كتر خيرك يا عبد الحفيظ.. معاوية ، من الناس المنتظر تمشي تشيل الفاتحة فيني في الدلنج (معاهو معاوية عبيد الصايم ، المعز ابو نورا ، حامد الصاوي ، علي دفع الله..!!).. فالك الخير يا معاوية ، زكاة جلد يا حبيب..تمشي وتجي بالسلامة باذن الكريم..وماني زول الله الواصل ، لكن صدقني سويتها قبال كده في شان صديق شيوعي..وخان العهد..لكن بسويها عشانك يا حبيب .. يس اربعين مرة لمدة اسبوع ما بتغلبنا ياحبيب..وربك يبليك بالعافية..وح نشوفك..عشان نصفى معاك باقي الرهان..نسكك في حواري كوستي..الثورة والعايدين ، وازهري الكلو ناس طيبين (وانا ما بجيب سيرة اشراقة مصطفى..)..وجلسة في اب شريف في القوز..معتقة بالعديل والزين..حلاة النصري..وهنا وقف شوية يا حبيب..اما المرابيع..عليها اللعنة يا صاحب..!! ح اصلي ليك يا حبيب..ومعاي بت ابا امنة مختار..ترجع معافى..ولازم ترجع طيب يا معاوية..لأنو بينا وبينك رهان سكوكية..شهودها حبيبنا الغايب عن المنبر ، المهندس ابراهيم فضل الله (قاعد يكتب اسمو بالإنجليزي) ..كوستاوي من عيال حي النصري يا معاوية..ودرس بكوستى القوز..وبقايا التفاصيل اسال عنها عضو المنبر الغايب برضك ..حبيبنا المهندس خالد المنسي..!!..وبرضك بقايا طيب الذكر الإتحاد السوفيتي ولا شنو كده ما عارف..!! وانت قايل شنو يا عبد الحفيظ.. اقرب الناس لي دم ولحم..ياهو المهندس ابراهيم فضل الله..والله صحي..كن تشوطن يا عبد الحفيظ وتجيب نقارة اهلك الجمع من تندلتي والغبشا..ولا تجيب نقارة اهلك الجوامعة من ام روابة وانت ماشي..الناس الخلقت ايقاع التم تم ولا شنو كده ما عارف..!! ولكن.. بقول لي صديقنا ول ابا معاوية الزبير..فالك العافية يا حبيب..عشان ترجع ترسم معانا التسامح..!! وهل هناك تسامح يا عبد الحفيظ..اكتر من انو كوز ليهو ضل زي استاذنا محمد حامد ادم..يكتب لينا (يا كوستى)؟..والغريبة هو نفس الزول الكتب (ضابط السجن ، صبرك لحظة واحدة..وبعدها ارجع وانسجن)..!! يتخيل لي امسودان دي ، محتاجين نعيد اكتشافها..!! وده كلو هين..! ح انتظر معاوية الزبير.. يرجع معافى..عشان اسكو في الشوارع البعرفها اياها(ما تقول لي مركب مخروقة بدل فاقد ولا شنو كده ما عارف..مافي عذر تب..!!)..شي لبيع بحجارة الطين..وشي بقايا انتظار عشان يكمل لهيثم غالي بقايا رحلة الصندل من كوستي ولا شنو كده ما عارف.. طريت الثورة والعايدين..وازهري الكلو ناس طيبين..!! واشلضمك قدام حيطة (كوستي الثانوية بنات) عشان نثبت لمعتصم الطاهر انو سنة يا الحيطة ماها خيال ساكت..!! لازم تعود طيبا معافي يا معاوية..عشان تقرا للناس اهدائي الذي اقتبسته من (مثاقيل) حليم بركات..!! دمت طيبا يا صديقي.. عد طيبا..فلازال في الحكي بعض من ثمالة..وثمالة طيبة يا صاحب.. ليت عادل القصاص ، عبد الحميد البرنس ، هشام ادم ، يمروا من هنا..فكتابة الحزن السوداني ، تحتاج ايادي كثيرة..ايادي كثيرة..!! عد طيبا معافى يا معاوية..! ناس البيت في انتظارك يا حبوب..!! سلام.. كبر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة