المطلقه مابين مطرقه المجتمع ونيران الفهم الذكوري[/QUOTE]

Quote: مواصلة لما انقطع: يعني وانتي نفسك مقطوع ومازومه وزهجانه من فشل علاقة وانهيار عالم بنيته علية امال تكوني مطالبه باكثر من حيل لعتالة ارث المجتمع الذي تعيشين فية ...تجرجري خطواتك المنهكه وتمشي لاقرب ماذون في الغربه عشان يفتي في النهايه بضروره حضور الزوج للحصول علي الورقه، تطنطن الدنيا فيك من جوه ( هو لوكان زول بتفاهم انا جيتك...) ، ولا تجد حظ احسن عند ناس المجمع الاسلامي . يهدوك اهل الحل والعقد من بني جلدتك للاسراع الي السفارة لانه مافي طريقه غير رفع قضيه ...ومتابعته من هناك تجرجر حيلك تاني وتمشي تقعد قدام سفير اقل وصف ممكن توصفه بيهوا هو الوقاحه ( انتي منو .../ بت منوا ../ واهلك وين .../ وراجلك دا زاتوا منو../ وقاعد وين .../ وانتي المقعدك هنا شنوا بعد الانفصال ما تمشي اهلك ../ انا ما بعمل الموضوع دا الا تديني تلفون اهلك / او يتصل بي واحد من اخوانك / عيوني بفيضوا بالدموع ..بحس انه انا لا شئ .. متجاوزني العالم حتي في اشد اشيائي خصوصيه ../ يتدخل مرافقي ليوضح حساسيه الموضوع .. يتنحنح ويستغفر عشان يلهم الله عليهوا ويقول خلاص ..نحنا خايفين عليك .. صغيرة وشكلك بت ناس وما شكل بهدله ... عاوزين نحافظ عليك ما اكتر ...يا الله من علب السردين المابتكمل في هذا العالم كل واحد يشوف وشي يحضر ليهوا علبة وينشني تجاهه ..وانا غايبه في ألمي ما بين عذاب اللحظه وحقي في اتخاذ القرار...قلت ليهوا اهلي عملوا الواجب رسلوا ود اختي راجل يعني عمره 19 ينفع يجيك ... قال خير امشي اكتبي لينا طلب وقدميهوا ومعاهوا القسيمه بعداك بنشوف ...اها صدقتوا وعملت طلب اضافه وبذلت جهدي لمقاومه الرغبه في صفعة لصفاقته وعدم لباقته التي تعامل بها معي .. . الطلب كان في رمضان ولانهم هم رحماء وراعوا صله القربي والدم وكدي باعتباري سودانيه قاموا اتصلوا علي في رمضان الذي يلية، يعني بعد مرور حول علي تقديم الطلب عشان يقولوا لي خلاص تعالي نحن وافقنا علي رفع القضيه خلاص .. حليلكم ...كنت عندها قد طرقت ابواب المحاكم الاجنبية ...وشرعت في موضوع دام ثلاثة اعوام ونصف ... المهم اتخلصت اخيرا ...من هم نائت عن حمله الجبال ...وقررت ان افتح نوافذي للهواء كما عهدتها سابقا بدون ارتباط ...ولا زول ينطط ليك في راسك ... يقول ليك افتكر كدة ...واعتقد ذاك ...ولا يحزنون... امامي الحياة بأكملها ... طفله اقوم بواجب الامومه تجاهها بدون صداع او توجيهات ... مواصلة دراستي العدو الاول لزوج العمر وفارس الاحلام ...وتجربه الغربه التي لم افلح في فك شفرتها او التعامل معها طيله الخمسة اعوام التي عشتها في القفص الخشبي ... وعمر بكامله لانسي ... نفسيا لم اكن مهيئه لتعاطي العالم الخارجي الا بعد مرور عامين من الانفصال ... كنت اخجل ان سألت اين والد الطفلة ... ارد بأنه مسافر ...ولم اقوي علي مواجهة الناس في البدايه بحقيقة انني اسعي للطلاق الا بعد مرور ثلاث اعوام من الانفصال ...تجنبت تجمعات السودانيين ومناسباتهم ...وعند ما اتورط في مناسبه كنت اجلس كالبكماء ... انطوي علي نفسي ... واتوقع لحظة انطلاق قنبله السؤال ... الاخت سودانية / من وين .../ اسم ابوكم منوا .../ ساكنين وين ... كانت هذة الاسأله تغتال كل ذرة شجاعة داخلي ولا اجد سوي الكذب ... لاحقا عرفت انه خوف من الناس نفسهم ومن تجربه الغربه التي اعيشها لاول مرة في حياتي بطفله صغيرة .... خوف من نفسي ان لا اكون قدر المسئولية خوف من المجتمع بصورته السلبية التي نجح ذوي القربي تماما في رسم مللامحه المظلمه...بداخلي الغربه قاسيه .. ما حا تقدري عليها ... بتك صغيرة ... جيبيها وارجعي كان راجعه .... انتي صغيرة ما بتقدري علي البهدله ... انتي مدلعه الغربه عاوزة زول ملحلح ... عبارات كثيرة كلما ذكرتها الان يتبين لي قدر شنو كان العالم دا قاسي وعندوا القدره علي نحت الخوف تماثيل بداخل المرأة فقط ليحارب مشروع بناء شخصيتها بعيد عن وصايته,,,, المهم ناس البيت اتهدّ حيل سؤالهم بتنصيب ابن اختي الذي جاء للدراسه حيث اقيم كحامي لشرفهم .. وكده الزول كسب كرت توازن وقبول اجتماعي لا بأس به ... ونواصل ....

(عدل بواسطة Alia awadelkareem on 02-07-2006, 09:00 AM)
(عدل بواسطة Alia awadelkareem on 02-07-2006, 09:14 AM)
(عدل بواسطة Alia awadelkareem on 02-07-2006, 09:43 AM)
(عدل بواسطة Alia awadelkareem on 02-08-2006, 07:37 AM)