كلما مر بنا الزمان ... و افسحت السوداء الطريق الي البيضاء ... يبعد حلمنا بالعودة الي البلد ... تلهينا سرعة الحياة هنا ... و نحن ندمن تلك السرعة حتى تنسينا ذلك البلد الأمين ... و كلما اتيقنا ... و قلنا راح مع الأيام ... يأتي ما ينكأ جرح النسيان ... ويقول لك هيهات ...
اليوم ...
جاءتني ابنتي الصغرى بكباية الشاي الأحمر و معها صحن ( قرقوش ) !!! سألتها ؟ قرقوش ؟ يا بتي ده من وين ؟ قالت جانا من السودان !!! ... ارسلته لك الخالة فلانه ؟ جابوهوا في كرتونة ... لكن فضيناهو في علبه !!! و الكرتونة وين يا بتي ؟ امشي جيبيها ...
و جاءت الكرتونة ... و بها رائحة الماضي و الزمن الجميل ... لم اشتم رائحة القرقوش فقط ... بل رائحة الصاج الذي سواه ... و رائحة حطب الفرن ... و ريحة الحلة ... و الجيران ... و زقاقت ام در .. و ريحة مشرع ابروف ... و تمربونة بيت الحاكم العسكري في مدني ... و التمرهندية الرامية فوق بيتنا ... و شجر الحنة في بيت العمة في امدرمان ... و ريحة البحر في اونقياي و سنكات ... و ريحة توب امى ... و جلابية ابوى ... و ريحة قفطان جدى محمد سعيد ... و ريحة تُكل حبوبتي في ود ارو ... و حوش جدى بعد ما اترشه في العصرية و ريحة عيد رمضان الآتي ... و مشاويرنا لفرن الحلة ... و صفايح الخبيز المجهزة للعيد ... ___________________________
نحن في السودان نهوى اوطانا ان رحلنا بعيد نطرى خلانا
يحيى قباني لك ألف تحية الوطن عالي جدا وسيظل حبه يجري في دمانا ببساطة ليس التراب ترابا فالتفاصيل كلها هي الوطن لذا نصحتكم من قبل : لا تطيلوا التسكع في بلاد الآخرين لا تطيلوا التسكع في بلاد الآخرينلا تطيلوا التسكع في بلاد الآخرين
01-09-2015, 11:32 AM
Khalid Basheer
Khalid Basheer
تاريخ التسجيل: 04-14-2013
مجموع المشاركات: 381
بعيد يا أخوانّا بتذكّر حلاة الذكرى لمّا تهف وفي أعماقنا تتحكّر محال في لحظة نحنا نخون ولي ماضينا نتنكّر أصلو عمرنا جدول شوق وحبة ذكرى ما أكتر *** بعيد يا أخوانّا بتذكّر حليل الخور يفرّحنا ومويتو تفيض وتتبعثر ونبني بيوتنا بي طينة نسيبا تفوت وتتكسّر ونمشي أهلنا فرحانين نفتش علبة السكّر ونشحد يابا تعريفة دحين يا أبوي ما بتقدر؟؟ يقول والله والله ويحلف زين ويتعذّر ونزعل نحنا بي رقة دموعنا الغالية تتقطّر *** بعيد يا أخوانّا بتذكر لمة بيتنا كل صباح وقعدة يمة في البنبر تناول داك حبيبة شاي وتدي التاني ما بتفتر ونحنا نشيل زلابية وعيش مع شاهينا نتحنطر دي صورة نعيشا كل صباح حفظنا القعدة والمنظر *** بعيد يا أخوانّا بتذكّر شوارع الحلة والدكان ولون الشارع الأسمر وحاجة تبيع تسالي وفول تحت نيماً ظليل أخضر ونختف نحنا نجري هناك وهي المسكينة ما بتقدر ونضحك ونحنا ما عارفين جزانا يكون وكت نكبر ونلقى الدنيا ... مرة الدنيا لمّا تضيق وتتعكّر وأصلو الما عتر مرة مصيروا يعيش ويتعتّر
01-09-2015, 11:58 AM
هاشم أحمد خلف الله
هاشم أحمد خلف الله
تاريخ التسجيل: 01-16-2007
مجموع المشاركات: 6449
Quote: بها رائحة الماضي و الزمن الجميل ... لم اشتم رائحة القرقوش فقط ... بل رائحة الصاج الذي سواه ... و رائحة حطب الفرن ... و ريحة الحلة ... و الجيران ... و زقاقت ام در .. و ريحة مشرع ابروف ... و تمربونة بيت الحاكم العسكري في مدني ... و التمرهندية الرامية فوق بيتنا ... و شجر الحنة في بيت العمة في امدرمان ... و ريحة البحر في اونقياي و سنكات ... و ريحة توب امى ... و جلابية ابوى ... و ريحة قفطان جدى محمد سعيد ... و ريحة تُكل حبوبتي في ود ارو ... و حوش جدى بعد ما اترشه في العصرية و ريحة عيد رمضان الآتي ... و مشاويرنا لفرن الحلة ... و صفايح الخبيز المجهزة للعيد ...
ليتك إن ذهبت ذات يوم تجد هذا الذي ( تهاتي ) به بعضه .... أو حتى قليلاً منه ......
....... ....... .......
أخشى أن أقول ...
01-09-2015, 04:38 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: يحيى قباني لك ألف تحية الوطن عالي جدا وسيظل حبه يجري في دمانا ببساطة ليس التراب ترابا فالتفاصيل كلها هي الوطن لذا نصحتكم من قبل : لا تطيلوا التسكع في بلاد الآخرين
شيخنا ود قاسم ...
قالوا في سوداني كان في السعودية و مرضان مرض شديد جداً ... لغاية ما الدكاترة نصحوا الناس انو فايدة مافي ... والأفضل انو يودوهوا السودان يقضي باقي ايامو الفضلن وسط اهله ... و فعلا عملوا الإجراءات و عربية اسعاف ودتو المطار و عمك منتهي ... وصلو مطار الخرطوم ... و عربية اسعاف تاني و نزلوهوا تحت الهانقر الزنكي داك و راجين الإجراءات عشان يدخلوهوا ... و الهانقر مفتوح طبعا و جاتك لفحة سموم و معاها غبار ... بس عمك مع اللفحة الحارة ديك فتح عيونوا بالراحه و قال لواحد من المرافقين بصوت محشرج كده: ياخي بس اوعوا تكونوا عملتو لي خروج نهائي من المملكة ؟
اها نبقي لي جنس ده يا خال ؟ _____________________________________________ دي مداعبة بس يا ود قاسم ...
و النفيسة فيها ... الا القدم تقل و حتل ..
بس نمرض بيها من بعيد لي بعيد ...
و نسأل الله ان يزيل الغمة ...
01-10-2015, 06:41 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: بس ريدة البلد يا عاطف ... لا قادرين نحمل بعادها ... و ملاوزين الجمال الفي راسنا يتكسر اكان زرناها ...
سلام عزيزنا يحيى التغيير الشكلي طبعا حصل بصورة لا تتخيلها، يمكن بيتكم ما ح تعرفو الأسبوع الماضي كنت في الخرطوم تحدثت مع صديق عن اختفاء المعالم المعروفة للشوارع الرئيسية وشبه الرئيسية وضربت مثلا، قلت ليهو في التمانينات كنت أكون راكب بص الثورة بالنص وأقرا في جريدة أو كتاب.. أرفع رأسي كل كم دقيقة لألقي نظرة خاطفة لا تتجاوز نصف ثانية عشان أعرف وصلنا وين هسي الناس الراكبين في المواصلات بكونوا مادين روسينهم بالشبابيك طول الوقت عشان ما يفوّتوا محطتهم، وفي الغالب معظمهم بلقوا نفسهم في آخر محطة ويرجعوا كداري الصبغة التجارية كست الشوارع بسبب الضائقة الاقتصادية، فتحولت إلى أسواق شعبية مصغرة كل زول حوّل واجهة بيتو (كان مِلك كان إيجار) لمحل بيع عطور، أنابيب غاز، شحن كروت موبايلات، مغلق، طاحونة.. الخ وبعد كم أسبوع تتبادل هذه المحلات مواضعها بكل كرم أما عن التغير الموضوعي فيحتاج إلى مداخلة أخرى، لكن باختصار أؤكد ليك هناك فقط طبقات غبار -خفيفة أو ثقيلة- طبقت على البلد، ستزول بزوال هذه العاصفة الهوجاء
01-10-2015, 07:13 PM
عاطف عمر
عاطف عمر
تاريخ التسجيل: 11-26-2004
مجموع المشاركات: 11152
Quote: و ملاوزين الجمال الفي راسنا يتكسر اكان زرناها ...
وهذا بالضبط ما نخاف عليك منه يا حبنا .......
ثم
مع تحياتنا لعزيزنا ود الزبير فقد أجاد وأبدع في وصف الحال كما العهد به ولكن ....
Quote: أما عن التغير الموضوعي فيحتاج إلى مداخلة أخرى، لكن باختصار أؤكد ليك هناك فقط طبقات غبار -خفيفة أو ثقيلة- طبقت على البلد، ستزول بزوال هذه العاصفة الهوجاء
مداخلة بس ؟؟؟ باين لى التغيير الحصل في البشر ( بس ) ... محتاج لـ كتب وليس مداخلة
Quote: سلام عزيزنا يحيى التغيير الشكلي طبعا حصل بصورة لا تتخيلها، يمكن بيتكم ما ح تعرفو الأسبوع الماضي كنت في الخرطوم تحدثت مع صديق عن اختفاء المعالم المعروفة للشوارع الرئيسية وشبه الرئيسية وضربت مثلا، قلت ليهو في التمانينات كنت أكون راكب بص الثورة بالنص وأقرا في جريدة أو كتاب.. أرفع رأسي كل كم دقيقة لألقي نظرة خاطفة لا تتجاوز نصف ثانية عشان أعرف وصلنا وين هسي الناس الراكبين في المواصلات بكونوا مادين روسينهم بالشبابيك طول الوقت عشان ما يفوّتوا محطتهم، وفي الغالب معظمهم بلقوا نفسهم في آخر محطة ويرجعوا كداري الصبغة التجارية كست الشوارع بسبب الضائقة الاقتصادية، فتحولت إلى أسواق شعبية مصغرة كل زول حوّل واجهة بيتو (كان مِلك كان إيجار) لمحل بيع عطور، أنابيب غاز، شحن كروت موبايلات، مغلق، طاحونة.. الخ وبعد كم أسبوع تتبادل هذه المحلات مواضعها بكل كرم أما عن التغير الموضوعي فيحتاج إلى مداخلة أخرى، لكن باختصار أؤكد ليك هناك فقط طبقات غبار -خفيفة أو ثقيلة- طبقت على البلد، ستزول بزوال هذه العاصفة الهوجاء
الحمد لله على السلامة يا ود الزبير يا جميل ...
سنة 93 بعد اغتراب في الرياض لمدة خمسة سنين ...
كان لي جار مصري مهندس كهرباء اسمه ربيع عبد الغني ...
رجل يساري جميل جداً و مثقف و قارئ نهم ...
جمعنا حب القراية و الاعتدال في التوجه ...
المهم السنة ديك اخوك مسكتو زهجة و قال يفكر يرجع السودان ...
و مسافرين شغل انا و عمك ربيع في الطيارة قال لي يا باشمهندس
انت تاعباك غربة جسدك و روحك من السودان ...
لكن انا خايف عليك ترجع و تصدمك غربة ( النفوس ) البدت تدخل علي الناس هناك ...
اها يا معاوية اخوك خاف من دي ...
و لي يوم الليلة .... ما شفت البقعة بي عيني ...
و المرسوم و منحوت جواي كتير ... ما دايره ينطمس ...
تعرفي يا سلمي ... زمان كنا لامن نودع او يودعونا نسمع حمد الريح و قلبي المكتول كمد ... قال الأولاد متجرسين يعني .... و القصة كلها تكون خفسة أسبوعين تلاتة ... ما قايلين بجينا يوم و تبقى فينا البقت ...
عثمان خالد قال : يا قلـبى يا مكتول كمد اعصـر دموع هات غنوه لى سيد البلد يا حليلو .. قال سايب البلد يا حليلو .. كيفن يبتعد وكيفن نسيبو يروح بعيد فى رحلة مجهولة الامد _________________ و الله مجهولة الأمد بالجد ...
Quote: يحيى قباني ....... حاسي بيك يا ود أمي حاسي بيك .... ومن رفع السماء بلا عمد .....
في خضم الشجن و الشوق الهالكنا يا عاطف ... حدث اليوم مالم يحدث هنا الا مرة واحدة ... في خلال الواحد و عشرين سنة الماضية ... انقطع التيار الكهربائي فجر اليوم و لمدة 6 ساعات ... نتيجة لعطب في كيبل رئيسي ... درجة الحرارة قبل الرياح ناقص 10 و مع الرياح ناقص 20 البيت ابرد من فريزر التلاجة ...!!! كل شيء مربوط بالكهرباء ... جهاز التدفئة المركزي لكي يعمل يحتاج الي الكهرباء ماعدا ( وليس في كل المنازل ) البوتجاز في منزلنا يعمل بالغاز فقط !!! و انا من اختار ان يكون الطبخ علي الغاز ... لقناعتي ان طبخ الغاز أطعم من طبخ الكهرباء ...
مع ذلك البرد ( تكلفت ) جميع من في المنزل الا العبد الفقير لله ... نزلت الي المطبخ ... اوقدت اكبر شعلة في البوتجاز و قمت بغلي ماء ... و حضرت كوب من الشاي المخلوط مع الهبهان ... و سحبت علبة القرقوش ... و اخدت ( شمّة ) من علبة القرقوش ... مليت الرئتين من ريحة البلد ... و شلت اول قرقوشة و غمستها في كباية الشاي ... و مع تغميستها اتذكرت قصة عمك عوض جبريل ... و قعاده في قهوة شديد مع المهنيين ... يبدو القعاد في القهوة من الفجر ... مع شاى اللبن و اللقيمات ... يسمعهم عمك عوض جبريل و يشاغلهم ... و ياخد من كلامهم و يكتب و يغني ... و قعدت ادندن يا عاطف و ( اغالب دمعي و اتصبر ) ... و حلفت آخر اليوم ده الا اسمعك ليها مع رمية جميلة من ابيات لعمر ابوريشة ...
تسجيل رايق لي ولدنا سامي المغربي ... _____________________________
امي الله يرحمها يا عاطف ... كانت تعجن اللقيمات او أي عجين لاي خبيز دون ما تحسب المقادير ... كانو يسألوها اللقيمات او القرقوش ده بتختي قدر شنو من ده و كم من داك ... تقول ليهم شوية من ده و حبه من داك ... و اعجنوهو ا بي شوية محبه و حنان ... يطلع خبيز مظبوط ...
01-13-2015, 01:23 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: و المرسوم و منحوت جواي كتير ... ما دايره ينطمس ...
ياصديقي كيفك أنا مشيت يوم 20/10 ورجعت يوم 23/10 علي الطلاق الطمسة من المطار تلاقيك ،،،، سأالني أحد الاصدقاء يازول مالك ما بتتكلم قلت ليهو نقول شنو ؟؟ ما لقينا البلد لقينا حاجة ثانية أمدرمان مافي عديييييل كده وحدث ولاحرج
يازول خليك بالصورة اللي في زهنك لا تذهب فستفجع
01-13-2015, 06:10 AM
Hamid Elsawi
Hamid Elsawi
تاريخ التسجيل: 09-22-2005
مجموع المشاركات: 3450
Quote: ياصديقي كيفك أنا مشيت يوم 20/10 ورجعت يوم 23/10 علي الطلاق الطمسة من المطار تلاقيك ،،،، سأالني أحد الاصدقاء يازول مالك ما بتتكلم قلت ليهو نقول شنو ؟؟ ما لقينا البلد لقينا حاجة ثانية أمدرمان مافي عديييييل كده وحدث ولاحرج
يازول خليك بالصورة اللي في زهنك لا تذهب فستفجع
نقنع يعني و لا شنو يا حبيب ..؟ تعرف يا صديقي ... الليلة درجة الحرارة ناقص 28 ... ليه ما عارف ... و باكر طول النهار نفس الشئ و اخوك عنده كم مواعيد كده ... قاعد افكر البس شنو و اتكلفت كيف ... قمت اتذكرت ليك أيامنا في الشتا في السودان ... خصوصا لما نكون ماشين السينما الدور التاني ... لازم تتقل قال .. و فوق القميص كده تربط ليك فنيلة برد في رقبتك ... و العجب كان السينما بقت الصافية ... الوكت داك الدنيا خلا ... و لا وطنية غرب مرة ... راجعين البركس وقفنا في فرن سيحة ناكل رغيف و نتدفا شوية قبال نواصل مشيتنا الكداري ...
حليل السودان ياخ ... و حليلكم انتو زاتكم ...
يا زول جاي متين ؟
01-13-2015, 01:59 PM
محمد كابيلا
محمد كابيلا
تاريخ التسجيل: 11-15-2008
مجموع المشاركات: 3510
أخى يحي قبانى الرجل الجميل الغربة صعبه والبره همو فى الرجوع والجوه همو فى المروق.......الله يصلح حال البلاد والعباد.....لوسمحت بتعرف عاطف فايز قبانى من أهلكم........
ذكريات الصبى وأم درمان..
01-15-2015, 04:11 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: أخى يحي قبانى الرجل الجميل الغربة صعبه والبره همو فى الرجوع والجوه همو فى المروق.......الله يصلح حال البلاد والعباد.....لوسمحت بتعرف عاطف فايز قبانى من أهلكم........
ذكريات الصبى وأم درمان
سلامات إسماعيل الرجل الجميل ...
عاطف فايز ماهر عبد العزيز القباني ...
أولاد عمومة و هم احد فروع القبانية الأساسيين و هم من قبانية الصور او الملازمين ...
لم اتشرف بمعرفته هو شخصياً و اعتقد انه مقيم في السعودية ...
و لكن كل من يعرفه عن قرب يقول انه انسان نادر و جميل جداً ...
تحياتي له و لك يا جميل ...
01-15-2015, 04:28 PM
ismeil abbas
ismeil abbas
تاريخ التسجيل: 02-17-2007
مجموع المشاركات: 10789
تمر بنا الأيام كقطار سريع يطوي محطات الحياه طياً ...
في احد تلك المحطات كانت لنا ذكرى لن ننساها ...
في منتصف سبيعينيات القرن الماضي كنا طلاب في بداية المرحلة الثانوية ... تم نقل والد صديقنا ( اللواء معاش حاليا ) محمد محمود رمضان الحضري الي فرع بنك النيلين بود مدني ... و انتظرنا انا و أصدقائي الأحبه سامي جون و مجدى ابدرق اول عطلة للذهاب الي مدني و قضاء وقت مع صديقنا محمد في منزلهم في بركات ... و استقبلنا الوالد محمود ( رحمه الله ) في محطة البص السريع ... و ذهبنا الي منزلهم ... و كانت الوالدة في استقبالنا بترحاب شديد فكنا كابنائها تماماً ... قضينا معهم أسبوعا كاملاً ... لم تكل الوالد من اكرامنا بل يزيد كرمها يوما عن يوم ... وكانت ( لقيمات ) الصباح اليومي هي ما نبدا به يومنا ... تستيقظ منذ الفجر للتحضير ... و نستيقظ نحن علي رائحتها و نجلس جميعاً حول صينية الشاي باللبن المقنن ... كانت امرأة فريدة من نوعها ... حبها فطري و دواخلها اصفى من الماء الزلال ...
تلك المحطة اذكرها و كاننا توقفنا فيها بالأمس القريب ...
و كما هي محطات ...
نعي الناعي والدة صديقي محمد محمود الأسبوع الماضي ...
رحمها الله رحمة واسعة ... و رحم الله امي و جميع امهاتنا ...
كلما ضاقت بنا الغربه ... و كلما طِرينا خلّانا و طوحت بنا ذكرياتنا ... تأتيني هذه الابيات من دُرة الخليل فلق الصباح ... و ما زلنا في حالة اختناق ... ننتظرها لعلها تتنفس ... و تفوح ...
01-20-2015, 04:20 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
بعد يوم عمل شاق جداً مع اكثر من عميل و في أجواء ثلجية غير مريحة ... عدت الى المنزل ... وانا اهم بالنزول من العربة ... لمحت ( عداد ) الكيلومترات الذي كنت قد ( صفرته ) قبل الخروج صباحاً يشير الى 189 كيلومتر ...قطعتها في يوم واحد و انا بين ثلاث مناطق ليست بعيدة عن بعضها ذلك البعد ... ولكن طبيعة العمل نتحرك من منزل الي منزل و من شارع الى شارع لمقارنة المنازل و ايهم اصلح للشراء ...
بعد حمام ساخن جداً ... جلست علي مكتبي لتلخيص عمل اليوم ... ثم تذكرت ذلك العداد و تلك الكيلومترات ال 189 ... فضحكت ... و تذكرت حينما كنا نقول ( مسافر مدني ) ... 180 كيلو مدني الخرطوم ... نعتبرها سفراً ... نعد له العدة ... و الزوادة ... ____________________________________________________________________________ قيادة السيارة في السودان كانت رفاهية ... رغم سوء الطرقات ... اذكر كيف كنت انتظر ان ينام الوالد رحمه الله عصراً وقت القيلولة ... حتي أقوم ( بدفر ) السيارة الأوبيل 64 بعيداً عن المنزل و استخدام المفتاح الاسبير و الذهاب الى حِلة المحبوبة ... و القيادة جيئة و ذهابا آملاً ان تطل و تراك ...
احلامنا كانت كاحلام العصافير ... ننتظر نظرة او ابتسامة ... حبنا كان عذرياً ... كانت نظرة واحدة تكفي ... و عجباً ان صحبت تلك النظرة ابتسامة خجولة ... كأننا امسكنا السحاب ... و نعيش ذلك المساء و كأننا اكلنا حباً و شبعنا عشقاً ... فتنتفخ صدورنا ... حتى تكاد تنفجر ... فالقلب هو سيد المساء و الليلة ...
01-22-2015, 07:49 AM
محمد محمد قاضي
محمد محمد قاضي
تاريخ التسجيل: 12-23-2014
مجموع المشاركات: 1605
محطة أخرى عادت الى الذاكرة بعد رحيل الملك عبد الله بن عبد العزيز ...
في بداية تسعينات القرن الماضي كنت في الطائف في رحلة عمل
كنت انا و معي اتنين من مدراء شركة ( تينيه انترناشيونال الفرنسية ) حضوراً في قصر الأمير مشعل بن عبد العزيز لمناقشة تصميم قصره الجديد بالرياض ... مكثنا هناك حوالي الأسبوع ... وقرب نهاية ذلك الأسبوع طلب مني الأمير مشعل ( كنت اعمل في الإدارة الهندسية التابعة لمكتبه الخاص ) ان اقدم دعوة للمهندسين الأجانب للذهاب معه لحفل عشاء في قصر الأمير عبد الله ( وقتها كان وليا للعهد ) ... و كان سبب الدعوة هو ان نشاهد ذلك القصر الفخيم المبني على احدث طراز ...
ذهبنا الى حفل العشاء و كان بالفعل قصراً مهيباً ... قمنا بمصافحته و تجولنا في القصر بعد ان استأذنه الأمير مشعل ... ثم ذهبنا الى صالة العشاء و التي كانت تعج بحوالي ال 300 شخص على اقل تقدير ... كان من يقدم الطعام كلهم من الجنسية اللبنانية ... لبس و اناقة و ذوق في التقديم ... و بعد دقائق حضر الامراء و جلسوا على صدر ( السفرة ) في طاولة تجلس على شبه مسرح ... و هنا ضحكت ملئ شدقيا ... فما ان جلس الأمير عبد الله ... الا و اتى خلفه ووقف حتى نهاية الحفل رجل سوداني ... بجلابيته البيضاء و طاقيه ... كان يحمل في جيوبه كل ادوية الأمير عبد الله ... يفتح العلب بيده من خلف الأمير ... و يناوله الحبوب ... و ( يبلع ) الأمير كل ما يعطيه ذلك السوداني ... فتذكرت ( عم ادريس ) و الذى كان يقوم بنفس الدور في قصر الأمير مشعل ... فرآني الأمير مشعل و انا اضحك ... فابتسم ( الأمير مشعل رجل صاحب ذكاء فطري خارق ) ... و في تلك الليله عدنا الى قصره و جلسنا قليلاً نتحدث عن القصر الفخم و التصميم ... و حين هممنا بالقيام ... قال لي ... رأيتك و انت تضحك ... و انا ادري لماذا انت تضحك ... فقلت لماذا ( طال عمرك ) ؟ قال لان ارواحنا انا و اخوتي بعد حفظ الله في اياديكم انتم يا سودانيين ... __________________________________________________________ من يقترب كثيراً من آل سعود ... يتعجب كثيراً لتلك الأسرة ... رحم الله أبا متعب ...
01-24-2015, 06:53 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
و لما ينادي همس الشوق يقيف كل الزمن و يسمع ... عيونك ديل عيون اهلي حُنان ...زي نغمه في مقطع بحبّك يا صباح العيد و يا فرح العريس السار و احسك في سما الازمان شمس بتضوّي للمشوار _________________ يا ريتني لو اقدر أقول فيك الكلام الما انكتب و اجلي المقاطع بالدهب و افرد صباح حسنك و شاح يمسح عذاب عمري المسطر باللهب
02-14-2015, 03:46 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
ـ ياخ جننتنا جِن .... ياسر ـ ياخ الله يعدلها عليك محل ما تقبل .... معاذ ـ أخ أنا منك ياخ .... هاشم ـ يا قباني مالك علينا ياخ .... حمد ـ يا سلام يااااخ .... كابيلا
الجرسة دي كلها ليك يا ود قباني ... !! الدنيا خميس ياخ !!
05-07-2015, 09:01 AM
نصر الدين عثمان
نصر الدين عثمان
تاريخ التسجيل: 03-24-2008
مجموع المشاركات: 3920
عزيزي ود قبــاني وضيوفك المتواجدين وجداً و صباً.. ليعنا الله ويعينكم...
Quote: احلامنا كانت كاحلام العصافير ... ننتظر نظرة او ابتسامة ... حبنا كان عذرياً ... كانت نظرة واحدة تكفي ... و عجباً ان صحبت تلك النظرة ابتسامة خجولة ... كأننا امسكنا السحاب ... و نعيش ذلك المساء و كأننا اكلنا حباً و شبعنا عشقاً ... فتنتفخ صدورنا ... حتى تكاد تنفجر ... فالقلب هو سيد المساء و الليلة ...
يا الله.............
قلبت علينا المواجع يا يحيى..... بيد أنها لم تغادرنا أصلاً منذ أن فارقنا الديار..
نحن غايتو ما وصلنا مرحلة شم كرتونة القرقوش دي.... لأننا بنجد كثير عزاء في الكسرة بالتقلية وأم رقيقة غداء كل جمعة..
ربنا يعينكم في تلك البلاد التي تموت حيتانها من البرد كما قال صاحب موسم الهجرة رحمه الله..
ويزيل هذا الكابوس الذي جثم على صدورنا طويلا.. ويجمعنا من تاني في بلدنا...... ---------- راح الميعاد .. راح الميعاد وزمانى راح والجرح لانام لا استراح لكنى مُتكتم عليــــه كم من جراح أحيت جراح يا قلبي ما تسهر معاي ما أظن يفيدنا الأنتظـــار عدًيني في روضة هنــاي سكت النغم سكت الكنـــار جفت ورود الأمنيـــــات يا حليل زمان الإخضـــرار يا حليل حبيب كان ليّ نــور كان ليّ ساعة الغــربة دار يا ريتني لــــو اقدر أعيد لحظات من الماضي البــعيد وأهدى الزمان كل الحــنان وأكتب لعمري ربيــع جديد لكن رجعت وقلت مـــــا يفيدني أحلم ما يفـــــــيد تلقاني بين الناس هــــــنا وأنا في حقيقتي هنـــاك وحيد ياحليل لياليــــــنا المضت من غير أمــــــاني تنّورها يا غالى يا أمـــــــل الحياة ومعنى الصفـــــــات النيّره طول البعـــــــاد ما أظن يفيد آمـــــــــالي فيك ما بغيرها
يا سلاااام يا استاذنا الشفيف يحيى قباني ,, تلك اوطانا وحبها الخاااااالد يجري في دمانا ,, فنحن ايضا مثلك نهوى هذا الكائن الجميل المسمى بالسودان ولكن اصبحنا نبكي على الماضي وزمااانا الراح ونتباكى على الاطلال وهيهات يعود الكان ولى وما اظنو يعود الكان ولى ,, وذكرتنا تنبيه الغالفين ود الرضي حينما قال ( العيلفون جنة عدن شوفت معالم يسعدن ) وكما قال الشاعر يا الخرطوم يا العندي جمال جنة رضوااان وطول عمري ما شفت مثالك في اي مكان ,,, هواجس وذكريات واشجان تعتلينا الفين بعد الفين يا قباني ونحن نهيم بلاد الغربة وزي ما قالو لمتين مبااارياك غربتك ملت خطوط الرحلة حالات الدوار ,, اااه يا قباني كم نشتاق لاهلنا وديارنا ولكل شي في البلد ,, الله بس يرد غربتنا سالمين .. لكن طلبتك بالذي سواك ما تقلب علينا المواجع والقرقوش ينفعك ان شا الله ,,,
تحياتي : ياسر العيلفون
05-08-2015, 05:51 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: نحن غايتو ما وصلنا مرحلة شم كرتونة القرقوش دي.... لأننا بنجد كثير عزاء في الكسرة بالتقلية وأم رقيقة غداء كل جمعة..
نصر الدين يا صديقي الجميل ...
مش بركه الوقفنا علي شم الكراتين بس :)
ياخ جيتنا بي راح الميعاد ...
تعرف راح الميعاد دي جمعت الحلنقي و ود الحاوي و عثمان مصطفي و مرقوا لينا غنا عجيب ...
عاين الألم ده يا نصر الدين
يا ريتني لــــو اقدر أعيد لحظات من الماضي البــعيد وأهدى الزمان كل الحــنان وأكتب لعمري ربيــع جديد لكن رجعت وقلت مـــــا يفيدني أحلم ما يفـــــــيد تلقاني بين الناس هــــــنا وأنا في حقيقتي هنـــاك وحيد
05-08-2015, 05:46 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: يا سلاااام يا استاذنا الشفيف يحيى قباني ,, تلك اوطانا وحبها الخاااااالد يجري في دمانا ,, فنحن ايضا مثلك نهوى هذا الكائن الجميل المسمى بالسودان ولكن اصبحنا نبكي على الماضي وزمااانا الراح ونتباكى على الاطلال وهيهات يعود الكان ولى وما اظنو يعود الكان ولى ,, وذكرتنا تنبيه الغالفين ود الرضي حينما قال ( العيلفون جنة عدن شوفت معالم يسعدن ) وكما قال الشاعر يا الخرطوم يا العندي جمال جنة رضوااان وطول عمري ما شفت مثالك في اي مكان ,,, هواجس وذكريات واشجان تعتلينا الفين بعد الفين يا قباني ونحن نهيم بلاد الغربة وزي ما قالو لمتين مبااارياك غربتك ملت خطوط الرحلة حالات الدوار ,, اااه يا قباني كم نشتاق لاهلنا وديارنا ولكل شي في البلد ,, الله بس يرد غربتنا سالمين .. لكن طلبتك بالذي سواك ما تقلب علينا المواجع والقرقوش ينفعك ان شا الله ,,,
ودي عشانك يا فنان ...
08-30-2015, 04:26 PM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: يا سلاااام يا استاذنا الشفيف يحيى قباني ,, تلك اوطانا وحبها الخاااااالد يجري في دمانا ,, فنحن ايضا مثلك نهوى هذا الكائن الجميل المسمى بالسودان ولكن اصبحنا نبكي على الماضي وزمااانا الراح
صديقي الفنان ياسر العيلفون ...
سامحنا يا جميل في تأخر الرد ...
فقد حال العُصار الغشا البلدات ان نرد عليك وقتها ...
ليس ذلك فحسب .. بل اعتقدت جازماً ان البوست قد انجرف مع الآخرين في تلك الفترة العجيبة... ________________________________________________________________ الزول الضخم عمر الدوش قال : أعيشهْا معاكَ لو تعْرف دموع البهجَهْ والأفراح أعيشهْا معاكَ واتأسّف على الماضى اللّى ولَّىَ وراح على الفُرْقَهْ الزمان طويل على الصبر الّى عِشْنَاهو مع طُول الألم والليل _________________ صحيح إنه الزمن غلاب لكن نحنا عِشناهُ و مشينا على عذاب دُرُوبنا تتوه.. و نحنا نتوه, و نفتح للأمل أبواب...
08-30-2015, 05:23 PM
معاوية الزبير
معاوية الزبير
تاريخ التسجيل: 02-07-2003
مجموع المشاركات: 7893
يحيى قباني يا زول يا جميل.. سلام يا صديقي. لقد جعلت لهذا المنير عبقا. لا يدانيه الا عبق الدعاش. ورائحة الجروف في الوطن الام. نهرب من كلماتك الصادقة لنداري الدموع! "تلك أيامٌ كان في الجيب ما يكفي من مال (على قلته) وفي الوجه كفايةٌ من نضار واللسان طلق" أو كما قال. في هذا البوست وحده ما يكفي من زاد روحي لأيام. نقرأ أدبا رفيعا. ونسمع فنا رفيعا. من بيت الكلاوي. ياخي الله يدرق عليك. ويعدل طريقك.
08-31-2015, 05:41 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: يحيى قباني يا زول يا جميل.. سلام يا صديقي. لقد جعلت لهذا المنير عبقا. لا يدانيه الا عبق الدعاش. ورائحة الجروف في الوطن الام. نهرب من كلماتك الصادقة لنداري الدموع! "تلك أيامٌ كان في الجيب ما يكفي من مال (على قلته) وفي الوجه كفايةٌ من نضار واللسان طلق" أو كما قال. في هذا البوست وحده ما يكفي من زاد روحي لأيام. نقرأ أدبا رفيعا. ونسمع فنا رفيعا. من بيت الكلاوي. ياخي الله يدرق عليك. ويعدل طريقك.
آآآآخ بس يا صديقي ...
نسأل عنك وعن حالا نعيد الكان حليل الكان
08-31-2015, 06:44 AM
khaleel
khaleel
تاريخ التسجيل: 02-16-2002
مجموع المشاركات: 30134
يا أرض الحبيب .... كم لي فيك غرام هابي علي طيب .... من ذكراك دوام أطراك لو أبين ... كل صباح جديد كم لي فيك شجون ... كل ما بقيت بعيد حبك لي دين ..... قربك لي عيد عاشقك ما بخون.... غيرك ما بريد وين زرق العيون .... للعينيه السود*** كم لي فيك مراح ... يا أرض الحبيب حسنك لي لاح ... شفته قريب قريب شفتو في نور الصباح.... شفتو في سحر المغيب شفتو و الغيد في الوشاح ... لاهية تلعب بالقلوب شفتو في اللهو المباح .... شفتو في الشط الرحيب**** يا مهد الجمال ... ما حبيت سواك أيه بحر الشمال ... و انت النيل حداك صافي يفيض زلال ... عندو جلس ملاك في حسنه الهلال ... في سحرو الهلاك شوقي ليك طال ... قولي متين أراك
باشمهندس يحيى لك التحية وانت دائما تتحفنا بالدرر خرجت من السعودية بلا سابق انذارالى بلاد تموت حيتانها من البرد وهدك الشوق والحنين الى امدرمان ونحن هنا في بلاد يموت دجاجها من الحر فماذا دهانا؟ كانت اواخر السبيعينات وبداية الثمانينات ايام جميلة في كلية المعمار قضيناها وسط لوحة زاهية من الابداع وبين عمالقة الفن عندما كان العميري صديقا وقاسما مشترك في كل حفلات الكلية والجابري وزيدان والكابلي وعثمان حسين وحميد والقدال وبادي ،من هناك ومن بهجة ام درمان تشكلت في دواخلك هذه النزعة الفنية الطاغية فلك التحية والشكر .
عبدالمنعم العوض الدفعة الوراك ولاقيتك في الرياض تسعة وتمانين
09-01-2015, 03:34 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
Quote: باشمهندس يحيى لك التحية وانت دائما تتحفنا بالدرر خرجت من السعودية بلا سابق انذارالى بلاد تموت حيتانها من البرد وهدك الشوق والحنين الى امدرمان ونحن هنا في بلاد يموت دجاجها من الحر فماذا دهانا؟ كانت اواخر السبيعينات وبداية الثمانينات ايام جميلة في كلية المعمار قضيناها وسط لوحة زاهية من الابداع وبين عمالقة الفن عندما كان العميري صديقا وقاسما مشترك في كل حفلات الكلية والجابري وزيدان والكابلي وعثمان حسين وحميد والقدال وبادي ،من هناك ومن بهجة ام درمان تشكلت في دواخلك هذه النزعة الفنية الطاغية فلك التحية والشكر .
عبدالمنعم العوض الدفعة الوراك ولاقيتك في الرياض تسعة وتمانين اÙÙÙ
منعم يا هندسة ...
كيفن ما متذكر ياخي ...
و الله أيام لا تنسى و عالم اخر معمار جامعة الخرطوم ...
و ميزة قلة عددنا في كل مرحلة لعب دور كبير انو الناس بتعرف بعضها ...
طمنا عنك ياخي و ان شاء الله كل شيء على خاطرك ...
09-01-2015, 03:23 AM
يحي قباني
يحي قباني
تاريخ التسجيل: 08-20-2012
مجموع المشاركات: 18708
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة