الديوم الشرقية :{ مهبط الوعي والفن وقلعة نضال ومرتع جمال }

Quote: ضحكة صدق هدأ حيلي طول سكة السفر البعيدة عن عيونك ياوطن. ومقيل قلبي في شقى البعاد ليل غرية. لابس سواد ظلامو حداد. وفارش نجومو ليك مأتم. ونار الشوق قائداها محن. وحاجات تجنن. كل المساحات من دونك سجن. ولقيت هنا النفاق قائم بين الصحاب شجر عشر. بي وشين ومادي في سرو لسانو للمطر. انتهازية وسخف مثقفاتية تجار نضال متمرين جزمابي عرق الغبش. وقاشرين بي قضيتك حتى كمان علام الصغار. لمة شوك في زهرة بستان. واقفين وراء بابك شمتانين. جالسين حول ضريحك نواح وجواهم مبتسمين. وبائعنك للناس في منبر سوق عكاظ. زيف كلام داقين جرس نضال وخادعنك بي ضجيج طنين الوهم. واحنا الكم كنا شائلنك كم. بين رموش عيون الحبيبة هم. نازل فوق جرح جبينك دمعةحزن ممزوجة بي مرارت ملح وجع الالم. واتوسدنا ترابك من التعب حضن. وانشدنا غنوة لقاك بي طبلة عز داقة في جوف الخوف. وكاتمة نباح كلاب الامن. وشفتك في خاطر فرح الرجوع حلم. وكتين اصل. مرسوم في ملامح ضحكة اشواق حبيبة. ومشدود حبل الوصل بيني وبينك وتر ريد مدوزن. علي نغم لعب اطفال. تبني من طينك في الغيب للحب مدن. وقمر ليلك قاعد في السكون. يمشط ضفائر زعف النخل بالضؤ. وشمس صباحك طالعة مبتسمة. وراقدة علي حجر امي. من التعب تنجم. وتغرف بايدها من نيلك. تغسل وجيها وتشطف رجليها ومن غبار وسخ السفر في موجو تنحم. واجلس في العصاري تحت ضل نيمة. وتحت قعر حيطة في ركن شارع. معاي رفاقي بالجد. ونقهوج في جبنة حب. ومتوسدين الاحمر جدلة عرسك. مزخرفة بالبنفسج. ونقالدفي وقت الاصيل. شجن عناء الطير. وجزن صوتو مره بالضحك ومره بالنضم. ونأخز من الديالكتيك وعي. لي عرق الزول الجاي راجع من الشغل. تفاصيل شقى اليوم حر الشمس هم العيال فسرنا همو بي فهم. ونغازل عيون الفراش بالرحيق ساعة يمر علينا في الحلم. وانا الجائك راجع مع الانسام وفاتح ليك صدري وكلو جراح وفارد ايدي شراع مركب شوق. لي جناح الريح ومباري السحاب خطوات في دربك. وراي قدامي اهت اشواق حبيبة. متبتبة بغناها حزن القلب. ومسكنا بي طرب موسيقة حروفا ودار الم الجرح ضنى البعاد في لحظة لقاك. مادي الحبيبة الكنت داسيها في عيون للزمن. مأخزه من ملامحك. خبيتا بين الغيم والارض. بشارة مطر لحن دوبيت نم حصاد للزرع. نسمة دعاش عز الحر طلاطف بالندى خد الورد. ماسحة بالخضار حزن الارض. وضحكت صدق نابعة من فرح القلب. مهدية ليك ياوطن. ساعة اصل 3/7/2007