ديوان جديد للشاعر المكاشفي محمد بخيت : خبر ونص

سرج النجوم

طرنا من بعدك جناحنا يلاوى قرضمةْ المدن
ما بنفع العشق المودر فى رمال داسة السموم
وينا وين من وردة راميها الزمن
مرسومة فى باب القدوم
يابلد يحلم عشانا...ونحن نتكوم ننوم
والبنية سحابة فكت ريقا من باقى الغيوم
مرة كانت كلمة تصبر فى القيامات يوم تقوم
يوم نجيها النهر يسكت تبلع الكلمة الدموم
يومى فى الأسواق تهضرب واقعة من سرج النجوم
يا بلد زيد فى سواحلك كان تتم فرحتنا يوم
رشت المدن التحية و يغشى ماضينا النعاس
كان طلعنا الضل يسارق انعكاسات الحواس
تفلق النجمة العصاية وتدلق الموجة الحماس
يابلد دافر مكانك فاضى قدام الخلاص
ما انتظرناك حلم يفضل فى العيون البحلقت
ما اعتبرناك فى أيادى تلم معانى اتمحقت
ما طلبناك إلا تسمع من قلوب اتفرقت
وماعشقناك إلا إنك شَمس فينا اتعلقت
عدها الأيام معانا وسدها الأبواب عموم
وأقرا من حلم البنية البين أصابعنا بيحوم
قاعدة فوق طشت الأغانى بتغسل الليل والهدوم
وين تشر أحلاما تَبْرُدْ نار متاعب ولعت
يابلد رجع ملامح لى وجوه اتبدلت
وأرجع مكانك فاضى قدام الخلاص