اخونا كبر .. ألحق صورة كردفانك!!

Quote: الباقر..حبابك يا صديق و كل سنة و انت طيبة..و التحية لناس الجبهة الثورية.. Quote: أساس مشكلتنا في السودان هو عدم الإرتفاع للوعي القومي بعد منذ الإستقلال فشلت النخبة الحاكمة في أن ترى في الوطن أبعد من مناطق محدودة جدا من المركز إذا أنارت شارع الجمهورية والقصر فقد قامت بواجبها تجاه كل السودان الذي لم تره يمتد خارج تخوم الخرطوم لو كنت وقفت في مشكلة الوعي القومي فقط..كان اتفقنا معك..و لكن استشهادك بحكاية انارة الشارع الواحد..فهنا يا صديقي مشكلة كبيرة..و ح تخطك في موقف مضحك للغاية..و هو موقف لا يرى الواقع بالدقة المطلوبة.. و ان كنت تثق في شخصي و في مشاهدتي فاقول لك الآتي: حضرت اواخر زمن نميري..و حضرت زمن حكم الديموقراطية و حضرت الناس ديل لغاية سنة 1999...و كنت اعيش في امبدة الحارة اربعطاشر جوار محطة القديمة و سوق كرور..و كانت المنطقة غير مخططة وبنشرب موية منقولة بالحمير (الله يكرمك و يكرم القارئين و القارئات)..و بنولع بفوانيس الجاز..و مافي حاجة اسمها مكيفات و مرواح.. لأنو ما عندنا كهربة..! رجعت في اكتوبر من السنة دي..اول حاجة البيت الكنت ساكن فيهو ما عرفتو..و تهت منو..المنطقة اتخططت..الشوارع سلكت..و الناس عندها موية و انارة و مكيفات و شوارع ظلط في حارات ما كان الواحد متوقع انها تصلها باخوي و اخوك..ده فيما يخص العاصمة.. الأقاليم.. شبكة الإنارة القومية.. بعض منها وصل مدينة ابي زبد ..و شوارع الهوا بقت شوارع ظلط (و دي بنية تحتية موجودة في الواقع هناك)..! شوارع الدلنج الصغيرة.. بعضها اتسفلت..و الإضاءة بعمدان تعمل بالطاقة الشمسية.. و الجامعة حصلت فيها امتدادت ..و شبكة الموية عادت تعمل من تاني..! الكلام ده يا الباقر مش تطبيل لجهة دون الأخرى.. لكن تنوير .. لأنو الحنك بتاع الحاجات ما وصلت لبعض بيكون مشكلة في تسويق القضايا.. الناس هناك بقت ما عندها مشكلة منو يمشي قصر غردون.. لكن بتسألك بذكاء شنو ح يقدم لينا بالضبط.. لأنو زي ما الناس دايرة تغير السودان.. برضك الناس هناك بتقول ليك شنو المقابل..!! و نفس الناس القاعدة تستخدم هذه الخدمات بتقارن بالأزمنة السابقة و بتقول لقينا حاجة شوية..و بتواصل تسب ليك سلسفيل الحكومة و بتواصل زهجها من الحكومة.. لكن زهج ماظني الجبهة الثورية تقدر تستفيد منو و توظفو بصورة سليمة..!! الناس يا الباقر ممكن تتكلم ليها عن التغيير لغاية السنة الجاية و بتسمع منك و بتمشي في غرضها..و لو قلت ليها ارحكم نغير مافي زول ح يشتغل بيك.. لكن لو قلت ليهم بالكضب ساكت.. ارح نغير عشان شريحة الإتصال تكون بي عشرة قروش..علي بالحلال تلقى الشوارع كلها مرقت تاني يوم..!!! النقطة الداير اقولها.. الأفضل نكون مواكبين و نقدم خطاب مواكب و بيملاس حاجات الناس بصدق.. عشان الناس تقيف معاك .. لكن الخطابات القديمة مافي زول ح يشتغل بيها كتير..! و كل سنة انت طيب يا صديق كبر