|
Re: القبول بالخسارة (Re: عليش الريدة)
|
لغز سيدي الحسن عطا رجل خمسيني،يعيش في قرية من قرى الشمال،أكمل الأولية وشيئا من الوسطى ثم تجول في مدن السودان حينا من الدهر بحثا عن المعيشة العصية وعاد إلى قريته قبل سنوات قليلة..يحب الاطلاع والنقاشات النوعية،ملم دوما بالأحداث العالمية وحوايا نشرات الأخبار،يشجع المريخ وبرشلونة ومن أوائل الناس في القرية استخداما للقنوات المشفرة والجوالات الجلاكسي ومؤسس قروب القرية في الواتساب.. علاوة على تداعيات أخرى قد تنمو في خيالك فيما يخص هذا الاتجاه،وإن كنت أيضا ـــ في هذا الاتجاه ـــ تستطيع التأقلم مع تلك النظريات الذهبية التي تندلق بغزارة من أفواه أنصاف المتعلمين كما تندلق بسخاء نحسد نحن عليه،وتحديدا على أمهات رؤوسنا ــ رؤوسنا خاصة من دون رؤوس جميع العالمين ــــ جلفوطات الحزب الحاكم الرعّاد،التي تتزين حواشيها بكل تلك الحناجر الجاهزة أبدا للصياح المنكر المؤذي الذي لديه قدرة على التسبب بالألم حتى للآذان الصماء..نعم،إنه السوبر ألم،أو الانفجار الألمي العظيم،أو الألم عن طريق الغمر ألما..أقول،على ذلك كله،يمكنك بقليل من التنازلات اعتبار أن عطا رجلٌ تقدميٌ.. في فترته الأخيرة صادف نجاحا اقتصاديا لافتا جعل منه صديقا لوجهاء القرية ومساكينها على السواء،وهذه حالة من التراضي بالغة الندرة..في الواقع الناس على الدوام يستهينون عامدين بقدرتهم على التذكر،فقد كان عطا طيلة عمره في وجوده أو غيابه مضربا للمثل عن الفقر والحظ الشرس ذي المخالب والأنياب التي تشبه حيوانات عصور ماقبل الانسان، أعني عصور الحيوانات التي سبقت هذا الحيوان الأغبى على الإطلاق..عندما ألمت بعطا تلك الصدف الثرية المتتالية وجعلته أخيرا الصديق المفضل للوجهاء والمساكين معا،قال حمدوك،وهو أشهر فقير في القرية والقرى المجاورة:بعد عطا روّق تاني أصلي ماخايفلي من فقر،الزول دا كان فقرو متل فقري،معناتو الدور بجيني.. لكن الناس وبما أوتوا تلك الأنصبة المهولة من الاستهانة بالذواكر،صاروا يعاملون عطا وكأنه ورث ثروته هذه جد عن جد منذ عهد الكنداكة شرشرشوت العظيمة على أقل تقدير..لكن كل هذا الكلام لاعلاقة له بما نود قوله هنا..أنا هنا أود أن أنقل لكم وباختصار شديد،واحدا من سجالاتي العديدة مع هذا الكهل.. قال: الحمدلله بعد ربنا بسطني،بقيت أمشي عمرة رمضان كل سنة،ياسلام على عمرة رمضان، رمضان في الحرم متل عيد الضحية عندكم،والله المامشى عمرة رمضان لامشى ولاجا.. دحين إت آعليش مشيت عمرة رمضان قبال دا؟ :أوفر.. :أوفر ياكبير؟ :أوفر :سمح خلها عمرة رمضان،حصل مشيت عمرة في أي شهرا عربي آخر؟ :أوفر.. :سمح إت البقعدك مع وجهاء الدولة شنو؟ ماتمشي تشوف الناس الكشا مشا،مُن مالين البلد.. :كُب..سلام عليكم.. :أقيف،عليك النبي تقيف.. :الطنقعة عرفناها،كمان الليلة جابتليها عكيم بالجنبة.. :ياخي أنا خسمتك بالنبي،دا أحكيلك قصة خالتي نفيسة ياخ.. :عليه الصلاة والسلام.. :الله يفتح عليك آلمبروك..أها،بعد مشيت المرّة الأولى والتانية بقيت كمان أسوق أخواتي الكبيرات،ظروف رجالن صعبة ياخي،أولادن زاتم ماعندهم عمار،أها كل سنة بسوق واحدة أو اتنين حسب الموقف،شوية كدا كمان ناس الحلة بقوا يودوا حريمن الكبيرات مع فوجي الصغير دا..يجهزوا ليهن الورق والنثريات كلها وأنا بستلمن يوم التحرك لبورتسودان ونمشي بوكالة واحدة كلنا..هسع من كلامي معاك دا أنا مشيت تلات مرات أميرا مفوجا على هؤلاء النسوّن الدائشات،المرتين الأوائل عدن على خير،لكن المرة الأخيرة دي حصلت فيها مشكلة خالتي نفيسة.. واصل قائلا: طبعا هي ماخالتي لزم لكن عندها رحما مع أمي،أولادا مجتهدين شوية،سلموني ورقا من بدري واتحركت معانا في الفوج..لمن وصلنا الحرم وانتهينا من اجراءات العمرة بقينا متمتعين هناك كم يوم لغاية مايجي زمن السفر للمدينة،طبعا لأني مابكون مع الحرّوم ديل باستمرار،عشان كدا كان عندي اجراءات وقائية استباقية قعد أعملا،يعني مثلا بكتب رقم تلفوني في ورقة وبديهو لأي واحدة عشان إذا راحت تديهو لأقرب سوداني عشان يتصل علي..الشي التاني كنت بوصفلهن باستمرار وبوريهن الاتجاهات وخاصة اتجاه الباب البودي لشارع الفندق،وكمان كنت محددلهن حتة معينة في الحرم نتجمع فيها بعد أفارقن..لكن الحاجات دي كلها مانفعت مع نفيسة..وأنا دايما بقول عدم الموبايل هو المشكلة،نسوانا الكبيرات مابعرفنلو ومابدورنو،نفيسة تحديدا ماكان عندها تلفون..نفيسة راحت قبل تلاتة يوم من ميعاد سفرنا للمدينة،عدت يومين كاملات رايحة وجزء كبير من اليوم التالت..في اليوم داك أنا مشيت السوق وخليتن في الحرم،بعدما جيت ضربت تلفون لآسيا أختي عشان تكش النسوان تجيبن في المكان البنتقابل فيهو عشان نمشي الفندق سوا..شوية كدي،النسوان جن لكن نفيسة ماكانت معاهن..ياآسيا وينا نفيسة؟..ماني خابراها..كيفن ماك خابراها،أنا محرسك بصل؟..هسع ديا كانت معانا.. أها ياشاب ياجذاب،طوالي قلت للنسوان أقعدن قبلكن دا،مافي واحدة فيكن تتحرك ولاشبرا واحد..ومشيت قلبت الحرم دا قلب..ولفيت الدائرة الخارجية،وغشيت مراكز المفقودين والمتطوعين التانين،لكن دا كلو بلافائدة..لامن رجعت للنسوان كانت الساعة قريب من 11مساء..لقيتن مهمومات ودميعاتن جاريات..أول حاجة سألت العندهن موبايلات،حدثتن زول؟ قالن لا..قلتلن جيبن التلفونات..جمعت منهن الموبايلات ووديتن الفندق..بعدما وصلتهن قلتلن مافي مرقة من هنا نهائي،بلغت ناس الوكالة ورجعت للحرم..قضيت الليل كلو حركة،إظن نمتلي فرد ساعة ولاشي،وتاني يوم برضو حوامة،واليوم التالت لغاية قريب ميعاد صلاة الظهر..لكن مافي أي فائدة..ناس الوكالة محددين الساعة واحدة ظهر للحركة للمدينة من أمام الفندق..باختصار،أنا كنت بمر بأزمة نفسية عجيبة جدا،أكلمك بصراحة،حياة نفيسة وسلامتا كانت بتهمني طبعا،لكن تفكيري الكبير كان كيف أنا أدقس دقسة زي دي؟ ياخي أنا زول مستنير وعارف العالم دا كلو،يغلبني أحافظ على نفيسة..والله ياعليش،وزني في التلاتة يوم ديل أظنو نقص عشرة كيلو..ياخي دي كانت أيام عصيبة أنا مابنساها عمري كلو..مع الساعات الأخيرة يئست تماما من عودتا،قلت أمشي أجيب النسوان يصلّن حبة،وبعداك أكلم أهلا ونشوف البحصل شنو تاني..فعلا مشيت جبت النسوان،ومريت تاني في الحرم وحولو،لكن برضو مالقيتا..بعد شوية ضربوا لي ناس الوكالة،قالوا الناس كلها جات وجاهزة للسفر،إنتو وين؟..خلاص،في اللحظة ديك إتيقنت تماما،وطوالي قفلت التلفون وضغطت رقم ولد نفيسىة دا أكلمو..لكن فجأة كدي غيرت رأيي،جاني شي كدي متل الإلهام،قلت النعمل جولة أخيرة..بس من مكاني داك ولفيت دايرة يمين..بس الساعة الأجيلك فيها قصاد حمامات النسوان وألمحلك نفيسة..ياخي ديك ماكانت لحظة عجيبة..بس لقطتها مع دخلتا للباب الكبير ألول الحمامات..يعني لو إتاخرت ثانية واحدة كانت فاتت مني..ثانية شنو؟ثانية زاتا كتيرة..أنا لمن شفتها ولا شفتها كويس،شفت بس طرف توبا وهي داخلة.. وصيحتلا:خالتي نفيسة.. لكنا ماسمعتني..بس وأجريلك وراها توش لحمامات النسوان،لاقاني سعودي ماني خابرو حرس ولاجا بالصدفة،قعد يصيح:يارجال،يارجال.. بس ونهرتو ليك:ياخي ماتغور بلا رجال بلاكلام فارغ معاك.. لكنو جا جاري وراي،أها لمن خشيت لقيت النسوان كتيرات واقفات في الصف،وميزت نفيسة وصيحتلا،والله الساعة الجات جارية وعمتتني،لاحول ولاقوة إلا بالله.. كانت بتبكي زي الغلام الصغير وتصيح أحمدك ياالله،أحمدك ياالله.. السعودي طوالي رجع،مافتح خشمو ولا بكلمة..طوالي سقتها ومرقنا برّا.. :إت ماأخدتلك بكية؟ :إت متخلف؟وأفرض بكيت شنو يعني؟ :طيب واصل.. :كانت عليها حالة مزرية جدا،كانت واقفة وترفع في رجليها وتنزلن،عاينتلا تحت لقيتها حفيانة،طبعا سراميك الحرم بالنهار حار جدا..قلتلا:وين نعلاتك؟ قالت:ودرن مني ليهن يومين.. طوالي ملصت نعلاتي أديتن ياها..قلتلا: أمشي خشي الحمام..قالت:آبدورو بعدّا..خلو بعد نمشي الفندق.. إنت عارف ياحبيبنا أنا قصيتلك القصة دي ليه؟ :لا ماعارف.. :تخيل المرة دي قالتلي شنو؟ :شنو؟ :قالت:والله ياعطا،أنا من ودرت بنده في سيدي الحسن،خابراك بتلقاني،أصلو ماجاني شك.. عارف المفارقة وين ياعليش؟المفارقة إنها بتدعو سيدا الحسن،وبعدّا ربنا بستجيب ليها..مركز معاي إنت في التوقيت المثالي اللمحت فيهو نفيسة..توقيت محسوب بأجزاء الثانية..طبعا لو مالمحتها هي كانت ماح تموت،لأنها استل عائشة،لكن احتمالات الضرر كانت واسعة جدا،فاهمني إنت،فاهمني؟ :أوفر.
|
|
|
|
|
|
|
العنوان |
الكاتب |
Date |
المطّاط. | عليش الريدة | 07-05-18, 09:55 PM |
Re: القبول بالخسارة | عليش الريدة | 07-06-18, 01:45 PM |
Re: القبول بالخسارة | عليش الريدة | 07-09-18, 09:21 PM |
Re: القبول بالخسارة | عليش الريدة | 07-09-18, 10:46 PM |
Re: القبول بالخسارة | نيمو | 07-10-18, 03:09 AM |
Re: القبول بالخسارة | عليش الريدة | 07-10-18, 05:29 AM |
Re: القبول بالخسارة | عليش الريدة | 07-10-18, 01:06 PM |
Re: القبول بالخسارة | عليش الريدة | 07-12-18, 11:07 AM |
Re: القبول بالخسارة | عليش الريدة | 07-13-18, 03:33 PM |
Re: القبول بالخسارة | عليش الريدة | 07-18-18, 09:41 PM |
Re: القبول بالخسارة | عليش الريدة | 08-10-18, 08:57 PM |
Re: القبول بالخسارة | عليش الريدة | 09-19-18, 10:01 PM |
Re: القبول بالخسارة | عليش الريدة | 09-21-18, 02:55 PM |
Re: القبول بالخسارة | عليش الريدة | 11-02-18, 08:52 PM |
Re: القبول بالخسارة | عليش الريدة | 11-03-18, 08:32 AM |
Re: القبول بالخسارة | عليش الريدة | 11-03-18, 11:00 AM |
Re: القبول بالخسارة | ابو جلمبو | 11-03-18, 02:12 PM |
Re: القبول بالخسارة | عليش الريدة | 11-03-18, 05:37 PM |
Re: القبول بالخسارة | بركلاوى | 11-04-18, 06:33 AM |
Re: القبول بالخسارة | عليش الريدة | 11-04-18, 10:38 AM |
Re: القبول بالخسارة | ATeF OMER | 11-04-18, 12:09 PM |
Re: القبول بالخسارة | عليش الريدة | 11-04-18, 12:39 PM |
Re: القبول بالخسارة | عليش الريدة | 11-05-18, 12:40 PM |
Re: القبول بالخسارة | ابو جلمبو | 11-06-18, 02:47 PM |
Re: القبول بالخسارة | ابو جلمبو | 11-06-18, 05:26 PM |
Re: القبول بالخسارة | عليش الريدة | 11-06-18, 06:36 PM |
Re: القبول بالخسارة | ابو جلمبو | 11-08-18, 02:08 PM |
Re: القبول بالخسارة | عليش الريدة | 11-09-18, 06:52 PM |
Re: القبول بالخسارة | جلالدونا | 11-09-18, 07:27 PM |
Re: القبول بالخسارة | عليش الريدة | 11-09-18, 07:36 PM |
Re: القبول بالخسارة | أبو جلمبو | 11-10-18, 12:10 PM |
Re: القبول بالخسارة | عليش الريدة | 11-10-18, 01:53 PM |
Re: القبول بالخسارة | عليش الريدة | 11-13-18, 09:29 PM |
Re: القبول بالخسارة | عليش الريدة | 11-14-18, 04:08 PM |
Re: القبول بالخسارة | عليش الريدة | 11-14-18, 08:02 PM |
Re: القبول بالخسارة | عليش الريدة | 11-15-18, 02:41 AM |
Re: القبول بالخسارة | عليش الريدة | 11-25-18, 08:00 PM |
Re: القبول بالخسارة | تماضر الطاهر | 11-27-18, 08:39 AM |
Re: القبول بالخسارة | عليش الريدة | 11-27-18, 12:43 PM |
Re: القبول بالخسارة | تماضر الطاهر | 11-27-18, 06:10 PM |
Re: القبول بالخسارة | عليش الريدة | 11-27-18, 06:49 PM |
Re: القبول بالخسارة | تماضر الطاهر | 11-27-18, 09:09 PM |
Re: القبول بالخسارة | عليش الريدة | 11-29-18, 07:11 PM |
|
تعليقات قراء سودانيزاونلاين دوت كم على هذا الموضوع:
at FaceBook
|
|