خبايا مشروع أبولو وخدعة الوصول للقمر

Quote: سلامات يا الصادق .. ياخي أنا شايفك مكرِّن في حكاية دليل علمي دي بدون تصوٌّر لكُنْه ودلالة دليل عملي ذاتو .. إنت في تصورك أن دليل علمي معناها تجربة معملبة في أنبوبة إختبار؟؟ .. ياخي الدليل العلمي ممكن يكون عقلي - إستنتاج رياضي - أو تجريبي .. وديل ذاتهم أنواع .. في البوست ده لمن حاتم يقول ليك حزام فان ألن يمنع الهبوط علي القمر ده كلام علمي .. لأنه بيشير ليك لحسابات التعرض للإشعاع بإعتبار أنواع الإشعاعات التي يتعرض لها المسافر والزمن الذي يستغرقة في حمام الإشعاع هذا .. ولمن يتكلم عن إمكانية الهبوط العمودي للصاروخ ده برضو حجة علمية ، ولمن يقول ليك إنو الشركة المصنعة التي تعتمد عليها ناسا هي لغاية الآن في طور تجارب لأشياء مفترض تكون أنجزتها في رحلة أبولو ، ده كلام علمي بيؤكد ليك بيان بالعمل أن الجهة المفروض إستخدمت تكنولوجيتها من سنة 69 هي لغاية - دلوقتي - بتعك في تلك التجربة معناها الكضاب نساي .. ده كله كلام علمي .. فإنت يجب عليك تعديل مفاهيمك لمعني دليل علمي .. الرياضيات مثلاً هي علم نظري بحت تقوم عليه كل التجارب العملية .. ولذلك عندما عالم رياضيات يجيب ليك نظرية رياضية ما تجي قول ليهو وينو دليلك العلمي -التجريبي - .. لأنو ناس التجريب هم المفروض يثبتوا تطابق تجربتهم مع الموديل الرياضي .. - الفلاسفة قالوا أن هناك طريقين فقط للوصول لليقين هما الطريقة الرياضية والطريقة الصوفية - تضحك؟ - فبقول ليك شنو ما تقعد تعك في دليل علمي دليل علمي زي أصحابنا أنصار السنة القلتهم ليك .. لأنو ال14 صفحة الفاتو ديل مليانة كلام علمي ودلائل علمية .. ما تبقي لينا زيي العريبي الدخل السينما أول مرة وكان الفلم كله ضرب وموت .. وبعدما الفلم إنتهي الجمهور كله إتخارج وفضل هو براهو قاعد مصنقر .. جاء الزول البيلملم القزاز قال ليهو يا زول إنت قاعد حارس شنو؟ قال حارس الجنازة لامن تمرق .. جنازة الدليل العلمي ياخوي مرقت زماااان ..