|
|
 Re: في سبيل إصلاح ذات البين بين الجمهوريين (Re: Yasir Elsharif)
|
كتب الأستاذ خالد الحاج مقالا نشر بتاريخ البارحة 10 أكتوبر 2016، في باب آراء حرة ومقالات في سودانيز أونلاين عنوانه: " العلم والإيمان (1ـ3) بقلم خالد الحاج عبد المحمود" يهمني منه هذه الجزئية فقط:
((أصحاب العبارات أعلاه، [والمقصود بهم الدكتور عمر القراي والأخ أبو بكر بشير الخليفة] على جهلهم الفاضح، هم أفضل بكثير من د. النور محمد حمد، الذي وصل إلى درجة من السوء ما عليها من مزيد، حيث قال: "أنا بفتكر ما عادت في فرصة للدعوة.. يعني الدعوة للعقيدة، أو لأي فكرة دينية هي من التاريخ.."!! ونحن لنا عودة إلى مناقشة هذا الزعم الممعن في الغرور والسطحية.. فصاحب الزعم رغم أنه تحدث حديثاً مطولاً، إلا أنه لم يورد أي دليل على قوله.. ونحن يعنينا زعمه هذا هنا، في مجال ارتباط الفكر بالعقيدة والعلم.))
رابط المقال:
http://sudaneseonline.com/board/7/msg/%d8%a7%d9%84%d8%b9%d9%84%d9%85-%d9%88%d8%a7%d9%84%d8%a5%d9%8a%d9%85%d8%a7%d9%86-%281%d9%803%29-%d8%a8%...8%af-1476075489.html
واهتمامي بهذه الجزئية يرجع إلى أنني أريد التعليق عليها بما يصب في مجال إصلاح ذات البين بين الجمهوريين، وهو عنوان هذا الخيط الذي افترعته منذ شهور. في البداية لا بد لي أن أعتب على الأستاذ خالد الحاج في أنه وضع هذا النص من كلام الأخ الدكتور النور محمد حمد من غير أن يشير ولا حتى إشارة إلى مصدره، ومتى وأين قيل، حتى يرجع القارئ ويتحقق منه أولا ثم يحكم لنفسه. وأنا من جانبي لا أريد أن أدافع عما يقوله الأخ النور، فربما أتفق معه هنا وأختلف معه هناك، وإنما يهمني إثبات مصدر القول ومناسبته بتفصيل يفيد في توضيح المسألة وتقريب وجهات النظر التي أرى أنها بالفعل قريبة من قريب فإلى القصة.
في يوم السبت 30 يوليو 2016 استضاف منبر السودان الديمقراطي، واشنطون دي سي، الأخ الدكتور أحمد المصطفى دالي في حوار حول حقيقة المنظمات التي تزعم تمثيل المسلمين في أمريكا، مقر الفعالية كان في Mason District Goverenmental Center في واشطنون. الحوار وضع في اليوتيوب بتاريخ 16 أغسطس 2016، ويمكن مشاهدته هنا لمن يريد:
جاءت مداخلة من البروفيسور سكر كانت في الموضع 49 دقيقة من التسجيل واستمرت حتى موضع ساعة وبضع ثواني من التسجيل، سأضعها في هامش رقم 1 أسفل هذه المداخلة، ثم عقَّب عليها الأخ الدكتور دالي من الموضع ساعة وحتى الموضع ساعة و 10 دقيقة من التسجيل تقريبا، سأضعها كتابة في هامش رقم 2 بالأسفل أيضا. ثم جاءت مداخلة الأخ الدكتور النور محمد حمد في الموضع ساعة و 11 دقيقة من التسجيل، وسأقوم بوضعها في صيغة كتابة هنا في متن المداخلة، مع التنبيه إلى أن ما أضعه بين قوسين مربعين [..] أو هلالين (...) هو دائما تحرير مني للتوضيح إذ أن الكلام بالدارجية السودانية طبعا، أو ترجمة لمصطلح أو جملة ذكرت في المداخلة باللغة الانجليزية.
((
النور: عجبتني مداخلة بروفيسور سكر واعتقد أنها طرحت قضايا أساسية وجوهرية.. وبرضو بفتكر أنه نحن الناس الاشتغلنا مع الأستاذ محمود وقعدنا معاهو فترة طويلة بنحتاج نعيد النظر في رؤيتنا.. وبنحتاج أننا نزاوج التغيرات التي جرت في 25 أو 30 سنة الماضية مع خلفيات فكرتنا.
...
أنا بفتكر ما عاد في فرصة للدعوة.. يعني الدعوة للعقيدة أو لأي فكرة دينية هي من التاريخ.. ويجب أن يكون في فصل تام بين العمل السياسي والعمل الدعوي.. دا هسع الوصلت ليهو ناس الغنوشي.. يعني قد يكون فيهو بعض الشوائب هنا وهناك واضطروا ليه اضطرار وانزنقوا ليهو لكنهم في النهاية مشوا فيهو لأن الاتجاه بقى واضح جدا.. أنا بفتكر إنك إنت تمسك القيم، يعني زي كلام دالي القالو دا. إنت داعي للاشتراكية وللديمقراطية أطرح نفسك كحزب اشتراكي ديمقراطي، واستبطن القيم الجاياك من فكرتك الدينية.. ما ضروري تعملها banner (يافطة).. خلي الناس يمشوا على القيمة دي.. مثلا، عشان الصورة دي تكون أوضح: الأستاذ محمود لمن كتب "أسس دستور السودان" في سنة 1954 والكتاب تاني أعيد طبعه في سنة 68 قال أنه "الحزب الجمهوري لكل سوداني وسودانية بلغ من العمر 18 سنة".. لا قال مسلم، ولا قال مسيحي، ولا قال أي حاجة.. لأنه دا حزب سياسي.. إذا إنت ما عايز core (نواة) ـ قد تكون عايز ليك core بتاع قيادة، وأنا بفتكر أنو نحن كجمهوريين، أو على الأقل بعضنا خلطوا بين فترة الإعداد الأعداها الأستاذ محمود لينا كدعاة وبين صورة المستقبل الذي ينبغي أن يكون عليه الحزب.. يعني نحن دُربنا تدريب ديني - وهو تدريب قادة - وانت في أي عمل داير تكون عندك leadership (قيادة) - ال leadership أساسية.. إنت ما بتحرِّك بال masses (الجماهير).. ال masses بتديك صوتها لكن بيكون عندك elites (نخبة).. ديل البيكونو ال key people (الناس الأساسيين) البيعملوا ليك ال transformation (التحول) من حالة لي حالة.. فالعمل عمل سياسي في الأساس..
بعدين أنت ما بتترك المسائل في الفراغ يعني أن نقول مثلا نحن حندعو الناس دعوة دينية.. يكون عندنا جمهوريين ماشين على ال model (النموذج) العملو الأستاذ مع ال core (النواة) الصغير الاشتغل معاه دا مثلا من سنة 51 لغاية 85.. دا ما بيحصل.. دا فكر مثالي جدا جدا.. بيحصل انك تكسب قطاع كبير من التعاطف لمن تجي في انتخابات وعندك برنامج انتخابي محدد.. الناس ديل يدوك أصواتهم لأنه شافوا فيك قيم.. انك انت transparent (شفّاف) ما قابل للفساد.. dedicated لل cause (مخلص للقضية) العام بتاع الناس ودا الشيء المطلوب في حقيقة الأمر.. ما بفتكر أنو ضروري فعلا نحن نقدم نفسنا...... في [هناك] إشكالية حقيقية.
برضو بالمناسبة ما ننسى التاريخ.. بروفيسور سكر نبهنا للتاريخ.. البيحصل في الشرق الأوسط دا ما جديد.. دا الحصل في أوروبا من القرون الوسطى لحدى الثورة الصناعية لحدي ما جات ثورة مارتن لوثر وحصل ال transformation وحصل ال separation between state and church (الفصل بين المؤسسة الدينية والدولة) يعني.. نحن موش راح نعيد اختراع العجلة.. ما افتكر نحن راح نجترح وضع جديد بيهو نرجع الدين يبقى هو central (مركزي) لحياة الناس.. الدين للأفراد.. يعني يمكن يكون التنظيم عنده خلفية دينية - زي الجمهوريين - لكن ما تعلن عنها كأنها هي خلفية دينية - أعلن عنها كقيمة عصرية مقبولة عند الناس..
برضو من الكلام القالوا الأستاذ محمود محمد طه مثلا أنه "أنا ممكن اتبع غير المسلم" - دا كلام قاله الأستاذ بنفسه - إذا هو متحقق بالقيم الرفيعة، ما بهمني أنه هو شنو مسلم أو غير مسلم، بتهمني النتيجة.. إيه هو محقق. نحن بالصورة دي كدة بنكون جبنا الإسلام للنطاق الإنساني.. ببقى هو مجرد خلفية زي الخلفية زي مثلا ما تقول الحزب الديمقراطي المسيحي في Germany (ألمانيا) الناس ديل هنا الآباء المؤسسين خلفياتهم خلفيات مسيحية.. ولا زالت البلد دي الـ creed العقيدة الواقفة وراء كل العمل دا هي روح مسيحية، لكن ما جاءت بالتفاصيل لتتحكم في حياة ..... لأنك إنت مجرد ما دخلت في موضوع النصوص دخلت في إشكالية وفي Dilemma (جدلية) كبيرة جدا جدا. لأن النصوص دايرا interpretation (تفسير وتأويل) والتفسير هو رأيي ورأيك، لأنو النصوص مرات بتكون crude (خام) إنت بتلطفها بالتأويل. التأويل هو فكري وفكرك. فبيبقى الحل في النهاية هو العقل، هو العقل الإنساني وليس هو النص.. النص إنت لابد أنك تتجاوزه إما بالتأويل أو بأن تقول مثلا انتقلنا من نصوص فرعية لنصوص أصلية - حتى النصوص الأصلية ذاتها يدخل فيها التأويل - التأويل لا ينتهي.. ولذلك نمشي للخلاصة.. الخلاصة هو العقل.. يعني العقل الصافي والقلب السليم.. إذا إنت رابط نفسك بالقيم العليا، بحقوق الناس، ومتخلِّق بالأخلاق البتخليك إنك تكون فعلا قائد وأنك تكون زاهد وأنك تكون حريص على صلاح أمر الناس زي ما حريص على صلاح أمر نفسك، دا الوقت البتجي فيهو القيادة اللي بتكون يعني تلهم الناس في أنو هم يجترحوا تغيير
...
أنا بفتكر برضو أنه التغيير اللي جاي ما راح يجي بالصور اللي نحن نتصوره بيها.. ما عاد الان لقطر يمكن أن ينهض بنفسه.. يعني ناس الخُضر وناس رالف نادر وناس بيرني ونحن الجمهوريين وغيرنا من الناس البيحلموا بدولة بنفكر بطريقة واحدة. التحكم الآن جاي من الرأسمال، ومن العولمة اللي هي الرأسمالية دايرة تتمدد في العالم تسيطر عليه زي ما سيطرت على أمريكا. يبقوا كل الناس عندها أقنان، دي هسع مشت خلاص، الرأسمالية بقت قاعدة في السودان أو قاعدة في الخليج أو قاعدة في أي دولة من الدول، هي مش رأسمالية وطنية، هي مرتبطة بمصالحها مع الـ core (المركز) اللي هو موجود في الفضاء الغربي. ولذلك هم قاعدين هناك وكلاء للنظام الموجود هنا. فبيبقى الحل دا حل كوكبي وليس حل جزئي. يعني لو إنت داير تتحرر من الدين البنك الدولي ما بيخليك، لو عايز تنمية ما بتحصل تنمية، لو عايز تنافس في السوق دا ما بتحصل منافسة. ما يقول ليك ناس البشير يعملوا إنتاج زراعي و... دا كلام ساي نظري. الواقع العملي لا يسمح للدول إلا في حدود ضيقة جدا. في الحدود اللي هي بتحصل هنا. يعني النموذج الماليزي النموذج الما [بعرف إيه]، حصلت نجاحات، البرازيل إلخ، هي دخلت في البنية دي، في البنية الرأسمالية، سُمح ليها ببعض الشيء لكن بتلقى الـ masses (الجماهير) فقيرة، سواء في الهند أو في البرازيل أو في ماليزيا. حتى في أمريكا نفسها صاحبة القدح المُعلَّى في الموضوع دا، 45 مليون شخص ليس عندهم health insurance (تأمين صحي). كل الناس from hand to mouth (من الإيد للخشم، أو من الشُمَّارة للخُمَّارة).. يعني بتشيل المرتب بي جاي وبتشيلو تكتبو فواتير للناس بي هنا. وتقعد بعد داك تناضل وحياتك كلها لهثي وإرهاق وأنك إنت ما عايش كإنسان. إنت جاري بس، جاي بس to survive (لتحيا) لحدي ما تقع تموت. فبيبقى الحل دا حل كوكبي، يعني هناك إشكالية حقيقية. ولذلك انت لمن تَصْدُر من مصدر في الشرق الأوسط وتقول ليهم أنا عندي خلفية دينية أو أنا عايز أكلمكم عن الدين الإسلامي أنا ما افتكر في حد بيسمع ليك.. هسع في السودان نفسه أنا أفتكر الكلام عن الدين بقى صعب جدا.. ولحسن الحظ، أنو الجماعة ديل حرقوا لينا الكرت بتاع الهوس الديني.. تاني مافي زول بيجي يتشدق زي ما قال فيصل لحسين خوجلي.. قال ليهو تااااني يا حسين.. حسين خوجلي قال لسه الإسلاميين لم يحكموا.. الحكموكم ديل ما الإسلاميين.. فالناس بقوا ما بيسمعوا الكلام الزي دا.. ما في فرصة زي دي.
في أمور تانية بتتعلق بدعوتنا نحن.. يعني تجربتنا ننظر ليها.. أنا ما بفتكر نحن كجمهوريين رايحين نلقى قائد أفضل من الأستاذ محمود there is no way ( مافي طريقة) أنا ما شفت في حياتي زول consistent (متسق) زي الأستاذ محمود، في كل تفاصيل حياته اليومية، يعني من تصبح لمن تغيب الأستاذ محمود دا عنده سمت واحد ونهج واحد وطريقة.. يعني أنا ما شفت إنسان يقظ يعني، وعشت معاه وبعرفه عرفة بتاعة 15 سنة.. إنت ما بتقدر to replicate (تكرره) مع هذا حركتنا دي استمرت من 51 بعد الأستاذ أعلن الفكرة بصورتها دي لحد 85، النهاية الشفناها ياها دي.. كل الناس النحن حصلناهم بضع مئات.. والأستاذ إنتهى الى منصة الإعدام.. فيبقى أنه البيئة دي ما بيئة صالحة لدعوة.. ولا يمكن نحن نجري وراهو ونمسك النهج دا نفسه ونعيد التجربة دي تاني.. التجربة دي مفروض ننطلق منها لتصور جديد في أن نمد جسور للناس ونتمسك بالقيم البتخلينا كلنا نعيش مع بعض..
يعني ما بتقدر تعمل عمل دعوي.. لا بتقدر تقدم له النموذج ولا بتقدر تقدم له التضحية ولا بتقدر تقدم له التحقيق.. ما بتقدر تعمل دا. فبيبقى الصورة أن الكلام في الناحية دي بيبقى إدعاء ساكت.. فببقى الوضع الوحيد الإنت يمكن أن تعمله هو تمد الجسور للناس.. تستبطن القيم العليا دي وتعرضها في شكل برنامج وتعمل في الحياة اليومية.. يعني ما تتعالى على الواقع.. تعمل مع ناسك.. ديل ياهم ناسك.. ياهم ناس "نداء السودان" وناس ما بعرف ايه و"الجبهة الثورية".. قايم وقاعد بتعمل في الحدود البتقدر [عليها]، ولأنه التغيير بيجي عن طريق الاحتكاك اليومي.. مافي فكر أنت بتطرحو نظريا بعدين الناس كلهم يقتنعوا بيهو بعدين يبقوا [يصبحوا] طاقة للتغيير.. لمن تجي النقطة الهناك ديك. لا. دا عمل في الحراك اليومي، من خلال الحراك دا الوعي بيزداد، من المحاككات دي. دا عند الشيوعيين مفهوم، موضوع النضال اليومي دا يعني، هو صحيح حقيقة. وهسع الناس شغالين كلهم كدا. الـ activism (النشاط) في كل العالم شغال كدا، إذا كان ناس خضر ناس بيئة ناس كدا ناس كدا، (إلخ) بيشتغلوا في حراك يومي؛ منظمات حقوق الإنسان، طوالي يرسِّلوا ويكتبوا و.. (إلخ)
...
فنحن نكون Activist (نشطاء)، مستبطنين قيمنا.. موش مجرد أننا عايزين نصب الناس في قالب.. الناس ما حيكونوا في قالب.. الإسلام ذاتو ما داير الناس يكونوا حاجة واحدة.. يعني (ولو شاء الله لجعلكم أمة واحدة).. فالشاهد أنه العالم متنوع جدا لكنه ماشي للمفاهيم الإنسانية، متقارب مع بعض.. الناس أقرب لبعض من أي وقت مضى.. وجاءت الوسايل بتاعة التواصل الاجتماعي وثورة المعلومات لتجعل الكوكب متقارب من أي وقت مضى.. ولذلك بتبقى فرصة تجميع الناس على الفضاء الإنساني من غير أن تجلب معاك انت ال baggage (الحمولة) بتاعك.. لأنه ال baggage بتاع الإسلام دا controversial (مثير للجدل) يا جماعة.. زي ما قال د. سكر يعني السيرة دي فيها مشاكل حقيقية.. مشكلة الناس لأنهم ما بيقروا.. بيكلموهم كلام بسيط.. لكن لو الإنسان بيقرأ بينفر من الإسلام.. لو بتقرأ السيرة حقيقة حتنفر من الإسلام.. والداعية البيجي يحاول يقنع الناس بالإسلام حيجد مشقة عظيمة جدا.. وبعدين التجارب في (موجودة)..
بعدين ننظر برضو للشرق الأوسط.. ليه البؤرة دي هي البؤرة الوحيدة المتخلفة في كل العالم.. ليه؟ ليه الهند ما متخلفة.. البوذيين.. الكونفوشيوسيين.. المسيحيين.. ليه بالضبط الحتة البين إيران دي وبين المغرب؟؟ دي الخالقة الاشكالات؟ متخلفة في التعليم.. متخلفة في التنمية.. الدول العربية كلها الناتج الاجمالي بتاعها أقل من أسبانيا اللي هي أفقر دولة في اوربا.. بالخليج دا وبكل قروشه دي.. كل الدول العربية دي أقل من اسبانيا وحدها.. دا لأنه في مشكلة في العقول.. المشكلة دي سببها ديني بالمناسبة..
الثورة الدينية ضرورية وال reform (الإصلاح) ضروري لكن جرجرته لموضوع السياسة بالشكل الدعوي راح يرهق الدعوة وبيجعلها تتراجع يعني بتتبدد.. الطاقة دي راح تتبدد.. إلا إذا الناس قدروا يمدو الجسور..
فكرتنا نحن ذاتها، الفكرة الجمهورية، فيها حاجات كثيرة جدا controversial والجمهور ما بيقبلها.. ولو كان ممكن يقبلها كان قبلها على عهد الأستاذ.. لكن موش معناها.. أنا افتكر الأستاذ قال أشياء عظيمة جدا وهو مفكر من كبار المفكرين الظهروا في القرن العشرين.. بالذات لأنه مشى لإشكالية الأخلاق، اللهي دي الفكر العلماني حتى فيما بعد الحداثة ما طرق الموضوع دي بالشكل دا.. لكن الأستاذ لمَّ (جمع) حاجة كثيرة جدا، لأنه هو في بيئة بتتعامل بالنصوص، اتعامل معاها بالنصوص.. ودا كان بحكم ال context (الإطار) واللحظة التاريخية.. ما بفتكر نحن في اللحظة دي مفروض نعيد انتاج نفس الموضوع دا من جديد.. لا.. لازم نخرج منه إلى فضاء أكثر رحابة وأكثر عملية.. وأكثر سيولة ونبعد من اليافطة - يافطة الإسلام دي ما تجرها.. استبطنها.. استبطن القيم الإنت بتؤمن بيها.. ناقش بيها ناسك.. لكن ما تعرضها up front [مباشرة] في الواجهة.. فيها مشاكل كتيرة جدا وبتعوق..
شكرا جزيلا
تداخلت الأستاذة إيمان وسألت الدكتور النور سؤالا حول كيف يتم مد الجسور التي تحدث هو عنها والنظام في السودان لا يسمح بذلك.
تعقيب النور:
أشكرك أنك ذكرتيني نقطة مهمة جدا اختمرت في ذهني لكن فاتت علي مع الكلام الطويل. أنا برضو مع بروفيسور سكَّر، في أنك إنت ما بتقدر تتجنَّب إقامة دولة علمانية. ما في طريقة تتجنبها. يعني ادعُ إلى أي شيء. أنا بفتكر إنو الدولة جهاز بيروقراطي، محايد، إنت ممكن to inject (تحقن) في الدولة مفاهيمك، كان [سواء] جبتها من القرآن، جبتها من الإنجيل، جبتها من الفلاسفة القدامى، جبتها من أي يوتوبيا، ممكن تحقنها في الدولة، لكن الدولة هي جهاز لتنظيم شئون الناس. ولذلك إلصاق بطاقة دينية عليها أنا بفتكر إنو irrelevant (لا علاقة له بالموضوع). ولذلك في وضعنا الفي السودان دا، في وضعنا الحالي دا، مع التجهيل [الحاصل دا]. يا جماعة في حاجة نحن ما ننساها. الجماعة ديل رجَّعوا عقارب الساعة في السودان أكتر من خمسين سنة. يعني النقطة النحن كنا فيها في 1989 نحن رجعنا منها تاني لوراء إمكن خمسين سنة. يعني لاحظوا للسودانيين إتغيروا كيف؟ شوفوا الثفنات الهنا [وأشار إلى جبهته]، شوفوا العزبات شوفوا الجلاليب، شوفوا الخِمارات والإسمها إيش، يعني، وبعدين شوفوا حاجات القرآن والحوقلة والبسملة، وما في أخلاق بملِّيم في الشارع. الخرطوم دي غااابة. السواقة غابة، السوق غابة، أي شيء غابة، الألفاظ ذاتها تدنت، اللغة بقت ضعيفة، القدرة على التعبير، الفن تدنى، أي شيء تدنَّى. يعني حصل انحطاط لا يُصدَّق. Reversal (انقلاب ورائي) لأي قيمة اكتسبناها نحن من مجيء الانجليز لحدي الاستقلال ولحدي ما بعد الاستقلال إمكن بعشرة عشرين سنة. لذلك في [هناك] إشكالية. يعني الدولة العلمانية بتدي فرصة لي أنك إنت تتنفس. صحيح ما حتجيك إنت من الأول؛ حيجوك ناس ملولوين وحيجوك ناس من الطائفيين يستغلوا الديمقراطية، زي ما استخدموها يعني طلعوا الحزب الشيوعي وعملوا محكمة الردة، وعملوا كدا (إلخ)، دا كلو بيحصل، لكن على أي حال النظام العلماني بيديك فرصة أنك تشيل وتخت. وأنك تعمل reform process (عملية إصلاح). لكن النظام الـ totalitarian (الشمولي) وخاصة إذا بقى ديني، بيكمم، وبياخد منك الجمهور، لأنو الجمهور بسيط والجمهور أمي. نحن إشكاليتنا إشكالية معقدة، لذلك أنا بفتكر كدا، بفتكر إنو الجمهوريين يشتغلوا مع بقية القوى في أننا نحاول نصل إلى دولة يعني نتقاسمها كلنا. وكل زول يكون عندو فيها equal representation (تمثيل متساوي) وعنده فرصة ليقول رأيه ويرفع للقضاء ويشتكي ويعمل ويناضل. التغيير ما بيجي Lump sum (دفعة واحدة). بيجي process (عملية تراكمية) .
آسف للإطالة.
هامش 1: مداخلة البروفيسور ابراهيم سكر:
شكرا جزيلا. شكرا للأخ دالي ، ونحن فعلا سعدنا اليوم أنو أكملنا ما سمعناه المرة السابقة من الأخ القراي، وزي ما أنا اتكلمت برضو في الندوة السابقة وقلت إلى أي حد يعني عندي admiration [إعجاب] للفكر بتاع الأستاذ محمود، وبفتكر فيهو كتير مما يمكن يحل الأزمة بتاعة المسلمين. المسلمين في محنة، القضية كبيرة جدا؛ والقضية ليست السودان، وليست شكل الدولة في السودان ولا حتى الديانة الكبيرة الإسمها الإسلام دي، فيها 1500 مليون، بالنسبة لي أنا كطبيب : في مرض عايز ليه علاج. اللي هو يسموهو الإصلاح. المشكلة بتاعة الإصلاح بالنسبة للدين الإسلامي متعقدة، معقدة. معقدة لأنو الدين الإسلامي ما فيهو Government per se [حكومة بهذا التحديد]. ما فيهو كنيسة. يعني المسيحيين دخلوا في الأشياء دي كلها. استخدموا الدين لأي حاجة عشان يفسروا بيهو كل شيء: العلم، السلطة، الغيرو؛ اللي هو هسع دا بالضبط دي اللحظة الواقفين فيها المسلمين. يعني كأنما يستجلبوا العصور الوسطى زي ما هي وبيعيدوا في إنتاجها قدام عيوننا، كل الحاصل دا نحن شايفينوا قدام عيونا. في المسيحية الموضوع كان أسهل إصلاحو [إصلاحو أسهل] لأنو في Governence في حوكمة ، جهاز بتاع اللي هو الكنيسة دي. بمجرد ما انقسمت الكنيسة وبدأ الحوار وغيرو وصلوا لأشياء هي اللي قدمتهم لي قدام. من الأشياء المهمة جدا في تقدم الغرب وانعتقوا من أسباب التخلف بخلط الدين وشبك الدين مع السياسة هو العلمانية أو فصل السياسة من الدين. العلمانية لا تعني إنو الناس يكفروا أو إنو إنك تمشي تقيم ليك منابر عشان تسب الأديان؛ لأ. لم يقوم الفكر العلماني على ذلك. الفكر العلماني أو التطبيق العلماني اللي هسع نحن بنشوفو إنو الدولة بمسافة واحدة من جميع الاعتقادات المواطن اللي هو نفس الكلام اللي بقولو الأخ [دالي] اللي هو يعني حكم الشعب للشعب ولمصلحة الشعب، والأفكار دي بتاعة الديمقراطية، والديمقراطية الليبرالية، لا يمكن أن تتم في وجود، يعني خلينا من الديماغوغية السياسية واستجداء الدين ، واستجداء وخلط الأشياء وما شابه ذلك. واحدة من المشاكل الوقفت أمام التغيير في الإسلام هو موضوع الـ Absence of Government [غياب الحكومة]. لكن في إشكالية تانية: إنو المسلمين جايبين كل، منذ أن جاءت عصور الانحطاط ، أتوا بالجمل بما حمل ودا كلو مسكوهو قدسوهو، وأنا بفتكر الجمهوريين قدموا مساهمة كبيرة جدا لحل الإشكالية دي. اللي هي في التفريق بين القرآن المكي والرسالة السرمدية للإسلام والتطبيق اللي تم في القرن السادس. وهذا يمكن.. ودي مشكلة.. هو في الحقيقة هسع أنا قلت إنو الـ Holy Grail [الكأس المقدسة] الـ "هولي قريل" هو بالنسبة للمسلمين الآن ، لو وصل الفهم دا ، وأتختَّ [وُضع] والتدين بتاع المسلمين وتفكير المسلمين مشى في هذا الاتجاه، لحلَّت الكثير جدا من المشاكل بتاعة العالم الإسلامي الهسع، يعني مخلية الزول ما شايف ليهو حاجة والله يحتفل بيها ويقول أنا مسلم أو جاي من دول إسلامية. المساهمة بتاعة الأستاذ محمود محمد طه دي بتضيع لمن [عندما] الإخوة يقدموا لينا الطرح الجمهوري المتكامل إنو عايزين الـ Magic Bullet [الرصاصة السحرية أو عصا موسى] تحل كل المشاكل. بما فيها العدالة الاجتماعية بما فيها ... بما فيها... بما فيها. في التدين يمكن أن تفصل بين السياسي والعمل الديني. في العمل الديني هذه رؤية متقدمة للإسلام. ويمكن للإخوة الجمهوريين أن يقنعوا بيها المسلمين. لكن لفك الاشتباك في الحياة العامة وفي السياسة لا بد للإخوة الجمهوريين أن يتقبلوا الفكرة ديه، بتاعة إنو بُعد السياسة عن الدين. وبعدين أنا حأضيف حاجة تانية. الإسلام ليس فيه دولة. والأستاذ [دالي] برضو اتكلم عن موضوع الشورى. الإسلام، الشواهد بتقول إنو كانت في ما يسمى مجتمع المدينة أو دولة المدينة، كان فيها رسول! وكان يعني يوصل للناس الأشياء البتجيهو من السماء وما تفسير الدين وأقاموا المجتمع بتاعهم. ولكن في دولة المدينة لم تؤت مؤسسات، ما كان في قائد بتاع جيش دائم، لم يكن هناك قضاة دائمين، ودا مش لأنهم ما كانوا بيعرفوا؛ العرب يعرفون ذلك، جنبهم الفرس وجنبهم الرومان. ولكن لم تكن هناك دولة. مات الرسول صلى الله عليه وسلم واختلفوا وتصارعوا، وحصل اللي في السقيفة وحصل ما يقال بين عمر بن الخطاب والسيدة فاطمة. الخلفاء الراشدين الأربعة كل واحد تم اختياره بطريقة مختلفة من التاني، وتلاتة منهم ماتوا [قتلوا] ويقال أنو الرابع برضو سُمم، فمافيش نظام، ما فيش نظام بتاع دولة. وليس مطلوب من الأديان أنو تقدم نظام بتاع دولة للناس، إنما بتديهم قيم، وبتديهم معايير معينة، على ضوئها، البشرية بتعبها دا كلو، وصلنا للنظام الديمقراطي، ووصلنا ... الغربيين بقولوا This is not Christian [هذا ليس مسيحية يعني الديمقراطية ليست مسيحية]. يعني إنو المسيحية لا تسمح لك بأنو تقول بي كدا. المسلمين [برضو] في مجتمعهم الإسلامي الديمقراطي اللي يُعزّ فيه الإنسان [ويشير إلى دالي] ويكون كل حوله يعني خدمة المشاكل بتاعة الناس المتساكنين والمتعاضدين والمتعايشين واللي بيدينوا بالدين الإسلامي يمكن لهم أن تكون ثقافتهم هي اللي حتعبِّر عن تديُّنهم أو الدين، والدين طبعا مكوِّن كبير جدا من الثقافة، ف دا الدور بتاع الدين. أختصر كلامي مرة تانية: أنا أفتكر إنو الإخوة الجمهوريين يحاولوا يعيدوا النظر في قصة إنو عاوزين يدونا [يعطوننا] Big Brush أو "ماجيك بولليت" يحلوا بيها مشاكلنا كلها. يكفي في الوقت الحاضر إنو الإخوة الجمهوريين يشيلوا ال "هولي قريل" دي ودا ال Magic Solution [الحل السحري] بالنسبة ليهم. بالمناسبة هسع المسلمين جايبين الجمل بما حمل. والله العظيم، أنا مشيت سنة 91 لليمن شلت معاي سيرة ابن هشام، قلت شوية كدا أصلح من ال [كلمة انجليزية غير واضحة] [السياق يعطي أنها تعني تحصيل] بتاعتي الدينية. أنا الكتاب دا ضربت بيهو الحيطة تلاتة مرات وللا أربعة مرات. وبقول لأصحابي إنو لو في حد كتب السيرة بتاعة هتلر ما ممكن يكتبها أسوأ من ديل. أنا أقول ليهم يعني: في السيدة زينب يحتمي بيها طفل يهودي صغير، تختوا [تضعه] بضهرها كدا يجو الجماعة يفتشوه ينزلوا سروالو يلقوهو العانة بتاعتو قامت يروحوا يمشوا يقتلوه؛ بس عشان العانة بتاعتو قامت. يهود بني قريظة قتل منهم 800 وكم، المهم الأعداد دي كلها مبالغ فيها. السيدة، الست اللي هجت الرسول صلى الله عليه وسلم، ومشوا ليها جابوا ليها جملين ربطوها من هنا ومن هنا والجملين كلٌّ على جيهة [ويوصف بيديه يعني شقها نصفين]، والرجل اللي مشى بالليل ويحكي كيف هو قاتل عدو الله اللي كان هو صاحبو وصديق، ناداهو بالليل استأمنو وقال لمن [عندما] سلم عليهو استل الخنجر وغرزو في ظهر عدو الله. دي الأشياء اللي بيدرسها الأزهر دي الغيبوبة بتاعة المسلمين اللي ماشة معاهم ليها سبعة قرون أو تمانية قرون I am not very sure of this [لست متأكدا جدا من هذا]. لو المسلمين أخدوا الفكرة بس بتاعة إنو الإسلام دا فيهو مستويات وأنو الأصل بتاعو هو القرآن المكي وإنو الشريعة وكل الأشياء اللي جاية في السيرة، صحيحة ولَّا [أو] غير صحيحة، لأنو برضو بيضيف ليها وشيء لخرجنا من الورطة اللي نحن فيها دي. الأشياء الروحية والفهم الراقي للجمهوريين يمكن يكون في المجتمع المدني في العمل الدعوي وما شابه ذلك. الإخوة في تونس هسع recently [مؤخرا] تكلموا عن أنو يكون في طلاق بين الدعوي والسياسي، العمل السياسي. ف الإخوة الجمهوريين لو أخدوا بس الفكرة دي، وطلَّعوا لينا الـ contribution [المساهمة] بتاعة الأستاذ محمود دي لي قدام بحيث إنو الناس التانيين يقدروا يبلعوها، لأنك إنت ما ممكن تجيب للناس a whole package [محمول كلي] وإنسان عندو ملاريا تجيب ليهو صديلية بأكملها وتقول ليهو يللا خودك [خذ] بلِّع الحاجات دي كلها عشان تبقى كويس وعشان تبقى اشتراكي وعشان ..... الإشكالية، الأزمة، الآن [تكمن] في الفهم بتاع الدين، والجمهوريين لديهم الحل وأنا من رأيي أنو الأستاذ محمود لو كان في بلد آخر، أو لو كان المسلمين فيهم النزعة دي بتاعة الفهم والنقاش الراقي وهنالك مجالات الحوارات الراقية، لكانت فكرتو انتشرت وأخدت طريقها. والآن أنا من رأيي أنو الجمهوريين يفكروا في هذا الأمر. للمرة التانية أنا أقول الكلام دا. شكرا جزيلا..
ــــ
هامش رقم 2 تعقيب الدكتور دالي على البروفيسور سكر:
الحقيقة نحن قبيل لمن [عندما] اتكلمنا عن الجماعة ديل، جماعات المنظمات الإسلامية بتطلع تشجب، أنو يقولوا داعش العملتو دا ما من الإسلام، لأنو بنعرف أنو الكلام البيطبق فيهو داعش هو الكلام الإنت قلت ضربت بيهو الحيطة بتاعة سيرة ابن هشام دا ذاتو موجود يعني. هم بيشجبوا والمقررات قاعدة زي ما هي. يعني الحقيقة أنا جبت معاي الآيباد دا، كنت فاكر أنو زول قد يحتاج لأي شيء يعني تثبيت للحاجات دي. أنو نحن المادة الموجودة في المقررات الدينية، وبتدرَّس الآن في المساجد، وفي المدارس، هي مادة داعش، ولذلك أن تجي تطلع إنت تشجب، دا قصد سياسي عشان تتصالح بيهو مع وزارة الخارجية الأمريكية ويدعوك للاجتماعات وعندما يكون أوباما عامل ليهو فطور بجيبوهم هناك الجماعة بتاعيننا ديل ذاتهم، لكن الموضوع الباقي في مسجدهم وفي كتبهم وفي الـ Web Sites [مواقعهم في الشبكة] بتاعتهم هو الكلام الإنت رفضتو هسع دا. المسألة البتخلق ليك المصالحة هي بس أنو الموضوع دا تاريخ البشرية يعني. موش [حاجة تانية]. بتبقى المشكلة لو داير تجيبو ليوم الليلة. الأستاذ محمود بيقول إنو إذا كان إنت عندك طاقة بتاعة قماش وعندك طفل عمرو سبعة سنين، بتفصِّل ليهو على قدرو هو في السبعة سنين دي. يعني ما بتعمل ليهو جلابية كبيرة تقول عشان ينمو جوَّاها. ف لمن [عندما] يبقى عمرو تمانية وعشرة واتناعشر لحدي ما يبقى 21 مؤكد التفصيلة بتاعة عمرو سبعة سنين دا ما بتلبِّسو. ف إنت ما داير تخليهو بدون لباس، وما داير تكسر جسمو عشان تنزلو لعمر سبعة سنين، عشان يكون to fit [يناسب] العراقي داك. ف بترجع للقماش الطاقة دي بتخيط منها. أهو دا الكلام البيقولو الأستاذ عن القرآن المكي والقرآن المدني. لكن إذا كان ما يتم الفهم دا ما بيكون في [هناك] تصالح مع الإسلام. لأنو إنت بتقرأ كلام بني قريظة وبتقيسو مع حقوق الإنسان في القرن الحادي والعشرين. لكن ما كدا. تاريخ البشرية دا كان عنيف جدا جدا، ودا السبب اللي بيهو الإسلام نزل من المستوى بتاع الإسماح والسلام للمستوى بتاع السيف. لأنو البشرية كانت في الوكت داك من.... دا مستواها ودي طاقتها ودي حاجتها. و"لا يكلف الله نفسا إلا وسعها". ولو إنت شفتا التوراة فيها العنف دا ذاتو اللي إنت بتلقاهو في الشريعة. فنحن بنفتكر لأنو الإسلام فيهو الجزء مما يلي التوراة اللي هي الشريعة، وفيهو الجزء اللي مما يلي الإنجيل اللي هو أصول القرآن. ويقول [القرآن]: "محمد رسول الله والذين معه أشداء على الكفار رحماء بينهم تراهم ركعا سجدا يبتغون فضلا من الله ورضوانا، سيماهم في وجوههم من أثر السجود، ذلك مثلهم في التوارة.. " اللي هو دا العهد الأول. "ومثلهم في الإنجيل كزرع أخرج شطأه فآزره فاستغلظ فاستوى على سوقه يعجب الزراع ليغيظ بهم الكفار" دا المستوى بتاع الرسالة التانية من الإسلام البقولو الأستاذ محمود. إنت قلت أنحن ما دايرين نجيب الأجزخانة كلها؛ نحن ما دايرين نجيب الاجزخانة كلها. لكن في مسألة لو الزول عندو ضغط وعندو سكري وحبوب الضغط بتنزل ليهو الكالسيوم بتديهو الحبة التالتة دي يعني. ما في مشكلة يعني. نحن قلنا دايرين ديمقراطية واشتراكية ومساواة اجتماعية. ف ما دايرين نجيب الاجزخانة كلها. بعدين الكلام دا مطروح للاقناع، نحن مش قلنا [لم نقل] والله إنتو تاخدوهو لأنو الله والنبي و... ولا بد كدا، ولَّا [أو] لو ما عملتو بيهو بتمشوا النار. نحن قلنا إذا كنا تلاتين ندعو ونجلس نبقى 31 نبقى 40 نبقى 50 [يقصد في المائة] plus one [50 في المائة زايد واحد] نجي نطبق الفكرة دي. يعني بنعمل شنو؟ قلنا يا جماعة نحن دايرين نعمل ديمقراطية في السياسة واشتراكية في المال ومساواة اجتماعية بين الناس. يعني نحن ما طالبنا الناس بشيتن [شيء] كتير. لكن عندنا حاجة زايدة على الناس. أنو البشرية دي في تطورها من "ألست بربكم" من قبل "ألست"، "إذ أخذ ربك من بني آدم من ظهورهم ذريتهم وأشهدهم على أنفسهم، ألست بربكم قالوا بلى" من الوقت داك لو أخدناها البشرية دي في تطورها لمن جات بشر الليلة ما جات فجأة، جات بعد تطور طويل جدا جدا اكتسبت مشاكل كتيرة جدا جدا نفسية، وأعتقد أنك كطبيب، إذا أنا أخدت الموضوع دا صاح، بتعرف أنو نحن عندنا يعني مشاكل وارثنها في عقلنا الباطن لا حصر لها. المشاكل دي دايرة حل. الحقيقة الحاصل بره دا انعكاس للموضوع الداخلي؛ يعني أنا رأسمالي لا أبالي بالآخرين لأنو عندي شُح وحرص وبخل. ودي هسع بيعبر عنها ترامب يقول Greed [جشع] بقولها يعني في وضح النهار والمايكروفونات قدامو ما شايف فيها مشكلة. ال greed دا هو البخليني أنا أشيل، أكون أنا باخد قدرك 422 مرة، لو قلت لي أكون معاك 421 مرة أقول لأ. أرفدك إنت لأنك رئيس النقابة بتعمل شوشرة علينا. دا موضوع نفسي عايز علاج. دا الموضوع النفسي. هسع الجماعة البيدَّعو الديمقراطية ديل، البشير دا 27 سنة الليلة، ماشي على تلاتين، لا لقى زول وسط الناس ولا وسط أخوانو يمسك منو. تلاتين سنة؟؟ مساهر. أردوغان. أردوغان هسع ماشي على هداهو يعني. (أحد الحضور قال: لكن هذه ديمقراطية يعني). دالي يواصل: طبعا أردواغان لأي زول بيعرف ما ديمقراطية لأنو الديمقراطية مش في الورق!. هسي البيشتكوا منها هنا بيشتكي ساندرز لأنو كل الموضوع دا اللجنة بتاعة الحزب الديمقراطي كانت ساعية سعي جاد جدا جدا، الاتكشف أخيرا في الـ leak [التسريب] بتاع الـ eMails [الرسائل الإلكترونية] أنو ما يجي، لأنو المؤسسة ما دايراهو. الديمقراطية قيمة هنا [يشير إلى قلبه] لو ما كدا بيكون تسرق الأوراق وتلخبط الواطة [الأرض]، لأنك إنت ما مقتنع بيها، بتكتبها في الورق، وبعدين تمشي تلتوي عليها. هسع إنت لو بتعرف، الإنقلاب دا قام على أردوغان الليلة أصبح بلستة [قائمة] فيها 2900 قاضي، إيه دخَّل القضاة مع الانقلاب، رفدهم تاني يوم. كيف؟ 70000 من الناس الليلة بين السجون أو فاقدين وظائفهم. كيف إنت بتقول دي ديمقراطية. بتمشي قوات الأمن التركية اللي هم الأخوان المسلمين؛ إنتو شوفتو في برنامج شاهد على العصر [مع الترابي] أنو التنظيم كلو جواسيس. كلو جواسيس الحزب! بيمشوا لي أي زول يلقوا عندو Literature [كتب أو مواد مطبوعة بأي شكل] من غولن [المعارض فتح الله غولن]؛ كتاب كاتبو أو كدا أنت بتمشي السجن وبتفقد الـ Job [الوظيفة أو الموقع].. الديمقراطية هي الخلاف في الرأي السماح للخلاف في الرأي. تعرف أنو دا ضدك وما موافق عليك وياخد فرصة مساوية ليك. لكن لأ!! الليلة الشكل بتاع الأخو المسلم الحقيقي طلع لمن [عندما] هو أصبح تاني يوم عندو قوائم بتاعة 70000 عاوز يصفيهم. فلا يمكن إنت تسمي دي ديمقراطية. الشاهد في الموضوع أنو ديمقراطية واشتراكية إنت ممكن تكتبها. في روسيا لمن جوا في سنة 17 كانت عندهم أماني كبيرة جدا جدا في دولة شيوعية مش [بس] اشتراكية. لكن انتهت. انتهت الدولة كلها لأنو اكتشفوا في النهاية أنو ناس الحزب الشيوعي ياهم زي ناس الأخوان المسلمين دايرين البيوت الكبيرة والعربات الكبيرة. ف إنت في مشكلة نفسية. يعني نحن بنرفع ليها النموذج النبوي. النبي صلى الله عليه وسلم يقول: "أنا عبد آكل كما يأكل العبد وأجلس كما يجلس العبد". وكان يرقع ثوبه ويحلب شاته ويخصف نعله ويردف على دابته. وكان لمن العربي يجي تاخدو الهيبة يرتجف أمامو يقول ليهو: هوَّن عليك إنما أنا ابن امرأة من قريش كانت تأكل القديد. دي الروح الديمقراطية. ليه؟ لأنو هو الموضوع دا عالجو نفسيا. وإنت بتطرح المنهاج النبوي ليعالجك. لأنو ما يكفي الكتابة في الورق. الكتابة في الورق ممكن تكون جميلة جدا جدا، والفعل مخالف لأنو النفس شحيحة والنفس متكبرة، والنفس مريضة. عندها إلتواء. إذا إنت عندك ليها علاج بتجعل التحقيق دا ممكن. ودا اللي نحن بنرفع ليهو منهاج النبي صلى الله عليه وسلم في علم النفس. لكن دا كلو بيتم بالإقناع، إذا ما تم إقناع ما حدَّش بيجي فيهو. إذا اقتنعوا بيهو الأغلبية تجي! وتلقى حقها بدون ما زول يوصفها ويقول ليها إنتِ ابتزاز الإيه إيه دا إلى الآخر.
في كلام عن الكنيسة. أول حاجة نحن في الدين بنرفض، في الإسلام، أنو يكون في جهة مسئولة عن تفسير الدين. ودا العمل الهسع الأزهر والجماعات دي محاولة تحتكرو. كبار العلماء في السعودية أو رابطة العالم الإسلامي أو الأزهر، دايرين يحتكرو هم. في الدين دايرين يقولوا نحن رجال الدين؛ إنتو مدرسين وأطباء ونجارين وسباكين دا ما موضوعكم. دا في الدين مرفوض تماما. مصدر الدين إن شاء الله إنت أمي "هو الذي بعث في الأميين رسولا منهم". أمي تعمل بالمنهاج تكون عندك علم إنت رجل دين، المرأة تعمل بالمنهاج عندها؛ هي مرأة دين. ما فيش احتكار لتكون في مؤسسة عندها صلاحية لتعبِّر لينا هي عن الدين. بعدين الدين في المستوى اللي نحن بنتكلم عنو، أنو إنت إذا مقتنع بالفكرة دي في الموضوع الاقتصادي والموضوع السياسي والاجتماعي تطبقها، ولو ما مقتنع بيها إنت حر موفور الكرامة، ما حد بيديك أي صفة بتاعة زنديق أو كافر أو كدا ولا يترتب عليها أي عنف ولا عقاب ولا أي شيء. إذا اقتنعت كلنا بقينا أغلبية بيجي مننا ممثلينا لينفذوها، إذا ما اقتنعوا يقنبوا [يجلسوا] في الخارج.
|
|
  
|
|
|
|
|
| العنوان |
الكاتب |
Date |
 في سبيل إصلاح ذات البين بين الجمهوريين | Yasir Elsharif | 04-16-16, 12:40 PM |
| Re: في سبيل إصلاح ذات البين بين الجمهوريين | عاطف عمر | 04-16-16, 01:07 PM |
| Re: في سبيل إصلاح ذات البين بين الجمهوريين | Yasir Elsharif | 04-16-16, 06:45 PM |
| Re: في سبيل إصلاح ذات البين بين الجمهوريين | فقيرى جاويش طه | 04-16-16, 08:13 PM |
| Re: في سبيل إصلاح ذات البين بين الجمهوريين | Yasir Elsharif | 04-16-16, 08:59 PM |
| Re: في سبيل إصلاح ذات البين بين الجمهوريين | Yasir Elsharif | 04-16-16, 09:01 PM |
| Re: في سبيل إصلاح ذات البين بين الجمهوريين | Yasir Elsharif | 04-16-16, 10:20 PM |
| Re: في سبيل إصلاح ذات البين بين الجمهوريين | Yasir Elsharif | 04-16-16, 10:24 PM |
| Re: في سبيل إصلاح ذات البين بين الجمهوريين | Elmoiz Abunura | 04-16-16, 10:51 PM |
| Re: في سبيل إصلاح ذات البين بين الجمهوريين | أبوبكر بشير الخليفة | 04-17-16, 03:23 AM |
| Re: في سبيل إصلاح ذات البين بين الجمهوريين | Yasir Elsharif | 04-17-16, 09:44 AM |
| Re: في سبيل إصلاح ذات البين بين الجمهوريين | Yasir Elsharif | 04-17-16, 11:23 AM |
| Re: في سبيل إصلاح ذات البين بين الجمهوريين | Yasir Elsharif | 04-18-16, 10:27 AM |
| Re: في سبيل إصلاح ذات البين بين الجمهوريين | Yasir Elsharif | 04-21-16, 09:20 AM |
| Re: في سبيل إصلاح ذات البين بين الجمهوريين | Yasir Elsharif | 04-21-16, 09:57 AM |
| Re: في سبيل إصلاح ذات البين بين الجمهوريين | Kostawi | 04-21-16, 05:41 PM |
| Re: في سبيل إصلاح ذات البين بين الجمهوريين | Yasir Elsharif | 04-22-16, 09:43 AM |
| Re: في سبيل إصلاح ذات البين بين الجمهوريين | Yasir Elsharif | 04-22-16, 10:25 AM |
| Re: في سبيل إصلاح ذات البين بين الجمهوريين | اميرة السيد | 04-22-16, 10:30 AM |
| Re: في سبيل إصلاح ذات البين بين الجمهوريين | Yasir Elsharif | 04-22-16, 11:43 AM |
| Re: في سبيل إصلاح ذات البين بين الجمهوريين | Kostawi | 04-23-16, 10:31 PM |
| Re: في سبيل إصلاح ذات البين بين الجمهوريين | Yasir Elsharif | 04-23-16, 11:28 PM |
| Re: في سبيل إصلاح ذات البين بين الجمهوريين | Yasir Elsharif | 04-23-16, 10:58 PM |
| Re: في سبيل إصلاح ذات البين بين الجمهوريين | Yasir Elsharif | 04-23-16, 11:10 PM |
| Re: في سبيل إصلاح ذات البين بين الجمهوريين | Yasir Elsharif | 04-23-16, 11:15 PM |
| Re: في سبيل إصلاح ذات البين بين الجمهوريين | Yasir Elsharif | 04-23-16, 11:25 PM |
| Re: في سبيل إصلاح ذات البين بين الجمهوريين | Kostawi | 04-24-16, 05:03 AM |
 Re: في سبيل إصلاح ذات البين بين الجمهوريين | عبدالله الشقليني | 04-24-16, 08:57 AM |
| Re: في سبيل إصلاح ذات البين بين الجمهوريين | Yasir Elsharif | 04-24-16, 03:56 PM |
| Re: في سبيل إصلاح ذات البين بين الجمهوريين | Yasir Elsharif | 04-24-16, 04:51 PM |
| Re: في سبيل إصلاح ذات البين بين الجمهوريين | عبدالله الشقليني | 04-25-16, 04:20 AM |
 Re: في سبيل إصلاح ذات البين بين الجمهوريين | Yasir Elsharif | 04-25-16, 09:05 AM |
| Re: في سبيل إصلاح ذات البين بين الجمهوريين | Yasir Elsharif | 04-25-16, 11:41 AM |
| Re: في سبيل إصلاح ذات البين بين الجمهوريين | Yasir Elsharif | 04-25-16, 02:24 PM |
| Re: في سبيل إصلاح ذات البين بين الجمهوريين | Yasir Elsharif | 04-25-16, 04:06 PM |
| Re: في سبيل إصلاح ذات البين بين الجمهوريين | Yasir Elsharif | 04-25-16, 04:09 PM |
| Re: في سبيل إصلاح ذات البين بين الجمهوريين | Yasir Elsharif | 04-25-16, 04:11 PM |
| Re: في سبيل إصلاح ذات البين بين الجمهوريين | Yasir Elsharif | 04-25-16, 04:26 PM |
| Re: في سبيل إصلاح ذات البين بين الجمهوريين | Yasir Elsharif | 04-25-16, 04:48 PM |
| Re: في سبيل إصلاح ذات البين بين الجمهوريين | عبدالله الشقليني | 04-25-16, 05:42 PM |
| Re: في سبيل إصلاح ذات البين بين الجمهوريين | Yasir Elsharif | 04-25-16, 06:58 PM |
| Re: في سبيل إصلاح ذات البين بين الجمهوريين | عبدالله الشقليني | 04-26-16, 05:42 AM |
| Re: في سبيل إصلاح ذات البين بين الجمهوريين | Yasir Elsharif | 04-26-16, 01:07 PM |
| Re: في سبيل إصلاح ذات البين بين الجمهوريين | Yasir Elsharif | 04-26-16, 09:13 PM |
| Re: في سبيل إصلاح ذات البين بين الجمهوريين | Yasir Elsharif | 04-26-16, 09:23 PM |
| Re: في سبيل إصلاح ذات البين بين الجمهوريين | Yasir Elsharif | 04-26-16, 11:28 PM |
| Re: في سبيل إصلاح ذات البين بين الجمهوريين | Yasir Elsharif | 04-26-16, 11:34 PM |
| Re: في سبيل إصلاح ذات البين بين الجمهوريين | Yasir Elsharif | 04-27-16, 00:32 AM |
| Re: في سبيل إصلاح ذات البين بين الجمهوريين | Yasir Elsharif | 04-27-16, 00:45 AM |
| Re: في سبيل إصلاح ذات البين بين الجمهوريين | Yasir Elsharif | 04-27-16, 00:48 AM |
| Re: في سبيل إصلاح ذات البين بين الجمهوريين | Yasir Elsharif | 04-27-16, 00:51 AM |
| Re: في سبيل إصلاح ذات البين بين الجمهوريين | Yasir Elsharif | 04-27-16, 00:57 AM |
| Re: في سبيل إصلاح ذات البين بين الجمهوريين | عبدالله الشقليني | 04-27-16, 05:38 AM |
| Re: في سبيل إصلاح ذات البين بين الجمهوريين | Yasir Elsharif | 04-27-16, 10:10 AM |
| Re: في سبيل إصلاح ذات البين بين الجمهوريين | Yasir Elsharif | 04-27-16, 09:31 PM |
| Re: في سبيل إصلاح ذات البين بين الجمهوريين | Yasir Elsharif | 04-28-16, 10:20 AM |
| Re: في سبيل إصلاح ذات البين بين الجمهوريين | عبدالله الشقليني | 04-29-16, 05:05 PM |
| Re: في سبيل إصلاح ذات البين بين الجمهوريين | الشفيع وراق عبد الرحمن | 04-29-16, 06:39 PM |
| Re: في سبيل إصلاح ذات البين بين الجمهوريين | Yasir Elsharif | 04-29-16, 11:21 PM |
| Re: في سبيل إصلاح ذات البين بين الجمهوريين | عبدالله الشقليني | 05-01-16, 12:48 PM |
| Re: في سبيل إصلاح ذات البين بين الجمهوريين | عبدالله الشقليني | 05-02-16, 04:17 AM |
| Re: في سبيل إصلاح ذات البين بين الجمهوريين | Haydar Badawi Sadig | 05-02-16, 06:30 AM |
| Re: في سبيل إصلاح ذات البين بين الجمهوريين | عبدالله الشقليني | 05-02-16, 05:32 PM |
| Re: في سبيل إصلاح ذات البين بين الجمهوريين | Yasir Elsharif | 05-03-16, 07:56 AM |
| Re: في سبيل إصلاح ذات البين بين الجمهوريين | Yasir Elsharif | 05-03-16, 09:51 AM |
| Re: في سبيل إصلاح ذات البين بين الجمهوريين | عبدالله الشقليني | 05-03-16, 06:52 PM |
| Re: في سبيل إصلاح ذات البين بين الجمهوريين | Yasir Elsharif | 05-03-16, 11:53 PM |
| Re: في سبيل إصلاح ذات البين بين الجمهوريين | Yasir Elsharif | 05-05-16, 11:22 AM |
| Re: في سبيل إصلاح ذات البين بين الجمهوريين | Yasir Elsharif | 05-07-16, 12:44 PM |
| Re: في سبيل إصلاح ذات البين بين الجمهوريين | عاطف عمر | 05-07-16, 01:50 PM |
| Re: في سبيل إصلاح ذات البين بين الجمهوريين | Yasir Elsharif | 05-09-16, 01:53 PM |
| Re: في سبيل إصلاح ذات البين بين الجمهوريين | عبدالله الشقليني | 05-13-16, 08:59 AM |
| Re: في سبيل إصلاح ذات البين بين الجمهوريين | Yasir Elsharif | 05-15-16, 10:03 PM |
| Re: في سبيل إصلاح ذات البين بين الجمهوريين | Yasir Elsharif | 09-23-16, 10:26 AM |
| Re: في سبيل إصلاح ذات البين بين الجمهوريين | Yasir Elsharif | 09-23-16, 11:04 AM |
| Re: في سبيل إصلاح ذات البين بين الجمهوريين | Yasir Elsharif | 09-26-16, 03:00 PM |
 Re: في سبيل إصلاح ذات البين بين الجمهوريين | Yasir Elsharif | 09-26-16, 03:22 PM |
| Re: في سبيل إصلاح ذات البين بين الجمهوريين | Yasir Elsharif | 10-11-16, 03:56 PM |
| Re: في سبيل إصلاح ذات البين بين الجمهوريين | Yasir Elsharif | 10-12-16, 05:23 PM |
| Re: في سبيل إصلاح ذات البين بين الجمهوريين | Yasir Elsharif | 10-15-16, 07:11 AM |
| Re: في سبيل إصلاح ذات البين بين الجمهوريين | Yasir Elsharif | 10-24-16, 11:23 PM |
| Re: في سبيل إصلاح ذات البين بين الجمهوريين | Yasir Elsharif | 10-25-16, 06:09 AM |
| Re: في سبيل إصلاح ذات البين بين الجمهوريين | Yasir Elsharif | 10-25-16, 07:02 AM |
| Re: في سبيل إصلاح ذات البين بين الجمهوريين | Yasir Elsharif | 10-25-16, 07:35 AM |
| Re: في سبيل إصلاح ذات البين بين الجمهوريين | Yasir Elsharif | 10-25-16, 08:17 AM |
| Re: في سبيل إصلاح ذات البين بين الجمهوريين | Yasir Elsharif | 10-25-16, 09:38 AM |
| Re: في سبيل إصلاح ذات البين بين الجمهوريين | Yasir Elsharif | 10-25-16, 10:09 AM |
 Re: في سبيل إصلاح ذات البين بين الجمهوريين | Yasir Elsharif | 11-01-16, 10:17 PM |
|
| |
Yasir Elsharif
فيس بوك
تويتر
انستقرام
يوتيوب
بنتيريست