرائعين.. ابداعاتكم و كتاباتكم تاخذ الوقت لما أدخل على البوست لذلك أقرأ لكم و استمتع بالقراءة أكثر من الكتابة .. أولاد الشعبية يشاركوا و يمثلونا خير تمثيل..الأخوان حسن طه و عابدون محمد عابدون و عبد الزهاب علي الحاج و أمجد عابدون و كمال كرار الذي نعتبره من أولاد الشعبية..
ناهد بشير مشاركات رائعة و بحراوية حتى النخاع التحية ليك و بحري خير و برضو أنا من جدة و جدة خير و خلينا غير ما دام حنكشتوها..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: الحاج حمد الحاج)
|
Quote: ناهد بشير مشاركات رائعة و بحراوية حتى النخاع التحية ليك و بحري خير و برضو أنا من جدة و جدة خير و خلينا غير ما دام حنكشتوها |
الاخ الحاج ..... التحيات النواضر ...
يااخى نحن نحمل (بحرى الحقيقة ) و(بحرى المجاز ).... نحمل بحرى معناعبر الحدود لتستقر معنا فى مهاجرنا بل ونحملها فى كل الاتجاهات ...نستذكر دروسها لنا .. خوفها علينا ...لهفتها للقاءنا ...و...
_____________________________________________
الكلام كتير لكن ...نقول (بحرى خير ) ..... تحياتى ....
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: دفع عشرة آلاف جنية بالجديد |
ابوكمال كيفك
والله كان جمعتو المبلغ المذكور
واديتوني ليهو انا اطبع وامسح واكنس
وبرضو ابقى وقف للطلبة .
_____________________________________ طبعا الفكرة كويسة
ولكن عمارة في الموقع دا
بالحجم بتاعها دا
كان جمعت عشرة الف من كل اعضاء المنبر ومعاهم بكري
ما اعتقد ان المبلغ يكفي
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: ولا مجال بعد ذلك للبيع في الشمس والهواء الطلق ... |
تعرف يا ابورزقة (اسمح لي ارفع التكليف)
مشكلة التجارة في البلد دي ما الامكنة
ولكن المشكلة في اخلاق التجار وفساد اخلاق التجار في السودان
خلق خبرة كبيرة بالنسبة للمستهلك العادي والخبرة دي لازم تكون شاملة سوق المستهلكات كلها
يعني لازم تكون خبير في شراء اللحم والخضار وتفتشو حتة حتة والاسمنت والخشب وووووو
ما في جهة بتحمي المستهلك (فعالة) يعني انت في السوق ونجاضتك غير كدا يضربوك ضرب تمام
ومن ناحية اخرى ايضا لا توجد حماية للتاجر يعني برضو غرفة التجارة غير مفعلة يعني اي
تاجر بيبيع على كيفو بالسعر الدايرو وممكن ينقصو ويخسر لمجرد ان يناكف جارو في السوق
سلوكيات زي دي بتمر عليها عادي في اسواقنا .
فلابد من وجود جهات فاعلة تحمي المستهلك والتاجر وضبط جودة والله السودانيين بقو ماشين بي يالطيف .
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
ابدأ باخي ابو رزقه الذي احييه بالمداخلة الثرة عن السوق وسياسة السوق العرجاء المطبقة في
بلادنا.
لكن يا ابو رزقه قلت في موضوع الفسيخ الخلاني ازعل منك انو حتي الفسيخ يكون ليهو مكانه وانت ما
عارف انو للفسيخ ده مكانه عزيزه في قلوبنا !!
كمال السر الحلوه مش صور النجيله بل صورة البروفايل الجديده . فترنا من دقنك البايخه وشناتنا.
الاعزاء محمد التلب وعابدون الف شكر لترحمكم علي الوالد وبرضو ابوكم.
الحاج حمد وينك يا راجل عامل مشغول بالنجمه زي اخونا حسن طه خلانا وقبل علي كرار التهامي.
اخي عبد الوهاب والله ذكرتنا زمن جميل ابام مطبعة الفي وانا كنت قايلها اندثرت زمان. لكن الراجل
القاعد جنب الحوض الازرق ده غسيل عربات ولا نضيف سمك ولا وضوء.
يا ناهد المدام قالت ليك الكرم القاصداهو ده كريم فاتيكا؟؟؟؟؟
معاويه والله بكلمة شباب دي شايف وجنات كمال كرار فرهدت.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
Quote: يا ناهد المدام قالت ليك الكرم القاصداهو ده كريم فاتيكا؟؟؟؟؟
|
اخونا طارق اولا سلامى لست بيتك واولادها .... لع لع ...مافاتيكا ...الجنبو التانى الاصفر المدور ... ...ثم كلمها انه ده هنا بى 54 ريال ..كيف بقدرة قادر بقى بى الفين جنيه هناك..
زمان كنا بنشيل الشامبوهات من هنا ونسافر السودان ..اها لما بقت الحاجات متوفرة فى السودان قلنا بلا شيل بلا لخمة بلا ميزان ... قمنا اشترينا شامبو من هناك وبسعر منخفض جاتنا حكة انا والبنيات فى جلد راسنا ..
جنبنا بقالة فى السودان بقالة كبيرة ... جيت اشترى منه تونة سألته من السعر قال لى ( ملحوظة التونة شركة واحدة)..دى بى 5 الف ودى بى الف ونص ...قلت ليه ؟ قال لى ام الف ونص مدتها انتهت ...تخيل روعة المنظر ياطارق ... زول مابخاف الله ...
لأ...... وازيدك كمان (معلقة) ..... اخو زوجى ايام العيد فى السودان جاب لاولاد وبنات العيلة كلهم شيبس .(حب يفرحهم) الشفع كلهم (الله يكرمكم) جاهم اسهال ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote: ثالثا ابن العمه عاطف عمر وينك ياباشمهندس تحيه عطره لك وللاسره ولام العيال قريبتى |
إبن الخال العزيز محمد التلب لك وأسرتك الصغيرة وللحاج والحاجة وأحمد وأسرته وماجدة تحياتنا ومحبتنا نحن بخير ، نجري ذات الجري ونعافر ذات المعافرة وبين هذا وذاك نقتنص من الوقت دقائق نلاقي فيهم الأحباب ، تارة لقاءات وجهاً لوجه وتارات أخرى لقاءات ( شاشة لشاشة ) أو ( كيبورد لكيبورد ) مروحين عن القلوب ساعة بعد ساعة
دمت والأحباب في صحة وهناء
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عاطف عمر)
|
Quote: ثانبا الاخت ناهد نصيحتك ميه ميه تستاهلى الضبيحه |
اخونا التلب ....
قالوا كترة التكرار بتعلم .... كنت مابعرف التكتح لكن ده يورينى وداك يورينى (ماقصروا يديهم الف عافية) منها بقيت سينير فى كيفية الدخول للمنبر ....طبعا فى طريقة تانية اللى هى انه زول يديك رابط المنبر العام ...يعنى تكون بالماسنجر العادى مع بوردابى وقبل ماتفتح سودانيز تخش باللنك البيرسله ليك (دى كانت مشكلة لانه دخولى كان مرتبط بصحيان الزول ده من النوم)
المهم حمدلله بسلامتك ....
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبد الرازق سعيد)
|
ابو رزقة .... سلامات ...
صفحة 22 دى متنوعة كدة مالها ... كريمات واسواق وتخفيضات ومجارى.. (غايتوا بوظنا لكمال البوست ..لكن بنرجعه ليه ) عارف احسن حاجة الزول يشترى ادوات التجميل من الصيدليات.. والادوات الكهربائية من مصدرها او شركاتها...
زمان رمضان ... كم سنة بنشتغل بخلاطة واحدة ومقاسمننا فيها الجيران كمان هسى رمضان الواااااحد ده تشترى تلاتة خلاطات ... خلاطة للعشرة الاوائل وخلاطة للعشرة الفى النص وخلاطة للعشرة الاواخر... وان بقيت كمان مشيت العمرة تجيب خلاطة لشهر شوال
سلام يارزقة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: الأخ العزيز / كمال كرار
السلام عليكم ورحمة الله وبركاته . . جمعة مباركة
مداخلة بسيطة مني في البوست عبارة عن كلمات شكر للأخ العزيز عبد الرازق ارجوا منك إنزالها في البوست ولك خالص مودتي . . معليش الرسالة الأولى بها خطا في كلمة يعينك لذا صححت الخطأ في الرسالة الثانية
تعجز كل كلمات الشكر والتقدير والثناء ان تفي الاخ العزيز والصديق عبد الرازق سعيد (ابو محمد ) حقه نظير إنزاله مشاركاتي السابقة والتي بلغت حوالي 25 مشاركة دون كلل او ملل ببوست معشوقتنا بحري ست الهوى والطراوة وربنا يعينك ويقدرك على الـ 75 مشاركة القادمة
عماد عثمان احمد - جدة
|
الرسالة أعلاه وصلت من أخينا / عماد عثمان .. وهي كما هو واضح موجهة للأخ/ أبو رزقة...
أما عن الجزء الخاص بي فأقول ليه يا عمدة.. ما عليك نحن جاهزين غير أن هذا لن يفت من عضدنا في مطالبة الأخ/ بكري في إعطائك جواز مرور لهذا الأسفير.. وأنا في إنتظار مساهماتك يا عماد..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخ كمال السر كرار
الأخ الباشمهندس طارق
الأخ المستشار عبدالكريم
الأعزاء كتاب و قراء بحري طراوة , أبناء و بنات بحري الأوفياء
أطيب التحايا و الود و الشكر لكم جميعا على الأهتمام و المتابعة و نحن مقصرين طبعا و لكن
لا تخفي عليكم جميعا ظروف العمل و مشاغل الحياة في الغربة و لكن سوف نجتهد في مواصلة
محاولاتنا للتوثيق للمحبوبتنا الجميلة بحري و زي ما سبق أن ذكرت لكم أن بحري بها الكثير
من الدرر و الشخصيات العظيمة التي لا نعرف عنها الكثير و الشكر للأخ عماد عثمان و
المجهود الذي يقوم به للتعريف عن قرب لتلك الشخصيات العملاقة التي عملت في صمت و
ذهبت في صمت رحمهم الله جميعا. المرحوم العم ميرغني رحمه الله( و أسكنه فسيح جناته مع
الأنبياء و الشهداء و الصديقين و حسن أولئك رفيقا) وجعل البركة في ذريته الأخ
الباشمهندس طارق و أخوانه و أخواته, وكان لي شرف مقابلة العم ميرغني عن قرب في
أوائل التسعينات في منزل المرحوم العم كامل صالح رحمة الله عليه و كان ذلك بمناسبة عودة
الصديق د. وجدي في أجازته من ليبيا و كان معنا طبعا طارق و الأخ الصد يق اللواء ميرغني
أدريس, وكانوا فعلا أصدقاء بالحديث الممتع و لطفهم و أدبهم الجم,و فعلا هذا الجيل يختلف
كثيرا فكانوا عصاميين مجتهدين ناضلوا كثيرا في كل النواحي السياسية و الأجتماعية و رغم
أن جلهم لم ينال حظه من التعليم المتوسط أو العالي الا أنك تجدهم قد سعوا لتطوير ثقافتهم
العامة والمهنية و أهتمامهم بتعليم أبنائهم أكبر دليل.
من الشخصيات البحراوية من الجيل العظيم و التي يجب ذكرها في التوثيق لمدينة بحري العم
العميد معاش و الأستاذ المحامي الطاهر محي الدين و الد صديقنا المحامي صلاح الطاهر , العم
الطاهر بدأ حياته جنديا بقوة دفاع السودان و تدرج حتى نال البرأة العسكرية التي بموجبها
صار ضابطا بالقوات المسلحة و بعد نيله الشهادة الثانوية التحق بجامعة القاهرة الفرع و
تخرج من كلية القانون و هو الآن يمارس مهنة المحاماة بعد تقاعده من الخدمة العسكرية
بفرع القضاء العسكري, و هو من سكان حي الختمية و اذكر ان لديه كتاب عن ذكرياته و
أشتراك قوة دفاع السودان أبان الحرب العالمية الثانية و صدر الكتاب في بداية السبعينات و
أكيد لديه الكثير من الذكريات اتمني الأخ صلاح مدنا بالمزيد من المعلومات عن حياته و عمله
و كتاباته....
ومن ذلك الجيل العظيم و من العسكريين العم المقدم أبراهيم كلم رحمة الله عليه والد
المهندس عباس و اللواء علي كلم المدير الأداري للسلاح الطبي و الطيار و لاعب الأمير
السابق عثمان كلم و الطيار عصام و أخوانهم الصديق عبدو كلم و صلاح و عبود. و العم الرائد أدريس سليمان (الكتلة) رحمة الله عليه و كان من أشهر المعلمين في
الكليةالحربية و تدرب علي يديه كثير من ضباط القوات المسلحة وهو والد الصديق الدفعة
ميرغني أدريس سليمان أمين نادي الهلال السابق و محمد و عماد, وبالرغم ماتمتع به من
شخصية عسكرية جادة فكان صديق لنا و الجلوس معه متعة لما لديه من ذكريات رائعة.
العم الرائد عثمان أدريس رحمة الله عليه من أشهر الضباط في سلاح النقل و من الذين عملو
لفترات طويلة في حاميات جنوب السودان ومن أبناءه الرائد م. أدريس و محمد و أبوبكر
العم الرائد صالح فرح رحمة الله عليه من ضباط سلاح النقل والد العقيد معاش عبدالسلام
صالح فرح وفيصل و أيهاب و شهاب و محمد وهم من سكان الحلفاية حاليا,,
العم الرائد . عوض محمود( كوبر) و هو موسيقي و شاعر و كان قائد لفرقة موسيقي القوات
المسلحة و دائما كان يقود الفرقة في المناسبات الوطنية و المباريات القومية و لديه الكثير من
الأعمال الموسقية من أغاتي و أناشيد و جلا لات عسكرية ( ناس الموسيقى و أخونا عماد
مدونا بما تعرفونه عن هذا الرجل المبدع)
و من الختمية المرحوم الرائد الأمين جوهر والمرحوم الرائد الأمين سعدالله وهم من الرعيل
الأول في الجيش السوداني...
وفي مدينة بحري و التي تعتبر المدينة الصناعية الأولى في السودان بها مراكز صناعية مهمة
مثل النقل الميكانيكي الوبورات و المخازن و المهمات التي عمل به الكثير من أباءنا و الأن كل
هذه المناطق دمرت و أزيلت و بيع ما تبقى منها مرة بأسم التمكين و مرات بأسم الأستثمار و
لكن هيهات فأن غدا لناظره قريب!!
ومن هذا الجيل أيضا الوالد عبدالله العجب ابراهيم الذي بدأ حياته جنديا بقوة دفاع السودان
الحملة الميكانيكة التي تحولت فيما بعد الى سلاح الخدمة و الآن سلاح النقل و أثناء هذه الفترة
عمل في جبهة الشرق أرتيريا ثم أنتقلوا الي ليبيا و كانوا اشتركوا في معركة العلمين في
الصحراء الليبية بين قوات التحالف و الجيش الأيطالي , و في تلك الفترة تعلم ميكانيكا
السيارات و بعد انتهاء الحرب في 1945 و عودتهم للسودان تم تسريحه من الجيش بعد أن
منح نوط نجمة أفريقيا من الحكومة البريطانية و تم تعينه بأدارة ألأشغال قسم مصلحة النقل
الميكانيكي و تدرج في النقل الميكانيكي و معه الكثير من الزملاء أذكر منهم المرحوم يسن
السيد والد الدكتور شوقي يسن السيد و أخوانه و العم محمود رحمة الله والعم السر كرار
والد سيد الحوش الأخ كمال و أخيه بدر الدين و أختهم زينب و العم السر دبلوك و الد حانم
دبلوك و أخوانه والعم حسن خليفة وا لأخيرين أنتقلوا للتعليم بمعهد التدريب المهني بعد أنشائه
و ظل الوالد معلما بمدرسة النقل الميكانيكي و تخرجت و تدربت أجيال من الفنيين على أيديهم.
وتمتعوا بعلاقات صداقة وأخوة حميمة نادر ما تتوفر في هذا الزمن الصعب.
رحم الله الذين أنتقلوا الي رحمته و متع الأحياء منهم بالصحة والعافية و العمر المديد...
وأستودعكم الله الذي لاتضيع و دائعه ...
و الى لقاء قريب بأذن الله
د. أبراهيم العجب
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
عزيزنا الدكتور العجب والله ذكرتنا باناس من فطاحلة وتاريخ بحري النضر واذكر ان والدكم عبد الله العجب رحمة الله عليه آخر مره رايته في منزل عمنا رحمة الله
عليه يسن السيد بالمزاد وفي نفس الفتره قابلت وفي نفس المنزل رحمةالله عليه محمد خيري احمد - حاج الفريني.
الطاهر محي الدين هل هو ايضا والد زميلنا الصادق؟
الاخت ناهد وعبد الوهاب انتو لو شفتوني هسع والجضوم المنفخه زي ما قالت ناهد من كترة قولت اوفففففففففففف مش من الالوف بتاعة السودان وبالفعل شكلي اختلف
تماما .
الزمن داك لو لاحظتو بتاع السوالف او الوسكرز كما كان يطلق عليها وبالطبع ما كان الفنان زنقار ولا عبد الله الماحي لانه رحمة الله عليه غني في طهور الوالد
رحمة الله عليه .
ان شاء الله زي سمير غانم في الروح علي الاقل.اخي كمال احسن من يحدثنا عن تلك الفتره ولكن ادري ان صديقي لو كان يعلم ان هذه الابواب ستنفتح كان عمل
نايم
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
أورد هذا الجزء الطريف من مقال قديم بجريدة الصحافة للشاعر المرهف الإحساس سعد الدين إبراهيم ..Quote: (رنده عطيه) الكاتبة بالسوداني (جابت سيرتي) في موضوع رشيق عن بخلنا بالحب .. حيث حكت ان اطفالا اندهشوا ان حقاً ( بابا) هو ( راجل ماما) فنحن نخجل من الحب .. بل نحن نخجل من النجاح .. كنت اتسامر مع طفلتي الصغيرة فقلت لها لماذا لا تطلعين الاولى؟ فقالت عشان بخجل. وبالمناسبة (يا رندا) حتى نحن (بابا) و(ماما) ننسى ذلك .. فمرات يمر علينا شعور بأن زوجاتنا وازواجنا مجرد رفاق للونسة ولادارة البيت اما ان قلت مثلاً لزوجتك : انا بحبك .. فربما تقول لك : بس .. او (عليك الله خلي العواره يا فلان).. رنده: حب ايه اللي انتي جاية تقولي عليه! بحري : - بالمناسبة يا رنده هل تصدقي اني عشقت مدينة بحري وسكنت فيها لسبب بسيط جداً كنت في شبابي اقول للفتاة الجميلة في نظري انت جميلة.. قلت ذلك لفتاة في ام درمان فقالت لي: الجمل اليرفسك وقلته لفتاة في بحري فقالت لي: شكراً جزيلاً .. لذلك احببت بحري .
|
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
يا ابو رزقه الاستاذ سعد الدين ابراهيم يكفيه انه قال: المشاوير لسه حزنانه بتنادي والاماسي بتبكي في اسي ما اعتيادي ما كنتي بهجتا في روائع قوس قزح .............. العزيزه
وقال :
عن حبيبتي انا باحكي ليكم
ضل ضفايرا ملتقانا شدو اوتار الضلوع .. باحكي ليكم
.. ساوا ليكم بايدينا شاي
وحالبالكم ضراع الليل
وجالبالكم ضي القمر
ومخبيه في جروف النيل
متي ما تدورو بتديكم
وما ممكن تخليكم
تجيب النسمه وتديكم
عشان كان نورا ما كفا
تجيب ضيا يكفيكم
هذه هي بحري.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: بحري قريبة والمسافة سنة!!! |
ولأول مرة وبعد غياب سنتين
كأطول سابقة غياب عن بحري وطراوتها
حزمنا حقائبنا على امل
قضاء عيد الأضحى في بحري
وربوع بحري
وياناس بحري حتستقبلونا ولا بتعملوا نايمين
والله طلباتنا ما كتيرة
بس شية وشربوت
والسهر ممنوع بامر وزيرنا بتاع الداخلية وكدة (بدون تعليق)
وبحري قريبة
وبلدنا حبيبة
وشوقنا بحر لي بحري
| |
|
|
|
|
|
|
|