المقشطة عند البنايين حاجة كدة بيحكوا بيها البوهية الما عايزينها وعند الميكانيكية آلة زي المخرطة لكن بتشتغل على الحديد في خط مستقيم وبتشيل الحديد الزائد لحد ما يصل لتخانة معينة. في السودان ناس الحلويات بيغرفوا بيها الباصطة، هي ذااااتا، بعد ما يغسلوها بعدين بتنضف براها وتلمع من كتر الغرف ومرات بتلقاها اتأكلت من قدام بسبب الحككان الشديد مع صواني الباصطة، الحديد الرايح مشى وين الله أعلم، جنكم باصطة مرات بيسموها الاسكريبة، أها، هنا لو عندك بوست متابعو وشايفو مهم وجا واحد مزعج ومصر يتداخل بالعندو (والماعندو) عشان يغير المسار أو يمرر فكرة خاصة بيهو أو عشان يظهر ساكت زي شارلي شابلن في الفيديو التحت دا تقوم تقشطو، تشيلو من البوست جَف، شيلة التالول من الجلد، تاني ما بيظهر.
السيناريو:
1 بوست لموضوع مهم ومركزي يهم الأغلبية يظهر في نصو شخص مزعج لا يدري أنه يحرف الموضوع. 2 بوست مسخن فيهو نقاش حار أو مواجهات لكن الكل يناقش بطريقة منطقية وفي فوائد من النقاش في جميع المراحل، ما عدا واحد
المتطلبات:
1 بوست مسخن أو في موضوع نشط وهدفك عضو متداخل.
التنفيذ:
1 المداخلة الأولى (الضربة) خليها سريعة وحاسمة وعنيفة ومباغتة لأنو لو اتراخيت الخصم حيجي راجع دمو فاير وتبقى معركة جانبية وتكون بوظت البوست وما حتعرف تنهي المعركة وغالباً يتدخل سيد البوست لتوبيخك وما أظن في زول حيقيف معاك كلو كلو بل تبقى وبال عليك 3 الخطة البديلة مافي، الخصم من النوع دا زي ديك العدة فلو مقشطتك ما سنينة أخير تخليهو يرتع لو ما كنت واثق إنو القشطة حتخليهو يختفي.
النتائج المتوقعة:
1 الصدمة والترويع المقشوط غالباً يشعر بالمفاجأة ويحس بأنو لأول مرة بأنو الناقصو كتير وما صاح يدخل نفسو في المواضع المشابهة.
الأسلوب:
1 أسلوب واحد صارم وجاد.
النكهات:
1 دي مافيها نكهات لأنها بتعتمد على السرعة.
النماذج العملية:
1 دى شنو كمان حكاية تعديل القرآن دى؟ Re: دى شنو كمان حكاية تعديل القرآن دى؟Re: دى شنو كمان حكاية تعديل القرآن دى؟ هنا المكشوط منتصر جا يلاطع ساكت ، فكشطناهو فقعد لنهاية الموضوع، يعاين ساكت
الملاحيظ:
المقشطة عادة بتكون مع زول لا يرجى منه وما عزيز عليك، لكن أعمل حسابك لو ما بتعرفو قبل كدة احتمال الكورة تجيك صادة وتنقشط انت
أعمل حساب إنو القشطة تكون في الموضوع الجانبي الابتدرو المقشوط، لأنو لو قشطتو في صلب الموضوع حتفتح باب جانبي انت ذاتك ويلموا فيك جماعة المقشوط
الخطة دي ما دايرة كلام كتير، تشتغلها زي الكوماندوز عملية برقية خاطفة، شيلو برة، اختفو حي أكلو ني.
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة