ديوان جديد للشاعر المكاشفي محمد بخيت : خبر ونص

مساء وضحى....وبواقى الكلام

مسيتى مساك ..
قمرك نضام...نجماتك صُمْ
والحلم الصاحى تلوت الليل
سهلة وصلصال ..وجبالا شُمْ
حوام من عين لى ايد..لى جهة
الشمس تبارى مدار..الظُلم..
وكأنك يوم ما تما ..ظهيرة
الضحى من قعدة حيطتو المايلة
بتبدا حكاية صح كضابة
لا بتبكيك العين البيضا ولا ..هتان منديلو سحابة..
ولا بتشكيك ..للقاضى ..نسايم
راكبة خيول الرحلة الخابة..
خرطوم مين الجاية تزحزح
بى أعصاب سايقاها رتابة
وبى أنخاب الدم الفاير..
وبى المافيش المالى جرابا
ترتب شوق جية عصفورا
تتلب من فوق عشو كلابا....
..ويا معروشة ..كما الكلمات..
تترصا وتحجب ضو الصوت..
مغشوشة دروبك ..أتر البوت
مقروشة قلوبك بين فكين..
من جبة لى حبة ..لى سوق..الدين
شدرات نتذكر..كانت حفرة وموية وبذره
وقلب وعين
كانت كراس وسطور حابسات دمعة وشمعة
ورحلة تكوين...
تتفرجى وين ؟..مسرح يوم داك...
شد الخشبات ..وستارتو اتقفلت
بين مشهد تقليب التربة ..وبين..
عصيان الغصن لأمر النقل لخانة ثمرة..
حوارك تم انقطعت صلة الروح بالجمرة
ولحظة بلحظة...
وسدة بى سدة..
..وقلب المسرح هوبة ردة..وضفروا حوار
السعف الشاهد..
انو زمان الأخضر ...أخضر ...
وفى درجاتو العليا ...أماكن ...
كافية لى ضل الشمس الأكبر...
..ولسه البت تسرق من لونا..
تزيد من لون ما فينا وفينا..
قدر مساحة ضو يكفينا...
وقدر مناحة الحزن العالق..
بين أبواب المطرة وبينا..
تشيل يا برق ..وتدى أغانى...
..مطالع تبدا من البوابة..
لسان الطير...الطبل الناتل من
سافنا الذكرى الدقة
من شلال النهر الحايم
بين الموج وكفوف السقا..
..تلم الصحرا ..هدوم الغابة
وتغسلا بالأبيض والزرعى..
لا تيار الصدفة...يواتى...
ولا مسدار المرحلة فرعى..
وانتى وراك نهرات الراعى
تملصى روحك تجرى وترعى
..عقاب المرعى
طرف جيران البيت السبعة
سؤال فى قرعة..
ولا ..مشوار الحزن اللافح..
يدى جواب بى مهلة وسرعة..
بنية مين ؟...تشرد من مطلع
وتركز نية فى آخر الصف ..
ما الباب..
الحارس..
والمحروس ..
وبضاعة ريد فى أول رف
السوق غناى ..حاضر أتمان..
والشوق حوام من صف لى صف..
حتغردى وين ؟..
سربك محبوس فى قمقم جنو عليك عاقل..
لا..مارد بصحى قبل عينيك ..لا خاتم.ضايع..لا راجل
حتشردى وين ؟.طفل الأيام ..
الشارد فى خاطرك ...موجود
والجاييى ...عليك ... نازح... راحل...

وانفتح الباب... وردة عتبات...
الخطوة ... صهيل الحرف ...عنيد...
اللمسة نزوح ... الجية نشيد
لا بتبقى بلاك..صورة يوم داك ..
لا درب المشية معاك ساهل...
مسيتى مساك...
مساكى صباح...والضحى بالليل ..زمناً ماهل.....
الحلم مدفن ..فى رملة..
أبحتى بى ايد..ما اتمدت ليك
أبحتى بى شوق ما ساكن فيك..
شارعنا مبارى لهب فانوس
عامود النور ما كفا ..وشيك..
شجن العصفور ..تشكيل القوس
أهو داك الحلم ...نسى النايمين..
يا فتحى عين أو غمضى عين..
...أو تمى ...مع المابيكى مشيك