- رجل بسيط عمل راعي غنم مع ابنه (محمد ) في اطراف جده. قانعا بما قسمه له الله من حلال.. دا كان قبل 15 سنة. - انهى محمد سعيه و رعيه ودخل عشته ونام في انتظار سعي اليوم التالي.. ولم يستيقظ ابدا.. ببساطة محمد مات. قتله تشادي طعنا ليسلبه 800 ريالا كانت في جيبه .. تحويشة عمره! - لملم المفجوع عمكم عبدالله احزانه على ولده القتيل وحاجياته القليلةع وغادر نهائيا الي الدويم.. قبل 15 سنة كما قلنا. وظل القاتل التشادي حبيسا في السجن انتظارا لحد السيف والقصاص.. - طوال كل هذه السنوات.. بدأت عمليات بحث كبرى عن عمكم عبدالله.... وتحركت جمعية حقوق الانسان في جدة وعثرت عليه اخيرا.. و استقدمته بزيارة صدرت من امارة مكة المكرمة. -وصل عمكم الي جدة لحضور القصاص من قاتل ولده. . وكما يحدث في مثل هذه الحالات تحركت حقوق الانسان لعل ابو القتيل يعفو مقابل الدية. - رقم على يمينه 5 اصفار بالريال السعودي حرر شيكه فاعل خير باسم عمكم عبدالله.. ولو طلب زيادة الاصفار الي 6 او سبعة لما تردد الخيرون في دفعه.. - ما داير ملين منكم.. عفيتو لله والرسول .. ادوني دقايق اشاور المرة(ام محمد).. فيهاتفها في السودان ويأتي الرد:لو اخدت ريال ما عاد تجي البيت عافيهو لله وللرسول. لم تخذله ام محمد .. - حاولت اللجنة اقناعه بان الشيك قد حرر وان فاعل الخير قد دفع.. عمكم عبد الله ثابت لا يتزحزح. - حين احضرته لجنة حقوق الانسان الي الجريدة انتحيت به جانبا: يا عم عبد الله.. الاصفار الخمسة تضربها في الجنيه شوف بتعمل كم.. فيرد :ماني داير.. علي الطلاق محتاجو تب.. بيتي من الطين ومافيهو حتى مطبخ.. بس ماني داير! - يا عم عبدالله.. فيلا .. شقة.. بيت في نص الخرطوم محل الرئيس بنوم... لا ماني داير -لعلمكم لو رغب في المساومة لنال مبتغاه.. فغادر الي الدويم امس مثلما اتى ..بحقيبته.. رجاء خاص: الناس الحتشيل صورة عمكم و تشير .. حابي اوضح لكم حاجة مهمة.عم عبدالله لم يقل انه جاء ممثلا للسودان في محفل دولي.. وبالتالي ارحموه من المزايدات والقصايد حقت واسفاي لو ما كنت من ناس ما عارف شنو. الرجل تصرف بقناعاته. وما بيمثل شعب ولا امة ولا بطيخ - ويا ناس السودان..بالله عليكم.. ما تزاحموا عمكم بدروعكم وشالاتكم وحفلات تكريمكم.. دا اصلا لو لقيتوه.. بكون اسي في الدويم . عمكم دا ضد النجوميةوما بحب الشهرة .فوفروا تعبكم وميزان حسناتكم
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة