Re: هجاء الروائي الحسن البكري (Re: Mohamed E. Seliaman)
.. Mohamed E. Seliaman ود سليمان، يا زول الحمدلله، أهو إنت عايش وشغّال تش، خفتك تكون قطعت كَهْرَبه من كلامي الفوق داك، أنا عارفك ياخ هسّع عندك سكري وألا ضغط!؟ مع إنّك ما بتراعي للنظرية دي مع مؤمن كلّو كلّو،.. لاحولالا، كلامي الفوق دا إنت اعتبرتو عيزومة فوراً، دي مهدوية مني ليك ياخ، وقلنا نعرقك ونشوفك بس ما تكون اتعوّقت، إنا لله، ما بتضيّع زمن تب آلطرماذ، طواالي تجيب لالوبك وسِبَحك وممهوول تاني تفرش لينا قِدّام دكانّا دا،.. بخصوص كتابة (إمرأة) أها أقول ليك حاجة؟ إنت غالطني زي ماك داير، بس كضّيب ما تكضّبني، لأنو الغلط دا عادي ممكن أكون غلطان، بس الكضب دا عمرك ما ح تلقاني كضّاب، ياخي أخوك بس زول بحب دربو يكون براهو، لقيت الناس دي سووا أي حاجة، الكتب القوية، الحريم السمحات، والوليدات البسرو القلب، البنايات البتتعجّن في السماء الأحمر دا، يا زول ما خلوا شيء تب ما سوهوا، إلا سواتن دي كلّللها خلبتوها أو أنجزوها بالكضب، ما لقيت غير الصدق حاجة بائرة ومافي زول شغّال بها الشغلة، عشان يبدع فيها، قلت بس أنوّخ هنا.. أكابد.. وأكافح.. لامن أبقى صادق أو أهلك في الفَرَقة دي، فياخي الكضب ما واحد من أهداف وجودي، لأني ما عندي هدف ذاتو، زول ما عندو targeting علي أي شيء، يربي الكضب عشان ينجز بيهو شنو؟ الكذب أداة بناء بالمناسبة وتراخيص لإقامة منشأات، مرّة طورية ومرّة مصطرين، يا كمان القِدّة والخيط، اللتان يقاس بهما حيطتنا الأنجزناها أسمن، أم حيطة منافسينا من الجيران. فأخوك ياخي ناذر نفسه لحَنَكات الخلاء دا طوعاً، وأبداً ما مغروض في الكضب دا لحاجة، إنت دا وريني إنّك مغروض في شنو؟ إنو محسن خالد يعترف بيك؟ قلتلك إنت "ذكي"، شكّرتك قمت دردرب وقعت في الطين، وأثبت لي إنّك "مجنون" أو أقلاها زول عندو مشكلة في حتّة ما، أو شورت في رأسو، هل إنت مغروض في إصلاح الكتابة؟ طيّب ما دااك إصلاح الكتابة في الحلّة الفوقانية ومش هنا، هسّع إنت قبل كدا مش صلّحتني في مثال أنا غلطان فيهو، ومشيت طوالي صلّحتو، بدون لولوة، لأنو كلام واضح غلط وما بديك فرصة تلولو ذاتو، خليهو زمان، هسّع في البوست دا ذاتو، مش أنا فوق كاتب "محاسناً"، الممنوعة من الصرف دي، مصروفة؟ هل غالطتك، طوالي مشيت صلّحتها "محاسنَ"، لأنّي مان ضهبان منها ولا من غيرها، وإنت عارف! يا محمّد لما تجيبني بالثابتة، ما بكون عندي فرصة ذاتو ألولو، دا لو إنت بدخلن عليك أرادب متعة ومحاصيل من حكاية إنّك تجيبني بالثابتة دي، شجاعة الاعتراف بالخطأ دي، ياها لبينتي كلها البرمي فيها كل يوم رَوّاب عشان ما أخسر روحي ذاتها، إنت ما ملاحظ حاجة، إنّو غلطاتك الجبتها دي معظمها، يا واقعة في مداخلات "زهج" يا كمان "غضب".. "غضبي مع مهيرة" مع "حميدة" و"زهجي مع الحسن"، إنت ليه ما داير تضيف حالة الكائن الوجودية لحصيلة معرفتو؟ إنت هسّع عارفني أنا أمس اتعشيت بشنو، وألا بايت القوى؟ قصدي من الكلام دا إنو الأخطاء البتقع في كتابتي الفورية دي، بتاعة (تأثير فكرة التداخل السريع دي نفسها، عجلتها الشيطانية، الطباعة، سبق لي وقلت إنو: فكرة لازم ترد دي، هي نفسها، أكبر غلطة سينطوي عليها الرد)، بعدين أنا رجل شبه ضرير، لو كنت شفتني بكوس المنيو بتاع الويرد دا كيف، عشان بس ألقى كوبي أو بيست، حرّم كلامك دا كلّو تبلعو لو كنتَ شريفاً ونزيهاً، أسمع أقوليك.. الحجج والمعاذير دي كللّلها، بتنفع لي أنا بس ومن يماثلوني أو يفوقوني معرفةً ومش لغيرنا من الناس، في الحتة دي أخوك سُقْرَاطي عديل، النوع البكتب (إنشاء الله) ملصّقة كلها دا، ومش يكتبها مرة واحدة في الدهر، بل كل يوم بقش عيونو من النوم بس عشان يجي يكتبها هنا، حتى يلوح وكأنّ دوره في الوجود هو أن يكون (جسم حاضن لا غير) كي تتعيّش فيه فيروسات الغلط حتى مماته، أها دا اسمو الجاهل، مش المخطئ أو صاحب الهفوة بعامل العجلة أو الزعل أو أي آفة وجودية أخرى، زول (إنشاء الله الكوبري) دا أسبابو مبتداها ومنتهاها الجهل، ومحسن خالد عالم ونجيض كمان ومش جاهل، والأخطاء النادرة والصغيرة الفي كتابتو دي أخطاء حالتو الوجودية، مش أخطاء معرفتو من عدمها، بعدين هل إنت ضهبان من إنو محسن خالد دا مقطّع العربي دا ومقدّدو لدينو، أبداً ماك ضهبان، ودا كلامك إنت بالمناسبة ورأيك القديم في محسن لهشام آدم، قلت (ما معناهو، وبلغتي أنا)، إنّو الناس ويين ومحسن خالد وين؟ دا زول مَحَرَّق ونجيض مش لعب، كان أنا كضّاب في الكلام دا قول لي!؟ طيّب هل العالم محسن أب جلحات دا، يخلوهو بحجّة حالتو الوجودية دي يرتكب أخطاء علي كيفو ساااي، أها الإصلاح ذاتو كان كدي فائدتو شنو؟ عشان بس الناس يبقوا متعلمين نظرياً، فاشلين عملياً. طيّب مافي زول قال كدي، وما هو القول إذن؟ القول إنو محسن -يا محمّد مُحِب نقل آي القرآن الكريم- لن يتخلّى عن تمسكه بحقه المنصوص عليه في القرآن هكذا: (هل يستوي الذين يعلمون والذين لا يعلمون؟). الآية دي ما دقست وقالت الذي يخطئون والذين لا يخطئون، دي ذاتها معجزة منهجية في القرآن اكتشفتها ليكم في ونستنا دي، وحقّو تحوم تلصقها في البوستات كلها بدل نشاطك الما بستريح ضد معجزة هذه الآية ومحاولاتك المستميتة لإفشالها بإثبات إنو "الجاهل" يطابق "المخطئ" تركيباً ومدىً، ياخي هناك فرق لدرجة ولادة المعجزات، والحاجة دي ذاتها يمكن حسابها بواحد اتنين تلاتة، مثلاً إنت بتكتب سطرين ونُص، وصاحبك ملاسي، بكتب كان سطر كان نص ما بعرفو، بينما محسن بسوّوود الصفحات، زي ما إنت شهدت بقلمك، وزي ما هو روائي، لامن تفتح الكتابة معاهو ممكن يكتب (بورتريه الغياب) ثلاثين صفحة بتاعة ويرد كمفترع بتاع بوست واحد ومسكين ساي، أها التلاتين صفحة ديل بتلقاهن أنضف من برغرافك وسطر ملاسي، ومع ذلك.. ممكن جداً –وحتف أنف ذلك- تحاحي محسن خالد في تسويدو الصفحات الما ليهو آخر دا، تقوم تلقى ليهو هميزة، غميزة، واقعة بهنا وألا بهناك، هو محسن خالد دا بشر بعرف لغة وألا الله الخلق اللغة؟ فهل يجوز أو طوالي بعدها يصبح من حقك أنت أو غيرك، أن يركب معه في سرج واحد؟ أو "ابتزازه" "مطاردته" "دق نحاس لا ينهتك جلدو ولا تنكسر إيد نَقّارو"، يا زول حاااح، وين النزاهة؟ وين علمه في اللغة دي ذاتها المحصّل فيهو فَرِق بالسنين الضوئية مع أشباهه؟ أفكارو هنا وأفكارو في كتبو؟ لماضتو الفنيّة والطاعمة دي ذاتها؟ إسهامو في مجمل حياتكم الثقافية، وتكريسو بكلامو الدارجي دا ذاتو لحكاية "تراثنا" التي بشَّعتموها وبشَّعتم بها لدرجة أصبحت "طراشنا"، جهدو وتعبو في الحاجات دي كلها، وكرمو في إصلاح الكتابة؟ دا chـت عليهو يروح في خبر هميزة وغميزة؟ يا زول حااااح، وكان دا كلّو بتتوطّاهو بكرعيك ساااي؟ إنت والله صاح ما سوداني ولا مسلم بطريقتنا السودانية دي. أها محسن دا نخلي ليهو الهميزة والغميزة ديل عوفه سااي، أصًّصلك وبتاتاً ما تخليهن ليهو، أنا قتلك "سيلهن" ودي لغة خلاء إذا بندرناها بتعني "سويلن أو أعملهن"، جراب وألا مخلاة وأبقى من تصحى من النوم، وكل يوم، أعقبن فوق ضهرك، ولالامن تدخل بيهن الانترنت، تقعد تظبطن كويس وبالتلوين النجيض فيهو دا، وبنفس طريقة تكبيرك للحروف دي، أفتكر حكيتلك قصة إني أعشى وكدا، ولا حتى تشكرني ولا تسلم علي ذاتو، قول لي يا محسن، وبدون أخ إذا بتريد، دي هميزاتك وغميزاتك، صلّحن عشان ما الناس تقرأ حاجة عندك بثقة إنّك محسن خالد، وهي تكون غلط، فيتعلّمون الغلط من حيث لا تقصد، بل من حيث تقصد بهم الخير والتقويم، مش كدا إنت ذاتك بتساعد البشرية في أن يكون لديها محل ثقة تتعلّم منه، أبداً، إنت خطّك بالواضح كدا ضرب الثقة دي بالتحديد، ودكّها، حتى بإثارة قضايا خلافية ومش نجيضة، ليه؟ ما هو المغزى والهدف؟ خليها ثقة محسن يمكن ما دخل مزاجك ياخ، طيب ثقة البوست بتاع الإصلاح نفسه، الما عندي شك أبداً إنو الخلِق دي كلها، وإنت ذاتك والله نهلت منو لامن بزبزت، ولو عندي تأثيرات في أي زول بكتب في المكان دا أنا شايفها، بالحرف. وحتى لو كلام السماحة دا كلّو ما خاشي رأسك، ولو المقترح الأولاني دا ما عجبك، برضو أعقب مخلاتك مخاانقة، ونزّلها في السهلة وقلب بوست (إصلاح الكتابة)، مش تنزلها في وشي وين ما لقيتني وحتى لو قاعد أصلّي، طيّب الكلامين ديل، بتاع الكرم والفضل من قِبلَك، وإرسال أخطائي لي على المسينجر الداخلي، أو كمان بتاع المحاققة من قِبلَك وفرش أخطائي دي في (بوست الله أكبر إصلاح الكتابة)، دي البصارة والمشهاد الوحيد عشان ننفك من بعض ياخي، وهذا الانفكاك ساهل ويمكن حدوثه بكل سهولة، بل لا يحتاج لعبقرية، لو بس فعلاً أنا سَوَي وإنت سَوَي، وهدفنا واحد: هو تقويم الكتابة. أنا هدفي تقويم الكتابة، إنت هدفك شنو؟ مشكلتي معاك إني ما عارف هدفك من ترصدي شنو؟ إنت مشكلتك معاي شنو؟ تقويم الكتابة؟ دي الطريقة الوحيدة والشارع الوحيد الممكن تتقوَّم به الكتابة. هل هدفك تدمير سعيي في المكان، أو حتى إذلالي ككاتب محترف؟ برضو ليشنو؟ ضرّيتك في شنو؟ ياخي خلينا على مذلّة الوجود الصرفوها لينا بسكاكين الدايات الولّدن أمّاتنا، تلقاني ديمة علي في حالي ياخي، محاولاً تفتيت حموضة الدهر بحموضة الفن، أدووبي، في عزلتي وببطن كتبي: دِرِيدرَّه وَحَدة ونويسها يِصِرْ مبارين بالضهَرة وصقايع القِرْ ولمّا أكتب الكلام دا في قصص، أفرّق علي روحي وعلي الزيي من البشر، الممكن يتونسوا مع طائر (أبو ملود)، في ناس نصيبها من السعادة طائر مع الطيور ياخ،.. بالفعل يا محمّد هدفك شنو؟ أنا اتمحنت فيهو، نوّرني، لو تقويم الكتابة تتوجّه فوراً بوست إصلاح الكتابة، لو تخريب أي حاجة أعملها أنا، فأنت وذمتك، وأنا وحالتي الوجودية البتعتّر لي فيها تحت كرعي، إنت من حقك تكتب في أي بوست هنا، لم نقل شيئاً، لأنو دا الغرض الذي صُنعت من أجله منابر الحوار، ولكن لاحظ، أيضاً من حقي أن أعتزل حوارك، ومن حقي أن أقرر إن كان الحوار معك يفيدني ويفيد القراء أم لا! وألا دا ما من حقي، ومفروض أحاورك غصب؟ ياخي أنا عندي هوايات تانية غير اللغة، ومنها كتابة الرواية، هسّع إنت ما شايف البوست دا مفتوح لشنو! أو ما تكون يا ربي قريت كونراد وكلب السجان تقوم بسرعتك ديك تفتح لينا بوست للحكاية دي؟ ولله دا يكون بوست الموسم، دي حكاية البوست دا يا مولانا، لو ما منتبه أهو نبّهناك،.. أرجّعك لحتّة (بخصوص كتابة إمرأة) أعفى لي من الطريقة دي في الكتابة، لأني روائي، بقدّم وأُأخّر في الأحداث والثيمة –على عملات المثقفين- وَفْقَاً لصبغتي، وترتيب الحُجيّة والنكهة عندي، محمّد أنت كذّبتني أو أقلاها غالطتني، دون أن ترجع لقاموس (المنجد) في موضوع "أبداً وقط" حتى هذه اللحظة، واليوم برضو في كتابة (إمرأة)، فياخي دي دعوة كريمة أكتر من عرس أخواتنا ذاتو، عشان أعمل ليك بوست، أيوة بوست بالبنط العريض، وأقول أخطأ محسن وأصاب ود سليمان، ارجع إلى هذا القاموس، وصوّر منه تصويراً المادّتين أعلاه، وتعال لصّقن في أي مكان يعجبك، لو لو كنت شايف إنو حكاية كتابة (إمرأة) بالطريقة دي غريبة؟ أيوة غريبة، وأنا كان قوّة رأس كان عدم اقتناع مني الغالب على كتابتي ليها ليوم الليلة رسمها بدون همزة، لأنو عادي القاموس يخطئ، وألا كيف؟ هي الهمزة دي ذاتها في الكتابة ظهرت متين، هل تعلم؟ أقول نفسي تعجّبت منها، ودعوت صديقي الشاعر واللغوي علي كنعان، لرؤيتها، تصدّق؟ لو ماك مصدّق حدّك تصوِّر القاموس دا وتجيب كلامو، أنا هسّع ما عندي، كنت أضعه على مكتبي أيام أبو ظبي، لأشربه مع الشاي، مع قهوتي، مع مغازلة نونا وروحي، ولأنّه مجلّد واحد فقط فخفيف بدل تمشي تفتّش ابن منظور كم وعشرين مجلّد، ولغته عملية جداً في باب التحرير والطلعات قصيرة المدى، أها في رحولي للندن دا شلت معاي قواميس الطلعات بعيدة المدى،. حكاية الساكنيْن دي مالك جلّيتها؟ أها الحجّة بتاعة الهمزة حرف براها وألا درفونة الألف دي ما طقشت أضانك؟ أو أكون ما فهمتك داير تقول شنو؟ ياخي الحتّات الفيها غلاط من أصلها خليها، وسبق لي وقلت في (إصلاح الكتابة) أنّه لا تُوجد قاعدة واحدة في العربي، تدخل من الجنبة هذي وتمرق من الجنبة الأخرى، دون أن يعترضها معترض!؟ الأصل في قواعد الدنيا كلّها، وليس اللغة فحسب، هو التغيّر وليس الثبات، معاك في؟ وزمان أنت بنفسك كنتَ تُريد أن تأتي ببيت الشعر الذي يكسر قاعدة العدد، وألا فاكرني ما واخد بالي؟ ---------------------- الكلام الفات دا كتبته لك قبل رؤيتي لبوستك الجديد. وكنت أرغب لخاتمته استبصاراً مختلفاً. أما الآن، وبعد رؤيتي لبوستك، فزهجت، تحوقلت وتسبحنت، يا زول إنت كتبت كلام ما ترجى ردي عليك، شوفني أقولك شنو؟ معقولة الطريقة بتاعتك دي يا محمّد؟ الحمد لله على كل حال غايتو،.. ----------------- حكاية الضمائر، ياخي كلامك البتقول فيهو هسع دا، ما قالو ود أشيقر من طقطق للسلام عليكم، وفردناه وفصّلناه من الألف للياء، اعتقادي إنّك حافظ البوست دا أكتر مني، معقول كلام الصدِّيق دا تب ما لاقاك، وألا عدم ذمة منّك؟ لو ما لاقاك هسّع أرجع البوست، وشوفو موجود وألا أنا كضّاب؟ أها دي من نوع الحاجات البتخليني أتمرعف عليك، بحسبان إنك داير تتعلقن ومنتهاك الحتّة دي؟ طيّب الهدف شنو؟ نفس كلامك لي عن إنك ما لقيت "عدمان السبيبة" -القلتها أنا تشبيها- في البخاري، وبعد داك اعتذرت عنها، وإصرارك علي إنو (تبارك، التي ورد فيها: تبارك الذي بيده الملك) إنو بت، بتقصد شنو إنت؟ إغاظة الخصم حد الإفلاس، إخراجه عن طوره عشان يسف؟ وتمشي بعداك تفتح ليهو بوست بإسفافه، لو الواحد ما انقلب rapper وتلّب ليك هنا بكرعين توباك شاكور ما بترتاح؟ أها دا (المرض) البربطو بعدو الزول بحبل وبودوهو لفقير وألا بعشر. ارجع لحواري مع ود أشيقر حول الضمائر دي ذااتها، وتفصيلي ليهو فيها، وكلامي عن التسهيل وما التسهيل، ياخي وهو في قاعدة اسمها أفعال بتبدأ بـ(است) دا نجري براي، وملاحظاتي لأجل الناس الما مغروضين شديييد في العربي، مالك ياخي بتتعمّد تفلت الإنسان عن عقال إنسانيته ورزانته، وتجبرو يفلس وما يلقى قدّامو سوى المداعاة، يا قال ليك إستك يشيلنو الكلاب، وألا كمان الإسهال اللي يعملو ليهو مصلحة بلدية ووزارة مجاري،.. ليه ياخي إنت بتحب تتحاور مع بشري بعد تحيله إلى مجنون؟ كن نزيهاً ومؤدّباً بأخلاق الآيات البتلزقها فيها في كل مكان دي ذاتها، كلام الضمائر دا من قرنو لضنبو اتقال هناك: (هو) رجلٌ، (هي) بنتٌ، (هم) قومٌ، (هن) نسوةٌ، إنـ(ـه) رجلٌ، إنـ(ـها) بنتٌ، لـ(ـه) شلوخٌ، لـ(ـها) فستانٌ، أمر(ه) عجبٌ، أمر(ها) سماحةٌ، فيـ(ـهم) خيرٌ، فيـ(ـهن) خيرٌ.. ووو.. إلخ. ياخي في إطار تبسيط لناس ما كُتّاب محترفين، لامن تحسب كميّة الغلط الممكن يرتكبوه بدرب الأمثلة الواضحة فوق دي، ح يكون تسعة وتسعين في المائة من تعبيرن اتصحّح، وشوف إنت مبحِّت ليك آيات من وين وين، عشان تهدم التسهيل دا، هسّع دا شنو بلا الخراب؟ ود أشيقر اتضامن مع الفكرة لأنها حلوة وملعوبة، وأضاف بس حقو ننبّه للانحشارات، زي كان وأخواتها وإنّ وبنات خالتها، مع إنو رأيي في ديل إنهم بجهجهوا أي قاعدة يقعوا فيها، كان نجري دا، كان المبتدأ والخبر المشهورين ومعروفين، مع إضافة إنو الانحشارات ديل برضو إنت وود أشيقر ما تنسو إنهن مشهورات، والسليقة نفسها بالغصب بتخليك تكتب صاح،.. كلامي دا فيهو شنو؟ إلا كان بس داير تعمل لمحسن خالد إنّك فارس في اللغة، أها ماك أفرس منو! ومن متابعتي ليك، أمرك والله هوين بالحيل، وكلّو في إطار البوست دا، اللهو دورة بتاعة "إسعافات أولية" مش وكَرَة بتاعة جرّاحين دماغ وقلب،.. يا محمّد القاعدة بتاعة الهمزات دي ذاتها، أنا شايف لو دَرّسوها "ناقصة زي ما أنا عملت في البداية" وفي حتّة بتاعة (إسعاف أولي زي دي) أحسن وأصح من يدرسوها كاملة، لأنو بينطبق عليها نفس الكلام بتاع تسعة وتسعين في المائة من تعبيرن ح يطلع صاح لو دَرَّسناهم القاعدة دي ناقصة، وقلنا لهم، أي فعل رباعي بس أركبوه همزة من تحت في حالة المصدر والاسم، وهمزة من فوق في حالة فعل الأمر، وأي فعل مش رباعي أنسوهو من الهمزة، أها الكلام دا لزول داير يكتب ليهو مش كلمة كلمتين، حتى لو مقالة مقالتين، يا زول حتى لو داير يبقى صحفي سوداني –ذاتو- برضو كفاية، وبعينك شايف الصحافة،.. اعمل إحصائية والشيمة تشيل الما غَطَّاس، كدي عاين هسّع لكتابتي القدامك دي كلّها، لو شايفلك همزة من الغايصات عدّها وقارنها بإحصائية قاعدة التسهيل؟ أما أصحابنا البكتبو هنا ديل، مستعد أراهنك، الواحد منهم يكتب سنة كاملة ما يمشي بعند الحتات الغااايصة ديك، والسودانيين ذاتهم منطقهم بالفطرة كدا فتراان وما قاعد يمشي بعند الحتّات الغايصة، عشان اللغة تكون بعدها مضطرة تنجر معاهم بالأزقة أم وحل وشوك، لكن إنت يا محمّد حتّى لو حافظ القواعد كلّها، برضو لاك مفكّر ولا خَلاق أدبي، عشان تكون التفاكير الزي دي حامت برأسك، ولا بتعتنى بالزقاقات البتمشي فيها الكتابة أكتر، أو أقل، ولا يعنيك بالمرَّة أن تخترع أزقةً من عند رأسك، دي تفاكيرنا نحن الفنانين وأشباهي، إنت ما بتقدر تصل لخلاصات واستنتاجات زي دي من أساسه، كدي قول لي ملاحظة ليك واحدة بس في الوجود الواسع دا كلّو، خليها اللغة، لاحظت شنو قبل كدا؟ ولو سألت أي واحد طبيب، بقولك عندنا شغل مرات بكون غلط عديل، أو قاصر، وبنعملو لأنو ضروري في حتت بتاعة إيمريجنسي، مع إنو غير صحي بالكامل، وجرّب اسأل أي دكتور جنبك، وكلامي مع ود أشيقر كان واضح وضوح الشمس، إنو نحن قاعدين نتونّس عدييل، كيف ننجر من رأسنا ما يخلينا نتفادى أكبر كمية من الأغلاط،.. ياخي هدفي من البوست دا، هو تخفيف كمية الأخطاء، وبالذات أبو هَقَل منها، والكلام دا مكتوب في كل صفحة من صفحات البوست، فما في داعي تستغل الحاجة دي، وتخليني أكرّر الكلام دا لامن خشمي يمرق دخان دخان، وزيتي يسيح بالسكّة. فبدل أقعد ألاوي فيك إنت العبقري والفالح دا، خليني ألاوي مع غيرك من الرمدانين زيي، واحدة نكتبها صاح، والتانية نقع دردرب علي خشمنا وتاني نقوم، وإنت لو ماك داير تجي تساعدنا علي القومة البلا مَنٍّ ولا أذى، فجر ليك كرسي هناااك، واضحك فينا ياخي، وكمان دنكل سفّتك كان بتسف،.. ---------- يا زول، هذه الهرجة كلّها لك أن تحصحصها بما يعجبك من مساق ودرب، ولكن "حيث" و"حين" مقامها فقط، وفي تكيتها المشرعة لها وليس لغيرها، فلا يعقل أبداً –كمثال- أن أسرح في الوجود وأتكلّم مع طائر (أبو ملود) الذي فكّرني به أبو حريرة فداخ شجني في حضن روحو، وفَتْفَتُّ كالصريع، وفي وسط هذه الحالة وأنا مشجون وضل جسمي رامي جَمر، أفتح عيني لأجدك بمخلاتك مخاانقة هميزات وغميزات، فأقول معليش، أمسكك بمخلاتك دي وأتم حالة الشجن بجركانة بدل الكأس، وأختر منك لقدّام، أقيف جنب حيطة سينما بالليل عشان أبول وضلّي المشجون من زمان داك يرمي قدّامي شمّاشة، برضو أرفع رأسي ألقاك قدّامي، وما لي عندك حتى حرمة البول، أعدّك في وجهي عداً ونقداً وكاش داون ولا ناقص أي هميزة وألا غميزة، أفتح بوست لنقاش في الصعيد وبلداً طيرو فصيح، أو لزهجة ساي مع روائيين، برضو ألقاك -بقيت وانتهيت- حتّى لون الجير لخيمتي القاطع ليها ضَرُّوب في الخلاء، يااخي حاااااح، شنو هو؟ الله ما قسم ليك من الملل ملوة ملوتين مع خلقه؟ إنت محسن دا قايلو أعظم مخلوق أنجبته النساء عشان تهدر فيه عمرك كدا وبالمجاان؟ لو بقيت علي فكرة إنتاج بوستاتك الخاصّة، وكل يوم بوست التهميز والتغميز علي زول، يوم للفكي محسن، وتاني للفكي حسن موسى، موافق تب، خلاص جَبُر يا زول، والعافية تتقدّمك شقيش ووين ما تقبّل، الحرية نورٌ ونارٌ في بلاداً كُتُر، أما في مجتمع زي حقنا دا، فـ"قَدَحٌ" و"رماد"، من مثلنا السوداني الأصيل: دا الرماد، ودا قَدَحو ----------- محمّد أخوي، هلاهلا علي الجد، بعد كلامي الفوق دا، ما فضل معاي -وحاة ربي- ولا مثقال ذرة لحلول معاك، لو هدفك بالفعل تقويم الكتابة هي مقترحاتي أعلاه بصددها، ووحاة أمي الأعزّ شيء عندي، ما عندي شبر بتاع فضل لقدّام أمشيهو معاك أبعد من هنا، فلا تلمني بعدها فيما تملك، ولا أملك -------------- صاحبي الحسن، الكتاب لسع ما وصلني، قلت أتم هرجتي مع ود سليمان دا في الفَرَقة دي،.. .. (عدل بواسطة محسن خالد on 02-12-2007, 02:49 AM) (عدل بواسطة محسن خالد on 02-12-2007, 02:49 AM)

العنوان	الكاتب	Date
هجاء الروائي الحسن البكري	محسن خالد	01-24-07, 09:31 PM
Re: هجاء الروائي الحسن البكري	Omar Bob	01-24-07, 10:02 PM
Re: هجاء الروائي الحسن البكري	محسن خالد	01-25-07, 05:24 AM
Re: هجاء الروائي الحسن البكري	محسن خالد	01-25-07, 05:29 AM
Re: هجاء الروائي الحسن البكري	عبدالرحمن عزّاز	01-25-07, 05:45 AM
Re: هجاء الروائي الحسن البكري	محمد سنى دفع الله	01-25-07, 06:09 AM
Re: هجاء الروائي الحسن البكري	محسن خالد	01-25-07, 01:57 PM
Re: هجاء الروائي الحسن البكري	محسن خالد	01-25-07, 02:09 PM
Re: هجاء الروائي الحسن البكري	Khalid Kodi	01-25-07, 06:16 AM
Re: هجاء الروائي الحسن البكري	محسن خالد	01-25-07, 02:17 PM
Re: هجاء الروائي الحسن البكري	نادر	01-25-07, 07:07 AM
Re: هجاء الروائي الحسن البكري	عبدالمنعم الرزوقي	01-25-07, 07:24 AM
Re: هجاء الروائي الحسن البكري	محسن خالد	01-25-07, 02:19 PM
Re: هجاء الروائي الحسن البكري	محسن خالد	01-25-07, 02:30 PM
Re: هجاء الروائي الحسن البكري	مجاهد عبد الرحمن	01-25-07, 10:35 AM
Re: هجاء الروائي الحسن البكري	محسن خالد	01-25-07, 03:04 PM
Re: هجاء الروائي الحسن البكري	مجاهد عبدالله	01-25-07, 03:19 PM
Re: هجاء الروائي الحسن البكري	طارق جبريل	01-25-07, 03:42 PM
Re: هجاء الروائي الحسن البكري	وليد محمد المبارك	01-25-07, 04:41 PM
Re: هجاء الروائي الحسن البكري	محسن خالد	01-25-07, 05:03 PM
Re: هجاء الروائي الحسن البكري	محسن خالد	01-25-07, 05:15 PM
Re: هجاء الروائي الحسن البكري	محسن خالد	01-25-07, 05:17 PM
Re: هجاء الروائي الحسن البكري	وليد محمد المبارك	01-25-07, 05:34 PM
Re: هجاء الروائي الحسن البكري	معتصم دفع الله	01-25-07, 05:43 PM
Re: هجاء الروائي الحسن البكري	عبدالله الشقليني	01-25-07, 06:03 PM
Re: هجاء الروائي الحسن البكري	محسن خالد	01-25-07, 06:12 PM
Re: هجاء الروائي الحسن البكري	محسن خالد	01-25-07, 06:15 PM
Re: هجاء الروائي الحسن البكري	محسن خالد	01-25-07, 06:24 PM
Re: هجاء الروائي الحسن البكري	محسن خالد	01-25-07, 08:23 PM
Re: هجاء الروائي الحسن البكري	محسن خالد	01-25-07, 09:11 PM
Re: هجاء الروائي الحسن البكري	الجندرية	01-25-07, 09:04 PM
Re: هجاء الروائي الحسن البكري	ودرملية	01-25-07, 11:12 PM
Re: هجاء الروائي الحسن البكري	Adil Isaac	01-26-07, 03:27 PM
Re: هجاء الروائي الحسن البكري	خالد عويس	01-26-07, 04:06 PM
Re: هجاء الروائي الحسن البكري	Adil Osman	01-26-07, 04:17 PM
Re: هجاء الروائي الحسن البكري	محسن خالد	01-26-07, 07:46 PM
Re: هجاء الروائي الحسن البكري	محسن خالد	01-26-07, 07:48 PM
Re: هجاء الروائي الحسن البكري	محسن خالد	01-26-07, 07:50 PM
Re: هجاء الروائي الحسن البكري	محسن خالد	01-26-07, 07:52 PM
Re: هجاء الروائي الحسن البكري	Masoud	01-26-07, 07:53 PM
Re: هجاء الروائي الحسن البكري	محسن خالد	01-26-07, 07:55 PM
Re: هجاء الروائي الحسن البكري	محسن خالد	01-26-07, 08:48 PM
Re: هجاء الروائي الحسن البكري	محسن خالد	01-27-07, 05:01 AM
Re: هجاء الروائي الحسن البكري	خضر حسين خليل	01-27-07, 09:29 AM
Re: هجاء الروائي الحسن البكري	حيدر حسن ميرغني	01-27-07, 11:02 AM
Re: هجاء الروائي الحسن البكري	mutwakil toum	01-27-07, 12:14 PM
Re: هجاء الروائي الحسن البكري	محسن خالد	01-27-07, 10:59 PM
Re: هجاء الروائي الحسن البكري	محسن خالد	01-27-07, 11:01 PM
Re: هجاء الروائي الحسن البكري	munswor almophtah	01-28-07, 00:20 AM
Re: هجاء الروائي الحسن البكري	mutwakil toum	01-28-07, 04:30 AM
Re: هجاء الروائي الحسن البكري	Adil Osman	01-31-07, 09:44 PM
Re: هجاء الروائي الحسن البكري	أبو ساندرا	01-31-07, 11:56 PM
Re: هجاء الروائي الحسن البكري	Masoud	02-01-07, 00:20 AM
Re: هجاء الروائي الحسن البكري	عبدالله الشقليني	02-03-07, 00:07 AM
Re: هجاء الروائي الحسن البكري	Elmosley	02-04-07, 06:03 PM
Re: هجاء الروائي الحسن البكري	محسن خالد	02-08-07, 01:57 AM
Re: هجاء الروائي الحسن البكري	محسن خالد	02-08-07, 02:03 AM
Re: هجاء الروائي الحسن البكري	محسن خالد	02-08-07, 02:22 AM
Re: هجاء الروائي الحسن البكري	Adil Isaac	02-08-07, 04:14 AM
Re: هجاء الروائي الحسن البكري	bayan	02-08-07, 05:21 AM
Re: هجاء الروائي الحسن البكري	محسن خالد	02-08-07, 09:16 PM
Re: هجاء الروائي الحسن البكري	محسن خالد	02-09-07, 06:56 AM
Re: هجاء الروائي الحسن البكري	مجاهد عبدالله	02-09-07, 07:40 AM
Re: هجاء الروائي الحسن البكري	Hussein Mallasi	02-09-07, 12:30 PM
Re: هجاء الروائي الحسن البكري	saif basheer	02-09-07, 03:31 PM
Re: هجاء الروائي الحسن البكري	Mohamed E. Seliaman	02-09-07, 03:20 PM
Re: هجاء الروائي الحسن البكري	Mohamed E. Seliaman	02-09-07, 03:46 PM
Re: هجاء الروائي الحسن البكري	Mohamed E. Seliaman	02-09-07, 04:09 PM
Re: هجاء الروائي الحسن البكري	Mohamed E. Seliaman	02-09-07, 05:09 PM
Re: هجاء الروائي الحسن البكري	محسن خالد	02-09-07, 06:51 PM
Re: هجاء الروائي الحسن البكري	Marouf Sanad	02-09-07, 09:37 PM
Re: هجاء الروائي الحسن البكري	Mohamed Elboshra	02-09-07, 10:20 PM
Re: هجاء الروائي الحسن البكري	Mohamed E. Seliaman	02-10-07, 07:14 AM
Re: هجاء الروائي الحسن البكري	bayan	02-10-07, 07:55 AM
Re: هجاء الروائي الحسن البكري	Mohamed E. Seliaman	02-10-07, 08:09 AM
Re: هجاء الروائي الحسن البكري	Mohamed E. Seliaman	02-10-07, 08:32 AM
Re: هجاء الروائي الحسن البكري	Hussein Mallasi	02-10-07, 08:46 AM
Re: هجاء الروائي الحسن البكري	Mohamed E. Seliaman	02-10-07, 10:08 AM
Re: هجاء الروائي الحسن البكري	Mohamed E. Seliaman	02-10-07, 11:47 AM
Re: هجاء الروائي الحسن البكري	mutwakil toum	02-10-07, 12:59 PM
Re: هجاء الروائي الحسن البكري	Mohamed E. Seliaman	02-10-07, 02:37 PM
Re: هجاء الروائي الحسن البكري	محسن خالد	02-10-07, 05:30 PM
Re: هجاء الروائي الحسن البكري	محسن خالد	02-10-07, 09:07 PM
Re: هجاء الروائي الحسن البكري	محسن خالد	02-11-07, 02:58 AM
Re: هجاء الروائي الحسن البكري	محسن خالد	02-11-07, 06:58 AM
Re: هجاء الروائي الحسن البكري	isam ali	02-11-07, 08:32 AM
Re: هجاء الروائي الحسن البكري	محسن خالد	02-11-07, 08:46 AM
Re: هجاء الروائي الحسن البكري	محسن خالد	02-11-07, 11:17 AM
Re: هجاء الروائي الحسن البكري	Mohamed E. Seliaman	02-11-07, 02:50 PM
Re: هجاء الروائي الحسن البكري	محسن خالد	02-12-07, 02:17 AM
Re: هجاء الروائي الحسن البكري	محسن خالد	02-12-07, 03:48 AM
Re: هجاء الروائي الحسن البكري	isam ali	02-12-07, 07:56 AM
Re: هجاء الروائي الحسن البكري	محسن خالد	02-12-07, 09:50 PM
Re: هجاء الروائي الحسن البكري	محسن خالد	02-12-07, 09:50 PM
Re: هجاء الروائي الحسن البكري	محسن خالد	02-12-07, 09:50 PM
Re: هجاء الروائي الحسن البكري	haider osman	02-12-07, 09:35 PM
Re: هجاء الروائي الحسن البكري	3mk-Tango	02-12-07, 09:37 PM
Re: هجاء الروائي الحسن البكري	isam ali	02-13-07, 00:27 AM
Re: هجاء الروائي الحسن البكري	حيدر حسن ميرغني	02-13-07, 04:07 AM
Re: هجاء الروائي الحسن البكري	Shinteer	02-13-07, 06:43 AM
Re: هجاء الروائي الحسن البكري	محسن خالد	02-13-07, 05:04 PM

[رد على الموضوع]

صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]