|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
اخي عبد الوهاب هل تقصد ناس عبد القادر علي مرسي؟؟ طبعا الراجل ده دفعتنا وصديقنا والآن هو في اسوان بعدما تزوج من هناك. وبعدين قرابتك ايه بيهم ؟؟ يعني عبد القادر رجع لي اصله.
بخصوص الدواريت واشهرهم عبد القادر الداروتي من اشهر الطهارين ببحري ووالد عثمان الداروتي وهو متزوج بنت خالتي علويه قسم السيد اخت عصام قرم.وهم يبدو من اصول مصريه.
اما المواليد فمعظمهم ارتبطت اسماءهم اما بالاعمال التي يؤدونها كعتباني ( من العتب )او النحاس( من اعمال النحاس) اوالشناقيط (من شنقيط او موريتانيا) او المناطق التي جاءوا منهامثل دندراوه ( اسره الدندراوي) لكن الملاحظ ان معظم المواليد رجعوا الي مناطقهم .
اما الاقباط ببحري الكثير منهم هاجر الي استراليابالتحديد والبعض احتفظ بعرقهم واستوطنوا كاسرة جرجس وآل اندراوس وكانوا من اجمل جيراننا بالدناقله شمال اسرة فؤاد اندراوس وزوجته ماتلدا وابناءه حمدي ونوال وميرفت واكلنا عندهم لاول مره ملوخيه بالانارب( كما يقولون).
اما الحلب فاشهرهم سيد الحلبي وكان من المرتاحين( يا ناهد) وكان رئيس لنادي العامل.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
Quote: اما الحلب فاشهرهم سيد الحلبي وكان من المرتاحين( يا ناهد) وكان رئيس لنادي العامل.
|
تااااااانى ياطارق ....
عارف زمان ماكان مرتاح .....الا الموظف .....البيدوه راتب ...وكان راتبه بيكفيه ايجار واكل وشرب وقراءة جرايد ودخول سينما ...وبعد ده ترفيه وسفر داخل او خارج السودان...
الوالدة قالت ليك ياطارق ...وهى جنبى الان ...
زمان كانت ماهيتا من الجامعه 80 جنيه سنة 73 تقريبا...قالت ليك بتملا ضهرية العربية بحاجات الشهر كلها السكر واللبن والصابون البودرة المستورد وكان جواته هدايا ... والحلاوة والبسكويت المستورد وتغشى تشترى الخدار واللحمة .. وتغشى امها تشيل منها كم جوز حمام من بيت الحمام .... وبعد ده بتمشى تتبضع من السوق الافرنجى اللى كان زى الفل ... وبتمشى تشترى من جنبرت بتاع العدة مفاتيح الصلص وقشارة الشنو مابعرفوداك .... وقالت ليك كمان فيها غشوة لشراية توب بشبشبه لامؤاخذة وكمان خاتم دهب بفاروزة .... لا وفى ترفيه كمان تجميع مبلغ معين شهريا للسفر به نهاية السنة للخارج.. .واكدت على ان اغلب الموظفين كانوا مرتاحين ...وقالت ليك ماواجعها شىء الا عدم وجود السينما الان ...وكان اللوج بى 80 قرش اربعه كراسى .... والسندوتشات جوة السينما حدث ولاحرج مرتدلا وجبنة مضفرة وجبنة رومى وبسطرمة ....وقالت ليك ولى ... انه نحن ماعشنا زيهم ...هم عاشوا حياة تانية ومرفهة ...
وياطارق انا طبعا جيل نميرى والصفوف ....والسكر بالاوقية ...وصف الغاز ...وصف العيش ... وصف البنزين ....وزمن الماهية مابتوصلك البيت خليها تكفيك لاخر الشهر .... وبتذكر كمان ياطارق...البيت زمان كله يمرق للصفوف ... كل واحد مننا انا واخوانى بيكون ليه فى صف.... والبجى داخل بالعيش ده كان احسن واحد بيستقبلوه استقبال الفاتحين او استقبال الزول الجاى من الحج....... ...فكنت شيطانة بمسك صف العيش طوالى .... منها اقرض وانا راجعه عيشة حارة ... ومنها الاقى الترحيب الحار ده من الوالدة.....زى عيشى الشايلاه ده ...
تانى بتقولى لى مرتاحين دى ياطارق؟
عالم مرتاحة.....
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
يا ناهد لغاية ما يظهر طارق الحلبي هو ذاتو..
الوالدة يديها العافية...
أكيد الوالدة بالمواصفات دي كانت من مرتادي Sweet Rosana وبابا كوستا.. ده زمن كان السودان قبلة الدول الحوالينا.... وكان العدني فيه أجدع حاجات ولا شارع قابل... بس اللعنة جاءت وأنا طلعت قلت بس أسوي البيت.. وأعرس وأرجع ... وحاتك العيال بقوا وش عرس... ونحن لسع هنا.. حضرنا من الريال كان بثلاثين قرش ونصحى كل يوم وهو متدهور لغاية ما حصل الريال 750 جنيه وما عارفين نرجع متين.. قولي للحاجة أنتو ربنا يديكم العافية كنتوا في زمن جميل هسع لو اللستك طرشق 8000 ما بتعمل رقعة... والحمام خلاص كلو طار وحتى القمري بقى ما بيجي.. وما عارفين يا حاجة البصارة كيف؟؟؟ غايتو بس دعواتكم..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
غابة الصبابي:
أين هي الآن؟؟ كنا ونحن تلاميذ في مدرسة الدناقلة شمال الأبتدائية.. وفي حصة الطبيعة (العلوم) وبمعية الأستاذ/ ماهر نذهب إلى الصبابي ..حيث كانت هناك غابة تبدأ من بعد بيان الشيخ موسى وتتمدد إلى ضفاف النيل.. وكانت تعج بالفراشات من كل لون.. وبعض الزواحف الجميلة بالإضافة إلى الكودوندارات" "كودوندار" الطلح و "كودوندار" الحنة...
نعود وشباك الحشرات معبأة بكل أنواع الفراشات .. .. الآن وفي غفلة من الزمان هجم الزحف العمراني.. وأتي على كل أخضر ويابس في الغابة.. فهاجرت الفراشات.. وطارت القماري.. وتشققت الأرض.. وعاث الأسمنت فسادا.. ..
صدقوني كان المنظر يبز أي منظر في الريف الإنجليزي... فمتى يكون الإنسان في بلدي صديقا للبيئة..
----------------- بحري طرااااااااااوة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
السلام عليكم والله انا بقيت قايم سداري وما لاحق البوست ده ياخي بحري دي بسحروها بعد كده لكن عندي اضافة بسيطة مع إني ما بتاع كورة لكن هل ذكرتوا قرن شطة لاعب الكورة المشهور والآن اعتقد انو في مصر ضمن طاقم الأهلي المصري معليش ما بعرف اتكلم في الكورة عذرا شيخنا صلاح شكوكو وسيد الحوش الأستاذ كمال كرار وجميع افخوة المتداخلين ودمتم سالمين
تخريمة: هيثم لبيب مشتاقين شديد
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: الآن وفي غفلة من الزمان هجم الزحف العمراني |
يا كمال يا حبيبي ما هجم الزحف العمراني ولا هجم النمر .....هجم العمر اذا كان انت بتتكلم عن المنطقه الفيها بيت الكابلي الحالي كانت غابه نحن لسه كنا بنقرأ في ست ليلي .
وبالمناسبه ما ننسي نوثق لمربيات الروضه ناس ست ليلي التي درسنا فيها الروضه( طبعا حسن طه حيتخلع من قصة الروضه دي ) ويفتكرنا قرينا في خلوة الشيخ صالح. وست عائشه وماما امال مقدمة برنامج الاطفال وجارتنا شقيقة عبده مصطفي لاعب الهلال المشهور وعصام مصطفي ايضا لاعب الهلال.
وايضا ما ننسي نوثق للخضرجيه الكبار ناس عمنا بر واولاده وناس جزيره واهلنا بالصبابي .كذلك كبار الجزارين ناس محمد عبد العال والبرديسي وعبد الجليل وهكذا...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
طارق ست ليللي أم كضم..
هكذا كنا نسميها ونأتي المدرسة مرعوبين نفتكر إنها عارفة إننا بنقول كده في البيت.. تعرف يا طارق أنا كنت شيطان جدا وأمي وأبوي الله يرحمهم ما كانوا بيخلوني أأجز لأني كنت Hyper Active لما تقفل ست ليلللي بيودوني لواحدة في حلة خوجلي أسمها بت فؤاد وعرفت فيما بعد أنها خالة أخونا الدكتور/ أحمد حامد الياس، وبرضو لما دخلت المدرسة في الإجازة على طول للأستاذ/ فخر الدين عم ناس عثمان نكير...وبالمناسبة دي نكير ذاتو من بحري... طبعا عثمان نكير... هو المقصود ومن المزاد جنوب... المهم يا طارق أنا وأنت قربنا نحضر الكمبيوتر تقول لي حسن طه.. يا أخ ناس حسن طه ديل كتبوا في لوح الأردواز وتعلموا كتابة الحروف في الرملة... ده زمن غابر.. لكن الحمد لله صاروا مشتشارين يشار لهم بالبنان.. وكمان بحراويين..
-------------- بحري طراوة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
تااااااانى ياطارق مرتاحين دى .......
عارف زمان ماكان مرتاح .....الا الموظف .....البيدوه راتب ...وكان راتبه بيكفيه ايجار واكل وشرب وقراءة جرايد ودخول سينما ...وبعد ده ترفيه وسفر داخل او خارج السودان...
الوالدة قالت ليك ياطارق ...وهى جنبى الان ...
زمان كانت ماهيتا من الجامعه 80 جنيه سنة 73 تقريبا...قالت ليك بتملا ضهرية العربية بحاجات الشهر كلها السكر واللبن والصابون البودرة المستورد وكان جواته هدايا ... والحلاوة والبسكويت المستورد وتغشى تشترى الخدار واللحمة .. وتغشى امها تشيل منها كم جوز حمام من بيت الحمام .... وبعد ده بتمشى تتبضع من السوق الافرنجى اللى كان زى الفل ... وبتمشى تشترى من جنبرت بتاع العدة مفاتيح الصلص وقشارة الشنو مابعرفوداك .... وقالت ليك كمان فيها غشوة لشراية توب بشبشبه لامؤاخذة وكمان خاتم دهب بفاروزة .... لا وفى ترفيه كمان تجميع مبلغ معين شهريا للسفر به نهاية السنة للخارج.. .واكدت على ان اغلب الموظفين كانوا مرتاحين ...وقالت ليك ماواجعها شىء الا عدم وجود السينما الان ...وكان اللوج بى 80 قرش اربعه كراسى .... والسندوتشات جوة السينما حدث ولاحرج مرتدلا وجبنة مضفرة وجبنة رومى وبسطرمة ....وقالت ليك ولى ... انه نحن ماعشنا زيهم ...هم عاشوا حياة تانية ومرفهة ...
وياطارق انا طبعا جيل نميرى والصفوف ....والسكر بالاوقية ...وصف الغاز ...وصف العيش ... وصف البنزين ....وزمن الماهية مابتوصلك البيت خليها تكفيك لاخر الشهر .... وبتذكر كمان ياطارق...البيت زمان كله يمرق للصفوف ... كل واحد مننا انا واخوانى بيكون ليه فى صف.... والبجى داخل بالعيش ده كان احسن واحد بيستقبلوه استقبال الفاتحين او استقبال الزول الجاى من الحج....... ...فكنت شيطانة بمسك صف العيش طوالى .... منها اقرض وانا راجعه عيشة حارة ... ومنها الاقى الترحيب الحار ده من الوالدة.....زى عيشى الشايلاه ده ...
تانى بتقولى لى مرتاحين دى ياطارق؟
عالم مرتاحة كيف ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: أكيد الوالدة بالمواصفات دي كانت من مرتادي Sweet Rosana وبابا كوستا.. ده زمن كان السودان قبلة الدول الحوالينا.... وكان العدني فيه أجدع حاجات ولا شارع قابل... بس اللعنة جاءت وأنا طلعت قلت بس أسوي البيت.. وأعرس وأرجع ... وحاتك العيال بقوا وش عرس... ونحن لسع هنا.. حضرنا من الريال كان بثلاثين قرش ونصحى كل يوم وهو متدهور لغاية ما حصل الريال 750 جنيه وما عارفين نرجع متين.. قولي للحاجة أنتو ربنا يديكم العافية كنتوا في زمن جميل هسع لو اللستك طرشق 8000 ما بتعمل رقعة... والحمام خلاص كلو طار وحتى القمري بقى ما بيجي.. وما عارفين يا حاجة البصارة كيف؟؟؟ غايتو بس دعواتكم |
ويديك الف عافية ياكمال .....
الوالدة بقت ترفع راسها تسألنى كمال مارد ...وطارق قال شنو ...وليه ود قناوى ماجاء وعبدالرازق ....طبعا ...اتعلمت اللابتوب وبقت خاتاه فى كرعينها زى الجاهل وشغالة فينا ...ناهد رجعلى كلام كمال ...جيبى لى كلام طارق القبيل ...بالله هو صحى ماقال ناس فلان.. بيقربوا لناس علان ...... الحجة بقت خطريه ...قالت حترسل تجيب معاشها من ناس المعاشات فى السودان ونتمه ليها نشترى ليها لابتوب.....براها (الحاجة خبرة فى الطباعة طبعا) يديكم الف عافية ياشباب ......
وديل ناااااااسك يابحرى خترييييين ....وتحيا الامة العربية ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
ياناس بحري سلام عليكم كلكم العالم المرتاحة والما مرتاحة
قبل يومين اتصل بي احد الاصدقاء وهو مخرج تلفزيوني وهو بيعمل في شغل عن بحري . يطلب الاتي : قال عاوز ليهو حاجة يفتتح بيها الشغل بتاعو اول ما تظهر في الكادر الناس كلها تعرف دي بحري قبل الكتابة .... والله ياشباب راسي بدا يودي ويجيب كبري بحري لا ماهو كبري ام درمان زيو ياربي سجن كوبر ياخ ما لذيذة هل نحن في بحري ما عندنا معلم بارز ؟ شنو ...شنو ...ياشباب مقترحاتكم
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبدالوهاب علي الحاج)
|
شوف يعني المعلم الوحيد هسع هو فندق قصر الصداقة.. ولا شنو يا جماعة؟؟؟... برضو ممكن سيقا أو ويتا!!
زمان كان كوشة الجبل.. أو مصنع البيرة (حمانا الله) ...أو دكان شريف بتاع النوفوتيه...
طبعا يا جماعة دكان شريف في سوق بحري كانوا الناس بيهاجروا ليهو من كل أنحاء العاصمة لأنو كان بيبيع أحلى نوفوتيه من شرايط شعر للبنات قبل ظهور الباندا.. والبكلات والحاجات المحكنشة دي.. شريطين واحد بهنا والثاني بهناك ومسيرتين ومع السلامة.. ودكان شريف كان مشهور بإنو بيجيب أحلى نوفوتيه... ده غير الزارير والسكسك وكل لوازم البنات.. والخياطة.. من خيوط ملونة وقطبات.. وهلمجرا..
كدي يا ناهد أسألي الحاجة من دكان شريف أكيد بتعرفه.. والحاجات زمان كلها من أوربا وإنجلترا بالذات نبيع القطن يرجعوا لينا حاجات جميلة..وأنيقة..ساتان وكريبشين.. وساكوبيس.. وبوبلين.. مش هسع بدل محلات شريف زنك سعد قشرة وكلها حاجات من فيتنام.. وسايجون...
-------------------- بس بحري طراوة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخت / ناهد بشير
سلام ..
عبد المنعم شونة من ألطف شباب الصافية وهو دفعتنا في بحري الحكومية ولكن لم ندرس في فصل واحد ولديه العديد من الصداقات مع أبناء المزاد بحكم العلاقة الخاصة التي تربط المزاد والصافية ، وبدر الدين شونة قريبه كانت عائلته تسكن المزاد جنوب
الأخ ناجي بشير الطيب هل هو دفعة عبد المنعم شونة ، أنا أذكر زميلنا وصديقنا ناجي الطيب درس معانا الإبتدائي في الحرية ودرس معانا أيضاً في بحري الحكومية وهو قريب ناس بدر الدين شونة كانوا يسكنوا الصبابي قبل كم سنة ، لو طلع هو فهو زميل وصديق عزيز ولو طلع إسم على إسم برضو تحياتنا له
أما طارق ميرغني ممكن يكون دفعة شونة الجد
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: عبد الرازق سعيد)
|
Quote: عبد المنعم شونة من ألطف شباب الصافية وهو دفعتنا في بحري الحكومية ولكن لم ندرس في فصل واحد ولديه العديد من الصداقات مع أبناء المزاد بحكم العلاقة الخاصة التي تربط المزاد والصافية ، وبدر الدين شونة قريبه كانت عائلته تسكن المزاد جنوب
|
الاخ عبدالرازق..
ياسلااااام على عبدالمنعم شونة ....طبعا بيتهم امام بيتنا طوالى .....وهى عائلة من بربر اصلا ...وعائلة كريمة جدا ومن احسن من جاورنا .....لهم كل التقدير والود
Quote: الأخ ناجي بشير الطيب هل هو دفعة عبد المنعم شونة ، أنا أذكر زميلنا وصديقنا ناجي الطيب درس معانا الإبتدائي في الحرية ودرس معانا أيضاً في بحري الحكومية وهو قريب ناس بدر الدين شونة كانوا يسكنوا الصبابي قبل كم سنة ، لو طلع هو فهو زميل وصديق عزيز ولو طلع إسم على إسم برضو تحياتنا له
|
لا اعتقد انه المقصود ....ناجى درس الابتدائى فى المذاد الابتدائية ....والثانوى بحرى الثانوية وهو اصغر من عبدالمنعم شونة ....ودرس بقبرص هندسة والان يعمل بشركة اجنبية للبترول بالدمام
اما بدر الدين وابن ادريس ...فااخواته صديقاتى ...وهم ساكنين فى المذاد...
ولك كل التقدير
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: أكيد الوالدة بالمواصفات دي كانت من مرتادي Sweet Rosana وبابا كوستا.. ده زمن كان السودان قبلة الدول الحوالينا.... وكان العدني فيه أجدع حاجات ولا شارع قابل... بس اللعنة جاءت وأنا طلعت قلت بس أسوي البيت.. وأعرس وأرجع ... وحاتك العيال بقوا وش عرس... ونحن لسع هنا.. حضرنا من الريال كان بثلاثين قرش ونصحى كل يوم وهو متدهور لغاية ما حصل الريال 750 جنيه وما عارفين نرجع متين.. قولي للحاجة أنتو ربنا يديكم العافية كنتوا في زمن جميل هسع لو اللستك طرشق 8000 ما بتعمل رقعة... والحمام خلاص كلو طار وحتى القمري بقى ما بيجي.. وما عارفين يا حاجة البصارة كيف؟؟؟ غايتو بس دعواتكم |
اخ كمال .....
قالت ليك كل كل الاسر زمان بتروح عن نفسها بالذهاب الى محل سندوتشات ذكى ...فى شارع البرلمان وبمبو فى شارع البرلمان ...والاندلس بحرى والخرطوم ....والاتينيه ...وبابا كوستا .. وبتاع السمك البربرى ....والعدنى بتاع بحرى ....ودكان شريف...كان مباااالغه ... تلقى القماش والهدوم الجاهزة وتحتهم الجبنة والزيتون...والمواد التموينيه ....وكان الدكان ليه ريحة خاصة ومميزة واولاده اسمهم مهدى ...واحسن واحد عنده بيزيانوس باااااارد اسمه(ثابت عجايبى ) قبطى ...ودكانه جنب الانجيلية ...والسر بتاع القماش وكان بيدى بالدين لكل الاسر البحراوية ...بدون شيكات ...وكان الناس ملتزمة بالدفع ....وميلاد الترزى... قبطى... بتاع بناطلين وبيخيطوا اخوانها وزوجها بشير الطيب عنده ...وقالت ليك مخبز بدران ...عيشه كان شمسى ومملح...والاجزخانة الوطنيه بتاعة (بابكر عباس ) وهى اقدم اجزخانة فى بحرى ...وحلوانى بحرى بتاع ناس البصيرى...وكافتيريا سبا جنب دوار البوستة ....وقال ليك اهل هشام رضا.. ناس معوض كان عندهم لوج مخصوص لاسرته بوصفه مدير للسينما ...
وبنجيك راجعين ......
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
الاخ كمال كرار تحياتي وشكراً على هذا البوست الرائع روعة بحري وأهل بحري الحلوين انا من المزاد شمال شارع 10 قرب نهاية المواصلات درست فى المزاد الأبتدائية والاميرية 2 لكن الثانوي والجامعة فى الخرطوم ولعبت فى رابطة المزاد فى فريق البرازيل مع نجوم الهلال هشام الطيب وفائز نصر الدين ، أحب بحري حباً لا يقابله حب اخر .ورغم بعدي من السودان فبحري فى قلوبنا شوارعها ناسها أحيائها هدوئها فبحريي مثل القرية الكبيرة يتعارف اهلها فردأ فرداً تقريباً. اعرف سوق بحري دكان دكان بحكم عمل الوالد تاجراً فى السوق بداءاً من معروضات عزيز وجبريل للعماري ومطعم الأخلاص ومطعم الخيام ومغلق كمال على أحمد ومغلق البلولة وابوالهول الحلاق ومحلات كبيرة اندثرت الان . بحرى رائعة رائعة وفى اجازاتي للسودان اذا حدث ان قضيت الليل خارج بحري احس بأنني لم انم مرتاحاً وبمجرد ما طلع الصباح اسرع لبحري وما أن أشاهد النقل الميكانيكي حتى تعود لى روحي لى ملاحظة هامة أنني صادفت أحداث الأثنين ألاسودبعد موت جون قرنق فى السودان وقد كانت مدينة بحلرى اكثر مدن العاصمة أماناً حيث لم تحدث اى أحداث تذكر فى وسط بحري وكل الذى حدث كان فى أطرافها النائية ونحن فى المزاد وكل احياء بحري الوسطية لم تشاهد احداث مثل باقى المدن الاخري وتصدقوا بان حتى احداث دارفور الأخيرة قد سمع بها سكان بحري من اهلهم خارج السودان وانا شخصياً أتصلت بالاهل فى المزاد اثناء ووجدتهم لم يسمعوا بها حتى . ياخي بحري امان وسلام بحري الفن والكورة بحري رائعة روعة اهلها
الأخ أبن المزاد عبد الزازق سعيد تحياتي لك وللأخ عبداللة سعيد أينما كان
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: معاوية محمد الحسن)
|
تعرف ياأستاذ معاوية أنا بشبه من زمان بس قلت النشوف أخرك وفي بوست أخونا هشام الطيب ( حارس البرازيل سابقاً في الرابطة ) كنت عاوز اناوشك ... بس قلت نبطل الخفة .. تتلمذنا وتدربنا على يدك انت وكمال نوبة .. ولحقنا أخركم أنتوا وفايز نصر الدين وحميد راس ويانكو .. أنا من دفعة حمو وماجد راس ومعتصم كباشي .. هيثم سعد الدين لبيب من أولاد المزاد جنوب قبل إشلاق السواري ..... كانت أيام وبحري طراوة ... والله البوست خلانا نقابل ناس لينا منهم عشرين أو خمسة وعشرين سنة ... تحياتي يا أستاذنا ..
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
هيثم سعد الدين كيفك ياخي واللة الحي بلاقي كيف انساك وانسي تلك الأيام التى كنت تلعب فبها للبرازيل مع دفعتكم الرائعة من المزاد جنوب بقيادة الكابتن المهذب معتصم كباشى وحمو وبقية العقد . البرازيل زمان رغم انها فريق رابطة الاانها تساوي فريق درجة اولي حالياً من حيث الأمكانيات والمواهب ويكفى انه الفريق الذي تخرج منه لأعبين للهلال مباشرة دون المرور على أى فريق اخر وهم هشام الطيب وفائز نصر الدين وتخرج منه ايضاً المعلم مهدي كرار ويانكو وحميد راس وكثيرين غيرهم وذلك بفضل الرعاية والأهتمام الذي كان يوليه للفريق الربان الكوتش القدير عوض اللة مصطفي ،وأكثر ماكان يميز هذا الفريق الترابط الأجتماعي والصداقة بين أعضاء الفريق والتى لاتزال ممدة حتى الان ولازم فى كل زيارة للسودان أزور يانكووأقضي معه لحظات جميلة . صدقني ياهيثم المالعب فى البرازيل مالعب كورة البرازيل تحتاج لبوست خاص
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخ الفاضل / معاوية محمد الحسن
تحية الود والإحترام
أسعدني ظهورك الأنيق في هذا المنتدى ونحن محظوظين جداً بإنضمام أخ عزيز لنا وأتوقع منك إثراء المنتدى بكل ما هو جميل
ويا أخ معاوية طالما ما ذكرت أنك بتعرف سوق بحري دكان دكان أرجو منك التوثيق لهذا السوق العريق وأكتب لينا كل ما تذكّره عن هذا السوق العريق ويا حبذا كمان لو كتبت لنا عن سوق المزاد لأنه كان في يوم الأيام من أفضل الأسواق الفرعية في بحري بعد السوق الكبير ، كان آخر حيوية مطاعم ومقاهي ومحلات موبيليا ومكتبات وقصص وحكاوي
أذكر كان هناك مطعم يفتح على نادي المزاد يقدم قراريص تأكل أصابعك وراها وكذلك مطعم خليل في الركن الجنوبي الشرقي للسوق ويفتح جنوباً ناحية جمعية سمت
قهوة علي جدادة متذكرها طشاش سمعت عنها من الأخوان كمال كرار وأبو عبيدة أتوقع أن يكون في مكانها الآن تم إفتتاح ماكدونالدز المزاد
الحجر الصحي (الكرنتينة) والتي تم توزيعها لاحقا إلى قطع سكنية سميت فيما بعد بالمغتربين أتذكر جيداً في ذلك الوقت حارس الكرنتينة العم حجير ذلك الفارس المغوار الذي كان يتعقب بالحصان كل من كان يتجرأ من أولاد المزاد بقطع ولو قسط بسيط من التبربونة (أشجار المسكيت) المحيطة بالمكان وكان كل من يشهد ذلك المنظر يعتقد بأن شيئاً غالياً تمت سرقته لأن الرجل كان في منتهي الجدية وهو يطارد الأولاد وبما يشبه أفلام الكابوي ربما كانت هذه تعليمات الإدارة ، أعتقد لو كان المسروق عنب أو تفاح ربما تم تعقبهم بسودانير
بالنسبة لكرة القدم ورابطة المزاد على وجه الخصوص كانت من أفضل وأنشط روابط الناشئين على مستوى العاصمة ومع إحترامي لفريق البرازيل في إعتقادي أن فريق النجمة هو الماضي والحاضر والمستقبل
تقبل فائق تحياتي
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
يا كمال يا اخوى ذاكرتنا بقت .. حلاوة قطن .. لكن بحرى .. و ناس بحرى .. حكاية ما بتنتهى و هاك الخواطر دى .. دكان شريف و لا العدنى !! سينما حلفايا و ليمون عمك الزين .. و مكتبة عبد الباسط .. مكتبة الثقافة العزبة الابتدائية و من المدرسين الفنان محمد ميرغنى و المسرحى يس عبد القادر .. حلة حمد و كشك ود عوضون .. كافتيريا سمر و اولاد العيلفون .. البلدية .. كافتيريا النيل الازرق و كافتيريا اركويت د. التجانى الماحى د. احمد محمد على د. حسن هارون و بالمناسبة استاذ فخرى امد الله فى ايامه و متعه بالصحة رأيته فى اجازتى الاخيرة و هو استاذى انا ايضا .. من بيوت بحرى (قناوى - عفيفى - السيوفى - العتبانية- سمارة نديم) اخر اليهود يقيمون الان فى بحرى ( اسرة شاؤول) حديقة عبود
و انشالله بجيك راجع لو الدينايصور طارق ادانا فرصة و كمان تحياتنا و اشواقنا لهشام رضا
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: اسعد الريفى)
|
أسعد الريفي يا بركة...
أولا حمدا لله على السلامة... وأجر وعافية.. يا أخي إذا أنت النحيف جاك ديسك.. نحن أصحاب الوزن فوق المتوسط يجينا "حجر طاحونة مقار".. مساهماتك دائما كبسولات شافية.. ذكرتني كتابة المرحوم الأستاذ/ الريفى في مرآيا...
الديناصور طارق أول ما جابوا سيرة الحلبة أختفى... قايل نفسو حلبي.. مرات يعمل لينا فيها من الحلاوين ومرات من أصل مغاربي.. وربك يستر...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: حسن طه محمد)
|
Quote: [ خوانا ما تانسز جنينة عبود وذكرياتكم فيه] |
حسن طه جنينة عبود والذكريات دي شغل ندامى (جميع نديم)..
أذكر يا حسن طه أول ما دخل البث التلفزيوني كان هناك تلفزيون في الهواء الطلق وضع ليشاهده الناس وهم جلوس على النجيلة أو وقوف... والنافورة شغالة.. ورشاشات الماء تقذف بالرذاذ المضمخ برائحة الطلع والنّوار.. وصفق الشجر أخضر خضرة قلوب أهل بحري الجميلة...
----------------- بحري طراوة يا أبوعلي
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
وصلتني قبل قليل مساهمة من الأخ الفاضل/ سيف الدين نجار.. وهو بحراوي اصيل.. وإلى المشاركةQuote: الأخ الفاضل كمال كرار
شكرا علي هذا البوست الذي يوثق لهذه المدينة الرائعة، والله الواحد عندما يتجول في هذا البوست يشعر كأنه يتجول في تلك الشوارع الأليفة والمحببة للنفس وفي حواري وأحياء بحري الأنيقة.
علي ذكر المعلمين بمدينة بحري أري إن بعض المتداخلين الأفاضل قد أسقطوا سهوا معلمين أمثال المرحوم الأستاذ عباس علي – مدرسة بحري الثانونية ( اللغة الأنجليزية)
وشقيقته المرحومة جليلة علاءالدين والدة المرحوم المهندس علاءالدين الواثق وهي ترقت في سلك التعليم إلي أن وصلت كبيرة الموجهين بالوزارة
وكذلك الأستاذ الشاعر المرحوم عوض حسن أحمد – الصبابي
بمناسبة العزبة التي سميت بها مدارس العزبة هي علي حد علمي ليست عزبة كافوري وانما عزبة حلفايا أو عزبة معوض ( يمكن الأخت ناهد تصحيح المعلومة)
وسوف أعود لاحقا
مع اكيد حبي وتقديري للجميع هنا
سيف الدين نجار ( الشلالية) حي الدناقلة شمال وحلة حمد
مقيم بأبوظبي – دولة الإمارات العربية المتحدة
|
:
نأمل من الأخ/ الكريم رفد هذا البوست بمساهماته حتى ولو من الشباك.. وسننشرها له تباعا...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
اعزائي الواحد بقي لازم يجيب ورقه وقلم عشان يرد للناس ويخت الاسم : كمال كرار اتنين ناهد تلاته ابو رزقه اربعه حسن طه وهكذا تدخل صلاة الضهر.
Quote: وما عارفين يا حاجة البصارة كيف؟؟؟ |
البصاره دي يا كمال لو سمحت لي الحاجه، هي ملاح الخدره( الملوخيه للصغار) بالفاصوليا يتم فركها لتقدم تحت تبن الكسره وبالهنا والشفا. بعدين قصة الحلبي دي سمعناها من صغار لكن انت شفت كمية الزرق او الخدر الفي البيت !!!مره مغربي ومره ليبي كما كان يحلو لصديقي المرحوم ابراهيم ابو ديه ان يقول.
بعدين دكان شريف ما تنسي كان من الدكاكين القليله في بحري الكنا بنجيب منها المارتديللا " حلب جد جد"
بعدين يا اخوانا عايزين ناس يعرجوا لينا علي ستات الفسيخ خاصة ناس حلة حمد يا.... هشام رضا" ما تعمل لينا فيها ما حلبي"
يا اخوانا قضية يحيي عامر دي لسه ما حليتوها لينا؟؟؟؟
اخي ابو رزقه عجبني ليك طلعت ما دفعة شونه الحبر لانو طلع بالضبط دفعتنا واصغر منك .... تحياتي يا ابو بشير. وبخصوص مطعم خليل طبعا ما شاء الله عمك خليل الآن يمتلك اشهر مطعم بالرياض يقدم الوجبات السودانيه من ضلع وحتي الفته..
اخي معاويه الف مرحب بيك ولكن بدون عنصريه كتير من المصايب جايانا من امدرمان ... الكلام ده بيني وبينكم ما يجيب لي الهوا....
اخي حسن طه يعني فطيت الحتات دي كلها ونطيت في جنينة عبود... اها الأريحك كانت من اجمل واول مناطق ترفيهيه اقامها عبود هي ورصيفاتها حديقة القرشي بالخرطوم وحديقة المورده بامدرمان وقدر ما سميت حديقة الشهداء لم يمشي الاسم وظلت حديقة عبود وكانت مرتع صبانا في (الجاهلية الثانية) لانو الاولي بتاعة ناس حسن طه،، وكان في بعض الاحيان يجي السواري ونحن جالسين .... حليل السواري.
وبالمناسبه دي احكي ليكم قصه حلوه:
كان اصدقائي جالسين في الحديقة ويتعشوا بعد انتهاء الونسه جاء السواري قرب الطاوله يطلب منهم المغادرة لان الصباح قرب فما كان من الحصان الا وقام بحركة فرفرة الخشم ديك وهوزز راسه( زي العطسه) في اكل الجماعه فما كان من احد الاصدقاء الا وقام وادي الحصان بونيه !!!رب الحصان وقع .. فتم اقتياد الفتي الي مركز الشرطه وفتح له بلاغ التعدي علي موظف اثناء تأدية واجبه .!!!!!افتينا يا حسن طه البلاغ ده صحيح؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
طارق.. أوع يكون الأدى الحصان بونية ده الفي بالي وبالك,,, دي مبااااااااااالغة..
يا أخي حسن طه ده ما مستشار حصين وحمير... ده مستشار بشري.. لووووووووووول.. وكمان بتاع شركات.. يعمل ليك MOU في 10 دقائق ويحاسبك على 10 ساعات والساعة ب 500 دولار أنت قايل حسن طه هين.. تعرف ده بيعمل 4 MOU في الشهر و3 LOI وبيرقد 3 شهور بدون ما يجر قلم.. زي الأصلة لما تبلع ليها غزال وتقعد شهر ما تأكل.. تقولي لي حصان...
بالمناسبة دي تتذكر لما الحصان باس "عمر رجب" جنب بحري الثانوية وملأ خشمو سعابيل وريالة.. أها طيب هنا الحصان المتعدي .. يشتكوه لمنو؟؟؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
آخر تشكيلة لعبت فيها للنجم الأحمر
فى حراسة المرمى ...أحمد حسين () إحتياطى وليد عزالدين
فى الدفاع : محمد عامر ، هندى حسين ، عاطف مصطفى ، محمد عبدالرحمن إحتياطى الطاهر مامون الطاهر
فى الوسط : عادل إدريس (ديب سنتر ) عباس مصطفى (هاف ماش) إحتياطى : سامى الروخ ، مجدى يس
فى الهجوم : محمد إدريس النونو جناح يمين ، إيهاب قاسم جناح شمال
زروق سيدأحمد رأس حربة صلاح أبودية إنصايد ساقط (يمين) إحتياطى : إبراهيم
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
طارق ميرغنى
يعنى الواحد مش عمل ورق.. الانت قلته ....جبنا كراس وسجلنا ليك فيه صفحة للرد وصفحة لكمال وعبدجالرازق وقناوى ولبيب وعبدالوهاب وكل الاخوان ......... ياحليلكم والله ....
الرسالة الاتيه من هشام رضا .... ____________________________________
فى اتنين يحى عامر ....الاول ود عمنا مهندس فى السعودية وهو محسى وساكن فى الاملاك جنب المستشفى ...
والتانى يحى عامر ...خاله عثمان كرار مدير مدرسة حلة حمد الابتدائيه ...ولعب بالنادى الاهلى السعودى والمنتخب السعودى ومنح الجنسيه السعوديه ...وهو الان مدرب بالنادى الاهلى السعودى ...(جدة) ...وكان بيلعب معانا ...فى ميدان السيد على جوار المجلس البلدى .....ومعانا يوسف عبد الفتاح وعمر خوجلى وعلى ابو جريشة وكمال حسن وعبدالمنعم مالك والنور الصادق وصلاح عمر ومجدى عمر ...والفريق اسمه (بروزرس) ... (الاخوان)
هشام رضا....
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: شادية الطيب)
|
بسم الله الرحمن الرحيم
يا ناس بحري نفسنا انقطع معاكم ماشاء الله الواحد بقراء سطر ويفط سطر
اسامة سعد النور الشعبية شمال وقبلها الدناقلة جنوب جرانا ناس المرحوم الازم مرسال واولاد حبيب أحمد وعادل ومعاوية وقبلها قالو كنا ساكنين البدوان
من الإعلامين عوض بابكر حقيبة الفن وبرنامج آخر المرحوم محجوب عبد الحفيظ الصلاة الطيبة سمير إبراهيم كان جيرانا في الدناقلة
الفنان عبد الرحمن بلاص من الشعبية
وكتب الأخ بدر الدين اسحاق احمد
Quote:
الاعزاء اولاد بحرى
معاكم والله ... مولود فى الشعبية ... سكنا من قبل فى الاحياء التالية : الوابورات ديم سلك ...ده حى ما بعرفو الا زول فوق السبعين خريف . ديوم بحرى ... الشعبية جنوب...
|
ديم السلك في الخرطوم شرق لفة القوز وغرب غريقانا او ابوحمامة شمال المدبغة الحكومية وشارع الشجرة من سكانه المرحوم الفنان رمضان حسن والمرحوم رمضان زايد الذي غني لبحري الأغنية التي تبدو وكأنها شعار بحري
ولكم الشكر والثناء
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: اسامة سعد)
|
ايه رايكم نحكي عن صعاليك بحري: الكضبي اسم الشهرة الكضبي كان من اشهر صعاليك بحري الاسم مصطفى اسم الوالد غير معروف وكذلك العائلية او الاصل. اشتهر بانه كان يهاجم تلاميذ المدراس يخيفهم ويرعبهم ويسلب ما لديهم من اموال. كان معظم تواجدة بسوق بحري الكبير او عند المدراس . كان غالبا ما يظهر معه شلة تتغير من وقت لاخر وكلهم اقل من هيبة بل وشكلا ومستوى هو من دونهم جميعا يبدو من عائلة شكله ملابسة واسلوبة في التعامل مع ضحاياه. رغم انه يبدو غير متعلم الا انه كان الابرز حضورا بين شلته وكان القائد بلا منازع. كثير من القصص كانت تروى عن اصله البعض يقول انه ابن لضابط بوليس كبير هرب من عائلته واحترف النهب. وبالطبع كان هناك قول انه غير معروف الاب. كبرت القصة واصبح مجرما محترفا. الغريب في قصته انا كان متواجدا بكثرة في بحري وكان اتباعة يتغيرون دائما. لا احد يدري اين يذهبون. البعض يتحدث عن انهم يقبض عليهم ويدخلون السجون والبعض يتحدث عن انهم ينفضوا من حوله لقسوته في التعامل معهم او لاستحوازه على الاموال والغنائم التي تسلب. ويظل هو يظهر من وقت لاخر يثير الرعب ويسرق ويضرب ويهرب. فجاء اختفت هذه الشخصية المثيرة للجدل وكما كانت حيانه كلها لعز كذلك اختفاءه كان لغزا أكثر غموضا. يقول البعض انه ترك الصعلكة واصبح رجل معتدلا . ويقول البعض انه في السجن وكذلك هناك قول ان عائلته استطاعت اخيرا ان تسيطر علية وتعيده للبيت ثم الدراسة والجامعة والعمل. واغرب الاقوال انه سلوكه تغير وصبح مسالما اغترب ايام موجة الاغتراب.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الاخ سيف الدين نجار يا هلا بالطله : الشاعر عوض حسن احمد رجل لا يمكن تجاوزه فهو شخصية فريده ووطني غيور كان ناظرنا في مدرسة الاميريه (1) وكان شاعرا مجيدا غني له ابو داؤود : " اوتذكرين صغيرتي أوربما لا تذكرين... الخمسة الاعوام قد مرت وما زال الحنين" وغني له ايضا فينوس الوجود:
تعالي ههنا..." هنا قيثار وغني"
وهو عم الفنان جمال مصطفي حسن احمد" فرفور"
الاخ اسامه سعد : احمد وعادل حبيب في المنطقة الشرقيه بالجبيل وهم اصدقاء اخي عامر ميرغني...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
[B]من ظرفاء بحري:
كمال اب حلق:
ملاكم دولي سابق مع ناس كمال السر بالمزاد:
المشهد" مباراه دوليه في اوغندا"
ممثل السودان: كمال اب حلق
بعد ان انقض الملاكم اليوغندي الجسور علي كمال اب حلق بضربه قويه اطاحته ارضا : صاح احد السودانيين من بين الجمهور: " يا كمال ...يا كمال .. ارفع راس السودان" لتشجيعه.
فاجاب كمال: " هو انا قادر ارفع راسي لمن ارفع راس السودان..."
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Haitham Labib)
|
الاخ طارق
البلاغ ما صحيح لسبب بسيط انو البيدي حصان بنية ويوقعو دا يستاهل تمثال مش بلاغ
وجنينة عبود لنا ذكريا معها لا ولن تنسي
كان استاذنا الكبير عبد الحميد رستم - يرحمه الله - يطلب منا في حصة الفنون الذهاب لجنينة عبود لرسم الورود والزهور.
وحصة الفنون كما تعلم كانت حصتين مع بعض .
فتصور انك ساعة ونص خارج المدرسة .
واتركك للتخيل.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: حسن طه محمد)
|
مصطفي الكضمي
اذكر انه تحول الي كاتب
بنفس طريقة هندي عوض الكريم الذي كان ينقل الاغاني السودانية في كتيب
واعتقد ان الاثنين اقرباء بعض
مصطفي الكضمي بدأ ايضا في كتابة قصص الافلام التي كان يقوم بمشاهدتها في كتيب صغير قرات انا شخصيا بعضا منها.
وكنت اقول سبحان الله الذي جعل من الكضمي كاتبا لا تستبعد وجود ما يكتبه علي ارفف مكتبة الكونقرس الامريكي.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Haitham Labib)
|
يا ناس يا حلوين.... سلام ......
والله الواحد ما قادر يفوت البوست الملهلب بالمواضيع الثرة والشخصيات الرائعة
كل مره يطلع ليك زول ليك زمن ما لاقيته...
عبدالرازق سعيد...الواحد ما قادر ينسى حلة النجمة وجلستك وسط معاوية وماهر ومحمد عامروعوض وفتحي والزين وطلال وجلال وحبيب وصلاح عروبي شايل النبلة وماشي الكرنتينة يجيب قمري ويبدأ التحدي بينه وبين عادل خشوني ...
يا اخي انتو ما فيكم واحد عرف قهوة علي جدادة الا الأستاذة ناهد فهي فعلا قهوة العمال بجوار سوق العناقريب القديم خلف هافانا في وسط السوق القديم...
اما القهوة في سوق المزاد كانت للوالد وتسمى قهوة عمك علي وتم فيها حادث قتل جانوار من أبناء الجنوب وكانت في الناصية ثم انتقلت الى وسط السوق جنب زريبة الفحم وكانت مشهورة بتجمع السياسيين والرياضيين.وهنالك ايضا قهوة عمك الرضي في الجانب الآخر قرب ابودية بتاع التمباك....
بحري معالمها رائعة وتاريخها ملأ البصر وامتداد ذكرياتها لاينضب..
البلدية وميدان عقرب. سينما الوطنية وحلفايا والصافية وعمك جلال بوليس السينما وعمك المرحوم سعد محمد الحسن شاويش النجدة.. كمال ابحلق والكضمي والصياد الصغير والكبير و الواثق صباح الخير وحسن الكونج وميصرة وفيصل كنة وعبده عضل وصلاح بحبوحة وخشوني وبلحاتي وود اللباب والسر تنقالي وغزالة ومحمد خوجلي وعادل خوجلي.
هاشم ضيف الله والفاضل دراج ويحيى الطاهر المارشال واحمد عبدالمجيد وعم اللازم رحمة الله عليهم وما قدموه للرياضة.
كمال طه وتوتو كورة.. علي الريح وسيف الدين البشير وعالم الرياضة تلفزيونيا...
المرحوم بشير الطيب والد الأستاذة ناهد والتنقيب في مؤلفات الوجودية عبر مجلة الوجود...
بحري الحكومية وبحري الشعبية والجيلي الثانوية وعوض ساتي...
ميصرة ومدارسه...
اولاد السراج ومزارعهم... اولاد طلب والشيخ مصطفى الأمين والمليجي والشيخ عبد الباسط والطيب النص وكامل محمود وتجارتهم....
اليمانية ودكاكينهم وافرانهم.....
العيلفون والفن .....
وبحري طراوة............................................................
أبوعبيدة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Abuobeida Ali Abdullah)
|
Quote: اما القهوة في سوق المزاد كانت للوالد وتسمى قهوة عمك علي وتم فيها حادث قتل جانوار من أبناء الجنوب وكانت في الناصية ثم انتقلت الى وسط السوق جنب زريبة الفحم وكانت مشهورة بتجمع السياسيين والرياضيين.وهنالك ايضا قهوة عمك الرضي في الجانب الآخر قرب ابودية بتاع التمباك.... |
يا أبوعبيدة هلا بالطلة الرشيقة.. دحين أنت الجريمة دي مش كان متهم فيها "سالم العربي" رحمه الله
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
هى ياكمال ياخوى مالك علينا داير تدخلنا فى نسب ومانسب .... طيب نمسكها من الكبرى ...اقصد نمسكها حته حته ... نصر الدين عثمان كرار ود مدير مدرسة حلة حمد ....ببقى ليك شنو ؟ ده سؤال يحى عامر ود خالتهم لمايجى من جدة بينزل عندهم فى بيتهم فى حلة حمد مواجه المقابر هل ده بيت عمك عثمان ؟ ده سؤال تانى يحى عامر بقى سعودى وعلى كفالته اتنين من اولاد عثمان كرار والان فى جدة بتعرفهم؟ ده سؤال تالت ... ....
كمال ان بقى قريبكم فيها ورثة تقيلة خلاص ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
شكرا لك أستاذ كمال والأستاذة ناهد لك تحياتي وللوالدة وأسأل الله أن تكون قد شفيت من ألم الركب بعد هذه الجرعات العالية فولترين بحري كما اود ان أسأل عن الأستاذ عوض مختار (الشهير بعوض طمبوش) وهو كان إداري برابطة الديوم وكان يغني للجابري ورجل له من النكات الكثير ولا زالت بعض زلات لسانه تضحك الناس مثلا يحكوا إنه كان بيغني وغلط في الغنية قما قال: أوب سوري ... وكذلك جارنا في الديوم سيف الين آدم الشهير بسيف البوز وكذلك اللاعب الخطير عبد المنعم خميس الشهير ب زوزو وهذا ما أسعفتني به الإتصالات بالسودان ودمتم سالمين
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
هذه رسالة ثانية من الأخ/ سيف الدين نجار.. نرجو الإجابة على ما تضمنته من أسئلة عن بحري..Quote: B] شكرا جزيلا أخي كمال كرار
وللمزيد من التوثيق لمدينة بحري، أرجو أسال سؤال بسيط
أين يوجد شارع الكنيسة ببحري وما هي الكنيسة المسمي الشارع بإسمها وأين تقع؟
والأسواق ببحري قديمها وحديثها
سوق الأثنين
سوق الطبابي وأين كان مقر هذا السوق؟
كما أرجو تحديد الحدود الجغرافية لحي الديوم ببحري
ملاعب كرة القدم
البلدية
ميدان الليق القديم اين مكانه الأول قبل الملعب الحالي عقرب
هناك شارع ببحري يتوسط شارعي المعونة والبوستة يبدأ من أول الديوم من الناحية الشمالية وحتي حلة الميري يسمي الضبطية تري لماذا سمي كذلك؟
مع شكري والي المزيد من المشاركات
سيف الدين نجــار
|
في إنتظار المزيد يا أستاذ/ سيف الدين
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
مرحب بطلة الاخ ابوعبيده علي و.....
سوق العناقريب ده كان العرب بيقفلوا بدري ويقع هو خلف بار حسين فكانت تلك العناقريب مرتعا لسمار الليل.
الاخ ابراهيم قناوي: عمك جلال رحمة الله عليه كان فارس سينما حلفايا وكان يلبس الكاب بطريقة الكاوبويات وكان له الفضل في ضبط صفوف الشعب وردع المشاغبين والصعاليك وكان هناك عمك بتاع الفريسكا.... هل تعلمون ما هي الفريسكا؟؟؟؟؟؟
عبد المنعم زوزو موجود في ديوم بحري وكان لاعبا ممتازا لكرة القدم بنادي الربيع هو وصديقي المرحوم عبد الحليم عبد الخير...
بعدين يا قناوي منو طارق خوجلي الديناصور العايز ينافسنا ده؟؟؟؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: وكان هناك عمك بتاع الفريسكا.... هل تعلمون ما هي الفريسكا؟؟؟؟؟؟ |
طارق الفريسكا دي حاجة كده لاهي دونات ولا كورسان.. كان بيبيعها عمك.. بتاع العجلة الفيها سبت من قدام وينادي فررررررررريسكا....يلا يا.. وكان يقف أمام سينما حلفايا على مقربة من كشك عم الزين.. وناس عم الزين أصلا من مدني بس سكنوا المزاد غرب مسجد الشيخ أنسه.. وكان أبنهم محمد الزين قدامنا في بحري الأميرية وأعتقد إنو تخرج في كلية البيطرة جامعة الخرطوم وكان عندو فيسبا.. وحسب علمي يمتون للفنان أبو الأمين بصلة.. لأنو كثيرا ما جاء عندهم....
فررريسكا...
----------------- بحري طراوة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote: فرررررررررررررريسكا يا .... بوست يجوع |
سلام يا جماعة والله نحنا يا ناهد أولاد قرف (ودي عكس أولادالراحات) والفريسكا والكراو... شنو ده بنسمع بيها عند أصحابنا أولاد الراحات لكن نحنا من أسر كادحة والحمد لله إتربينا بالقراصة والويكة والملوحة وقراصة البلح وحشوة الفطور بالفول ولا سلطة الدكوة وبالعدم ملاح خدرة بايت وبرضو still نكون عايشين وبنحب بحري وناس بحري وحتى علاقاتنا بالأقباط كانت زي العسل وأذكر جيراننا نا ميخائييل أنيس برسوم وهو فني معمل في كنيسة بحري وبحري طرااااااااااااااوة ودمتم سالمين
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: هى ياكمال ياخوى مالك علينا داير تدخلنا فى نسب ومانسب .... طيب نمسكها من الكبرى ...اقصد نمسكها حته حته ... نصر الدين عثمان كرار ود مدير مدرسة حلة حمد ....ببقى ليك شنو ؟ ده سؤال يحى عامر ود خالتهم لمايجى من جدة بينزل عندهم فى بيتهم فى حلة حمد مواجه المقابر هل ده بيت عمك عثمان ؟ ده سؤال تانى يحى عامر بقى سعودى وعلى كفالته اتنين من اولاد عثمان كرار والان فى جدة بتعرفهم؟ ده سؤال تالت ... ....
|
يا ناهد زي ماقلت ليك .. نصر الدين ودعمي والبيت البيفتح في المقابر أصلا بيت جدي كرار، وأولاد عثمان كرار في جده غالبا مأمون وأمين.. وأخوهم عصام كان في المدينة ,,وصلاح ومحمد عثمان وعبدالعزيز الصغير في السودان.. وكذلك كوثر وأسماء وأخواتهن بنات عمي.. وعيييييييييييييك.. يعني برضو عندنا في الحلبة نصيب...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
[U]طاحونة مقار:
سألت عنها المولودين في النصف الثاني من القرن الماضي.. طارق ميرغني وطقته ولم يشف غليلي.. ومن تبينا قمنا ربينا شفنا في شوارع الضواحي حجري الرحى بتاعة الطاحونة ملقيين أمام الطاحونة..وقد أعتلى إطارهما الحديدي الصدأ ولم نعرف يقينا من هو مقار وإين هو الآن.. ناس النصف الأول من القرن الماضي يفتونا.. يا مولانا حسن طه فزعتك.. طاحونة مقار معلم من معالم بحري القديمة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخ/ كمال كرار
سلام ..
الإعلامي الرياضي المعروف ومقدم برنامج الرياضة خلال الأعوام الماضية من أبناء المزاد هو "سيف الدين علي" وإسمه موجود في القائمة
بالمناسبة ...
أين أختفى الأخ م. محمد شمس الدين ما هي آخر التطورات في عضوية نزار عتيق
ويا سامي عتباني .. العتبانية أحلى ناس وزادوا علي بحري حلاوة بأصلهم الطيب
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
اخي ابو رزقه الاخ كمال حسب علمي الآن بصدد وضع ميزانية خاصه للبوست واول بنودها عمل خوذه لسعادتي وشراء فريسكا للجمهور وعمل خط اتصالات للحاجه فوزيه للتواصل مع الخرطوم.
ويا ناهد لحدت دلوقتي ما جاوبتونا هل يحيي عامر بتاعنا ذاتو بتاع بحري الثانويه ومصنع التمور بالسعوديه واخو خالد عامر؟؟؟؟؟؟؟؟؟؟؟
اخي حسن عبد الله كافتيريا اريزونا باتذكرها لكن المكتبه ....لا
ابراهيم قناوي عمنا جلال ابنه محمد ويسكنون شمال ميدان عقرب رحمه الله كان شخصيه مشهوره في بحري. بعدين ياخي الفريسكا عمرها ما كانت بتاعة اولاد راحات لانها تباع في صف الشعب بسينما حلفايا.
كمال السر زايده حبال لا اظن اولاد الزمن ده بيعرفوها لكن طاحونة مقار الآن موقع مواصلات شمال المحطه الوسطي واظن ان صاحبها نفسه اسمه مقار. بعدين ايه كلمة.. غالبا.. امام اولاد عمك؟؟؟؟؟؟؟؟؟؟؟؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
دا كيد لانك ما كنت بتاع قراية. كنت بالتأكيد بتاع كزينوهات والارزونا دي كان عاملة زحمة والشربه فيها والغناء للصباح. المكتبة كانت داخل المجلس البلدي وكانت كبيرة جدا مليانة كتب والمكان كمان كان متاح للناس بيجو للمذاكرة. المسئول منها اسمة حسن طلب راجل قصير ومفتل وطيب جدا كانوا يعطوا الواحد بطاقة فيها صورة ويقدر يدخل المكتبة اي وقت وهي كانت تفتح حتى بالليل. بماسبة الناس الظريفين ما فيش اظرف من عباس كرار عم اخونا كمال واتمنى لو يحكي لنا عن طرفه.
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
لا زال إبن بحري الأصيل سيف الدين نجار يطل من الشباك ويتحفنا بمساهماته
وهاهي مساهمته الأخيرة طازة من الفرن.. ويا هيثم لبيب بالله إستكتب لينا صلاح لبيب وأجرك على بحري
Quote: يبدو انه ليس هناك احدا عرف هذه المعالم ولا حتي الديناصورات، أنا شخصيا معلوماتي استقيتها من كبار السن في بحري وبعضها ادركتها بحواسي فأنا ايضا امنتمي للديناصورات الأخيرة قبل الإنقراض.
مثلا – شارع الكنيسة: الكنيسة المقصودة هي كنيسة الشهيد ماري جرجس والتي هي مقابلة لحلة الميري، يبدأ هذا الشارع من اقصي شمال مدرسة ميسرة وهو فاصل بين الديوم والدناقلتين مرورا بشارع
المستشفي قبل إغلاقه وبناء الجناح الخاص مرورا بغرب منزل أولاد رضا محمد عثمان وناس يحي وعثمان عامر وغرب طاحونة مقار وغرب مجلس مدينة بحري، هناك لافتات قديمة في ناصية كل شارع جانبي كتب عليها ( شارع الكنيسة) وهي لازالت في المنازل التي لم يعاد تشييدها.
سوق الأثنين كان أمام مستشفي بحري وتحول إلي سوق سعد قشرة والذي كان يعرف بسوق الطبالي
جغرافيا ديوم بحري تبدأ من الشريحة المقابلة للدناقلتين وحدوده من الشمال مستشفي بحري وموقف الضواحي وحتي مدارس ميسرة ( الشعب) ومن ثم شرقا حتي ميدان المولد الحالي وحتي سوق بحري جنوبا. يعتبر من أكبر أحياء بحري المدينة مساحة
ميدان الليق أول الأمر كان في الوابورات اعتقد في المكان الذي اقيمت فيه مدرسة مايو
شارع الضبطية وهو الشارع الذي يقع ما بين شارع البوستة وشارع المعونة ويتجه من الشمال عند آخر المزاد وحتي حلة الميري جنوبا، وهو سمي كذلك نسبة لكون كافة اجهزة الحكومة تتمركز في مركز واحد ( مثل مكتب مساعد المحافظ سابقا، الشرطة، المحاكم، الأراضي وكافة اجهزة الحكومة التفيذية، وهذا المقر الآن أصبح مجمع المحاكم ببحري جنوب الإدارة المركزية).
بالمناسبة يا أخ كمال يوجد هناك بحراوي أصيل ومن اسرة مرموقة بحلة حمد شارع الشلالية لديه معلومات غزيرة عن بحري القديمة والحديثة وهو أبن عم عضو البورد هيثم لبيب الأستاذ/ الصحفي صلاح محمد لبيب، يمكن الأخ هيثم ان يستدرجه لاعلاء هذا البوست بما لديه من معلومات ويعتبر الأستاذ/ صلاح لبيب مؤرخا لتاريخ بحري الحديث.
مع اطيب الأمنيات القلبية لكم
ونواصل
سيف الدين نجـار ( ما ذكرته من معلومات ليس بالضرورة تمثل الحقيقة ويمكن تصحيح ما هو خاطيء)
|
--------------- وبحري طراوة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: بالمناسبة يا أخ كمال يوجد هناك بحراوي أصيل ومن اسرة مرموقة بحلة حمد شارع الشلالية لديه معلومات غزيرة عن بحري القديمة والحديثة وهو أبن عم عضو البورد هيثم لبيب الأستاذ/ الصحفي صلاح محمد لبيب، يمكن الأخ هيثم ان يستدرجه لاعلاء هذا البوست بما لديه من معلومات ويعتبر الأستاذ/ صلاح لبيب مؤرخا لتاريخ بحري الحديث. |
العزيز / سيف النجار ... في محاولات حثيثة لإستكتاب أخي صلاح لبيب .. بس غاطس وين ماعارف الأيامات دي وبحاول في سيف ومالامي فيهو برضو .. على أي حال أنشاء الله يدينا المفيد .. تخريمة .. عندك علاقة بياسر النجار وبرضو من ناس حلة حمد ؟؟؟ مع فندق قصر الصداقة .. وهو الان في الرياض .
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Haitham Labib)
|
يا هيثم ده رد الأخ سيف الدين نجار..Quote: الشكر الجزيل العزيزان كمال وهيثم
أنا سيف الدين محجوب نجار أصلا يوجد منزل الأسرة الكبير بحلة الدناقلة شمال ( شارع بنك التضامن – قديما دكان حسين اليماني) في المنطقة التي تقع جنوب مدارس الأميرية 2 ، وحاليا منزلنا بحلة حمد جوار فندق قصر الصداقة ( تحديدا سكن الكوريين)، لا علاقة لي بياسر نجار أو اسرة المرحوم نجار عبدالعظيم سوي العشرة الطيبة والجيرة، نسابتنا ناس حسن دهب ( صلاح ناجي، وعبدالوهاب وسمير دهب وعادل دهب وعاطف دهب)، اقربانا في حلة حمد المرحوم محمد زبير حسنين وأولاده والمهندس كمال صيام ادريس ابن عمي وهو صهر لناس مكي حسن ادريس، والمرحوم الأستاذ/ عباس علي وناس بهاء بلال توفيق، لدي أخ واحد شقيق هو مجدي محجوب نجار ( ببلو) مقيم بالولايات المتحدة الأمريكية ( ولاية فريجينيا)، بلغ تحياتي لآل لبيب صلاح، عزو، سمير جمال وسيف، اعتقد انك شقيق فريد وسعد – صحيح.
مع تقديري
سيف الدين نجار – أبوظبي
This is my email address
[email protected]
] |
------------ بحري طراوة
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
مرحب بي طلة محمد سني وانت في بيتك.
سيف الدين نجار فعلا ميدان المولد فيه الآن مدرسة مايو. ارجو فعلا استكتاب الاخ صلاح لبيب لانه رجل خبره ومن ديناصورات حلة حمد "الشلاليه".
يا اخوانا والله وانا جايي قلت اول ما اصل اسال من الاخ محمد شمس الدين ليهو كام يوم ما ظاهر عل المانع خير؟؟؟
ابو رزقه مالك مره " شلكنح" ومره "شكلنح" ساهرت وين امبارح؟؟؟؟؟؟
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: بماسبة الناس الظريفين ما فيش اظرف من عباس كرار عم اخونا كمال واتمنى لو يحكي لنا عن طرفه. |
تعرف يا أبوعلي.. عباس ده راجل نكتة..لكن ما حافظ ليهو... المهم تقعد معاه تضحك..لمن تقول بس..أحاول أستعين بواحد من زملائه في ارامكو أو شركة الكهرباء.. عموماكل ما أقابل زول ويعرف إنو ود عمي يشيد بظرافته.. الله يديه ويديكم العافية..
كان بتكلم عن واحد زميله بخيل.. قال: ده الريال البيدخل جيبه إلا يطبعوا واحد بدله.. طبعا كناية عن بخل الراجل
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخ العزيز / سيف نجار ...
تقبل تحيات كل آل محمد لبيب وسعد الدين لبيب بدايةً من صلاح مروراً بمعاوية ( عزو ) وجمال وسمير وسيف .. أنا بن سعد الدين وأخو فريد ( جيركي ) كما كان يكنى .. وعموم آل دهب وآل صيام آعمامي وأظنك نسيت شاذلي دهب .. يعني طلعنا نسايب .. وبيتكم في الدناقلة قريب لآل العرايسي مقابلين سعد قشرة ... ويقال أنو جدهم هو نفسه صاحب التسمية سعد قشرة وفيما قبل كان يسمى السوق بسوق الزنك .. ياناس مانشوف لي الزول ده طريق يجينا بالباب عدييييل .. وحقيقة فرصة سعيدة جداً بمعرفتك ..
تخريمة صغيرة للفنان محمد السني دفع الله .. أذكرك وأنت جالس تحت النيمة في كرش الفيل مقابل شارع المزاد جنب بقالة رحمة بيت صاحبو يكون هلالابي على طول مضروب بوهية زرقاء ... ولي اللحظة دي كل ما أمر بالمكان ده بتذكر شخصك الكريم ...
| |
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخ/ كمال كرار
تحياتي ...
كلامك عن نادي الصبيان ذكرني مجلة الصبيان الممتعة والمسلية والتي إتضح أن مؤسسيها من أبناء بحري وخاصة رئيس تحريرها عمنا الراحل رضا محمد عثمان ، وأتذكرت شخصية عم تنقو اللطيفة ، وفي هذه الأثناء جادت قريحتي بهذه الأبيات :-
عمك تنقــو أتحكر وعايـن قال للســرّة أنا أون لايـن خلاص قررت أسيب ود راوة لقيت أحسن لي بحري طراوة
البقية تأتي ..
| |
|
|
|
|
|
|
|