سخانه ...سخانه ..سخانه 1000

سخانه ..سخانه... سخانه 1000 ..ورطوبه مبالغة ..يعني زي العايش ليك في حلة كوارع ..والدنيا كلها مولعه نار ..العراقيين كانو بقولوا شهر آب البخلع المسمار من الباب من السخانه .. والله آب السنة خلعنا وبقي ابو لهب عديل...... ناس اوربا قالو العجايز انقرضن..والشباب فكه اخرو خالص ...والشفع ما خلو ليهم نافورة ولا جردل مويه ما دخلو فيهو ..والغابات اتحرقت ..دا كلو ودرجة الحرارة 36 لحدي 40 ... ديل بهذرو الظاهر عليهم ... زمان كانو بمشو يصيفو ..بعد كدا اخير ليهم يمشو يشتو ..... تتصل علي السودان يقولو ليك الجو حلو اولله ..وتعاين في التلفزيون تلقي درجة الحرارة 38 ..ناس صحراويه و شماشية خالص...
اما الخليج بتاعنا دا ...تقوم من الصباح تقطع ليك جك مويه بااارد وتقول هل من مزيد ... والله دي لو عملتها في السودان .. تلقي الناس يتلامزو ويتغامزو ..ويقولوا ليك انت امبارح كنت مساهر وين ؟؟ دا لو ما جا واحد اداك شمه كدا ..
سمعت لي شمار قالو ناس خليجنا ديل بختو تلج في الترمومتر البقيس درجة الحرارة ... عشان ما يقرا درجة الحرارة صاح .... ياربي دا داير ليهو كم لوح ؟؟ ....علي الانا حاسيهو دا بتكون درجة الحرارة كان60 ولا 70 امكن... غايتو الواحد داير ليهو جهاز يبرد بيهو المويه عشان يعرف ياخد ليهو دش .... تقول خلاص امشي اقعد في التكييف شوية ..والله بس زي القاعد ليك جوه طاحونه ..وتبقي عليك ميته وخراب اضان ... واحد قال لي امشي اشتري ليك مكيف ما فيهو صوت اسمو اسبلت قال ..قلت ليهو خلي المطالب الميري انطوانيتية دي ..... اسة فرقك شنو من ميري انطوانيت لمن قالت للجماعة اكلو قراصة بي عسل والناس ما عندهم دقيق .... ناس السودان الواحد يدي ليك الحوش رشة بي موية وكان الله رحمو بالكهرباء يشغل المروحة وينوم ويشخر.. ويقوم زي الداقيو بي عكاز عمنا قرجة..جسمو كلو مكسر .. تقول لي اسبلت .....
انا داير لي كركدي في جك قزاز مندي بي برا ... واقطعو زي قطعة الاوستن لي رمال الابيض
واخت الجك دا تااااخ في الواطه ... وبعد داك خلي الاسبلت ينفعك ... قال لي اشرب شاي ببرد ليك جسمك ...لووول ..شاي دا انا خلقة ما عندي معاهو علاقة ...لكن والله الشاي الببرد الجسم دا الا يكون جايبنو من روسيا ..خليني مع جكي دا ... انشاء الله يعمل لي قرحة ..لكن شاي يجيب لي احتراق زاتي في معدتي ... دا ما بنفع معاي ...
قالو الاوزون اتخوزق وخوزق العالم معاهو ..وخوازيق العالم زادت ... كان كدا الله يستر علينا من رمضان البعد الجاي ..باقي انا جرسة في رمضان ..الظاهر حتبقي علي حكاية الليله عدوك ما صايم ...
الله يمشي آب دا بي خير زي ما مشي تموز.. والله يحفظكم من حرارة الشمس و العين ...
ولكم الحب

تنقو