|
|
 Re: السوداني فى دنيا الإغتراب حبيس الوظيفة !!! (Re: طارق عبد الله)
|
وهذه مساهمات شعرية في نفس المجال حيث كتب احد الشعراء هذه القصيدة مجسدا واقع الغربة والمغتربين في السبعينات والثمانينات من القرني الماضي ، والحقيقة القصدية جميلة ولكنها تصف شطر الحدث لذا اكملت الشطر الآخر برد على نفس النسق اترككم مع القيصدتين وتقبل مروري
قال الشاعر
يا غربة .. يا غشاشة .. يا بكاية .. يا مستهبلة
تغرينا بي درهم قروش وراه قنطار بهدله
جيناك سنة .. أو قول سنين بنكمله
نبني البيوت في العاصمة
وبي كوم أثاث بنجمله
وكرولا حاره نرسله أصلو التنقل مشكله
ونكمل الدين بي مهل والسمحة جاهزة نحصله
غير القروش اللي الأهل عبر الشهور حا نرسلا
والباقي يدخل في البنوك ونشوف دباره نشغله
ناس فكرت تجني العلم تبدأ الدراسة تواصلا
أحلام كتيره وشيقه وآمال كبيرة نأملا
لكن حساباتنا الغلط في كل عام بنرحله
مرت سنين من العمر بنعزها وبنفضله
والحسبة وصلت طاشرات يمكن نعيش وندبلا
وتعال نحاسبك يا وهم من غير رقم أو أمثله
كان للقروش نجري ونحوش لكن تقول بنشاكلا
ما راضية تقعد في الجيوب وتقول حرامي بينشلا
لكن بترقد في الضهور بديون تقيله متلتلا
ممحوقة ما بتقضي الغرض وأقل حاجة تكملا
كملانه سفرة وحق وزن ومجاملات مستفحله
ضرائب أبعاج المشي وإلزامي حمدي نحولا
وأحلامنا صبحت زي سراب نمشي ونجري ما نحصلا
يا ريت يكون هم القروش يا غربة فيك هو المعضله
لكن تعال شوف الهموم الما إفتكرنا نقابلا
ذلة ومهانة واحتقار خلو النفوس متململة
سجنا كبير فيهو الكفيل سجان قيوده مكبله
أشغالو شاقة ومؤلمه ودايما تكون مستعجله
ما عاد يكفيها النهار تحتاج ليالي مليله
أمراض كتيره بدت معاك عايزه الفحوص مستعجله
ناس الضغط والسكري ومرض القلب مع الكلى
ومصران وقرحة وإكتئاب ونفوسنا ما متحمله
وبنينا فيك كيمان لحم تحت الهدوم متندله
وأكيد يكون أكل المعلب والمجمد عاملا
عدم الرياضة والكونديشن لابد يكون ليهم صــــــلا
وكمان تعال لمعادلة ما قدرنا أصلا نعدلا
سجن العيال جوه الشقق وفراق الأهل والعائله
جيب العيال بي جيبنا مال وجيوبنا غيرو مميله
وصغارنا صبحت بالزهج متوحشة ومتجفله
لا قادرة تلعب في خلا ولا ضل شديره يضللا
لا قادرة تدرس بي نفس من الدروس المترهله
تلقي الولد غالبو الكلام والبت كبيرة ومريله
كل الضغوط سوا ما قدرنا حتى نقللا
في كل طرف تلقي القرف تلقي الخيوط مداخله
يا غربة أديناك كتير أدينا خاطرك يسهلا
خلينا نرجع بالفضل نلحق حياتنا نعدلا
آمالنا فيك بدري إتنست إلاّ الرجول متوحله
وبقينا زي أهل القبور لا البره عارف يدخلا
لا الجوه يرجع لي ورا يحكي الحقيقة يوصلا
لكن خلاص هان الخلاص عندك نزل مهما علا
وإن شاء الله نحيا نودعك وتكوني ذكرى نغازلا
يا غربة .. يا بكاية .. يا غشاشة .. يا مستهبله
وقلت ردا عليه ( محمد الزبير )
عذرا تمهل في الحكم الغربة لا غشاشة لا بكاية لا مستهبلة
شطر الكلام ماهو الصواب ما يستقيم دون تكملة
نصف الذكرتو كلام صحيح كانت ثقافة مرحلة
الغربة إختلفت كتير وبقت في نسخة معدلة
الغربة تخطيط منتظم ضبط الحكاية من اولا
الغربة زي موية المطر في الرملة ما بتحصلا
الغربة عايزة مؤهلات تطوير شديد دون ململة
الغربة كم ربت يتيم مسحت دميعات أرملة
في الغربة ناس تركوا الخمول عرفوا الصلاح درب الصلاة
بالغربة ناس فتحت بيوت حفظت صغارها من البلا
بالغربة كم حجوا الكبار دفعوا التذاكر في الغلا
الغربة كم سندت ضعاف اضحت امورها مسهلة
بالغربة كم مديون مهان سدد ديونو وحلحلا
بالغربة كم متروك ضعيف حاز العماير وسجلا
بالغربة ناس عملت بيوت مفروشة اثاث آخر حلا
في الغربة ناس حازت علم طب وإقتصاد مع صيدلة
في الغربة ناس درست فقه حفظوا المتون من اوّلا
الغربة كم دعمت إمام شيد مساجد للصلاة
الغربة كم رزعت حقول روت العطاشا الفي الخلا
قصة عيال جوة البيوت في دا الزمن ما مشكلة
ليه الولد غالبو الكلام والبت كبيرة مريلة
ليه مافي تربية وإهتمام ليه العيال متبهدلة
لو انت مشغول بالعمل دور الأمومة مكملة
تهوى السهر نوم النهار خلت عيالها مهملة
سوق الدهب ونسات حريم طبعا اكيد ليهم صلة
علم الشوارع ما بيفيد في البيت هوايتو بحصلا
ظل الشديرة دة كان زمان وقت البيوت مترهلة
كل البيوت صارت شقق مضروبه بوهية مقفلة
في البيت في انترنت بيجيب كل الخيوط متواصلة
البيت بيحفظو من الشرور ومخدرات ومن البلا
حتى اللعب بي إنتظام أوقاتو ما متداخلة
ليه للقروش تقعد تحوش بالأولويات نزلا
رتب حواجك بي عقل ما تسيبها ماشا سبهللة
طور معارفك بإنتظام أصلو المنافسة مذهلة
فيهم أعاجم والعرب واتراك معاهم بنقلة
الخبرة والتأهيل كمان بعد الشهادة مفضلة
الواسطة قبل الإمتحان ما اظن تحل المسألة
خلى المجاملة في حدود والواجبات ما معضلة
والغربة منحة من الكريم تستاهلك وتستاهلا
بس أبدا بي تخطيط سليم من دون كلل دون ململة
حصل قطارك ما يفوت بى سرعة من غير فرملة
سيب إكتئابك والملل كتر دعاك وقت الصلاة
فارق الشلل لعب الورق سهر إستراحات بطلا
اصلو الزمن دوار شديد لحظاتو ماها مطولا
وادعو الكريم ساعة السحور للمعضلات بيسهلا
بس حسن اعمالك كمان بي نية صافية من اولا
تلقي المراد يوم الحصاد كل المحطات توصلا
وإن فاتت في الفانية دي يوم القيامة تحصلا
في اللحظة ديك تقدر تقول الغربة لا بكاية لا غشاشة لا مستهبلة
محمد الزبير محمود
|
|
 
|
|
|
|
|
| العنوان |
الكاتب |
Date |
| السوداني فى دنيا الإغتراب حبيس الوظيفة !!! | walid taha | 03-16-17, 03:43 PM |
| Re: السوداني فى دنيا الإغتراب حبيس الوظيفة !!! | فردوس جامع | 03-16-17, 05:02 PM |
| Re: السوداني فى دنيا الإغتراب حبيس الوظيفة !!! | walid taha | 03-19-17, 07:52 AM |
| Re: السوداني فى دنيا الإغتراب حبيس الوظيفة !!! | عبد العزيز محمد عمر | 03-19-17, 08:09 AM |
 Re: السوداني فى دنيا الإغتراب حبيس الوظيفة !!! | عبدالله ود البوش | 03-19-17, 09:01 AM |
| Re: السوداني فى دنيا الإغتراب حبيس الوظيفة !!! | عبدالله ود البوش | 03-19-17, 09:04 AM |
| Re: السوداني فى دنيا الإغتراب حبيس الوظيفة !!! | walid taha | 03-19-17, 03:54 PM |
| Re: السوداني فى دنيا الإغتراب حبيس الوظيفة !!! | walid taha | 03-19-17, 11:36 AM |
| Re: السوداني فى دنيا الإغتراب حبيس الوظيفة !!! | ياسر السر | 03-19-17, 02:48 PM |
| Re: السوداني فى دنيا الإغتراب حبيس الوظيفة !!! | walid taha | 03-21-17, 03:24 PM |
| Re: السوداني فى دنيا الإغتراب حبيس الوظيفة !!! | حسن محمد عمر | 03-19-17, 02:52 PM |
| Re: السوداني فى دنيا الإغتراب حبيس الوظيفة !!! | طارق عبد الله | 03-19-17, 04:14 PM |
| Re: السوداني فى دنيا الإغتراب حبيس الوظيفة !!! | محمد الزبير محمود | 03-19-17, 04:55 PM |
| Re: السوداني فى دنيا الإغتراب حبيس الوظيفة !!! | walid taha | 03-20-17, 10:12 AM |
| Re: السوداني فى دنيا الإغتراب حبيس الوظيفة !!! | عبد العزيز محمد عمر | 03-20-17, 10:52 AM |
| Re: السوداني فى دنيا الإغتراب حبيس الوظيفة !!! | walid taha | 03-20-17, 11:14 AM |
| Re: السوداني فى دنيا الإغتراب حبيس الوظيفة !!! | ياسر منصور عثمان | 03-20-17, 11:44 AM |
| Re: السوداني فى دنيا الإغتراب حبيس الوظيفة !!! | سيف الدين محجوب | 03-21-17, 10:50 AM |
| Re: السوداني فى دنيا الإغتراب حبيس الوظيفة !!! | ابوحراز | 03-21-17, 05:20 PM |
| Re: السوداني فى دنيا الإغتراب حبيس الوظيفة !!! | walid taha | 03-22-17, 07:30 AM |
| Re: السوداني فى دنيا الإغتراب حبيس الوظيفة !!! | ابوحراز | 03-22-17, 08:43 AM |
| Re: السوداني فى دنيا الإغتراب حبيس الوظيفة !!! | Hasheem Karouri | 03-22-17, 08:55 AM |
|
| |
فيس بوك
تويتر
انستقرام
يوتيوب
بنتيريست