*****حكاية موضوع تعريفي... و حاجات تانية حامياني *****

Quote: العبارات زي (I am a banana) و (comprendes) و (hallelujah) ديل عندهن غردين، الأول قفلات والقفلة تفاصيلها تحت، أما الغرد التاني فهن بيشتغلن مفاتيح للبحث، يعني (anchors) بلغة ناس الكمبيوتر، المنبر دا ما بيصنف المواضيع، ملجة ساكت، فلو عايز تبحث عن مداخلة فانت في الواقع حتلقى نفسك بتبحث في كل البوستات الاتجمعت لعشرة سنوات أو اكتر، فالجمل القصيرة دي بتساعد في تحديد المداخلة المعنية وكل واحدة ليها مدلولات على نوع الموضوع. أها، نجي لتصميم المداخلة، المداخلة عادة فيها ترويسة وبطن وقفلة، الترويسة دي بتعتمد على الموضوع انت عايز تركز انتباه منو أو عايز تشتت انتباه منو، البطن فيها الرد، أما القفلة دي فبتشتغل عكس الترويسة تماماً، يعني لو ترويستك كانت سؤال فالقفلة مفروض تكون إجابة السؤال وهكذا، بكدة مداخلتك بتكون صامدة ومكتفية (encapsulated). أها، من التقنيات في المواجهات، ما تسأل خصمك سؤال ممكن يلقى فيهو فرصة الرد لصالحو، فلو ما متأكد من نزاهتو فهو ما حيقيف معاك ضد نفسو، منطق مش؟ يعني سؤال زي دا ما تسألو (يا فلان الحاجة ديك صاح ولا غلط؟) ، بل جاوب انت وعلل مباشرة، وما تدي خيارات إلا يكون كل خيار أكعب من التاني، وما تجاوب على سؤال إلا في الحدود الما بتسمح بسؤال لاحق بعدو، أو إذا سألت فخلي سؤالك إجابته من البديهيات الما ممكن يختلفوا عليها اتنين. في التعليل دائماً ابني على راحتك، الطوب الكبار تحت والصغار فوق، يعني ابدأ بالحقائق المطلقة حتى لو كانت مضحكة وبالتدرج اضف ليها الحقائق القابلة للنقاش، دا بيخلي محاورك يضطر يجاريك وكلامك حيظهر مقنع للجميع. ابتعد من المفردات الظنية، ما تقول اعتقد أو أظن أو احتمال أو غالباً إلا إذا كانت لحقيقة لا تقبل التغيير، دا بيضيف صيت أو (tone) لكلامك يخليهو كأنو كلام خبراء. آخر حاجة، لو الموضوع طويل فما تمرق الحقائق كلها، خلي باقي ملاح في الحلة لتاني يوم، وأوهم المحاور بأنو دا ياهو حدك بأنك تديهو لكزة، بتكتيك التسخينة مثلاً أو الريـال، ودي تطبيقها دائماً ضروري في سرد النقاط، اسرد النقاط الما مهمة وأمسك عليك أهم مجموعة لتاني يوم.