جنوب السودان بين الوحدة والانفصال

Quote: وينك يا مونج - مونج دى بمستخدمها بمعنى يا ابو الشباب او يا اصلى ويا فردة ولا ياقربه- وغيرها من مفردات شعبيه حميمه و انا بستخدم مفردة مونج لى زول حسيت انو فى مشترك ما بيننا...... ويمكن تطوير المشتركات الى برنامج عمل منتج ومثمر لكل السودان سواء كان سودان واحد ولا اربعه-ايوا اربعه يامان عديل كدا مش جنوب وشمال تيمان برقو المبتفرقو ديل ولا حيتفرقو ؟اللهو ورسولو تعلم. وقبال ما ترجع لى متل ماقلت...خلينى اقول ليك انو رد ذى-المخطط امريكى ضمن مشروع القرن الافريقى الكبير ومتاح فى النت- القلتها لى دى-وماداير اتسرع وافتكرك اضايقتك من اسئلتى- لا ابدا...بس هى ممكن تكون مقدمه او تقود لى حوارات ونقاشات غير جادة.و النت فيهو ما لزة وطاب عن السودان وعن افريقيا- القرن الافريقى الكبير؟؟؟- وهنا انحنا وبالاصح انا عن زات نفسى فى تصورات ومشروعات حقت دول تانيه عندها مصالحها الخاصه سواء كانت عن افريقيا ولا السودان والبهمنى انو انا قاعد اشوف التصورات المشروعات دى كيف ومن ياتو حته-زاويه- فانت مثلا ممكن تورينا رايك فى المشروع الامريكى للقرن الافريقى وبتتفق معاهو وين وبتخلتف وين-ولاشنو؟. وتاكد انا لو لقيت كلام عندو علاقه بى موضوعنا دا الهو-جنوب بين الانفصال والوحدة- بجيبو ليك هنا ماحقول ليك امشى المكتبة لا امشى النت.ياهو النقاش ماشى كويس فى موضوع الجالدونق المفكر الاسلامى-المعتدل.الاصلاحى.المستنير.العقلانى الى اخر قائمه النعوت البلاغية البيقولوها عنو الناس فى الخرتوم- وكل الاوصاف ولا النعوت دى موضوع قابل للنقاش والجدل وبنجى ليها لمن نتكلم عن مقالو الانت جايبو لينا هنا للاخز والرد...والسؤال هنا يامونج انت جبت المقال والاخوان قالو رايهم فيهو..طيب انت رايك وينو فى المقال دا؟ لانو شايفك بعد مانزلت المقال عملت كوت طويل وطوالى قلت عندك قريبك من شندى كان فى الجنوب وقال ليك الانفصال حيصل يحصل فى سنه الفين وحداشر يوم الاستفتاء...طيب قريبك دا اكيد وراك ليه الانفصال حيصل ولاياتو اسباب...طيب ماحسن تحدد لينا الاسباب دى ولا شنو؟ ولا انت متفق ميه فى الميه مع كاتب المقال؟ وطبعا مسالة الاتفاق ميه فى الميه مابتجى فى موضوع وفكار البشر ولا نكون قاعدين نتعامل مع الافكار البشرية كدين وانحنا كمؤمنين سامبلا ساكت. والبوست مهم جدا جدا. وتحيه خاصه للمونج دينق وعيد سعيد لى كل الاخوة المشاركين فى البوست دا.