حلفاية الملوك ما أحلى مدرستك الصغرى ، ذكريات تتحدى التاريخ

Quote: و الله ما عارفة ليه لكن الحلفاية احساسها تاني ولما تكون من الحلفاية أو سكنت فيها بالجد الاحساس بيكون تاني. مش بس احساسك بنفسك لكن احساسك بالناس الفيها . وفي اي مكان لما تلاقي زول من الحلفاية او سكن فيها بدون ما تشعر بتبتسم و تفرح فرحة شديدة . عشان كدا أول ما لقيت البوست بتاع أنور الطيب وفيه الكمية دي من ناس الحلفاية فرحت زي فرحت الشفع بالعيد وكأني لي من الحلفاية زمن طويل وكـأني ما ساكنة فيها وكل يوم بمشي وأجيها وطوالي طبعته واديت نسخة لابوي عابدين جماع ونسخة لخالتي نعمات جماع و اليوم داك بقيت اتنطط زي الشفع واسأل أها ودا منو وأهلوا منو و طبعا نعمات جماع مرجع وريتني الناس كلها . وقالت ليك يا أنور مشتافة ليك شديد ولمن عرفت انك جيت ومالقيتها زعلت زعل شديد و قالت ليك عليك الله تجي تاني . و بديت اتذكر ايام الروابط في الحلفاية كان في سبق بين ناس الخرطوم وناس الفرع . كورسات صيفية و حملات تطعيم و محاولات جادة للنهوض بالحلفاية . للاسف دا كلو بقى مافي بقى عشان الناس تتلاقى مشكلة يا الله يا الله في المناسبات و بقى الناس مابتتعارف يكونوا في جامعة واحدة و ما بعرفوا بعض وشوية شوية بقى ما في التعصب الجميل للحلفاية و الجيل الجديد ما عندوا اي فكرة عن جمال الحلفاية وروعتها واللمة بقت الا في بوست زي حق أنور دا أو زي عزومة مصطفى حقت الشاي . غايتو لازم نرجع تاني عايزاكم تدلوني كيف . كيف نقدر نلم الناس من تاني وكيف نرجع نهتم بالحلفاية وامورها . مستنية ردودكم و عايزة اشكر انور الطيب الخلاني احس الاحساس الجميل دا و كمان مصطفى دوليب الاستقبلني بكل ترحاب و الشكر الجزيل لبكري اللم الناس اللمة الحلوة دي. على فكرة الناس الما عرفوني أنا ندى بنت عابدين جماع و أمي عاتقة جماع و أخوي خالد سيكا .