لاتعديل -بل الغاء لقانون النظام العام

Quote: ولايمكن انك تتطبق قانون من غير معيار اذا فرضنا جدلا وسلمنا بانه يكون فى قانون يحدد ماذا نلبس ؟؟ وكيف نتحدث ؟؟ وكيف تبتسم ؟؟ ومع من تجلس ؟؟؟

تعرفي أمس كنا بنتناقش في موضوع قريب من كده ، أنا قطع شكّ ما بتدعي تفقّه في الدين ولا كده ، لاكين ربنا ما كان غالبو ينزّل في القرآن الكريم ده كل التفاصيل المتعلقة بي حياتنا اليومية زي الكلام الفي الإقتباس ده.

بس جزء من حكمة وجودنا زاته كبشر إننا نستخدم الميزة الميزّنا بيها ربنا من سائر مخلوقاتو ن ميزة العقل .

يعني في ظني إنو ربنا ختّ لينا الخطوط العريضة والملامح العامة ، وباقي التفاصيل خلاها لي رؤيتنا حسب تفكيرنا .. عشان نشغل عقلنا ده .

ده من وجهة نظر إسلامية طبعا ، وأكيد كل زول عندو تفسيرو حسب مايعتقد.

الداير أصل ليهو إنو المسئولية في الدين فردية ، والنظام فردي ، ما عام !

كل نفس بما كسبت رهينة ، وكل شاة معلقة من عرقوبة ، بالتالي بي ياتو حق تجي جهة ما تحاول تعمم المسألة دي !؟

يوم القيامة بحاسبو كل زول براااااااهو مش صاح!؟

يعني البيضمني شنو شكل اللبس ، ولا السلوك ، وغيرها من الحاجات الواردة في قانون النظام العام دي، البيضمني شنو إنو هي البتتطلعني ناجح في الإمتحان الكبير الرهيب بتاع الآخرة داك !؟

لك الله يا وطني.