|
|
 Re: حول تعديلات د. عمر القراي في الفكرة الجمهو (Re: Yasir Elsharif)
|
الحلقة الثانية ..
* لاى مدى يا يوسف كان إرتباطك بالكنيسة وإنت ما تزال مسيحياً؟.
+ كان إلتزامي وليس ارتباطي وحده ،، كان على مستوى عالي ،، وكنت أنتمي في الكنيسة لما يسمى رابطة Legion Of Mary وترجمتها الجيش المريمي ، هؤلاء ليسوا قسساً أو راهبات لكنهم يقومون بعمل ومهام الكنيسة ، كنا نزور المرضى ونقف على أحوال العجزة وخلافه .
* أهو تنظيم مسيحي إصلاحي يعني؟
+ نعم تقدر تقول هو كده ،، وهو تنظيم عالمي موجود بكثرة في أوربا خاصة ،، موجود هنا في أستراليا ، وموجود في آيرلندا وكندا وأمريكا وغيرها وكان موجود في السودان برضو.
* وكان بضم عدد من الشباب المسيحي من الجنسين برضو في السودان ؟
+ نعم كلهم ،، وبرضو عدد من الجنوبيين ومن جبال النوبة .
* هل كان عندك منصب في التنظيم ؟
+ أذكر عقد اجتماع عام لاختيار رئيس لمنطقة الخرطوم وأم درمان للتنظيم ،، وده كان منصب
في داخل الكنيسة وليهو معنى.. ما متذكر إذا كان هناك مرشح نزل معاي ، بس بتذكر إنو تم انتخابي بالاجماع من قبل الشماليين والجنوبيين في المنصب الكنسي.. أنا بطبعي كانت لي آراء بخصوص أشياء ظاهرة في الكنيسة ولا تعجبني وبعبر عن رفضي ليها .
* إنت يا أستاذ يوسف هل كنت متدين بطبعك؟
+ نعم كنت متدين ،، عندنا في الكنيسة قداس أول جمعة في كل شهر وكنت أحرص على حضوره ،، وهناك قداس تحضره كمتدين ملتزم لمدة تسعة مرات في كل يوم سبت أو أحد ،، يعني مش تدين وبس ،، بل كان في التزام .
* والحاجات اللي ما كانت عاجباك زي شنو مثلاً؟!
+ أشياء أنا ما مقتنع بيها ،، ما حا ندخل في تفاصيل الأشياء دي ،، وهي أشياء مهمة لو واجهت الكنيسة اليوم أو الكنيسة واجهتها،، لكانت الكنيسة أفضل مما هي عليه اليوم!. ،، رغم التحسنات اللي حصلت في الكنيسة من الوكت داك ،، باختصار ما كان عندي مشكلة كبيرة مع الكنيسة ،، أنا كان في ذهني إنو التغيير يحصل ما كنت متمرد على الأوضاع داخل الكنيسة بس كانت عندي آراء.
* لو سمحت في الجزئية دي ،، ما كنت تنشده في وضعية الكنيسة ،، هل كان على المستوى الاجتماعي أم الديني؟.
+ كلو!. على المستوى الديني لابد من أشياء بعينها تطرح بوضوح أكتر ولا زم يكون حولها نقاش أوضح ،، وعلى المستوى الاجتماعي هناك أشياء بعينها ما كانت مقبولة لدي ، منها قبل كل شئ ، بتذكر زار كاردينال محدد السودان، والكرادلة ديل هم أمراء الكنيسة، الناس وقفوا ليهو صفوف عشان كل واحد يتقدم ليهو ويبوس الخاتم تبعو في إصبعو!،، أنا رفضت ،، والخاتم في الأعراف الكنسية يمثل سلطة ،، قلت ليهم نعم أنا أتبع تعاليم المسيح لكين ما ببوس يد زول! ،، حتى أنا تسائلت حول اللبس والزي زاتو .. هل وكت المسيح موجود الناس ديل كانوا بلبسو كده والقصة شنو بالضبط؟! ،، لاحظ إنها كلها شكليات ما مهمة من ناحية دينية ،، لكنها مهمة من ناحية تانية ،، (Expression of Authority) يعني مسألة بتاعت سلطان وهيبة.
* بمعنى محاولات لاضفاء قدسية ما؟
+ نعم هي كده ،، وأنا مش كنت عارف إنو نفس آرائنا دي كانت متبنياها جماعات واسعة في حتات كتيرة حول العالم ،، ودلوكتي الموضوع ده أصبح شئ طبيعي في الكنيسة!.
* يعني أصبح إتجاه أو أفكار سائدة في المجتمعات المسيحية الكنسية؟
+ نعم أصبحت كده ،، ومن الأشياء دي إنو البابا الحالي ده ،، البابا فرانسيس ده ،، لمن أنتخب ، كسر الخاتم بتاعو ورفض إنو الناس يجو ينحنو قدامو وكده، وأبعد كتير من المظاهر اللي كان الناس بعترضو عليها ،، وفي ظاهرة تانية ، هي إنو أصبح يلبس ملابس بيضاء مبسطة! ،، المهم ده في حد ذاتو تغيير ورغم إنو مش كبير ولكنو تغيير!.
* يعني نقدر نقول إنو مفاهيم تمردك على بعض الأوضاع الاجتماعية والدينية الكنسية نفسها كانت تتبناها جماعات واسعة من المتدينين المخلصين في أماكن واسعة لدرجة أن البابا الجديد تبناها وعمل من أجل تصحيحها نزولاً على رغبة هذا القطاع الواسع من المتدينين؟!.
+ نعم ،، هذا ما كان يحصل في مناطق كثيرة في العالم كما هو واضح ،، ولكن بالنسبة لي أنا مع أتباع الكنيسة السودانيين في السودان ، ما شعرت إنو كان عندي وازع البحث عن خلاص آخر سوى تعاليم المسيح وتوجهات الكنيسة ،، فأنا كنت إبن الكنيسة المخلص!.
* هل بتمردك – وخلينا نسميهو كده – وتكون الشكل الجنيني للثوري في دواخلك ، أهو نتاج أو تأثير بما أطلق عليه لاهوت التحرير كشكل من أشكال التمرد الثوري على الكنيسة الطبقية في فترة من فترات المد الثوري العام في العالم ،خاصة في لاتين أمريكا؟!.
+ ده جاء لاحقا وكده (Liberation Theology) ،، أنا قريت عنو وتعرفت بيهو ،، ممكن تقول إنو حمل بعض ما كنت أعبر عنه وأحملو من أفكار ،، بس زي ما قلت ليك ما كنت بفكر في أي شئ آخر.
* يعنى إنت كنت حتى الوكت داك إبن الكنيسة وحامل تعاليمها ومفاهيمها ولا تبحث عن خلاص إلا من داخلها ؟!.
+ نعم ،، دا أنا ،، وفي تلك الفترة كان في مؤتمر دعا له البابا الثالت والعشرين (The second Vatican Council)دعا له الجميع ومش فقط كرادلة الفاتيكان، وشمل كل المطارنة بما فيهم مطران الخرطوم ،، يعني حوالي 4000 مطران وكاردينال ،، ده كان في الستينات ،، ومن قراراتهم المهمة ضرورة التغيرات الجذرية مع المسلمين واليهود وكافة الملل وبقية العالم وداخل الكنيسة نفسها ،، فقرارات مؤتمر الفاتيكان التاني ورغم أنها تسير بخطى بطيئة نحواً ولكنها تطبق بعض الشيئ ،، من بين أهم هذه القرارات والمراجعات أن اليهود لم يكونوا مقبولين لدى المسيحيين! ،، نعم مقبولين كبشر ولكن كأهل كتاب فما في كلام زي ده وحصل تغيير ،، وبالنسبة للمسلمين كانوا يقولون ما فيهو حاجة روحية ولكنها طبيعية ،، وما هو مقبول عند المسيحيين كما عندهم وتغير هذا المفهوم ،، يعني أوجد أرضية مناقشات وتفاهمات مع اليهود والمسلمين من جانب وبقية الاتجاهات المسيحية الأخرى كالبروتستانت من جانب آخر. كانت المرأة التي تتزوج بروتستانتياً أو الرجل الذي يتزوج بروتستانتية يطردان من الكنيسة ! ،، ده بالنسبة لقوانين الكاثوليك ،، ده كلو مشى بحسب تطور المجتمعات واضطروا لقبول الكلام ده.
* في الثانوي والجامعة في الفترة ديك كان في نشاط ،، لياتو درجة كنت مرتبط بالنشاط ده سواء على المستوى السياسي أوالاجتماعي أو الفكري بشكل عام؟!.
+ في فترة الثانوي بتذكر قامت ثورة أكتوبر 1964،، أنا كنت في لجنة اتحاد الطلبة بكلية كومبوني وكان في واحد من ناس أبو جبل ما بتذكر إسمو بالضبط ،، فؤاد أبو جبل أو إسم زي ده من ناس أم درمان،، كان في الاتحاد معانا وساعدنا كتير،، إنفعلنا بالثورة وأصدرنا بيانات وتوجيهات ،، يعني شاركنا في ثورة أكتوبر ،، لمن جينا الجامعة إلتحقت بتنظيم إسمه المؤتمر الديمقراطي الاشتراكي ، ورئيسه إسمه مكاوي عوض المكاوي أصبح فيما بعد وزير في حكومة نميري ،، وكان في إسم تاني بإسم الجبهة الاشتراكية الديمقراطية، وده طبعاً غير الجبهة الديمقراطية المعروفة واللي بتضم جناح شيوعي وجناح ديمقراطي . وبتذكر رئيس الاتحاد تم انتخابه من الجبهة الديمقراطية الاشتراكية ،، كان عندي قدر من المفاهيم العامة حول إنو لازم الناس تعيش عيشة متساوية عن طريق تحقيق المجتمع الاشتراكي وليس الشيوعي ،، ولابد من الديمقراطية وما يكون في كبت وما يكون في قمع وما يكون في إرهاب ،، ده هو مفهومنا العام ، وبالفهم ده قبلنا الشيوعيين وبالمفهوم ده قبلنا جبهة الميثاق الاسلامي ! ،، وكان اتحاد الطلاب ،، ورغم إني كنت مهتم بهذا النوع من النشاط السياسي والاجتماعي إلا إني كنت مهتم أكتر بدراستي الأكاديمية ،، ولحدي الوكت داك كل البعرفو إنو بتذكر في زول إسمو محمود محمد طه جا الجامعة وقدم محاضرة ده كل الكنت بعرفو عن الجمهوريين !.
|
|
  
|
|
|
|
|
| العنوان |
الكاتب |
Date |
| حول تعديلات د. عمر القراي في الفكرة الجمهورية بقلم خالد الحاج عبد المحمود | خالد الحاج عبدالمحمود | 08-15-16, 08:55 PM |
| Re: حول تعديلات د. عمر القراي في الفكرة الجمهو | بدر الدين اسحاق احمد | 08-16-16, 07:02 AM |
| Re: حول تعديلات د. عمر القراي في الفكرة الجمهو | Yasir Elsharif | 08-16-16, 02:58 PM |
| Re: حول تعديلات د. عمر القراي في الفكرة الجمهو | MOHAMMED ELSHEIKH | 08-17-16, 04:59 AM |
| Re: حول تعديلات د. عمر القراي في الفكرة الجمهو | nasreldin | 08-17-16, 10:37 AM |
| Re: حول تعديلات د. عمر القراي في الفكرة الجمهو | Abdel Aati | 08-17-16, 12:46 PM |
| Re: حول تعديلات د. عمر القراي في الفكرة الجمهو | حافظ سليمان | 08-17-16, 02:27 PM |
| Re: حول تعديلات د. عمر القراي في الفكرة الجمهو | حافظ سليمان | 08-17-16, 02:39 PM |
| Re: حول تعديلات د. عمر القراي في الفكرة الجمهو | Yasir Elsharif | 08-17-16, 04:38 PM |
| Re: حول تعديلات د. عمر القراي في الفكرة الجمهو | Yasir Elsharif | 08-17-16, 05:00 PM |
| Re: حول تعديلات د. عمر القراي في الفكرة الجمهو | Yasir Elsharif | 08-17-16, 05:15 PM |
| Re: حول تعديلات د. عمر القراي في الفكرة الجمهو | Yasir Elsharif | 08-17-16, 05:42 PM |
| Re: حول تعديلات د. عمر القراي في الفكرة الجمهو | Yasir Elsharif | 08-17-16, 06:11 PM |
| Re: حول تعديلات د. عمر القراي في الفكرة الجمهو | Yasir Elsharif | 08-17-16, 07:20 PM |
| Re: حول تعديلات د. عمر القراي في الفكرة الجمهو | Yasir Elsharif | 08-17-16, 07:31 PM |
| Re: حول تعديلات د. عمر القراي في الفكرة الجمهو | Yasir Elsharif | 08-17-16, 07:48 PM |
| Re: حول تعديلات د. عمر القراي في الفكرة الجمهو | Yasir Elsharif | 08-17-16, 08:06 PM |
| Re: حول تعديلات د. عمر القراي في الفكرة الجمهو | Yasir Elsharif | 08-17-16, 08:51 PM |
 Re: حول تعديلات د. عمر القراي في الفكرة الجمهو | Yasir Elsharif | 08-17-16, 10:10 PM |
| Re: حول تعديلات د. عمر القراي في الفكرة الجمهو | حافظ سليمان | 08-18-16, 05:08 AM |
| Re: حول تعديلات د. عمر القراي في الفكرة الجمهو | محمد الزبير محمود | 08-21-16, 08:23 AM |
| Re: حول تعديلات د. عمر القراي في الفكرة الجمهو | حافظ سليمان | 08-21-16, 05:10 PM |
| Re: حول تعديلات د. عمر القراي في الفكرة الجمهو | حافظ سليمان | 08-21-16, 05:24 PM |
| Re: حول تعديلات د. عمر القراي في الفكرة الجمهو | MOHAMMED ELSHEIKH | 08-22-16, 04:55 AM |
| Re: حول تعديلات د. عمر القراي في الفكرة الجمهو | حافظ سليمان | 08-22-16, 12:06 PM |
| Re: حول تعديلات د. عمر القراي في الفكرة الجمهو | MOHAMMED ELSHEIKH | 08-22-16, 12:09 PM |
| Re: حول تعديلات د. عمر القراي في الفكرة الجمهوري | أنور عمار | 08-22-16, 01:38 PM |
| Re: حول تعديلات د. عمر القراي في الفكرة الجمهو | حافظ سليمان | 08-22-16, 03:07 PM |
|
تعليقات قراء سودانيزاونلاين دوت كم على هذا الموضوع:
at FaceBook
| |
Yasir Elsharif
فيس بوك
تويتر
انستقرام
يوتيوب
بنتيريست